Category کھیل

لاہور(سپورٹس رپورٹر/میڈیا 92نیوز)پاکستان سپر لیگ (پی ایس ایل) 3 کی افتتاحی تقریب کی میزبانی کے لیے اداکارہ حریم فاروق اور اداکار بلال اشرف دبئی پہنچ گئے ہیں۔

جیو نیوز سے گفتگو کرتے ہوئے حریم فاروق نے بتایا کہ ان کے پسندیدہ کھلاڑی شاہد آفریدی ہیں کیونکہ جب وہ گراؤنڈ میں آتے ہیں تو بھرپور اینرجی کے ساتھ کھیلتے ہیں جو قابلِ ستائش ہے۔

ان کا کہنا تھا کہ ’ایسے وقت آتے ہیں جب آفریدی پرفارم نہیں کرپاتے لیکن جب وہ اچھا کھیلتے ہیں تو دیکھ کر خوشی ہوتی ہے‘ ۔

دوسری جانب بلال اشرف کا کہنا تھا کہ اس بار ہم کافی پر جوش ہیں کیونکہ پی ایس ایل 3 میں 6 ٹیمیں اور 34 میچز ہیں اور سب سے اہم بات یہ ہے کہ کراچی میں بھی کرکٹ بحال ہوگی۔

جب ان سے پوچھا گیا کہ ان کا پسندیدہ کھلاڑی کون ہے تو انہوں نے کیون پیٹرسین، فخر زمان اور شاداب خان کا نام لیا۔

بلال اشرف نے بتایا کہ وہ پی ایس ایل کے پہلے ایڈیشن میں ٹیم کوئٹہ گلیڈی ایٹرز کے ساتھ تھے لیکن اس بار وہ ٹیم ملتان سلطانز کو سپورٹ کر رہے ہیں۔

پی ایس ایل کی افتتاحی تقریب پچھلے دو برسوں سے بھی بہتر ہوگی، نجم سیٹھی

اداکار کا مزید کہنا تھا کہ وہ امید کرتے ہیں کہ ٹیم ملتان سلطان ضرور اچھا کھیلے گی کیونکہ ٹیم کے ڈائریکٹر سابق فاسٹ بالر وسیم اکرم ہیں جب کہ کپتان شعیب ملک ہیں۔

ساتھ ہی ان کا کہنا تھا کہ دلچسپ بات یہ ہے کہ نئی ٹیم کو اس بار پہلے سے زیادہ دباؤ کا سامنا کرنا ہوگا۔

پی ایس ایل 3 کی افتتاحی تقریب میں پاکستانی ثقافت کے رنگوں کو اجاگر کیا جائے گا جس میں گلوکار علی ظفر، شہزاد رائے، عابدہ پروین اور جیسن ڈیرولو اپنی آواز کا جادو جگائیں گے۔

افتتاحی تقریب کے بعد پاکستانی وقت کے مطابق رات 10 بجے پہلا میچ پشاور زلمی اور ملتان سلطانز کے درمیان کھیلا جائے گا۔

لاہور(سپورٹس رپورٹر/میڈیا 92نیوز)صحرائے عرب میں چوکوں، چھکوں کی برسات آج سے شروع ہوگی جب کہ رنگا رنگ افتتاحی تقریب میں شائقین موسیقی کے دھنوں پر جھومیں گے۔

چھکے، چوکے اور وکٹیں گرتے دیکھنے کیلیے بیتاب شائقین کا انتظارختم ہوا، پاکستان سپر لیگ کے تیسرے ایڈیشن کا آغاز آج دبئی انٹرنیشنل کرکٹ اسٹیڈیم میں ہوگا، افتتاحی تقریب میں موسیقی کا تڑکا لگایا جائے گا، عابدہ پروین،علی ظفر،شہزاد رائے اور امریکی گلوکار جیسن ڈیرولو اپنی آواز کا جادو جگائیں گے۔

پاکستان کے ثقافتی رنگ بھی نمایاں کئے جائیں گے، آتش بازی کا شاندار مظاہرہ بھی کیا جائے گا، افتتاحی تقریب کے بعد پاکستانی وقت کے مطابق رات 10 بجے ایونٹ کا پہلا میچ پشاور زلمی اور ملتان سلطانز کے درمیان کھیلا جائے گا۔

گزشتہ برس لاہور کے قذافی اسٹیڈیم میں کوئٹہ گلیڈی ایٹر کو شکست دیکر ٹرافی اٹھانے والی پشاور زلمی ٹیم ٹائٹل کے دفاع کی مہم پی ایس ایل کا حصہ بننے والی فرنچائز ملتان سلطان کیخلاف میچ سے کریگی، ویسٹ انڈین کو دو مرتبہ عالمی ٹی ٹوئنٹی چیمپئن بنانے والے ڈیرن سیمی کی قیادت میں پشاورکو ان فارم اوپنر کامران اکمل کی خدمات بھی حاصل ہیں، وکٹ کیپر بیٹسمین دوسرے سیزن میں 353 رنز کیساتھ ٹاپ اسکورر تھے۔

ادھر تجربہ کار محمد حفیظ کیساتھ تمیم اقبال، حارث سہیل بیٹنگ کو استحکام دینے کیلیے موجود ہونگے، ڈیوائن براوو جیسا آل راؤنڈر بھی میسر ہے، تاہم شکیب الحسن کے انجری کی وجہ سے باہر ہونے پر پشاور ٹیم کو مسائل ہوسکتے ہیں، شاہد آفریدی بھی اس بار کراچی کنگزکوجوائن کرچکے ہیں، وہاب ریاض، کرس جورڈن بولنگ میں ٹیم کیلیے اہم کردار ادا کرنے کی صلاحیت رکھتے ہیں۔

حسن علی کی ابتدائی میچزمیں شرکت مشکوک ہونا بھی پشاور کیلیے پریشانی کا باعث ہے،ان کے کوور کے طور پر عمید آصف کواسکواڈ میں شامل کیا گیا ہے۔حریف ٹیم ملتان سلطانز کو ڈائریکٹر کی صورت میں وسیم اکرم جیسے عظیم کرکٹرز کی رہنمائی حاصل ہے۔

گزشتہ دو سیزنز میں کراچی کنگز کی نمائندگی کرنے والے شعیب ملک اس نئی فرنچائز کی قیادت کرینگے، گذشتہ دو ایونٹس میں کوئٹہ گلیڈی ایٹرز کی جانب سے بہتر پرفارم کرنے والے احمد شہزاد بھی اس ٹیم کا حصہ ہیں، کمار سنگاکارا، صہیب مقصود اور ڈیرن براوو بیٹنگ کے ستون ہونگے، باصلاحیت آل راؤنڈرکیرون پولارڈ کی خدمات بھی میسر ہیں جب کہ جنوبی افریقی لیگ اسپنر عمران طاہر یواے ای کی کنڈیشنز میں انتہائی خطرناک ثابت ہوسکتے ہیں۔

کراچی کنگز اور کوئٹہ گلیڈی ایٹرز کی ٹیمیں جمعہ کو اپنا پہلا میچ کھیلیں گی جبکہ اسی روز لاہور قلندرز اور ملتان سلطانز کا ٹاکرا بھی ہوگا، اسلام آباد یونائیٹڈ 24 فروری کو پشاور زلمی کے مقابل ہوگی جب کہ ہفتے کوہی دوسرا میچ کوئٹہ گلیڈی ایٹرز اور لاہور قلندرز کے مابین ہوگا۔

ایونٹ میں مجموعی طور پر 34 میچز کھیلے جائیں گے جس میں سے 31 دبئی اور شارجہ جبکہ 3 پاکستان میں کھیلے جائیں گے،2پلے آف میچز 20اور 21مارچ کو لاہور جبکہ فائنل 25 مارچ کو کراچی کے نیشنل اسٹیڈیم میں کھیلا جائے گا۔

دریں اثنا پہلے میچ سے قبل پاکستان اور یواے ای میں شائقین کا جوش و خروش عروج پر پہنچ گیا، دبئی میں افتتاحی تقریب اور میچ کے تمام ٹکٹ فروخت ہوچکے ہیں، جنرل، انٹرنیشنل کیساتھ پریمیئم ویسٹ اور ایسٹ اسٹینڈز کا بھی کوئی ٹکٹ باقی دستیاب نہیں رہا۔

دبئی(سپورٹس رپورٹر/میڈیا 92نیوز) پاکستان سپر لیگ (پی ایس ایل) 3 سے قبل پشاور زلمی کی انتظامیہ نے مشہور بھارتی کامیڈین کپل شرما کے ساتھ ایک شو کا انعقاد کیا، جس کے دوران کھلاڑی خوب محظوظ ہوئے۔

شو میں پشاور زلمی کے کھلاڑیوں، آفیشلز، چیئرمین جاوید آفریدی اور مینٹور یونس خان نے شرکت کی۔

شو کے دوران کپل شرما کے دلچسپ جملوں کو کھلاڑیوں نے خوب انجوائے کیا، خاص کر ڈیرن سیمی، کامران اکمل اور محمد حفیظ کے حوالے سے کامیڈین کے چٹکلوں نے محفل میں چار چاند لگا دیئے۔

ویسٹ انڈیز کے سابق کپتان ڈیرن سیمی کو مخاطب کرکے کپل نے پوچھا، ‘آپ کو لوگ خان کہہ کر کیوں بلاتے ہیں؟’

جس پر انہوں نے جواب دیا، ‘آفریدی کی وجہ سے اور شاید اس لیے کیونکہ میرا تعلق پشاور سے ہے’۔

کپل شرما نے کامران اکمل اور محمد حفیظ کے ساتھ بھی خوب ہنسی مذاق کیا۔

کپل نے کامران اکمل کو مخاطب کرتے ہوئے کہا، ‘آپ تین بھائی کرکٹ میں ہیں جبکہ ایک کزن بھی ٹاپ لیول کی کرکٹ کھیل رہا ہے اور آپ سب کے بچے بھی ہیں، اس کا مطلب ہے کہ پاکستان کو کرکٹ میں کسی اور خاندان کی ضرورت نہیں ہے’۔

اس موقع پر پشاور زلمی کے مالک جاوید آفریدی نے کہا کہ وہ پی ایس ایل 3 سے قبل ٹیم کے کھلاڑیوں کو تھوڑا پرسکون وقت فراہم کرنا چاہتے تھے، اس لیے اس شو کا انعقاد کیا گیا۔

جاوید آفریدی کا مزید کہنا تھا کہ ‘کپل شرما ان دنوں ہمارے خطے کے بہترین کامیڈین ہیں اور کھلاڑیوں نے ان کے ساتھ بہت اچھا وقت گزارا’۔

شو میں شوکت خانم میموریل کینسر اسپتال کے بچوں کو بھی مدعو کیا گیا تھا۔

جاوید آفریدی کے مطابق ‘ان کا مشن مسکراہٹیں پھیلانا ہے’۔

لاہور(سپورٹس رپورٹر/میڈیا 92نیوز) پشاور زلمی کے اہم کھلاڑی شکیب الحسن انجری کی وجہ سے پی ایس ایل تھری سے باہر ہوگئے۔

پی ایس ایل اکاﺅنٹ سے جاری بیان میں بتایا گیا ہے کہ گزشتہ ایونٹ کی چیمپئن پشاور زلمی کے شکیب الحسن ایونٹ سے باہر ہو گئے، آل راﺅنڈر اس وقت انگلی کی انجری سے نجات پانے کی کوشش کر رہے ہیں۔ ان کی جگہ بنگلہ دیش کے ہی شبیر رحمٰن اسکواڈ کا حصہ ہوں گے۔

یاد رہے کہ شکیب الحسن سری لنکا کے خلاف سہ ملکی سیریز کے فائنل میں انجری کا شکار ہوئے تھے، جس کے بعد انہیں آرام کا مشورہ دیا گیا تھا،ابھی تک فٹنس مکمل طور پر بحال نہیں ہوسکی، شبیر رحمٰن ابتدائی میچوں کیلیے پشاور زلمی کو دستیاب ہوں گے، بعد ازاں ان کی جگہ انگلینڈ کے لیام ڈاسن کو شامل کیا جائے گا۔

پی ایس ایل کے تیسرے ایڈیشن کے آغاز سے قبل ہی پشاور زلمی کی ٹیم مشکلات سے دوچار ہے، انجرڈ نوجوان فاسٹ بولر حسن علی کی بھی ابتدائی میچز میں شرکت مشکوک ہے۔

لاہور(سپورٹس رپورٹر/میڈیا 92نیوز)پی ایس ایل تھری میں لاہور قلندرز کمزور ٹیم کا لیبل اتارنے کیلیے کوشاں ہونگے۔

تفصیلات کے مطابق پاکستان سپر لیگ کے پہلے ایڈیشن کیلیے منتخب لاہور قلندرز کا اسکواڈ کاغذ پر انتہائی مضبوط نظر آتا تھا، اسے فیورٹس میں شمار کیا گیا لیکن شائقین کو مایوسی کا سامنا کرنا پڑا،ٹیم کی تیاریوں کو دھچکا لگا جب یاسر شاہ پر ڈوپنگ کے سبب پابندی لگی، بنگلہ دیشی پیسر مستفیض الرحمان کو این او سی نہ ملا،کرس گیل کا بیٹ نہ چل سکا،عمراکمل ایونٹ کے ٹاپ اسکورر رہے لیکن ان کی محنت پر دیگر نے پانی پھیر دیا، ٹورنامنٹ کے دوران ہی قیادت کی تبدیلی بھی ہوئی، اظہر علی کی جگہ ڈیوائن براوو کو کپتان بنا دیا گیا مگر ٹیم پوائنٹس ٹیبل پر سب سے نیچے رہی،لیگ مرحلے میں صرف 2میچز میں کامیابی کے بعد اسلام آباد یونائیٹڈ سے میچ میں جیت پلے آف مرحلے میں جگہ دلا سکتی تھی لیکن 5وکٹ سے شکست ہوئی۔

’’سپرٹ آف دی گیم‘‘ ایوارڈ کے سوا لاہور قلندرز کے ہاتھ کچھ نہ آیا۔ دوسرے ایڈیشن میں بہتر کارکردگی کا عزم لیے لاہور قلندرز نے سابق کیوی کپتان برینڈن میک کولم کو قیادت سونپ دی لیکن ڈیوائن براوو انجری کا شکار ہوکرایونٹ سے باہر ہوگئے،کرس گیل کی جگہ سہیل تنویر کو لیا گیا،صہیب مقصود کے بجائے عامر یامین اسکواڈ میں شامل ہوئے،ٹیم نے دوسرے ایڈیشن میں قدرے بہتر کھیل پیش کیا لیکن اس کے باوجود پورے ٹورنامنٹ میں 3 فتوحات کے ساتھ پوائنٹس ٹیبل میں آخری پوزیشن کی خفت اٹھائی، کوئٹہ گلیڈی ایٹرز نے 136 رنز بناکر 128تک محدود کیا،اگلے میچ میں عمراکمل اور جیسن رائے کی جارحانہ بیٹنگ سے تقویت پاکر اسلام آباد یونائیٹڈ کیخلاف159کا ہدف حاصل کیا، پشاور زلمی نے صرف 59پر ڈھیر کرتے ہوئے 3وکٹ سے فتح پائی، یاسر شاہ کی 7رنز کے عوض 4وکٹیں بھی کسی کام نہ آئیں،کراچی کنگز کیخلاف 179کا مجموعہ حاصل کرتے ہوئے 7رنز سے کامیابی حاصل کی، اس میں فخرزمان کی ففٹی بھی شامل تھی۔

کوئٹہ گلیڈی ایٹرز کیخلاف لاہور قلندرز 201رنز کے ہدف کا دفاع نہیں کرپائے،اسلام آباد یونائیٹڈ سے سنسنی خیز میچ میں عمر اکمل کی ففٹی نے ٹیم کا اسکور145رنز تک پہنچایا اور ایک وکٹ سے فتح حاصل ہوئی،پشاور زلمی نے 165کا ٹوٹل پانے کے بعد 17رنز سے شکست دی، اس میچ میں لاہور قلندرز نے 38سے 43رنز کے سفر میں 6وکٹیں گنوائیں،پلے آف مرحلے تک رسائی کیلیے کراچی کنگز کیخلاف لازمی فتح درکار تھی لیکن 156کا ہدف دینے کے باوجود 5وکٹ سے ناکامی کے بعد ایونٹ سے اخراج کا صدمہ برداشت کرنا پڑا،آخری اوور میں 14رنز کا دفاع نہ کیا جا سکا۔اس ایونٹ میں ناکامی سے قطع نظر لاہور قلندرز نے قومی ٹیم کو فخر زمان جیسا اوپنر فراہم کیا جو چیمپئنز ٹرافی میں قومی ٹیم کی فتح کے ہیرو بنے۔تیسرے ایڈیشن کیلیے اسکواڈ انتہائی مضبوط و متوازن دکھائی دے رہا ہے۔

ٹاپ آرڈر میں برینڈن میک کولم اور فخرزمان کے ساتھ آسٹریلوی ٹی 20 اسپیشلسٹ کرس لین بھی حریف بولنگ کو تہس نہس کرسکتے ہیں،عمراکمل کی صلاحیتوں میں کسی شک کی گنجائش نہیں،سنیل نارائن اچھے اسپنر ہونے کے ساتھ آئی پی ایل میں ٹاپ پر بیٹنگ کرتے ہوئے بھی صلاحیتوں کا لوہا منوا چکے،مڈل آرڈر میں کیمرون ڈیلپورٹ بھی موجود ہیں، آل راؤنڈرز میں عامر یامین،بلال آصف اور انجری کا شکار اینجیلو میتھیوز کی جگہ لینے والے اینٹن ڈیوچ بھی موجود ہوں گے، بلاول بھٹی انجرڈ ہوچکے، گذشتہ سیزن میں سب سے زیادہ وکٹیں لینے والے بولر سہیل خان، مستفیض الرحمان، مچل میک کلینگن اور انڈر 19 اسٹار شاہین آفریدی پیس بیٹری میں شامل ہیں، تجربہ کار سنیل نارائن اور یاسر شاہ کے ساتھ ڈوپنگ قوانین کی خلاف ورزی پر پابندی کی سزا پوری کرنے والے حسن رضا کو بھی ڈائریکٹرو کوچ عاقب جاوید نے منتخب کیا ہے،بیٹنگ میں انضمام الحق اور بولنگ میں شعیب اختر کی رہنمائی لاہور قلندرز کو میسر ہے۔

کوئٹہ (سپورٹس رپورٹر/میڈیا 92نیوز)کوئٹہ گلیڈی ایٹرز نے اداکارہ مایا علی کو پاکستان سپر لیگ (پی ایس ایل) سیزن تھری کے لیے اپنی ٹیم کا برانڈ ایمبیسڈر منتخب کرلیا۔

پاکستان سپر لیگ کے تیسرے ایڈیشن کے لیے ٹیم کوئٹہ گلیڈی ایٹرز نے اپنے آفیشل ٹوئٹر پیج پر اداکارہ مایا علی کو اپنا برانڈ ایمبیسڈر مقرر کرنے کا اعلان کیا۔

دوسری جانب اداکارہ نے ٹیم کوئٹہ گلیڈی ایٹرز کا برانڈ ایمبیسڈر مقرر ہونے پر خوشی کا اظہار کیا اور اسے اپنے لیے اعزاز قرار دیا۔

دبئی(سپورٹس ڈیسک/میڈیا 92نیوز) انگلینڈ کے سابق کپتان کیون پیٹرسن آخری مرتبہ پاکستان سپر لیگ کے دوران ایکشن میں دکھائی دینگے۔

کیون پیٹرسن پہلے ہی اس بات کا اعلان کرچکے تھے کہ ان کی تمام قسم کی کرکٹ سے ریٹائرمنٹ کا وقت قریب ہے، انھوں نے ٹویٹر پر اپنی بیوی بچوں اور تمام دوست احباب کا اب تک کے کرکٹ سفر میں ساتھ دینے پر شکریہ ادا کرتے ہوئے کہا کہ میں اب مزید تین سے چار ہفتے کرکٹ کھیلوں گا۔اس کے بعد یہ باب بند ہوجائے گا۔

واضح رہے کہ کیون پیٹرسن پی ایس ایل میں کوئٹہ گلیڈی ایٹرز کی ٹیم میں شامل ہیں۔

دبئی(سپورٹس رپورٹر/ایمرا نیوز)پاکستان سپر لیگ (پی ایس ایل) کے تیسرے ایڈیشن کی ٹرافی کی رونمائی کر دی گئی ہے اور چمچماتی ٹرافی دیکھ کر پاکستانی شائقین کرکٹ کے جوش و جذبات میں مزید اضافہ ہو گیا ہے۔
پی ایس ایل کی ٹرافی کی تقریب رونمائی میں پاکستان کرکٹ بورڈ (پی سی بی) کے چیئرمین نجم سیٹھی اور تمام چھ ٹیموں کے کپتان شریک ہوئے۔ اس موقع پر چیئرمین نجم سیٹھی نے ایک مرتبہ پھر پی ایس ایل کی ٹرافی ڈیزائن کرنے پر سوروسکی کا شکریہ ادا کیا اور تمام ٹیموں کے کپتانوں کی تعریفوں کے پل باندھتے ہوئے ٹیموں کیلئے نیک خواہشات کا اظہار کیا۔

انہوں نے پی ایس ایل کو ایک برانڈ بنانے پر فرنچائز مالکان کے تعاون کا شکریہ ادا بھی کیا اور کہا کہ ان کے بغیر پی ایس ایل ممکن نہیں تھی۔ انہوں نے اعلان کیا کہ اس مرتبہ ٹورنامنٹ کے بہترین باﺅلر، بیٹسمین، وکٹ کیپر اور فیلڈر کو بھی ٹرافی دی جائے گی۔

انہوں نے سب سے پہلے دفاعی چیمپیئن پشاور زلمی کے کپتان ڈیرن سیمی کاتعارف کروایا اور کہا کہ وہ پاکستان کے ہر گھر میں بستے ہیں اور پاکستان میں ایک سپر سٹار کا درجہ رکھتے ہیں اور میں انہیں لیگ میں آمد پر خوش آمدید کہتا ہوں۔

اس کے بعد انہوں نے پاکستان کی ٹیسٹ کرکٹ کی تاریخ کے کامیاب ترین کپتان اور اسلام آباد کے قائد مصباح الحق سمیت شاہد آفریدی، شعیب ملک، برینڈن میکالم اور عماد وسیم کی تعارف بھی کرایا۔

لاہور(سپورٹس رپورٹر/ایمرا نیوز)پی ایس ایل تھری میں کراچی کنگز گذشتہ ناکامیوں کا ازالہ کرنے کی خواہاں ہیں۔

پی ایس ایل ون میں اسٹارز سے مزین کراچی کنگز کو پشاور زلمی کے ساتھ دوسری مضبوط ترین ٹیم شمار کیا جارہا تھا لیکن کارکردگی توقعات کے برعکس رہی، لاہور قلندرز کیخلاف آسان فتح سے مہم کا آغاز کے بعد ٹیم گروپ اسٹیج میں صرف ایک کامیابی حاصل کر پائی، 6 شکستوں کے نتیجے میں چوتھے نمبر پر آنے والی سائیڈ نے پلے آف مرحلے میں جگہ بنائی۔

ناک آؤٹ میچ سے قبل شعیب ملک نے انداز پر اعتراض سامنے آنے پر کپتانی چھوڑ دی اور ان کی جگہ روی بوپارہ کو عہدہ سونپ دیا گیا، اسلام آباد یونائیٹڈ نے 112 کا ہدف صرف ایک وکٹ پر حاصل کرکے ٹورنامنٹ سے باہر کر دیا۔

دوسرے ایڈیشن میں کمار سنگا کارا اور بابر اعظم اسکواڈ میں برقرار رہے، سہیل تنویر کی جگہ کرس گیل نے سنبھالی، اظہر محمود بولنگ کوچ بنے،شعیب ملک، عماد وسیم، روی بوپارہ، محمد عامر، شاہ زیب حسن برقرار رہے، کیرن پولارڈ، میہلا جے وردنے اور ریان میکلارن کی خدمات بھی حاصل کی گئیں، پہلے میچ میں پشاور زلمی نے 118 کا ہدف صرف 3 وکٹ پر حاصل کرکے ناکامی سے دوچار کیا۔

اگلے میچ میں کراچی کنگز نے 159کا مجموعہ پایا لیکن کوئٹہ گلیڈی ایٹرز 7 وکٹ سے سرخرو ہوئی،لاہور قلندرز کے خلاف میچ میں سنگا کارا اور شعیب ملک کے مابین 101 رنز کی شراکت نے فتح کی امید دلائی لیکن 180 کا ہدف حاصل کرنے کی کوشش میں ٹیم 172 تک محدود رہی، ڈک ورتھ لوئس میتھڈ پر اسلام آباد کے خلاف میچ میں 8 رنز سے فتح پائی، پشاور زلمی سے مقابلے میں 174 رنز بنائے، شاہد آفریدی اور ڈیرن سیمی کی جارحانہ بیٹنگ بھی کراچی کنگز کو 9 رنز کی فتح سے دور نہ رکھ پائی۔

کوئٹہ گلیڈی ایٹرز کے خلاف میچ میں 154 کا مجموعہ حاصل کیا، سہیل خان کی ایک اوور میں 3 وکٹوں کے باوجود 6 وکٹ سے شکست گلے کا ہار بن گئی، اگلے میچ میں ایونٹ کی ناکام ترین ٹیموںنے بقاکی جنگ لڑی، کیرن پولارڈ نے آخری 2 گیندوں پر درکار 10 رنز کا حصول مسلسل دو چھکوں سے ممکن بنا دیا۔

آخری لیگ میچ میں فتح کے ساتھ رن ریٹ بہتر بنانے کا چیلنج درپیش تھا، اسلام آباد یونائیٹڈ نے بارش زدہ میچ میں15 اوورز میں 124 کا ہدف دیا، کراچی کنگز کو کم از کم 111 رنز بنانے تھے، کرس گیل نے 17 گیندوں پر 44 رنز اسکور کیے جبکہ کیرن پولارڈ نے ایک بار پھر جارحانہ اننگز کھیلی، پلے آف مرحلے میں کراچی کنگز نے 126 رنز بنائے، محمد عامر، عماد وسیم اور اسامہ میر نے 3,3 شکار کرتے ہوئے اسلام آباد یونائیٹڈ کو 82 پر ڈھیر کر دیا، کوالیفائر 2 میں پشاور نے کامران اکمل کی سنچری سے تقویت پاتے ہوئے 3 وکٹ پر 181 رنز کا پہاڑ کھڑا کیا۔

کراچی کنگز کیرن پولارڈ کے 47رنز کے باوجود 7 وکٹ پر 157رنز بنا سکی اور لاہور میں شیڈول فائنل کی دوڑ سے باہر ہو گئی۔تیسرے ایڈیشن کیلیے کراچی کنگز نے شاہد آفریدی کی خدمات حاصل کی ہیں جو صدر ہونے کے ساتھ بطورکھلاڑی بھی ایکشن میں نظر آئیں گے، ہیڈ کوچ مکی آرتھر ، معاون اظہر محمود برقرار ہیں جبکہ قیادت نوجوان آل راؤنڈر عماد وسیم کے سپرد کی گئی ہے۔

بیٹنگ میں ایون مورگن، لینڈل سیمنز اور بابر اعظم امیدوں کا مرکز ہوں گے، شاہد آفریدی، عماد وسیم اور روی بوپارا کا شمار بڑے آل راؤنڈرز میں ہوتا ہے، وکٹ کیپر محمد رضوان اچھی بیٹنگ بھی کر لیتے ہیں، بولرز میں محمد عامر، عثمان شنواری، تابش خان اور ٹائمل ملز سے امیدیں وابستہ ہیں،نئے ٹیلنٹ محمد عرفان جونیئر کو بھی اسکواڈ میں شامل کیا گیا ہے۔

پیونگ چانگ(سپورٹس رپورٹر/ایمرا نیوز) ونٹر اولمپکس گیمز کے 10ویں دن مزید 3 طلائی تمغوں کا فیصلہ ہوگیا جس میں ناروے نے مزید 2 ٹائٹل جیت کر طلائی تمغوں کی تعداد 11 کرتے ہوئے ٹاپ پوزیشن پر راج برقرار رکھا۔

جرمنی 10 سونے کے تمغے لیکر اب بھی دوسرے نمبر پر ہے، ناروے کے ہاورڈ لورینٹزون نے مینز 500 میٹر اسپیڈ اسکیٹنگ میں اولمپک ریکارڈ قائم کرتے ہوئے ٹائٹل قبضے میں کرلیا، انھوں نے 34.41 سیکنڈز کی پرفارمنس پیش کرکے سب کو حیران کردیا، میزبان جنوبی کوریا کے من کیون چا نے سلور میڈل اپنے نام کرلیا۔

چین کے تینگ یو گاؤ نے برانز میڈل پر حق جتادیا۔مینز 2 مین بوبسلیگ ایونٹ میں کینیڈا اور جرمنی نے مشترکہ طور پر طلائی تمغے حاصل کرلیے، کینیڈا کی فاتح ٹیم جسٹن کریپس اور الیگزینڈر کوپاز پر مشتمل رہی جبکہ جرمنی کیلیے ایونٹ میں 10 واں گولڈ میڈل جیتنے والی ٹیم فرانسسکو فریڈرچ اور ٹوریسٹن مارگیز پر محیط رہی، لٹویا نے برانز میڈل پر اکتفا کیا، ان کی ٹیم میں اوسکارس میلباریڈز، جینس اسٹرینگا اور ڈومانٹس شامل رہے۔
مینز اسکی جمپنگ ایونٹ میں ناروے نے طلائی تمغہ جیت لیا، جرمنی نے چاندی اور پولینڈ نے کانسی کے میڈلز حاصل کیے، پولش ٹیم میں شامل کامیل اسٹوچ نے حالیہ گیمز میں دوسرا میڈل اپنے نام کیا، علاوہ ازیں ویمنز آئس ہاکی کے سیمی فائنلز میں امریکا نے فن لینڈ کو 5-0 سے آؤٹ کلاس کردیا جبکہ کینیڈا کی ٹیم نے روس کو 5-0 سے مات دیکر فائنل میں جگہ بنالی۔

کرلنگ ویمنز ایونٹ کے راؤنڈ میچزمیں امریکا نے ڈنمارک کو دلچسپ اور سنسنی خیز مقابلے میں 7-6 سے مات دی، جاپانی ٹیم کو کینیڈا نے 8-3 سے تختہ مشق بنالیا، میزبان جنوبی کوریا نے سوئیڈن کو 7-6 سے ہرادیا، سوئیڈن نے روسی ٹیم پرہلہ بولتے ہوئے 11-2 سے فتح سمیٹ لی، برطانیہ نے سوئٹزرلینڈ کو 8-7 سے ہرادیا، روس نے ڈنمارک کیخلاف 8-7 سے فتح پائی، امریکا نے چین کو10-4 سے زیر کیا، جاپان نے سوئیڈن کو 5-4 سے ہرادیا۔

مینز ایونٹ میں جنوبی کوریا کی ٹیم نے اٹلی کو 8-6 سے قابو کیا، سوئٹزرلینڈ نے سوئیڈن کیخلاف 10-3 سے کامیابی حاصل کرلی، امریکا نے کینیڈا کو 9-7 سے زیر کرلیا، برطانیہ نے ڈنمارک پر 7-6 سے غلبہ حاصل کرلیا۔

صحافی سے بدتمیزی کرنے والے فرنچ اسکیئرکو وطن واپس بھیج دیا گیا

پیونگ چانگ گیمز کے دوران صحافی سے بدتمیزی کرنے والے فرنچ الپائن اسکیئر میتھیو فیور کو وطن واپس بھیج دیا گیا۔ وہ مینز جینٹ سلالوم میں ساتویں نمبر پر رہے تھے، ریس کے بعد جب صحافی کی جانب سے کھیل کے بارے میں سوال کیا گیا تو انھوں نے توہین آمیز کمنٹس دیے تھے۔

فرنچ مینز اسکئنگ کے ڈائریکٹر ڈیوڈ چیسٹن کا کہنا ہے کہ میتھیو کو ڈسپلنری بنیادوں پر وطن واپس بھیجاگیا ہے، ہم ان گیمز کے دوران ڈسپلنری معاملات کے حوالے سے عدم برداشت کی پالیسی پر عمل پیرا ہیں۔