Category کرکٹ

کراچی: (سپورٹس ڈیسک/ایمرا نیوز) قومی ٹیم کی نمائندگی کے اہل نہ سمجھے جانے والے ٹیسٹ بیٹسمین فواد عالم بدھ کی شب انگلینڈ روانہ ہو گئے۔

فواد عالم لنکا شائر لیگ میں کلیتھروئے کرکٹ کلب کی نمائندگی کریں گے۔ فواد عالم نے روانگی سے قبل گفتگو میں کہا کہ میں مایوس نہیں اور اپنی کرکٹ جاری رکھنا چاہتا ہوں، انہوں نے کہا کہ انگلینڈ میں عمدہ کھیل سے ٹیم کے کام آنے کی خواہش ہے۔

کراچی: (سپورٹس ڈیسک/ایمرا نیوز) پاکستان کرکٹ بورڈ نےغیر ملکی لیگز کے حوالے سے نئی پالیسی کا اعلان کردیا ہے۔ ڈومیسٹک فرسٹ کلاس کرکٹ کے ڈھانچے میں18- 2017کے سیزن کی طرح کوئی تبدیلی نہیں کی جائے گی۔ پاکستان کرکٹ بورڈ نے سیزن کو پرکشش بنانے اور خامیوں کو دور کرنے کے لئے کئی اہم فیصلے کئے ہیں۔ کھلاڑیوں کی میچ فیس میں اضافہ کیا جارہا ہے گرائونڈز اور پچوں کی حالت میں بہتری لائی جائے گی ۔ میچوں کی تعداد کو کم کرکے کوالٹی کرکٹ پر زور دیا جائے گا۔ پی سی بی نے اپنی نگرانی میں کلب کرکٹ کو آئوٹ سورس کرنے کا بھی فیصلہ کیا ہے۔ ڈسٹرکٹ کے لئے ہر سیزن میں دو ٹورنامنٹ کرنا لازمی ہوگا۔ آئوٹ سورس کلب ٹورنامنٹ اس کے علاوہ ہوگا۔ فرسٹ کلاس ٹورنامنٹ میں8 ریجنل اور8 ڈپارٹمنٹل ٹیمیں شرکت کریں گی۔ قائد اعظم ٹرافی میں ریجن اور ڈپارٹمنٹ کی سولہ ٹیمیں شرکت کریں گی۔ قائد اعظم ٹرافی کی فاتح ٹیم فرسٹ کلاس ٹورنامنٹ میں شرکت کرے گی۔ جبکہ آخری نمبر پر آنے والی فیصل آباد اور نیشنل بینک کی ٹیم گریڈ ٹو کے نان فرسٹ کلاس ٹورنامنٹ میں شرکت کرے گی ۔2018-19میں زرعی تر قیاتی

بینک کی ٹیم بھی فرسٹ کلاس ٹورنامنٹ میں شرکت کرے گی۔ سینٹرل کنٹریکٹ میں شامل کھلاڑی ایک سیزن میں پاکستان سپر لیگ سمیت دو لیگز میں شرکت کرسکیں گے۔ جن کھلاڑیوں کے سینٹرل کنٹریکٹ نہیں ہیں انہیں پاکستان کرکٹ بورڈ سے این او سی حاصل کرنے کے لئے کم از کم تین ڈومیسٹک میچ کھیلنا ہوں گے۔ اس بات کا اعلان بدھ کو پاکستان کرکٹ بورڈ کے اعلامیہ میں کیا گیا۔ تین مئی کو لاہور میں ہونے والی بورڈ کی اعلیٰ سطح میٹنگ کے فیصلوں کا اعلان چھ دن بعد کیا گیا۔ میٹنگ میں چیئرمین نجم سیٹھی، سبحان احمد، مدثر نذر، انضمام الحق، ہارون رشید،شکیل شیخ اور ثاقب عرفان نے شرکت کی تھی۔ پاکستان کرکٹ بورڈ نے لیگز کے حوالے سے کئی ماہ سے زیر التوا پالیسی کا اعلان کردیا۔ پی سی بی کے مطابق ریٹائرڈ کھلاڑیوں کو این او سی کی ضرورت نہیں ہوگی۔انہیںاپنی ریٹائرمنٹ کی تاریخ سے دو سال تک این او سی حاصل کرنا ہوگی اس کے بعد این او سی کی ضرورت نہیں ہوگی۔ بعض خصوصی کیسوں میں پاکستانی ٹیم کےچیئر مین پی سی بی، چیف سلیکٹر، ہیڈ کوچ، ڈائر یکٹر کرکٹ آپریشنز پر مشتمل کمیٹی این او سی جاری کرے گی۔ اس طرح کسی بھی کھلاڑی کو اضافی لیگ میں شرکت کی اجازت دی جائے گی۔ فرسٹ کلاس سسٹم کو برقرار رکھا گیا ہے تاہم چار روزہ میچوں کے ساتھ ایک ون ڈے ٹورنامنٹ بھی کرایا جائے گا۔ پی سی بی کے مطابق ڈومیسٹک کرکٹ کو پر کشش بنانے کے لئے فرسٹ کلاس کھلاڑیوں کی میچ فیس میں بھی اضافہ کردیا گیا ہے۔ ریجنل کھلاڑیوں کی میچ فیس ڈپارٹمنٹس کے برابر کردی جائے گی۔ ریجن کے جن کھلاڑیوں کو ماہانہ مشاہرہ دیا جاتا ہے۔ یہ معاوضہ ڈومیسٹک میچ فیس میں ضم کردیا جائے گا۔ پی سی بی ریجن کھلاڑیوں کی میچ فیس میں اضافہ اور ریٹینر شپ ختم کرنے کا فیصلہ کیا ہے۔ ڈومیسٹک کرکٹ میں کوالٹی لانے کے لئے پیٹرنز ٹرافی گریڈ ٹومیں ٹیموں کی تعداد سولہ کردی جائے گی۔ پاکستان کرکٹ بورڈ نے چیئرمین پی سی بی کے مشیر شکیل شیخ کو ہدایت کی ہے کہ وہ فرسٹ کلا سینٹرز کا دورہ کرکے پچوں اور انفرااسٹرکچر کے بارے میں رپورٹ دیں۔ وہ اپنی رپورٹ اور تجاویز تیس روز میں جمع کرائیں گے مدثر نذر یا ہارون رشید شکیل شیخ کے ہمراہ گراونڈز کا دورہ کریں گے ۔

ڈبلن ( سپورٹس ڈیسک/ایمرا نیوز) 18ویں صدی میں کرکٹ شروع کرنے والے آئرلینڈ کو 250 برس کے طویل اور صبرآزما انتظار کے بعد خوابوں کی تعبیر ملنے والی ہے۔ آئی سی سی ورلڈکپ میں کے مختلف ایڈیشنز میں پاکستان، انگلینڈ، زمبابوے اور ویسٹ انڈیز کو ہرانے والے آئرش کرکٹرز پہلی مرتبہ جمعہ کو روایتی سفید کٹ میں پاکستان سے مقابلہ کرنے میدان کا رخ کریں گے۔ آئرش کرکٹ کی تاریخ کافی دلچسپ ہے۔ 1855 میں پہلی آئرش قومی کرکٹ ٹیم نے انگلینڈ کےخلاف ڈبلن میں باقاعدہ میچ کھیلا۔ آئرش کرکٹ یونین ( آئی سی یو) کا قیام 1923 میں عمل میں آیا۔ ایک دور ایسا بھی آیا کہ80 برس سے زائد عرصے تک ملک میں کرکٹ نہیں کھیلی گئی۔ آئرش ایتھلیٹک ایسوسی ایشن نے ملک میں کرکٹ سمیت تمام غیرملکی کھیلوں پر پابندی لگادی۔ یہ حکم اتنا سخت تھا کہ کرکٹ میچ دیکھنا بھی کسی کیلئے مصیبت کا سبب بن سکتا تھا۔ تاہم 1971میں پابندی ختم کردی گئی۔ اس دوران کرکٹ کسی نہ کسی طرح جاری رہی۔ 1993 میں اسے آئی سی سی نے ایسوسی ایٹ رکن کا درجہ دیا۔ اگلے سال کھیلی گئی پہلی آئی سی سی ٹرافی میں آئرلینڈ نے 20ممالک

میں ساتویں پوزیشن حاصل کی جبکہ 1997میں سیمی فائنل تک رسائی حاصل کی۔ آئرلینڈ نے 1996، 1999، 2003اور 2007کے ورلڈکپ کیلیے کوالیفائی کیا اور اس دوران ٹیسٹ ٹیموں کو ہرا کر تہلکہ بھی مچایا۔ اس کارکردگی سے حوصلہ پاتے ہوئے آئی سی یو نے ٹیسٹ اسٹیٹس حاصل کرنے کی ٹھانی اور 2013 میں بین الصوبائی کرکٹ چیمپئن شپ شروع کرائی اسے 2016 میں آئی سی سی نے فرسٹ کلاس ٹورنامنٹ کا درجہ دیا۔ ٹورنامنٹ کے عمدہ معیار اور انٹرنیشنل کرکٹ میں اچھے نتائج کے صلے میں اسے 2017 میں ٹیسٹ اسٹیٹس دے دیا گیا۔

لاہور(سپورٹس ڈیسک/ وقت نیوز) پاکستان کرکٹ ٹیم کے فاسٹ باﺅلر جنید خان پالتو کتے کی موت پر انہتائی افسردہ ہیں ۔ان کا کہنا ہے کہ انہوں نے کتے کی پرورش پر رقم کے ساتھ ساتھ اپنا قیمتی وقت بھی صرف کیا جس کی وجہ سے انہیں اس کتے سے انہےائی لگاﺅ ہوگیا تھا ۔یاد رہے کہ جنید خان کے پالتو کتے جوئی کو چند روز قبل اس وقت ایک موٹر سائیکل سوار کچل کر فرار ہوگیا تھا ۔

کراچی (سپورٹس ڈیسک/ایمرا نیوز) آسٹریلیا کی جانب سے حالیہ بدنام زمانہ بال ٹیمپرنگ تنازع کے مرکزی کردار اوپنر ڈیوڈ وارنر آئندہ سال پاکستان سپر لیگ کے چوتھے ایڈیشن میں ایکشن میں دکھائی دیں گے۔ جبکہ اس بات کے امکانات روشن ہیں کہ آسٹریلین آل رائونڈر شین واٹسن آئندہ پاکستان سپر لیگ میں ایکشن میں دکھائی نہ دیں۔ انہوں نے کوئٹہ گلیڈی ایٹرز کی جانب سے پلے آف کے لئے لاہور جانے سے انکار کردیا تھا۔ ذمے دار ذرائع کا کہنا ہے کہ پاکستان سپر لیگ کے چوتھے ایڈیشن کے لئے پلیئرز ڈرافٹنگ کی فہرست میں ڈیوڈ وارنر کا نام بھی شامل ہوگا۔ گذشتہ ہفتے لاہور میں ہونے والی میٹنگ میں پی ایس ایل فرنچائز کے نمائندوں نے ڈرافٹنگ سمیت مختلف امور پر بات چیت کی تھی۔ پی سی بی کی جانب سے جن تین بڑے ناموں کو اگلے ایڈیشن کی فہرست میں شامل کرنے پر غور کیا گیا ان میں ڈیوڈ وارنر ، ڈیوڈ ملر اور مورنے مورکل شامل تھے۔ بائیں ہاتھ کے اوپنر پر کرکٹ آسٹریلیا نے انٹرنیشنل اور ڈومیسٹک کرکٹ میں شرکت پر ایک سال کی پابندی لگادی ہے۔ تاہم یہ

پابندی ٹورنامنٹ سے قبل ختم ہوجائے گی۔ تاہم ڈیوڈ وارنر اس سے قبل دنیا کے کسی بھی ٹورنامنٹ میں شرکت کرسکتے ہیں۔ آسٹریلیا ٹیم کے سابق نائب کپتان کی جانب سے فی الحال پی ایس ایل میں شرکت سے متعلق کوئی ردعمل سامنے نہیں آیا ہے ۔ البتہ ذرائع کا کہنا ہے کہ وہ پی ایس ایل کو انٹرنیشنل کرکٹ میں اپنی واپسی کا راستہ قرار دے سکتے ہیں۔ لاہور کی میٹنگ میں شین واٹسن پر سب سے زیادہ تحفظات سامنے آئے اور یہ تجویز دی گئی کہ ایسے کھلاڑیوں پر پابندی لگا دی جائے جو وعدہ کرنے کے باوجود پاکستان نہیں آئے۔ پاکستان سے ٹورنامنٹ شروع کرنے کی بڑی وجہ یہ بتائی گئی ہے کہ جو کھلاڑی پاکستان آنے کا وعدہ کرے گا اسے افتتاحی میچوں اور افتتاحی تقریب کے لئے شروع ہی سے پاکستان آنا پڑے گا۔ اگر کوئی کھلاڑی انکار کرتا ہے تو اس سے معاہدہ نہیں کیا جائے گا۔ سابق کپتان راشد لطیف نے کراچی کنگز کے نمائندے کی حیثیت سےتجویز دی ہے کہ اگر کوئی کھلاڑی وعدے کے باوجود پاکستان نہیں آتا ہے تواس کا معاوضہ فرنچائز نہیں پاکستان کرکٹ بورڈ ادا کرے گا۔ کھلاڑیوں کی ڈرافٹنگ کے دوران رینڈم پک کی تجویز رد کردی گئی اور آخری نمبر پر آنے والی لاہور قلندر کی ٹیم ڈرافٹنگ میں پہلا کھلاڑی منتخب کرے گی۔

سڈنی (سپورٹس ڈیسک/ایمرا نیوز) بال ٹیمپرنگ کے اعتراف اور سزائوں کے خلاف اپیل نہ کرنے والے تینوں آسٹریلین کرکٹرز اسٹیون اسمتھ ،وارنر اور بینکر افٹ کیلئے آسٹریلین کرکٹ حکام میں ہمددری پیدا ہونے لگی ہے۔سابق کینگروز قائد اور آسٹریلین کرکٹ ڈائریکٹر مارک ٹیلر نے کہا ہے کہ اسٹیو اسمتھ پابندی بھگتانے کے بعد دوبارہ کپتان بن سکتے ہیں۔ خیال رہے کہ اسمتھ پر عائد پابندی کچھ ایسے لگی ہے کہ ان کی غیرموجودگی میں آسٹریلیا کو زیادہ بڑے چیلنجز سے نہیں نمٹنا پڑیگا۔ وہ اگلے برس انگلینڈ میں ورلڈکپ اور ایشز سیریز سے قبل آزاد ہوجائیں گے۔ تاہم ان کی قیادت پر عائد پابندی 2020 میں ختم ہوگی۔ مارک ٹیلر نے اتوار کو ایک انٹرویو میں کہا کہ طویل مدت تک قیادت کیلئے میرے پاس صرف اسمتھ کا ہے نام ہے ۔ میری نظر میں وہ دھوکا باز نہیں۔ بات صرف اتنی ہے کہ اس نے کچھ غلط ہوتے دیکھا لیکن روکا نہیں، یہ لاپروائی میں ہونے والی غلطی ہے اور بس۔ ہمدردی کی اسی رو میں بہتے ہوئے سابق کوچ ڈیرن لی مین نے بھی مذکورہ کرکٹرز کو ’’بہت ہی اچھے انسان‘‘ کہا ہے۔ ان کا کہنا تھا

کہ میں تمام وقت ان کے بارے میں پریشان رہتا ہوں۔

اسلام آباد(سپورٹس ڈیسک/ایمرا نیوز)پاکستان کرکٹ بورڈ (پی سی بی)کے چیئرمین نجم سیٹھی نے واضح کیا ہے کہ وہ سلیکشن اور ٹیم کے معاملات میں مداخلت اور اعتراض نہیں کرتے،سلیکشن اور کوچنگ سٹاف نے ٹیم کیلئے10سال کیلئے منصوبہ تیار کیا ہے، باہر بیٹھے لوگوں کو تنقید کا حق ہے، وہ ضرور کریں،ڈومیسٹک کرکٹ میں ٹیموں کی تعداد8سے بڑھا کر 10کرنے کی تجویزہے اس حوالے سے اعلان کریں گے، پاکستانی بیٹسمینوں کو انگلینڈ میں مشکلات کا سامنا کرنا پڑسکتا ہے۔اپنے ایک انٹرویو میںچیئرمین پی سی بی نجم سیٹھی نے کہا کہ چیف سلیکٹر انضمام الحق ایکسپرٹ ہیں، میں ان کی سلیکشن پر اعتراض نہیں کرتا۔انہوں نے بتایا کہ سلیکشن اور کوچنگ ٹیم نے 10 سال کے لیے منصوبہ تیار کیا ہے، وہ چاہتے ہیں کہ 10 سالوں کے لیے نئے گھوڑے تیار کیے جائیں، میں سلیکشن اور ٹیم کے معاملات میں مداخلت نہیں کرتا، انضمام ایکسپرٹ ہیں اور ان کی سلیکشن پر میں اعتراض نہیں کرتا۔چیئرمین پی سی بی کا کہنا تھا کہ باہر بیٹھے لوگوں کو تنقید کا حق ہے، وہ ضرور کریں، اگر وہ نہیں کہیں گے تو ان کی کون سنے گا جب کہ تنقید کرنے والے خود بھی سلیکٹرز رہے ہیں، سابق ٹیسٹ کرکٹرز کو تنقید کا حق ہے۔انہوں نے کہا کہ ڈومیسٹک کرکٹ میں ٹیموں کی تعداد 8 سے بڑھا کر 10کرنے کی تجویزہے اور اس سے متعلق جلد پالیسی بیان جاری کریں گے۔نجم سیٹھی کا کہنا تھا کہ فرسٹ کلاس کھلاڑیوں کو اچھا معاوضہ دینے کے لیے ریجنز کو رقم دینے پر غور کر رہے ہیں، بینکوں میں پیسہ رکھنے کے بجائے کھلاڑیوں پر لگائیں گے، ریجن کھلاڑی پیدا کرتے ہیں اور ڈپارٹمنٹ کھلاڑی لے جاتے ہیں، ریجنل کرکٹ، کھلاڑی پیدا کرنے کا اہم ذریعہ ہیں۔پاکستان کرکٹ ٹیم کے حوالے سے بات کرتے ہوئے نجم سیٹھی نے کہا کہ پاکستان ٹی ٹوئنٹی میں نمبر ون ہے، قومی ٹیم پچھلے سال ٹیسٹ اور ون ڈے میں بھی نمبر ون رہی۔انہوں نے کہا کہ آئرلینڈ کے ساتھ ٹیسٹ میچ تاریخی ہے اور وہ خود یہ میچ دیکھنے جائیں گے۔نجم سیٹھی نے بتایا کہ انگلینڈ کی وکٹوں پر موسم کی وجہ سے بیٹنگ مشکل ہوجاتی ہے، وہاں بارشوں موسم ہے، پاکستانی بیٹسمینوں کو انگلینڈ میں مشکلات کا سامنا کرنا پڑسکتا ہے۔

نارتھمپٹن ( سپورٹس ڈیسک/ایمرا نیوز) پاکستانی لیگ اسپنر شاداب خان نے کائونٹی کلب نارتھمپٹن کے بیٹسمینوں کو تگنی کا ناچ نچادیا۔ ان کی تباہ کن بولنگ نے میزبان ٹیم کے چھکے چھڑا دیے۔ دورے کے دوسرے چار روزہ پریکٹس میں انہوں نے19 اوورز میں 77 رنز دے کر چھ وکٹ اڑا دیے، ان کی عمدہ کارکردگی کے سبب میزبان ٹیم اپنی پہلی اننگز میں 259 رنز پر ہمت ہارگئی۔ پاکستان نے کھیل ختم ہونے تک کسی نقصان کے بغیر چھ رنز بنائے تھے۔ آئرلینڈ کے خلاف اولین ٹیسٹ سے قبل یہ پاکستان کے خلاف تمام ہتھیار جانچنے اور حربے آزمانے کا آخری موقع ہے۔ پاکستان کے دیگر بولرز شاداب کا ساتھ نہ دے پائے۔ محمد عامر اس بار بھی کوئی تاثر چھوڑنے میں ناکام رہے۔ انہوں نے 13 اوورز میں کسی کامیابی کے بغیر 40 رنز دیے، محمد عباس نے ابھی اتنے ہی اوور کرائے 34 رنز دیے ان کے ہاتھ بھی کوئی کامیابی نہ لگی۔ البت راحت علی 25 رنز کے عوض دو شکار کرنے میں کامیاب رہے۔ حارث سہیل نے بھی ایک وکٹ حاصل کی۔ قبل ازیں نارتھمپٹن شائر نے ٹاس جیت کر بیٹنگ کا فیصلہ کیا۔ رابرٹ نیوٹن، اور بین ڈیکٹ نے
نارتھمپٹن شائر کو 36رنز کا آغاز دیا۔ نیوٹن 35 رنز بنا کر شاداب کی گیند پر اسٹمپڈ ہوئے۔ ڈیکٹ کو راحت علی نے ایل بی ڈبلیو کیا وہ 26 رنز اسکور کرپائے۔ لیوک پروکٹر نے ایک ہی رن بنایا تھا کہ وہ حارث سہیل اور شاداب کی مشترکہ کاوش پر رن آئوٹ ہوکر پویلین لوٹ گئے۔ رچرڈ لیوی نے پانچ بائونڈریز کی مدد سے 31 رنز کی اننگز کھیل جسے شاداب نے ختم کردیا۔ ایڈم روسنگٹن نے ہوم ٹیم کی بیٹنگ کو سہارا دیا اور مکمل تباہی سے بچایا، وہ دو چھکوں اور آٹھ چوکوں کی مدد سے 90 رنز ٹیم کی نذر کرکے شاداب کی گیند سمجھ نہ سکے اور اسٹمپڈ ہوگئے۔جوش کوب کو شاداب نے صرف سات رنز بنانے کا موقع دیا اور ان کی وکٹیں بکھرادیں۔ نئے بیٹسمین روب کیوف کو تو کھاتہ کھولنے کی مہلت بھی نہ مل سکی اور بھی لیگ اسپنر کی ورائٹی سمجھ نہ پائے اور ایل بی ڈبلیو ہوئے۔ اسٹیون کروک کو راحت علی نے 10 رنز پر فہم اشرف کا کیچ بنایا۔ رکارڈو واسکنسیلوز نے کافی مزاحمت کی اور 72گیندوں پر 30 رنز بناکر ڈریسنگ روم لوٹے، شاداب نے ان کاوش ختم کی بریٹ ہٹنن کو حارث سہیل نے آٹھ رنز پر کلین بولڈ کیا جبکہ آخری بیٹسمین گیرتھ ویڈ ایک رن بنا کر ناٹ آئوٹ رہے۔ پاکستان کو جوابی اننگز میں صرف 4.3 اوورز بیٹنگ کرنے کا موقع ملا جس میں انہوں نے وکٹ گنوائے بغیر چھ رنز اسکور بورڈ پر لگادیے۔ اظہر علی تین اور امام الحق بھی تین رنز بنا کر یز پر موجود تھے۔ میچ کیلیے پاکستان ٹیم اظہر علی، امام الحق،حارث سہیل، اسد شفیق، بابر اعظم، سرفراز احمد( کپتان)، شاداب خان، فہیم اشرف، محمد عامر ، محمدعباس اور راحت علی پر مشتمل ہے۔

(سپورٹس ڈیسک/ایمرا نیوز)
کولکتہ: رویندرا جڈیجا حالیہ آئی پی ایل میں اب تک کچھ خاص پرفارم نہیں کرپائے ہیں۔

کولکتہ نائٹ رائیڈرز سے میچ میں چنئی کے آل رائونڈر کی ناقص فیلڈنگ پر شائقین بھڑک اٹھے، انھوں نے ٹیم میں جڈیجا کے کردار پر سوال اٹھا دیا ہے،وہ اب تک 9 میچز میں صرف 59 رنز بنا پائے اور 3 ہی وکٹیں ہاتھ لگی ہیں۔ انھوں نے گذشتہ شب حریف اوپنر سنیل نارائن کے لگاتار2کیچز ڈراپ کرکے شائقین کو خاصا مایوس کیا۔

اولین موقع اننگز کے دوسرے اوور میں کے ایم آصف کی گیند پر سامنے آیا جب جڈیجا مڈ آف پوزیشن پر سنیل کا کیچ تھامنے میں ناکام رہے، وہ پہلی کوشش کے بعد دوسری کوشش میں بھی گیند کو قابو نہیں کرپائے، دوسری بار بھی آصف کی ہی گیند پر جڈیجا نے کیچ ڈراپ کیا، اس پر وکٹ کے پیچھے کھڑے دھونی بھی حیران دکھائی دیے۔