Category کھیل

مبئی: بھارتی کرکٹ ٹیم کے کپتان ویرات کوہلی نے کہا ہےکہ فلم پری دیکھنے کے بعد وہ تھوڑے ڈر گئے لیکن انہیں اپنی بیوی انوشکا پر فخر ہے۔

انوشکا شرما کی ہوم پروڈکشن میں بننے والی تیسری فلم ’’پری‘‘ گزشتہ روز ریلیز کردی گئی، ان کے شوہر ویرات کوہلی نے فلم دیکھنے کے بعد اسے انوشکا کی اب تک کی بہترین اداکاری قرار دیا ہے۔ اس کے ساتھ ہی انہوں نے کہا ہے کہ طویل عرصے بعد میں نے اتنی اچھی فلم دیکھی ہے، ہاں! فلم دیکھنے کے بعد میں تھوڑا ڈر گیا تھا لیکن مجھے اپنی بیوی پر فخر ہے۔

Watched #Pari last night, has to be my Wife's best work ever! 🤩 One of the best films I've seen in a long time. Got quite scared but so very proud of you @AnushkaSharma ♥️

— Virat Kohli (@imVkohli) March 2, 2018

دوسری جانب فلمی تجزیہ کاروں نےفلم کا اسکرپٹ کمزور قراردیتے ہوئے انوشکا کی اداکاری کو سراہا ہے، ان کا کہنا ہے کہ انوشکا کی اداکاری ’’پری‘‘کی ڈوبتی ہوئی کشتی کیلئے سہارا ثابت ہوئی ہے۔ جب کہ فلمی تجزیہ نگار ترن آدرش نے بھی انوشکا کی’’پری‘‘کو اوسط درجے کی فلم قرار دیا ہے۔

واضح رہے کہ گزشتہ روز بھارت سمیت دنیا بھر میں ریلیز ہونے والی فلم’’پری‘‘کی پاکستان میں نمائش پر پابندی عائد کردی گئی ہے، پاکستانی سنسر بورڈ کا کہنا ہے کہ فلم میں کالے جادو کے استعمال کے ساتھ فلم کے مکالمے اور مناظر مذہب، سماجی اور اخلاقی اقدار پر پورے نہیں اترتے یہی وجہ ہے کہ فلم کو پاکستان میں نمائش کی اجازت نہیں دی جاسکتی۔

شارجہ: پی ایس ایل 3 میں آج ملتان سلطانز اور کراچی کنگز جب کہ لاہور قلندرز اور اسلام آباد یونائیٹڈ ایک دوسرے کے مد مقابل ہوں گے۔

شارجہ کرکٹ اسٹیڈیم میں آج پاکستانی وقت کے مطابق شام ساڑھے 4 بجے ملتان سلطانز اور کراچی کنگز آمنے سامنے ہوں گے۔ کراچی کنگز اب تک ایونٹ میں ناقابل شکست ہے، اس لئے مبصرین کراچی کنگز کو ہی فیورٹ قرار دے رہے ہیں تاہم شعیب ملک کی قیادت میں ملتان سلطانز بھی صرف ایک ہی مقابلے میں شکست سے دوچار ہوئی ہے۔

آج کے روز دوسرا میچ لاہور قلندرز اور اسلام آباد یونائٹڈ کے درمیان کھیلا جائے گا، پاکستان کے معیاری وقت کے مطابق رات 9 بجے شروع ہونے والے اس مقابلے سے قبل لاہور قلندرز 3 میچ کھیل چکی ہے اور تینوں میں ہی اسے شکست کا مزا چکھنا پڑا ہے۔

لاہور(سپورٹس نیوز/ایمرا نیوز)نیشنل کبڈی چیمپین شپ آج لاہور میں شروع ہوگی جس میںملک بھر سے ٹیمیں شرکت کریں گی چیمپین شپ میں شرکت کیلئے ایرانی ٹیم لاہور پہنچ گئی ، جو کہ5میچز کھیلے گی،پاکستان اکیڈمی فیڈریشن کے سیکرٹری رانا سرور نے ٹیموں کا استقبال کیا

کراچی(سپورٹس رپورٹر/میڈیا 92نیوز)نیشنل اسٹیڈیم میں پی ایس ایل تھری فائنل کے انعقاد کا حتمی فیصلہ پیر کو ہوگا۔

پی سی بی کے چیئرمین نجم سیٹھی پیر کو کراچی میں پی ایس ایل تھری کے فائنل کے انعقاد کے فیصلے کا اعلان کریں گے تاہم غیر ملکی سیکیورٹی اہلکاروں نے اپنی رپورٹ بورڈ کو پیش کردی۔

سندھ حکومت نے سیکیورٹی پلان کو موزوں اور بہترین قرار دیدیا تاہم تعمیراتی کام میں سست روی کے سبب کراچی میں فائنل کا انعقاد مشکل میں پڑ گیاہے۔
پی سی بی اور سندھ حکومت کی کوششیں رائیگاں جانے کا امکان ہے، ڈیڑھ ارب روپے کاتعمیراتی منصوبہ تاخیر کا شکار ہے، یکم نومبر سے شروع ہونے والے کام کو3 ماہ میں مکمل ہونا تھا، 30جنوری کے بعد15فروری تک کام مکمل کرنے کی یقین دہانی کرائی گئی، بعدازاں15مارچ تک اسٹیڈیم تیار کر لینے کا وعدہ کیا گیا تاہم تزئین وآرائش کے کام میں سست روی کے سبب25 مارچ کو شیڈول فائنل کے لیے اسٹیڈیم بروقت تیار نہ ہونے کا خدشہ ہے۔

ایک جائزے کے مطابق نیشنل اسٹیڈیم کی مرکزی عمارت کی ابتر حالت ہے، چیئرمین باکس مخدوش قرار پائے ہیں۔ اسٹیڈیم میں موجود30 باکس بھی خستہ حالت میں ہیں، 6 برس سے بند گیلری بھی قابل استعمال نہیں، چینل باکس کی چھتیں بھی خطرناک قرار پائی ہیں، نجم سیٹھی پہلے ہی بی پلان کے تحت لاہور کو متبادل قرار دے چکے ہیں۔

ذرائع کے مطابق پی سی بی اور سندھ حکومت کی ہر ممکن کوشش ہے کہ وعدے کے مطابق پی ایس ایل تھری کا فائنل کراچی میں ہی میں منعقد کرایا جائے تاہم اسٹیڈیم کی مجموعی حالت اس وقت اتنے بڑے ایونٹ کے انعقاد کے لیے قطعی طور پر موزوں نظر نہیں آرہی۔

معلوم ہوا ہے کہ چیئرمین پی سی بی نجم سیٹھی پیر کو کراچی پہنچ رہے ہیں، غیرملکی سیکیورٹی اہلکاروںکی جانب سے دی جانے والی رپورٹ اور دیگر عوامل کی روشنی میں وہ تعمیراتی کام کرنے والے ذمے داران سے بریفنگ اور صوبائی و مقامی حکام کے ساتھ گفت وشنید کے بعد حتمی فیصلے کا اعلان کریں گے۔

باخبر ذرائع کا کہناہے کہ اگر جاری کام کی رفتار میں دگنی تیزی لائی جائے تو اسٹیڈیم فائنل کے لیے بروقت دستیاب ہوسکتا ہے وگرنہ پی ایس ایل تھری کا حتمی مقابلہ لاہور کے قذافی اسٹیڈیم میں ہی ہوگا۔ اسی بنیاد پر کراچی میں فائنل کے لیے ٹکٹوں کی فروخت تو دور کی بات، چھپائی کا کام تک شروع نہیں کیا گیا۔

واضح رہے کہ پی سی بی کے چیئرمین نجم سیٹھی پہلے ہی کہہ چکے ہیں کہ پی ایس ایل ایل تھری فائنل بوجوہ کراچی میں منعقد نہ ہوسکا تو لاہور بہترین متبادل ہوگا، ان کا کہنا ہے کہ اگر کراچی میں فائنل کسی وجہ سے نہ ہوسکا تو لاہور پلان بی میں شامل ہے۔ لاہور میں لیگ کے سیمی فائنلز مقابلے تو ہونا ہی ہیں۔

نجم سیٹھی کا موقف ہے کہ اگر فائنل کراچی میں ہوگیا تو یہ ملک کے بہترین مفاد میں ہوگا اور پاکستان اور کراچی کے حوالے سے عالمی سطح پر مثبت تاثر جائے گا، تعمیراتی کام 15 مارچ تک مکمل کرنے کی کوشش کی جائے گی۔

چیئرمین پی سی بی نجم سیٹھی نے اپنے دورہ کراچی میں موقف اپنایا تھاکہ پی ایس ایل کا فائنل کراچی میں منعقد کرانا چاہتے ہیں لیکن کچھ نہ کچھ گڑبڑ ہوسکتی ہے۔

دبئی(سپورٹس رپورٹر/میڈیا 92نیوز) آل راؤنڈر شعیب ملک نے کہا ہے کہ انہیں اب قومی ٹیم کی کپتانی کا کوئی شوق نہیں رہا۔

میڈیا 92نیوز کو خصوصی انٹرویو میں سابق قومی کپتان شعیب ملک نے کہا ہے کہ وسیم اکرم جیسے عظیم کرکٹر نے پی ایس ایل تھری میں ملتان سلطانز کی قیادت سنبھالنے کا کہا تھااس لئے انکار نہیں کرسکا تاہم قطعی طور پر قومی ٹیم کی کپتانی کی خواہش نہیں رکھتا، اپنی فٹنس اور کارکردگی کا تسلسل برقرار رکھتے ہوئے ورلڈکپ 2019میں ملک کی نمائندگی کرتے ہوئے میگاٹائٹل جیتنے کا خواب پورا کرنا چاہتا ہوں تاہم شدید خواہش ہے کہ چیمپئنز ٹرافی جیتنے کے بعد پاکستان عالمی چیمپئن بھی بنے۔

نیوزی لینڈ کیخلاف سیریز کے حوالے سے بات کرتے ہوئے آل راؤنڈر نے کہا کہ کیوی کنڈیشنز میں بیٹسمینوں کو ہمیشہ مشکلات ہوتی ہیںتاہم تسلیم کرنا ہوگا کہ کارکردگی توقعات کے مطابق نہیں تھی، کم بیک کے بعد اعلیٰ معیار کی پرفارمنس دکھانے میں کامیاب رہا لیکن کبھی کبھار کیریئر میں برا دور بھی آتا ہے، اس سے نکلنے کا ایک ہی طریقہ ہے کہ اپنی خامیوں کو دور کرنے کیلیے کام کیا جائے، میں بھی سخت محنت کررہا ہوں، پی ایس ایل میچز میں اس کا مثبت نتیجہ بھی سامنے آرہا ہے۔

نوجوان کرکٹرز کی رہنمائی کرنے کے حوالے سے خاص شہرت رکھنے کی وجہ بتاتے ہوئے شعیب ملک نے کہا کہ نیا ٹیلنٹ پاکستان کرکٹ کا مستقبل ہے،کسی سینئر کو یہ فکر نہیں ہونا چاہیے کہ کوئی نوجوان آگے نہ نکل جائے، تجربہ کھیل کر آتا ہے، اگر کوئی سینئر اس کو نئے ٹیلنٹ میں منتقل کرے اور یہی پلیئرز ٹیم کو 4کے بجائے 6میچ جتوانے میں اہم کردار ادا کریں تو اس سے اچھی کوئی بات نہیں ہوسکتی۔

آل راؤنڈر نے کہا کہ نیت صاف ہو تو کوئی آپ کی جگہ نہیں لے سکتا، میری کوشش ہوتی ہے کہ جونیئرز کو جلد سکھائیں تاکہ وہ ٹیم کیلیے زیادہ کار آمد ثابت ہوں، نوجوانوں کی رہنمائی کرتے ہوئے فخر محسوس کرتا ہوں۔

شعیب ملک نے کہا کہ ملتان سلطانز پہلی بار پی ایس ایل کھیل رہے ہیں اس لیے درست کمبی نیشن کے حوالے سے تھوڑا فکر مند تھے تاہم ٹیم میں تجربہ کار کھلاڑیوں کی موجودگی میں مسائل نہیں ہوئے، افتتاحی میچ میں پشاور زلمی کا سامنا تھا جو اس بار شاہد آفریدی کے بغیر کھیل رہی ہے، حسن علی بھی انجری کی وجہ سے دستیاب نہیں تھے، اس کے باوجود ان کو کمزور ٹیم خیال نہیں کیا جاسکتا، بڑی خوشی کی بات ہے کہ ملتان سلطانز نے فتح کیساتھ پی ایس ایل میں سفر کا آغاز کیا۔

آل راؤنڈر نے کہا کہ وسیم اکرم جیسا مینٹور ساتھ ہوتو کپتان پر دباؤ آدھا رہ جاتا ہے، کرکٹرز کو ان کی حوصلہ افزائی ہی اعتماد کی دولت سے مالا مال کردیتی ہے۔

پاک بھارت کرکٹ کی بحالی کے سوال پر آل راؤنڈر کا کہنا تھا کہ نہ صرف کھیل کے میدانوں میں مقابلے بلکہ سیاسی اختلافات بھی دور ہونا چاہئیں، دونوں ملکوں میں زبانیں اور کھانے پینے کی عادات زیادہ مختلف نہیں، مجھے بھارت میں بڑی پذیرائی ملتی ہے، ثانیہ مرزا کو پاکستان میں بڑی عزت دی جاتی ہے، امید ہے پڑوسی ملکوں کے حکام بھی خلیج کو کم کرنے کا سوچ رہے ہوں گے، دونوں ملکوں کے مابین مقابلے کرکٹ کی جان ہیں، اگر باہمی میچز ہورہے ہوں تو بڑا جوش وجذبہ نظر آتا ہے، اس روز ایسا لگتا ہے کہ عید کا سماں ہے۔

شارجہ(سپورٹس رپورٹر/میڈیا 92نیوز)کوئٹہ گلیڈی ایٹرز کے نمایاں بلے باز کیون پیٹرسن نے ایک بار پھر پاکستان آنے سے انکار کردیا ہے۔

شارجہ میں پریس کانفرنس کرتے ہوئے کوئٹہ گلیڈی ایٹرز کے جارح مزاج بلے باز کیون پیٹرسن کا کہنا تھا کہ میری اپنی ٹیم کے ساتھ دلی وابستگی ہے اور یہ ٹیم ایک فیملی کا روپ دھار چکی ہے، خواہش ہے کہ یہ ٹیم ایک بار پھر ٹرافی اٹھائے تاہم پاکستان سپرلیگ کے پاکستان میں ہونے والے میچز کا حصہ نہیں بنوں گا۔

کیون پیٹرسن کا کہنا تھا کہ کوئٹہ گلیڈی ایٹرز کو بہترین ٹیم بنانے کا سہرا کوچ معین خان اور کپتان سرفراز احمد کے سر جاتا ہے، پاکستان کی خوش نصیبی ہے کہ اس کے پاس سرفرازاحمد جیسا باصلاحیت کپتان موجود ہے جس میں کرکٹ کی بہت زیادہ سمجھ بوجھ ہے اور تمام کھلاڑی انہیں پسند کرتے ہیں، پاکستان کرکٹ بورڈ کو چاہیے کہ وہ سرفراز احمد کو آئندہ سال ہونے والے ورلڈ کپ تک کپتان مقرر کرنے کا اعلان کر دے۔ یہ دانشمندانہ فیصلہ ہو گا کہ سرفراز احمد پر سے دباؤ ختم کرتے ہوئے ان سے کہا جائے کہ وہ ورلڈ کپ میں پاکستانی ٹیم کے کپتان ہوں گے۔

واضح رہے کہ کیون پیٹرسن پاکستان سپر لیگ میں کوئٹہ گلیڈی ایٹرز کی نمائندگی کررہے ہیں اور گزشتہ برس پی ایس ایل کا فائنل لاہور میں کھیلا گیا تھا لیکن کیون پیٹرسن فائنل کھیلنے لاہور نہیں گئے تھے اور اس بار بھی وہ پاکستان نہ جانے کے اپنے فیصلے پر قائم ہیں۔

دبئی(سپورٹس رپورٹر/میڈیا 92نیوز) کوئٹہ گلیڈی ایٹرز کے کپتان سرفراز احمد پرامید ہیں کہ پی ایس ایل تھری کے کراچی فائنل میں انٹرنیشنل اسٹارز جگمگائیں گے۔

قومی کرکٹ ٹیم کے کپتان سرفراز احمد پی ایس ایل میں کوئٹہ گلیڈی ایٹرز کی قیادت کررہے ہیں،انہوں نے کہا کہ لیگ کے انعقاد سے پاکستان کرکٹ کا مستقبل سنوارنے کیلیے ایک اچھا پلیٹ فارم میسر آ گیا ہے، نوجوان نہ صرف اپنے ہیروز کو ایکشن میں دیکھتے ہیں بلکہ اپنا کیریئر آگے بڑھانے کیلیے تحریک بھی حاصل کرتے ہیں۔

سرفراز احمد نے کہا کہ پی ایس ایل میں شرکت کرنے والے کھلاڑیوں کو انٹرنیشنل میچ کی طرح بڑے کرکٹرزکے ساتھ کھیلنے کا تجربہ حاصل ہوتا ہے ، ڈریسنگ روم میں کمارسنگا کارا، کیون پیٹرسن، مصباح الحق، شین واٹسن، شاہد آفریدی کی رہنمائی حاصل ہونا بہت بڑی بات ہے۔

لاہور(کورٹ رپورٹر/سپورٹس رپورٹر/میڈیا 92نیوز) لاہور ہائی کورٹ نے سید فیصل صالح حیات کی صدارت میں پاکستان فٹبال فیڈریشن کو بحال کر دیا، عبوری ذمہ داریاں سنبھالنے والے ایڈمنسٹریٹر کو چارج فوری طور فیصل صالح حیات کے سپرد کرنے کی ہدایت کی گئی ہے۔

عدالت کی طرف سے فیصلے میں پی ایف ایف کے الیکشن میں فیصل صالح کے انتخاب کو درست قرار دیتے ہوئے پاکستان اسپورٹس بورڈ کو کسی بھی قسم کی مداخلت سے روک دیا گیا ہے، 2 رکنی بنچ نے 30 جون 2015 کو سنگل بنچ کی جانب سے فٹبال فیڈریشن کے انتخابات کو غیرقانونی قرار دینے کا فیصلہ کالعدم قرار دے دیا۔ واضح رہے کہ پاکستان فٹبال فیڈریشن فیصل صالح حیات اور ظاہر شاہ گروپ میں تقسیم تھے۔ پاکستان فٹبال فیڈریشن کی معطلی سے قبل فیفا نے پی ایف ایف کو دھڑے بندی ختم کرنے کے لئے تنبیہ کی تھی، تاہم اس کے باوجود دونوں دھڑے اپنی ضد پر اڑے رہے تھے۔

2015 میں ہونے والے انتخابات کو سنگل بنچ کی جانب سے کالعدم قرار دیتے ہوئے جسٹس (ر) اسد منیر کو ایڈمنسٹریٹر مقرر کیا گیا۔ اکتوبر 2017 میں فیفا نے تیسرے فریق کی مداخلت کے باعث پاکستان فٹبال فیڈریشن کی رکنیت معطل کر دی تھی۔ اب عدالتی فیصلے کے بعد فیفا کی جانب سے پاکستان فٹبال فیڈریشن کی معطلی ختم کئے جانے کا امکان روشن ہوگیا ہے۔

دنیا کی بلند ترین چوٹیاں سر کرنے والے روسی نژاد پولش کوہ پیما ڈینس اروبکو ساتھیوں کی مخالفت کے باوجود شدید سردی میں دنیا کی دوسری بڑی بلند ترین چوٹی ‘کے ٹو’ کو سر کرنے نکل پڑے۔

پولینڈ کے کوہ پیما ڈینس موسم سرما میں ‘کے ٹو’ کے علاوہ دنیا کی تقریباً تمام بلند ترین چوٹیاں سر کرچکے ہیں اور اب انہوں نے پاکستان کی سب سے بڑی اور دنیا کی دوسری بلند ترین چوٹی کو سر کرنے کی ٹھا ن لی ہے۔

نینشل جیوگرافک کی ایک رپورٹ کے مطابق 44 سالہ ڈینس اروبکو، اپنے ساتھیوں سے مسلسل اختلافات کے بعد ہفتہ (24 فروری) کو اکیلے ہی ‘کے ٹو’ سر کرنے نکل گئے۔

رپورٹ کے مطابق ڈینس اپنی ٹیم کو فروری میں ‘کے ٹو’ سر کرنے کے لیے آمادہ کر رہے تھے تاہم ٹیم کے مسلسل انکار کے بعد انھوں نے اکیلے ہی اس کا آغاز کر دیا۔

واضح رہے کہ موسم سرما میں ‘کے ٹو’ کو سر کرنا ناممکن قرار دیا جاتا ہے اور ڈینس کی اس مہم کو ساتھی کوہ پیما انتہائی خطرناک قرار دے رہے ہیں۔

رپورٹ کے مطابق ڈینس نے اپنے ساتھ ریڈیو لے جانے سے بھی انکار کردیا، جس کے باعث ان کی ٹیم کے پاس ان سے رابطہ کرنے کا کوئی ذریعہ نہیں ہے اور نہ ہی انہیں معلوم ہے کہ وہ چوٹی پر اس وقت کہاں موجود ہے۔

ٹیم لیڈر کرزیزف ویلیسی کے مطابق ‘ڈینس کی یہ حرکت انتہائی نامناسب ہے اور انہوں نے ہم سب کو بھی خطرے میں ڈال دیا ہے، اگر انہیں کوئی مسئلہ درپیش آتا ہے تو ان کے ریسکیو کے لیے ہمیں ہی جانا پڑے گا’۔

لاہور(سپورٹس رپورٹر/ایمرا نیوز)ایران کی کبڈی ٹیم کی لاہور آمد،یکم مارچ سے ہونے والی چالیسویں نیشنل چیمپئن شپ میں شرکت کرے گی۔

ذرائع کے مطابق یکم مارچ سے شروع ہونے والی نیشنل کبڈی چیمپئن شپ میں شرکت کےلئے ایرانی کبڈی ٹیم کی لاہور آمد،چیمپئن شپ میں ملک بھر سے ٹیمیں شرکت کریں گی، نیشنل کبڈی چیمپئن میں شرکت کے لئے ایران کی کبڈی ٹیم لاہور پہنچ گئی, چیمپئن شپ میں ملک بھر سے ٹیمیں شرکت کریں گی جبکہ ایرانی ٹیم لاہور میں سات دن قیام کرے گی اور پانچ میچ کھیلے گی۔

مہمان ٹیم ماہان ائیرلائنز کی پرواز 1135 کے ذریعے لاہور پہنچی, ائیرپورٹ پر پاکستان کبڈی فیڈریشن کے سیکرٹری رانا سرور نے ٹیم کا استقبال کیا۔