Category کھیل

دبئی(میڈیا نائن ٹوڈاٹ‌ ٹی وی)انٹرنیشنل کرکٹ کونسل نے چیمپئنز ٹرافی فائنل کے بعد پاکستان اور بھارت کے کھلاڑیوں میں باہمی گپ شپ کی ویڈیو کو 2017 کا بہترین لمحہ قرار دے دیا۔آئی سی سی نے اپنے ٹویٹر اکائونٹ پر ’اسپرٹ آف کرکٹ‘ مہم کے تحت یہ ویڈیو جاری کی جس میں چیمپئنز ٹرافی کے فائنل میں پاکستان نے بھارت کو شکست دی تھی تاہم بعد میں فیلڈ میں دونوں سائیڈز کے کچھ کھلاڑیوں کو آپس میں کسی بات پر مسکراتے ہوئے دکھایا گیا تھا۔

کولمبو / نئی دہلی(میڈیا نائن ٹو ڈاٹ ٹی وی) آلودگی نے سری لنکا اور بھارت کے تعلقات آلودہ کردیے خراب فضا میں میچ کھلانے پر آئی لینڈرز نے آئی سی سی سے میزبان کی شکایت لگا دی۔وزیر کھیل دیاسری جیاسیکرا کا کہنا ہے کہ کونسل نے ہمیں ضروری کارروائی کی یقین دہانی کرا دی، ہم نہیں جانتے یہ ایکشن کس قسم کا ہوگا، دوسری جانب سری لنکن ٹیم مینجمنٹ نے بھارتی حلقوں کی جانب سے اسموگ کے نام پر بہانے بازی کا الزام مسترد کردیا۔ بھارت اور سری لنکا کے درمیان فیروڑ شاہ کوٹلہ اسٹیڈیم دہلی پر کھیلا جانے والا تیسرا ٹیسٹ ڈرا پر ختم ہوچکا،البتہ اس دوران شہر میں اسموگ کی وجہ سے مہمان کھلاڑیوں کی حالت غیر ہونے کا معاملہ بدستور موجود ہے، وزیر کھیل دیاسری جیاسیکرا نے بتایا کہ ہم نے انٹرنیشنل کرکٹ کونسل سے دہلی کی آلودہ فضا میں میچ کے حوالے سے شکایت کی ہے، جس پر کھیل کی عالمی گورننگ باڈی کی جانب سے ہمیں مناسب قدم اٹھانے کی یقین دہانی کرائی گئی ہے،البتہ ہم نہیں جانتے کہ اس معاملے میں آئی سی سی کی جانب سے کیا اقدام کیا جاتا ہے۔
واضح رہے کہ بھارت کے کچھ کھلاڑیوں، حلقوں اور میڈیا کی جانب سے ایسا تاثر دیا جارہا ہے جیسے سری لنکن ٹیم نے صورتحال کی بڑھا چڑھا کر عکاسی کی اور اس سلسلے میں بہانے بازی کی گئی۔ اس حوالے سے دہلی کے ڈاکٹر کی رپورٹ کو بھی پیش کیا جا رہا ہے جنھوں نے تین کھلاڑیوں کا آکسیجن ٹیسٹ لے کر ان کو نارمل قرار دیا تھا۔ اس حوالے سے سری لنکا کے کوچ نک پوتھاس نے کہاکہ صرف ہمارے ہی کھلاڑیوں کی حالت خراب نہیں ہوئی بلکہ خود بھارتی فاسٹ بولر محمد شامی بھی فیلڈ میں الٹی کرتے ہوئے دکھائی دیے، ہم اپنی جانب سے کچھ بھی نہیں کہہ رہے، پلیئرزکی طبیعت اسی آلودگی کی وجہ سے خراب ہوئی ہے۔

نئی دہلی(میڈیا نائن ٹو ڈاٹ ٹی وی) پاکستانی کرکٹر شعیب ملک کی بھارتی اہلیہ ثانیہ مرزا نے سچن ٹنڈولکر کو اپنا پسندیدہ کھلاڑی قرار دیا ہے۔پاکستان کی بھابھی کے نام سےمشہور معروف بھارتی ٹینس پلیئر ثانیہ مرزا حقیقی زندگی میں کافی چلبلی اور پر مزاح ہیں اور سوشل میڈیا پر اکثر اپنے مداحوں اور چاہنے والوں کے سوالوں کے جوابات بھی دیتی ہیں۔ گزشتہ روز ثانیہ مرزا اپنے مداحوں کے ساتھ بات چیت کررہی تھیں کہ ایک شخص نے ان سے ان کے پسندیدہ کھلاڑی سے متعلق سوال کیا۔
جس پر ثانیہ مرزانے جواب دیا کہ ان کے پسندیدہ کھلاڑی سابق بھارتی کرکٹرسچن ٹنڈولکر ہیں۔ ٹینس اسٹار کے مداح یہ جواب سن کر حیران رہ گئے کیونکہ انہیں ثانیہ سے اس جواب کی توقع نہیں تھی لوگ امید کررہے تھے کہ ثانیہ بھارتی کرکٹ ٹیم کے کپتان ویرات کوہلی، دھونی یا شعیب ملک کانام لیں گی لیکن ثانیہ نے سچن ٹنڈولکر کانام لے کر سب کو حیران کردیا۔
واضح رہے کہ ثانیہ مرزا اور شعیب ملک کا شمار پاک بھارت کی خوشگوار جوڑیوں میں ہوتا ہے۔ ثانیہ مرزاپاکستان کے اہم میچز کے دوران پویلین سے اپنے شوہر کی ہمت بندھاتی ہیں۔ گزشتہ کچھ عرصے قبل پاکستان سری لنکا کے میچ کے دوران بھی وہ پاکستان آئی تھیں اورمیچ کے دوران شعیب اور ثانیہ کے درمیان کی جانے والی ٹوئٹس سوشل میڈیا پر بہت وائرل ہوئی تھیں۔

لاہور(میڈیا نائن ٹو ڈاٹ ٹی وی) پاکستان ہاکی ٹیم کیلیے غیرملکی کوچ کی خدمات حاصل کرنے کی تجویز سامنے آگئی۔انٹرنیشنل پلیئر طاہر شاہ کا کہنا ہے کہ ملکی کوچز میں کوچنگ کی صلاحیت موجود نہیں، گرین شرٹس کی کامیابی کیلیے غیرملکی کوچ کا ہونا ناگزیر ہے، ان کے مطابق ضرورت اس امر کی ہے کہ پاکستان ہاکی ٹیم کے تمام غیر ضروری دورے بند کرکے تمام توجہ ڈومیسٹک ہاکی پر دی جائے۔
’’ایکسپریس‘‘ سے بات چیت میں طاہر شاہ کا کہنا تھا کہ گرین شرٹس کی پے در پے ناکامیوں سے ثابت ہوگیاکہ ملکی کوچز میں کوچنگ کی صلاحیت موجود نہیں، اگر پاکستان ہاکی فیڈریشن کے پاس فنڈز کی کمی ہے تو ہالینڈ میں موجود پاکستانی سفیر کی مدد سے یہ مسئلہ حل کیا جاسکتا ہے۔
یاد رہے کہ پی ایچ ایف کی موجودہ انتظامیہ نے ورلڈ ہاکی لیگ کے سیمی فائنل مقابلوں میں خواجہ محمد جنید کو قومی ٹیم کا ہیڈ کوچ بنایا، ایونٹ میں ناکامی کے بعد ان کو ہٹا کر سابق اولمپئن فرحت خان کو نئی ذمہ داری سونپی گئی، فرحت خان کی کوچنگ میں بھی پاکستانی ٹیم آسٹریلیا میں شیڈول 4 ملکی ٹورنامنٹ میں آخری نمبر پر رہی، اب فیڈریشن حکام ایک بار پھر ٹیم مینجمنٹ میں تبدیلی کے حوالے سے غوروفکر کر رہے ہیں۔
طاہر شاہ نے کہا کہ ماضی میں گرین شرٹس جرمنی، ہالینڈ، سمیت یورپ کی کسی بھی ٹیم کیخلاف میدان میں اترتے تھے تو شائقین میں بڑا جوش وخروش ہوتا تھا، پاکستانی ٹیم کی مسلسل ناکامیوں کے بعد اب حالات اس کے برعکس ہوگئے ہیں اور پاکستان ٹیم کے مقابلوں کے دوران تماشائی نہ ہونے کے برابر ہوتے ہیں، انھوں نے کہا کہ قومی ٹیم کے غیر ملکی دوروں کے دوران غیر ضروری لوگوں کا ساتھ جانا سمجھ سے بالاتر ہے، جو فنڈز کھلاڑیوں پر خرچ کیے جانے چاہئیں وہ فیڈریشن عہدیداروں اور ان کے ساتھیوں کے سیرسپاٹوں پر خرچ کیے جا رہے ہیں۔ انھوں نے کہا کہ ضرورت اس امر کی ہے کہ پاکستان ہاکی ٹیم کے تمام غیر ضروری دورے بند کرکے تمام توجہ ڈومیسٹک ہاکی پر دی جائے۔
ایک سوال پر طاہر شاہ کا کہنا تھا کہ پاکستان اور سری لنکا کی بھارت کے ساتھ ہوم اینڈ اوے کی بنیاد پر سیریز ضرور ہونی چاہیے لیکن یہ سیریز برابری کی بنیاد پر ہونی چاہیے۔

لندن(میڈیا نائن ٹو ڈاٹ ٹی وی) کرکٹ میں کرپشن کاآتش فشاں دہکنے لگا جب کہ آئی سی سی کو نجی لیگز ہدف نظر آنے لگیں۔گزشتہ 2 ماہ کے دوران تواتر کے ساتھ فکسنگ کیسز سامنے آئے ہیں، پہلے اکتوبر میں پاکستانی کرکٹ ٹیم کے کپتان سرفراز احمد سے بکی نے رابطہ کرتے ہوئے انھیں سری لنکا کیخلاف ون ڈے سیریز میں مال بنانے کی پیشکش دی، اسی ماہ ویسٹ انڈیز کیخلاف ٹیسٹ سیریز سے قبل زمبابوین قائد گریم کریمر سے بورڈ کے ایک سابق عہدیدار نے رابطہ کرتے ہوئے میچز کے کچھ حصے فکسڈ کرنے کاکہا،کسی انٹرنیشنل ٹیم کے تیسرے کپتان کو پیشکش کی بھی اطلاعات ہیں لیکن اس کا نام ابھی تک صیغہ راز میں ہے۔
سرفراز احمد اور گریم کریمر دونوں نے ایک گھنٹے کے اندر متعلقہ حکام کو آگاہ کرتے ہوئے اپنا فرض پورا کیا،ان کے اس اقدام کو دنیا بھر میں سراہا بھی گیا،بظاہر تو لگ رہا تھا کہ آئی سی سی کی جانب سے ابتدائی تفتیش مکمل کیے جانے کے بعد معاملہ سرد خانے میں چلا گیا لیکن برطانوی میڈیا کے مطابق تینوں کپتانوں سے رابطہ کیے جانے سمیت کم ازکم 7 کیسز کے حوالے سے اینٹی کرپشن یونٹ کی چھان بین جاری ہے، کرکٹ میں بدعنوانی پھیلانے والوں کی سرگرمیوں کے تواتر سے سامنے آنے سے نئے اے سی یو جنرل منیجر ایلکس مارشل کیلیے چیلنجز بھی بڑھ گئے ہیں۔
سابق پولیس افسر کی سربراہی میں یونٹ کو برصغیر اور مڈل ایسٹ میں نجی سطح پرہونے والے چھوٹے ٹورنامنٹس پر کڑی نظر رکھنا ہوگی،ان میں ریٹائرڈ کرکٹرز کے ساتھ مقامی کھلاڑیوں کی بڑی تعداد بھی ایکشن میں ہونگی۔
یاد رہے کہ رپورٹ میں کسی ایونٹ کا نام تو نہیں لیا گیا لیکن ٹی 10 لیگ اسی طرز کا نجی ٹورنامنٹ ہے جس میں کسی اہم بورڈ کا انتظامی ہاتھ نہیں،ذرائع کے مطابق ویمنز کرکٹ، انڈر17 اور19لیول پر فکسرز کا وار ہونے کے خدشات زیادہ ہیں،کم عمر کھلاڑی پُرکشش پیشکش پر جلد بکیز کے دام میں گرفتار ہوسکتے ہیں جب کہ پلیئرز کو5 ہزار سے ایک لاکھ 50 ہزار ڈالرز تک کی رقم پیش کی جاتی ہے۔
رپورٹ کے مطابق ملائیشیا میں انڈر 17ٹورنامنٹ کے دوران صرف لیگل مارکیٹ میں 7کروڑ ڈالر کا جوا ہوا،اس سے اندازہ کیا جاسکتا ہے کہ بکیز نے کتنا مال بنایا ہوگا۔
خیال رہے کہ آئی سی سی نے ستمبر میں اینٹی کرپشن کوڈ میں ترمیم کی ہے جس کے تحت تفتیش کاروں کو مناسب وجوہات کی بنا پر کسی بھی وقت کرکٹرز، کوچز اور ایڈمنسٹریٹرز کے موبائل فون چیک کرنے کا اختیار حاصل ہو گیا، فون دینے سے انکار پر 2 سالہ پابندی کا سامنا کرنا پڑ سکتا ہے۔
ای سی یو کے نئے جنرل منیجر ایلکس مارشل حال ہی میں ایڈیلیڈ کا دورہ کرچکے جہاں انھوں نے مقامی پولیس سے روابط بڑھانے سمیت کرپشن کے سدباب کیلیے مختلف امور پر بات چیت کی،ان کی جانب سے دیگر ملکوں کے ٹورز بھی متوقع ہیں۔
مزید معلوم ہوا ہے کہ آئی سی سی 7کیسز کا دائرہ کار پھیلاتے ہوئے جو معلومات حاصل کرے گی ان کو نوجوان کرکٹرز کی تعلیم کیلیے وضع کردہ پروگراموں میں بھی استعمال کیا جائے گا۔

لاہور(میڈیا نائن ٹو ڈاٹ ٹی وی) سری لنکا کی ویمنز آرمی ہاکی ٹیم آئندہ برس کے ابتدائی مہینوں میں لاہور کا دورہ کرے گی جب کہ میزبان ملک کی مختلف ٹیموں کے خلاف 5 میچوں کی سیریز میں حصہ لے گی۔سری لنکا کی کرکٹ ٹیم کے بعد اب آرمی کی خواتین ہاکی ٹیم بھی پاکستان آنے کے لیے تیار ہے، پاکستان ہاکی فیڈریشن نے بھی سری لنکا کی میزبانی کرنے کے لیے ویمنز ونگ کو گرین سگنل دے دیا ہے۔ ذرائع کے مطابق سری لنکا کی ویمنز آرمی ہاکی ٹیم 2018 کے ابتدائی ایام میں لاہور کا دورہ کرے گی اور میزبان ملک کی مختلف ٹیموں کے خلاف 5 میچوں کی سیریز میں حصہ لے گی، یہ میچز پنجاب، واپڈا، آرمی، پی ایچ ایف الیون اور لاہور کالج کی ٹیموںکے ساتھ کھیلے جائیں گے۔
یاد رہے کہ لاہور کی خواتین ہاکی اکیڈمی نے گزشتہ ماہ سری لنکا کا دورہ کیا تھا اور میزبان سائیڈ کے خلاف 3میچوں کی سیریز میں حصہ لیا تھا، دورے کے دوران ہی سری لنکا نے بھی پاکستان کے دورے کی خواہش کا اظہار کیا تھا۔
پاکستان ہاکی فیڈریشن کی سینئر نائب صدر پروین سکندر گل کا کہنا ہے کہ سری لنکن ٹیم کا دورۂ پاکستان خوش آئند ہے، اس سے نہ صرف پلیئرز کو کھیلنے کے مواقع ملیں گے بلکہ دونوں ملکوں کے درمیان محبت اور دوستی میں بھی اضافہ ہوگا۔
میڈیا سے بات چیت میں ان پروین سکندر کا کہنا تھا کہ گزشتہ ماہ لاہور ہاکی اکیڈمی نے سری لنکا کا دورہ کیا اور 3 میچوں کی سیریز میں 3-0 سے کامیابی حاصل کی، جذبہ خیرسگالی کے تحت ہم بھی آئی لینڈرز کو پاکستان میں بلانا چاہتے ہیں، اس ضمن میں پی ایچ ایف سے بات کی ہے، عہدیداروں نے سری لنکن ٹیم کو پاکستان بلانے کے لیے گرین سگنل دے دیا ہے۔ انہوں نے کہا کہ دورے کے دوران مہمان ٹیم میزبان ملک کے خلاف 5 میچوں کی سیریزمیں حصہ لے گی۔
ایک سوال پر پروین سکندر گل نے کہاکہ فیڈریشن خواتین ہاکی کے فروغ کے لیے بھی کوشاں ہے، حال ہی میں پاکستان ویمنز ہاکی ٹیم نے ایشین چیمپئن ٹرافی کے فائنل تک رسائی حاصل کی، اس نتیجے سے یہ ثابت ہوتا ہے کہ پاکستان میں خواتین کا ہاکی میں بھی بے پناہ ٹیلنٹ موجود ہے، خاتون پلیئرز کو بھی انٹرنیشنل ایونٹس میں کھیلنے کے مواقع ملتے رہیں تو وہ اپنے کھیل سے ملک وقوم کا نام روشن کرسکتی ہیں۔

لاہور(میڈیا نائن ٹو ڈاٹ ٹی وی) انڈر 19 ورلڈ کپ کیلیے 15 رکنی قومی ٹیم کا اعلان کردیا گیا ہے جس کے لیے حسان خان کپتان ہوں گے۔جونیئر ورلڈ کپ کے لیے 15 رکنی قومی انڈر 19 ٹیم کا اعلان کر دیا گیا، حسان خان قومی ٹیم کی قیادت کریں گے، گرین شرٹس میگا ایونٹ سے قبل آسٹریلیا اور نیوزی لینڈ کے خلاف میچز کھیلیں گے۔ منتخب کھلاڑیوں میں محسن خان، عمران شاہ، زید عالم، روحیل نذیر، محمد طحہ، عماد عالم، علی زریاب، سعد خان، کپتان حسان خان، موسیٰ خان، شاہین شاہ، منیر ریاض، ارشد اقبال، محمد علی، سلیمان شفقات شامل ہیں۔ ریزو پلیئرز میں محمد جنید، حیدر علی، محمد الیاس، اعظم خان، مختار احمد کو جگہ ملی ہے۔
انڈر 19 ٹیم ورلڈ کپ سے قبل آسٹریلیا کے خلاف 3 میچز کی سیریز کھیلے گی، پہلا میچ 27 دسمبر، دوسرا 29 جب کہ تیسرا میچ 31 دسمبر کو کھیلے گی۔ نیوزی لینڈ میں 3 اور 5 جنوری کو میزبان ٹیم کے ساتھ 2 میچز بھی شیڈول کیے گئے ہیں۔

نئی دلی(میڈیا نائن ٹو ڈاٹ ٹی وی) شدید آلودگی کی وجہ سے سری لنکن کھلاڑیوں کو منہ پر ماسک پہن کر میچ کھیلنا پڑا۔دہلی کا شمار دنیا کے آلودہ ترین شہروں میں ہوتا ہے جہاں عام دنوں میں بہت زیادہ فضائی آلودگی رہتی ہے جب کہ دیوالی کے موقع پر فضائی آلودگی کی شرح عام دنوں کے مقابلے میں بڑھ جاتی ہے، اس فضائی آلودگی نے نئی دہلی کے شہریوں کو جہاں پریشان کیا ہوا ہے وہیں سری لنکن ٹیم کے کھلاڑیوں کو بھی ٹیسٹ میچ کے دوران پریشان کیے رکھا اور کھلاڑیوں کو ماسک لگاکر میچ کھیلنا پڑا۔
بھارت اور سری لنکا کی ٹیموں کے درمیان فیروز شاہ کوٹلا اسٹیڈیم میں جاری تیسرے ٹیسٹ میچ کے دوران سری لنکن کھلاڑیوں کو فضائی آلودگی کے باعث کافی دشواری کا سامنا کرنا پڑا، سری لنکن کھلاڑی لنچ بریک کے بعد ماسک لگاکر میدان میں اترے جس کی وجہ سے کھلاڑیوں کو فیلڈنگ کے دوران کافی دشواری کا سامنا کرنا پڑا۔
ٹیسٹ میچ کے دوران فضائی آلودگی کے باعث کئی بار میچ روکنا پڑا، سریلنکن کپتان دنیش چندیمل نے امپائرز کو بتایا کہ کھلاڑیوں کو فیلڈنگ کے دوران فضائی آلودگی کے باعث شدید مشکلات کا سامنا ہے، میچ کے دوران صورتحال اس قدر ابتر ہوگئی کہ سری لنکن کھلاڑی سورنگا اکمل طبیعت خراب ہونے پر گراؤنڈ سے باہر چلے گئے جب کہ کچھ ہی دیر بعد سری لنکن ٹیم کے صرف 10 کھلاڑی ہی گراؤنڈ میں باقی رہ گئے۔
واضح رہے کہ آلودگی کے حوالے سے برطانوی ادارے لینسٹ میڈیکل جنرل کی رپورٹ میں انکشاف کیا گیا ہے آلودگی سے ہلاک ہونے والوں کی فہرست میں بھارت کا پہلا نمبر ہے جہاں صرف 2015 میں 25 لاکھ افراد آلودہ ماحول کی وجہ سے موت کے منہ میں چلے گئے جب کہ بھارتی فضاؤں میں زہریلی مادوں نے ہر چوتھے شہری کو متاثر کیا ہے۔

لاہور(میڈیا نائن ٹو ڈاٹ ٹی وی) قائد اعظم ٹرافی کے سپر8 مرحلے کے ابتدائی روز پاکستانی اوپنراظہرعلی نے ایچ بی ایل کیخلاف سنچری جڑکر فٹنس ثابت کردی، تفصیلات کے مطابق پی سی بی کے زیر اہتمام قائد اعظم ٹرافی کے سپر ایٹ مرحلے کا باقاعدہ آغاز کراچی اور حیدر آباد میں ہوگیا۔ایچ بی ایل نے ٹاس جیت کر پہلے سوئی ناردرن گیس کو بیٹنگ کی دعوت دی تو اظہر علی نے کپتان محمد حفیظ کے ساتھ مل کرعمدہ بیٹنگ کا مظاہرہ کرتے ہوئے اپنی ٹیم کو عمدہ آغاز فراہم کیا ۔ 37کے اسکورپر محمد حفیظ عمرگل کے ہاتھوں بولڈ ہوکرپویلین لوٹ گئے تاہم اظہر علی نے خرم شہزاد کے ساتھ مل کر غیرمعمولی کارکردگی کا سلسلہ جاری رکھا اورعمرگل، عماد بٹ، عبدالرحمن، زوہیب خان اور احمد شہزاد کی بولنگ کا ڈٹ کر مقابلہ کرتے ہوئے 229 گیندوں پر 12 چوکوں کی مدد سے118 رنز بنائے، ذرائع کے مطابق اظہر علی کو قائداعظم ٹرافی میں میچ فٹنس ثابت کرنے کو کہا گیا تھا۔
ایچ بی ایل کے خلاف سنچری جڑنے کے بعد اظہرعلی قومی ٹیم کے دورہ نیوزی لینڈ کے لیے ایک بار پھر فیورٹ ہو گئے ہیں اور ان کا کیویز کے خلاف قومی اسکواڈ کا حصہ بننے کا قوی امکان ہے۔ یاد رہے کہ پاکستان کرکٹ ٹیم جنوری میں نیوزی لینڈ کا دورہ کرے گی اور میزبان سائیڈ کے خلاف 5 ایک روزہ اور3 ٹی ٹوئنٹی میچوں کی سیریز میں حصہ لے گی، سوئی ناردرن گیس نے 2 وکٹ پر 294 رنز جوڑلیے، خرم شہزاد نے انتہائی شاندار بیٹنگ کا مظاہرہ کرتے ہوئے 4 چھکوں اور 8 چوکوں کی مدد سے ناقابل شکست رہ کر 113 رنز بنائے ہیں، اسٹیٹ بینک گراؤنڈ کراچی میں واپڈا کے وقاص محمود نے کے آر ایل کی بیٹنگ لائن کے پرخچے اڑادیے، انھوں نے تباہ کن بولنگ کرتے ہوئے پوری ٹیم کی بساط صرف 95 رنز پر لپیٹ دی، جنید علی40 رنز کیساتھ نمایاں اسکورر رہے، وقاص محمود نے صرف32 رنز دے کر 9 کھلاڑیوں کو پویلین کا راستہ دکھایا۔
جواب میں واپڈا نے 6 وکٹوں پر 96 رنز بنائے ہیں۔ خالد عثمان 41 رنز کیساتھ کریز پر موجود ہیں جبکہ عامر سجاد نے ناٹ آؤٹ 18 رنز بنائے ہیں۔ صدف حسین نے 4 کھلاڑیوں کو میدان بدر کیا جبکہ احمد بشیر نے 2 وکٹیں حاصل کیں۔ یوبی ایل گراؤنڈ نمبرون کراچی میں لاہور وائٹس اورلاہوربلوزکے درمیان بولرز کا راج رہا، دن بھرمیں دونوں سائیڈز سے 14کھلاڑیوں کومیدان بدر ہونا پڑا، لاہور وائٹس کی ٹیم صرف 141 رنز پرہمت ہار گئی، رضوان حسین اورمحمد عرفان نمایاں رہے، دونوں نے بالترتیب42 اور41 رنز بنائے، اعزاز چیمہ اور بلاول اقبال نے انتہائی عمدہ بولنگ کا مظاہرہ کرتے ہوئے4، 4 مہرے کھسکائے۔
جواب میں لاہور بلوز نے 4 وکٹوں پر 150 رنز جوڑلیے، طیب طاہر71 جبکہ سعد نسیم 53 رنز پرناقابل شکست ہیں۔ عمید آصف نے 3 کھلاڑیوں کو میدان بدرکیا۔ گروپ ٹو میں نیازاسٹیڈیم حیدر آباد میں شیڈول میچ میں یو بی ایل نے سوئی سدرن گیس کیخلاف پہلی اننگز میں 252 رنزبناکرپویلین کی راہ لے لی، شان مسعود 75 رنز بناکر نمایاں رہے، حماد اعظم نے25 اور گلریز صدف نے 22 رنزاسکورکیے، احمد جمال نے 34 رنز دے کر 6 کھلاڑیوں کو میدان بدرکیا جبکہ کاشف بھٹی نے3 وکٹیں اپنے نام کیں، سوئی سدرن گیس نے2 وکٹوں پر 31 رنز بنالیے، دونوں وکٹیں پیسر سہیل خان نے حاصل کیں۔

نئی دہلی(میڈیا نائن ٹو ڈاٹ ٹی وی) ویرات کوہلی مسلسل 2 ٹیسٹ اننگز میں ڈبل سنچری بنانیوالے دنیا کے پہلے کپتان اور چھٹے بیٹسمین بن گئے۔نئی دہلی کے فیروز شاہ کوٹلہ گراؤنڈ میں سری لنکا کے خلاف تیسرے ٹیسٹ میں بھارتی کپتان نے لگاتار تیسری اور کیریئر کی 20 ویں سنچری بناتے ہوئے کیریئر میں 5000 رنز بھی مکمل کرلیے۔ کوہلی نے 63 ویں ٹیسٹ کی 105 ویں اننگز میں 20 سنچریوں اور14 نصف سنچریوں کی مدد سے 5000 رنز مکمل کئے ۔ بطور کپتان سب سے زیادہ ڈبل سنچریاں بنا کر کوہلی نے ویسٹ انڈیز کے لیجنڈ بلے باز برائن لارا کا ریکارڈ بھی توڑ دیا۔ برائن لارا کو ٹیسٹ میں 5 ڈبل سنچریاں بنانے کا اعزاز حاصل تھا۔
دائیں ہاتھ کے جارح مزاج بلے باز ویرات کوہلی نے سری لنکا کےخلاف سیریز میں مسلسل دوسری ڈبل سنچری اسکور کی جبکہ تمام 6 ڈبل سنچریاں 18 ماہ میں اسکور کیں اور اس طرح ویرات کوہلی 6 ڈبل سنچریاں بنانیوالے دنیا کے پہلے کپتان بھی بن گئے۔
واضح رہے کہ سری لنکا کے خلاف رواں سیریز کی پہلی اننگ میں ویرات کوہلی گولڈن ڈک پر آؤٹ ہوئے تھے۔ لیکن دوسری اننگ میں انہوں نے سنچری بنائی، ناگپور میں ڈبل سنچری اور دہلی ٹیسٹ میں پہلے دن کا کھیل ختم ہونے تک 156 رنز پرناٹ آؤٹ ہیں۔