Category کھیل

لاہور (میڈیا پاکستان) پاکستانی کرکٹ ٹیم کے سابق آل راؤنڈر شاہد آفریدی کا کہنا ہے کہ کرکٹرز اور شائقین سب کو ٹی 10 لیگ کا انتظار ہے اور یہ نیا فارمیٹ شائقین میں بے پناہ مقبول ہوگا۔شاہد آفریدی ان کرکٹرز میں شامل ہیں جو 14 سے 17دسمبر تک شارجہ میں ہونے والی اس ٹی 10 لیگ میں حصہ لے رہے ہیں۔شاہد آفریدی کا کہنا ہے کہ وقت کے ساتھ ساتھ کرکٹ میں بڑی تیزی آئی ہے اور اس ٹی 10 کرکٹ میں کرکٹرز کو اپنی مہارت دکھانے کا بھرپور موقع ملے گا۔شاہد آفریدی کا کہنا ہے کہ وہ یہ سوچ رہے تھے کہ مزید ایک سال ٹی 20 کھیل کر کرکٹ کو خیرباد کہہ دیں گے لیکن اس ٹی 10 کی کشش نے انھیں مزید کھیلنے پر مجبور کر دیا ہے۔پہلی ٹی 10 لیگ میں حصہ لینے والی چھ ٹیموں میں پنجاب لیجنڈز، پختون، مراٹھا عربینز، کیرالہ کنگز، بنگال ٹائیگرز اور ٹیم سری لنکا شامل ہیں۔پہلے یہ بتایا گیا تھا کہ اس ایونٹ میں کولمبو لائنز کے نام سے ٹیم حصہ لے گی لیکن اب سری لنکن کرکٹ بورڈ اپنی منتخب کردہ ٹیم اس لیگ میں شرکت کے لیے بھیجے گا۔دبئی میں ہونے والے ڈرافٹ میں پانچ فرنچائزز مالکان نے اپنے کھلاڑیوں کو حتمی شکل دے دی ہے۔شاہد آفریدی (پختون) سرفراز احمد (بنگال ٹائیگرز) اوئن مورگن (کیرالہ کنگز) شعیب ملک ( پنجاب لیجنڈز) اور وریندر سہواگ (مراٹھا عربئنز) اس لیگ کے آئیکونک کرکٹرز قرار پائے ہیں۔ یہی پانچوں کھلاڑی اپنی اپنی ٹیموں کی قیادت بھی کریں گے۔اس لیگ میں حصہ لینے والی پاکستانی کرکٹرز میں فخرزمان، حسن علی، مصباح الحق، عبدالرزاق، عمراکمل، محمد عامر، عماد وسیم، سہیل خان، سہیل تنویر، کامران اکمل، رومان رئیس، محمد نواز، وہاب ریاض، محمد عرفان، احمد شہزاد، فہیم اشرف، جنید خان، عمرگل، حسان خان، اسامہ میر، محمد سمیع اور انور علی شامل ہیں۔دیگر بین الاقوامی کرکٹرز میں بنگلہ دیش کے تمیم اقبال، شکیب الحسن، ویسٹ انڈیز کے ڈیرن سیمی، ڈیرن براوو، کیرون پولارڈ، سیموئل بدری، لینڈل سمنز، نیوزی لینڈ کے لیوک رانکی، انگلینڈ کے الیکس ہیلز، عادل رشید، کرس جارڈن اور سری لنکا کے کمار سنگاکارا اور رنگانا ہیرتھ کے نام قابل ذکر ہیں۔

کراچی(M92) وزیراعلیٰ سندھ سید مراد علی شاہ نے پاکستان ہاکی فیڈریشن کی سرگرمیوں کو فروغ دینے کے لیے 10 کروڑ روپے گرانٹ کی منظوری دی ہے۔گزشتہ روز وزیراعلیٰ ہاؤس میں اجلاس منعقد کیا گیا جس کی صدارت وزیر اعلیٰ سندھ سید مراد شاہ نے کی، انہوں نے کراچی میں ہاکی اسٹیڈیم کی دوبارہ تعمیر کیلیے وزیراعلیٰ سندھ پاکستان ہاکی فیڈریشن کے لیے 10 کروڑ روپے گرانٹ کی منظوری دی ہے۔ اس موقع پر پی ایچ ایف کے صدر خالد سجاد کھوکھر، طارق ہدی، نائب صدر شہباز احمد سینئر، وزیراعلیٰ سندھ کے پرنسپل سیکریٹری سہیل راجپوت، سیکریٹری خزانہ حسن نقوی، سیکریٹری کھیل مسٹر چیف انجینئر کراچی کنٹونمنٹ بورڈ زوہیب مجاہد بخاری، محکمہ کھیل کے چیف انجنیئر اسلم مہر و دیگر حکام موجود تھے۔
وزیراعلیٰ سندھ نے سیکریٹری خزانہ حسن نقوی کو ہدایت کی کہ 3 دن میں 3.5 ملین روپے جاری کیے جائیں، صوبائی حکومت عبدالستار ایدھی ہاکی اسٹیڈیم کو دوبارہ تعمیر کرے گی۔ انھوں نے چیف انجنیئر کھیل اسلم مہر کو ہدایت کی کہ اسٹیڈیم کے سروے کا کام شروع کریں جس پر پی ایچ ایف کے چیف نے کہا کہ انھیں معقول سالانہ امداد کی ضرورت ہے تاکہ سندھ میں ہاکی کی سرگرمیوں کو جاری رکھا جاسکے، اس موقع پر وزیراعلی سندھ نے 100 ملین روپے سالانہ گرانٹ کی منظوری دیتے ہوئے سیکریٹری خزانہ کو ہدایت کی کہ مجوزہ رقم10 دن کے اندر جاری کی جائے۔
مراد علی شاہ نے سیکریٹری خزانہ کو یہ بھی ہدایت کی کہ وہ اسے سالانہ بجٹ میں شامل کریں تاکہ ہر سال ہاکی فیڈریشن کو رقم مل سکے۔ اجلاس میں یہ بھی فیصلہ کیا گیا ہے کہ 10جنوری2018 کو کراچی میں بین الاقوامی ہاکی تقریب کا انعقاد ہوگا جس میں بین الاقوامی کھلاڑی بھی میچز میں شرکت کریں گے، اجلاس میں یہ بھی فیصلہ کیا گیا کہ ہاکی فیڈریشن کراچی اور میرپورخاص میں قومی میچ بھی منعقد کرے گی، اسی طرح کے ایونٹ آئندہ 2 ماہ میں انٹرمیڈیٹ طلبا کیلیے بھی منعقد ہونگے۔
وزیراعلیٰ سندھ نے ان پر زور دیتے ہوئے کہا کہ وہ صوبے میں اپنے ہاکی کلبز کو فعال کریں۔ اگر کلب کو پیشہ ورانہ طریقے سے چلایا تو ہم ورلڈ کلاس کھلاڑی تیار کرسکیں گے۔ وزیراعلی سندھ نے کہا کہ کرکٹ کی طرح، ہاکی کو بھی کمرشل بنانے کی ضرورت ہے تاہم انھوں نے ہاکی فیڈریشن کو یقین دلایاکہ وہ ان کے ساتھ ہر ممکن مدد و تعاون کریں گے جب کہ انھوں نے کہا کہ وہ ہاکی کے شاندار ماضی کی دوبارہ بحالی کے خواہاں ہیں۔

لاہور(M92) قومی کرکٹرز کو کپتان کی ڈانٹ بھی اچھی لگنے لگی جب کہ پیسر حسن علی نے اسے کارکردگی دکھانے کی تحریک قرار دے دیا۔ایک انٹرویو میں فاسٹ بولر حسن علی نے کہاکہ میدان میں سرفراز احمد کے چلانے سے کوئی پلیئر ناراض نہیں ہوتا، سب جانتے ہیں کہ کپتان ایسا غصے میں نہیں بلکہ اس لیے کرتے ہیں کہ تمام کھلاڑیوں کی پوری توجہ کھیل پر مرکوز رہے، ان کے چلانے سے مجھے بھی کوئی پریشانی نہیں ہوتی بلکہ کارکردگی دکھانے کیلیے مزید تحریک ملتی ہے، انہوں نے بتایا کہ سرفراز احمد ڈانٹ دیں تو غصہ کرنے کے بجائے لطف اندوز ہوتا ہوں۔
محدود اوورز کی کرکٹ میں پاکستان کی عمدہ پرفارمنس کے سوال پر انھوں نے کہا کہ بڑی خوش آئند بات ہے کہ جو بھی ٹیم میں آئے بہترین کارکردگی دکھاتا ہے، پلیئرز میں حسد یا مقابلے بازی نہیں، جو بھی اچھا کھیلے سب اس کی حوصلہ افزائی کرتے ہیں، انہوں نے بتایا کہ عثمان خان شنواری نے بہترین بولنگ کی تو میں بھی بہت خوش تھا، ان کو وکٹیں لیتا دیکھ کر مجھے بہت لطف آیا، ایسا ہی لگ رہا تھا کہ میں خود گیند کر رہا ہوں، شاداب خان آیا اور خود کو میچ ونر ثابت کیا، فہیم اشرف اور فخر زمان بھی آتے ہی بہت اچھی انٹرنیشنل کرکٹ کے مطابق ڈھل گئے ہیں، امام الحق نے حال ہی میں اپنے پہلے میچ میں سنچری بنائی،کامیابیوں کے لمحات میں ان سب پلیئرز کے ساتھ ہونا بہت ہی زبردست تجربہ ہے۔
حسن علی نے کہا کہ سینئرز بھی جونیئرز کی بڑی حوصلہ افزائی کرتے ہیں،ٹیم ایک ایسا یونٹ بن چکی جو کامیابیوں کا بھرپور لطف اٹھا رہی ہے۔ انھوں نے کہا کہ میرا خواب ہے کہ پاکستان ٹیم ورلڈکپ 2019جیتے اور میں اس میں بہترین بولر کا اعزاز حاصل کروں،کیریئر کے آغاز میں ملنے والی کامیابیوں کا سلسلہ جاری رکھنے کیلیے سخت محنت کروں گا۔ایک سوال پر حسن علی نے کہا کہ ڈاکٹر نے وکٹ لینے کے بعد جشن منانے کے لیے بم دھماکے کا ایکشن بنانے سے منع کیا تھا،ان کا کہنا تھا کہ اس زوردار انداز سے فٹنس مسائل پیدا ہوسکتے ہیں لیکن میں نے کہا کہ جشن منانے کا انداز نہیں بدلوں گا، اپنی فٹنس مزید بہتر بنانے پر کام کرنے کے لیے تیار ہوں، امید ہے کہ کمر کی کوئی انجری نہیں ہوگی۔

راولپنڈی(میڈیا پاکستان)آزاد کشمیر کے علاقے میرپور سے تعلق رکھنے والے بچوں کی فٹبال ٹیم نے بارہویں اوپن آل رشیا فٹبال چیمپئن شپ جیت لی۔پاک فوج کے شعبہ تعلقات عامہ (آئی ایس پی آر) کے مطابق میرپور آزاد کشمیر سے تعلق رکھنے والے بچوں کی فٹبال ٹیم نے بارہویں اوپن آل رشیا فٹبال چیمپئن شپ جیت لی۔ اس فتح کے ساتھ ہی پاکستانی ٹیم نے روس میں 2018 کے اسٹریٹ چلڈرن ورلڈ کپ کے لیے بھی کوالیفائی کرلیا۔
آئی ایس پی آر کے مطابق فٹبال چیمپئن شپ کا انعقاد 25 سے 28 اکتوبر کو روس میں ہوا جس میں پاکستانی ٹیم نے بھارت، روس سمیت دیگر تمام ٹیموں کو شکست دی۔ پاکستانی ٹیم نے وطن واپس پہنچنے پر کورکمانڈر راولپنڈی لیفٹیننٹ جنرل ندیم رضا سے ملاقات کی جس میں انہوں نے کھلاڑیوں کو ہرممکن تعاون کی یقین دہانی کرائی۔

لاہور(میڈیا پاکستان) ٹیسٹ اوپنر احمد شہزاد کی خراب فارم اور مسلسل ناکامی کے بعد انہیں قومی ٹیم سے ڈراپ کرنے کا اصولی فیصلہ کر لیا گیا ہے۔ ویسٹ انڈیز کے خلاف تین ٹی ٹوئینٹی انٹر نیشنل میچز میں احمد شہزاد پاکستان ٹیم کا حصہ نہیں ہوں گے۔ سلیکشن کمیٹینے ہیڈ کوچ مکی آرتھر کے ساتھ مل کر جو 14 رکنی ٹیم تشکیل دی ہے اس کے مطابق دائیں ہاتھ کے بیٹسمین ٹیم کا حصہ نہیں ہوں گے۔قومی سلیکشن کمیٹی نے کوچ مکی آرتھر کو تجویز دی ہے کہ وہ آل رانڈر عامر یامین اور محمد نواز کو موقع دیں تاکہ ان میں موجود ٹیلنٹ کا اندازہ ہو سکے۔ احمد شہزاد حالیہ میچوں میں بیٹنگ صلاحیتوں کا مظاہرہ کرنے میں ناکام رہے ہیں جس کی وجہ سے انہیں لاہور میں سری لنکا کے خلاف ٹی ٹوئنٹی میچ سے ڈراپ کیا گیا تھا۔احمد شہزاد نے سری لنکا کے خلاف ابوظہبی میں کھیلے جانے والے 2 ٹی ٹوئنٹی میچز میں 27 اور 22 رنز بنائے تھے جب کہ ون ڈے سیریز میں انہوں نے صفر اور 8 رنز بنائے تھے۔25سالہ احمد شہزاد نے پاکستان کی جانب سے تینوں فارمیٹ میں سنچریاں بنائیں ہیں۔ احمد شہزاد نے لاہور میں کھیلے جانے والے ورلڈ الیون کے خلاف آخری ٹی ٹوئنٹی میچ میں 49 رنز اسکور کئے تھے۔پاکستان کی جانب سے 13 ٹیسٹ 81 ون ڈے انٹر نیشنل اور 53 ٹی ٹوئنٹی انٹرنیشنل میچ کھیلنے والے احمد شہزاد کو پاکستان سپر لیگ کی ٹیم کوئٹہ گلیڈی ایٹرز نے بھی ریلیز کر دیا ہے اور ان کے پاس اس وقت کوئی فرنچائز نہیں ہے تاہم وہ پر امید ہیں کہ 12 نومبر کو لاہور میں ہونے والے ڈرافٹ میں ان کی خدمات کوئی فرنچائز لے گی۔

لاہور(میڈیا پاکستان) پاکستان ویمنز کرکٹ ٹیم نے نیوزی لینڈ کو تیسرے ون ڈے میچ میں شکست دے کر نئی تاریخ رقم کردی۔آئی سی سی ویمنز چیمپئن شپ میں پاکستان اور نیوزی لینڈ کی ٹیموں کے درمیان سیریز کے تیسرے اور آخری میچ میں گرین شرٹس نے نئی تاریخ رقم کردی، دونوں ٹیموں کے درمیان ہونے والے اب تک کے13میچوں میں فتح حاصل کر کے تاریخ میں پہلی بارکیویزکوزیرکرنے کا بھی منفرد اعزاز حاصل کرلیا، میچ کی ہیرو آل راؤنڈر ثنا میر رہی جنھوں نے4 کھلاڑیوں کو پویلین چلتا کیا جبکہ معروف نے بھی 36 کی ناقابل شکست اننگز کھیل کر قومی ٹیم کی فتح میں اہم کردار ادا کیا۔شارجہ کرکٹ اسٹیڈیم میں سیریز کے آخری میچ میں نیوزی لینڈ نے ٹاس جیت کر پہلے کھیلنے کا فیصلہ کیا اور پوری ٹیم 43.4 اوورز میں صرف 155 رنز بنا کر ہمت ہار گئی، 6کھلاڑی ڈبل فیگرز میں بھی داخل نہ ہو سکیں اور50 کے مجموعی اسکور پر کیویز کی4 پلیئرز پویلین لوٹ چکی تھی۔
کیویز کی طرف سے سب سے کامیاب کھلاڑی سیم کرٹس رہیں ، انھوں نے 5چوکوں کی مدد سے 50 رنز بنائے، ا یم ایل گرین نے 26، مارٹن اور ایم اے پیٹرسن15،15جبکہ اے سی کیر نے 12رنز بنائے۔ ایس ایف ایم ڈیوائن اور ایم ایم روی نے 2،2 بیٹس4، اے ای سیٹرویٹ 5، ٹی ایم ایم نیوٹن نے 7 جبکہ ایل ایم کاسپریک نے کھاتہ کھولے بغیر پویلین واپسی کی راہ لی۔ثنا میر نے عمدہ بولنگ کا مظاہرہ کیا اور 25 رنز کے عوض 4 کھلاڑیوں کو آؤٹ کیا۔ سعدیہ یوسف نے2 جبکہ ایمن انور، ناشرا سندھو اور بسمہ معروف نے ایک، ایک وکٹ حاصل کی۔ جواب میں پاکستان ویمن نے ہدف 48.5 اوورز میں 5 وکٹوں کے نقصان پر حاصل کر لیا۔
اوپنرز جویریہ خان اور کپتان بسمہ معروف نے قومی ٹیم کو 40 رنز کا عمدہ آغاز فراہم کیا تاہم اسی مجموعہ پر جویریہ29 رنز پر پویلین لوٹ گئیں، کپتان بسمہ معروف نے شاندار بیٹنگ کا مظاہرہ کیا اور 36 رنز کی ناقابل شکست اننگز کھیل کر ٹیم کی جیت میں اہم کردار ادا کیا۔بعد ازاں بعد میں آنے والی پلیئرز نے کھل کر بیٹنگ کے جوہر دکھائے اور باآسانی ہدف حاصل کرنے میں ٹیم کی مدد کی۔ سدرہ امین 32 اور ناہیدہ خان 23 رنز کے ساتھ نمایاں رہیں۔
ثنا میر نے ناقابل شکست رہ کر 12 رنز بنائے جبکہ عالیہ ریاض نے7 اور ارم جاوید نے ایک رن بنایا۔ اینا پیٹرسن نے 2 وکٹیں حاصل کیں جبکہ ایم ایم روی، ٹی ایم ایم نیوٹن اور اے سی کیر نے ایک، ایک کھلاڑی کا شکار کیا۔عمدہ بولنگ کا مظاہرہ کرنے پر ثنامیرکومیچ کی بہترین پلیئر کے ایوارڈ سے نوازا گیا۔

لاہور(میڈیا پاکستان)پاکستان کرکٹ بورڈ نے چار کھلاڑیوں رومان رئیس، عثمان شنواری، بابر اعظم اور عماد وسیم کو ہر طرح کی کرکٹ میں شمولیت سے روک دیا ہے، یہ فیصلہ کھلاڑیوں کی فٹنس دیکھ کر کیا گیا ہے۔ پی سی بی ذرائع کا کہنا ہے کہ ان کھلاڑیوں کو ہدایت کی گئی ہے کہ پہلے میڈیکل فٹنس سرٹیفکیٹ حاصل کیا جائے۔ چاروں کھلاڑی مختلف عالمی ایونٹسمیں شمولیت کے خواہاں تھے اور حال ہی میں شروع ہونے والی بنگلہ دیش پرئمیر لیگ میں شرکت کرنا چاہتے تھے۔ ذرائع کا یہ بھی کہنا ہے کہ یہ کھلاڑیوں مختلف نوعیت کی انجریز کا شکار ہیں۔دوسری جانب خبروں کے مطابق عثمان خان شنواری کی انجری بگڑ گئی ہے۔ ڈاکٹرز کی جانب سے فاسٹ بالر کو چھ ماہ کے لئے کرکٹ سے دور رہنے کا مشورہ دیا گیا ہے۔

لاہور(میڈیا پاکستان)سابق کپتان اور معروف کمنٹیٹر رمیز راجہ نے نوجوان اوپنر فخرزمان کو بطور ٹیسٹ اوپنرتیار کرنے کی تجویز پیش کردی۔ایک انٹرویو میں رمیز راجہ نے کہاکہ فخرزمان کو بطور ٹیسٹ اوپنرتیار کیا جا سکتا ہے، آسٹریلوی ڈیوڈ وارنر اور بھارتی شیکھر دھون جارحانہ بیٹنگ کرتے ہوئے حریف کو ابتدا میں ہی دباؤ کا شکار کردیتے ہیں،فخر زمان ردھم میں ہوں تو بہترین کارکردگی پیش کرتے ہیں،ان کی تکنیک پر تھوڑا کام کرلیا جائے تو پاکستان کا یہ تجربہ کامیاب اور ٹیسٹ اوپننگ کا مسئلہ حل ہوسکتا ہے۔رمیز راجہ نے کہاکہ ون ڈے اور ٹی ٹوئنٹی میں قومی ٹیم کی کارکردگی میں وہی جارحانہ پن نظر آنے لگا جو جدید کرکٹ کی ضرورت سمجھا جاتا ہے،البتہ ٹیسٹ کرکٹ میں درست کمبی نیشن کیلیے مزید کام کرنے کی ضرورت ہوگی، انہوں نے کہا کہ یونس خان اور مصباح الحق اپنے ٹمپرامنٹ کی وجہ سے کریز پر زیادہ قیام کرتے ہوئے حریف کو اپنی حکمت عملی تبدیل کرنے پر مجبور کردیتے تھے لیکن نوجوان بیٹسمین مسائل کا شکار نظر آتے ہیں، اظہر علی اور اسد شفیق کا بیٹنگ آرڈر تبدیل کرنے سے بھی ٹیم تھوڑا اپ سیٹ ہوئی،بابر اعظم کی ٹیسٹ کرکٹ میں فارم کا مسئلہ حل اور بہتری کیلیے تھوڑا کام کرنے کی ضرورت ہے،اس حوالے سے اہم فیصلے کرتے ہوئے مستقبل کی پلاننگ کرنا ہوگی۔سابق کپتان نے کہا کہ تمام تر خامیوں کے باوجود ڈومیسٹک کرکٹ سے نیا ٹیلنٹ سامنے آہی جاتا ہے،اسے نکھارنے اور سنوارنے کیلیے مناسب رہنمائی اور محنت کی ضرورت ہے، قدرتی صلاحیتوں سے مالا مال چند کرکٹرز کو ڈومیسٹک کرکٹ کی بھٹی سے گزارنے کی بھی ضرورت نہیں ہوتی، شاداب خان اس کی مثال ہیں، پوری امید ہے کہ پاکستان کو ایسے نوجوان کرکٹرز ضرور مل جائیں گے جو سینئرز کا خلا پر کرسکیں۔

ممبئی (میڈیا پاکستان) بھارتی ٹیم کے کپتان ویرات کوہلی نے سابق پاکستانی فاسٹ باؤلر شعیب اختر کو خطرناک ترین باؤلر قرار دیتے ہوئے کہا ہے کہ وہ باؤلنگ کر رہے ہوتے تو میری یہی خواہش ہوتی کہ میں دوسرے اینڈ پر موجود رہوں۔ ’بریک فاسٹ ود چیمپیئنز‘ میں انٹرویو دیتے ہوئے ویرات کوہلی نے سابق کپتان مہندرا سنگھ دھونی کو کھیل کی سب سے بہترین شخصیت قرار دیا۔ انہوں نے کہا کہ اگر منصوبہ اور کھیل کو سمجھنے کی بات کی جائے تو میں نے مہندرا سنگھ دھونی سے بہتر کرکٹ کا دماغ آج تک کسی کا نہیں دیکھا اور جب کبھی بھی میں نے ان سے بات کی تو 90فیصد سے زائد ان کے مشوروں نے کام کیا۔ کوہلی نے ورلڈ کپ 2011 کی فتح کو اپنی زندگی کا سب سے یادگار واقعہ قرار دیا اور کہا کہ 2013 کی چیمپیئنز ٹرافی اور لارڈز میں ٹیسٹ میچ جیتنا بھی ہمیشہ یاد رہے گا۔ انہوں نے ایک سوال کے جواب میں کہا کہ شعیب اختر ایسے باؤلر ہیں جن کی باؤلنگ پر میں دوسرے اینڈ پر رہنا ہی پسند کرتا۔ بھارتی ٹیم کے کپتان نے کہا کہ میں نے شعیب اختر کا سامنا نہیں کیا لیکن کیریئر کے آخری لمحات میں انہیں باؤلنگ کرتے دیکھا اور اس وقت بھی وہ بہت خطرناک تھے جس کے بعد میں نے محسوس کیا کہ جب یہ اپنے عروج پر ہوں گے تو دوسرے اینڈ پر رہنا ہی بہتر لگتا ہو گا۔ انہوں نے محمد عرفان کو بھی خطرناک باؤلر قرار دیتے ہوئے کہا کہ ورلڈ کپ میں میچ سے قبل ہمیں سنجے بانگر نے ایک فٹ کے اسٹول پر کھڑے ہو کر باؤلنگ کر کے پریکٹس کرائی تھی اور ایک ٹی20 میچ میں ان کا سامنا کیا تھا جس میں انتہائی کوشش کے باوجود ان کی باؤلنگ کھیلنے میں ناکام رہا تھا۔ ہندوستانی کپتان نے کہا کہ مجھے جیت کر مزید کھیلنے کی تحریک ملتی ہے اور جس دن یہ احساس اور جیت کا جذبہ ختم ہو گیا، اس دن میں کرکٹ چھوڑ دوں گا۔ ان کا کہنا تھا کہ دورہ انگلینڈ میرے کیریئر کا سب سے بدترین دور تھا جس میں میں کارکردگی نہیں دکھا سکا اور غیرمستقل مزاجی اپنے عروج پر تھی لیکن اسی بدترین دور اور ناقص فارم میں اپنے کیریئر میں سب سے زیادہ سیکھنے کا موقع ملا۔ناقدین اور فینز کے بے تکے سوالوں سے تنگ بھارتی کپتان نے کہا کہ میں سوشل میڈیا وغیرہ سے اب دور رہتا ہوں اور میں سمجھتا ہوں کہ یہ میرے لیے سب سے بہتر چیز ہوئی ہے کیونکہ ان سب چیزوں کی وجہ سے ہم غیرضروری دباؤ کا شکار ہو جاتے ہیں جس کے نتیجے میں ہماری کارکردگی متاثر ہوتی ہے۔اس موقع پر بھارتی ٹیم کے کپتان انوشکا شرما کا ذکر کرنا نہ بھولے اور انہیں اپنے لیے ’لیڈی لک‘ قرار دیا۔انہوں نے کہا کہ ہمیں تو عقل نہیں تھی لیکن جب سے میری زندگی میں ’لیڈی لک‘ آئی ہے، زندگی میں ایک ٹھہراؤ سا آ گیا ہے اور اس نے مجھے کچھ سکھایا ہے۔ کوہلی نے بتایا کہ 2014 میں دورہ انگینڈ پر خراب فارم کی وجہ سے بہت برے دور سے گزر رہا تھا اور اس موقع پر انوشکا نے مجھے مزید محنت کرنے اور ہمت نہ ہارنے کی تلقین کی اور پھر وہ دورہ آسٹریلیا پر بھی وہ میرے ساتھ تھیں جہاں میں بہت رنز اسکور کیے۔ کوہلی نے بتایا کہ انوشکا کو ساتھ رکھنے پر لوگوں نے مجھے بہت تنقید کا نشانہ بنایا لیکن اس موقع پر ظہیر خان نے مجھے تلقین کی کہ زندگی میں کبھی کچھ مت چھپانا کیونکہ تم کچھ غلط نہیں کر رہے اور چھپانے کی صورت میں تم خود بہت دباؤ میں رہو گے اور کارکردگی متاثر ہو سکتی ہے۔ کوہلی نے ظہیر خان کو مزید سراہتے ہوئے کہا کہ وہ ایک عظیم انسان ہیں اور اگر کبھی بھی کسی کو کوئی مسئلہ ہو تو وہ ظہیر خان سے رابطہ کرے۔

لاہور (میڈیا پاکستان ) پاکستان کرکٹ بورڈ نے قومی کرکٹرز کو بنگلہ دیش پریمئر لیگ کیلئے18 نومبر سے 13 دسمبر تک کے لیے این او سی جاری کر دیئے۔بنگلہ دیش پریمئر لیگ 4 سے 12 دسمبر تک کھیلی جا ئے گی، پی سی بی نے سینٹرل کنٹریکٹ یافتہ کرکٹرز کو لیگ کے لیے 18 نومبر سے 13 دسمبر تک کے لیے این او سی جاری کر دیئے ہیں، لیکن کرکٹرز کو 11 نومبر سے شروع ہونے والے ڈومیسٹک ٹی ٹوئنٹی میں حصہ لینا لازمی ہو گا۔ ویسٹ انڈیز سے سیریزکا شیڈول طے پانے کی صورت میں بھی کرکٹرز قومی ڈیوٹی کے لیے دستیاب ہوں گے۔ این او سی حاصل کرنے والوں میں محمد عامر، شعیب ملک، حسن علی، فہیم اشرف، عمران جونیئر، فخر زمان، رومان رئیس، اسامہ میر، رضا علی ڈار، عثمان شنواری، بابرا عظم، غلام مدثر ،جنید خان، شاداب خان اور سرفراز احمد شامل ہیں ۔دوسری جانب حکام کی جانب سے شاہد آفریدی ٗ مصباح الحق ٗ سہیل تنویر اور محمد سمیع کو مکمل ایونٹ کیلئے این او سی جاری کیا گیا ہے۔