Category کھیل

(ایمرا نیوز) آسٹریلیا نے زمبابوے کو 100 رنز سے شکست دیدی
ہرارے میں کھیلے گئے میچ میں میزبان زمبابوے نے ٹاس جیت کر پہلے بولنگ کا فیصلہ کیا جو غلط ثابت ہوا، کپتان ایرون فنچ نے ڈارسی شاٹ کے ساتھ مل کر ٹی ٹوئنٹی کی سب سے بڑی 223 رنز کی شراکت قائم کی، دونوں وکٹیں آخری اوور میں گریں، شارٹ 46 رنز بنانے کر بلیسنگ موزربانی کی گیند پر وکٹ کیپر کا کیچ بنے، ایرون فنچ نے صرف 76 گیندوں کا استعمال کرتے ہوئے 16 چوکوں اور 14 چھکوں کی مدد سے 172 رنز کی اننگز کھیلی، وہ بڑا شاٹ کھیلنے کی کوشش میں ہٹ وکٹ ہو گئے، آسٹریلیا نے 2 وکٹوں کے نقصان پر 229 رنز بنائے۔
بڑے ہدف کے تعاقب میں اوپنرز نے زمبابوے کو 42 رنز کا اچھا آغاز فراہم کیا، چامو چبھابا (18) اور سولومن مائر 28 رنز بنا کر آﺅٹ ہوئے جس کے بعد وکٹیں تسلسل سے گرتی رہیں اور زمبابوین ٹیم 20 اوورز میں 9 وکٹوں پر 129 رنز بنا پائی، پیٹر مور 19، کپتان ہیملٹن مساکاذا 12 جبکہ تریسائی موساکاندا اور ریان برل 10،10 رنز بنا پائے۔ اینڈریو ٹائی نے 3، ایشٹن اگار نے 2 جبکہ بلی سٹین لیک، جائے رچرڈسن، گلین میکسویل اور مارکوس سٹوئنس نے ایک ایک وکٹ اڑائی۔

ہرارے: (ایمرا نیوز) پاکستانی کرکٹ ٹیم کے کپتان نے ہارنے کی وجہ بتا دی
سرفراز احمد نے بدترین کارکردگی کی وجہ ٹاس ہارنے کو قرار دے دیا۔
آسٹریلیا سے شکست کے بعد پاکستانی کرکٹ ٹیم کے کپتان نے کہا کہ زمبابوے کی کنڈیشنز میں ٹاس بہت اہم ہے،پہلے بیٹنگ کرتے ہوئے گرین شرٹس نے ابتدائی 6اوورز میں ہی وکٹیں گنوا دیں،ٹاپ آرڈر کی ناکامی کے بعد میچ میں واپسی مشکل ہوجاتی ہے، انھوں نے کہا کہ ہمیں بلی اسٹین لیک کو بھی کریڈٹ دینا چاہیے، جنھوں نے پیس اور باؤنس دونوں کا بہترین استعمال کرتے ہوئے پاکستانی بیٹنگ لائن کو امتحان میں ڈال دیا۔
آسٹریلوی کپتان ایرون فنچ نے کہا کہ بولرز نے بہترین کارکردگی سے فتح کی بنیاد رکھ دی تھی،فیلڈرز نے بھی مواقع ہاتھ سے نہیں جانے دیے،ہم ہدف کا تعاقب کرتے ہوئے بغیر کسی دباؤ کے کھیلے، انگلینڈ میں کینگروز پلان کے مطابق کھیل پیش نہیں کرسکے تھے،اب ناکامیوں کا کسی حد تک ازالہ کرنے کا عزم لیے سہ ملکی سیریز جیتنے کیلیے آئے ہیں۔

(ایمرا نیوز) آسٹریلیا نے پاکستان کو عبرت ناک شکشت دے دی
سہ فریقی کرکٹ ٹورنا منٹ میں پاکستانی بیٹنگ لائن ایک مرتبہ پھر دھوکہ دے گئی اور آسٹریلیا کیخلاف میچ میں پو ری ٹیم 116رنز پر ڈھیر ہو گئی۔
ہرارے میں جاری میچ میں آسٹریلیا کے کپتان نے ٹاس جیت کر پہلے پاکستان کو بیٹنگ کی دعوت دی اور یہ فیصلہ ان کے پولرز نے درست ثابت کرتے ہو ئے پاکستانی بیٹنگ کو مکمل طور پر دبائو میں رکھا اور کھل کر کھیلنے کا موقع نہیں دیا ۔
محمد حفیظ اور فخر زمان نے اننگز کا آغاز کیا لیکن محمد حفیظ ابتدا میں ہی کھاتہ کھولے بغیر پویلین لوٹ گئے ،فخر زمان بھی جم کر نہ کھیل سکے اور صرف 6رنز بنا سکے۔
کپتان سرفراز احمد بھی صرف 4 رنز بنا کر پویلین لوٹ گئے ،سینئر بیٹسمین شعیب ملک کا اسکور 13 رنزرہا ،شاداب خان 29رنز بنا کر سب سے کامیاب بیٹسمین رہے آصف علی 22 اور فہیم اشرف21رنز بنا کر قابل ذکر رہے ۔
آسٹریلیا کی جانب سے اسٹین لیک نے پاکستانی بیٹسمینوں کو پویلین کی راہ دکھائی جب کہ اینڈریو ٹائی نے 3 وکٹیں حاصل کیں یوں پاکستان پورے20اوورز بھی نہ کھیل سکا اور116رنز بناکر ڈھیر ہو گیا۔

ماسکو (ایمرا نیوز) روبوٹس بھی فٹبال کے رنگ میں رنگ گئے ہیں
روس میں فیفا ورلڈ کپ کے مقابلے زور و شور سے جاری ہیں تاہم دوسری جانب روبوٹس بھی فٹبال کے بخار میں مبتلا ہو چکے ہیں۔ مونٹریال میں روبوکپ کے عالمی مقابلے شروع ہو گئے ہیں اس ہی سلسلے میں دنیا بھر سے کئی ٹیموں نے ان مقابلوں میں حصہ لیا اور گول کرتے روبوٹس توجہ کا مرکز بنے رہے۔

لاہور(ایمرا نیوز) شاہ لائلہ بلوچ انڈر 16 ویمن فٹ بال چیمپئن شپ کے سیمی فائنل مقابلے۔ ماڈل ٹاؤن ویمن فٹ بال کلب اور کراچی ککرز کلب نے فائنل کے لئے کوالیفائی کرلیا۔ فائنل معرکہ 3جولائی کو ہوگا۔ماڈل ٹاؤن فٹ بال اکیڈمی میں انڈر 16 ویمن فٹ بال چیمپئن شپ کے سیمی فائنل مقابلے۔پہلے سیمی فائنل میں ماڈل ٹاؤن ویمن فٹ بال کلب نے دیا ۔فٹ بال کلب کو تین، صفر سے ہرا دیا۔دوسرے سیمی فائنل میں کراچی ککرز نے اسلام آباد فٹ بال کلب کو ایک صفر سے شکست دی۔ اس موقع پرخواتین کھلاڑیوں نے لاہور نیوز سے گفتگوکرتے ہوئے ٹورنامنٹ کے انتظامات کو سراہا۔ ان کا کہنا تھا کہ ایسے ٹورنامنٹس سے خواتین میں فٹ بال کے کھیل کو فروغ ملے گا۔ٹورنامنٹ کا فائنل میچ 3 جولائی کو کراچی ککرز اور ماڈل ٹاؤن ویمن فٹ بال کلب کے مابین کھیلا جائے گا۔

دبئی: (سپورٹس ڈیسک/ایمرا نیوز) راہول ڈریوڈ اور رکی پونٹنگ کے لیے بڑا اعزاز حاصل کرلیا.
بھارت اور آسٹریلیا کی کرکٹ ٹیموں کے سابق کپتان راہول ڈریوڈ اور رکی پونٹنگ کو آئی سی سی ہال آف فیم میں شامل کرلیا گیا جب کہ خواتین کھلاڑیوں میں انگلش ٹیم کی سابق وکٹ کیپر کرین ٹیلر بھی اس کلب میں جگہ بنانے میں کامیاب ہوئی ہیں۔

راہول ڈریوڈ ہال آف فیم میں جگہ بنانے والے پانچویں بھارتی کھلاڑی ہیں، ان سے پہلے 2009 میں بیشن سنگھ بیدی، سنیل گواسکر، کپل دیو جب کہ 2015 میں انیل کمبلے کو اس کلب میں شامل کیا گیا تھا۔
ڈریوڈ نے اپنے ٹیسٹ کیرئیر میں بھارت کی جانب سے 164 ٹیسٹ میچز میں نمائندگی کرتے ہوئے 36 سنچریوں کی مدد سے 13 ہزار 288 بنائے۔
اسی طرح 244 ایک روزہ میچز میں انہوں نے 12 سنچریوں کی بدولت 10 ہزار 889 رنز بنائے، اس کارکردگی کی بنیاد پر انہیں آئی سی سی ہال آف فیم میں شامل کیا گیا۔
سابق آسٹریلوی کپتان رکی پونٹنگ اس کلب میں شامل ہونے والے 25ویں کینگروز کھلاڑی ہیں۔
رکی پونٹنگ نے اپنے کیرئیر میں 168 ٹیسٹ میچز میں 41 سنچریوں اور 62 نصف سنچریوں کی بدولت 13 ہزار 378 رنز بنائے۔
375 ایک روزہ میچز میں انہوں نے 30 سنچریوں اور 82 نصف سنچریوں کی مدد سے 13 ہزار 704 رنز بنائے جب کہ 17 ٹی ٹوئنٹی میچز میں رکی پونٹنگ نے آسٹریلیا کی نمائندگی کرتے ہوئے 401 رنز بنائے۔
ویمن انگلش ٹیم کی سابق وکٹ کیپر کرین ٹیلر اپنے بہترین کیرئیر کی بدولت ہال آف فیم میں شامل ہوئیں، انہوں نے 15 ٹیسٹ میچز میں ایک ہزار 30 جب کہ 126 ایک روزہ میچز میں 4 ہزار 101 اور 21 ٹی ٹوئنٹی میچز میں 615 رنز بنائے۔

ماسکو (سپورٹس ڈیسک/ایمرا نیوز) روس میں فٹبال ورلڈکپ کے کوارٹرفائنل میں پہنچنے کی خوشی رات بھر منائی گیا.
روسی گول کیپر ایگر آکن فیو کی شاندار کارکردگی کے باعث روسی ٹیم نے تجربہ کار اور سابق عالمی چیمپئن اسپین کو انتہائی دلچسپ اور سنسنی خیز مقابلے کے بعد پینلٹی ککس پر 4-3 سے شکست دیکر ورلڈ کپ فٹ بال ٹورنامنٹ کے کوارٹرفائنل میں کھیلنے کا اعزاز حاصل کرلیا۔ گول کیپر ایگر نے میچ کے مقررہ وقت اور اضافی وقت میں کئی یقینی گول بچا کر اپنی ٹیم کو1970 کے بعد پہلی بار ٹاپ ایٹ میں پہنچادیا۔ انہیں میچ کا ہیرو قرار دیا گیا۔ شاندار فتح کے بعد خوب جشن منایا گیا، کھلاڑیوں نے انہیں کاندھوں پر اٹھالیا، جشن منانے میں روسی شہری بھی پیچھے نہ رہے، فٹبال دیوانے سڑکوں پر نکل آئے، گاڑیوں کے ہارن بجاتے رہے۔ دوسری جانب قسمت کی دیوی بھی شاید اسپین کے کھلاڑیوں سے ناراض تھی اور کئی یقینی گول بھی نہ ہوسکے۔ روسی کھلاڑیوں نے ہوم گرائونڈ اور کرائوڈ کا بھرپور فائدہ اٹھایا اور اسپین کو مکمل دبائو میں رکھا۔ میزبان ملک ہونے کی حیثیت سے اعزازی طور پر ورلڈ کپ ٹورنامنٹ کھیلنے والے روسی کھلاڑیوں نے پہلے سابق عالمی

چیمپئن کے مقررہ وقت اور اس کے بعد ملنے والے اضافی ٹائم میں مقابلہ ایک ایک گول سے نہ صرف برابر رکھا بلکہ پینلٹی ککس پر بھی مہمان ٹیم کو اتنا شدید دبائو کا شکار کیا اس کے دو ٹاپ کھلاڑی پینلٹی ککس پر بھی گول نہ کرسکے۔ ماسکو کے لوزنیکی اسٹیڈیم میں کھیلے جانے والے پری کوارٹر فائنل کا میچ سنسنی تھا۔ اسپین کے اگناشیوک نے 12 ویں منٹ میں خوبصورت گول کرکے اپنی ٹیم کو ایک صفر کی برتری دلادی۔ اس موقع پر روسی کھلاڑیوں نے جوابی حملے کئے لیکن کامیابی نہیں ملی۔ میچ کے 40ویں منٹ میں روسی کھلاڑیوں نے اسپین کے گول پر اٹیک کیا اور کارنر کی ہٹ پر ڈی میں اسپین کے کھلاڑی کے ہاتھ پر گیند لگی جس پر ریفری نے روس کو پینلٹی کک ایوارڈ کی۔ ڈیوبا نے گول کرکے مقابلہ ایک ایک گول سے برابر کردیا۔ دوسرے ہاف میں بھی اسپین نے کئی حملے کئے لیکن گول کیپر ایگر کی شاندار کارکردگی کی بدولت اسپین کوئی گول نہ کرسکی۔ مقررہ وقت کے اختتام پر اسکور ایک ایک گول سے برابر رہا۔ میچ برابر ہونے پر بیس منٹ کا اضافہ ٹائم دیا گیا لیکن اس میں بھی کوئی گول نہ ہوسکا ۔ میچ کا فیصلہ کرنے کیلئےدونوں ٹیموں کو پینلٹی ککس دی گئیں۔ روسی گول کیپر نے دو پینلٹی روک کر فیورٹ اسپین کو باہر کردیا۔ میچ ختم ہونے کے بعد سابق عالمی چیمپئن اسپین کے خلاف پری کوارٹر فائنل میں کامیابی پر روس میں جشن منایا گیا، میچ کے ہیرو گول کیپر آکن فیو کوکھلاڑیوں نے کندھوں پر اٹھا لیا۔ دنیا بھر سے شائقین ورلڈ کپ فٹ بال کے مختلف میچز دیکھنے روس پہنچنے ہوئے ہیں لیکن اتوار کو اسپین کے خلاف لوزنیکی اسٹیدیم میں ہر طرف روسی شائقین دکھائی دے رہے تھے۔ تماشائی اپنے ساتھ ساتھ روسی پرچم اور باجے بھی لائے ہوئے تھے جو مسلسل بجا کر اپنی ٹیم کی حوصلہ افزائی کرتے رہے۔ روسی کھلاڑی کے حملوں اور کامیاب دفاع پر بھی وہ اپنے کھلاڑیوں کو داد دیتے اور مسلسل شور کرتے رہے۔ میچ کے اختتام پر ماسکو شہر میں جشن کا سماں تھا ہر طرف ٹیم کی کامیابی کاچرچہ تھا۔

کراچی:(سپورٹس ڈیسک/ایمرا نیوز) سرفراز احمد نے سب کپتانوں کو پیچھے چھوڑ دیا ہے.
سرفراز احمد ٹوئنٹی 20 انٹرنیشنل کے کامیاب ترین پاکستانی کپتان بن گئے۔

سرفراز احمد نے زمبابوے کیخلاف تین ملکی سیریز کے ابتدائی میچ میں 74رنز سے فتح پائی، یہ مختصرفارمیٹ میں بطور کپتان ان کی 20ویں کامیابی شمار ہوئی، اس طرح وہ سابق کپتان شاہد آفریدی سے آگے نکل گئے، آفریدی نے بطور کپتان اس فارمیٹ میں گرین شرٹس کو 19 فتوحات دلائی تھیں۔
سرفراز اب تک بطور کپتان صرف 3 میچز میں ناکام رہے، محمد حفیظ 29 میچز میں 17 فتوحات کے ہمراہ اس فہرست میں تیسرے نمبر پر ہیں، حفیظ اور آفریدی کی زیرقیادت قومی ٹیم نے ایک ایک میچ ٹائی بھی کیا ہے، شعیب ملک 17 میچز میں بطور کپتان 12 میں فتحیاب رہے، چار میچز میں شکست ان کا مقدر بنی جبکہ ایک مقابلہ ٹائی ہوا۔

ہرارے : (سپورٹس ڈیسک/ایمرا نیوز) پاکستان کرکٹ ٹیم آج آسٹریلیا سے ٹکرائے گی.
ہرارے میں آج پھر میدان سجے گا، آسٹریلیا اور پاکستان مد مقابل ہوں گے۔ انگلینڈ کے خلاف ون ڈے اورٹی ٹونٹی سیریز ہارنے کے بعد آسٹریلیا کا مورال ڈاؤن ہے جبکہ شاہین کینگروز کو دبوچنے کو تیار ہیں ۔

دونوں ٹیمیں دِن ایک بجے ایکشن میں نظر آئیں گی، سیریز کے افتتاحی میچ میں سرفراز الیون نے میزبان زمبابوے کو بیٹنگ اور بائولنگ میں آؤٹ کلاس کیا۔

گرین شرٹس نے پہلے بیٹنگ کرتے ہوئے 4 وکٹوں پر 182 رنز بنائے، اوپنر فخر زمان 61، آصف علی 41 رنز بنا کر نمایاں رہے، ہدف کے تعاقب میں زمبابوین بیٹنگ لائن ریت کی دیوار ثابت ہوئی۔

پوری ٹیم 108 رنز بنا کر 18 ویں اوور میں پویلین لوٹ گئی، پاکستان کی جانب سے محمد نواز، عثمان شنواری، حسن علی اور حفیظ دو دو شکار کر کے سر فہرست رہے۔

ہرارے(نیٹ نیوز/میڈیا 92ن یوز )پاکستان نے زمبابوے کو 74رنز سے ہرا دیا ۔183 رنز کے تعاقب میں زمبابوے کی بیٹنگ108رنز پر ڈھیر ہو گئی۔ہرارے کرکٹ اسٹیڈیم میں کھیلے جارہے میچ میں میزبان ٹیم کے کپتان ہیملٹن مساکدزا نے ٹاس جیت کر پہلے گرین شرٹس کو بیٹنگ کی دعوت دی تو قومی ٹیم نے مقررہ 20 اوورز میں 4 وکٹوں کے نقصان پر 182 رنز بنائے۔ محمد حفیظ اور فخر زمان نے اننگز کا آغاز کیا اور دونوں بلے بازوں نے پہلی وکٹ پر 13 رنز کی شراکت قائم کی تھی کہ محمد حفیظ 7 رنز بنا کر پویلین لوٹ گئے، جس کے بعد نئے آنے والے بلے باز طلعت حسین بھی زیادہ دیر کریز پر کھڑے نہ رہ سکے اور 10 رنز بنا کر چیبھایا کی گیند پر وکٹ کے پیچھے کیچ دے کر چلتے بنے۔کپتان سرفراز احمد اور فخرزمان نے تیسری وکٹ پر 34 رنز جوڑے اور ٹیم کا مجموعی اسکور 78 تک پہنچا تھا کہ کپتان ہمت ہار بیٹھے اور 16 رنز بنا کر کیچ آؤٹ ہوگئے۔ فخر زمان نے شاندار بیٹنگ کا مظاہرہ کیا اور 3 چھکوں اور 3 چوکوں کی مدد سے 40 گیندوں پر 61 رنز بنا کر آؤٹ ہوئے۔شعیب ملک اور آصف علی نے پانچویں وکٹ پر شاندار کھیل پیش کیا اور مقررہ اوورز کے اختتام تک ٹیم کا اسکور 182 تک پہنچایا، شعیب ملک 24 گیندوں پر 37 اور آصف علی 4 چھکوں کی مدد سے 21 گیندوں پر 41 رنز بنا کر ناٹ آؤٹ رہے۔جب زمبابوے نے اپنی باری کا آغاز شروع کیا تو آتے ہی انہوں سی جے چیبارا کا نقصان اٹھانا پڑا ۔زمبابوے کی ٹیم کی طرف سے میرو اور مسکندا کے علاوہ کوئی بھی کھلاڑی پاکستانی باؤلروں کا جم کا مقابلہ نہیں کر سکی اور یکے بعد دیگرے وکٹ گرتے رہے اور پوری ٹیم 108رنز کے سکور پر آؤٹ ہو گئے۔پاکستان کی طرف سے حسن ،نواز، عثمان شنواری نے شاندار باؤلنگ کی اور تینوں باؤلروں نے دو دو کھلاڑی آؤٹ کئے۔اچھے کھیل کے پیش نظر محمد آصف کو مین آف دی میچ کا ایوارڈ دیا گیا۔زمبابوین ٹیم کے کامیاب کھلاڑی برینڈن ٹیلر ٹیم میں شامل نہیں جب کہ سکندر رضا کینیڈا میں ٹی ٹوئنٹی گلوبل لیگ کھیلنے میں مصروف ہیں، گریم کریمیر، سین ولیمز اور کریگ ایرون بھی سہ فریقی سیریز میں زمبابوے کی نمائندگی نہیں کر رہے۔ زمبابوین ٹیم کی قیادت کے فرائض ہیملٹن مساکدزا انجام دیں گے اور ٹیم کے کوچ لال چند راجپوت نے حال ہی میں اپنی ذمہ داریاں سنبھالی ہیں۔ پاکستان ٹی ٹوئنٹی رینکنگ کی سب سے بہترین ٹیم ہے جبکہ زمبابوے عالمی درجہ بندی میں 12 ویں نمبر پر ہے۔ سیریز میں شامل تیسری ٹیم آسٹریلیا بھی تیسرے نمبر پر براجمان ہے۔سہ فریقی سیریز میں تینوں ٹیمیں چار چار میچز کھیلیں گی اور دو ٹاپ ٹیموں کے درمیان فائنل 8 جولائی کو کھیلا جائے گا۔ہرارے میں میڈیا سے گفتگو کرتے ہوئے کپتان سرفراز احمد کا کہنا تھا کہ سیریز میں کوئی ٹیم فیورٹ نہیں کیوں کہ ٹی ٹوئنٹی میں کسی ٹیم کے بارے میں کچھ نہیں کہا جاسکتا۔قومی ٹیم کے کپتان نے کہا کہ پاکستان کرکٹ ٹیم نوجوان اور سینیئر کھلاڑیوں کا امتزاج ہے جس کی کارکردگی حالیہ چند سیریز میں بہترین رہی ہے۔سرفراز احمد کا مزید کہنا تھا کہ وہ فی الحال رینکنگ کے بارے میں نہیں سوچ رہے، ان کا مقصد مثبت کرکٹ کھیلتے ہوئے سیریز جیتنا ہے۔