Category کھیل

دبئی: (میڈیا پاکستان) پاکستان اور سری لنکا کے درمیان دوسرا اور آخری ڈے نائٹ ٹیسٹ 6 اکتوبر سے دبئی میں شروع ہو گا۔ دو میچز کی ٹیسٹ سیریز میں سری لنکن ٹیم کو ایک صفر کی برتری حاصل ہے۔ اطلاعات کے مطابق حسن علی دوسرے ٹیسٹ میں حتمی الیون کا حصہ نہیں ہوں گے جبکہ ان کی جگہ فاسٹ باؤلر وہاب ریاض کو کھلائے جانے کا امکان ہے۔ آخری ٹیسٹ میں قومی ٹیم کو آئی لینڈرز کے خلاف سیریز بچانے کا چیلنج درپیش ہے۔

کراچی(میڈیا پاکستان) پی سی بی کے ڈائریکٹرکرکٹ آپریشنز و سابق ٹیسٹ کرکٹر ہارون رشید نے دعویٰ کیا ہے کہ سری لنکا نے معاہدے پر عمل درآمد کرتے ہوئے تیسرا ٹی ٹوئنٹی میچ لاہورمیں کھیلنے کی یقین دہانی کرا دی ہے،سیکیورٹی کلیئرنس کے بعد اگر ٹیم پاکستان آئی تو اسے ورلڈ الیون کی طرح فول پروف سیکیورٹی فراہم کی جائے گی۔نیشنل اسٹیڈیم کراچی میں میڈیا سے گفتگو کرتے ہوئے ہارون رشید نے کہا کہ قوی امید ہے کہ سری لنکا کی ٹیم اپنا تیسرا ٹی ٹوئنٹی میچ لاہور میں کھیلے گی، اس حوالے سے ورڈ کا پی سی بی سے معاہدہ ہوا، اس پر عمل درآمد کی یقین دہانی بھی کرا دی گئی ہے، انھوں نے کہا کہ کلیئرنس کے بعد اگر سری لنکا کی ٹیم پاکستان آئی تو اسے وہی سیکیورٹی دیں گے جو ورلڈ الیوں کودی گئی، ایک سوال پر انھوں نے کہا کہ ڈومیسٹک کرکٹ میں متعارف کرائے جانے والے ڈرافٹنگ کے نظام کو بلا جواز تنقید کا نشانہ بنایا جارہا ہے، ماضی میں ریجن کی ٹیموں کی تشکیل کے وقت شکوک و شبہات پیدا ہوا کرتے تھے، ڈرافٹنگ سسٹم کا مقصد کھلاڑیوں کو زیادہ سے زیادہ مواقع فراہم کرنا ہے۔
یہ تاثر درست نہیں کہ اس نظام سے ریجن کے کھلاڑی متاثر ہوں گے، قائد اعظم ٹرافی میں ڈرافٹنگ کی مثال سامنے ہے، کراچی اورلاہورکی ٹیموں میں زیادہ ترکھلاڑیوں کا تعلق ان ہی ریجنز سے ہے، اب اچھے کرکٹر زکو زیادہ مواقع ملیں گے اور وہ کارکردگی کی بدولت اہلیت تسلیم کرانے میں کامیاب رہیں گے، البتہ اب بھی اس نظام میں کچھ جھول موجود جنھیں دور کرنے کی کوشش ہو رہی ہے، ہارون رشید نے کہا کہ پاکستان ویمن ٹیم میں ہونے والی تبدیلیاں ناگزیر تھیں، امید ہے کہ کرکٹ میں آگے چل کر بہتری آئیگی، البتہ یہ حقیقت ہے کہ پاکستانی ویمن ٹیم کا دنیا کی دیگر ٹیموں کے مقابلے میں معیار بہت پست ہے، اگر یہ سمجھا جائے کہ انگلینڈ، آسٹریلیا، ویسٹ انڈیز، بھارت اورسری لنکا کی ٹیموں کو زیرکرلیں گے تو درست نہ ہوگا، پاکستان کوویمن کرکٹ میں بہت محنت کرنا ہے، اس حوالے سے بورڈ نے مربوط لائحہ عمل تیارکرلیا، بہت زیادہ پھیلی ہوئی ویمن کرکٹ کو5 ریجن میں سمیٹ کرکھلاڑیوں کو بھرپور تربیت دی جائیگی۔

لاہور(میڈیا پاکستان) شاہد آفریدی کی آمد کے بعد شعیب ملک کا کراچی کنگز میں برقرار رہنا دشوارہو گیا ہے اور اب ان کا بھی کراچی کی جگہ ملتان میں شامل ہونے کا امکان ہے۔شعیب ملک نے اولین پی ایس ایل میں ٹیم کی قیادت کے فرائض بھی انجام دیے تھے مگر پھر شکستوں کے بعد ذمہ داریاں روی بوپارہ کے سپرد کردی تھیں۔ ذرائع نے بتایا کہ فرنچائز اگلے سیزن میں شعیب ملک کو برقرار نہیں رکھنا چاہتی، آل راؤنڈر کے حال ہی میں نئی ٹیم ملتان سلطان کے ڈائریکٹر آف کرکٹ آپریشنز وسیم اکرم سے رابطے بھی ہوئے ہیں، توقع ہے کہ وہ اس کیلیے بطور کپتان یا پھر عام کھلاڑی کی حیثیت سے ایکشن میں نظرآئیں گے۔
واضح رہے کہ شاہد آفریدی نے پشاورزلمی کے اونرجاوید آفریدی سے اختلافات کے بعد فرنچائز کو چھوڑ دیا تھا، وہ اب کراچی کنگز کے ساتھ وابستہ ہو چکے ہیں۔ پی ایس ایل تھری کا انعقاد آئندہ برس کے اوائل میں ہوگا، پلیئرز ڈرافٹ رواں ماہ کے آخر یا نومبر میں متوقع ہیں۔

دبئی(میڈیا پاکستان) ٹیسٹ میچز کے پانچویں روز ہتھیار ڈالنے کی بیماری شدت اختیار کرگئی۔پیر کو ابوظبی ٹیسٹ میں آخری روزپاکستانی ٹیم 136رنز کا معمولی ہدف بھی حاصل نہ کر سکی اور 114رنز پر ڈھیر ہوگئی،سری لنکن اسپنرز رنگانا ہیراتھ اور دلروان پریرا کے سامنے میزبان بیٹسمین بے بسی کی تصویر بنے نظر آئے،اگرچہ مصباح الحق اور یونس خان کی غیر موجودگی میں پاکستانی بیٹنگ لائن تشکیل نو کے عمل سے گزر رہی ہے لیکن ان دونوں تجربہ کار سینئرز کے ہوتے ہوئے بھی میچ کے فیصلہ کن لمحات میں کھلاڑیوں کے ہاتھ پیر پھول جانے کی بیماری تواتر کے ساتھ نظر آتی رہے۔
ویب سائٹ ’’کرک انفو‘‘ کے مطابق گزشتہ ایک سال میں پاکستان نے 4 میچز میں آخری روز تمام وکٹیں گنواتے ہوئے شکست کو گلے کا ہار بنالیا،گرین کیپس نے اس نوعیت کی کارکردگی دنیا کے مختلف میدانوں پر دہرائی، اس دوران پیسرز یا اسپنرز اور کبھی دونوں بھاری پڑتے رہے، گزشتہ سال اگست میں برمنگھم ٹیسٹ پہلی مثال ہے۔ پاکستان سنبھل کر کھیلتا تو میچ ڈرا کیا جا سکتا تھا لیکن ریورس سوئنگ کا سامنا کرتے ہوئے پوری ٹیم201رنزپر ہمت ہار گئی، میزبان انگلینڈ نے فتح کے شادیانے بجائے، اسی نوعیت کی دوسری ناکامی ہیملٹن ٹیسٹ میں ہوئی، اس بار پاکستان نے 229رنز کے بدلے میں تمام 10وکٹیں گنواکر فتح نیوزی لینڈ کی جھولی میں ڈال دی، یہاں کیوی پیس اور اسپن اٹیک کے سامنے مہمان ٹیم تذبذب کا شکار رہی کہ فتح کیلیے جائیں یا ڈرا کی کوشش کریں۔
برسبین ٹیسٹ میں آخری روز2وکٹیں 68رنز پرگنوا کر ناکامی کا منہ دیکھا، میلبورن میں ڈرا ممکن تھا، مگر ناتھن لیون نے مردہ پچ پر مڈل آرڈر کی قلعی کھول دی اور پاکستان نے 163رنز بناتے ہوئے تمام وکٹوں کا نقصان اٹھالیا، سڈنی ٹیسٹ میں گرین کیپس نے 9وکٹیں 189رنز پرکھونے کے بعد شکست کا منہ دیکھا، اس میچ میں اسپنرز اور پیسرز کے سامنے بہتر مزاحمت میچ ڈراکرسکتی تھی۔
کنگسٹن ٹیسٹ کے آخری روز 3 وکٹیں گنواکر گزشتہ سال ٹیسٹ میچ کے آخری روز واحد کامیابی سمیٹی،مگر اگلے ہی میچ میں 188کے ہدف کا تعاقب کرتے ہوئے پوری پاکستانی ٹیم81رنز پر پویلین لوٹ گئی،ویسٹ انڈین فتح کا راستہ بنانے والے بولرز میں شینن گبریل، الزاری جوزف اور جیسن ہولڈر شامل تھے۔
ابوظبی ٹیسٹ میں پاکستان نے لورینک کی حامل سری لنکن ٹیم کے سامنے جس طرح ہتھیار ڈالے اس نے ایک بار پھر شائقین کے دل توڑ دیے، ایک سال میں مختلف کنڈیشنز اور بولرزکے سامنے سرنگوں ہونے والی ٹیم کی کارکردگی نے ثابت کردیا کہ دباؤ بڑھتے ہی اوسان خطا ہونے لگتے ہیں،آخری روز بیٹنگ کی تباہی کی بنیاد زیادہ تر اوپنرز ہی رکھتے رہے ہیں۔
مذکورہ بالا 7 شکستوں میں پاکستان نے 6مختلف افتتاحی جوڑیاں میدان میں اتاریں، گزشتہ ایک سال میں مصباح الحق اور یونس خان بھی تباہ کاریوں کو ٹالنے میں ناکام رہے۔ اظہرعلی،اسد شفیق اور سرفراز احمد بھی ان شکستوں کا بوجھ اٹھانے والوں میں شامل رہے ہیں،بابر اعظم ان میں سے 6اور سمیع اسلم5کے ساجھے دار تھے۔
ابوظبی میں سری لنکا کے ہاتھوں شکست سے واضح ہوگیا کہ گزشتہ سال کے تجربوں سے سینئرز اور جونیئرز کسی نے کچھ نہیں سیکھا۔ اس مسئلے نے ٹیم مینجمنٹ کو بھی پریشان کیا ہوا ہے اور وہ حل تلاش کرنے کیلیے سر جوڑے بیٹھی ہے، آئی لینڈرز کیخلاف سیریز کا دوسرا اور آخری ٹیسٹ جمعے کو دبئی میں شروع ہوگا،اس ڈے اینڈ نائٹ میچ کیلیے دونوں ٹیموں کی تیاریاں بھی مختلف ہونگی،کرکٹرز رات کو گلابی گیند سے نیٹ پریکٹس کرتے ہوئے کنڈیشنز سے ہم آہنگ ہونے کی کوشش کرینگے۔
پاکستان ٹیم نے گزشتہ روز آرام کیا، بدھ کی دوپہر3بجے دبئی کی آئی سی سی اکیڈمی میں پریکٹس سیشن کا آغاز ہوگا،پہلے میچ میں شکست کے بعد ہیڈ کوچ مکی آرتھر کیلیے میزبان کھلاڑیوں کو ناکامی کے خوف سے نکالنا ایک چیلنج ہے،وہ پہلے ہی کہہ چکے کہ اگلے میچ سے قبل پہلی شکست کے دباؤ سے کیسے نکلنا ہے اس معاملے پر حکمت عملی بنائیں گے۔

لاہور(میڈیا پاکستان) قومی کرکٹ چیف سلیکٹر انضمام الحق نے یو اے ای میں شیڈول ٹی 10 لیگ کی ایک ٹیم خرید لی جس پر بورڈ حکام ناخوش نظر آتے ہیں.قومی کرکٹ چیف سلیکٹر انضمام الحق نے یو اے ای میں شیڈول ٹی 10 لیگ کی ایک ٹیم خرید لی جس پر بورڈ حکام ناخوش نظر آتے ہیں. اس حوالے سے چئیرمین نجم سیٹھی روس میں چھٹیاں گزار کر واپس آنے کے بعد ان سے بات کریں گے، 10 اوورز فی اننگز پر مشتمل میچز کا حامل ایونٹ 21 سے 24 دسمبر تک شارجہ میں کھیلا جائے گا، اس کیلیے انضمام کو چیف مینٹور بھی مقرر کیا گیا ہے، وہ پی سی بی سے بطور چیف سلیکٹر ماہانہ تقریباً15 لاکھ روپے وصول کرتے ہیں، بورڈ سے ہی ٹکٹ، رہائش کی سہولت اور ڈیلی الاؤنس لے کر وہ ون ڈے سیریز کیلیے مشاورت کے نام پر دبئی گئے، مگر وہاں گزشتہ روز ٹی 10 لیگ کی تقریب میں شرکت کی، ایونٹ میں وہ پنجابی لیجنڈز نامی ٹیم کے مالک ہیں۔
بورڈ حکام نے گزشتہ روز ہی اس ایونٹ پر دبے الفاظ میں تشویش ظاہر کی تھی مگر اب ان کا اپنا چیف سلیکٹر اس کے ساتھ منسلک ہو چکا، گزشتہ برس انضمام کے بھائی بنکاک میں منعقدہ ایک ایونٹ کیلیے اپنی ٹیم لے کر گئے تھے جس کے کپتان فکسنگ میں تاحیات پابندی کے شکار سابق اسپنر دانش کنیریا تھے، انضمام ماضی میں باغی انڈین کرکٹ لیگ میں بھی شریک ہو چکے ہیں۔

ابو ظبی(میڈیا پاکستان) معمولی ہدف پہاڑ بن جانے پر ہیڈ کوچ مکی آرتھر نے سخت مایوسی کا اظہار کیا ہے۔ابوظبی ٹیسٹ میں شکست کے بعد پریس کانفرنس میں ہیڈ کوچ مکی آرتھر نے کہا کہ کنڈیشنز جیسی بھی ہوں 136کا ہدف حاصل کرنا چاہیے تھا، سری لنکا نے ٹاس جیتنے کا فائدہ اٹھایا، پاکستان کو چوتھی اننگز میں بیٹنگ کرنا پڑی، کسی بھی ٹیسٹ کے آخری روز شکستہ پچ پر نوجوان بیٹنگ لائن کیلیے کارکردگی دکھانا مشکل ہوتا ہے لیکن انٹرنیشنل کرکٹ میں کھلاڑیوں کو توقعات پر پورا اترنے کیلیے تیار ہونا چاہیے،یہ ہدف حاصل کیا جا سکتا تھا،اس سطح پر ناکامی کا کوئی جواز نہیں پیش کیا جاسکتا۔مکی آرتھر نے کہا کہ حارث سہیل اور سرفراز احمد کی بیٹنگ کے دوران ہی مثبت رویہ نظر آیا، دیگر بیٹسمین زیادہ دباؤ کا شکار ہوتے ہوئے وکٹیں گنواتے رہے، کوئی مزاحمت کرتے ہوئے رنز نہ بنائے تو رنگنا ہیراتھ جیسے تجربہ کاربولر کو حاوی ہونے کا موقع مل جاتا ہے۔
بیٹنگ آرڈر تبدیل کیے جانے سے کارکردگی متاثر ہونے کے سوال پر آرتھر نے کہا کہ ٹیم میں موجود بہترین بیٹسمینوں کو ہی نمبر 3اور 4بھیجا جاتا ہے،اظہر علی اور اسد شفیق کو اوپر کھلانا ہی مناسب ہے تاکہ بابر اعظم اور حارث سہیل جیسے بیٹسمین کسی اضافی دباؤ کا شکار ہوئے بغیر اپنی کارکردگی میں استحکام لا سکیں۔انھوں نے کہا کہ یاسر نے اپنی فٹنس اور فارم دونوں ثابت کردی،انھوں نے80کے قریب اوورز کیے، وہ دنیا کے نمبر ون اسپنر ہیں۔

چینگڈو(میڈیا پاکستان) پاکستانی ٹینس اسٹار اعصام الحق قریشی نے چین میں ہونے والے چینگڈو ٹینس ٹورنامنٹ کا مینز ڈبلز ٹائٹل اپنے نام کرلیا۔رپورٹس کے مطابق اعصام الحق نے فائنل میں اپنے اسرائیلی پارٹنر جوناتھن ایلرچ کے ساتھ مل کر برازیل کے ڈیمولائنر اور نیوزی لینڈ کے مارسیلو ڈینیئل کی جوڑی کو اسٹریٹ سیٹس میں 3-6 اور 6-7 سے شکست دے کر ٹائٹل اپنے نام کیا۔
اس سے قبل سیمی فائنل میں اعصام الحق اور ان کے ساتھی ایلرچ نے میکسیکن پلیئر سانتیاگو گونزالز اور سربیا کے نیناڈ زیمونچ کو 6-3 اور6-4 سے مات دے دی تھی۔

ابوظہبی(میڈیا پاکستان) پاکستان کے ساتھ ٹیسٹ کے پانچویں روز دوسری اننگ میں سری لنکا کے 8 کھلاڑی آؤٹ ہوگئے ہیں۔ابو ظہبی ٹیسٹ کے آخری دن سری لنکا نے اپنی دوسری اننگز 69 رنز 4 کھلاڑی آؤٹ سے شروع کی تو محمد عباس نے مینڈس کو 18 رنز پر ایل بی ڈبیو کیا جس کے نتیجے میں سری لنکا کی پانچویں وکٹ 73 رنز پر گر گئی ۔ 86 رنز کے مجموعی اسکور پر محمد عباس ہی نے لکمل کو بھی میدان بدر کیا ، انہوں نے 13 رنز بنائے تھے۔ 101 رنز کے اسکور پر یاسر شاہ نے پریرا اور ہیراتھ کو چلتا کیا۔
اس سے قبل سری لنکا نے اپنی پہلی اننگز میں 419 رنز بنائے تھے جب کہ پاکستان نے اس کے جواب میں 422 رنز بنا کر 3 رنز کی برتری حاصل کی تھی۔
واضح رہے کہ سری لنکا اور پاکستان کے درمیان دو ٹیسٹ میچز کی سیریز کھیلی جارہی ہے جس کے بعد 5 ایک روزہ جب کہ 3 ٹی 20 مقابلے ہوں گے۔

پاناما(میڈیا پاکستان) پاکستانی باکسر محمد وسیم نے پاناما کے باکسر کو شکست دے دی۔محمد وسیم نے پاناما میں ہونے والے باکسنگ مقابلے میں کارلوس میلیو کو چت کرتے ہوئے ورلڈ باکسنگ کونسل (ڈبلیو بی سی) انٹرنیشنل رینکنگ فائٹ جیت لی۔ پاکستانی کھلاڑی نے پہلے راؤنڈ میں ہی مخالف کو ناک آؤٹ کرتے ہوئے فلائی ویٹ کیٹگری کی عالمی رینکنگ میں نمبر ون ہونے کا اعزاز برقرار رکھا۔محمد وسیم کی اپنے پروفیشنل کیریئر کی یہ آٹھویں فائٹ تھی جب کہ باکسر کارلوس کی یہ 44 ویں فائٹ تھی تاہم محمد وسیم نے عمدہ کھیل کا مظاہرہ کرتے ہوئے اپنے سے زیادہ تجربہ کار کھلاڑی کو شکست سے دوچار کیا۔ واضح رہے کہ کوئٹہ سے تعلق رکھنے والے محمد وسیم اپنی تمام انٹرنیشنل فائٹس میں ناقابل شکست رہے ہیں۔ 30 سالہ محمد وسیم کی رواں سال یہ تیسری فائٹ تھی اور انہوں نے جولائی میں پاناما کے ہی دو باکسرز ایوان ٹریجوس اور ایلیسر والڈیز کو دھول چٹائی تھی۔
ورلڈ باکسنگ کونسل کی عالمی رینکنگ میں محمد وسیم فلائی ویٹ کیٹیگری میں پہلے، میکسیکو کے باکسر فرانسسکو روڈریگوئز جونیئر دوسرے اور برطانوی باکسر اینڈریو سیلبی تیسرے نمبر پر ہیں۔ محمد وسیم یہ اعزاز حاصل کرنے والے پہلے پاکستانی باکسر ہیں۔ خیال رہے کہ محمد وسیم پروفیشنل باکسر بننے کے بعد امریکہ کے شہر لاس ویگس میں مقیم ہیں جہاں وہ مشہور باکسر فلائیڈ مے ویدر کے ٹریننگ سینٹر میں ٹریننگ کرتے ہیں اور فلائیڈ مے ویدر کے چچا جیف مے ویدر ان کےٹرینر ہیں۔
محمد وسیم کے پروموٹر کا کہنا تھا کہ باکسر کی نظریں گولڈ فلائی ویٹ ورلڈ چیمپیئن بننے پر مرکوز ہیں اور وہ موجودہ عالمی چیمیپئن جاپان کے ڈیاگو ہیگا کو چیلنج کرنے کا ارادہ رکھتے ہیں۔

فرانس (میڈیا پاکستان) چیمپئنر لیگ میں پیرس سینٹ جرمین کلب نے جرمنی کی بائرن میونخ کو صفر کے مقابلے میں تین گول سے ہرا دیا ۔سٹرائیکر نیمار نے شاندار کھیل کا مظاہرہ کیا ۔ چیمپئنز لیگ کا چیمپئنز مقابلہ فرانس میں ہوا جہاں پیرس سینٹ جرمین اور بائرن میونخ کلب آپس میں مدمقابل ہوئے ۔
میزبان ٹیم میچ کے دوران حریف پر چھائی رہی ۔ پہلا گول کھیل کے دوسرے منٹ میں ڈانی نے سکور کیا ۔ اکتیسویں منٹ میں کیوانی نے گیند کو جال میں پھینکا ۔