Category کرکٹ

پاکستان نے بابر اعظم کی ریکارڈ ساز سنچری کی بدولت جنوبی افریقہ کو تیسرے ٹی20 میچ میں یکطرفہ مقابلے کے بعد 9 وکٹوں سے شکست دے دی۔

سنچورین میں کھیلے گئے سیریز کے تیسرے ٹی20 میچ میں پاکستان نے ٹاس جیت کر پہلے باؤلنگ کا فیصلہ کیا۔

جنوبی افریقہ نے اننگز کا آغاز کیا تو اوپنرز نے ٹیم کو 108 رنز کا عمدہ آغاز فراہم کیا اور اپنی اپنی نصف سنچریاں بھی مکمل کیں۔

اس شراکت کا خاتمہ اس وقت ہوا جب ایڈن مرکرم 31 گیندوں پر 4 چھکوں اوت چھ چوکوں سے مزین 63 رنز کی اننگز کھیلنے کے بعد محمد نواز کی وکٹ بنے۔

جیارج لنڈے نے بھی 11 گیندوں رپ 22 رنز کی جارحانہ اننگز کھیلی لیکن اس سے قبل کہ وہ مزید خطرناک ثابت ہوتے، فہیم اشرف نے ان کی وکٹیں بکھیر دیں جبکہ جینمن ملان بھی 55 رنز بنانے کے بعد نواز کی دوسری وکٹ بن گئے۔

کپتان ہنری کلاسن اور ایندائل فلکوایو کچھ خاطر خواہ کارکدگی نہ دکھا سکے اور بالترتیب 15 اور 11 رنز بنانے کے بعد پویلین لوٹے۔

اختتامی اوورز میں راسی وین ڈر ڈوسن نے جارحانہ بیٹنگ کرتے ہوئے 20 گیندوں پر 34 رنز کی اننگز کھیلی جس کی بدولت جنوبی افریقہ کی ٹیم مقررہ اوور میں 5 وکٹوں کے نقصان پر 203 رنز بنانے میں کامیاب رہی۔

پاکستان کی جانب سے محمد نواز 2 وکٹوں کے ساتھ سب سے کامیاب باؤلر رہے جبکہ فہیم اشرف، حسن علی اور شاہین شاہ آفریدی نے ایک، ایک وکٹ حاصل کی۔

پاکستان نے ہدف کا تعاقب شروع کیا تو ابتدائی دو اوورز میں دونوں بلے باز زیادہ کھل کر بیٹنگ نہ کر سکے اور ایسا لگا کہ شاید پاکستانی ٹیم ایک بڑے ہدف کے بوجھ تلے دب کر مجموعے کے حصول میں ناکام رہے۔

لیکن پھر بابر اعظم اور محمد رضوان دونوں نے جارحانہ بیٹنگ کا سلسلہ شروع اور جنوبی افریقی باؤلرز کے چھکے چھڑا دیے۔

دونوں کھلاڑیوں بالخصوص بابر کا انداز انتائی جارحانہ تھا جو گزشتہ میچ میں سست رفتار نصف سنچری کی کسر پوری کرنے کے موڈ میں نظر آئے۔

گزشتہ میچ میں 50 گیندوں پر 50 رنز بنانے والے قومی ٹیم کے کپتان نے اس میچ میں صرف 27 گیندوں پر اپنی نصف سنچری مکمل کی۔

دوسرے اینڈ سے رضوان نے بھی ان کا بھرپور ساتھ دیا اور 32 گیندوں پر نصف سنچری مکمل کی۔

جنوبی افریقہ کو اس موقع پر وکٹ لینے کا موقع ملا جب 13ویں اوور کی پہلی گیند پر رضوان نے پوائنٹ پر شاٹ کھیلا لیکن وہاں موجود بلجون کیچ نہ تھام سکے۔

بابر نے عمدہ بیٹنگ کا سلسلہ جاری رکھا اور 27 گیندوں پر نصف بنانے والے بلے باز نئے اپنی دوسری نصف سنچری صرف 22 گیندوں پر بناتے ہوئے ٹی20 انٹرنیشنل میں پہلی سنچری مکمل کر لی۔

ببار نے صرف 49 گیندوں پر اپنی نصف سنچری مکمل کی اور ہدف کے تعاقب سے محض چند قدم کی دوری پر 122 رنز کی شاندار انگز کھیلنے کے بعد پویلین لوٹے، 59 رنز کی اس اننگز میں 4 چھکے اور 15 چوکے شامل تھے۔

پاکستان نے 18 اوورز میں 204 کا ہدف حاصل کر لیا اور سیریز میں 1-2 کی برتری بھی حاصل کر لی۔

محمد رضوان نے 47 گیندوں پر 73 رنز کی اننگز کھیلی اور ناقابل شکست رہے۔

بابر اعظم کو عمدہ بیٹنگ پر میچ کا بہترین کھلاڑی قرار دیا گیا،

یاد رہے کہ سنچورین میں کھیلے جا رہے سیریز کے تیسرے ٹی20 میں پاکستان کے کپتان بابر اعظم نے ٹاس جیت کر پہلے جنوبی افریقہ کو بیٹنگ کی دعوت دی۔

پاکستان نے میچ کے لیے ٹیم میں تین تبدیلیاں کرتے ہوئے محمد حسنین، شرجیل خان اور عثمان قادر کو آرام کا موقع فراہم کیا ہے۔

ان تینوں کھلاڑیوں کی جگہ فخر زمان، حارث رؤف اور آصف علی کو فائنل الیون کا حصہ بنایا گیا ہے۔

حیران کن امر یہ ہے کہ گزشتہ میچ میں باؤلنگ کی ناکامی کے باوجود اس میچ میں لیگ اسپنر عثمان قادر کی جگہ ایک باؤلر کم کر کے آصف علی کو ٹیم میں شامل کیا گیا ہے۔

میچ کیلئے دونوں ٹیمیں ان کھلاڑیوں پر مشتمل ہیں۔

پاکستان: بابر اعظم(کپتان)، فخر زمان، حیدر علی، محمد رضوان، محمد حفیظ، آصف علی، محمد نواز، فہیم اشرف، حسن علی، شاہین شاہ آفریدی اور حارث رؤف۔

جنوبی افریقہ: ہنری کلاسن(کپتان)، جینمن ملان، ایڈن مرکرم، راسی وین ڈر ڈوسن، پیٹ وین بلجون، جیارج لنڈے، ایندائل فلکوایو، سیسانڈا مگالا، بیورن ہینڈرکس، لیزاڈ ولیمز اور تبریز شمسی۔

برا دن گزرگیا، اگلا میچ ہمارا ہوگا‘ پاکستانی کپتان بابر اعظم نے سیریز میں پھر برتری کا عزم ظاہر کردیا۔

پاکستان کو دوسرے ٹی 20 میں جنوبی افریقہ کے ہاتھوں 6 وکٹ کی شکست کا سامنا کرنا پڑا،پی سی بی کی جانب سے جاری کردہ ویڈیو میں کپتان بابر اعظم نے کہاکہ ہمارا دن اچھا نہیں تھا، جلد گرنے والی وکٹوں نے بھی کافی نقصان پہنچایا، جس کی وجہ سے ہم مومینٹم کھو بیٹھے، مڈل آرڈر میں میری اور حفیظ کی شراکت بھی لمبی نہیں چلی،یہ بات درست ہے کہ مڈل آرڈر جدوجہد کر رہی ہے تاہم ابھی ہمیں یہاں اور زمبابوے میں بھی ٹی 20 میچز کھیلنے ہیں، اس دوران مختلف کمبی نیشنز کی آزمائش جاری رہے گی تاکہ بھارت میں شیڈول ٹی 20 ورلڈ کپ تک موزوں کمبی نیشن تشکیل دے سکیں۔

جنوبی افریقہ سے اگلے میچ کے بارے میں بابر اعظم نے کہا کہ ہمارا بْرا دن گزرچکا، ہم شکست کو پس پشت ڈال کر مثبت چیزوں کے ساتھ میدان میں اتریں گے،ایک بار پھر سیریز میں برتری حاصل کرنے کی پوری کوشش ہوگی، مجھے اپنی ٹیم پر مکمل اعتماد اور یقین ہے کہ اگلے میچ میں ہم اچھا پرفارم کریں گے۔ قومی کپتان نے مزید کہاکہ دوسرے میچ میں فتح کا کریڈٹ جنوبی افریقہ کو بھی دینا چاہیے، مختلف پچ پر انھوں نے بہت اچھی بولنگ کی۔

پاکستان نے جنوبی افریقہ کو پہلے ٹی20 میچ میں شکست دے کر سیریز میں 0-1 کی برتری حاصل کرنے کے ساتھ ساتھ نیا ریکارڈ قائم کردیا۔

جوہانسبرگ میں ہفتے کے روز کھیلے گئے سیریز کے پہلے ٹی20 میچ میں جنوبی افریقہ نے ٹاس جیت کر پہلے بیٹنگ کا فیصلہ کیا تھا۔

جنوبی افریقہ نے ہنری کلاسن اور ایڈن مرکرم کی نصف سنچریوں کی بدولت 6 وکٹوں کے نقصان پر 188 رنز بنائے تھے۔

پاکستان نے محمد رضوان کی 72 رنز کی جرات مندانہ اننگز کی بدولت میزبان ٹیم کو دلچسپ مقابلے کے بعد 4 وکٹوں سے شکست دی۔

پاکستان نے 189 رنز کے ہدف کا تعاقب کر کے سیریز میں برتری حاصل کرنے کے ساتھ ساتھ نیا ریکارڈ بنا دیا اور یہ پاکستانی ٹیم کی جانب سے ٹی 20 کرکٹ میں اب تک حاصل کیا گیا سب سے بڑا ہدف ہے۔

اس سے قبل پاکستان نے سب سے بڑا ہدف 2018 میں آسٹریلیا میں حاصل کیا تھا جب گرین شرٹس نے 187 رنز کا ہدف کامیابی سے حاصل کیا تھا۔

یہ میچ قومی ٹیم کے سب سے تجربہ کار بلے باز محمد حفیظ کے لیے بھی یادگار تھا جنہوں نے 100 ٹی 20 میچز کھیلنے کا اعزاز حاصل کر لیا۔

اس میچ میں گوکہ حفیظ نے صرف 13 رنز بنائے لیکن اس دوران وہ پاکستان کی جانب سے ٹی20 انٹرنیشنل میچوں میں سب سے زیادہ رنز بنانے والے بلے باز بن گئے۔

اس سے قبل یہ اعزاز شعیب ملک کے پاس تھا جنہوں نے 2 ہزار 335 رنز بنائے تھے جبکہ حفیظ اب 2 ہزار 336 رنز کے ساتھ پاکستان کے سب سے کامیاب بلے باز ہیں۔

کورونا وائرس کے کیسز میں اضافے کے باعث بنگلہ دیش میں لاک ڈاؤن کی مدت میں اضافہ کردیا گیا جس کے باعث پاکستان انڈر 19 کرکٹ ٹیم کا دورہ بنگلہ دیش ملتوی ہوگیا۔

پاکستان کرکٹ بورڈ (پی سی بی) سے جاری بیان کے مطابق ابتدائی طور پر قومی انڈر 19 کرکٹ ٹیم کو ایک چار روزہ اور 5 ایک روزہ میچز پر مشتمل سیریز کے لیے 11 اپریل کو ڈھاکہ روانہ ہونا تھا تاہم بنگلہ دیش میں لاک ڈاؤن کے باعث روانگی میں چھ روز کی تاخیر کی گئی۔

بعد ازاں بنگلہ دیش کی حکومت نے ملک بھر میں لاک ڈاؤن کو بڑھانے کا فیصلہ کیا، جس کے باعث دورے کو غیر معینہ مدت تک کے لیے ملتوی کردیا گیا۔

بیان میں کہا گیا کہ دونوں کرکٹ بورڈز اب کورونا وائرس کی صورتحال میں بہتری آنے پر باہمی مشاورت سے دورے کی نئی تاریخوں کا اعلان کریں گے۔

دورے کی تیاریوں کی غرض سے لاہور میں جاری قومی انڈر 19 کرکٹ ٹیم کا تربیتی کیمپ بھی فوری طور پر ختم کرنے کا فیصلہ کیا گیا ہے۔

واضح رہے کہ دو روز قبل پی سی بی نے دورہ بنگلہ دیش کے لیے آل راؤنڈر قاسم اکرم کو قومی انڈر 19 کرکٹ ٹیم کی قیادت سونپی تھی۔

آل راؤنڈر کا کہنا تھا کہ دورہ بنگلہ دیش، قومی انڈر 19 کرکٹ ٹیم کے لیے ایک مفید تجربہ ثابت ہوگا۔

پاکستان نے محمد رضوان کی عمدہ بیٹنگ کی بدولت جنوبی افریقہ کو پہلے ٹی20 میچ میں 4 وکٹوں سے شکست دے کر سیریز میں 0-1 کی برتری حاصل کر لی۔

قومی ٹیم نے 189 رنز کا ہدف آخری اوور کی پانچویں گیند پر حاصل کیا۔

جوہانسبرگ میں کھیلے گئے سیریز کے پہلے ٹی20 میچ میں جنوبی افریقہ نے ٹاس جیت کر پہلے بلے بازوں کو آزمانے کا فیصلہ کیا۔

میزبان اوپنرز نے اپنی ٹیم کو 31 رنز کا آغاز فراہم کیا جس کے بعد محمد نواز نے 24 رنز بنانے والے جینمن ملان کو چلتا کردیا۔

پہلا میچ کھیلنے والے ویہان لوبے کچھ خاص تاثر قائم کرنے میں ناکام رہے اور 4 رنز بنانے والے حسن علی کی وکٹ بن گئے۔

دو وکٹیں گرنے کے بعد ایڈن مرکرم اور کپتان ہنری کلاسن نے ٹیم کو سہارا دیا اور 62 رنز کی شراکت قائم کر کے اپنی ٹیم کی بڑے مجموعی تک رسائی کی راہ ہموار کی۔

مرکرم نے 8 چوکوں اور ایک چھکے کی مدد سے 51 رنز بنائے جس کے بعد نواز نے وکٹوں کے عقب میں موجود رضوان کی مدد سے انہیں قابو کر لیا۔

کلاسن نے جارحانہ بیٹنگ جاری رکھی اور عمدہ نصف سنچری اسکور کرنے کے ساتھ ساتھ پیٹ وین بلجون کے ساتھ 61 رنز کی ساجھے داری قائم کی، وہ 28 گیندوں پر 4 چھکوں اور دو چوکوں سے مزین 50 رنز بنانے کے بعد حسن کی وکٹ بنے۔

ایک موقع پر جنوبی افریقہ نے 16 اوورز میں 3 وکٹوں کے نقصان پر 159 رنز بنائے تھے اور ایسا محسوس ہوتا تھا کہ وہ باآسانی 200 سے زائد رنز بنانے میں کامیاب ہو جائیں گے لیکن اختتامی اوورز میں پاکستانی باؤلرز نے عمدہ باؤلنگ کرتے ہوئے جنوبی افریقہ کے ارمان خاک میں ملا دیے۔

جنوبی افریقہ نے ایڈن مرکرم اور ہنری کلاسن کی نصف سنچریوں کی بدولت 6 وکٹوں کے نقصان پر 188 رنز بنائے— فوٹو: اے ایف پی
اننگز کے آخری اوور میں چھکے اور چوکے کی بدولت جنوبی افریقہ کی ٹیم 6 وکٹوں کے نقصان پر 188 رنز بنانے میں کامیاب ہوئی۔

پاکستان کی جانب سے محمد نواز اور حسن علی دو، دو وکٹوں کے ساتھ سب سے کامیاب باؤلر رہے۔

ہدف کے تعاقب میں پاکستان کو اوپنرز بابر اعظم اور محمد رضوان نے 41 رنز کا آغاز فراہم کیا جس کے بعد پاکستان کے کپتان کی 14 رنز کی اننگز اختتام کو پہنچی۔

فخر زمان اور محمد رضوان نے 45 رنز کی شراکت قائم کی لیکن ون ڈے سیریز میں رن کے انبار لگانے والے فخر زمان اننگز کے 10ویں اوور کی آخری گیند پر 27 رنز بنا کر چلتے بنے۔

محمد حفیظ اپنے 100ویں میچ کو یادگار نہ بنا سکے اور صرف 13 رنز بنانے کے بعد تبریز شمسی کو وکٹ دے بیٹھے جبکہ نوجوان حیدر علی کی اننگز بھی 14رنز پر اختتام کو پہنچی۔

پاکستانی ٹیم ابھی اس نقصان سے سنبھلی بھی نہ تھی کہ محمد نواز پہلی ہی گیند پر بغیر کوئی رن بنائے پویلین لوٹ گئے اور اس طرح پاکستان کی ٹیم پانچویں وکٹ بھی گنوا بیٹھی۔

آدھی ٹیم کے آؤٹ ہونے کے بعد باوجود رضوان نے ہمت نہ ہاری اور نصف سنچری بنانے والے بلے باز نے فہیم اشرف کے ہمراہ ٹیم کو فتح کی دہلیز تک پہنچانے کا بیڑا اٹھایا۔

دونوں کھلاڑیوں نے بڑھتے ہوئے رن ریٹ کے پیش نطر جارحانہ بلے بازی کا مظاہرہ کیا اور 48 رنز کی شاندار شراکت قائم کی۔

اس عمدہ شراکت کا خاتمہ اس وقت ہوا جب فہیم اشرف 14 گیندوں پر 30 رنز بنانے کے بعد لزاد ولیمز کی وکٹ بن گئے۔

فہیم اشرف کے آؤٹ ہونے کے باوجود پاکستان کی ٹیم نے ایک گیند قبل ہی ہدف تک رسائی حاصل کر کے میچ میں 4 وکٹوں کامیابی حاصل کر لی۔

اس میچ میں فتح کے ساتھ ہی قومی ٹیم نے سیریز میں 0-1 کی برتری بھی حاصل کر لی۔

محمد رضوان نے عمدہ بیٹنگ کرتے ہوئے 50 گیندوں پر دو چھکوں اور 9 چوکوں کی مدد سے ناقابل شکست 74 رنز کی اننگز کھیلی۔

واضح رہے کہ آج کا میچ تجربہ کار آل راؤنڈر محمد حفیظ اپنے کیریئر کا 100واں ٹی20 انٹرنیشنل میچ تھا۔

میچ کیلئے دونوں ٹیمیں ان کھلاڑیوں پر مشتمل تھیں۔

پاکستان: بابر اعظم(کپتان)، فخر زمان، حیدر علی، محمد رضوان، محمد حفیظ، محمد نواز، فہیم اشرف، حسن علی، شاہین شاہ آفریدی، عثمان قادر اور حارث رؤف۔

جنوبی افریقہ: ہنری کلاسن(کپتان)، جینمن ملان، ایڈن مرکرم، پیٹ وین بلجوئن، ویہان لوبے، جیارج لنڈے، ایندائل فلکوایو، سیسانڈا مگالا، بیورن ہینڈرکس، لیزاڈ ولیمز، تبریز شمسی۔

جنوبی افریقہ سے ٹی ٹوئنٹی سیریز میں فخرزمان مڈل آرڈر میں بھی بیٹنگ کیلیے تیار ہیں۔

جنوبی افریقہ سے ون ڈے میچز میں 2سنچریاں بنا کر مین آف دی سیریز قرار پانے والے فخرزمان کا کہناہے کہ کنڈیشنز کو پیش نظر رکھتے ہوئے ابتدائی 6اوورزمیں وکٹ بچائے رکھنے کی حکمت عملی اپنائی،ورچوئل میڈیا کانفرنس میں انھوں نے کہا کہ نئی گیند کا میرٹ پر سامنا کیا، سیٹ ہونے کے بعد اپنے نیچرل انداز سے بیٹنگ کی، اسی وجہ سے وکٹ پر زیادہ دیر قیام اور پرفارم کرنے کا موقع ملا۔

انھوں نے کہا کہ ٹیم انتظامیہ نے افریقی کنڈیشنز میں کارکردگی بہتر بنانے کے مشورے دیے تھے،ڈریسنگ روم میں مصباح الحق اور یونس خان جیسے پرفارمرز کی موجودگی سے بہت کچھ سیکھنے اور فائدہ اٹھانے کا موقع مل رہا ہے، اکیڈمی میں سخت محنت کرنے کا صلہ اچھی پرفارمنس کی صورت میں حاصل ہوا، بْرے وقت میں سپورٹ کرنے والوں کا شکریہ ادا کرتا ہوں، سنچری یا ڈبل سنچری نہیں بلکہ اس بات پر توجہ مرکوز ہوتی ہے کہ اننگز ٹیم کے کام آئے۔
اوپنر نے کہاکہ پاکستان ٹیم کو اس سیریز میں جیت کی بہت ضرورت تھی، پروٹیز کو ہوم کنڈیشنز میں ہرانا بہت بڑی بات ہے،اس زبردست فتح سے سب کے اعتماد میں بے پناہ اضافہ ہوگیا۔

فخرزمان نے کہا کہ بابر اعظم دوسرے اینڈ پر موجود ہوں تو بڑی شراکت قائم کرنے میں مدد ملتی ہے، کپتان مشکل کنڈیشنز کو بھی آسان بنانے کے ماہر ہیں، وہ ڈریسنگ روم اور میدان میں سب کو بہت سپورٹ کرتے ہیں،اسی طرح میرا ساتھی اوپنر امام الحق کے ساتھ بھی کافی اچھا تال میل ہے جس کی وجہ سے ہم اچھا آغاز فراہم کرنے میں کامیاب رہتے ہیں۔

فخر زمان نے شرجیل خان کو اپنے فیورت کرکٹرز میں شمار کرتے ہوئے کہا کہ ٹی ٹوئنٹی میں ان کے ساتھ اننگز کا آغاز کرنے کا موقع ملا تو کافی اچھا لگے گا، وہ بہت زبردست بیٹسمین اور جارحانہ اسٹروکس آسانی سے کھیلتے ہیں، بابر اعظم اور محمد رضوان کی بطور اوپنرز عمدہ کارکردگی کو دیکھتے ہوئے میں مڈل آرڈر سمیت کسی بھی بیٹنگ نمبر پر کھیلنے کو تیار ہوں، یہ فیصلہ کرنا ٹیم انتظامیہ کا کام ہے کہ کسے کس نمبر پر کھلانا ہے۔

پاکستان نے جنوبی افریقہ کو سیریز کے تیسرے اور فیصلہ کن ایک روزہ میچ میں 28 رنز سے شکست دے کر سیریز میں فتح حاصل کر لی۔

سنچورین میں کھیلے تین میچوں کی سیریز کے فیصلہ کن میچ میں جنوبی افریقہ نے ٹاس جیت کر پاکستان کو بیٹنگ کی دعوت دی۔

جنوبی افریقی کپتان کا فیصلہ پاکستان کے لیے سودمند ثابت ہوا اور دونوں اوپنرز نے بہترین آغاز فراہم کیا۔

اوپنرز فخر زمان اور امام الحق نے عمدہ کھیل پیش کرتے ہوئے 112 رنز کی شراکت قائم کی، تاہم امام الحق 57 رنز بنا کر کیچ آؤٹ ہوگئے۔

اس کے بعد فخر زمان کا ساتھ دینے کپتان بابر اعظم کریز پر آئے اور ٹیم کے اسکور کو آگے بڑھانے ہوئے 200 رنز مکمل کرائے۔

فخر زمان نے ایک بار پھر شاندار بلے بازی کا مظاہرہ کرتے ہوئے 9 چوکوں اور 3 چھکوں کی مدد سے سنچری اسکور کی، جس کے بعد وہ بھی پویلین لوٹ گئے۔

محمد رضوان چند منٹ ہی وکٹ پر ٹِک پائے اور صرف 2 رنز بنا کر 214 کے مجموعی اسکور پر آؤٹ ہوگئے۔

سرفراز احمد اچھی فارم میں نظر آئے لیکن ان کی اننگز بھی صرف 13 رنز تک محدود رہی اور وہ جے جے اسمٹس کی گیند پر انہی کو کیچ دے بیٹھے۔

پاکستانی ٹیم ابھی اس نقصان سے سنبھلی بھی نہ تھی کہ اگلے اوور میں فہیم اشرف بھی صرف ایک بنا کر چلتے جس کے ساتھ ہی پاکستان کی ٹیم پانچویں وکٹ گنوا بیٹھی۔

کپتان بابراعظم نےایک مرتبہ پھر شاندار باری کھیلتے ہوئے نصف سنچری مکمل کی۔

محمد نواز بھی موقع سے فائدہ اٹھانے میں ناکام رہے اور صرف 4 رنز بنانے کے بعد ایڈن مرکرم کی دوسری وکٹ بن گئے۔

محمد رضوان پھر بڑی انگز نہ کھیل سکے اور اسٹمپ ہو کر پویلین لوٹے— فوٹو: اے ایف پی
آخری دس اوورز میں وقتاً فوقتاً گرنے والی وکٹوں کی وجہ سے پاکستانی ٹیم تیز رفتاری سے رنز اسکور نہ کر سکی۔

تاہم آخری دو اوورز میں پاکستان نے جارحانہ کھیل پیش کیا اور حسن علی اور بابر اعظم نے چھکوں کی بارش کرتے ہوئے دو اوورز میں 43 رنز بنائے۔

حسن علی نے اننگز کے 49ویں اوور میں 4 چھکے لگا ئے جبکہ بابر نے 50ویں اوور میں دو چھکے اور ایک چوکا لگایا۔

اننگز کی آخری گیند پر بابر اعظم کو سنچری مکمل کرنے کے لیے 6 رنز درکار تھے لیکن چھکا مارنے کی کوشش میں وہ باؤنڈری پر کیچ ہو گئے۔

پاکستان نے مقررہ اوورز میں 7 وکٹوں کے نقصان پر 320 رنز بنائے۔

بابر نے 82 گیندوں پر تین چھکوں اور 7 چوکوں کی مدد سے 94 رنز بنائے جبکہ حسن علی نے 11 گیندوں پر 32 رنز کی جارحانہ اننگز کھیلی۔

ہدف کے تعاقب میں ایڈن مرکرم کے ساتھ جینمن ملان نے اننگز کا آغاز کیا اور دونوں نے اپنی ٹیم کو 54 رنز کا اچھا آغاز فراہم کیا۔

پاکستان کو پہلی کامیابی شاہین شاہ آفریدی نے دلائی جب 18 رنز بنانے والے ایڈن مرکرم وکٹوں کے عقب میں سرفراز احمد کو کیچ دے بیٹھے۔

اسکور 77 تک پہنچا تو کیریئر کا پہلا ون ڈے میچ کھیلنے والے عثمان قادر نے 17 رنز بنانے والے جے جے اسمٹس کو چلتا کر کے پہلی وکٹ حاصل کی۔

دو وکٹیں گرنے کے بعد ملان کا ساتھ دینے کپتان ٹیمبا باووما آئے اور دونوں نے 50 رنز کی شراکت قائم کر کے اسکور کو 127 تک پہنچا دیا۔

اس مرحلے پر سیریز کا پہلا میچ کھیلنے والے محمد نواز نے ایک ہی اوور میں ملان اور باووما کو چلتا کر کے پاکستان کو میچ میں مضبوط پوزیشن میں پہنچا، ملان نے 77 اور باووما نے 20 رنز بنائے۔

جنوبی افریقہ کو اگلا دھچکا اس وقت لگا جب نواز نے چند رنز کے اضافے سے ہنری کلاسن کو بھی چلتا کر کے پاکستان کو پانچویں کامیابی دلا دی۔

پانچ وکٹیں گرنے کے بعد ایندائل فلکوایو اور کائل ویرین کی جوڑی وکٹ پر اکٹھا ہوئی اور دونوں نے ذمے دارانہ بیٹنگ کرتے ہوئے اپنی ٹیم کی ڈبل سنچری مکمل کرائی۔

فلکوایو اور ویرین نے چھٹی وکٹ کے لیے 108 رنز کی شراکت قائم کی اور اپنی ٹیم کو میچ میں واپس لے آئے۔

اس مرحلے پر ایسا محسوس ہوتا تھا کہ یہ دونوں کھلاڑی جنوبی افریقہ کو فتح دلانے میں کامیاب ہو سکتے ہیں لیکن حارث رؤف نے ویرین کی اننگز کا خاتمہ کر کے میزبان ٹیم کے ارمانوں پر پانی پھیر دیا، ویرین نے 3 چھکوں اور اتنے ہی چوکوں کی مدد سے 62 رنز بنائے۔

فلکوایو سے بھی ساتھی کھلاڑی کی جدائی برداشت نہ ہوئی اور وہ بھی مجموعی اسکور میں 3 رنز کے اضافے سے چلتے بنے، انہوں نے بھی نصف سنچری اسکور کرتے ہوئے 54 رنز بنائے۔

بیورن ہینڈرکس بھی صرف ایک رنز بنا سکے جبکہ 19 رنز بنانے والے کیشپ مہاراج کی وکٹیں شاہین شاہ آفریدی نے بکھیر دیں۔

میچ کے آخری اوور میں شاہین نے ڈیرل ڈپاویلن کو آؤٹ کرکے پاکستان کو میچ اور سیریز میں فتح سے ہمکنار کرا دیا۔

پاکستان کی جانب سے محمد نواز 34 رنز کے عوض تین وکٹیں لے کر سب سے کامیاب باؤلر رہے جبکہ شاہین شاہ آفریدی نے بھی تین اور حارث رؤف نے دو وکٹیں حاصل کیں۔

میچ میں فتح کی بدولت پاکستان نے تین میچوں کی سیریز بھی 1-2 سے اپنے نام کر لی۔

دورہ جنوبی افریقہ میں انجری کا شکار ہونے والے شاداب خان کی جگہ لیگ اسپنر زاہد محمود کو دورہ زمبابوے کے لیے قومی ٹیم کا حصہ بنا لیا گیا ہے۔

زاہد محمود کو زمبابوے کے خلاف ٹیسٹ اسکواڈ کا حصہ بنایا گیا تھا لیکن اب شاداب خان کی انجری کے بعد انہیں تین ٹی20 میچوں کے لیے بھی اسکواڈ میں شامل کر لیا گیا ہے۔

یاد رہے کہ شاداب خان جوہانسبرگ میں جنوبی افریقہ کے خلاف کھیلے گئے دوسرے ایک روزہ میچ میں بیٹنگ کے دوران بائیں بازو پر گیند لگنے کے باعث انجری کا شکار ہوئے تھے۔

انجری کا شکار ہونے پر شاداب خان کا ایکسرے کروایا گیا جس میں انٹرا آرٹیکلور کیمونیکیٹڈ فریکچر کی تشخیص ہوئی تھی۔

آل راؤنڈر کو چار ہفتوں کے لیے ری ہیب تجویز کیا گیا تھا جس کی وجہ سے وہ کچھ عرصے کے لیے کرکٹ سے دور ہوگئے ہیں۔

زاہد محمود کے ساتھ ساتھ فخر زمان کو بھی جنوبی افریقہ کے خلاف سیریز میں عمدہ فارم کا مظاہرہ کرنے پر ٹی20 اسکواڈ کے ہمراہ رکھنے کا فیصلہ کرلیا گیا۔

فخر زمان کو اس سے قبل ٹی20 اسکواڈ کا حصہ نہیں بنایا گیا تھا۔

ٹیم مینجمنٹ کی درخواست پر سلیکشن کمیٹی نے اسکواڈ میں دونوں تبدیلیوں کی منظوری دے دی۔

پاکستان اور جنوبی افریقہ کے درمیان تین ٹی20 میچوں کی سیریز 21 سے 25 اپریل تک ہرارے میں کھلیلی جائے گی جس کے بعد دونوں ٹیمیں ٹیسٹ میچ میں آمنے سامنے ہوں گی۔

لاہور: جنوبی افریقہ اور پاکستان کے درمیان ون ڈے سیریز کا تیسرا اور فیصلہ کن میچ آج سنچورین میں کھیلا جائے گا۔

سنچورین میں جنوبی افریقہ کیخلاف ون ڈے سیریز کا فاتحانہ آغاز کرتے ہوئے پاکستان نے 3وکٹ سے فتح سمیٹی تھی، بولرز نے ابتدا میں جلد وکٹیں حاصل کرتے ہوئے پروٹیز کو روایتی جارحانہ انداز اختیار کرنے کا موقع نہیں دیا، ریسی وان ڈر ڈوسین اور ڈیوڈ ملر کی اچھی شراکت سے میزبان ٹیم معقول ہدف دینے میں کامیاب ہوئی۔

جواب میں بابر اعظم اور امام الحق نے بڑی پارٹنرشپ سے فتح کی بنیاد رکھی، مڈل آرڈر کی ناکامی کے باوجود پاکستان نے آخری گیند پر ہدف حاصل کرلیا۔ دوسرے میچ میں جنوبی افریقی بیٹنگ لائن کی فارم لوٹ آئی،کوئنٹن ڈی کک، ٹیمبا باووما، ریسی ون ڈر ڈوسین اور ڈیوڈ ملر نے اچھا رن ریٹ برقرار رکھتے ہوئے پہاڑ جیسا مجموعہ حاصل کیا۔
جواب میں گرین شرٹس کی بیٹنگ استحکام کو ترستی رہی لیکن فخرزمان نے غیر معمولی اننگز کھیلتے ہوئے آخری اوور میں متنازع رن آؤٹ تک فتح کی امیدیں برقرار رکھیں،دونوں میچز میں اینرچ نورکیا مہمان بیٹسمینوں کیلیے مشکل ترین بولر ثابت ہوئے، سیریز1-1سے برابر ہونے کے بعد اب بدھ کو دونوں ٹیمیں فیصلہ کن معرکے کیلیے ایک بار پھر سنچورین میں مقابل ہوں گی۔

5ٹاپ اسٹارز کی آئی پی ایل کیلیے رخصتی کے بعد کمزور پڑنے والی جنوبی افریقی ٹیم کو زیر کرتے ہوئے سیریز کی ٹرافی پر قبضہ جمانے کا سنہری موقع گرین شرٹس کے ہاتھ آگیا،اس سے قبل پلیئنگ الیون کے حوالے سے چند اہم فیصلے کرنا ہوں گے،ٹاپ4میں شامل فخرزمان، امام الحق، بابر اعظم اور محمد رضوان اچھی فارم میں ہیں،پاکستان کی توقع ہوگی کہ ان میں سے کم ازکم ایک سنچری اسکور کرے۔

گزشتہ دونوں میچز میں پرفارم نہ کرنے والے دانش عزیز اورآصف علی کی جگہ خطرے میں ہے، اگر ان میں سے کوئی ڈراپ ہوا تو خلا پْر کرنے کیلیے حیدر علی اور سرفراز احمد امیدوار ہیں، سابق کپتان وکٹ کیپر بیٹسمین کو میدان میں اتارے جانے کا امکان کم ہے، انجری کے باعث سیریز سے باہر ہونے والے شاداب خان کی جگہ سنبھالنے کیلیے عثمان قادر مضبوط امیدوار ہیں،محمد نواز کا آپشن بھی موجود ہوگا۔

فہیم اشرف پیس بولنگ کے ساتھ بیٹنگ میں بھی ٹیم کیلیے مفید ثابت ہوسکتے ہیں،شاہین شاہ آفریدی اور حارث رؤف کے ساتھ محمد حسنین کی جگہ برقرار رہنے کا امکان ہے، حسن علی کو شامل کرنے پر بھی غور کیا گیا لیکن کورونا سے نجات پانے والے پیسر کی میچ فٹنس کا مکمل جائزہ لیا جائے گا۔

دوسری جانب آئی پی ایل کیلیے ریلیز کیے جانے کے بعد جنوبی افریقہ ان فارم بیٹسمینوں کوئنٹن ڈی کک اور ڈیوڈ ملر کے ساتھ پاکستانی بیٹنگ لائن کیلیے مشکلات کا سبب بننے والے پیسر اینرچ نورکیا کی خدمات سے محروم ہوچکا، کاگیسو ربادا اور لونگی نگیڈی کا خلا پْر کرنے کیلیے متبادل تلاش کرنا ہوں گے۔

تیسرے ون ڈے میں ایڈن مارکرم، ٹیمبا باووما، ریسی ون ڈر ڈوسین اور ہینری کلاسن کو بیٹنگ کا بوجھ اٹھانا پڑے گا،ڈی کک کی عدم موجودگی میں ہینری کلاسن کو وکٹ کیپنگ گلوز بھی سنبھالنا ہیں، ایڈم مارکرم کے ساتھ جنیمن ملان اننگز کا آغاز کریں گے، ڈیوڈ ملر کی جگہ کائل ویرائن سنبھالیں گے، اسپن کا شعبہ تبریز شمسی کے سپرد ہوگا۔
فاسٹ بولرز کی کمان گذشتہ میچ میں اچھی بولنگ کرنے والے اینڈل فیلکوایو کے پاس ہوگی، لیتھو سمپالا اور ڈوپاویلون ساتھ دیں گے، لیفٹ آرمر بیوران ہینڈرکس یا دوسرے اسپنر کے طور پرکیشو مہاراج کا انتخاب ہوگا۔

سنچورین کی پچ پر صبح کے وقت نمی سے پیسرز کو مدد ملتی ہے، اس لیے ٹاس جیتنے والی ٹیم بولنگ کو ترجیح دے گی،پیشگوئی کے مطابق بارش کی مداخلت کا خدشہ بھی موجود ہے۔

لاہور: قومی ٹیم کے ہیڈکوچ مصباح الحق نے تیسرے اور فیصلہ کن ون ڈےمیچ کےلیے ٹیم میں دو سے تین تبدیلیوں کا اشارہ دےدیا۔
مصباح کا کہناہے کہ شاداب خان کے متبادل سمیت ٹیم کمبی نیشن کے لیے جو تبدیلی ضروری ہوئی کریں گے۔ مڈل آرڈر بیٹنگ میں بہتری کی ضرورت ہے۔ سنچورین اور وانڈررز کی پچز جنوبی افریقی کنڈیشنز کی حقیقی ترجمانی کرتی ہیں، ان باؤنسی پچز پر ہمارے ٹاپ آرڈر بیٹسمین کا سنچری کرنا بہت خوش آئند ہے۔
ہیڈکوچ نے بولرز کی کارکردگی کے حوالےسے اس یقین کا اظہار کیاہے کہ ہمارے باؤلرز تیسرے ون ڈے انٹرنیشنل میں بہترین کم بیک کریں گے، ڈریسنگ روم کا ماحول بہت حوصلہ افزاء ہے، لڑکے سیریز جیتنے کے لیے پرامید ہیں۔ نوجوان کھلاڑیوں پر مشتمل اس ٹیم کے لیے ہر جیت بہت اہم ہے۔