Category کرکٹ

(میڈیا پاکستان ): لاہور ریجن سینئر انٹر ڈسٹرکٹ کرکٹ ٹورنامنٹ کا میچ بارش کے باعث تاخیر کا شکار، چند منٹوں کی بارش نے میچ میں گھنٹوں کا وقفہ کرا دیا، میچ لاہور کے ویسٹ اور نارتھ زون کی ٹیموں کے مابین کھیلا جارہا ہے، بارش نے میچ بند کرایا تو کھلاڑیوں کو خوش گپیوں کا موقع مل گیا۔
ایل سی سی اے کرکٹ گرائونڈ میں کھیلے جانے والے میچ کی پہلی اننگ میں نارتھ زون نے 331 رنز بنائے تھے جس کے جواب میں ویسٹ زون وائٹ نے کھیل کا آغاز کرنا تھا لیکن بارش سے میچ تاخیرکا شکار ہوگیا۔
گرائونڈ مینیجر عبدالحی کا کہنا تھا کہ گرائونڈ کے پچ کور پرانے ہوچکے ہیں جنہیں تبدیل کرنا ضروری ہے، پی سی بی کو بارہا کور تبدیلی کے حوالے سے درخواست کی لیکن شنوائی نہیں ہوئی۔
کھلاڑی سہانے موسم سے بھرپور لطف اندوز ہوئے، کسی نے دوستوں کے ساتھ خوش گپیوں میں وقت گزارا، کوئی چائے کی چُسکیاں لیتا نظر آیا، کسی نے کوچ سے بیٹنگ ٹپس لیں اور کچھ تو وقت گزارنے کے لیے گرائونڈ کے ساتھ پچ کور ہٹاتے رہے۔
بلا شبہ ایل سی سی اے گرائونڈ لاہور کی سب سے بہترین گرائونڈ ہے لیکن رین کور جیسی سہولیات کو بہتر بنا کر اس گرائونڈ کو موسمی تغیر و تبدل سے بھی بچایا جاسکتا ہے۔

 بیسٹری، و یسٹ انڈیز:جمیکا ٹالا واہز کے کپتان کمار سنگا کارا نے کہا ہے پاکستانی آل راونڈر عماد وسیم کی عدم موجودگی ان کی ٹیم کے لئے نقصان دہ ثابت ہوئی۔ سینٹ کٹس کے ہاتھوں لیگ میچ میں شکست کے بعد ان کا کہنا تھا عماد وسیم کے وطن واپس لوٹنے سے ٹیم کا بیٹنگ آرڈر متاثر ہوا ہے ۔انہوں نے کہا کہ ہم نے ٹریون گرفتھ کو بیٹنگ آرڈر میں ترقی دے کی اوپنر بنایا اور انہوں نے بھی اچھی کارکردگی دکھا ئی لیکن میں سمجھتا ہوں کہ اگر عماد وسیم موجود ہو تے تو صورتحال مختلف ہو سکتی تھی۔سنگا کارا نے سینٹ کٹس کی بیٹنگ کو سراہا اور کہا کہ ٹی20میچ میں 200سے زائد کا ہدف کبھی آسان نہیں ہوتا ، ہم نے اس تک رسائی کی کوشش کی لیکن کامیاب نہ ہوسکے۔اچھی بات یہ ہے کہ ہمارے کھلاڑی مقابلے کے جذبے سے سرشار ہیں اور انہوں نے بڑے اسکور کے باوجود ہمت نہیں ہاری ۔

پاکستان میں انٹرنیشنل کرکٹ کی بحالی کے سلسلے میں آئندہ ماہ پاکستان کا دورہ کرنے والی ورلڈ الیون کی قیادت کے لیے جنوبی افریقن کھلاڑیوں ہاشم آملہ اور فاف ڈوپلیسی سے بات چیت جاری ہے۔
ورلڈالیون ستمبر کے دوسرے ہفتے میں پاکستان کے شہر لاہور کا دورہ کرے گی جہاں وہ تین ٹی 20 میچز کی سیریز کھیلے گی۔
جنوبی افریقا کے دونوں مذکورہ کھلاڑی پہلے ہی پاکستان کا دورہ کرنے والی ورلڈالیون میں شمولیت پر رضامندی ظاہر کر چکے ہیں۔
کرکٹ بورڈ ذرائع کا کہنا ہے کہ ورلڈ الیون کی قیادت کے لیے ہاشم آملہ اور فا ڈوپلیس سے بات چیت جاری ہے۔
پاکستان کرکٹ بورڈ کے چیرمین نجم سیٹھی نے گزشتہ روز پریس کانفرنس کرتے ہوئے ملک میں انٹرنیشنل کرکٹ کی بحالی کا اعلان کیا اور کہا کہ ورلڈالیون، سری لنکا اور ویسٹ انڈیز کی ٹیمیں رواں سا پاکستان کا دورہ کریں گی۔
انہوں نے مزید کہا کہ کرکٹ کھیلنے والے 7 ممالک کے 15 کھلاڑیوں نے پاکستان آنے پر رضامندی ظاہر کر دی ہے اور وہ آئندہ 72 گھنٹوں میں ان کھلاڑیوں کے ناموں کا اعلان کریں گے۔
برطانوی خبر رساں ادارے انڈیپینڈنٹ کی ایک رپورٹ کے مطابق انگلینڈ کے سابق کپتان پال کولنگ ووڈ بھی ورلڈ الیون میں شامل ہوں گے۔
یاد رہے کہ پاکستان میں انٹرنیشنل کرکٹ کے دروازے 3 مارچ 2009 کو سری لنکن ٹیم کی بس پر حملے کے بعد سے بند ہیں اور زمبابوے واحد ٹیم ہے جس نے 2015 میں پاکستان کا دورہ کیا۔
اس برسوں کے دوران پاکستان نے اپنی بیشتر ہوم سریز متحدہ امارات میں کھیلیں جب کہ پاکستان سپر لیگ کا پہلا ایڈیشن مکمل اور دوسرا ایڈیشن کے سیمی فائنلز تک کے تمام مقابلے بھی وہیں ہوئے ۔
تاہم پاکستان میں انٹرنیشنل کرکٹ بحال ہونے کی امید ایک مرتبہ پھر اس وقت روشن ہوئی جب پی ایس ایل کے دوسرے ایڈیشن کا فائنل لاہور کے قذافی اسٹیڈیم میں کھیلا گیا جس میں کئی غیرملکی کھلاڑیوں نے شرکت کی۔

لاہور: (میڈیا پاکستان) ٹیسٹ کرکٹر عمر اکمل کو ہیڈ کوچ مکی آرتھر پر الزام تراشی مہنگی پڑ گئی، پی سی بی نے انہیں شو کاز نوٹس جاری کر کے سات روز میں جواب دینے کا پابند کیا ہے۔
مشکلیں عمر اکمل کا پیچھا ہی نہیں چھوڑ رہیں، پہلے خراب فٹنس پر ٹیم سے باہر ہوئے اور اب مکی آرتھر پرالزام تراشی مہنگی پڑ گئی، پی سی بی نے انہیں شو کاز نوٹس جاری کرتے ہوئے سات روز میں جواب دینے کا پابند کیا ہے، انضمام الحق اور مشتاق احمد کو بطور عینی شاہد بلایا جائے گا۔ مڈل آرڈر بیٹسمین نے گزشتہ روزپریس کانفرنس میں ہیڈ کوچ پر گالیاں دینے اور این سی اے میں پریکٹس سے روکنے کا الزام لگایا تھا۔ انہوں نے چیئرمین پی سی بی نجم سیٹھی سے معاملے کا نوٹس لینے کا مطالبہ بھی کیا تھا۔
دوسری جانب مکی آرتھر نے عمر اکمل کے الزامات کو مسترد کیا اور موقف اپنایا کہ انہوں نے بلے باز کو ڈانٹا ضرور تھا لیکن گالی نہیں دی۔

لاہور: پاکستان کرکٹ بورڈ (پی سی بی) نے گزشتہ روز ہیڈ کوچ مکی آرتھر کے خلاف الزامات عائد کرنے پر مڈل آرڈر بلے باز عمر اکمل کو شوکاز نوٹس جاری کردیا۔
گزشتہ روز عمر اکمل نے دعویٰ کیا تھا کہ ہیڈ کوچ مکی آرتھر نے انہیں گالیاں دیں۔
انہوں نے کہا کہ مکی آرتھر نے ان سے کہا کہ کرکٹ اکیڈمی میں کھیلنے کے بجائے کلب کرکٹ کھیلو۔

انٹرنیشنل کرکٹ کونسل ( آئی سی سی ) نے انڈر 19 کرکٹ ورلڈ کپ کے شیڈول کا اعلان کردیا جس کا انعقاد نیوزی لینڈ میں کیا جائے گا۔
آئی سی سی کے مطابق انڈر 19 ورلڈ کپ 13 جنوری 2018 سے 3 فروری تک نیوزی لینڈ میں کھیلا جائے گا جس میں 16 ٹیمیں شرکت کر رہی ہیں اور تمام میچز چار مختلف مقامات پر کھیلے جائیں گے۔
دفاعی چیمپئن ویسٹ انڈیز اور مہمان نیوزی لینڈ کے درمیان افتتاحی میچ کھیلا جائے گا اور ایونٹ کے تمام میچز کرائسٹ چرچ، کوئنز ٹاؤن، ٹورنگا اور ونگیرائی میں کھیلے جائیں گے۔
پاکستانی ٹیم ایونٹ کا پہلا میچ افغانستان کے خلاف 13 جنوری کو کھیلے گی۔
ایونٹ میں شامل 16 ٹیموں کو 4 گروپوں میں تقسیم کیا گیا ہے اور گروپ اے میں دفاعی چیمپئن ویسٹ انڈیز، نیوزی لینڈ، جنوبی افریقا اور کینیا کی ٹیمیں شامل ہیں۔
گروپ بی یں تین مرتبہ چیمپئن رہنے والی بھارت، آسٹریلیا، زمبابوے اور گھانیا کی ٹیمیں شامل ہیں جب کہ گروپ سی میں انگلینڈ، بنگلادیش، کینیڈا اور نمیبیا کی ٹیمیں شامل ہیں۔
انڈر 19 ورلڈکپ میں دو مرتبہ ایونٹ اپنے نام کرنے والی پاکستان، سری لنکا، افغانستان اور آئرلینڈ کی ٹیم گروپ ڈی میں شامل ہے۔
انڈر 19 ورلڈ کپ کھیلنے والے چار ایسے کپتان ہیں جو اس وقت اپنے ملک کی کرکٹ ٹیم کی قیادت کررہے ہیں جن میں پاکستان کے سرفراز احمد، آسٹریلیا کے اسٹیون اسمتھ، بھارت کے ویرات کوہلی اور نیوزی لینڈ کے کین ولیمسن شامل ہیں۔

خیبر پختونخواہ میں ایک کلب کرکٹ میچ کے دوران گیند سر پر لگنے سے ایک کرکٹر ہلاک ہوگیا۔
یہ واقعہ ضلع مردان میں کھیلے جانے والے ایک کلب میچ میں پیش آیا جہاں گیند سر پر لگنے سے زبیر احمد نامی کرکٹر کی ہلاکت ہوئی۔
پاکستان کرکٹ بورڈ کے ٹوئٹر اکاﺅنٹ پر یہ خبر شیئر کی۔
پی سی بی نے ٹوئیٹ میں لکھا ‘ زبیر احمد کی المناک موت ایک اور یاد دہانی ہے کہ حفاظتی گیئر یعنی ہیلمٹ کو ہمیشہ پہننا چاہئے، ہماری ہمدردیاں زبیر کے خاندان کے ساتھ ہیں’۔

اس ٹوئیٹ سے عندیہ ملتا ہے کہ بیٹنگ کرتے ہوئے زبیر احمد نے ہیلمٹ نہیں پہن رکھا تھا۔
زبیر احمد فخر زمان اکیڈمی کا حصہ تھے۔
معروف کمنٹیٹر اور سابق آسٹریلین کرکٹر ڈین جونز نے بھی ٹوئٹر پر نوجوان پاکستانی کرکٹر کی ہلاکت پر تعزیت کی۔
انہوں نے لکھا کہ میچ کے دوان ایک شارٹ پچ گیند نے زبیر کے سر کو نشانہ بنایا ہے اور وہ ہلاک ہوگیا۔
منگل کو آسٹریلین نائب کپتان ڈیوڈ وارنر کو ایک پریکٹس میچ کے دوران ایک باﺅنسر گردن پر لگا، جس کے بعد وہ کھیل جاری نہیں رکھ سکے۔
تاہم اب ان کی حالت بہتر ہے اور بنگلہ دیش کے خلاف دو ٹیسٹ میچز کی سیریز سے قبل فٹ ہوجائیں گے۔

(میڈیا پاکستان) پی سی بی کا سابق چئیرمین شہریار خان کے اعزاز میں ظہرانہ شہریار خان نے چئیرمین پی سی بی کا چارج نجم سیٹھی کے حوالے کر دیا۔
ذرائع کے مطابق چئیرمین پی سی بی نجم سیٹھی نے شہریار خان کو یادگاری شیلڈ پیش کی چئیرمین پی سی بی نجم سیٹھی نے شہریار خان کی خدمات کو سراہا۔

لندن (میڈی پاکستان)انگلینڈ کی سرزمین پر ویسٹ انڈیز اور انگلینڈ کی ٹیمیں کل پہلے ڈے اینڈ نائٹ ٹیسٹ (day night test)میچ میں آمنے سامنے ہوں گی ، کرکٹ کی تاریخ کا یہ پانچواں ڈے نائٹ ٹیسٹ میچ ہے۔
ایجبسٹن کے تاریخی کرکٹ گراونڈ پر انگلینڈ اور ویسٹ انڈیز کی ٹیمیں جب پہلے ٹیسٹ میچ کے لئے میدان میں اتریں گی تو انگلش کرکٹ کی تاریخ میں ایک نئے باب کا اضافہ ہوگا۔
انگلش سر زمین پر پہلے ڈے اینڈ نائٹ میچ کے لئے انگلش ٹیم نے اپنی تیاریاں مکمل کر لیں ، ڈے نائٹ ٹیسٹ کا تجربہ نہ ہونے کے باوجود انگلش کرکٹرز اپنی سرزمین پر پہلے ڈے نائٹ میچ میں عمدہ کارکردگی دکھانے کے لئے پرعزم دکھائی دیتے ہیں۔
انگلش فاسٹ بائولر کرس ووکس کہتے ہیں مصنوعی روشنیوں میں بیٹنگ کرنا بلے بازوں کا کڑا امتحان ہوگا ، انگلش وکٹ کیپر جونی بریسٹو کہتے ہیں کہ پنک بال کے مصنوعی روشنیوں میں فیلڈنگ کرنے والی ٹیم کو فائدہ پہنچے گا۔
انگلینڈ اور ویسٹ انڈیز کے درمیان ایجبسٹن ٹیسٹ کرکٹ کی تاریخ کا پانچواں جبکہ ڈیوک گیند کے ساتھ ہونے والا پہلا ڈے اینڈ نائٹ ٹیسٹ میچ ہوگا۔

کراچی: پاکستان اور سری لنکا کے درمیان ٹی ٹوئنٹی کرکٹ سیریز کو ‘نیک شگون’ قرار دیتے ہوئے میئر کراچی وسیم اختر نے پاکستان کرکٹ بورڈ (پی سی بی) سے سیریز کا ایک میچ کراچی میں منعقد کرانے کا مطالبہ کردیا۔
گذشتہ روز اپنے دفتر میں صحافیوں سے گفتگو کرتے ہوئے وسیم اختر کا کہنا تھا کہ ‘پاکستان میں انٹرنیشنل کرکٹ کے قحط کا خاتمہ خوش آئند ہے، لہذا وقت آگیا ہے کہ ملک کے سب سے بڑے شہر میں بھی آنے والی سیریز کا ایک میچ کرایا جائے’۔
یاد رہے کہ کراچی کے مشہور نیشنل اسٹیڈیم نے سری لنکا کے خلاف آخری ون ڈے اور ٹیسٹ میچ کی میزبانی جنوری اور فروری 2009 میں کھیلی جانے والی سیریز کے دوران کی تھی۔
مارچ 2009 میں لاہور ٹیسٹ کے تیسرے روز قذاقی اسٹیڈیم کے نزدیک سری لنکن ٹیم پر ہونے والے حملے کے بعد یہ سیریز پاکستان میں ہونے والی آخری انٹرنیشنل سیریز ثابت ہوئی تھی۔
کراچی میں میچ کے انعقاد کی صورت میں میئر کراچی نے کھلاڑیوں اور حکام کے لیے ‘فول پروف’ سیکیورٹی کی یقین دہانی کروائی۔
کھلاڑیوں کو پاکستان بھیجنے پر رضامندی کا اظہار کرنے پر وسیم اختر نے سری لنکن کرکٹ انتظامیہ کا شکریہ ادا کرتے ہوئے کہا کہ کراچی کے کرکٹ سے محبت کرنے والے شہری مہمانوں پر اپنی محبت نچھاور کریں گے جو ماضی کو بھلا کر مقبول کھیل کے دوبارہ احیاء میں پاکستان کی مدد کررہے ہیں۔
ان کا کہنا تھا کہ ‘ایک بار ہم سری لنکن بھائیوں کی میزبانی کرلیں پھر یقیناً دوسری انٹرنیشنل ٹیموں کو بھی پاکستان کا دورہ کرنے کا حوصلہ ہوگا’۔
وسیم اختر کے مطابق کراچی ایک مقبول شہر ہے جہاں ماضی میں کئی یادگار اور پرجوش ایونٹس منعقد ہوئے۔
میئر کراچی نے کہا کہ ‘دنیا بھر میں ہماری اسپورٹس مین شپ کی داد دی جاتی ہے اور یہ بات سب جانتے ہیں کہ بین الاقوامی کھلاڑی کراچی میں کھیلنے پر فخر محسوس کرتے ہیں’۔