Category کھیل

جوہانسبرگ (ایم نائن ٹو) جنوبی افریقا کے شہر جوہانسبرگ میں جاری کامن ویلتھ ریسلنگ چمپئن شپ اور فری اسٹائل ایونٹ میں پاکستانی پہلوان چھائے رہے۔ ریسلنگ چمپئن شپ میں پاکستانی پہلوان محمد انعام نے بھارتی پہلوان سمویر سنگھ کو شکست دے کر سلور میڈل اپنے نام کیا جبکہ فری اسٹائل ایونٹ میں پاکستانی پہلوانوں نے چار برانز میڈل حاصل کئے۔ایونٹ میں پاکستانی پہلوان محمد انعام نے اپنی کیٹگری میں لیگ کی بنیاد پر ہونے والےچار میں سے تین مقابلوں میں کامیابی سمیٹی اور اپنے آخری میچ میں انہوں نے بھارتی پہلوان سمویر سنگھ کو 3۔6 سے شکست دے کر سلور میڈل حاصل کیا۔دوسری جانب فری اسٹائل ایونٹ میں چار برانز میڈل حاصل کرنے والوں میں بلال نے 57، غلام غوث نے 70، عمیر احمد نے 86 اور طیب رضا نے 97 کلو گرام کیٹیگری میں کانسی کے تمغے جیتے۔ایونٹ کے گریکو رومن اسٹائل میں پاکستانی پہلوانوں نے 6 برانز میڈل بھی اپنے نام کیے تھے۔

شارجہ (ایم نائن ٹو) بالی وڈ اداکارہ زرین خان بھی بوم بوم شاہد خان آفریدی کی مداح نکلیں۔بھارتی اداکارہ کا کہنا تھا کہ کھیل کو سیاست سے دور رکھنا چاہئے۔ پاکستان اور ہندوستان کے عوام ایک دوسرے سے محبت کرتے ہیں۔شارجہ کرکٹ اسٹیڈیم میں ہونے والے کرکٹ ایونٹ ٹی 10لیگ میں وہ بالی وڈ اداکاروں کے ساتھ جلوہ گرہیں۔خصوصی گفتگو کرتے ہوئے بالی ووڈ اسٹار کا کہنا تھا کہ کرکٹ کا تو مجھے زیادہ پتہ نہیں لیکن شاہد آفریدی بہت پسند ہیں۔ اداکارہ نے کھیل کو سیاست سے دور رکھنے کا مشورہ دیا۔انہوں نے کہا کہ سرحدوںکی اطراف عوام ایک دوسرے سے محبت کرتے ہیں۔ اداکارہ نے اپنے پختون ہونے پر فخر کا بھی اظہار کیا۔

نئی دہلی (ایم نائن ٹو) بھارتی ٹینس اسٹار ثانیہ مرزا گھٹنے کی انجری کے باعث آسٹریلین اوپن میں شرکت نہیں کرسکیں گے۔بھارتی میڈیا رپورٹ کے مطابق ثانیہ مرزا نے کولکتا میں ٹینس ٹورنامنٹ کے موقع پر بتایا کہ ہوسکتا ہے اْنہیں گھٹنے کی تکلیف سے نجات کیلئے سرجری کرانا پڑے اور وہ کئی ماہ تک ٹینس کورٹ سے باہر رہیں گی تاہم وہ راجر فیڈرر کی طرح کم بیک کریں گی۔ٹینس اسٹار کے مطابق اْنہیں چلنے پھرنے میں کوئی مسئلہ نہیں لیکن کھیلنے کے دوران مختلف ڈائریکشنز لیتے وقت گھٹنے میں شدیدتکلیف محسوس ہوتی ہے۔ثانیہ مرزا کا کہنا تھا کہ ڈاکٹر نے اْنہیں چندماہ آرام کرنے کا مشورہ دیاتھا تاہم دوماہ گزرنے کے بعد تکلیف کم نہیں ہوئی ٗ اب ڈاکٹرز فیصلہ کریں گے کہ سرجری کرانی ہے یا انجکشنزلگوانے ہیں۔انہوںنے کہاکہ 15سال بعد چند ماہ کے لئے کورٹ سے باہر رہنا کوئی بڑی بات نہیں ٗراجر فیڈرر بھی 6ماہ تک ٹینس سے باہر رہے اس کے بعد انہوں نے حیرت انگیز طور پر کم بیک کیا اور اب تک کوئی میچ نہیں ہارے، امید ہے میرے ساتھ بھی ایسا ہو۔واضح رہے کہ 2016ء میں ثانیہ مرزا اور مارٹینا ہنگز کی جوڑی سے آسٹریلین اوپن وومنز ٹائٹل جیتا تھا۔

اسلام آباد(ایم نائن ٹو) بھارت نے ایشین نیٹ بال چیمپین شپ کے فائنل میں پاکستان کو سنسنی خیز مقابلے کے بعد ایک گول سے شکست دے کر چیمپیئن شپ جیتنے کا اعزاز حاصل کر لیا۔ملائیشیا میں جاری ٹورنامنٹ میں پاکستان نے ہفتے کو کھیلے گئے ایونٹ کے سیمی فائنل میں سنگاپور کی مضبوط ٹیم کو شکست دے کر فائنل میں جگہ بنائی تھی جبکہ روایتی حریف بھارت نے میزبان ملائیشیا کو مات دے کر فائنل کیلئے کوالیفائی کیا۔اتوار کو ایونٹ کے فائنل میں سنسنی خیز مقابلے کے بعد پاکستان کو بھارت سے ایک گول سے شکست کا سامنا پڑا اور پاکستان نیٹ بال ٹیم کو چاندی کے تمغے رپ ہی اکتفا کرنا پڑا۔پاکستان نے مجموعی طور پر میچ میں شاندار کھیل پیش کیا اور کھیل کے تین کوارٹرز میں برتری حاصل کیے رکھی لیکن آخری کوارٹر میں روایتی حریف کے عمدہ کھیل نے پاکستان نے جیتی بازی چھین لی۔پاکستان ٹیم کا پہلے کوارٹر میں اسکور13-11 (دو گول کی برتری)، دوسرے کوارٹر میں 25-23(دو گول سے برتری)، تیسرے کوارٹر میں 40-36 (چار گول سے برتری) تھی۔تاہم آخری کوارٹر میں بھارت نے 15 گوال اسکور کر کے فیصلہ کن برتری حاصل کرنے کے ساتھ ساتھ میچ میں 51-50 سے کامیابی اپنے نام کرتے ہوئے چیمپیئن بننے کا اعزاز حاصل کر لیا۔یاد رہے کہ پاکستان نے ایونٹ میں ناقابل شکست رہتے ہوئے لگاتار پانچ میچ جیت کر فائنل کیلئے کوالیفائی کیا تھا۔تیسری پوزیشن کا میچ سنگاپور اور ملائیشیا کے مابین کھیلا گیا جسے سنگاپور نے 48کے مقابلے 50 گولوں سے جیت کر تیسری پوزیشن حاصل کر لی۔

لاہور(میڈیا نائن ٹو)آئی سی سی کے مجوزہ فیوچر ٹور پروگرام میں پاکستان چیمپئنزکا چیمپئن بن کربھی تنہا ہوگیا جبکہ بچے آگے نکلنے لگے۔تفصیلات کے مطابق گرین شرٹس کے ساتھ دوسرے درجے کی ٹیموں جیسا سلوک کردیا گیاہے چیمپئنز ٹرافی کے فاتح گرین شرٹس 2019سے 2023تک سب سے کم38 ایک روزہ میچز کھیلیں گے۔ دوسری جانب کرکٹ بے بی سمجھے جانے والے زمبابوے کو40 ، افغانستان 41 اور آئرلینڈ کو42 مقابلوں کا حقدار ٹھہرایا گیا، ویسٹ انڈیز62، بھارت61، آسٹریلیا، سری لنکا 48،48، جنوبی افریقہ، بنگلہ دیش، نیوزی لینڈ 45، 45میچز میں حصہ لیں گے۔ ٹیسٹ میچز کی تعداد میں بھی بنگلہ دیش تک آگے ہے،گرین کیپس کو صرف 28میچز ملیں گے۔ تینوں فارمیٹ کے مقابلوں کی مجموعی تعداد میں پاکستان نویں نمبر پر ہے۔
دوسری جانب پی سی بی نے خواہشات کو حقیقت سمجھ لیا،بھارت کیخلاف آئی سی سی تنازعات کمیٹی کا فیصلہ حق میں ہونے پر مزید24میچز شیڈول میں شامل ہونے کی آس لگالی گئی ہے۔ تفصیلات کے مطابق آئی سی سی فیوچر ٹور پروگرام کے سلسلے میں ورکشاپ سنگاپور میں 7اور 8ستمبر کو ہوچکی، نئے اسٹرکچر کے تحت 2019سے 2023تک رکن ممالک کے میچز کا شیڈول طے کرنے کیلیے اس اہم پیش رفت میں بیشتر کام مکمل کرلیا گیا ہے، فروری میں ہونے والی چیف ایگزیکٹوز میٹنگ میں جائزہ لینے کے بعد اگر ضرورت ہوئی تو تھوڑی بہت تبدیلی کے بعد اسے جون میں ہونے والی سالانہ کانفرنس میں آئی سی سی بورڈ میں پیش کرتے ہوئے منظوری دیدی جائے گی۔
مجوزہ شیڈول میں آئی پی ایل کیلیے انٹرنیشنل ایونٹس کو بھی آگے پیچھے کردیا گیا،بھارتی ٹیم کے بیشتر میچز بڑی ٹیموں کے ساتھ شیڈول کیے گئے ہیں،پاکستان کو سب سے کم ون ڈے میچز دیے گئے، چیمپئنز ٹرافی کے فاتح گرین شرٹس 2019 سے 2023تک صرف 38 ایک روزہ میچز میں حصہ لیں گے، دوسرے درجے کی ٹیموں میں شمار ہونے والا زمبابوے 40 ، افغانستان 41 اور آئرلینڈ 42 مقابلوں میں شریک ہوگا، مجوزہ ایف ٹی پی کے مطابق ویسٹ انڈیز62، بھارت61، آسٹریلیا، سری لنکا 48، 48، جنوبی افریقہ، بنگلہ دیش، نیوزی لینڈ45،45، انگلینڈ 43،آئر لینڈ42، افغانستان 41، زمبابوے 40 اور پاکستان38ون ڈے کھیلے گا۔ دوسری جانب ٹیسٹ میچز میں بھی بنگلہ دیش پاکستان سے آگے ہے،مجوزہ ایف ٹی پی ڈرافٹ میں گرین کیپس اور نیوزی لینڈ کو28، 28 میچز ملے جبکہ طویل فارمیٹ کی کمزور ٹیموں میں شمار ہونے والے بنگلہ دیش کو 35 ٹیسٹ دیے گئے ہیں۔
اس دوران سری لنکا اور ویسٹ انڈیز کے 29، 29 مقابلے ہوں گے،انگلینڈ 46، آسٹریلیا 40، بھارت 37، بنگلہ دیش 35، جنوبی افریقہ32، سری لنکا اور ویسٹ انڈیز 29، 29، پاکستان، نیوزی لینڈ 28، 28،زمبابوے17، آئرلینڈ16، افغانستان 13 طویل فارمیٹ کے میچز کھیلے گا۔زیادہ کمائی والے ٹی ٹوئنٹی فارمیٹ میں بھارت61 میچز کے ساتھ سرفہرست ہے۔
ویسٹ انڈیز 55، نیوزی لینڈ49،آئر لینڈ44، جنوبی افریقہ، بنگلہ دیش، سری لنکا42،42، انگلینڈ41، آسٹریلیا، پاکستان 38، 38، افغانستان 34اور زمبابوے 31 مقابلوں کا حصہ بنے گا۔تینوں فارمیٹ کے مجموعی طور پر سب سے زیادہ 159 میچز بھارت کے کھاتے میں ڈالے گئے ہیں، ویسٹ انڈیز کے146، انگلینڈ 130، آسٹریلیا 126، نیوزی لینڈ 124، بنگلہ دیش122، جنوبی افریقہ اور سری لنکا 119، 119، پاکستان 104، آئر لینڈ 102، افغانستان اور زمبابوے کے88، 88 میچز ہوں گے۔
دوسری جانب پی سی بی ذرائع کا اصرار ہے کہ سنگاپور ورکشاپ میں ابتدائی طور پر پیش کیے جانے والے ایف ٹی پی میں بڑی تبدیلیاں متوقع ہیں، پی سی بی نے اپنے میچز کا جو شیڈول تجویز کیا اس میں 34ٹیسٹ،45 ون ڈے اور 42ٹی ٹوئنٹی رکھے گئے ہیں،اگر آئی سی سی کی تنازعات کمیٹی کے فیصلے میں بھارت کو پاکستان سے کھیلنے کا پابند کیا گیا یا حالات بہتر ہوگئے تو مزید 24میچز کیلنڈر میں شامل ہوسکتے ہیں۔یاد رہے کہ ایف ٹی پی میں میچز کی جو تعداد بتائی گئی اس میں آئی سی سی ایونٹس میں ہونے والے مقابلوں کو شامل نہیں کیا گیا ہے۔

شارجہ(میڈیا نائن ٹو) کرکٹ کی مختصر ترین طرز ٹی 10 لیگ کا آغاز آج سے شارجہ میں ہورہا ہےجس میں شاہد آفریدی اور وریندر سہواگ جیسے اسٹار کرکٹرز بھی ایکشن میں دکھائی دیں گے۔
کرکٹ کے شائقین کے لئے خوشخبری ہے کہ ٹی 10 لیگ کا آغاز آج سے شارجہ میں ہورہا ہے۔ لیگ میں محدود اوورز کے انگلش کپتان ایون مورگن بھی ایونٹ میں حصہ لے رہے ہیں۔ چار روز تک جاری رہنے والا یہ ٹورنامنٹ 93 ممالک میں نشر کیا جائے گا۔
اس لیگ میں ڈینی موریسن، ڈین جونز اور رمیز راجہ کمنٹیٹر کے فرائض انجام دیں گے۔ پہلے یہ ٹورنامنٹ پنک گیند کے ساتھ کھیلنے کا فیصلہ ہوا تھا تاہم دھونی کے مشورے پر سفید گیند ہی استعمال ہوگی۔ شاہدآفریدی پختون ٹیم کی قیادت کریں گے۔ پاکستانی کپتان سرفراز احمد سمیت دیگر تمام اہم اسٹارز بھی اس لیگ میں شریک ہیں۔

کراچی(میڈیا نائن ٹو ڈاٹ ٹی وی) ہیڈ کوچ مکی آرتھر نے کہا ہے کہ کرکٹ میں ہم نے نیا پاکستان تشکیل دے دیا جب کہ کھلاڑیوں کو ڈراپ ہونے کے خوف سے آزاد کردیا گیا۔مکی آرتھر نے غیرملکی میگزین کو انٹرویو دیتے ہوئے کہا کہ میں نے جنوبی افریقہ اور آسٹریلیا کے ساتھ کام کیا مگر وہ زیادہ مستحکم ٹیمیں ہیں، وہاں پر آپ محنت کریں اورکھلاڑی فیلڈ میں پرفارمنس دیتے ہیں مگر پاکستان میں چیزیں کافی مختلف ہیں، یہاں پر ہمیں بہادری دکھانے اور کھیل کو آگے لے جانے کی ضرورت پڑتی ہے۔
ہیڈ کوچ نے بتایا کہ کئی بار ایسا ہوا کہ میں پریس کانفرنس میں بیٹھا اور مجھے سننے کو ملا کہ یہ پاکستان ٹیم ہے جو ایک دن بہت عظیم اور دوسرے روز انتہائی بُری ہوتی ہے، میں کہتا ہوں کہ نہیں وہ پرانا پاکستان ہے اورمیں جس چیز کیلیے فائٹ کررہا ہوں وہ نیا پاکستان ہے کیونکہ ہم اب زیادہ منظم ہوچکے ہیں، اب اچھی اور بُری چیزیں ایک ساتھ چلتی ہیں کیونکہ ہم معاملات کو اب کافی بہتر بناچکے ہیں۔
مکی آرتھر نے کہاکہ پاکستان ٹیم کی کوچنگ سے خود مجھے بہت کچھ سیکھنے کو ملا میں نے یہاں پر اسپن کے بارے میں بہت کچھ جانا، میں سمجھتا ہوں کہ اگر میں کسی جنوبی ایشیائی ٹیم کی کوچنگ نہ کرتا تو میری سی وی ایک طرح سے ادھوری رہ جاتی،میں خود کو ساتویں آسمان پر محسوس کررہا ہوں، پی سی بی میری راہ میں کبھی نہیں آیا، میں ایک بہتر اسٹرکچر قائم کرناچاہتا ہوں کیونکہ اسی سے آپ کو اچھے پلیئرز ملتے رہتے ہیں۔
فاسٹ بولر عامر کے بارے میں مکی آرتھر نے کہاکہ ان کی پیس واپس آنے لگی اور سوئنگ بہتر ہوئی ہے، میں ان کو ایک بڑے میچ پلیئر کے طور پر جانتا ہوں، میں سمجھتا ہوں کہ اعتماد بہت اہم کردار ادا کرتا ہے، عامر کو بھی جب اعتماد ملا تووہ بہتر ہوتا چلا گیا، حسن علی بھی اس کی ایک مثال ہیں، جب انھوں نے ہمارے ساتھ کام شروع کیا تو وہ کافی کمزور تھے لیکن اگر آپ اب ان کو دیکھیں تو وہ کافی مضبوط اور فٹ ہوچکے اور رواں برس انھوں نے مستقل مزاجی سے پرفارم کیا ہے۔
کوچ نے کہا کہ کھلاڑی ٹیم میں اپنے جگہ کے حوالے سے غیریقینی کا شکار اور اسی لیے صرف اپنی خاطر کھیلتے تھے، ہم نے سلیکشن میں تسلسل سے ان پر سے یہ دبائو کافی حد تک کم کردیا ہے۔

لندن(میڈیا نائن ٹو ڈاٹ ٹی وی )باکسر عامر نے راز سے پردہ اٹھاتے ہوئے اہم انکشاف کیا ہے کہ انہوں نے فریال مخدوم سے راہیں جدا کرنے کا فیصلہ کرنے کے باوجود بھی فریال مخدوم کو طلاق کیوں نہیں دی تھی ۔ باکسر عامر نے میڈیا ارکان سے گفتگو کرتے ہوئے کہا ہے کہ میں نے فریال کو طلاق اس لئے نہیں دی کیونکہ اسلام میں حاملہ خاتون کو طلاق دینے کی اجازت نہیں ہے اسی لیے میں نے فریال کو طلاق دینے کا فیصلہ ترک کر دیا ہے ۔مزید یہ کہ میرے اہلخانہ نے بھی مجھے اس بات کا احساس دلایا کہ فریال میرے لئے کیا ہیں ۔ فریال نے بھی اپنی غلطیوں سے بہت کچھ سیکھا ہے اور اب ہم بہت خوش ہیں، ہمیں پوری امید ہے کہ اب ہم دوبارہ ایسی غلطی نہیں کریں گے۔واضح رہے کہ باکسر عامر خان اور ان کی اہلیہ فریال مخدوم میں اختلافات پر بات علیحدگی تک آن پہنچی تھی ، فریال مخدوم نے دوسری مرتبہ ماں بننے کی خبر ٹویٹر کے ذریعے شئیر کی جس کے کچھ عرصہ بعد ہی دونوں میں صلح ہو گئی۔

لاہور(میڈیا نائن ٹو ڈاٹ ٹی وی) اسپاٹ فکسنگ کیس میں قومی کرکٹ ٹیم کے کھلاڑی ناصر جمشید پر ایک سال کی پابندی عائد کردی گئی۔میڈیا کے مطابق پاکستان کرکٹ بورڈ (پی سی بی) کے 3 رکنی اینٹی کرپشن ٹربیونل نے اسپاٹ فکسنگ کیس کا فیصلہ سناتے ہوئے ناصر جمشید پر ایک سال کی پابندی عائد کردی۔ انگلینڈ میں موجود ٹیسٹ کرکٹر اینٹی کرپشن ٹربیونل کے سامنے پیش نہیں ہوئے اور تحقیقات میں تعاون بھی نہیں کیا۔ ناصر جمشید کو اسی سال 13 فروری کو معطل کیا گیا تھا اور ایک سال کی سزا کا مطلب ہے کہ ان کی معطلی ختم ہونے میں صرف دو ماہ رہ گئے ہیں۔
ناصر جمشید کے وکیل حسن وڑائچ نے میڈیا سے گفتگو کرتے ہوئے کہا کہ ٹیسٹ کرکٹر کو بکیز سے رابطوں کے الزامات سے بری کیا گیا تاہم اسپاٹ فکسنگ کیس میں عدم تعاون پر سزا دی گئی، پی سی بی نے ان کے موکل کو بہت بدنام کیا، اس لیے وہ بورڈ پر ہتک عزت کا دعوی کر سکتے ہیں۔

سنگاپور(میڈیا نائن ٹو ڈاٹ ٹی وی ) پاکستان کی سانیہا غفور نے 57 کلوگرام ویٹ کیٹگری میں 4 جب کہ ٹونکل سہیل نے 70 کلوگرام میں سونے کا 1 تمغہ حاصل کیا۔سنگاپور میں جاری ایشیا پیسیفک پاور لفٹنگ چیمپئن شپ میں پاکستان نے 5 گولڈ میڈل حاصل کرلئے ہیں، پاکستان کی جانب سے سنیہا غفور نے 57 کلوگرام ویٹ کیٹگری میں 4 سونے کے تمغے جیت کر اپنی برتری ثابت کی۔ سنیہا غفور نے اسکواٹ، بینچ پریس، ڈیڈلفٹ اور مجموعی وزن میں گولڈ میڈل جیتے ۔پاکستانی ویٹ لفٹر نے اسکواٹ میں 115، بینچ پریس میں 55 اور ڈیڈ لفٹ میں 110 کلووزن اٹھایا جبکہ مجموعی طور پر انہوں نے 280 کلووزن اٹھایا۔ پاکستان کی دوسری ویٹ لفٹر ٹوئنکل سہیل نے 70 کلوگرام کیٹگری میں گولڈ میڈل حاصل کیا جس کے بعد پاکستان نے مجموعی طور پر 5 تمغے حاصل کرلئے ہیں۔ ٹوئنکل سہیل 2015 میں بھی ایشن پاورلفٹنگ چیمپئن شپ میں گولڈ میڈل حاصل کرچکی ہیں۔واضح رہے کہ سنگاپور میں ہونے والے مقابلوں میں 4 خواتین اور 3 مرد پاکستان کی نمائندگی کررہے ہیں۔