Category کھیل

لاہور(میڈیا پاکستان) لاہور میں سری لنکا کیخلاف ٹی ٹوئنٹی میچ کیلیے وزارت داخلہ نے سیکیورٹی کلیئرنس دیدی۔وزارت داخلہ کی جانب سے پی سی بی سمیت تمام متعلقہ محکموں کو جاری کیے جانے والے خط میں لاہور میں 29اکتوبر کو شیڈول ٹی ٹوئنٹی میچ کے انعقاد کیلیے گرین سگنل دیتے ہوئے بہترین انتظامات کرنے کی ہدایت کردی گئی ہے تاہم معلوم ہوا ہے کہ میچ کو براہ راست نشر کرنے کیلیے آنے والے 17 بھارتی براڈ کاسٹرز کی سیکیورٹی کلیئرنس کیلیے بھی گرین سگنل دیا جا چکا جب کہ اس حوالے سے این اوسی پیر کو جاری کیے جانے کا امکان ہے۔
دوسری جانب کمشنر لاہور ڈویژن عبداللہ خان سنبل کی زیر صدارت اجلاس میں انتظامات کو حتمی شکل دیدی گئی، سری لنکن ٹیم کو لاہور میں صدر مملکت کے برابر پروٹوکول دیا جائے گا،ٹیموں کی سیکیورٹی کیلیے پاک فوج اور رینجرز سے مدد لی جائے گی۔آئی جی پنجاب عارف نواز نے دیگر اضلاع سے افسروں و اہلکاروں کو لاہور رپورٹ کرنے کے احکامات جاری کردیے۔
6 ڈی پی اوز، 30ڈی ایس پیز،الیٹ فورس کی 100 ٹیمیں بشمول 6 ریزروز اسنائپرز، 50پی سی ریزروز اور 150ریزروز پولیس اہلکاروں کو طلب کر لیا گیا ہے، تمام افسران و اہلکاروںکو27اکتوبر تک لاہور پولیس لائن رپورٹ کرنے کے احکامات جاری کردیے گئے ہیں۔
تماشائیوں کو 38 اسپیڈوبس اور30 کوسٹرز پر مشتمل شٹل سروس کے ذریعے اسٹیڈیم پہنچایا جائے گا، نشتر اسپورٹس کمپلیکس میں 20 اور نجی ہوٹل میں 8 بستروں پر مشتمل عارضی اسپتال 27 اکتوبر کو فعال کردیے جائیں گے، اسٹیڈیم میں سیاسی نعرے بازی پر پابندی ہوگی۔

دبئی (میڈیا پاکستان) سری لنکا نے پاکستان کے خلاف ٹی ٹوئنٹی سیریز کے لیے اسکواڈ کا اعلان کردیا، تاہم اہم کھلاڑیوں کے پاکستان آنے سے انکار پر ٹیم میں زیادہ تر نئے کرکٹرز شامل کیے گئے ہیں۔جن کھلاڑیوں نے پاکستان آنے سے انکار کیا، ان میں لاستھ ملنگا، دنیش چندیمل، اپل تھرنگا اور لکمل شامل ہیں۔پاکستان کے خلاف ٹی ٹوئنٹی سیریز کے لیے تھیسارا پریرا کو سری لنکا کا کپتان مقرر کیا گیا ہے۔سری لنکن ٹی ٹوئنٹی اسکواڈ میں تھیسارا پریرا (کپتان)، تھیس دلشان موناریوا، دنشکا گوناتھیلاکا، سدیرا سماراوکرمہ، آشان پرینجن، مہیلا اداوتے، دسون شناکا، سچتھ پتھیرانا، وکرم سنجایا، لاہیرو گماگے، سیکوجے پرسانا، وشوا فرنینڈو، اسورو ادانا، جیفرے ونڈرسے اور چتورنگا ڈی سلوا شامل ہیں۔سری لنکا اور پاکستان کے درمیان 3 ٹی ٹوئنٹی میچوں پر مشتمل سیریز کا تیسرا اور آخری میچ 29 اکتوبر کو لاہور میں شیڈول ہے اور یہ سری لنکا کا 2009 کے بعد پاکستانی سرزمین پر پہلا انٹرنیشنل میچ ہوگا۔یاد رہے کہ مارچ 2009 میں سری لنکن ٹیم پر لاہور میں دہشت گردوں کے حملے کے بعد پاکستان پر انٹرنیشنل کرکٹ کے دروازے بند ہو گئے تھے اور اس حملے کے بعد سری لنکا پاکستان کا دورہ کرنے والی پہلی صف اول کی ٹیم ہو گی، اس سے قبل زمبابوے کی ٹیم 2015 میں پاکستان آچکی ہے۔میچ کے پاکستان میں انعقاد کے بعد سری لنکن کپتان اپل تھرانگا اور دیگر اہم کھلاڑیوں نے پاکستان آنے سے انکار کردیا تھا، جس پر سری لنکن چیف سلیکٹرز نے سخت موقف اپناتے ہوئے کھلاڑیوں کو خبردار کیا تھا کہ پاکستان نہ آنے والے کھلاڑیوں کو بقیہ سیریز کے لیے بھی منتخب نہیں کیا جائے گا۔اپنے ایک بیان میں سری لنکن چیف سلیکٹر گریم لبروئے نے کہا تھا کہ بورڈ کھلاڑیوں کو قائل کرنے کے لیے ہر ممکن کوشش کر رہا ہے تاہم اس کے باوجود بھی جو کھلاڑی نہیں مانیں گے وہ گرین شرٹس کے خلاف شیڈول ٹی ٹونٹی سیریز میں ٹیم کا حصہ نہیں ہوں گے۔انھوں نے دوٹوک الفاظ میں کہا تھا کہ جو کھلاڑی پاکستان جانے پر رضامند ہوں گے صرف انھیں ہی پوری سیریز کے لیے منتخب کیا جائے گا۔

دبئی (میڈیا پاکستان) پاکستانی فاسٹ بولر حسن علی کے بارے میں سب کی ایک ہی رائے ہے کہ وہ جب سے پاکستانی کرکٹ ٹیم میں آئے ہیں انہوں نے اپنی بولنگ سے ٹیم میں ایک نئی روح پھونک دی ہے۔حسن علی کی انٹرنیشنل کرکٹ ابھی صرف ایک سال کی ہے لیکن اس مختصر سے عرصے میں وہ ایک کے بعد ایک نیا ریکارڈ اور سنگ میل عبور کرتے جا رہے ہیں اور یہ اسی مستقل مزاج کارکردگی کا نتیجہ ہے کہ وہ آئی سی سی کی تازہ ترین ون ڈے عالمی رینکنگ میں پہلی پوزیشن حاصل کرنے میں بھی کامیاب ہوگئے ہیں۔حسن علی ایک انٹرویو میں کہتے ہیں کہ عالمی نمبر ایک بولر بننے کی انھیں بہت زیادہ خوشی ہے۔’اللہ کا شکر ہے کہ اس نے اتنی عزت بخشی ہے کہ میں آج دنیا کا نمبر ایک بولر بنا ہوں۔ ایک ہی سال میں بہت زیادہ عزت ملی ہے۔ میں یہ سمجھتا ہوں کہ میری ان تمام کامیابیوں کا کریڈٹ میری ٹیم کو جاتا ہے۔ یہ میرے والدین کی دعاؤں اور میرے بھائی کی محنت کا نتیجہ ہے۔‘حسن علی کے کریئر میں ان کے بھائی عطاء الرحمن کا نمایاں ہاتھ ہے جو انھیں کرکٹر دیکھنا چاہتے تھے۔’میں کبڈی کا باقاعدہ کھلاڑی نہیں تھا کبھی کبھی شوق میں کھیل لیتا تھا لیکن مجھے بچپن سے کرکٹ کا شوق تھا اور میرے بھائی عطاء الرحمن نے شروع ہی سے مجھے کرکٹ کی طرف رکھا تھا۔ انھوں نے قدم بہ قدم میری رہنمائی کی آج میں جو کچھ بھی ہوں انھی کی وجہ سے ہوں۔حسن علی سے یہ سوال ضرور کیا جاتا ہے کہ ان میں اتنی انرجی کہاں سے آئی ہے کہ ٹیم کو گرنے ہی نہیں دیتے۔ جارحانہ کھیلنے کا انداز یا یہ انرجی جو لوگوں کو میدان میں نظر آتی ہے مجھ میں قدرتی طور پر شروع ہی سے موجود ہے اور یہ میرا فرض بھی بنتا ہے کہ میں ٹیم کو اوپر ہی رکھوں نیچے نہ آنے دوں۔حسن علی اپنے ایک اوور میں مختلف نوعیت کی گیندوں کے ذریعے بیٹسمین کو پرسکون نہیں رہنے دیتے لیکن ان سے سوال تھا کہ آخر کوئی ایک خوبی بتائے جس کے بل پر آپ کو وکٹیں ملتی ہیں؟’میری کوشش ہوتی ہے کہ میں بیٹسمین کو زیادہ رنز نہ کرنے دوں۔ میں لینتھ لائن کا خیال رکھتے ہوئے وکٹوں میں بولنگ کرتا ہوں اور جب آپ بیٹسمین کو کھل کر کھیلنے نہیں دیتے تو وہ غلطی کرکے آپ کو وکٹ دینے پر مجبور ہوجاتے ہیں۔حسن علی کا تعلق گوجرانوالہ کے قریبی گاؤں لدھے والا وڑائچ سے ہے جس کے گلی محلوں سے انہوں نے اپنی کرکٹ شروع کی۔ علاقائی سطح پر انڈر 16 کرکٹ بھی کھیلی اور پھر یہ سفر انہیں لاہور لے گیا جہاں انہوں نے سید پیپر ملز کی طرف سے گریڈ ٹو کرکٹ کھیلی جس کے بعد وہ فرسٹ کلاس کرکٹ سے ہوتے ہوئے پاکستان سپر لیگ تک جا پہنچے۔پاکستان سپر لیگ نے صحیح معنوں میں حسن علی کو آگے بڑھنے اور اپنی شناخت بنانے کا موقع فراہم کیا۔میں پہلی پاکستان سپر لیگ میں ایمرجنگ کرکٹر کے طور پر پشاور زلمی میں شامل ہوا تھا اور اس وقت میری یہی کوشش تھی کہ اپنی کارکردگی کو بہتر سے بہتر بنانا ہے اور مجھے خوشی ہے کہ وقت کے ساتھ ساتھ میری کارکردگی میں بہتری آئی ہے اور یہ کارکردگی ٹیم کے کام آرہی ہے۔اس سال چیمپینز ٹرافی میں پاکستان کی جیت میں حسن علی کی شاندار بولنگ نے کلیدی کردار ادا کیا تھا۔ وہ 13 وکٹیں حاصل کرکے ٹورنامنٹ کے بہترین کھلاڑی قرار پائے تھے۔بھارت کے خلاف پہلے میچ میں میری کارکردگی اچھی نہیں رہی تھی لیکن پھر اگلے میچوں میں میں نے کوچ کے دیے گئے پلان کے مطابق بولنگ کی اور مجھے وکٹیں ملیں۔ یقیناً سب سے بڑی خوشی پاکستانی ٹیم کی جیت اور ٹورنامنٹ کا بہترین کھلاڑی کا ایوارڈ ملنے کی تھی۔ حسن علی سابق فاسٹ بولر وقار یونس کے زبردست مداح ہیں اور یہ بھی اتفاق ہے کہ حسن علی نے پاکستان کی طرف سے سب سے کم ٹیسٹ میچوں میں پچاس وکٹیں مکمل کرنے کا وقاریونس ہی کا ریکارڈ اپنے نام کیا ہے۔یہ ریکارڈ قائم کرنے کے بعد حسن علی نے اپنے ٹوئٹر پیغام میں کہا تھا، ’میرے کئی خواب ہیں۔ میں نے کبھی یہ نہیں سوچا تھا کہ میں عظیم وقار یونس کا پچاس وکٹوں کا یہ ریکارڈ توڑ دوں گا۔ میں اسے وقار یونس کے نام کرتا ہوں۔

دبئی (میڈیا پاکستان) پاکستان کرکٹ بورڈ(پی سی بی) کے چیئرمین نجم سیٹھی نے قومی ٹیم کے ایک کھلاڑی کو ایک فرد کی جانب سے میچ فکسنگ کی پیش کش کرنے کی تصدیق کرتے ہوئے کہا ہے کہ معاملے کوفوری طور پر آئی سی سی کے اینٹی کرپشن یونٹ کو بھجوادیا گیا ہے۔نجم سیٹھی نے ٹویٹر میں کہا کہ ایک کھلاڑی سے رابطہ کیا گیا تھا، قواعد کے تحت پی سی بی نے فوری طور پر آئی سی سی کو مطلع کیا۔ان کا کہنا تھا کہ معاملات مشترکہ طور پر ہمارے ہاتھوں میں ہیں اس لیے مزید وضاحت نہیں۔پی سی بی چیئرمین نے کسی کھلاڑی کا نام نہیں لیا تاہم پی سی بی میں موجود میڈیا ذرائع کہہ چکے ہیں کہ بکی کی جانب سے جس کھلاڑی کو پیش کش کی گئی تھی وہ کپتان سرفرازاحمد تھے۔ان کا کہنا تھا کہ بکی نے سرفرازاحمد سےسری لنکا کے خلاف تیسرے میچ سے قبل 17 اکتوبر کو رابطہ کیا تھا۔ذرائع کا کہنا تھا کہ سرفرازاحمد نے پی سی بی کے اینٹی کرپشن یونٹ کو معاملے سے فوری آگاہ کیا تھا جس نے آئی سی سی کو مطلع کردیا۔اینٹی کرپشن قواعد کے مطابق کھلاڑیوں پر لازم ہے کہ وہ فکسنگ کی پیش کش پر فوری طور پر مطلع کریں ایسا نہ کرنے کی صورت میں انھیں 6 مال کی پابندی کی سزا بھی ہوسکتی ہے جبکہ زیادہ سے زیادہ سزا تاحیات پابندی ہے۔خیال رہے کہ 5 میچوں کی ایک روزہ سیریز میں پاکستان نے اب تک کھیلے گئے چاروں میچوں میں کامیابی حاصل کرکے سیریز اپنے نام کرلی ہے جبکہ سیریز کا آخری میچ 23 اکتوبر کو شارجہ میں کھیلا جائے گا۔یاد رہے کہ رواں سال پاکستان سپرلیگ (پی ایس ایل) کے دوسرے ایڈیشن کے آغاز میں ہی اسپاٹ فکسنگ کی گونج نے پاکستان کرکٹ کو شدید جھٹکا دیا تھا جس کے نتیجے میں قومی ٹیم کے اوپنر شرجیل خان اور خالد لطیف کو ملک واپس بھیج دیا گیا تھا۔بعد ازاں پی سی بی نے شرجیل خان کو پانچ سال اور خالد لطیف کو پانچ سال معطلی کے علاوہ 10 لاکھ روپے کا جرمانہ بھی عائد کردیا تھا۔پی ایس ایل میں فاسٹ باؤلر محمد عرفان نے اپنی غلطی کا اعتراف کیا تھا جس کے بعد انھیں ایک سال پابندی کی سزا دی گئی تھی اور بتایا گیا تھا کہ ٹھیک طرح عمل درآمد پر ان کی سزا 6 ماہ کردی جائے گی جس کے بعد انھوں نے سزا پوری کرکے ڈومیسٹک کرکٹ میں واپسی کردی ہے۔

ڈھاکہ (میڈیا پاکستان) بھارت نے پاکستان کو ہاکی ایشیا کپ کےسیمی فائنل میں 4-0 سے شکست دے کر فائنل میں جگہ بنادی جبکہ پاکستان تیسری پوزیشن کے لیے میچ کھیلے گا۔بنگلہ دیش کے دارالحکومت ڈھاکا میں کھیلے گئے اہم میچ میں بھارتی ٹیم شروع سے ہی کھیل پر چھائی رہی اور پاکستان کے خلاف مسلسل گول کرتی رہی۔پاکستانی ٹیم نے ٹورنامنٹ کے پہلے میچ میں بنگلہ دیش کے خلاف بہترین کارکردگی دکھائی تھی جس کے بعد ناقص کارکردگی کا مظاہرہ جاری ہے۔پاکستانی ٹیم نے جنوبی کوریا کے خلاف میچ کو 1-1 گول سے برابر کردیا تھا جس کے بعد ٹیم کے فائنل میں پہنچنے کے امکانات معدوم ہوگئے تھے تاہم سیمی فائنل میں ٹورنامنٹ کی مضبوط بھارتی ٹیم کو شکست دینے کی صورت میں فائنل کھیلنے کی صورت نکل سکتی تھی جس کو حریف ٹیم نے ناممکن بنادیا۔خیال رہے کہ بھارتی ٹیم نے پاکستان کو گروپ میچ میں بھی شکست دی تھی جبکہ ملائیشیا کے ہاتھوں بھی پاکستانی ٹیم کو شکست کا سامنا کرنا پڑا تھا۔دوسری جانب بھارت نے پاکستان کے خلاف سیمی فائنل سے قبل ملائیشیا کی ٹیم کو 4-2 سے شکست دے کر ٹورنامنٹ میں اپنی برتری ثابت کردی تھی۔ جاپان کی ٹیم نے میزبان بنگلہ دیش کو گزشتہ روز کھیلے گئے میچ میں 4-0 سے واضح شکست دی تھی۔

شارجہ(میڈیا پاکستان) باؤلرز کی عمدہ کارکردگی اور بابر اعظم و شعیب ملک کی ذمے دارانہ بیٹنگ کی بدولت پاکستان نے سری لنکا کو لگاتار چوتھے ون ڈے میچ میں سات وکٹ سے شکست دے کر سیریز میں 4-0 کی برتری حاصل کر لی۔شارجہ میں کھیلے جا رہے سیریز کے چوتھے ون ڈے میچ میں سری لنکا نے ایک مرتبہ پھر ٹاس جیت کر بیٹنگ کا فیصلہ کیا جو ایک مرتبہ پھر غلط ثابت ہوا۔سری لنکا کی پہلی وکٹ دوسرے ہی اوور میں 2 رنز پر گری جب کیریئر کا پہلا ون ڈے میچ کھیلنے والے عثمان خان شنواری نے سری لنکن کپتان اپل تھارنگا کی وکٹیں بکھیر کر ون ڈے کیریئر کا شاندار انداز میں آغاز کیا۔اس کے بعد نروشن ڈِکویلا نے جارحانہ بیٹنگ کی لیکن وہ 22 رنز بنانے کے بعد وہ جنید خان کی وکٹ بن گئے۔30 رنز پر دو وکٹیں گرنے کے بعد دنیش چندیمل اور لہیرو تھیمانے یکجا ہوئے اور آہستہ آہستہ اسکور کو آگے بڑھانا شروع کیا لیکن ابھی انہوں نے دوسری وکٹ کیلئے 29 رنز ہی جوڑے تھے کہ وکٹوں کے درمیان غلط فہمی کے نتیجے میں چندیمل رن آؤٹ ہو کر پویلین واپسی پر مجبور ہوئے جبکہ اگلی ہی گیند پر عماد وسیم نے ڈیبیو کرنے والے سدیرا سمارا وکراما کی وکٹیں بکھیر دیں۔پاکستان کے خلاف سری لنکا کی پانچویں وکٹ 91 رنز پر گری جب ملندا سری وردنا 13 رنز بناکر حسن علی کی گیند پر آؤٹ ہوگئے۔پاکستانی کپتان سرفراز احمد نے شاداب خان کو متعارف کرایا جنہوں نے پہلی اور دوسری گیند پر سکیگو پرسنا اور تھسارا پریرا کو پویلین لوٹا کر پاکستان کو چھٹی اور ساتویں کامیابی دلائی۔99 رنز پر سات کھلاڑی آؤٹ ہونے کے بعد لہیرو تھریمانے اور اکیلا دھننجیا نے 43 رنز جوڑ کر ٹیم کے آنسو پونچھنے کی کوشش کی لیکن حسن علی نے اپنے نئے اسپیل کے پہلے ہی اوور میں دھننجیا کی اننگز کا خاتمہ کردیا۔لہیرو تھری مانے نے نصف سنچری بنا کر کچھ مزاحمت کی لیکن 62 کے انفرادی اسکور پر عماد وسیم نے ان کی اننگز کے آگے فل اسٹاپ لگا دیا۔پاکستان کو سری لنکا کی آکری وکٹ کیلئے بھی زیادہ تگ و دو نہیں کرنی پڑی اور حسن علی نے گماگے کو باؤلڈ کر کے سری لنکن ٹیم کی بساط 173 رنز پر لپیٹ دی۔پاکستان کی جانب سے حسن علی ایک مرتبہ پھر سب باؤلرز پر بازی لے گئے اور تین وکٹیں لے کر سب سے کامیاب باؤلر رہے جبکہ شاداب خان اور عماد نے دو دو وکٹیں حاصل کیں۔پاکستان نے ہدف کا تعاقب شروع کیا تو گزشتہ میچ میں سنچری بنانے والے امام الحق صرف دو رنز بنا کر پویلین لوٹ گئے۔بابر اعظم اور فخر زمان نے اسکور کو 37 تک پہنچایا ہی تھا کہ مستقل مشکلات سے دوچار فخر ایک غیر ضروری شاٹ کھیلتے ہوئے لگاتار دوسرے میچ میں اسٹمپ ہو کر پویلین لوٹ گئے جبکہ حفیظ نو رنز بنا کر آؤٹ ہوئے تو پاکستانی ٹیم صرف 58 رنز پر تین کوٹوں سے محروم ہو چکی تھی۔اس مرحلے پر ٹیم کے سب سے تجربہ کار بلے باز شعیب ملک کی وکٹ پر آمد ہوئی جنہوں نے بابر کے ساتھ عمدہ شراکت قائم کرتے ہوئے مزید کسی نقصان کے ٹیم کو ہدف تک رسائی دلا کر سیریز میں 4-0 کی برتری دلا دی۔دونوں کھلاڑیوں نے چوتھی وکٹ کیلئے ناقابل شکست 119 رنز کی شراکت قائم کر کے 39 اوورز میں ہی ٹیم کی فتح کو یقینی بنا دیا، شعیب نے تین چھکوں اور دو چوکوں کی مدد سے 69 جبکہ بابر نے بھی پانچ چوکوں کی مدد سے 69 رنز بنائے۔بابر اعظم کو میچ کا بہترین کھلاڑی قرار دیا گیا۔اس سے قبل چوتھے ون ڈے کیلئے قومی ٹیم میں 2 تبدیلیاں کی گئیں ہیں، رومان رئیس کی جگہ عثمان خان شنواری اور فہیم اشرف کی جگہ عماد وسیم کو ٹیم میں شامل کیا گیا ہے۔آج کے میچ میں عثمان خان اور سدیرا سمارا وکراما بالترتیب پاکستان اور سری لنکا کی طرف سے ڈیبیو کر رہے ہیں۔
میچ کے لیے دونوں ٹیمیں ان کھلاڑیوں پر مشتمل تھیں۔
پاکستان: سرفراز احمد (کپتان)، امام الحق، فخر زمان، بابر اعظم، محمد حفیظ، شعیب ملک، عماد وسیم، شاداب خان، حسن علی، عثمان خان شنواری اور جنید خان۔
سری لنکا: اپل تھرنگا (کپتان)، نروشن ڈکویلا، سدیرا سمارا وکرمہ، لہیرو تھریمانے، دنیش چندیمل، ملندا سریوردنا، تھیسارا پریرا، سورنگا لکمل، اکیلا دھاننجیا، ایس پراسانا اور لہیرو گماگے۔

دبئی(میڈیا پاکستان) جنوبی افریقہ نے انٹرنیشنل کرکٹ کونسل (آئی سی سی) کی تازہ ترین ون ڈے ٹیم رینکنگ میں بھارت سے ٹاپ پوزیشن چھین کر دوسرے نمبر پر دھکیل دیا ہے جبکہ پاکستان کی چھٹی پوزیشن برقرار ہے۔آئی سی سی کی طرف سے جاری کردہ تازہ ترین ون ڈے رینکنگ میں بنگلہ دیش کے خلاف ون ڈے سیریز میں 2-0 کی برتری حاصل کرنے والی جنوبی افریقی ٹیم نے عمدہ کارکردگی کی بدولت ایک درجہ ترقی کے ساتھ دوبارہ ٹاپ پوزیشن پر قبضہ جما لیا۔تاہم پوزیشن کے دفاع کیلئے اسے بنگال ٹائیگرز کے خلاف 3-0 سے کامیابی حاصل کرنا ہو گی جبکہ بھارتی ٹیم تنزلی کے بعد دوسرے نمبر پر چلی گئی۔نیوزی لینڈ کے خلاف شیڈول ون ڈے سیریز میں بھارت کے پاس دوبارہ ٹاپ پوزیشن پانے کا موقع ہو گا اور ہدف کے حصول کیلئے اسے کیویز کو 3-0 سے ہرانا ہو گا۔نئی درجہ بندی میں آسٹریلیا تیسرے، انگلینڈ چوتھے، نیوزی لینڈ پانچویں، پاکستان چھٹے، بنگلہ دیش ساتویں اور سری لنکا آٹھویں نمبر پر موجود ہے۔

شارجہ (میڈیا پاکستان) پاکستان نے سری لنکا کے خلاف چوتھے ون ڈے میچ میں فاسٹ باؤلر عثمان خان کو ڈیبیو کا موقع فراہم کیا جس کے ساتھ ہی وہ رواں سال ڈیبیو کرنے والے چھٹے پاکستانی کھلاڑی بن گئے۔سری لنکا کے خلاف سیریز میں فتح کے بعد پاکستان نے نئے کھلاڑیوں کو آزمانے کا فیصلہ کیا اور رومان رئیس کی جگہ نوجوان عثمان خان شنواری کو ون ڈے ڈیبیو کرایا۔اس کے ساتھ عثمان رواں برس ون ڈے ڈیبیو کرنے والے چھٹے جبکہ مجموعی طور پر 216ویں پاکستانی کھلاڑی بن گئے۔رواں سال اس سے قبل شاداب خان، فخر زمان، فہیم اشرف، رومان رئیس اور امام الحق گرین شرٹس کی طرف سے ون ڈے ڈیبیو کر چکے ہیں۔ عثمان شنواری نے ون ڈے کیریئر کی دوسری ہی گیند پر سری لنکن کپتان اپل تھارنگا کو آؤٹ کر کے اپنا انتخاب درست ثابت کردیا تھا۔عثمان مہمان ٹیم کے خلاف رواں سیریز کے دوران امام الحق کے بعد ڈیبیو کرنے والے دوسرے کھلاڑی ہیں، امام نے سیریز کے تیسرے ون ڈے میں ایک روزہ کیریئر کا آغاز کیا تھا۔

ابوظہبی (میڈیا پاکستان)پاکستان کرکٹ ٹیم کے ایک انتہائی اہم کھلاڑی سے سری لنکا کے خلاف جاری ون ڈے سیریز کے دوران مبینہ طور پر سٹّے بازوں نے رابطہ کرکے سپاٹ فکسنگ کی پیشکش کی ہے۔قومی ٹیم کے ذرائع کے مطابق سٹے بازوں کی جانب سے رابطے کی اطلاع اس کھلاڑی نے فوری طور پر ٹیم منیجمنٹ اور پاکستان کرکٹ بورڈ کے اینٹی کرپشن یونٹ کو دے دی تھی۔ذرائع نے شارجہ میں بی بی سی کے استفسار پر اس بات کی تصدیق کی کہ مذکورہ کھلاڑی سے ابوظہبی میں کھیلے گئے دوسرے ون ڈے انٹرنیشنل کے موقع پر ایک مشکوک شخص نے رابطہ کیا تھا لیکن اس کھلاڑی نے اس رابطے کی فوری رپورٹ کر دی تھی۔پاکستانی کرکٹ ٹیم کے ذرائع کا یہ بھی کہنا ہے کہ جس شخص نے کرکٹر سے رابطہ کیا ہے وہ متحدہ عرب امارات کا مقامی ہے۔واضح رہے کہ پاکستان سپر لیگ کے دوران سپاٹ فکسنگ سکینڈل سامنے آیا تھا جس میں ملوث دو کرکٹرز شرجیل خان اور خالد لطیف پر پابندی عائد کی جاچکی ہے۔سری لنکا کے خلاف ون ڈے سیریز کے دوران بھی پاکستانی کرکٹ ٹیم کے ساتھ سکیورٹی افسر کرنل خالد موجود ہیں۔

دبئی(میڈیا پاکستان)قومی کرکٹ ٹیم کے فاسٹ بولر حسن علی آئی سی سی کی نئی ون ڈے رینکنگ میں پہلی پوزیشن پر آگئے جب کہ جنوبی افریقا کے اے بی ڈویلیئرز کو بہترین بلے باز قرار دیا گیا ہے۔
آئی سی سی کی نئی رینکنگ کے مطابق سری لنکا کے خلاف ون ڈے سیریز کے ابتدائی تین میچز میں 9 وکٹیں حاصل کرنے والے حسن علی نے 6 درجہ ترقی پا کر پہلی پوزیشن سنبھال لی۔
حسن علی سے قبل رواں سال پہلی پوزیشن پر ٹرینٹ بولٹ، عمران طاہر، کگیسو رابادا اور جوش ہیزلی وڈ براجمان تھے۔
بہترین بلے بازوں کی رینکنگ میں جنوبی افریقا کے اے بی ڈویلئرز بنگلادیش کے خلاف سنچری بنانے کے بعد پہلی پوزیشن پر آگئے۔ اس سے قبل پہلی پوزیشن بھارتی کپتان ویرات کوہلی کے پاس تھی۔
بیٹسمینوں کی رینکنگ میں بابراعظم نے دو درجہ ترقی پاکر چوتھی پوزیشن حاصل کرلی جو ان کے کیئریر کی بہترین پوزیشن ہے جب کہ آسٹریلیا کے ڈیوڈ وارنر تیسری پوزیشن پر ہیں۔
آئی سی سی رینکنگ کے مطابق بہترین آل راؤنڈر کی فہرست میں محمد حفیظ دو درجہ ترقی پاکر ایک مرتبہ پھر پہلی پوزیشن پر آگئے جب کہ بنگلادیش کے شکیب الحسن دوسرے نمبر پر ہیں۔