Category کھیل

ماسکو(میڈیا نائن ٹو ڈاٹ ٹی وی) فٹبال ورلڈ کپ 2018 کے ڈراز کا اعلان کردیا گیا جس میں میگا ایونٹ میں شامل 32 ٹیموں کو 8 گروپس میں تقسیم کیا گیا ہے۔ آئندہ برس روس میں شیڈول فیفا ورلڈ کپ 2018 کی تیاریاں عروج پر ہیں، میگا ایونٹ 14 جون سے 15 جولائی تک روس میں کھیلا جائے گا، جرمنی کی ٹیم ٹائٹل کا دفاع کرے گی۔ جرمنی نے 2014 میں منعقدہ ایونٹ کے فائنل میں ارجنٹائن کو ہرا کر عالمی چیمپئن بننے کا اعزاز حاصل کیا تھا۔
فٹبال ورلڈ کپ 2018 کے ڈراز کا بھی اعلان کردیا گیا ہے، ورلڈ کپ میں شامل 32 ٹیموں کو 8 گروپس میں تقسیم کیا گیا ہے جب کہ ٹورنامنٹ کا افتتاحی میچ میزبان روس اورسعودی عرب کےدرمیان کھیلا جائے گا۔ گروپ اے میں میزبان، روس، یوروگوئے، مصر اور سعودی عرب شامل ہیں، گروپ بی میں پرتگال، اسپین، ایران اور مراکش کی ٹیمیں شامل ہیں۔
گروپ سی میں فرانس، پیرو، ڈینمارک اور آسٹریلیا کو شامل کیا گیا ہے جب کہ گروپ ای میں برازیل، سوئٹزرلینڈ، کوسٹاریکا اور سربیہ شامل ہیں۔ گروپ ایف میں جرمنی، میکسیکو، سویڈن اورجنوبی کوریا شامل ہیں، گروپ جی میں بیلجیم، انگلینڈ ،تیونس اور پاناما کی ٹیمیں شامل ہیں اور گروپ ایچ میں پولینڈ، کولمبیا، سینیگال اور جاپان کی ٹیمیں شامل ہیں۔
یاد رہے کہ گزشتہ ماہ کے شروع میں فیفا ورلڈ کپ 2018 میں شرکت کرنے والی 32 ٹیموں کی لائن اپ مکمل ہوئی تھی، میزبان ہونے کی حیثیت سے روس نے براہ راست ایونٹ میں شرکت کا ٹکٹ پایا تھا، اس کے بعد برازیل نے میگا ایونٹ تک رسائی حاصل کرکے پہلی ٹیم کا اعزاز پایا تھا جب کہ پیرو 32ویں اور آخری ٹیم تھی۔

لاہور(میڈیا نائن ٹو ڈاٹ ٹی وی) سعید اجمل تمام طرز کی کرکٹ سے ریٹائر ہو گئے اور لیجنڈ آف اسپنر میدان سے باہر جاتے ہوئے آبدیدہ ہو گئے جبکہ اس موقع پر پلیئرز نے انہیں گارڈ آف آنر بھی دیا۔قومی ٹی ٹوئنٹی ٹورنامنٹ کا سیمی فائنل سعید اجمل کے کیریئر کا آخری میچ ثابت ہوا اور ان کی ٹیم فیصل آباد کو لاہور وائٹس کے ہاتھوں شکست کا سامنا کرنا پڑا۔ میچ کے اختتام پر دونوں ٹیموں کے پلیئرز نے انہیں الوداع کہا اور لائنوں میں کھڑے ہو کر بیٹس کی چھاﺅں سے گزارا۔ آف اسپنر اس موقع پر جذبات پر قابو نہ رکھ پائے اور آبدیدہ ہو گئے۔ انہوں نے ہاتھ ہلا کر پلیئرز اور شائقین کی سپورٹ پر ان کا شکریہ ادا کیا۔
واضح رہے کہ سعید اجمل نے قومی ایونٹ کے دوران اعلان کیا تھا کہ وہ موجودہ سیزن میں اپنی خدمات سرانجام دینے کے بعد کرکٹ کو خیرباد کہہ دیں گے۔ آف اسپنر سعید اجمل پاکستان سپر لیگ میں اسلام آباد یونائیٹڈ کی نمائندگی کر رہے تھے تاہم تیسرے ایڈیشن کیلیے انہیں اسپن بولنگ کوچ مقرر کر دیا گیا ہے۔

لاہور(میڈیا نائن ٹو ڈاٹ ٹی وی) انٹرنیشنل باکسر عامر خان کی اہلیہ فریال چھٹیاں اپنے سسرالیوں کے ساتھ پاکستان میں گزاریں گی۔میڈیا سے بات چیت میں عامر خان کی اہلیہ فریال نے کہا کہ میں اپنے شوہرکے ساتھ متعدد بار پاکستان جا چکی ہوں، وہ بڑا خوبصورت ملک اور وہاں کے لوگ بیحد پیار کرنے والے ہیں، انہوں نے امید ظاہر کی کہ میں ایک بار پھر چھٹیاں منانے کے لیے سسرالیوں کے ساتھ پاکستان جاؤں گی۔

سری نگر(میڈیا نائن ٹو ڈاٹ ٹی وی) مقبوضہ کشمیر میں مہندرا سنگھ دھونی کا ’’بوم بوم آفریدی‘‘ کے نعروں سے استقبال کیا گیا۔بھارتی فوج کئی برسوں کے ظلم و تشدد کے بعد بھی کشمیریوں کے دل سے پاکستان کی محبت کو ماند نہیں کر سکی،انھیں جب بھی موقع ملتا ہے وہ اس محبت کا اظہار کچھ ایسے طریقے سے کرتے ہیں کہ بھارت اپنا سا منہ لے کر رہ جاتا ہے۔
بھارتی ٹیم کے سابق کپتان مہندرا سنگھ دھونی کو اعزازی لیفٹینٹ کرنل کا عہدہ بھی دیا گیا ہے، اسٹار کرکٹر مقبوضہ کشمیر میں بھارتی فوج کی جانب سے منعقد کی گئی چنار کرکٹ لیگ کے میچ میں بطور مہمان خصوصی آئے، اس موقع پر وردی میں ملبوس دھونی بہت خوش نظر آ رہے تھے لیکن ان کی یہ خوشی اس وقت رفوچکر ہو گئی جب نوجوانوں نے یک آواز ہو کر ’’بوم بوم آفریدی‘‘ کے نعرے لگانے شروع کر دیے، اس صورتحال پر بھارتی فوج بھی بوکھلاہٹ کا شکار ہو گئی، ایک فوجی اہلکار نوجوانوں کو آنکھیں دکھاتا اور انھیں پیچھے ہٹنے کی ہدایت کرتا بھی نظر آیا، مگر کشمیری نوجوانوں کے جذبے کے سامنے یہ سب بے بس نظر آئے اور فضا ’’بوم بوم، آفریدی‘‘ کے نعروں سے گونجتی رہی۔
اس موقع پر میڈیا سے گفتگو کرتے ہوئے ایک سوال پر دھونی نے کہا کہ پاک بھارت کرکٹ صرف کھیل نہیں بلکہ اس سے بڑھ کر کچھ ہے، اس سے اسٹیڈیمز بھرتے اور بورڈز کو بھاری آمدنی بھی حاصل ہوتی ہے، انہوں نے کہا کہ کھیل کو سیاست سے دور رکھنا چاہیے لیکن بھارتی ٹیم کا معاملہ الگ ہے،دونوں ملکوں کے درمیان کرکٹ کی بحالی اب سیاسی اور سفارتی فیصلہ بن چکا، بہتر ہوگا کہ پاک بھارت کرکٹ کی بحالی کا فیصلہ حکومت پر چھوڑ دیا جائے، وہ جب اجازت دے تو کھیلنا چاہیے ورنہ دیگر میچز پر توجہ دی جائے۔

راولپنڈی (ایم نائن ٹو ڈاٹ ٹی وی )نیشنل ٹی ٹونٹی کپ میں مایہ ناز وکٹ کیپر بلے باز کامران اکمل نے 71گیندوں پر 150کی شاندار اننگ کھیل کر کئی ریکارڈ اپنے نام کرلئے۔تفصیلات کے مطابق راولپنڈی کرکٹ اسٹیڈیم میں جاری نیشنل ٹی ٹوینٹی کپ 2017ء میں کامران اکمل کی طوفانی بیٹنگ نے کئی عالمی ریکارڈ اپنے نام کرلئے۔ لاہور وائٹس کی نمائندگی کرنے والے مایہ ناز وکٹ کیپر بیٹسمین کامران اکمل نے اسلام آباد کے خلاف 71گیندوں پر 150رنز بناڈالے جس میں 12 چھکے اور 14 چوکے بھی شامل تھے۔کامران اکمل نے ٹی ٹونٹی کی ایک اننگز میں سب سے زیادہ 12 چھکے لگانے کا ریکارڈ اپنے نام کرنے کے ساتھ سلمان بٹ کے ساتھ مل کر 209 رنز کی پارٹنر شپ کا عالمی ریکارڈ بھی اپنے نام کرلیا۔ اس سے قبل ٹی ٹونٹی میں سب بڑی پارٹنر شپ کا عالمی ریکارڈ 207 رنز کا تھا۔ کامران اکمل نیشنل ٹی ٹوینٹی کپ میں 382رنز کے ساتھ اس ٹورمنٹ کے ٹاپ اسکورر بھی بن گئے ہیں۔

لاہور(ایم نائن ٹو ڈاٹ ٹی وی )کرکٹ کا میلہ اب سوئٹزر لینڈ کی جمی ہوئی برف پر بھی سجے گا جس میں اسپیڈ اسٹار شعیب اختر اور بیٹنگ پاور وریندر سہواگ سمیت دیگر نامور کھلاڑی ایکشن میں نظر آئیں گے۔اسٹیڈیم میں اسٹار کھلاڑیوں کو کھیلتے تو سب نے ہی دیکھا ہوگا لیکن اب شائقین کرکٹ برف بھی کرکٹ کا مقابلہ دیکھ سکیں گے ۔شعیب اختر الیون اور سہواگ الیون آئس ریزورٹس میں جمی ہوئی جھیل کی سطح پر کرکٹ کھیلیں گے۔8اور 9فروری کو ہونے والے2 ٹی ٹونٹی میچوں میں جیک کیلس، مہیلا جے وردھنے، لسیتھ مالنگا، مونٹی پنیسر، محمد کیف، مائیکل ہسی، ناتھن میک کولم، گریم اسمتھ، ڈینئل ویٹوری، گرانٹ الیٹ اور اویس شاہ سمیت کئی دیگر اسٹار کھلاڑی بھی حصہ لیں گے۔کھلاڑیوں کو 20 سے 50 ہزار ڈالر معاوضہ ملے گا۔ وریندر سہواگ کا کہنا ہے کہ برف پر کھیلنے کی پیشکش قبول کرنے میں 2 منٹ نہیں لگائے۔ میچ کے دوران کھلاڑیوں کو اسپائکس کے بجائے عام اسپورٹس شوز پہن کر کھیلنے کی ہدایت کی گئی ہے۔

لاہور(میڈیا نائن ٹو ڈاٹ ٹی وی) کرکٹ کے بعد ہاکی کا عالمی میلہ پاکستان میں سجانے کا منصوبہ تیار کرلیا گیا ہے۔ورلڈ الیون کے خلاف سیریز کے لیے کھلاڑیوں کے نام فائنل کر لیے گئے جب کہ حتمی اعلان دو تین روز تک متوقع ہے۔ مہمان ٹیم جنوری میں پاکستان کا دورہ کرے گی اور میزبان ملک کے خلاف 3 ٹیسٹ میچز کی سیریز میں حصہ لے گی جب کہ سیریز کے یہ مقابلے لاہور، کراچی اور اسلام آباد میں ہوں گے۔
ذرائع کے مطابق 9 ممالک کے 20 کھلاڑیوں نے پاکستان آنے پر رضامندی ظاہر کر دی، ورلڈ الیون ٹیم 14 کھلاڑیوں اور 2 آفیشلز پر مشتمل ہوگی جس میں ہالینڈ، ارجنٹائن، آسٹریلیا، بیلجیئم، جرمنی، انگلینڈ، جاپان، نیوزی لینڈ، جنوبی کوریا اور ملائیشیا کے کھلاڑی شامل ہوں گے، ورلڈ الیون کا اعلان 25 نومبر تک کر دیا جائے گا۔

لاہور(میڈیا نائن ٹو ڈاٹ ٹی وی) محمد عامر نے ورلڈ کپ 2019 میں تہلکہ مچانے کی ٹھان لی۔محمد عامر نے کہا ہے کہ پابندی کی وجہ سے ورلڈ کپ 2011 اور 2015نہ کھیل پانے کا افسوس ہے،آئندہ ایونٹ میں بھرپور شرکت کرتے ہوئے اپنی کارکردگی سے گہرا تاثر چھوڑنا چاہتا ہوں۔
’’کرک انفو‘‘ کو انٹرویو میں محمد عامر نے کہا کہ میں تینوں فارمیٹ میں اپنی ذمہ داریوں سے انصاف کرنے کیلیے ٹریننگ کے سخت شیڈول پر عمل پیرا رہتا ہوں، 2010میں سامنے آنے والے اسپاٹ فکسنگ کیس میں میرے سزا مکمل کرنے کے بعد کم بیک تک کرکٹ میں انقلابی تبدیلیاں ہوئیں،اس کا انداز یکسر بدل چکا،خاص طور پر محدود اوورز کے کھیل میں بولرز کیلیے مشکلات بڑھ گئی ہیں، ون ڈے میچز میں 300سے زائد رنز عام سی بات ہوگئی، میچز میں بڑے اسکور معمول بن چکے۔
پیسر نے بتایا کہ دائرے کے اندر فیلڈرز کھڑے کرنے کا قانون متعارف کرائے جانے سے بولرز کو اپنی کارکردگی برقرار رکھنے کیلیے نئی ورائٹیز پر کام کرنا پڑا،کھیل میں اس قدر تیزی آنے کی وجہ مختلف ملکوں میں ہونے والی ٹی ٹوئنٹی لیگز بھی ہیں، انہوں نے کہا کہ کرکٹ پہلے سے بہت زیادہ مشکل اور محنت طلب کھیل ہوگیا ہے۔
مکی آرتھر کی طرف سے ٹیسٹ کرکٹ میں شارٹ لینتھ گیندوں کی وجہ سے زیادہ کامیاب نہ رہنے کے سوال پر محمد عامر نے کہا کہ اس میں کوئی شک نہیں کہ کم بیک کے وقت زیادہ فرسٹ کلاس میچز نہ ملنے کی وجہ سے میں ابتدا میں شارٹ گیندیں زیادہ کرتا تھا، بعد ازاں بہتری لانے کی کوشش کی اور مثبت نتائج بھی حاصل ہوئے، ویسٹ انڈیز میں زیادہ کامیابی ملی،اس کے ساتھ ایک اور پہلو بھی مد نظر رکھنا چاہیے کہ ایک ڈیڑھ سال میں ٹیسٹ میچز کے دوران میری بولنگ پر 16کے قریب کیچز بھی ڈراپ ہوئے،ایسا نہ ہوتا تو میرا ٹیسٹ ریکارڈ خاصا بہتر نظر آتا،ہم کسی کو الزام نہیں دے سکتے، کوئی فیلڈرنہیں چاہتا کہ کیچ چھوڑ دے۔

نئی دہلی(ایم نائن ٹو ڈاٹ ٹی وی)بھارتی عدالت نے روسی ٹینس سٹار ماریہ شراپوا کیخلاف مقدمہ درج کرنے کا حکم دے دیا ۔ٹینس کوئین کیخلاف رہائشی منصوبے میں مبینہ غبن اور فراڈ کے الزامات عائد کئے گئے ہیں، سماعت جمعرات کو ہوگی۔درخواست گزارنے موقف اختیار کیا کہ رئیل سٹیٹ کمپنی نے53 لاکھ روپے لے کر فلیٹ دینے کا وعدہ کیا،ماریہ شراپوا نامی ٹینس اکیڈمی بھی منصوبے کا حصہ تھی مگر تاحال ایک اینٹ بھی نہیں رکھی گئی۔تفصیلات کےمطابق بھارتی عدالت میں ماریہ شراپوا کے خلاف درخواست دائر کی گئی جس میں موقف اختیا ر کیا گیا کہ گڑگاؤں کے قریب قائم ایک رئیل سٹیٹ کمپنی نے2013میں 53لاکھ روپے لے کر اسے ایک فلیٹ دینے کا وعدہ کیا تھا اور ساتھ ہی ماریہ کے نام سے ایک ٹینس اکیڈمی بھی اسی رہائشی منصوبے میں قیام کی جائے گی مگر چار سال گزرنے کے باوجود اس منصوبے کی ایک اینٹ بھی نہیں لگائی گئی۔ عدالت میں جمع کرائی گئی درخواست میں مزید کہا گیا کہ رہائشی پروجیکٹ بیلیٹ بائے شراپوا کی تشہیری مہم میں حصہ لیا تھا اور اس رہائشی منصوبے میں ماریہ شرپوا کے بھی شیئرز ہیں ۔درخواست گزار کا مزید کہنا تھا کہ پروجیکٹ کے ڈویلپرز نے ٹینس اسٹار کو خطیر رقم کی پیشکش کرکے اس کی تشہیر پر آمادہ کیا جس کے حوالے سے دعوی کیا گیا تھا کہ یہ 2016 میں مکمل ہوجائے گا۔درخواست گزار نے موقف اختیار کیا کہ شراپوا نے نہ صرف ڈویلپرز کے دھوکہ دہی پر مبنی سرگرمیوں نے پرزور تشہیر کی بلکہ عام آدمی کی نظر میں انہوں نے اس پروجیکٹ کی حمایت بھی کی لہذا وہ بھی اس مجرمانہ سازش کا حصہ ہیں۔پروجیکٹ کے ڈویلپرز کے خلاف بھی دھوکہ دہی اور مجرمانہ سازش کے الزامات کے تحت مقدمہ درج کیا گیا ہے تاہم فی الحال کوئی بھی گرفتاری عمل میں نہیں لائی گئی ہے جبکہ مقدمے کی سماعت کل(جمعرات )تک ملتوی کردی گئی ہے۔

کراچی(میڈیا نائن ٹوڈاٹ ٹی وی) مشہور باکسر محمد وسیم نے مالی مشکلات کے باعث پاکستانی شہریت چھوڑنے پر غور کردیا۔کراچی میں ویڈیو پیغام جاری کرتے ہوئے محمد وسیم نے کہا کہ میں مالی مشکلات کا شکار ہوں، اپنے ملک پاکستان کے لیے کھیلنا چاہتا ہوں، تاہم مالی مشکلات کی وجہ سے شہریت ترک کرنے پر غور کررہا ہوں اور کوریا یا امریکا کی شہریت کے لیے درخواست دے سکتا ہوں۔
محمد وسیم نے کہا کہ اسپانسر نہ ہونے کے باعث بہت مسائل کا شکار ہوں، عالمی ٹائٹل کے لیے جلد ایک انٹرنیشنل فائٹ میں حصہ لوں گا جو شاید پاکستان کےلیے میری آخری فائٹ ہو۔ باکسر محمد وسیم کا کہنا تھا کہ وہ پاکستان کی شہریت ترک کرنا اور ملک کی نمائندگی کو چھوڑنا نہیں چاہتے لیکن مالی مشکلات کی وجہ سے مجبور ہیں۔
واضح رہے کہ محمد وسیم نے 8 پروفیشنلز فائٹ کھیلی ہیں اور سب مقابلوں میں کامیابی حاصل کی ہے۔ اب محمد وسیم ڈبلیو بی سی فلائی ویٹ کی ورلڈ رینکنگ میں نمبر ون پوزیشن برقرار رکھنے کے لیے امریکا روانہ ہورہے ہیں جہاں وہ کولمبیا کے باکسرز سے مقابلہ کریں گے۔