Category کھیل

اسلام آباد(میڈیاپاکستان)پشاور زلمی نے پاکستان سپر لیگ کے تیسرے ایڈیشن میں 2 چینی کرکٹرز کو اسکواڈ میں شامل کرنے کا اعلان کردیا۔ اسلام آباد میں چین کے سفارتخانے میں تقریب منعقد کی گئی جس میں چین کے سابق سفیر چن زیانگ زنگ، چین کرکٹ ٹیم کے کوچ یی تیان، چین کے کرکٹرز جیان لی اور یوفی زانگ نے خصوصی شرکت کی۔
تقریب میں پشاور زلمی کے چیرمین جاوید آفریدی نے چین کے 2 انٹرنیشنل کرکٹرز کو پی ایس ایل تھری میں پشاور زلمی کے اسکواڈ میں شامل کرنے کا اعلان کیا ہے۔ اس موقع پر ان کا کہنا تھا کہ عظیم دوست ملک چین کے ساتھ کھیلوں کے روابط سے دونوں ملکوں کے عوام مزید قریب آئیں گے۔
ٹیم میں شامل کیے جانے والے چینی کرکٹرز جیان لی اور یوفی زانگ نے کہا کہ وہ پشاور زلمی کے اسکواڈ میں شامل ہونے پر بہت پرجوش ہیں اور امید ہے کہ انہیں ٹیم سے بہت کچھ سیکھنے کا موقع ملے گا۔

دبئی (میڈیا پاکستان)اس بات کے ناقابل تردید اور ٹھوس شواہد موجود ہیں کہ اب بھی انٹر نیشنل سٹےبازوں کا ما فیا پاکستانی کرکٹرز کے تعاقب میں ہے اور ان کی چالیں برقرار ہیں۔ دبئی میں اس سال فروری میں پاکستان سپر لیگ اسپاٹ فکسنگ اسکینڈل منظر عام پر آنے کے بعد پاکستانی ٹیم کا ہوٹل تبدیل کردیا گیا لیکن اب بھی سٹے باز کھلاڑیوں کو اس گھناؤنے کاروبار میں ملوث کرنے کی کوششوں میں مصروف ہیں۔ جنگ کو حددرجہ مصدقہ ذرائع سے معلوم سے ہوا ہے کہ پاکستان اور سری لنکا کے درمیان جاری سیریز کے دوران پاکستانی کرکٹ ٹیم کے ایک اہم ترین کھلاڑی سے ایک سٹے باز نے رابطہ کیا اور اسے اسپاٹ فکسنگ کی پیشکش کی۔
پاکستان کرکٹ بورڈ اینٹی کرپشن یونٹ کے ایک سرکردہ افسر نے نام نہ بتانے کی شرط پر جنگ کو بتایا کہ کرکٹرز نے فوری طور پر اس کی اطلاع ٹیم انتظامیہ اور اینٹی کرپشن یونٹ کو دی۔
ذرائع کا کہنا ہے کہ دبئی کے ہوٹل میں ہونے والی پیشکش کے بعد کھلاڑی رات بھر سو نہیں سکا لیکن صبح اس نے پیشکش کو رپورٹ کرکے ذمے داری کا ثبوت دیا۔
اس نئی پیشکش کے بعدپاکستان کرکٹ بورڈ کے حکام کی آنکھیں کھلی رہ گئیں تاہم ذرائع کا کہنا ہے کہ پی سی بی اینٹی کرپشن یونٹ کے پاس آئی سی سی اور برطانوی کرائم ایجنسی کے توسط سے مصدقہ اطلاعات تھیں کہ سٹے بازوں کا نیٹ ورک اب بھی پاکستانی کرکٹرز کے پیچھے ہے اور انہیں دولت کی چمک دکھا کر ان کی آنکھیں خیرہ کرنا چاہتے ہیں۔
ان اطلاعات کے بعد جب پاکستانی ٹیم لاہور سے دبئی پہنچی تو اینٹی کرپشن یونٹ نے ٹیم انتظامیہ کو مشورہ دیا کہ کھلاڑیوں پر کر فیو ٹائمنگ دوبارہ لاگو کردیا جائے۔ مکی آرتھر کے کوچ بننے کے بعد پاکستانی کھلاڑیوں کے کر فیو ٹائمنگ ختم کردیا گیا تھا۔
دبئی میں پاکستانی ٹیم ایک ہفتے کے لیے ابوظبی گئی تاہم اس کے بعد ٹیم ایک ہی ہوٹل میں ٹھہری ہوئی ہے۔ نئے کر فیو ٹائمنگ کے مطابق میچ سے قبل کھلاڑیوں کو رات ساڑھے گیارہ بجے اپنے کمروں میں واپس آنا ہے۔ اگر کوئی کھلاڑی تاخیر سے آتا ہے تو اس کی اطلاع پیشگی ٹیم انتظامیہ کو دے گا۔
ذرائع کا کہنا ہے کہ پاکستانی کرکٹر کو نئی پیشکش کے بعد پاکستانی ٹیم انتظامیہ الرٹ ہوگئی ہے اور کھلاڑیوں کو خبردار کردیا گیا ہے جب کہ کھلاڑی بھی کوئی خطرہ مول لینے کو تیار نہیں ہیں۔
واضح رہے کہ پاکستان سپر لیگ میں شرجیل خان اور خالد لطیف اسپاٹ فکسنگ اسکینڈل میں ملوث پائے تھے۔ دونوں کھلاڑیوں کو سزائیں دی جا چکی ہیں۔
بدھ کو کراچی میں میڈیا سے بات چیت کرتے ہوئے پی سی بی چیئر مین نجم سیٹھی نے کہا تھا کہ کرپشن پر کسی کو معاف نہیں کیا جائے گا تاہم میرا نکتہ نظر ہے کہ اگر کسی کھلاڑی نے سزا پوری کر لی ہے تو اسے ایک جرم میں دو سزائیں نہ دی جائیں البتہ کوئی کھلاڑی کرپشن میں ملوث پایا گیا اسے نشان عبرت بنائیں گے۔

لاہور(میڈیا پاکستان) سابق کپتان مصباح الحق کی جانب سے کرکٹرز کو پچ سازی کی تربیت دینے کی تجویز سامنے آگئی۔سابق کپتان معین خان کا کہنا ہے کہ مجموعی طور پر کرکٹ کی بہتری کیلیے اقدامات اٹھائے جارہے ہیں لیکن گرائونڈزکے حوالے سے کمزوریاں سامنے آرہی ہیں۔ خاص طور پر پچز کے معاملے میں بہت سے مسائل سامنے آرہے ہیں، ایک انٹرویو میں انھوں نے کہا کہ کیوریٹرز کی تنخواہیں بہت کم ہیں، چند ایک تو معاشی مشکلات پر قابو پانے کیلیے دوسری نوکری بھی کرنے پر مجبور ہیں۔
اقبال قاسم نے کہا کہ کرکٹرز پچز کے حوالے سے مسائل جانتے اور اپنے تجربے کی بناپر بہتر پلاننگ کرسکتے ہیں، وقت آگیا ہے کہ کرکٹ کا عملی تجربہ رکھنے والے کھلاڑی اس شعبے میں آئیں۔ ان کو پچ سازی کی ٹریننگ دینے سے پاکستان کرکٹ کے مسائل میں کمی آسکتی ہے۔
یاد رہے کہ قائد اعظم ٹرافی میں وکٹوں کی جھڑی لگنے پرسابق کپتان مصباح نے ناہموار پچز کو ہدف تنقید بنایا تھا۔

لاہور(میڈیا پاکستان) ایشیا ہاکی کپ میں پاکستان کی فائنل میں رسائی کے امکانات معدوم ہو گئے ہیں۔بنگلادیشی دارالحکومت ڈھاکا کے مولانا بھاشانی نیشنل ہاکی سٹیڈیم میں جاری ایونٹ میں گزشتہ روز سپر فور رائونڈ میں پاکستان کا مقابلہ جنوبی کوریا سے ہوا، میچ کے پہلے کوارٹر کے آخری لمحات میں گرین شرٹس کی جانب سے اعجاز احمد نے خوبصورت فیلڈ گول کرتے ہوئے ٹیم کو برتری دلائی ، اگلے دو کوارٹرز میں جنوبی کورین ٹیم نے مقابلہ برابر کرنے کی بھرپور کوشش کی تاہم کامیابی نہ مل سکی۔
چوتھے کوارٹر میں جنوبی کوریا نے گول کرتے ہوئے مقابلہ 1-1 سے برابر کر دیا، پاکستانی فارورڈز گول کرنے کے کئی یقینی مواقع کو کارآمد نہ بنا سکے اور مقابلہ ایک ایک گول سے برابری کی سطح پر اختتام پذیر ہوا۔ میچ کے بہترین گول کا ایوارڈ اعجاز احمد کو ملا جبکہ پاکستان کے محمد رضوان سینئر کو شاندار کھیل پیش کرنے پر مین آف دی میچ قرار دیا گیا۔
یاد رہے کہ سپر فور مرحلے کے پہلے میچ میں ملائیشیا نے پاکستان کو 3-2 سے شکست دی تھی جبکہ پول میچز میں پاکستان نے میزبان بنگلہ دیش کو 7-0 سے آئوٹ کلاس کیا تھا، جاپان کے خلاف دوسرا میچ 2-2 سے برابر رہا تھا جبکہ تیسرے میچ میں روایتی حریف بھارت کے ہاتھوں 1-3 سے شکست کا سامنا کرنا پڑا تھا۔
گزشتہ روز کھیلے گئے دوسرے میچ میں بھارت نے ملائیشیا کو 6-2 سے مات دیتے ہوئے ٹاپ پوزیشن پر قبضہ برقرار رکھا۔ فاتح ٹیم کی جانب سے آکاش دیپ سنگھ، ہرمنپریت سنگھ، ایس کے اتھاپا، گجرانت سنگھ، ایس وی سنیل اور سردار سنگھ جبکہ ملائیشیا کی جانب سے رضی رحیم اور رمضان رسولی نے گول کیے۔
واضح رہے کہ سپر فور راؤنڈ میں دونوں پولز کی ٹاپ 2 ٹیمیں ایک دوسرے کے خلاف نبرد آزما ہیں، دونوں پولز کی سرفہرست ٹیموں کے مابین فائنل معرکہ 22 اکتوبر کو ہو گا جبکہ دوسری دو ٹیمیں برانز میڈل کیلیے ایک دوسرے کے خلاف نبرد آزما ہوں گی۔ بھارتی ٹیم پوائنٹس ٹیبل پر سرفہرست ہے جبکہ پاکستان سپر فور رائونڈ میں ایک شکست اور ایک ڈرا کے بعد سب سے آخر میں چوتھے نمبر پر موجود ہے۔
گرین شرٹس کے فائنل میں رسائی کے امکانات تقریباً معدوم ہو چکے ہیں تاہم سپر فور کے تیسرے میچ میں ان کا مقابلہ روایتی حریف بھارت سے ہفتے کو ہو گا، میچ پاکستانی وقت کے مطابق سہ پہر ساڑھے 4 بجے کھیلا جائے گا۔ یہ مجموعی طور پر دونوں ٹیموں کا 171 واں مقابلہ ہو گا، پاکستان ٹیم 82 میچز میں کامیاب رہی جبکہ بھارت کو 53 مرتبہ کامیابی ملی۔

شارجہ(میڈیا پاکستان)پاکستانی کرکٹ ٹیم آئی لینڈرز پر غلبہ قائم رکھنے کا خواہاں ہے۔سری لنکا کیخلاف ون ڈے سیریز کے پہلے تینوں میچز میں فتوحات کی ہیٹ ٹرک مکمل کرنے والے گرین شرٹس اب شارجہ میں بھی مسلسل 2فتوحات کیساتھ کلین سوئپ کا مشن مکمل کرنے کی کوشش کرینگے،اس وینیو پر پہلا میچ آج کو کھیلا جائے گا۔
دوسرے میچ میں تھوڑا ڈگمگانے کے بعد تیسرے میں پاکستان کی بیٹنگ فارم لوٹ آئی،مسلسل ناکام احمد شہزاد کا خلا پرکرنے کیلیے لائے جانے والے امام الحق نے ڈیبیو پر ہی سنچری بناکر روشن مستقبل کی نوید سنائی،اوپنر سے ایک بار پھر بڑی اننگز کی امیدیں وابستہ ہیں، ورلڈ الیون کیخلاف ہوم سیریز کے بعد ابھی تک یواے ای میں بھی ففٹی نہ کرپانے والے فخرزمان کا سب سے بڑا سکور43 دبئی میں کھیلے جانے والے پہلے ون ڈے میچ میں تھا، اوپنر کو شارجہ کے چھوٹے میدان میں باؤنڈری قریب ہونے کا بھرپور فائدہ اٹھانے کا موقع ملے گا۔
بابر اعظم، محمد حفیظ، شعیب ملک بھی اچھی فارم میں ہیں، انجرڈ محمد عامر کی کمی محسوس نہ ہونے دینے والے پیسرز حسن علی،جنید خان اور رومان رئیس آئی لینڈرز کی کمزور بیٹنگ پر کاری ضربیں لگانے کیلیے تیار ہونگے، شاداب خان بھی کنڈیشزکا بہتر استعمال کرنے کی بھرپور صلاحیت رکھتے ہیں۔ البتہ بولنگ ایکشن شکوک کی زد میں آجانے کے بعد محمد حفیظ ان کا ساتھ دیتے ہوئے اعتماد کی کمی محسوس کرسکتے ہیں۔
سری لنکن ٹیم بیٹسمینوں کی طرف سے بہتر کارکردگی کی امیدیں وابستہ کیے ہوئے ایک روزہ کرکٹ میں مسلسل 11ویں شکست کا رخ موڑنے کی کوشش کریگی، اپل تھارنگاکوکریزپردیر تک ساتھ دینے والے کسی کھلاڑی کی تلاش ہے، دوسرے تجربہ کار بیٹسمین دنیش چندیمل کو اپنی اور ٹیم کی ساکھ بچانے کا چیلنج درپیش ہے۔
ابوظبی میں آنکھ پر گیند لگنے سے انجری کا شکار ہونے والے چمارا کاپوگدیرا کی شمولیت مشکوک ہے،ان کی جگہ کوشل مینڈس کو شامل کیا جاسکتا ہے،اگر کاپو گدیرا فٹ ہوگئے تو سری وردانا کوباہر بٹھائے جانے کا امکان ہے، لاہیرو گاماگے سمیت بولرز کی بہتر لائن لینتھ کپتان کی مشکلات میں کمی کا ذریعہ بن سکتی ہے، شارجہ میں رات کو پڑنے والی اوس کی وجہ سے بعد میں بولنگ کرنے والی ٹیم کیلیے مسائل ہوسکتے ہیں۔
یاد رہے کہ اس وینیو پر گزشتہ 5باہمی مقابلوں میں پاکستان فاتح رہے رہا، آئی لینڈرز نے یہاں آخری میچ 2002میں جیتا تھا۔

لاہور( میڈیا پاکستان) قومی کرکٹ ٹیم کے آل رانڈر محمد حفیظ کا بولنگ ایکشن ایک بار پھر مشکوک قرار دے دیا گیا۔ذرائع کے مطابق پاکستان اور سری لنکا کے درمیان تیسرے ایک روزہ میچ کے دوران امپائر نے قومی ٹیم کے آف اسپنرمحمد حفیظ کے بولنگ ایکشن پر شکوک کا اظہار کیاجس کے بعد قواعد کے مطابق 14 روز کے اندر ان کا آئی سی سی کی منظور شدہ لیب میں جائزہ لیا جائے گا جس میں اگر ان کے بازو کا خم 15 ڈگری کی قانونی حد سے متجاوز پایا گیا تو وہ ایک بار پھر پابندی کی زد میں آجائیں گے تاہم ٹیسٹ سے قبل وہ بولنگ جاری رکھ سکیں گے۔محمد حفیظ کا بولنگ ایکشن پہلے بھی دو بار رپورٹ ہو چکا ہے، نومبر 2014میں ابوظبی میں نیوزی لینڈ کے خلاف ٹیسٹ کے دوران ان کا بولنگ ایکشن رپورٹ ہوا تھا جس کے بعد دسمبر میں انہیں انٹرنیشنل کرکٹ میں بولنگ سے روک دیا گیا۔پہلی بار بولنگ ایکشن رپورٹ ہونے کے بعد محمد حفیظ کے بازو کا خم 15 ڈگری کی قانونی حد کی بجائے 31 پایا گیا تھا، جنوری 2015 میں انہوں نے غیر رسمی ٹیسٹ کروایا تو بھی ایکشن میں مسائل برقرار تھے۔اپریل 2015 میں آئی سی سی کی منظور شدہ لیب میں ٹیسٹ کے بعد ان کا ایکشن کلیئر قرار دیا گیا۔ اس کے بعد جون میں سری لنکا کے خلاف گال ٹیسٹ کے دوران دوبارہ مشکوک ایکشن کی زد میں آئے، جولائی 2015 میں ان پر ایک سال کی پابندی عائد کر دی گئی یہ مدت مکمل ہونے کے بعد انہیں دوبارہ بولنگ کراونے کی اجازت مل گئی۔

ڈھاکہ (میڈیا پاکستان) ایشیا کپ ہاکی میں قومی ٹیم کی مایوس کن کارکردگی کا سلسلہ جاری ہے اور ایونٹ کے سپر فور مرحلے میں پاکستان اور جنوبی کوریا کے درمیان میچ برابری پر ختم ہوا جس سے قومی ٹیم کے فائنل میں پہنچنے کے امکانات معدوم ہو گئے ہیں۔بنگلہ دیش میں جاری ایونٹ کے سپر فور مرحلے میں پاکستان کا دوسرے میچ میں جنوبی کوریا سے مقابلہ ہوا اور اعجاز احمد نے 15ویں منٹ میں گول کر کے پاکستان کو برتری دلائی جو اگلے دو کوارٹرز تک برقرار رہی جبکہ اس دوران قومی ٹیم نے گول کرنے کے مزید کئی مواقع بھی ضائع کیے۔میچ کے چوتھے اور آخری کوارٹر میں نمیونگ لی نے جنوبی کوریا کیلئے گول اسکور کر کے مقابلہ کردیا اور میچ کے اختتام تک یہی اسکور برقرار رہا۔یہ میچ ڈرا کھیلنے کے بعد پاکستان کے ایونٹ کے فائنل میں رسائی کی امیدیں تقریباً دم توڑ چکی ہیں کیونکہ اب تک اس کا دو میچوں میں صرف ایک پوائنٹ ہے جبکہ گرین شرٹس کو اگلا میچ فیورٹ بھارت سے کھیلنا ہے۔ادھر بھارت نے اپنی عمدہ کارکردگی کا سلسلہ جاری رکھتے ہوئے ملائیشیا کو با آسانی 6-2 گولز سے ہرا دیا۔ھارتی ٹیم میچ کی ابتدا سے ہی حاوی رہی اور پہلے ہاف میں تین گول کی برتری لینے کے بعد اگلے ہاف میں مزید تین گول اسکور کر کے ملائیشیا کو یکطرفہ مقابلے کے بعد 6-2 سے شکست دے کر فائنل میں رسائی کی امیدیں روشن کر لی ہیں۔

لاہور (میڈیا پاکستان) قومی ہاکی ٹیم کی سابق گول کیپر سیدہ سعدیہ نے ٹیم کے ہیڈ کوچ سعید خان پر جنیسی طور پر ہراساں کرنے کا الزام عائد کیا ہے۔ریلوے کی ہاکی ٹیم کی قیادت کا اعزاز رکھنے والی سعدیہ نے الزام عائد کیا کہ سعید نے آٹھ اکتوبر کی رات ایک معاملے پر بحث کے بعد انہیں جنسی طور پر ہراساں کیا۔سعدیہ کے مطابق چھ اکتوبر کو ہونے والے ٹرائلز کے بعد قومی ٹیم میں جگہ نہ بنانے پر وہ لاہور میں ہی رک گئیں کیونکہ منیجر نے کہا تھا کہ جب تک آپ کے بقایا جات ادا نہیں کیے جاتے، آپ رکی رہیں۔انہوں نے بتایا کہ واقعے کے دن رات میں سعید خان نے ان سے کہا کہ وہ فوری طور پر ہاکی اسٹیڈیم سے نکل جائیں اور اس دوران بے ہودہ زبان بھی استعمال کی۔ انہوں نے الزام عائد کیا کہ ہیڈ کوچ اس کے بعد میرے کمرے تک پیچھے آئے اور ان کے ہاتھ کو بھی پکڑا۔قومی ٹیم کی سابق کھلاڑی نے کہا کہ واقعے کی عینی شاہدین دیگر کھلاڑی فوری طور پر انہیں بچانے کیلئے آگے بڑھیں لیکن کوچ نے انہیں واپس جانے کا حکم دیا۔انہوں نے الزام لگایا کہ کوچ میرے کمرے میں زبردستی داخل ہوئے اور ہاتھ پکڑ لیا، اس موقع پر جب میں نے چیخ و پکار کی اور بھاگنے کی کوشش تو وہ مجھے چھوڑنے پر مجبور ہو گئے۔سعدیہ نے کہا کہ واقعے کے بعد میں اتنی خوفزدہ تھی کہ میں نے فوری طور پر اپنا بیگ پیک کیا اور گھر کو روانہ ہو گئی۔قومی کھلاڑی نے مزید الزام عائد کیا کہ واقعے سے چند دن قبل کوچ نے انہیں اپنا نمبر دیا اور کہا کہ ’مجھے رات میں فون کرو‘۔انہوں نے بتایا کہ اگلے ہی دن نو اکتوبر کو انہوں نے پنجاب کے وزیر کھیل جہانگیر خانزادہ کو خط لکھ کر معاملے سے آگاہ کیا اور ساتھ ساتھ ان سے مطالبہ کیا کہ سعید خان کو ٹیم کی کوچنگ سے الگ کیا جائے۔خط کے جواب میں وزیر کھیل پنجاب نے ڈائریکٹر جنرل اسپورٹس عامر جان کو معاملے کی تحقیقات کر کے دس دن میں رپورٹ جمع کرانے کا حکم دیا لیکن ابھی تک کوئی ایکشن نہیں لیا گیا۔سعدیہ نے پاکستان ہاکی فیڈریشن کے صدر کو بھی خط لکھ کر انصاف کا مطالبہ کیا۔جمعرات کو میڈیا کے نمائندوں کو بھیجے گئے ایک ویڈیو پیغام میں انہوں نے حکام سے معاملے کا سنجیدگی سے نوٹس لینے اور فوری طور پر سعید خان کو نوکری سے برخاست کرنے کا مطالبہ کیا۔’انہوں نے آج مجھے ہراساں کیا۔ اگر وہ کوچ کے عہدے پر برقرار رہے تو دیگر کھلاڑیوں کو بھی ہراساں کریں گے‘۔دوسری جانب ٹیم کے کوچ نے سعدیہ کے الزامات کو بے بنیاد قرار دیتے ہوئے کہا ہے کہ ٹیم سے ڈراپ ہونے کے سبب وہ تنازع کھڑا کرنے کی کوشش کر رہی ہیں۔سعدیہ گزشتہ پانچ سال سے قومی ویمنز ہاکی ٹیم کا حصہ ہیں۔

(میڈیا پاکستان) سری لنکا کے وزیرِ کھیل نے فاسٹ بولر لستھ مالنگا کی یہ درخواست مسترد کردی ہے کہ لاہورکے ٹی ٹوئنٹی انٹرنیشنل کے لیے علیحدہ ٹیم منتخب کی جائے اور کہا ہے کہ پاکستان کے خلاف تینوں ٹی ٹوئنٹی انٹرنیشنل میچوں کے لیے ایک ہی ٹیم منتخب کی جائے گی۔واضح رہے کہ لستھ مالنگا پاکستان کے خلاف ٹی ٹوئنٹی انٹرنیشنل میچ کھیلنے کے لیے لاہور جانے کے لیے تیار نہیں ہیں، اسی لیے انھوں نے سری لنکا کے وزیرِ کھیل دیاسری جیاسکیرا سے درخواست کی تھی کہ اس سیریز کے لیے دو علیحدہ ٹیمیں منتخب کی جائیں لیکن وزیرِ کھیل نے ان پر واضح کر دیا ہے کہ یہ ممکن نہیں۔سری لنکا کے وزیرِ کھیل کا یہ بھی کہنا ہے کہ یہ حق کھلاڑیوں کا نہیں کہ وہ اپنی مرضی کے میچز کا انتخاب کریں کہ کس میں انھیں کھیلنا ہے اور کس میں نہیں۔وزیرِ کھیل کا یہ بیان دراصل پاکستان کے دورے پر جانے کے سلسلے میں سری لنکن حکومت کی جانب سے باضابطہ توثیق بھی ہے۔ سری لنکن کرکٹ بورڈ پہلے ہی پاکستان کرکٹ بورڈ کی جانب سے سکیورٹی کی یقین دہانی پر اپنا مثبت ردعمل ظاہر کرچکا ہے۔خیال رہے کہ سری لنکا میں کرکٹ سمیت تمام ٹیموں کے سلیکشن کی حتمی منظوری کا اختیار وزارتِ کھیل کے پاس ہے۔پاکستان کے خلاف ٹی ٹوئنٹی سیریز کے لیے سری لنکن ٹیم کا اعلان بیس اکتوبر کو متوقع ہے۔لستھ مالنگا کے علاوہ کپتان اپل تھرنگا بھی پاکستان جانے سے انکار کرچکے ہیں لیکن دوسری جانب جن چالیس کھلاڑیوں نے پہلے پاکستان جانے کے سلسلے میں بورڈ کو اپنے تحفظات ظاہر کیے تھے ان میں سے بھی متعدد نے اپنی رائے تبدیل کردی ہے اور وہ پاکستان جانے کے لیے تیار ہوچکے ہیں۔ پاکستان اور سری لنکا کے درمیان دو ٹی ٹوئنٹی انٹرنیشنل چھبیس اور ستائیس اکتوبر کو ابوظہبی میں کھیلے جائیں گے جبکہ تیسرا اور آخری ٹی ٹوئنٹی انٹرنیشنل انتیس اکتوبر کو لاہور میں ہوگا۔

ڈھاکا(میڈیا پاکستان)ہیرو ایشیا ہاکی کپ میں تیسری پوزیشن کے لئے آج پاکستان جنوبی کوریا کے خلاف میچ کھیلے گا۔ بنگلادیش کے شہر ڈھاکا کے مولانا بھاشانی نیشنل ہاکی اسٹیڈیم میں دونوں ٹیمیں ایونٹ میں تیسری پوزیشن کے لئے میدان میں اتریں گے۔
گزشتہ روز سپر فور مرحلے کے پہلے میچ میں ملائشیا نے پاکستان کو 2 کے مقابلے میں 3 گول سے شکست دے کر فائنل کے لئے کوالیفائی کیا۔
سپر فور مرحلے کے دوسرے میچ میں بھارت نے جنوبی کوریا کے ہرا کر فائنل میں جگہ بنائی تھی۔