Category کرکٹ

پاکستان کرکٹ ٹیم سے نظر انداز کیے جانے والے فاسٹ بولر محمد عباس نے کاؤنٹی کرکٹ میں شاندار بولنگ کی ہے اور انہوں نے ہیمپشائر کی جانب سے مڈل سیکس کے خلاف میچ میں نو 9 وکٹیں حاصل کیں۔

انہوں نے پہلی اننگز میں ہیٹ ٹرک سمیت 6 وکٹیں لیں اور محمد عباس کی شاندار بولنگ کی بدولت ہیمپشائر نے میچ میں 249 رنز سے کامیابی حاصل کی۔

محمد عباس کا کہنا ہے کہ کاؤنٹی کرکٹ میں سیزن کا آغاز اچھا ہوا ہے، خوشی ہے کہ ہے پہلے دو میچز میں کامیابی ملی ہے۔

انہوں نے کہا کہ میری کوشش یہی ہے کہ کاؤنٹی کرکٹ کھیل کر ردہم حاصل کروں، لمبی بولنگ کر کے اپنا اعتماد بحال کرنا چاہتا ہوں، اعتماد اور ردہم کے ساتھ ایک بار پھر ملک کے لیے کچھ کرنا چاہتا ہوں۔

محمد عباس نے کہا کہ میں اپنے ورک لوڈ کو بھی سیٹ کر رہا ہوں، ٹارگٹ یہی ہے کہ ٹیم میں واپس آنا ہے جب بھی موقع دیا گیا تو ملک کے لیے کھیلنا چاہوں گا۔

انہوں نے بتایا کہ پہلے میچ میں لیسٹرشائر میں بہت سردی تھی، کنڈیشنر کی وجہ سے مشکل ہوئی جبکہ ساؤتھمپٹن میں کنڈیشنر اچھی تھیں جس کا بھرپور فائدہ اٹھایا، ریورس سوئنگ کے لیے زور لگانا پڑتا ہے، اس سے ردہم میں آنے کا موقع مل رہا ہے۔

قومی ٹیم کے بیٹنگ کوچ یونس خان کا کہنا ہے کہ نوجوان ٹیم کے ساتھ جنوبی افریقا کے خلاف سیریز جیتی ہے، کئی مثبت پہلو ہیں، سیکھنے کا موقع ملا، مسائل سامنے بھی آئے جن کا حل تلاش کرنا ہے۔

ورچوئل میڈیا کانفرنس میں انہوں نے کہا کہ چند پلیئرز نے بڑی اننگز کھیلیں، فخرزمان اور بابر اعظم نے بڑے اسکور کیے شاٹ سلیکشن بھی بہتر ہوئی، پلیئرز نے صورتحال کے مطابق کھیلنا سیکھا، فخر زمان، بابر اعظم اور محمد رضوان طویل عرصہ پرفارم کرنے کیلیے تیار ہیں،

جیدرعلی نے پی ایس ایل میں لوئر آرڈر میں پرفارم کیا تھا اس لیے ان کو نچلے نمبروں پر کھلایا، آخری میچ میں فخر اور بابر کے آؤٹ ہونے پر سنگلز بنانا مشکل ہوگیا، اسی لیے کہتا ہوں کہ کچھ پیچھے نہ چھوڑ کر جائیں، آخری میچ میں مطلوبہ اوسط کم ہونے کے باوجود وکٹیں گریں، ان مسائل کا حل تلاش کرنا ہے، نوجوان پلیئرز اپنی غلطیوں سے سبق سیکھیں گے۔

ایک سوال کے جواب میں انہوں نے کہا کہ میرے خیال میں ہر نئے پلیئر کو دو سے تین سیریز ملنا چاہیئں، پلیئرز کو خود چیلنج لینا پڑیں گے، ملک کیلیے پرفارم کرنا ہوگا۔ہم ڈنڈا پریڈ نہیں کر سکتے، کھلاڑیوں کو خود بھی دیکھنا ہے کہ انہیں کس طرح صورتحال کے مطابق کھیلنا ہے اور وہ کیسے کھیل کر ٹیم کو میچز جتوا سکتے ہیں۔

سیریز میں فتح کے باوجود مڈل آرڈر کی ناکامی پر پاکستان کو سخت تشویش ہے جب کہ کپتان بابر اعظم کا کہنا ہے کہ مل بیٹھ کر غلطیوں کا جائزہ لیں گے۔

جنوبی افریقہ سے سیریز میں فتح کے بعد قومی ٹیم کے کپتان بابر اعظم نے کہا کہ چوتھے ٹی ٹوئنٹی میں دونوں سیٹ بیٹسمینوں کے ایک ساتھ آؤٹ ہونے سے مڈل آرڈر بیٹنگ دباؤ کا شکار ہوئی،فتح خوش آئند مگر ہم مل بیٹھ کر اپنی غلطیوں کا جائزہ لیں گے، سب کو اعتماد دیں گے، کوشش ہوگی کہ غلطیوں کو آئندہ میچز میں کم سے کم دہرائیں۔

انھوں نے کہا کہ ون ڈے سیریز کے بعد فخرزمان نے چوتھے اور فیصلہ کن ٹی ٹوئنٹی میں بھی شاندار کارکردگی کا مظاہرہ کیا،ان کی فارم کا ٹیم کو بہت فائدہ پہنچ رہا ہے۔

بابر اعظم نے کہا کہ جنوبی افریقہ کا دورہ شروع ہونے سے قبل ہر کھلاڑی کا عزم تھا کہ سو فیصد پرفارم کرنا ہے، جب ٹیم کا ایسا جذبہ ہو تو نتائج بھی مثبت ہی آتے ہیں، قیادت کے ساتھ بطور کھلاڑی میری کوشش تھی کہ پرفارمنس پاکستان کے کام آئے۔

انھوں نے کہا کہ سیریز کا جشن منانے کیلیے ہمارے ساتھ سپورٹرز بھی اسٹیڈیم میں ہوتے توزیادہ خوشی ہوتی لیکن کورونا کی وجہ سے حالات اس کی اجازت نہیں دے رہے، بہرحال انھوں نے سوشل میڈیا پر بھی ہماری بڑی حوصلہ افزائی کی ہے،اس پرسب کا شکریہ ادا کرتے ہیں۔

بابر اعظم نے کہا کہ قرنطینہ اور دیگر مسائل کے باوجود جنوبی افریقہ کا دورہ خوشگوار رہا،میزبان بورڈ نے بہترین سہولیات فراہم کیں، مہمان نوازی کیلیے ان کا شکریہ ادا کرتے ہیں۔

مین آف دی میچ فہیم اشرف نے کہا کہ فیلڈنگ کرتے ہوئے بیٹسمینوں کے اسٹروکس دیکھتے ہوئے میں اپنی حکمت عملی بنا رہا تھا، اسی کا فائدہ اٹھاتے ہوئے نہ صرف رنز روکے بلکہ وکٹیں حاصل کرنے میں بھی کامیاب رہا، مجھے ٹیم مینجمنٹ کا اعتماد حاصل ہے، اس لیے کسی بھی صورتحال میں دباؤ محسوس نہیں کرتا۔

بھارتی حکومت نے رواں سال شیڈول ٹی 20 ورلڈ کپ کے لیے پاکستانی کھلاڑیوں کو ویزے جاری کرنے کا فیصلہ کیا ہے۔

ہندوستان ٹائمز کی رپورٹ کے مطابق حکومت کے اس فیصلے سے بھارتی کرکٹ بورڈ (بی سی سی آئی) کے سیکریٹری جے شاہ نے اعلیٰ کونسل کو آگاہ کیا۔

بھارتی حکومت کے اس فیصلے کے بعد بابر اعظم کی قیادت میں پاکستان کرکٹ ٹیم کو اکتوبر میں آئی سی سی ٹی 20 ورلڈ کپ میں شرکت کے لیے بھارت کا سفر کرنے میں کوئی دشواری پیش نہیں آئے گی۔

اعلیٰ کونسل کے رکن نے نام ظاہر نہ کرنے کی شرط پر بھارتی خبر ایجنسی ‘پی ٹی آئی’ کو بتایا کہ ‘پاکستان کرکٹ ٹیم کو ویزا جاری کرنے کا مسئلہ حل ہوگیا ہے، تاہم ابھی یہ واضح نہیں ہے کہ پاکستانی شائقین کرکٹ کو ویزے جاری کیے جائیں گے یا نہیں’۔

انہوں نے بتایا کہ ‘سیکریٹری نے اجلاس میں اعلان کیا کہ اس کا فیصلہ بعد میں کیا جائے گا تاہم ہم نے آئی سی سی سے وعدہ کیا تھا کہ معاملہ حل ہوجائے گا’۔

دوسری جانب بھارتی کرکٹ بورڈ نے ورلڈ ٹی 20 کے لیے 9 مقامات کا فیصلہ کر لیا ہے جن میں سے احمد آباد کے نریندر مودی اسٹیڈیم میں ایونٹ کا فائنل کھیلا جائے گا۔

دیگر مقامات میں دہلی، ممبئی، چنئی، کولکتہ، بنگلور، حیدر آباد اور دھرمشالہ شامل ہیں۔

واضح رہے کہ پاکستان کرکٹ بورڈ (پی سی بی) کے چیئرمین احسان مانی نے ویزوں کے اجرا کے معاملے پر گزشتہ ماہ انٹرنیشنل کرکٹ کونسل (آئی سی سی) کو خط لکھ کر تحفظات کا اظہار کیا تھا۔

خط میں کہا گیا تھا کہ اگر بھارتی کرکٹ بورڈ، پاکستانی ٹیم، میڈیا اور شائقین کے لیے ویزے کی آسانیاں پیدا نہیں کرتا اور تحریری یقین دہانی نہیں کرواتا تو ٹورنامنٹ متحدہ عرب امارت (یو اے ای) منتقل کردیا جائے۔

خیال رہے کہ سیاسی تنازعات کے باعث پاکستان اور بھارت کے درمیان کئی سالوں سے کوئی دوطرفہ سیریز بھی نہیں کھیلی گئی ہے۔

وزڈن نے سال کے پانچ بہترین کھلاڑیوں کے ناموں کا اعلان کردیا ہے اور پاکستان کے وکٹ کیپر بلے باز محمد رضوان عمدہ کارکردگی کی بدولت اس فہرست میں جگہ بنانے میں کامیاب رہے۔

کرکٹ کی بائبل تصور کیے جانے والے ادارے وزڈن نے سال کے پانچ بہترین کھلاڑیوں کے ناموں کا اعلان کردیا جس میں پاکستان کے محمد رضوان بھی شامل ہیں جبکہ بھارت کا کوئی بھی بلے باز فہرست میں جگہ نہ بنا سکا۔

وزڈن نے محمد رضوان کے ساتھ ساتھ ویسٹ انڈیز کے جیسن ہولڈر اور انگلینڈ کے زیک کرالی، ڈومینک سبلی اور ڈیرن اسٹیونز کو بھی سال کا بہترین کھلاڑی قرار دیا گیا۔

اس کے علاوہ انگلینڈ کے مایہ ناز آل راؤنڈر بین اسٹوکس لگاتار دوسرے سال بہترین کرکٹر کا ایوارڈ لے اڑے۔

15 اپریل کو شائع ہونے والے وزڈن المانیک کے شمارے میں بین اسٹوکس کو سال کا بہترین کھلاڑی قرار دیا گیا جنہوں نے ٹیسٹ کرکٹ میں 58.28 کی اوسط سے سب سے زیادہ 671 رنز بنانے کے ساتھ ساتھ 19 وکٹیں بھی حاصل کیں۔

وزڈن نے آسٹریلیا کی بیتھ کو سال کی بہترین وومن کرکٹر جبکہ کیرن پولارڈ بہترین ٹی20 کرکٹر قرار پائے۔

78ون ڈے اننگز کے اعداد وشمار میں بابر اعظم کو ویرات کوہلی پر برتری حاصل ہے۔

حال ہی میں عالمی رینکنگ میں پہلی پوزیشن پر قبضہ جمانے والے پاکستانی کپتان نے ابھی تک 56.83کی اوسط سے 3808رنز بنائے ہیں، اسٹرائیک ریٹ 88.70رہا، انھوں نے13 سنچریاں اور 17ففٹیز بنائیں، زیادہ سے زیادہ اسکور 125ناٹ آؤٹ رہا۔

دوسری جانب بھارتی ہم منصب نے آخری 78اننگز میں 45.58کی اوسط سے 3100رنز بنائے، اسٹرائیک ریٹ 83.26رہا، انھوں نے 8سنچریاں اور 20ففٹیز بنائی ہیں،زیادہ سے زیادہ اسکور 118رہا، یوں بابر اعظم نصف سنچریوں کی تعداد کے سوا ہر معاملے میں ویرات کوہلی سے آگے ہیں،اسی کارکردگی کے صلے میں انھوں نے عالمی نمبر ون پوزیشن پر قبضہ جمایا۔

یاد رہے کہ بابر اعظم نے ابھی تک 80ون ڈے میچز میں 78اننگز کھیلی ہیں، دوسری جانب ویرات کوہلی نے مجموعی طور پر 254مقابلوں میں 59.07کی اوسط سے 12169رنز اسکور کیے اور43سنچریاں بنا چکے ہیں، بابر اعظم کو اس مقام پر پہنچنے کیلیے ابھی طویل سفر کرنا ہوگا۔

پاکستان کرکٹ ٹیم کے کپتان بابر اعظم نے کہا ہے کہ گزشتہ روز جنوبی افریقاکے خلاف جیت کا کریڈٹ محمد رضوان کو جاتا ہے کیونکہ روزہ رکھ کر میچ کھیلنا مشکل ہوتا ہے۔

پاکستان نے گزشتہ روز سینچورین کے سپر اسپورٹس پارک میں کھیلے گئے تیسرے ٹی20 میں جنوبی افریقا کو 9 وکٹوں سے شکست دی تھی ۔ میچ میں بابر اعظم نے 122 رنز کی اننگز کھیلی جب کہ محمد رضوان 73 رنز بناکر ناٹ آؤٹ رہے۔

میڈیا سے گفتگو کرتے ہوئے بابر اعظم نے کہا کہ فتح کا رضوان کو کریڈٹ جاتا ہے کیونکہ روزہ رکھ کر میچ کھیلنامشکل ہوتا ہے،رضوان نے جیسی اننگز اور پورا میچ کھیلا قابل تعریف ہے۔

بابر اعظم کے مطابق تیسرے میچ میں جیت اہم تھی کیونکہ دوسرا ٹی ٹونٹی اچھا نہیں کھیلے تھے۔

انہوں نے کہا کہ ان کی کوشش ہوتی ہے اپنے پلان پر عمل کریں اور یہ کہ وہ اس اننگز کی کافی عرصے سے کوشش کررہے تھے۔

کپتان پاکستان ٹیم نے کہا کہ انہیں افسوس ہے کہ وہ آخر میں آؤٹ ہوگئے اور ریکارڈ نہ بن سکا۔

یاد رہے کہ گزشتہ روز بابر اعظم فخر زمان کی جگہ خود اوپننگ کے لیے آئے۔

اس حوالے سے بابر کا کہنا تھا کہ فخر نے اوپننگ کیلئے نہیں کہا ٹیم پلان پر ہی عمل کیا،ان کی فخر زمان سے بات ہوئی کہ وہ نیچے آکر تیز کھیل سکتا ہے۔

ویرات کوہلی اور کین ولیمسن کے مشورے بابر اعظم کے کام آگئے۔

آئی سی سی ون ڈے رینکنگ میں نمبر ون بیٹسمین بننے والے قومی ٹیم کے کپتان نے پی سی بی پوڈ کاسٹ میں کہا کہ میں کارکردگی میں بہتری لانے کے لیے ہمیشہ انضمام الحق اور محمد یوسف جیسے کھلاڑیوں سے رہنمائی لیتا ہوں، نیٹ میں اچھی بیٹنگ نہ ہوسکے تو سارا دن بْرا گزرتا ہے، اس سفر میں میرے والدین اور ساتھی کرکٹرز نے بہت ساتھ دیا۔

انہوں نے کہا کہ ویرات کوہلی نے نیٹ سیشنز میں میچ سیناریو کی پریکٹس کا مشورہ دیا،میں نے گیند کو تاخیر سے کھیلنا کین ولیمسن سے سیکھا۔

انٹرنیشنل کرکٹ کونسل (آئی سی سی) نے اینٹی کرپشن قوانین کی خلاف ورزی پر زمبابوے کے سابق کپتان ہیتھ اسٹریک پر 8 سال کی پابندی عائد کردی۔

ہیتھ اسٹریک پر کرپشن میں ملوث شخص سے بٹ کوائن میں رقم وصول کرنے سمیت آئی سی سی کے اینٹی کرپشن قوانین کی پانچ شقوں کی خلاف ورزی کا بھی الزام ہے۔

زمبابوے کی تاریخ کے عظیم ترین فاسٹ باؤلر تصور کیے جانے والے ہیتھ اسٹریک 2017 اور 2018 میں کھیلے گئے میچ کی وجہ سے مسلسل زیر تفتیش تھے اور یہ میچز اس وقت کھیلے گئے جب وہ زمبابوے کی کوچنگ کے فرائض انجام دے رہے تھے۔

وہ 2016 سے 2018 تک زمبابوے کے کوچ رہنے کے ساتھ ساتھ انڈین پریمیئر لیگ، بنگلہ دیش پریمیئر لیگ اور افغانستان پریمیئر لیگ سے بھی منسلک رہے۔

ہیتھ اسٹریک پر الزام ہے کہ انہوں نے کرپٹ سرگرمیوں میں ملوث افراد کا ٹیم کے کھلاڑیوں سے رابطہ کرانے میں سہولت کار کا کردار ادا کیا جبکہ ان پر کرپٹ افراد کی جانب سے رابطے کے بارے میں آگاہ نہ کرنے اور ان سے تحائف اور رقوم وغیرہ وصول کرنے کا بھی الزام ہے۔

زمبابوے کے سابق کپتان پر الزام ہے کہ انہیں دو بٹ کوائن کی شکل میں رقم کی ادائیگی کی گئی جس کی مالیت 35 ہزار ڈالر بنتی ہے جبکہ انہیں ایک آئی فون بھی بطور تحفہ دیا گیا تھا لیکن اس حوالے سے بھی انہوں نے آگاہ نہیں کیا۔

کرک انفو کے مطابق ہیتھ اسٹریک نے ابتدائی طور پر ان الزامات کا عدالت میں سامنا کرنے کا فیصلہ کیا لیکن ٹھوس شواہد کو دیکھتے ہوئے انہوں نے الزامات اور سزا کو قبول کر لیا ہے۔

ان پر 8 سال کے لیے ہر طرز کی کرکٹ میں شمولیت پر پابندی عائد کردی ہے اور وہ 28 مارچ 2029 سے دوبارہ کھیلوں کی سرگرمیوں کا حصہ بن سکیں گے۔

آئی سی سی کے اینٹی کرپشن کے سربراہ ایلکس مارشل نے کہا کہ ہیتھ اسٹریک ایک تجربہ کار سابق کرکٹر ہیں اور قومی ٹیم کے کوچ رہ چکے ہیں جس کی وجہ سے وہ متعدد ایسے سیشنز میں شرکت کر چکے ہیں جس میں کرپٹ سرگرمیوں کے حوالے سے آگاہی فراہم کی گئی لہذا وہ اپنی ذمے داریوں سے مکمل طور پر آگاہ تھے۔

انہوں نے کہا کہ سابق کپتان اور کوچ کی حیثیت سے ان پر ذمے داری عائد ہوتی تھی کہ وہ کھیل کی شفافیت کو برقرار رکھیں لیکن انہوں نے ناصرف متعدد مرتبہ ان قواعد کی خلاف ورزی کی بلکہ چار کھلاڑیوں کی کرپٹ عناصر تک رسائی کا سبب بھی بنے جبکہ انہوں نے ہماری تفتیش میں رکاوٹ ڈالنے کی بھی کوشش کی۔

ایلکس مارشل نے کہا کہ اسٹریک کے اقدامات سے میچ کے نتیجے پر کوئی فرق نہیں پڑا اور انہوں نے آئی سی سی کے اینٹی کرپشن تعلیمی پروگرام سے تعاون پر رضامندی ظاہر کی ہے جس پر ہم ان کے شکر گزار ہیں۔

زمبابوے کے سابق کھلاڑیوں سمیت کھیلوں سے تعلق رکھنے والے افراد نے ہیتھ اسٹریک کی سرگرمیوں پر پابندی پر افسوس کا اظہار کیا ہے۔

زمبابوے کے سابق وزیر کھیل ڈیوڈ کولارٹ نے اس رویے کو افسوسناک قرار دیتے ہوئے کہا کہ اس طرح کے افعال کے لیے کوئی عذر قابل قبول نہیں۔

انہوں نے کہا کہ کرپشن نے کرکٹ کو بین الاقوامی سطح پر متاثر کرنے کے ساتھ ساتھ زمبابوے کرکٹ کو بھی بہت نقصان پہنچایا ہے اور اسے جڑ سے اکھاڑ کر پھینک دینا چاہیے۔

زمبابوے کے سابق کپتان ہیتھ اسٹریک 90 کی دہائی میں زمبابوے کی ٹیم کے اہم رکن تصور کیے جاتے تھے اور انہوں نے اپنی عمدہ باؤلنگ اور بیٹنگ سے کئی میچز میں زمبابوے کو فتح دلائی۔

نامور آل راؤڈر کو 65 ٹیسٹ اور 189 ون ڈے میچز میں زمبابوے کی نمائندگی کا اعزاز حاصل ہے اور اس دوران انہوں نے 450 سے زائد وکٹیں لینے کے ساتھ ساتھ 4 ہزار 933 رنز بنانے کا اعزاز بھی حاصل ہے۔

کرکٹ سے ریٹائرمنٹ کے بعد وہ زمبابوے کی کوچنگ کے ساتھ ساتھ دنیا کی مختلف لیگز میں بھی بطور کوچ فرنچائزوں سے منسلک رہے۔

لاہور: قومی کرکٹ ٹیم کے کپتان بابراعظم نے ون ڈے کرکٹ کی رینکنگ میں ویرات کوہلی سے پہلی پوزیشن چھین لی۔

بابر اعظم نے آئی سی سی مینز کرکٹ ورلڈکپ سپر لیگ میں شامل جنوبی افریقا کے خلاف ون ڈے انٹرنیشنل سیریز کا اختتام دنیائے کرکٹ کے نمبر ون بیٹسمین کی حیثیت سے کیا ہے۔

جنوبی افریقا کے خلاف ایک روزہ سیریز کے تین میچوں میں 228 رنز بنانے والے بابراعظم نےسیریز کے دوران مجموعی طور پر 28 ریٹنگ پوائنٹس حاصل کیے۔

سیریز کے آغاز سے قبل انٹرنیشنل کرکٹ کونسل کی درجہ بندی میں بھارت کے ویرات کوہلی اور پاکستان کے بابراعظم کے درمیان 20 ریٹنگ پوائنٹس کا فاصلہ تھا۔

میزبان ٹیم کے خلاف پہلےایک روزہ میچ میں 103 رنز کی عمدہ اننگز کھیلنے پر بابراعظم آئی سی سی ون ڈے انٹرنیشنل پلیئرز رینکنگ میں پہلے نمبر پر پہنچ گئے تھے تاہم سیریز کے دوسرے میچ میں 31 رنز بناکر آؤٹ ہونے کے باعث وہ پانچ پوائنٹس گنوانے کی وجہ سے دوبارہ دوسری پوزیشن پر پہنچ گئے۔

البتہ بابراعظم نے سیریز کے تیسرے اور فیصلہ کن میچ میں ایک بار پھر شاندار بیٹنگ کا مظاہرہ کیا اور 94 رنز بناکر مین آف دی میچ قرار پائے۔

میزبان ٹیم کے خلاف اس اننگز کی بدولت وہ ایک بار پھر ون ڈے انٹرنیشنل پلیئرز رینکنگ میں پہلی پوزیشن پر پہنچ گئے ہیں۔

بابراعظم سے قبل بھارت کے کپتان ویرات کوہلی عالمی درجہ بندی میں نمبر ون بیٹسمین تھے۔ وہ اکتوبر 2017 سے اسی رینک پر موجود تھے۔

ون ڈے انٹرنیشنل رینکنگ میں پہلی پوزیشن پر براجمان بابراعظم کا ٹی ٹوئنٹی کی عالمی رینکنگ میں تیسرا اور ٹیسٹ میں چھٹا نمبر ہے۔ ان کے علاوہ صرف ویرات کوہلی دنیا کے وہ واحد بیٹسمین ہیں جو فی الحال ان تینوں فارمیٹ کی عالمی درجہ بندی کے مطابق ابتدائی چھ بلے بازوں کی فہرست میں شامل ہیں۔

ون ڈے انٹرنیشنل کرکٹ کی تاریخ میں بابراعظم وہ چوتھے پاکستانی ہیں جنہوں نے یہ اعزاز حاصل کیا ہے۔

اس سے قبل ظہیر عباس نے ورلڈکپ 1983 میں نیوزی لینڈ کے خلاف میچ میں 103 رنز کی ناقابل شکست اننگز کھیلنے پر عالمی درجہ بندی میں پہلی پوزیشن حاصل کی تھی، پھر جاوید میانداد نے ورلڈکپ 1987 میں سری لنکا کے خلاف 103 رنز بناکر یہ اعزاز حاصل کیا تھا۔

18 سال قبل محمد یوسف نے جنوبی افریقا کے خلاف ہوم سیریز میں 60 رنز بناکر آئی سی سی ون ڈے انٹرنیشنل رینکنگ میں پہلی پوزیشن حاصل کی تھی۔

کپتان پاکستان کرکٹ ٹیم بابراعظم کا کہنا ہے کہ وہ ظہیر عباس، جاوید میانداد اور محمد یوسف جیسے مایہ ناز کھلاڑیوں کی فہرست میں شامل ہونے پر بہت فخر محسوس کرتے ہیں۔

انہوں نے کہا کہ یہ تینوں کرکٹرز ہمیشہ پاکستان کی کرکٹ کے روشن ستارے رہیں گے۔

بابراعظم کا کہنا ہے کہ اب ان کا اگلا ہدف اس درجہ بندی کو برقرار رکھنا ہوگا، کوشش کریں گے کہ وہ سخت محنت اور یکسوئی کا مظاہرہ کریں۔ سر ویو رچرڈز نے جنوری1984 سے اکتوبر1988 تک جبکہ ویرات کوہلی نے 1258 روز تک یہ پوزیشن اپنے پاس رکھی۔

اس کے علاوہ اوپنر فخر زمان نےجنوبی افریقا کے خلاف تین میچوں میں 302 رنزبناکر نہ صرف مین آف دی سیریزکا اعزاز حاصل کیا بلکہ وہ آئی سی سی ون ڈے انٹرنیشنل پلیئرز رینکنگ میں بھی پہلے دس بہترین بلے بازوں میں شامل ہوگئے ہیں۔ سیریز میں 8، 193 اور 101 رنز بنانے کی بدولت وہ عالمی درجہ بندی میں انیسویں سے ساتویں پوزیشن پر پہنچ گئے ہیں۔

دوسری طرف قومی کرکٹ ٹیم کے فاسٹ باؤلر شاہین شاہ آفریدی نے بھی ون ڈے انٹرنیشنل کرکٹ میں اپنی بہترین پوزیشن حاصل کرلی ہے۔ جنوبی افریقا کے خلاف سیریز کے آخری ون ڈے میچ میں 3 وکٹیں حاصل کرنے والے نوجوان فاسٹ باؤلر نے تازہ ترین عالمی رینکنگ میں 11ویں پوزیشن حاصل کرلی ہے۔