Category کرکٹ

دبئی: (سپورٹس ڈیسک/ایمرا نیوز) انٹر نیشنل کرکٹ کونسل کھیل کو مقبول عام اور زیادہ منافع بخش بنانے کی کوشش میں ٹی ٹوئنٹی کی دنیا بھر میں حوصلہ افزائی کررہی ہے لیکن عالمی تنظیم نے یہ بات فراموش کردی کہ اس طرح روایتی ٹیسٹ کرکٹ کو ناقابل تلافی نقصان پہنچ سکتا ہے۔ مختلف بورڈ کی ٹی 20 لیگز کا طوفان اس قدر شدت اختیار کرگیا ہے کہ اب آئی سی سی کے کرتا دھرتا اور ایم سی سی ٹیسٹ کرکٹ کی بقا اور اس سے دلچسپ بنانے کیلئے جتن کررہے ہیں۔ ڈے اینڈ نائٹ ٹیسٹ کے کامیاب تجربے کے بعد اب ٹاس کو ختم کیے جانے کی باتیں ہورہی ہیں۔ ممبئی میں رواں ماہ کے آخر میں آئی سی سی کرکٹ کمیٹی کے اجلاس میں یہ تجویز ایجنڈے پر شامل ہے کہ ٹاس ختم کرکے مہمان ٹیم کو بیٹنگ کا فیلڈنگ کے فیصلے کا حق دیا جائے۔ یہ تجربہ انگلینڈ میں کائونٹی چیمپئن شپ میں 2016سے جاری ہے۔ منظوری کے بعد قانون کا اطلاق عالمی ٹیسٹ چیمپئن شپ سے ہوسکتا ہے، جس میں نوٹیمیں دو سالہ سائیکل میں ایک ٹرافی کے لئے 27سیریز کھیلیں گی۔کرکٹ ماہرین کاکہنا ہے کہ میزبان بورڈ ایسی پچزتیارکرتاہے۔جس میں ٹاس کاسکہ غیر معمولی اہمیت اختیارکرجاتاہے۔اوراکثرٹاس جیتنے والی ٹیم میچ بھی جیت جاتی ہے۔ یہ خیال کافی عرصے سے کرکٹ حلقوں میں موضوع بحث ہے۔ اس کے سب سے بڑے حامی سابق آسٹریلین کو ڈیرن لی مین تھے۔ مبصرین کا

کہنا ہے کہ ٹاس ختم کیے جانے ہوم ٹیم کو حاصل غیرضروری ایڈوانٹیج بھی ختم ہوجائے گا۔ دیکھا گیا کہ میزبان ٹیم میچز کیلئے اپنی پسند کی وکٹ بناتی ہے اس طرح میچ کا توازن بگڑتا ہے۔ کئی سابق ٹیسٹ کرکٹرز اس تجوزیر کے حامی ہیں۔ دوسری جانب سابق بھارتی کپتان انیل کمبلے کی سربراہی میں کام کرنے والی کرکٹ کمیٹی کے سامنے اہم ترین ٹاسک بھارت کو ڈے اینڈ نائٹ ٹیسٹ میچز کیلئے راضی کرنا ہوگا۔ اس کے لئے آئی سی سی کا ورکنگ گروپ بھارتی کرکٹ بورڈ کے ٹاپ آفیشلز سے ملے گا، ایجنڈے میں کرکٹ سے متعلق نئے چیلنجز سمیت اس بات پر رائے لی جائے گی کہ ٹیسٹ کرکٹ میں شائقین کی دلچسپی واپس کیسے لائی جائے۔ بھارتی بورڈ نے حال ہی میں آسٹریلیا کےخلاف پنک بال ٹیسٹ کھیلنے سے انکار کردیا تھا۔ تاہم اب شاید اس کیلیے یہ ناممکن بنادیا جائے کیونکہ 2019ایشز سے شروع ہونے والی ٹیسٹ چیمپئن شپ کیلیے ڈے اینڈ نائٹ میچز ہی واحد آپشن ہوسکتے ہیں۔ اس چھتری تلے ہونے والی سیریز میں دن یا ڈے اینڈ نائٹ ٹیسٹ سے متعلق فیصلے کا اختیار میزبان ملک کو سونپ دیا جائے گا۔ تاہم اگر میزبان ملک ایک سے زیادہ ڈے اینڈ ٹیسٹ کھیلنے کا خواہاں ہوا تو مہمان ٹیم کی مرضی معلوم کی جائے گی۔ چیمپئن شپ کا فائنل خیال ہے کہ 10جون 2012 سے متوقع اور ممکنہ طور پر انگلینڈ میں کھیلا جائے گا۔ کرکٹ کمیٹی اس چیمپئن شپ کی پلیئنگ کنڈیشن پر غور کرے گی۔ سفارشات مرتب ہونے کے بعد ڈبلن میں آئندہ ماہ چیف ایگزیکٹوز کمیٹی کے سالانہ اجلاس میں ان پر تفصیلی بحث کی جائے گی۔ کرکٹ کمیٹی اس بات کا جائزہ بھی لے گی چیمپئن شپ میں پوائنٹس کیا میچ یا میچ اور سیریز دونوں کے نتائج کی بنیاد پر دیے جائیں۔ فیلڈ میں کھلاڑیوں کا رویہ اور سلو اوور ریٹ پر سزائوں کو بھی بحث کا حصہ بنایا جائیگا۔

کراچی: (سپورٹس ڈیسک/ایمرا نیوز) آئندہ سال ورلڈ کپ سے قبل پاکستانی ٹیم انتظامیہ کرکٹرز کو فٹ رکھنے کے لئے ایک مربوط پروگرام پر کام کررہی ہیں تاہم اس وقت بھی لیگ اسپنر یاسر شاہ، فاسٹ بولر رومان رئیس اور آل رائونڈر عماد وسیم زخمی کھلاڑیوں کی فہرست میں شامل ہیں۔ رومان رئیس اور عما وسیم کی انجری پیش رفت زیادہ حوصلہ افزا نہیں ہے۔ دونوں کی آئندہ ماہ اسکاٹ لینڈ کے خلاف دو میچوں کی ٹی 20 سیریز میں شرکت کا امکان نہیں ہے۔ سلیکٹرز زمبابوے کی سیریز کے لئے25 کھلاڑیوں کی فہرست کو حتمی شکل دے رہے ہیں انہیں بھی دونوں کی حتمی فٹنس رپورٹ کا انتظار ہے۔ حددرجہ مصدقہ ذرائع کا کہنا ہے کہ سینٹرل کنٹریکٹ یافتہ رومان رئیس اور عماد وسیم اپنے طور پر علاج کرارہے ہیں۔ عماد بیرون ملک جاچکے ہیں۔ رومان کا پی سی بی کے ڈاکٹروں سے کوئی رابطہ نہیں ہے۔ وہ اپنے ڈپارٹمنٹ یو بی ایل کے ڈاکٹر کے پاس زیر علاج ہیں۔ شاید یہ فیشن بن گیا ہے کہ انتہائی کوالیفائیڈ ڈاکٹرز پر مشتمل پاکستان کرکٹ بورڈ کے میڈیکل پینل کی موجودگی

میں پاکستان کرکٹ ٹیم کے اکثر کھلاڑی اپنے طور پر بیرون ملک علاج کرارہے ہیں جس سے کئی اسٹار کرکٹرز کو فٹ بنانے والے پی سی بی میڈیکل پینل کی ساکھ پر سوالات اٹھ رہے ہیں۔ حددرجہ مصدقہ ذرائع کا کہنا ہے کہ کئی پاکستانی کرکٹرز حالیہ مہینوں میں ان فٹ ہونے کے بعد لندن گئے جہاں انہوں نے معروف فٹ بال کلب کرسٹل پیلس سے وابستہ پاکستانی ڈاکٹر ظفر سے اپنا علاج کرایا۔ حیران کن طور پر حالیہ انگلش فٹ بال سیزن کے دوران کرسٹل پیلس کے فٹ بالر بھی انجری لسٹ میں شامل ہیں۔ اسپورٹس میڈیسن کے کوالیفائیڈ ڈاکٹر ظفر دو سال قبل پاکستانی ڈومیسٹک سرکٹ میں دکھائی دیے۔ پھر پاکستان سپر لیگ کے دوران ان کی خدمات پشاور زلمی نے حاصل کی۔ انہوں نے سب سے پہلے عمر امین کی گروئن کا علاج کیا پھر محمد حفیظ ان سے استفادہ کیا۔ اس طرح وہ پاکستانی کرکٹرز میں مقبول ہوگئے۔ اب عماد وسیم اپنے گھٹنے کا علاج کرانے انگلینڈ میں ہیں۔ ٹیسٹ اوپنر شان مسعود ان سے اپنے گھٹنے کا علاج کراکر واپس آئے ہیں۔ کھلاڑیوں کے اس عمل سے پاکستان کرکٹ بورڈ کے سینئر اور کوالی فائیڈ ڈاکٹروں کی ساکھ پر سوال اٹھ رہا ہے۔ پی سی بی میڈیکل پینل اس وقت لیگ اسپنر یاسر شاہ کو فٹ بنانے کی کوشش کررہا ہے۔ گذشتہ سال سری لنکا کی ٹیسٹ سیریز کے بعد اسٹار بیٹسمین اظہر علی بھی ڈاکٹر ظفر کے پاس زیر علاج رہے۔ وہ گھٹنے کی تکلیف سے نجات حاصل کرچکے ہیں لیکن آئر لینڈ اور انگلینڈ میں بولنگ نہیں کرائیں گے۔ فاسٹ رومان رئیس کراچی میں ہیں اور ابھی تک گھٹنے کی انجری سے لڑ رہے ہیں۔ عماد وسیم لندن میں ری ہیبلی ٹیشن کرارہے ہیں لیکن دونوں کی فوری طور پر فٹنس کا کوئی امکان نہیں ہے۔ اگر دونوں فٹ قرار دے بھی دیے گئے تو انہیں پاکستانی ٹیم میں آنے کےلئے فٹنس ٹیسٹ دینا ہوگا۔ ذرائع کا کہنا ہے کہ پاکستانی میڈیکل پینل کو نظر انداز کرکے کچھ کھلاڑی بورڈ افسران کی اجازت سے بیرون ملک علاج کرالیتے ہیں۔ سوال یہ پیدا ہوتا ہے کہ اگر کرکٹرز بیرون ملک غیر ملکی ڈاکٹروں سے علاج کرائیں گے تو پی سی بی میڈیکل پینل کی کیا اہمیت رہ جائے گی۔ میڈیکل پینل کے سربراہ ڈاکٹر سہیل سلیم اور قومی ٹیم کے ساتھ کئی ممالک کے دورے کرچکے ہیں۔ ڈاکٹر ریاض احمد ریزیڈنٹ اسپورٹس فزیشن ہیں۔ جنوبی افریقا سے تعلق رکھنے والے کلف ڈی کون نے ڈبلن ٹیسٹ کے تیسرے دن ان فٹ ہونے والے محمد عامر کو فٹ کرنے میں اہم کردار ادا کیا تھا۔ وہ اچھی ساکھ کے حامل فزیو ہیں۔

لاہور: (سپورٹس ڈیسک/ایمرا نیوز) سابق کپتان آصف اقبال کا کہنا ہے کہ سینئر بیٹسمین ناکامیوں سے سنبھل کر انگلینڈ کیخلاف اچھا پرفارم کریں گے۔

سابق کپتان آصف اقبال کا کہنا ہے کہ اظہر علی گرچہ ٹور میچز اور آئرلینڈ کیخلاف ٹیسٹ میں بڑی اننگز کھیلنے میں ناکام رہے لیکن ان میں صلاحیتیں اور کلاس موجود ہے،ایک انٹرویو میں انھوں نے کہا کہ سب کو اظہر علی کی کارکردگی کھٹک رہی ہوگی، میرا یہ خیال ہے کہ وہ بڑے میچ کے کھلاڑی ہیں،پوری امید ہے کہ انگلینڈ میں ٹیم کیلیے بڑا اسکور کرنے میں کامیاب ہوں گے، اسد شفیق نے بھی آئرلینڈ کیخلاف ٹیسٹ کی پہلی اننگز میں اچھی بیٹنگ کی، بطور سینئر وہ بیٹنگ کا بوجھ بانٹ سکتے ہیں۔

آصف اقبال نے کہاکہ کبھی کہا جاتا تھا کہ عمران خان اور جاوید میانداد کے متبادل کہاں سے آئیں گے، بعد ازاں یہ خلاپر ہوگیا، مصباح الحق اور یونس خان کے متبادل بھی ضرور مل جائیں گے لیکن نئے ٹیلنٹ کو تھوڑا وقت دیناپڑے گا، ظہیر عباس نے طویل عرصہ تک ملک کی نمائندگی کرتے ہوئے بہترین کارکردگی دکھائی، انھیں بھی انٹرنیشنل کرکٹ میں قدم جمانے کیلیے مواقع دینا پڑے تھے،پاکستانی کھلاڑیوں کو ہوم سیریز نہیں ملتیں، اس کے باوجود باصلاحیت کرکٹرز سامنے آجاتے ہیں۔
سابق کپتان کے فٹنس مسائل ہوئے تو شاداب خان میسر آگئے،نوجوان لیگ سپنر کا تجربہ شاید کم ہو،صلاحیتیں سینئربولر سے شاید زیادہ ہی ہونگی،موسم سازگار ہوا تو انگلینڈ میں بھی میزبان ٹیم کیلیے مشکلات پیدا کریں گے۔

ایک سوال پرآصف اقبال نے کہا کہ کھلاڑیوں سے ملاقات ہوئی ہے، پاکستان ٹیم کا ماحول شاندار ہے،سب ایک دوسرے اورکپتان کی عزت کرتے ہیں، دوستانہ ماحول کا کریڈٹ کپتان سرفراز احمد اور منیجمنٹ کو جاتا ہے، میرے خیال میں ناتجربے کار ہونے کے باوجود قومی کرکٹرز انگلش چیلنج کیلیے تیار ہیں۔

ڈبلن (سپورٹس ڈیسک/ایمرا نیوز) پاکستان کرکٹ کی نئی نوجوان بریگیڈ نے مضبوط اعصاب کا ثبوت دیتے ہوئے انہونی کو ٹال دیا۔ آئرلینڈ کے خلاف اولین ٹیسٹ میں گرین کیپس نے پانچ وکٹ سے کامیابی حاصل کی۔ امام الحق نے ناقابل شکست 74رنز اسکور کیے۔ بابر اعظم نے بھی ففٹی اسکور کی۔ فاسٹ بولر محمد عباس نے مجموعی طور پر 9کھلاڑیوں کو آؤٹ کیا۔ میزبان ٹیم نے پاکستان کو 160رنز کا ہدف دیا تھا۔ پاکستانی بولرز کے خلاف دونوں اننگز میں مزاحمت کرنے والے کیون اوبرائن میچ کے بہترین کھلاڑی قرار پائے۔ انہوں نے پہلی اننگز میں40 اور دوسری میں118رنز بنائے۔ میچ کے پانچویں روز آئرلینڈ نے 7وکٹوں کے نقصان پر 319رنز سے اپنی دوسری اننگز شروع کی لیکن اس کے آخری تینوں کھلاڑی محض 20 رنز کا اضافہ کرسکے اور پوری ٹیم 339 رنز بنا کر پویلین لوٹ گئی۔ ہدف کے تعاقب میں پاکستان کا آغاز بھیانک تھا۔ تین وکٹیں صرف 14رنز پر گرگئیں۔ اظہر علی 2، حارث سہیل 7 اور اسد شفیق صرف ایک رن بناکر پویلین لوٹ گئے۔ تاہم بابر اعظم اور امام الحق نے126 رنز کی شراکت قائم کرکے جیت کی بنیاد رکھی۔ بابر اعظم140کے

مجموعی اسکور پر 59رنز بناکر رن آؤٹ ہوگئے۔ کپتان سرفراز دو چوکوں کی مدد سے آٹھ رنز بنا کر ایل بی ڈبلیو ہوئے۔ سرفراز کے بعد شاداب خان کریز پر آئے اور میچ کو منطقی انجام تک پہنچایا۔ لیفٹ آرم بیٹسمین امام الحق 74 اور شاداب خان 4 رنز بناکر ناٹ آؤٹ رہے۔ ٹم مرٹاغ نے دو جبکہ رینکن اور تھامپسن نے ایک ایک وکٹ لی۔ خیال رہے کہ پاکستان نے پہلی اننگز میں 310رنز بنائے، جواب میں آئرش ٹیم 130 رنز بناکر فالو آن کا شکار ہوئی اور دوسری بیٹنگ میں 339رنز اسکور کیے۔ دریں اثنا پاکستانی کرکٹ ٹیم کے کپتان سرفراز احمد نے کہا ہے کہ آئر لینڈ کو ہرانے کے بعد اب ہماری نظریں انگلینڈ کے خلاف لارڈز ٹیسٹ پر ہیں۔ پاکستانی ٹیم اس چیلنج پر پورا اترنے کے لئے تیار ہے۔ کوشش کریں گے کہ توقعات پورا کریں۔ ڈبلن ٹیسٹ کی دوسری اننگز میں کنڈیشن بیٹنگ کے لئے سازگار نہیں تھیں۔ لیکن صورتحال کے مطابق امام الحق اور بابر اعظم نے بہت اچھی بیٹنگ کی۔منگل کو میچ کے بعد سرفراز احمد نے اعتراف کیا کہ دوسری اننگز میں تین وکٹ گرنے کے بعد ہمیں تشو یش لاحق تھی۔ پورا کریڈٹ امام الحق اور بابر اعظم کو جاتا ہے۔ انہوں نے کہا کہ سری لنکا کے خلاف136 رنز کے ہدف کے تعاقب میں ہم ٹیسٹ ہار گئے تھے۔ آئرلینڈ فالو آن کراتے ہوئے ہمارے ذہن میں سوالات تھے لیکن ہمیں امید تھی کہ نوجوان ٹیم کو جو بھی ہدف ملا اسے حاصل کرلیں گے۔لیکن تین وکٹ گرنے پر گھبرائے ہوئے تھے۔ انگلینڈ کے خلاف اظہر علی اور اسد شفیق سے بڑی امید وابستہ ہیں۔ ادھر آئرلینڈ کے کپتان ولیم پورٹ فیلڈ نے کہا کہ اگر دو سو رنز کا ہدف ہوتا تو ہم مزید قریب آسکتے تھے ۔

ڈبلن: (سپورٹس ڈیسک/ایمرا نیوز) آئرلینڈ نے اپنے اولین ٹیسٹ میں ہی ثابت کردیا کہ وہ ٹیسٹ اسٹیٹس کی حقدار تھی۔ میزبان بیٹسمینوں نے مشکل حالات میں شاندار مزاحمت کرتے ہوئے پاکستانی بولرز کو بے بس کردیا۔ فالو آن کے بعد دوسری اننگز میں 7 وکٹوں کے نقصان پر 319رنز بناکر 139رنز کی برتری حاصل کرلی ہے۔ ٹیسٹ میچ دلچسپ مرحلے میں داخل ہوگیا ہے۔ پانچویں روز بارش کی بھی پیش گوئی ہے اور اگر ایسا ہوا تو میچ ڈرا ہوسکتا ہے۔ چوتھے دن کا کھیل ختم ہوا کیون اوبرائن 118اور ٹائیرون کین 8رنز بناکر وکٹ پر موجود تھے۔ اوبرائن نے ڈیبیو ٹیسٹ میں تھری فیگراننگز کھیلی۔ پاکستانی بولرز تمام ترکوشش کے بعد چوتھے دن آئرلینڈ کو آل آؤٹ نہ کرسکے۔ اس سے قبل میزبان ٹیم نے بغیر کسی نقصان کے 64رنز سے کھیل کے چوتھے روز کا آغاز کیا تو ایڈ جوائس 39اور پورٹر فیلڈ 23رنز کے ساتھ وکٹ پر موجود تھے۔ ایڈ جوائس43 رنز بنا کر رن آؤٹ ہوگئے، نئے بیٹسمین اینڈی بالبرنی بغیر کوئی رنز بنائے آؤٹ ہوئے۔ نیل اوبرائن بھی 18 رنز بناسکے انہیں محمد عامر نے بولڈ کیا۔ کپتان ولیم

پورٹرفیلڈ32 رنز بنا کر ہمت ہار گئے انہیں محمد عامر نے میدان بدر کیا۔ کیون اوبرائن اور اسٹیورٹ تھامپسن نے ذمہ دارانہ بیٹنگ کی اور ساتویں وکٹ کی شراکت میں 114 رنز کا اضافہ کیا۔ تھامپسن 53 رنز بناکر آؤٹ ہوگئے تاہم کیون اوبرائن اپنی سنچری مکمل کی اور ٹیسٹ کرکٹ میں سنچری اسکور کرنے والے پہلے آئرش بیٹسمین ہونے کا اعزاز حاصل کرلیا۔ محمد عامر نے 3 ،محمد عباس نے 2 اور شاداب خان نے ایک وکٹ حاصل کی۔یاد رہے کہ پاکستان نے اپنی پہلی اننگز 9 وکٹوں کے نقصان پر 310 رنز بنا کر ڈکلیئر کر دی تھی جس کے جواب میں آئرلینڈ کی پوری ٹیم پہلی اننگز میں 130 رنز بناسکی۔

لاہور(سپورٹس ڈیسک/ ایمرا نیوز)پاکستان سپر لیگ میں شامل لاہور قلندرز کی ٹیم یونٹ کے کسی بھی ایڈیشن میں متاثر کن کارکردگی دکھانے میں ناکام رہی لیکن فرنچائز کے چیرمین فواد رانا نے آف اینڈ آن کرکٹ سے محبت اور پاکستانیوں کے لئے کرکٹ میں خدمات کے اعتراف پر پرائیڈ آف لاہور کا اعزاز اپنے نام کرلیا ہے ۔تفصیلات کے مطابق لاہور چیمبر آف کانفرنس میں فواد رانا کو اس اعزاز سے نوازا گیا ۔

دہلی (سپورٹس ڈیسک/ ایمرا نیوز) آئی پی ایل میں دہلی ڈیئر ڈیولز کی ٹیم پلے آف سے باہر ہو چکی لیکن کھلاڑیوں سے باہر ابھی مصروفیات برقرار ہیں ۔گزشتہ روز دہلی کے فاسٹ باﺅلر ٹرینٹ بولٹ گلوکار بن گئے ۔انہوں نے گزشتہ گانے گاتے ہوئے نظر آرہے ہیں ۔ٹورنامنٹ میں دہلی کی کارکردگی بدترین رہی ہے لیکن گراﺅنڈ کے باہر کھلاڑیوں کی مصروفیات جوشو خروش سے جارہی ہیں ۔فاسٹ باﺅلر کی ایونٹ میںکارکردگی بہترین رہی ہے جس میں انہوں نے 12 میچوں میں 15وکٹیں حاصل کر رکھیں ہیں۔

ڈبلن (ایمرا نیوز) پاکستان کے خلاف تاریخی ٹیسٹ میچ میں فالو آن کا شکار ہونے کے بعد آئرش بیٹسمین یکایک بیدار ہوگئے۔ 180 رنز کے خسارے میں دوسری اننگز شروع کرنے والے اوپنرز نے خلاف توقع پاکستانی بولرز کے تمام حربےناکام بنادیے، تیسرے دن جب کھیل ختم ہوا تو فالوآن کے بعد آئرلینڈ نے کسی نقصان کے بغیر اسکور بورڈ 64 رنز کا ہندسہ جمادیا تھا۔ ایڈجوائس 39 اور کپتان ولیم پورٹر فیلڈ 23 رنز بنا کر کریز پر موجود ہیں۔ اسے اننگز کی شکست ٹالنے کیلئے مزید 116رنز کی ضرورت ہے۔ قبل ازیں میچ کے تیسرے روز پاکستان نے 9 وکٹوں کے نقصان پر 310 رنز بنانے کے بعد پہلی اننگز ڈکلیئر کر دی تھی جس کے جواب میں آئرلینڈ کی پوری ٹیم 48 ویں اوور میں 130 رنز پر ڈھیر ہو گئی۔ پاکستان نے 16 برس بعد کسی ٹیم کو فالو آن کرنے کے بعد دوبارہ بیٹنگ کی دعوت دی۔ پاکستان نے آخری مرتبہ 2002 میں لاہور میں انضمام الحق کی قیادت میں نیوزی لینڈ کو فالو آن کرایا تھا۔میزبان ٹیم کا ٹیسٹ کرکٹ میں پہلی اننگز کا آغاز ڈراؤنا خواب ثابت ہوا۔ محمد عباس اور محمد عامر نے زبردست سیم اور سوئنگ بولنگ سے آئرش بیٹسمینوں کو دہلا کر رکھ دیا۔ سات رنز پر اس کے چار کھلاڑی پویلین لوٹ چکے تھے جبکہ ایک موقع پر 73 رنز پر 8 وکٹیں گرنے کے بعد آئرلینڈ کی سنچری بھی مکمل ہوتی نظر نہیں آ رہی تھی

لیکن ٹیل اینڈرز پاکستانی بولرز کے خلاف ڈٹ گئے۔ گیری ولسن نے بوائڈ رینکن کے ساتھ مل کر ٹیم کی سنچری مکمل کرائی اور اننگز کی سب سے بڑی 34رنز کی شراکت قائم کی لیکن عباس نے رینکن کو آؤٹ کر کے اس مزاحمت کا خاتمہ کردیا۔پاکستان کو آخری وکٹ کے حصول کے لیے کچھ انتظار کرنا پڑا اور ولسن نے ٹم مرٹاغ کے ساتھ مزید 23رنز جوڑ کر اسکور 130 تک پہنچا دیا ۔ شاداب نے مرٹاغ کو پویلین رخصت کر کے آئرش ٹیم کی اننگز کا بھی خاتمہ کردیا، ولسن ناقابل شکست 33 رنز کے ساتھ ٹیم کے دوسرے کامیاب بیٹسمین رہے۔ آئرلینڈ کو 180 رنز کے خسارے کے سبب فالو آن کا سامنا کرنا پڑا۔ پاکستان کی جانب سے محمد عباس نے 4، شاداب خان نے 3، محمد عامر نے دو اور فہیم اشرف نے ایک وکٹ حاصل کی۔ قبل ازیں پاکستان نے ٹیسٹ کے تیسرے روز 6 وکٹوں کے نقصان پر 268 رنز سے کھیل کا آغاز کیا تو 8 رنز کے اضافے کے بعد شاداب خان 55 رنز بناکر آؤٹ ہوئے۔ قومی ٹیم کو آٹھویں وکٹ کا خسارہ فہیم اشرف کی صورت میں ہوا جو 83 رنز بناکر پویلین لوٹے جس کے بعد 306 کے مجموعی اسکور پر محمد عامر بھی 13 رنز بنانے کے بعد کیچ تھما بیٹھے۔

ڈبلن: ( سپورٹس ڈیسک/ایمرا نیوز ) آئرلینڈ اور پاکستان کے خلاف واحد ٹیسٹ کے افتتاحی روز خراب موسم کے سبب ایک گیند بھی نہ پھینکی جاسکی۔ ڈیبیو کے منتظر میزبان کرکٹرز برسات میں بھی پیاسے رہ گئے۔ لیکن اس کے ساتھ ہی تاریخ بھی رقم ہوگئی۔ دراصل 1877 سے لے کر 11 مئی 2108 تک کبھی ایسا نہیں ہوا تھا کہ کسی ملک کے اولین ٹیسٹ میچ کا پہلا دن ضائع ہوگیا ہو۔ امپائرز نے دن میں کئی بار پچ اور گرائونڈ کا معائنہ کیا لیکن کھیل شروع ہونا ممکن نہیں تھا۔ دن میں بارش میں تو بہت تیز نہ تھی لیکن 50 کلومیٹر فی گھنٹہ کی رفتار سے چلنے والی ہوا نے مسائل پیدا کیے۔ گرائونڈ اسٹاف کیلیے پچ کورز کو اپنی جگہ پر برقرار رکھنے میں سخت مشکل پیش آئی۔ یہ میچ اب چار روز پر مشتمل ہوگا جس میں فالو آن کا مارجن 150 رنز ہوگا۔ ڈبلن میں جمعہ سے شروع ہونے والے تاریخی ٹیسٹ کا پہلا دن بارش کی نذر ہوگیا۔ میچ پاکستانی وقت کے مطابق سہہ پہر 3 بجے شروع ہونا تھا تاہم میچ سے قبل ہی بارش شروع ہوگئی جس کے باعث ٹاس بھی نہ ہوسکا۔ اس دوران امپائرز کئی مرتبہ معائنے لیے آئے لیکن خراب موسم اور

تیز بارش کے سبب انہیں مایوس واپس لوٹنا پڑا۔ اس دوران گراؤنڈ اسٹاف آؤٹ فیلڈ سکھانے اور میچ جلد شروع کرانے کے لیے کوشاں رہے۔ لنچ کے بعد امپائرز نے مقامی وقت کے مطابق دوپہر تین بجے میدان میں جمع پانی کو دیکھتے ہوئے دونوں ٹیموں کے قائدین کی باہمی مشاورت سے میچ کے پہلے دن کا کھیل ختم کرنے کا اعلان کردیا۔میچ کے دوسرے دن 98 اوورز کا کھیل ہوگا۔ یاد رہے کہ محکمہ موسمیات نے 14 مئی تک بارش کی پیشگوئی کر رکھی ہے۔ پاکستان نے میچ سے ایک دن قبل ہی اپنی فائنل الیون کا اعلان کردیا تھا اور پاکستان کی جانب سے امام الحق اور فہیم اشرف کو ڈیبیو کرایا جائے گا۔ ٹیم ان کھلاڑیوں پر مشتمل ہے۔سرفراز احمد(کپتان)، اظہر علی، امام الحق، حارث سہیل، اسد شفیق، بابر اعظم، شاداب خان، فہیم اشرف، محمد عامر، محمد عباس اور راحت علی۔ جبکہ آئرش پلیئنگ الیون ولیم پورٹرفیلڈ (کپتان) اینڈریو بالبرنی، ایڈ جوائس، ٹائرون کین، اینڈریو میک برین، ٹم مرتاغ، کیون او برائن، نیل او برائن (وکٹ کیپر) بوائڈ رینکن، جیمز شینن، کریگ ینگ، پال اسٹرلنگ، اسٹورٹ تھامسن، گیری ولسن میں سے منتخب کی جائے گی۔2007 کے ورلڈ کپ کے میچ میں پاکستان کے خلاف غیر معمولی کامیابی کے بعد یہ پہلا موقع ہے کہ دونوں ٹیمیں مدمقابل ہوئی ہیں۔ پاکستانی ٹیم آئرلینڈ کو شکست دینے کے لیے پرعزم ہے۔ کپتان سرفراز احمد نے کہا ہے کہ آئرلینڈ کو آسان نہیں لیں گے اور تمام نوجوان کھلاڑی اپنی صلاحیتوں کے جوہر دکھائیں گے۔ دوسری جانب سابق کپتان وقار یونس کا کہنا ہے کہ ہوم کنڈیشنز میں آئرلینڈ کو ہرانا مشکل ہے، گیلی اور سبز کنڈیشنز پاکستان کےلیے آسان نہیں ہوں گی۔ پاکستان کی جانب سے آئرلینڈ کے خلاف 5 بولرز آزمائے جانے کا امکان ہے۔

کراچی: (سپورٹس ڈیسک/ایمرا نیوز) ویسٹ انڈیز کرکٹ بورڈ امریکا میں مجوزہ ٹرائنگولر سیریز کو شیڈول نہیں کر سکا جس کی وجہ سے پاکستانی کرکٹ ٹیم رواں برس امریکا میں کرکٹ نہیں کھیل سکے گی۔

ویسٹ انڈین ٹیم نے رواں برس پاکستان کا دورہ کیا تھا، جواب میں پاکستانی اسکواڈکو بھی ٹور کرنا تھا، اس دوران امریکا میں میچز کا منصوبہ تھا جس کی آمدنی میں سے پی سی بی کو بھی حصہ ملتا، سیریز کیلیے اگست کی تاریخیں رکھی گئی تھیں مگر اب مقابلوں کا امکان مکمل طور پر ختم ہوگیا ہے۔

ذرائع نے بتایا کہ ویسٹ انڈین کرکٹ بورڈ نے چند برس قبل لیگ کے حقوق ایک برطانوی کمپنی کو فروخت کر دیے تھے جو تمام انتظامات سنبھالتی ہے، سی پی ایل کاآغاز8 اگست کو ہونا ہے لیکن ویسٹ انڈین کرکٹ بورڈ نے کیریبیئن لیگ کے منتظمین سے درخواست کی تھی کہ وہ ایونٹ کو ایک ہفتے آگے بڑھا دیں مگر انھوں نے اتفاق نہ کیا،ان کا کہنا تھا کہ اس صورت میں غیرملکی پلیئرز کو بلانے میں مشکل ہوگی۔
پاکستانی ٹیم ان دنوں آئرلینڈ میں موجود ہے، وہاں سے اسے انگلینڈ اور اسکاٹ لینڈ بھی جانا ہے، دورے کا اختتام 13 جون کو ہوگا،اسی ماہ کی 28 تاریخ کو گرین شرٹس زمبابوے پہنچ جائیں گے جہاں آسٹریلیا اور میزبان سے ٹرائنگولر سیریز ہوگی، 13 جولائی سے پاکستانی ٹیم زمبابوے کے خلاف5 ون ڈے میچز کھیلے گی۔ دورے کا اختتام22 تاریخ کو ہونا ہے۔

مجوزہ شیڈول کے مطابق وہیں سے پاکستانی ٹیم کو امریکا پہنچ کر ویسٹ انڈیز سے میچز کھیلنے تھے، وہاں لوڈرہل،فلوریڈا اور ہیوسٹن میں بنگلہ دیش کی شمولیت سے ٹرائنگولر سیریز کاانعقاد بھی ہوتا،ڈبل لیگ کی بنیاد پر 4 میچز ایک اور3 دوسرے شہر میں ہوتے۔ ویسٹ انڈیز کرکٹ بورڈ مجوزہ ٹرائنگولر سیریز کو شیڈول نہیں کر سکا، جس کی وجہ سے پاکستانی کرکٹ ٹیم رواں برس امریکا میں کرکٹ نہیں کھیل سکے گی کیونکہ اگر اگست میں سیریز نہ ہو سکی تو پھر پاکستان ٹیم کے مصروف شیڈول سے وقت نکالنا ناممکن ہے، کیریبیئن لیگ کا اختتام16 ستمبر کو ہوگا، 13 تاریخ سے یو اے ای میں ایشیا کپ کا آغاز ہونا ہے۔

اکتوبر میں گرین کیپس کی آسٹریلیا اور نومبر، دسمبر میں نیوزی لینڈ سے سیریز ہوں گی،دسمبر کے تیسرے ہفتے میں ٹیم جنوبی افریقہ چلی جائے گی جہاں6 فروری2019 تک میچز کھیلے جائیں گے۔

واضح رہے کہ ویسٹ انڈین بورڈ نے تاحال بنگلہ دیش سے ہوم سیریز کا شیڈول بھی جاری نہیں کیا جسے جولائی، اگست میں وہاں کھیلنا ہے، بنگال ٹائیگرز 31 ممکنہ کھلاڑیوں کا اعلان کر چکے جو ان دنوں ٹریننگ کیمپ میں شریک ہیں۔

لوڈرہل میں ویسٹ انڈین ٹیم نے 2016میں بھارت سے2 ٹی ٹوئنٹی میچز کھیلے تھے، وہاں اس سے قبل مختصر طرز کے 4 میچزاور سی پی ایل کے مقابلے بھی ہو چکے، البتہ ہیوسٹن میں تاحال کوئی انٹرنیشنل میچ نہیں کھیلا گیا ہے۔