Category کھیل

دبئی(سپورٹس رپورٹر/میڈیا 92نیوز)پاکستان سپر لیگ (پی ایس ایل) کے تیسرے سیزن کے چوتھے میچ میں اسلام آباد یونائیٹڈ نے پشاور زلمی کے خلاف ٹاس جیت پہلے بولنگ کا فیصلہ کیا ہے۔

یہ اسلام آباد یونائیٹڈ کا پی ایس ایل تھری میں پہلا میچ ہو گا، جو مصباح الحق کی قیادت میں پی ایس ایل کا پہلا ٹائٹل اپنے نام کر چکی ہے۔

دوسری جانب دفاعی چیمپئن پشاور زلمی کو رواں سیزن کے پہلے میچ میں ملتان سلطانز کے ہاتھوں شکست کا سامنا کرنا پڑا تھا۔

پی ایس ایل3: جنید، طاہر کی شاندار بولنگ کی بدولت ملتان دوسرے میچ میں بھی کامیاب

آج پی ایس ایل کا دوسرا میچ کوئٹہ گلیڈی ایٹرز اور لاہور قلندرز کے درمیان کھیلا جائے گا۔

کوئٹہ کو پہلے میچ میں کراچی کنگز کے ہاتھوں شکست کا سامنا کرنا پڑا تھا جب کہ لاہور قلندرز کو ملتان سلطانز نے 43 رنز سے شکست دی تھی۔

خیال رہے کہ پاکستان سپر لیگ کا تیسرا ایڈیشن 22 فروری سے شروع ہوچکا ہے جس کے ابتدائی میچز یو اے ای میں جب کہ ایلیمینیٹر میچز 20 اور 21 مارچ کو لاہور میں ہوں گے اور فائنل 25 مارچ کو کراچی میں کھیلا جائے گا۔

دبئی(سپورٹس رپورٹر/میڈیا 92نیوز)پی ایس ایل تھری میں آج تیسرے دن دو مقابلے شیڈول ہیں، اسلام آباد یونائیٹڈ کا پشاور زلمی جبکہ لاہور قلندرز کا کوئٹہ گلیڈی ایٹرز سے مقابلہ ہوگا۔

اسلام آباد یونائیٹڈ کا شام ساڑھے چار بجے پشاور زلمی سے مقابلہ ہوگا ، دفاعی چیمپئن پشاور زلمی ملتان سلطانز کے خلاف پہلے میچ میں ناکام رہی تھی۔ دن کا دوسرا مقابلہ کوئٹہ گلیڈی ایٹرز اور لاہور قلندرز کے درمیان شیڈول ہے۔ ایونٹ کا یہ پانچواں میچ رات نو بجے شروع ہو گا۔

پی ایس ایل تھری کے دوسرے روز کراچی کِنگز اور ملتان سلطانز نے اپنے اپنے میچ جیت لیے۔ ملتان کی جانب سے 180 رنز کے بڑے ہدف کا تعاقب کرتے ہوئے قلندرز کی پوری ٹیم 136 رنز پر ڈھیر ہو گئی۔ پہلے بیٹنگ کرتے ہوئے سلطانز کے سنگاکارا نے لگاتار دوسری نصف سنچری بنائی۔ اس سے پہلے کھیلے گئے میچ میں کراچی کنگز نے کوئٹہ گلیڈی ایٹرز کو 19 رنز سے شکست دی۔ سرفراز الیون 150 رنز کے ٹارگٹ کے تعاقب میں 9 وکٹ پر 120 رنز ہی بنا سکی۔

لاہور(سپورٹس رپورٹر/میڈیا 92نیوز) پاکستان ہاکی ٹیم کیلیے غیر ملکی کوچ کی خدمات حاصل کرنے کا حتمی فیصلہ کر لیا گیا جب کہ حتمی غیر ملکی کوچ کا فیصلہ پیر تک متوقع ہے۔

سیکریٹری پی ایچ ایف شہباز احمد سینئر کا کہنا ہے کہ گرین شرٹس کا نیا چیف کوچ غیر ملکی ہی ہوگا۔ تفصیلات کے مطابق انٹرنیشنل ایونٹس میں پاکستانی کوچز کی مسلسل ناکامی کے بعد پی ایچ ایف نے قومی ٹیم کے لیے مستقل بنیادوں پر غیر ملکی کوچ رکھنے کا حتمی فیصلہ کیا ہے۔

ذرائع کے مطابق فیڈریشن حکام کی اس وقت جرمنی کے کرسٹین بلنک، آسٹریلیا کے جمی ڈائر اور ہالینڈ کے راولنٹ اولٹمینز کے ساتھ بات چیت حتمی مرحلے میں داخل ہو چکی ہے، راولنٹ اولٹمینز پاکستانی ٹیم کے پہلے بھی کوچ رہ چکے ہیں اور انھوں نے حال ہی میں اومان میں ہونے والے 3 ملکی ٹورنامنٹ میں پی ایچ ایف حکام کے ساتھ ملاقاتیں کرنے کے ساتھ کچھ وقت پاکستانی ٹیم کے ساتھ بھی گزارا ہے۔
کرسٹین بلنک کا شمار بھی دنیا کے ممتاز کھلاڑیوں اور کوچز میں ہوتا ہے جبکہ جمی ڈائر بھی کوچز کے میدان میں صلاحیتوں کا لوہا منوا چکے ہیں، ذرائع کے مطابق ان 3 کوچز میں سے حتمی کوچ کا فیصلہ پیر تک ہوگا۔ یہ بات قابل ذکر ہے کہ رواں برس پاکستان ہاکی ٹیم کے لیے انتہائی اہمیت کا حامل اس لیے بھی ہے کیونکہ گرین شرٹس نے اس سال کامن ویلتھ گیمز سمیت 5 بڑے عالمی ٹورنامنٹس میں شرکت کرنا ہے، ان ایونٹس میں کامن ویلتھ گیمز، چیمپئنز ٹرافی، ایشین ٹرافی، ایشین گیمز اور ورلڈ کپ شامل ہیں۔

ایشین گیمز ایک طرح سے اولمپک گیمز تک رسائی کا ذریعہ بھی بنے گی، ایونٹ کا چیمپئن ہونے کی صورت میں قومی ٹیم براہ راست میگا ایونٹ کے لیے کوالیفائی کرنے میں کامیاب ہوجائے گی۔

مزید معلوم ہوا ہے کہ اپریل میں آسٹریلیا میں شیڈول کامن ویلتھ گیمز کی تیاریوں کے لیے کیمپ عبدالستار ایدھی ہاکی اسٹیڈیم کراچی میں یکم مارچ سے شروع ہوگا، معاملات طے پانے کی صورت میں غیر ملکی کوچ ہی اس کیمپ کی نگرانی کریں گے جبکہ قومی ٹیم کے موجودہ ہیڈ کوچ حسن سردار کو ٹیم منیجر کی ذمہ داریاں سونپے جانے کا امکان ہے۔

کامن ویلتھ گیمز 2018 مینز اور ویمنز ہاکی ایونٹس کے شیڈول کے مطابق پاکستانی ٹیم 5 اپریل کو ویلز کے خلاف مہم کا آغاز کرے گی جبکہ 7 اپریل کو گرین شرٹس کو روایتی حریف بھارت کا چیلنج درپیش ہوگا۔

ادھر سیکریٹری پی ایچ ایف شہباز احمد سینئر کا کہنا ہے کہ گرین شرٹس کا نیا چیف کوچ غیر ملکی ہی ہوگا۔ ایکسپریس سے بات چیت میں ان کا کہنا تھا کہ رواں سال پاکستان ٹیم کے لیے خاصا اہم ہے، قومی ٹیم کے 5 بڑے عالمی ایونٹس میں اچھی کارکردگی کے حصول کے لیے بھر پور اقدامات کیے جا رہے ہیں، ہم سمجھتے ہیں کہ عوامی توقعات کے مطابق نتائج کے حصول کے لیے غیر ملکی کوچ ناگزیر ہے، دنیا کے 3 ممتاز کوچز کے ساتھ بات چیت جاری ہے، پیر تک کسی ایک کے ساتھ معاملات طے کر لیے جائیں گے۔

شہباز احمد سینئر نے کہا کہ کامن ویلتھ گیمز کی تیاریوں کے لیے قومی ٹیم کا کیمپ یکم مارچ سے کراچی میں شروع ہوگا جس میں ماہر کوچز کی نگرانی میں کھلاڑیوں کی خامیوں پر قابو پانے کی کوشش کی جائے گی۔

دبئی(سپورٹس رپورٹر/میڈیا 92نیوز)پاکستان سپر لیگ کی فرنچائز کوئٹہ گلیڈی ایٹرز کے کپتان سرفراز احمد نے کہا ہے کہ کھلاڑیوں کی غیر ملکی لیگ میں شرکت کو کنٹرول کرنا ضروری ہے۔

پاکستان سپر لیگ کے تیسرے ایڈیشن کے دوسرے میچ میں کراچی کنگ نے کوئٹہ گلیڈی ایٹرز کو 19 رنز سے شکست دے دی ہے۔

اس موقع پر جیو نیوز سے گفتگو کرتے ہوئے کوئٹہ گلیڈی ایٹرز کے کپتان سرفراز احمد کا کہنا ہے کہ پی ایس ایل ٹیلنٹ فیکٹری بن چکا ہے جس سے اور بھی نئے کرکٹرز سامنے آئیں گے۔

انہوں نے کہا کہ کراچی کنگز کیخلاف میچ میں بیٹنگ ٹھیک طرح نہیں ہوسکی اور ابتدائی اوورز میں بلے باز سست رفتاری سے کھیلے جس کے باعث دباؤ میں اضافہ ہوا۔

ان کا کہنا تھا کہ کھلاڑیوں کی غیر ملکی لیگ میں شرکت کو کنٹرول کرنا ضروری ہے کیوں کہ آگے ہماری بہت کرکٹ ہے اور اہم سیریز آرہی ہیں جب کہ امید ہے پی سی بی کھلاڑیوں کی لیگ میں شرکت کے بارے میں پراپر پلان بنائے گی۔

لاہور(سپورٹس رپورٹر/میڈیا 92نیوز) پاکستان کرکٹ ٹیم کے سابق فاسٹ بولر شعیب اختر کا کہنا ہے کہ پی ایس ایل ایک برانڈ بن چکا ہے اور یہ پاکستان کرکٹ کیلیے بہترین ہے۔

شعیب اختر نے کہا کہ پی ایس ایل کی ٹیموں کی تعداد بھی بڑھ رہی ہے اور انھیں حیرت نہیں ہوگی کہ آئندہ آنے والے سالوں میں پی ایس ایل میں 10 ٹیمیں مدمقابل نظر آئیں تاہم پی ایس ایل ایک برانڈ بن چکا ہے اور یہ پاکستان کرکٹ کیلیے بہترین ہے۔

ایک انٹرویو کے دوران ان کا کہنا تھا کہ پی ایس ایل نے پاکستان کرکٹ کو متعدد اسٹارز دیے اور کھلاڑیوں کو اضافی پیسے فراہم کیے ہیں۔ انھوں نے کہا کہ عمر اکمل اچھے فارم میں ہیں، کامران اکمل بے خوف ہوکر کرکٹ کھیل رہے ہیں جبکہ شاہین آفریدی ابھرتے ہوئے باصلاحیت فاسٹ بولر ہیں۔ پی ایس ایل تھری میں عمر اکمل، کامران اکمل اور شاہین آفریدی اچھا پرفارم کریں گے۔

کراچی(سپورٹس رپورٹر/میڈیا 92نیوز)بالی ووڈ کے نامور مزاحیہ اداکار کپل شرما کا پاکستان اور پاکستانیوں سے لگاؤ ڈھکا چھپا نہیں وہ اکثر موقعوں پر اس کا اظہار بھی کرتے رہتے ہیں لیکن اب یہی لگاؤ ان کیلئے جرم بن گیا ہے اور بھارت میں ہندو انتہا پسندوں کے ساتھ ساتھ متعصب میڈیا بھی ان کی حب الوطنی پر سوالیہ نشان اٹھارہا ہے۔

دبئی میں جاری پی ایس ایل 3 کے رنگارنگ اور گلیمر سے بھرپور شاندار ایونٹ کی چکاچوند نے پاکستان سمیت بھارت کو بھی دیوانہ بنادیا ہے۔ پاک بھارت سرحد پر کشیدگی کے باوجود بھارتی فنکار خود کو پی ایس ایل میں شرکت کرنے سے روک نہیں پارہے ہیں تاہم بھارتی فنکاروں کی پی ایس ایل کیلئے دیوانگی بھارت اور بھارتی میڈیا کو ایک آنکھ نہیں بھارہی ہے۔

بھارتی ٹی وی کے مزاحیہ اداکار کپل شرما پاکستان سے بے انتہا محبت اور دل سے عزت کرتے ہیں، یہی وجہ ہے کہ پی ایس ایل 3 میں پشاور زلمی کے بانی جاوید آفریدی نے جب کپل کو اپنی ٹیم کو سپورٹ کرنے کیلئے مدعو کیا تو کپل انکار نہ کرسکےاور پاکستان سے محبت کی وجہ سے وہ پی ایس ایل 3 میں شرکت کرنے اور پشاور زلمی کو پرموٹ کرنے کیلئے ان دنوں دبئی میں موجود ہیں، لیکن کپل شرما کی پی ایس ایل 3 میں شرکت بھارتی میڈیا کو سخت ناگوار گزررہی ہے یہاں تک کہ انہوں نے کپل کی حب الوطنی پر بھی سوالیہ نشان اٹھادئیے ہیں۔

ایک بھارتی ویب سائٹ نے کپل کی دبئی میں شرکت کو آڑے ہاتھوں لیتے ہوئے لکھا ’’ہمارے بھارتی جوان سرحد کی حفاظت کرنے کیلئے دن رات جاگتے ہیں تاکہ ہماری قوم چین سے اپنے گھروں میں سو سکےلیکن المیہ یہ ہے کہ کپل ہماری سرحدوں پر کشیدگی پھیلانے والے پاکستان اور پاکستانی ایونٹ پی ایس ایل3 کو سپورٹ کررہے ہیں۔ کیا کپل کے ارد گرد موجود لوگوں نےانہیں نصیحت نہیں کی۔ فنکاروں کی بیرون ملک جاکر مختلف ایونٹ میں شرکت کرنا عام بات ہے لیکن پاکستانی ٹیم کو کیوں بڑھاوا دیا جارہا ہے۔ ‘‘

ہندو انتہا پسند جماعت شیو سینا نے کپل کی پی ایس ایل میں شرکت پر شدید تنقید کرتے ہوئے کہا ہے کہ ’’کپل چند پیسوں کیلئے اپنے ملک کی عزت سے کھیل رہے ہیں، جب کہ بھارتی آرمی کا کہنا ہے کہ کپل نے اپنے ملک کی بےعزتی کی ہے۔ بھارتی سیاستدان راج ٹھاکرے کی جماعت کے ترجمان نے کپل کی پی ایس ایل3 میں شرکت اور پرفارمنس کی مخالفت کرتے ہوئے کہا ہےکپل کو شرم آنی چاہئے، ہم کپل کا کوئی شو نہیں دیکھیں گے اور دوسروں سے بھی درخواست کریں گے کہ کپل کا کوئی شو نہ دیکھیں۔

دوسری جانب کپل شرما پی ایس ایل3 میں شرکت کرنے پر بے انتہا خوش ہیں اور پشاور زلمی کو دل سے سپورٹ کررہے ہیں۔ جب کہ چند شرپسند اور ہندو انتہاپسندوں کی مخالفت کے باوجود گزشتہ روز اداکار انیل کپور کے چھوٹے بھائی سنجے کپور بھی پی ایس ایل 3 کی افتتاحی تقریب میں شریک ہوئے اور پی ایس ایل کیلئے اپنی نیک خواہشات کا اظہار کرتے ہوئے کہا کہ وہ پشاور زلمی کی ٹیم کی سپورٹ میں یہاں آئے ہیں۔

واضح رہے کہ آئی پی ایل(انڈین پریمیئرلیگ)میں پاکستانی فنکاروں کی عدم شرکت اور کھلاڑیوں کو نہ لیے جانے پر دنیا بھر میں آئی پی ایل کو سخت تنقید کا نشانہ بنایا جاتا ہے جب کہ پی ایس ایل 3 میں بھارتی فنکاروں کو مدعو کرکے انتظامیہ نے ثابت کردیا کہ فنکاروں کی آپس میں محبت چند بھارتی انتہا پسندوں کی نفرت سے کہیں اوپر ہے۔

دبئی(سپورٹس رپورٹر/میڈیا 92نیوز)پاکستان کرکٹ ٹیم کے سابق کپتان وسیم اکرم کا کہنا ہے کہ پی ایس ایل تھری کا آغاز انتہائی شاندار ہو اہے ۔

پی ایس ایل کی فرنچائز کے ملتان سلطان کے ڈائریکٹر اور سوئنگ کے سلطان وسیم اکرم نے ایک بیان میں کہا ہے کہ پی ایس ایل اچھے انداز میں شروع ہو ئی ہے جبکہ پہلے ہی میچ میں ملتان کا جیتنا بہت اچھا لگا ۔

انہوں نے کہا کہ ایونٹ کی تمام ٹیمیں مضبوط اور متوازن ہیں اس لیئے آئندہ بھی اچھے میچز ہوں گے ۔

انہوں نے اس خواہش کا اظہار کیا کہ اگلے ایک ماہ میں ہرکوئی کرکٹ میں دلچسپی لے ۔اب وقت صرف کرکٹ کا ہے ۔ کر کٹ کے زریعے ہی قوم کو خوشیاں فراہم کرنے کا وقت ہے ۔

واضح رہے کہ ٹیسٹ اور ون ڈے انٹرنیشنل میں پاکستان کی طرف سے سب سے زیادہ وکٹیں حاصل کرنے والے وسیم اکرم پاکستان سپر لیگ میں پہلی بار شامل ہونے والی ٹیم ملتان سلطانز کے ڈائریکٹر آف کرکٹ ہیں۔

دبئی(سپورٹس رپورٹر/میڈیا 92نیوز) جنوبی افریقا کے لیگ اسپنر اور ملتان سلطانز کے کھلاڑی عمران طاہر نے ملتان کی نمائندگی کو اپنے لیے اعزاز قرار دیا ہے۔

عمران طاہر نے اپنے بیان میں کہاکہ پی ایس ایل میں ملتان کی نمائندگی اعزاز ہے، پی ایس ایل کے پہلے میچ میں کامیابی پربہت خوش ہوں۔

لیگ اسپنر کا اپنی ٹیم کے پہلے میچ پر تبصرہ کرتے ہوئے کہنا تھا کہ کمار سنگاکارا کی بیٹنگ نے میچ کو بہت آسان بنا دیا تھا۔

دبئی(سپورٹس رپورٹر/میڈیا 92نیوز)دفاعی چیمپیئن پشاور زلمی، پاکستان سپر لیگ (پی ایس ایل) 3کے افتتاحی میچ میں نئی ٹیم ملتان سلطانز سے ٹکرائے گی۔

پشاور زلمی کے کپتان، ویسٹ انڈیز کے آل راؤنڈر ڈیرن سیمی ہیں، جن کی قیادت میں گذشتہ سیزن میں کوئٹہ گلیڈی ایٹرز کو شکست سے دوچار کرکے پشاور زلمی نے ٹرافی اپنے نام کی تھی۔

اس مرتبہ ‘بوم بوم’ شاہد خان آفریدی پشاور زلمی کا حصہ نہیں ہیں، جن کی کراچی کنگز میں شمولیت کے باعث ٹیم میں ان کی کمی محسوس کی جائے گی۔

دوسری جانب ملتان سلطانز پی ایس ایل 3 میں ڈیبیو کرنے جارہی ہے، جس کی قیادت شعیب ملک کر رہے ہیں۔

اگرچہ یہ ٹیم پی ایس ایل میں نووارد ہے لیکن ٹیم میں شامل غیر ملکی کھلاڑیوں خصوصاً اسپنر عمران طاہر کی وجہ سے ملطان سلطانز اچھی کارکردگی دکھا سکتی ہے۔

پشاور زلمی کی ٹیم پر ایک نظر
ہیڈ کوچ: محمد اکرم

کپتان: ڈیرن سیمی

اسکواڈ: ڈیرن سیمی، تمیم اقبال، کامران اکمل، اینڈرے فلیچر، رکی ویسلز، حماد اعظم، حارث سہیل، وائن براوو، خوشدل شاہ، عمید آصف، سعد نسیم، محمد حفیظ، شبیر رحمان، لیام ڈوسن، ثمین گل، حسن علی، کرس جورڈن، محمد اصغر، وہاب ریاض

ملتان سلطانز کی ٹیم پر ایک نظر
ہیڈ کوچ: ٹام موڈی

کپتان: شعیب ملک

اسکواڈ: شعیب ملک، احمد شہزاد، ڈیرن براوو، عبداللہ شفیق، سیف بدر، نکولس پوران، کمار سنگا کارا، صہیب مقصود، کاشف بھٹی، شان مسعود، تھیسارا پریرا، محمد عباس، عمر صدیق، روز وائٹلی، عمران طاہر، جنید خان، محمد عرفان، سہیل تنویر، عمر گل، ہردوس ولجوئن

ڈھاکا(سپورٹس رپورٹر/میڈیا 92نیوز) بنگلادیش کرکٹ بورڈ مشرفی مرتضیٰ سے ٹوئنٹی 20 ریٹائرمنٹ واپس لینے کی درخواست کرے گا۔

مشرفی مرتضیٰ نے اس طرز سے گزشتہ برس ریٹائرمنٹ لے لی تھی، اس وقت بنگلادیش کو قیادت کا بحران درپیش ہے، اسی وجہ سے مشرفی کو دوبارہ مختصر ترین فارمیٹ میں واپسی کیلیے راضی کیا جارہا ہے تاکہ وہ آئندہ ماہ سری لنکا میں شیڈول ٹرائنگولر سیریز میں ٹیم کی قیادت کرسکیں۔