Category کھیل

ابوظبی(میڈیا پاکستان) ابوظبی ٹیسٹ میں آئی سی سی کے نئے قوانین کا بھی ڈیبیو ہوگیا، نئے قواعد و ضوابط کے مطابق امپائرز کو میدان میں کوڈ آف کنڈکٹ کی خلاف ورزی کرنے والے کھلاڑی کو باہر بھیجنے اور حریف ٹیم کو پنالٹی رنز دینے کا اختیار حاصل ہے،اگر کپتان کھلاڑی کو گراؤنڈ سے باہر بھیجنے سے انکار کرے تو امپائر حریف ٹیم کو فاتح قرار دے سکتا ہے،اننگز کے 80اوورز مکمل ہونے پر مزید ریویوز نہ دینے کی پالیسی کا بھی پہلی بار اس میچ میں ہی اطلاق ہوا۔پاکستان اپنے دونوں ریویوز ضائع کرنے کے بعد کسی فیصلے کو چیلنج کرنے کے حق سے محروم ہوچکا،نئے قانون کا البتہ اسے ایک فائدہ ہوا جب سرفراز احمد نے یاسر شاہ کی گیند پر ڈکویلا کیخلاف ایل بی ڈبلیو کیلیے ریویو لیا،اگرچہ امپائر کا فیصلہ تبدیل نہیں ہوا اور بیٹسمین وکٹ بچانے میں کامیاب ہوئے لیکن گیند وکٹوں سے ٹکراگئی تھی، اس لیے پاکستان کا ریویو ضائع نہیں ہوا، پرانے قانون کے تحت مسترد ہونے والا ہر ریویو بے کار چلا جاتا تھا۔دریں اثنا حارث سہیل پاکستان کی جانب سے ٹیسٹ ڈیبیو کرنے والے 229 ویں پلیئر بن گئے۔
ابوظبی میں سری لنکا کیخلاف سیریز کا پہلا میچ شروع ہونے سے قبل اظہر علی نے نوجوان بیٹسمین کو ٹیسٹ کیپ پہنائی، دیگر پلیئرز نے انھیں مبارکباد دیتے ہوئے نیک خواہشات کا اظہار کیا۔
اس سے قبل آل راؤنڈر نے پاکستان کی جانب سے 22 ون ڈے انٹرنیشنلز میں43 کی اوسط سے 7 نصف سنچریوں سمیت774 رنز بنائے اور9 وکٹیں بھی حاصل کی ہیں۔ 4ٹی ٹوئنٹی میچز میں انھوں نے 45 رنز اسکور کیے ہیں۔ پاکستان کی پلیئنگ الیون سرفراز احمد(کپتان) ، شان مسعود، سمیع اسلم، اظہرعلی، اسد شفیق، بابراعظم،حارث سہیل،یاسر شاہ، محمد عامر، محمد عباس اور حسن علی پر مشتمل ہے۔ سری لنکن ٹیم میں دنیش چندیمل (کپتان)،کوشل سلوا، ڈیموتھ کرونارتنے، کوشل مینڈس، لاہیرو تھریمانے، نیروشن ڈکویلا، دلروان پریرا، رنگنا ہیراتھ، سورنگا لکمل، لکشان سندکان اور نوان پرادیپ کو شامل کیا گیا۔

ابوظہبی(میڈیا پاکستان) پاکستان کے خلاف ٹیسٹ سیریز کے پہلے میچ کے دوسرے دن سری لنکا کی اننگز جاری ہے۔ابوظہبی کے شیخ زید کرکٹ اسٹیڈیم میں پاکستان اور سری لنکا کے درمیان کھیلی جارہی ٹیسٹ میچوں کی سیریز کے پہلے میچ کے دوسرے دن کا کھیل جاری ہے۔ سری لنکا نے 227 رنز4 کھلاڑی آؤٹ سے دوبارہ اپنی پہلی اننگز کا آغاز کیا تو کریز پر چندی مل 60 جب کہ ڈک ویلا 42 رن پر موجود تھے، دونوں کھلاڑیوں نے اننگز کا آغاز کیا۔ سری لنکا کے کھلاڑی سست روی سے اپنی اننگز کو آگے بڑھا رہے ہیں۔اس سے قبل گزشتہ روز سری لنکن ٹیم نے ٹاس جیت کر پہلے بیٹنگ کا فیصلہ کیا تو61 رنز پر ان کی 3 وکٹیں گرگئیں، کوشل سلوا 12، کوشل مینڈس10 جب کہ لاہیرو تھریمانے بغیرکوئی رن بنائے پویلین لوٹے، جس کے بعد کپتان دنیش چندیمل اورکرونارتنے نے چوتھی وکٹ کی شراکت میں محتاط اندازمیں سکورآگے بڑھایا تاہم کرونا رتنے 161 کے مجموعی اسکورپربدقسمتی سے رن آﺅٹ ہوگئے اور 7 رنزکے فرق سے سنچری مکمل نہ کر سکے۔ پہلے روز کھیل کے اختتام پر مہمان ٹیم نے 4 وکٹ پر227 رنز بنا لئے ہیں۔ کپتان دنیش چندیمل 60 اور نیروشن ڈکویلا 42 پر ناقابل شکست ہیں۔
پاکستان کی جانب سے لیگ سپنر یاسر شاہ سب سے کامیاب بولر رہے اور 59 رنز دیکر 2 شکار کئے، حسن علی نے 58 کے بدلے میں ایک وکٹ حاصل کی، محمد عامر39، محمد عباس 43 اور حارث سہیل 14 رنز دیکرکوئی کامیابی حاصل نہیں کر پائے،شان مسعود اور اسد شفیق نے بھی ایک ایک اوور کروایا۔ پاکستان کی ٹیم دونوں ریویوز سے فائدہ نہ اٹھا سکی، نئے قوانین کے مطابق اب پہلی اننگز میں پاکستان کو مزید ریویو دستیاب نہیں ہوں گے۔
واضح رہے کہ پاکستان اور سری لنکا کے درمیان ٹیسٹ سیریز 2 میچوں پر مشتمل ہے۔

دبئی(میڈیا پاکستان) سری لنکا کے خلاف ٹیسٹ سیریزمیں فتح سے بھی پاکستانی رینکنگ پوزیشن پر اثر نہیں پڑے گا۔پاکستانی ٹیم اس وقت ٹیسٹ رینکنگ میں 93 پوائنٹس کے ساتھ چھٹے نمبر پر موجود ہے، اگر وہ جمعرات سے شروع ہونے والی 2 ٹیسٹ میچز کی سیریز میں سری لنکا پر کلین سوئپ فتح پائے تو اس کو ایک ساتھ 4 پوائنٹس میسر آئیں گے، جس سے مجموعی پوائنٹس بالترتیب چوتھے اور پانچویں نمبر پر موجود نیوزی لینڈ و آسٹریلیا کے برابر 97 ہوجائیں گے، البتہ اعشاریائی پوائنٹس کی وجہ سے گرین کیپس کو بدستور چھٹے نمبر پر ہی رہنا پڑے گا۔
اگر ابوظبی اور پھر دبئی میں کھیلے جانے والے ان ٹیسٹ میچز میں سے کسی ایک میں بھی ناکامی کا منہ دیکھنا پڑا اور دوسرا ڈرا ہو گیا تو پھر پاکستانی ٹیم ساتویں نمبر پر چلی جائے گی، اس کی جگہ سری لنکا چھٹا نمبر سنبھال لے گا۔ پاکستان اگر 1-0 سے فتح پائے تو اس کے پوائنٹس 95 ہوجائیں گے، سیریز ڈرا ہونے پر ایک پوائنٹ کی کٹوتی کا سامنا کرنا پڑے گا تاہم پھر بھی سری لنکا پر 2 پوائنٹس کی برتری موجود رہے گی۔
سری لنکا کی سیریز میں کسی بھی مارجن سے کامیابی گرین کیپس کے ساتویں نمبر پر تنزلی کا باعث بنے گی۔ دوسری جانب جمعرات سے ہی پوشف اسٹروم میں جنوبی افریقہ اور بنگلہ دیش کے درمیان 2میچز کی سیریز شروع ہورہی ہے، اگر بنگلادیش اس سیریز کو برابر کرے تو وہ ویسٹ انڈیز کی جگہ آٹھویں نمبر پر آجائے گا،اگر جنوبی افریقہ ہارا تو پھر اسے دوسری پوزیشن سے ہاتھ دھونا پڑسکتا ہے تاہم اس صورت میں انگلینڈ اس کی جگہ سنبھال لے گا۔

ابو ظہبی(میڈیا پاکستان) ٹیسٹ سیریز کے پہلے میچ میں پاکستان کے خلاف سری لنکا کی بیٹنگ جاری ہے۔پاکستان اور سری لنکا کے درمیان 3 ٹیسٹ میچوں کی سیریز کا پہلا ٹیسٹ ابوظہبی کے شیخ زید اسٹیڈیم میں کھیلا جارہا ہے، سری لنکن ٹیم نے ٹاس جیت کر پہلے بیٹنگ کا فیصلہ کیا ہے اور پاکستان کے خلاف اس کی بیٹنگ جاری ہے، سری لنکن کپتان دنیش چندی مل کا کہنا تھا کہ گزشتہ کئی ماہ سے ٹیم کی کارکردگی اچھی نہیں رہی تاہم امید ہے کہ ٹیم اس بار اچھی کارکردگی کا مظاہرہ کرے گی۔
قومی ٹیسٹ ٹیم کے کپتان سرفراز احمد نے کہا کہ اگر ٹاس جیت جاتے تو ہم بھی پہلے بیٹنگ کو ترجیح دیتے، قومی ٹیم کی کپتانی بہت بڑا اعزاز ہے ٹیم میں لڑکوں نے بہت محنت کی۔
سری لنکا کے خلاف پہلے ٹیسٹ میں حارث سہیل کو ٹیسٹ کیپ دی گئی ہے جب کہ دیگر کھلاڑیوں میں سمیع اسلم، شان مسعود، اظہر علی، اسد شفیق، بابر اعظم، سرفراز احمد، یاسر شاہ، محمد عامر، محمد عباس اور حسن علی شامل ہیں، ٹیسٹ کیپ ملنے کے بعد حارث سہیل پاکستان کی جانب سے ٹیسٹ کھیلنے والے 229 ویں کھلاڑی بن گئے ہیں

ابوظبی(میڈیا پاکستان)سرفراز احمد ٹیسٹ ٹیم کی قیادت کرنے والے پاکستان کے پانچویں وکٹ کیپر ہوںگے، اس سے قبل امتیاز احمد، وسیم باری، راشد لطیف اور معین خان یہ اعزاز حاصل کرچکے ہیں۔کپتان سرفراز احمد کو اب تک 9 ون ڈے اور 11 ٹی ٹوئنٹی انٹرنیشنل میچز میں قیادت کا موقع ملا ہے، مصباح الحق کی ریٹائرمنٹ کے بعد انھیں ٹیسٹ ٹیم کا کپتان بھی بنا دیا گیا تھا، پہلی آزمائش مہمان سری لنکن ٹیم کیخلاف جمعرات کو ابوظبی میں شروع ہونے والے میچ میں ہوگی۔

دبئی(میڈیا پاکستان) آئی سی سی نے جھگڑالو کرکٹرز کو مزا چکھانے کیلیے ’ہتھکڑیاں‘ تیارکرلیں۔رواں برس کرکٹ قوانین کے سرپرست ادارے میریلیبون کرکٹ کلب (ایم سی سی)کی جانب سے کھیل میں نئے قوانین وضع کیے گئے تھے، ان کی بعد میں آئی سی سی کرکٹ کمیٹی اور بورڈ نے توثیق کردی تھی،اطلاق یکم اکتوبر سے ہونا تھا مگر آئی سی سی نے 28 ستمبر سے ہی نفاذ کا اعلان کردیا ہے، اس طرح پاکستان اور سری لنکا کے درمیان یو اے ای جبکہ جنوبی افریقہ اور بنگلہ دیش کے پوشف اسٹروم میں شروع ہونے والی ٹیسٹ سیریز میں بھی نئے قوانین کا اطلاق ہوگا۔میدان میں اترتے ہی اگر امپائر کو کسی بیٹسمین کے بیٹ کی موٹائی اور چوڑائی پر شک ہوا تو وہ گورننگ باڈی کی جانب سے فراہم کی جانے والے خصوصی گیج سے پیمائش کرینگے، کوئی بھی بیٹ 40 ایم ایم سے چوڑا اور 67 ایم ایم سے موٹا نہیں ہونا چاہیے۔ نئی پلیئنگ کنڈیشنز میں سب سے سخت سزا ان کھلاڑیوں کو ملے گی جو جان بوجھ کر حریف یا امپائر کو جسمانی ضرب لگائیں گے، جھگڑے گے یا لیول 4 کا کوئی بھی جرم کرینگے، انھیں فوری طور پر باقی میچ کیلیے میدان سے باہر کردیا جائیگا، لیول 1 سے 3 کی خلاف ورزی پر پہلے سے رائج سزائیں ہی دی جائیں گی۔
اب ٹیسٹ اور ون ڈے کے ساتھ ٹوئنٹی 20 میں بھی ڈی آر ایس کا استعمال ہوگا، اگر کسی ریویو پر تھرڈ امپائر کی جانب سے فیصلہ واپس فیلڈ امپائر کو بھیجا جاتا ہے جسے ’امپائر کال‘ کہتے ہیں تو پھر ریویو ضائع نہیں ہوگا،اب ایک ٹیسٹ اننگز میں 80 اوورز کے بعد دوبارہ نئے ریویو نہیں ملیں گے بلکہ ایک اننگز میں صرف 2 ہی ریویوز دیے جائیں گے۔ رن لینے یا اسٹمپ سے بچنے کی کوشش میں کوئی بیٹسمین خود یا بیٹ کو ایک بار کریز کے اندر پہنچا دے اور جس وقت گیند وکٹ سے ہٹ ہو اس کے پاؤں اور بیٹ زمین کو نہیں چھورہے ہوتے تب بھی وہ رن آؤٹ یا اسٹمپڈ نہیں ہوگا۔
حالیہ کچھ عرصے میں فیلڈرز باؤنڈری کے باہر جانے والی گیند کو وہاں سے اندر اچھالتے اور پھر واپس لوٹ کر کیچ کرلیا کرتے تھے، مگر اب نئے قوانین میں لازمی قرار دیا گیا ہے کہ فیلڈر کا باؤنڈری کے اندر رہتے ہوئے گیند کو پہلے ہاتھ سے جسم کا کوئی حصہ لگنا چاہیے بصورت دیگر وہ باؤنڈری ہی تصور ہوگی۔وکٹ کیپر کو انجری سے بچانے کیلیے اب بیلز اسٹمپس کے ساتھ بندھی ہوئی ہوں گی جو زیادہ دور تک نہیں اچھل پائیں گی تاہم ایسی اسٹمپس صرف میزبان بورڈ کی خواہش پر ہی استعمال کی جائیں گی۔ اگر بیٹسمین کے شاٹ پر گیند وکٹ کیپر یا فیلڈر کے ہیلمٹ سے لگ کر وکٹوں سے ٹکراتی ہے یا کوئی اسے تھام لیتا ہے تو وہ اسٹمپڈ یا کیچ ہی تصور ہوگا، یوں بیٹسمین کو پویلین واپس جانا پڑے گا۔ اب جان بوجھ کر فرنٹ فٹ نوبال کو بے ایمانی تصور کیا جائے گا اور بولر کو فوری طور پر باقی اننگز کیلیے بولنگ سے ہٹا دیا جائے گا۔

لاہور(میڈیا پاکستان) پاکستانی ہیڈ کوچ مکی آرتھر کو ابوظبی جاتے ہی سابق عظیم اسٹارز یونس خان اور مصباح الحق کی یاد ستانے لگی۔ہیڈ کوچ مکی آرتھر نے کہا کہ سری لنکا کو تینوں فارمیٹ میں باصلاحیت کرکٹرز کی خدمات حاصل ہیں، مہمان کرکٹرز کو یواے ای میں ہوم سیریز جیسی کنڈیشنز میسر ہوںگی، ٹیسٹ سیریز میں بھی وہ ہمارے لیے آسان حریف ثابت نہیں ہوں گے۔ انہوں نے کہا کہ مصباح اور یونس خان کی ریٹائرمنٹ کے بعد پاکستان ٹیم کے ایک نئے دور کا آغاز ہورہا ہے، میری اسکواڈ میں شامل کرکٹرز سے بات ہوئی ہے، تجربہ کار کھلاڑیوں کے بغیر نئے کپتان سرفراز احمد کی قیادت میں میدان میں اترنے والی ٹیم کیلیے اب ایک نیا چیلنج ہوگا، وکٹ کیپر بیٹسمین ٹیسٹ فارمیٹ میں بھی بہترین قائد ثابت ہوں گے۔مکی آرتھر نے کہا کہ ہم بہتر کمبی نیشن بنانے کیلیے کوشاں ہیں، ایک یا 2نئے کھلاڑی اپنے ٹیسٹ کیریئر کا آغاز کریں گے،ٹیم میں فی الحال فٹنس کا کوئی مسئلہ نہیں اور یاسر شاہ نے بھی بھرپور پریکٹس کی ہے۔ انھوں نے کہا کہ فی الحال پاکستان عالمی رینکنگ میں چھٹے نمبر پر ہے۔ 2019میں دورئہ جنوبی افریقہ کو سامنے رکھتے ہوئے ایک متوازن اسکواڈ تشکیل دینے کی کوشش کرینگے۔
یونس خان اور مصباح الحق کا خلا پُرکرنے کے امیدواروں حارث سہیل اور عثمان صلاح الدین کے حوالے سے ہیڈ کوچ نے کہا کہ ان کھلاڑیوں کیلیے متبادل کا لفظ استعمال کرنا مناسب نہیں،گزشتہ سال شاندار کارکردگی کا مظاہرہ کرنے والے اظہر علی، اسد شفیق اور کسی حدتک بابر اعظم کو رنز بنانے کی ذمہ داری اٹھانا ہوگی، دیگر بیٹسمین ناتجربہ کار اور اس پوزیشن میں ہیں جہاں 2 سال قبل اسد شفیق اور ایک سال قبل بابر اعظم تھے۔
مکی آرتھر نے کہا کہ ہم ہر سیریز جیتنا چاہتے ہیں،نئے دور میں نیا ٹیلنٹ ٹیم میں شامل کرتے ہوئے انھیں چیلنجز کیلیے تیار کرنا بھی ایک منفرد تجربہ ہوتا ہے جس کیلیے میں انتہائی پُرجوش ہوں،ہمیں نئی پلاننگ اور کمبی نیشن میں تبدیلیوں کی ضرورت پڑ سکتی ہے،امید ہے کہ پلیئرز توقعات پر پورا اتریں گے۔
یاد رہے کہ گزشتہ سال ٹیسٹ کرکٹ میں پاکستان کے سب سے کامیاب بیٹسمین اظہر علی بطور اوپنر کھیلتے رہے،ان کی جانب سے یونس خان کا خلا پُرکرنے کیلیے سمیع اسلم اور شان مسعود کو اوپننگ کیلیے بھیجا جا سکتا ہے، بعد ازاں مڈل آرڈر میں مصباح الحق کی جگہ لینے کیلیے حارث سہیل یا عثمان صلاح الدین کی ضرورت پڑے گی،اس صورتحال میں حارث کو ٹیسٹ ڈیبیو کرائے جانے کا امکان زیادہ ہے، یواے ای میں سلو لیفٹ آرم بولر کے طور پر بھی ان کی خدمات ٹیم کیلیے مفید ثابت ہوسکتی ہیں۔

لاہور(میڈیا پاکستان) سابق کپتان جاوید میانداد نے یورپی ٹیموں کو پاکستان بلانے کی تجویز پیش کردی۔جاوید میانداد نے کہا ہے کہ لاہور میں ورلڈ الیون کیخلاف آزادی کپ سیریز اور بعد ازاں میرانشاہ میں پیس کپ میچ کا انعقاد بڑا خوش آئند ہے، ملک میں انٹرنیشنل کرکٹ کی واپسی کا راستہ بنتا جا رہا ہے،اگلے مرحلے میں یورپی ٹیموں کو بلانا چاہیے، پی سی بی اس مقصد کیلیے سابق کرکٹرز کی خدمات حاصل کرے تو زیادہ مثبت پیش رفت ہوگی۔
سابق کپتان نے کہا کہ ملک میں انٹرنیشنل کرکٹ کی بحالی کیلیے پاک فوج کا کردار قابل ستائش ہے،فورسز نے پہلے لاہورمیں آزادی کپ میچز کے کامیاب انعقاد میں بھرپور معاونت کی،اس کے بعد میرانشاہ میں زبردست میچ ہوا، قوم نے اپنے عزم سے دہشت گردی کو شکست دی ہے،میرانشاہ کے عوام نے شاید اپنی زندگیوں میں پہلی بار قومی کرکٹرز کو میدان میں کھیلتے ہوئے دیکھا ہے۔
جاوید میانداد نے کہا کہ دونوں ایونٹس سے دنیا بھر میں پیغام گیاکہ پاکستان کھیلوں کیلیے ایک محفوظ ملک ہے،ورلڈ الیون اور یوکے میڈیا ٹیموں میں شامل کھلاڑی ہمارے ملک کے بارے میں مثبت تاثر لے کر واپس گئے۔
سابق کپتان نے کہا کہ ہماری افواج ملک میں امن وسلامتی کیلیے دشمن قوتوں سے نبرد آزما ہیں،انٹرنیشنل کھیلوں کی بحالی میں بھی ان کا کردار ناقابل فراموش ہے۔

لاہور(میڈیا پاکستان) قومی کرکٹ ٹیم کے چیف سلیکٹر انضمام الحق کا کہنا ہے کہ اللہ کا شکر ہے کہ 10،9 سال میں کالے بادل چھٹ گئے اور ملک میں کرکٹ کے دروازے کھل گئے ہیں۔پاکستان اور سری لنکا کے درمیان ٹیسٹ سیریز کے لوگو کی تقریب رونمائی کا انعقاد کیا گیا۔ اس موقع پر چیف سلیکٹر انضمام الحق اور دیگر بھی موجود تھے۔
بعدازاں پریس کانفرنس کرتے ہوئے چیف سلیکٹر انضمام الحق نے کہا کہ اللہ کا شکر ہے کہ 10،9 سال میں کالے بادل چھٹ گئے اور ملک میں کرکٹ کے دروازے کھل گئے ہیں جب کہ نجم سیٹھی انٹرنیشنل کرکٹ کی بحالی کیلئے کوشش کررہے ہیں۔ انہوں نے کہا کہ سری لنکا اور ویسٹ انڈیز کی ٹیمیں بھی پاکستان آئیں گی، پورا پاکستان ساتھ دینے کے لیے تیار ہوگا کیوں کہ سب کا اس میں کردار ہے۔
واضح رہے کہ قومی ٹیم آئی لینڈرز کے خلاف ٹیسٹ سیریز کھیلنے دبئی پہنچ چکی ہے، گرین شرٹس 28 ستمبر کو ابو ظہبی میں پہلا ٹیسٹ میچ کھیلیں گے، دوسرا ڈے اینڈ نائٹ ٹیسٹ 6 اکتوبر سے دبئی میں کھیلا جائے گا۔ قومی ٹیم سری لنکا کے خلاف 5 ون ڈے میچز اور 3ٹی ٹوئنٹی میچز بھی کھیلے گی۔

لاہور(میڈیا پاکستان) سری لنکا کے خلاف تینوں طرز کی کرکٹ میں رنگ جمانے کیلیے شاہینوں نے متحدہ عرب امارات کی سرزمین پر اپنے پنجے گاڑ دیے، باقاعدہ ٹریننگ کا آغاز پیر سے ہوگا۔کپتان سرفراز احمد نے حریف سائیڈ کیلیے خطرے کے گھنٹی بجاتے ہوئے کہا ہے کہ ہر کپتان کی کوشش ہوتی ہے کہ پہلے میچ میں کامیابی کے ساتھ فاتحانہ آغاز کرے، میری خواہش ہے کہ پہلے میچ میں سنچری اسکور کرتے ہوئے قیادت کا حق ادا کروں، ادھر سابق ٹیسٹ کپتان مصباح الحق نے گرین کیپس کو مشوروں سے نوازتے ہوئے کہا ہے کہ ٹیسٹ کرکٹ میں صبر اور برداشت بہت ضروری ہے، طویل طرز کی کرکٹ میں سرفراز الیون کو صبر کا دامن ہاتھ سے نہیں چھوڑنا چاہیے۔ تفصیلات کے مطابق سری لنکا کے خلاف ٹیسٹ، ون ڈے اور ٹی 20 سیریزکھیلنے کیلیے قومی کرکٹ ٹیم سرفراز احمد کی قیادت میں متحدہ عرب امارات پہنچ گئی۔ قومی کرکٹ ٹیم ہفتے کی رات نیشنل کرکٹ اکیڈمی سے علامہ اقبال انٹرنیشنل ایئرپورٹ لاہور پہنچی۔
جہاں سے صبح غیر ملکی پرواز کے ذریعے دبئی پہنچی، یو اے ای روانہ ہونے والوں میں 16 کھلاڑی اظہر علی، شان مسعود، سمیع اسلم، بابر اعظم، اسد شفیق، حارث سہیل، سرفراز احمد (کپتان)، عثمان صلاح الدین، محمد عامر، حسن علی، محمد اصغر، یاسر شاہ، محمد عباس، بلال آصف، میر حمزہ اور وہاب ریاض شامل ہیں، ہیڈ کوچ مکی آرتھر سمیت 9 آفیشلز بھی ٹیم کے ہمراہ تھے۔
پاکستان کرکٹ ٹیم دبئی پہنچی تو وہاں موجود مداحوں نے قومی کرکٹرز کا پرتپاک استقبال کیا اوران کے ساتھ سیلفیاں بھی بنائیں، اس موقع پر ایک صحافی نے ان سے سیریز کے حوالے سے سوال کیا تو سرفراز احمد نے اپنے ’’اچھوتے اور منفرد انداز میں جواب دیتے ہوئے کہا ’’ جو کہیں گے، ایک ہی بار کہیں گے، یاد رہے کہ قومی کرکٹ ٹیم سری لنکا کے خلاف 2 ٹیسٹ، 5 ون ڈے اور 3 ٹی 20 میچز کی سیریز کھیلے گی، پاکستان اور سری لنکا کے درمیان پہلا ٹیسٹ 28 ستمبر کو ابوظبی میں شیڈول ہے، دوسرا ڈے اینڈ نائٹ ٹیسٹ 6 اکتوبر سے شروع ہوگا جب کہ دونوں ٹیموں کے درمیان 5 ون ڈے میچز بالترتیب 13، 16، 18، 20 اور 23 اکتوبر کو کھیلے جائیں گے۔ 3 ٹی ٹوئنٹی میچز 26، 27 اور 29 اکتوبر کو ہوں گے۔
ٹی ٹوئنٹی سیریز کی خاص بات یہ ہے کہ سیکیورٹی کلیئرنس ملنے کی صورت میں تیسرا اور آخری ٹوئنٹی20 میچ قذافی اسٹیڈیم لاہور میں کھیلا جائیگا۔ مزید معلوم ہوا ہے کہ سری لنکا کے خلاف ٹیسٹ سیریز کی تیاریوں کیلیے پاکستانی ٹیم اپنی باقاعدہ ٹریننگ کا آغاز پیر سے کرے گی، ابتدائی مرحلے میں پلیئرز کو فٹنس ٹریننگ کروائی جائے گی، بعد ازاں پلیئرز کے گیم میں مزید مہارت لانے کے لیے کوچز کی طرف سے خصوصی ڈرلز بھی کروائی جائیں گی۔ ادھر پاکستان ٹیم کے کپتان سرفراز احمد نے سری لنکن سائیڈ کے لیے خطرے کی گھنٹی بجاتے ہوئے کہا ہے کہ ہر کپتان کی کوشش ہوتی ہے کہ پہلے میچ میں کامیابی کیساتھ فاتحانہ آغاز کرے، میری خواہش ہے کہ پہلے میچ میں سنچری اسکور کرتے ہوئے قیادت کا حق ادا کروں، ان کا کہنا تھا کہ مجھے اپنے کھلاڑیوں پر مکمل بھروسہ ہے۔
آئی لینڈرز کے خلاف عمدہ کارکردگی کا مظاہرہ کرنے میں کامیاب رہیں گے، دریں اثنا قومی کرکٹ ٹیم کے سابق کپتان مصباح الحق نے گرین کیپس کو مفید مشوروں سے نوازتے ہوئے کہا ہے کہ ٹیسٹ کرکٹ میں صبر اور برداشت بہت ضروری ہے، سرفراز کو صبر کا دامن ہاتھ سے نہیں چھوڑنا چاہیے۔دوسری جانب سری لنکن کرکٹ ٹیم بھی اتوار کو دبئی پہنچ گئی، روانگی سے قبل تمام کھلاڑیوں نے اپنی مذہبی رسومات کے مطابق دعائیہ تقریب میں شرکت کی، مہمان ٹیم کی قیادت اس بار دنیش چندیمل کے سپرد ہے، انجرڈ ہوجانے کے سبب تجربہ کار آل راؤنڈر انجیلومیتھیوز سیریز کے پہلے میچ میں حصہ نہیں لے پائیں گے، تاہم ان کی دوسرے میچ میں شرکت کا امکان ظاہر کیا جارہا ہے۔