Category کھیل

لاہور(آن لائن)نیشنل ٹی ٹونٹی ٹورنامنٹ کے ٹیموں کے کپتانو ں کے ناموں کا اعلان کردیا گیا ہے ،سپاٹ فکسنگ کیس کے مرکزی کردار سلمان بٹ کے سر پر بھی قیادت کا تاج سج گیا ۔ تفصیلات کے مطابق چیمپئنز ٹرافی جیتنے والی قومی ٹیم اکتوبر تک کوئی انٹر نیشنل سیریز نہیں کھیلے گی جس کا فائدہ اٹھاتے ہوئے پاکستان کرکٹ بورڈ نے نیشنل ٹی ٹونٹی ٹورنامنٹ کروانے کا فیصلہ کیا ہے ۔ذرائع کے مطابق ٹورنامنٹ کو دو حصوں میں تقسیم کیا گیا ہے جس کا پہلا حصہ 25سے 31اگست تک ملتان اور دوسر احصہ4-10ستمبر تک فیصل آباد میں کھیلا جائے گا۔ایونٹ میں 8ٹیمیں شرکت کریں گی جن کے کپتانوں کے نام سامنے آگئے ہیں ۔ کراچی وائٹس کی کپتانی سرفراز احمد کے سپرد کی گئی ہے جبکہ فیصل آباد کی قیادت مصباح الحق کریں گے ، عثمان خان شنواری فاٹا،سلمان بٹ لاہور وائٹس،عمر امین راولپنڈی،محمد حفیظ لاہور بلیوز،محمد رضوان پشاور اور عماد وسیم اسلام آباد کی قیادت کریں گے ۔

پاکستان کرکٹ بورڈ کے نئے چیئر مین نجم سیٹھی نے کرسی پر بیٹھتے ہی قومی کرکٹ ٹیم کے فٹنس ٹرینر شان ہیز کی چھٹی کردی ،انہوں نے پریس کانفرنس میں بتایا کہ فٹنس ٹرینر شان ہیز کو فارغ کردیا گیا ہے ،ذرائع کا کہنا ہے کہ شان ہیز کیخلاف قومی ٹیم کے سینئر کھلاڑیوں نے شکایات درج کروائی تھیں کہ ٹرینر کا رویہ ٹھیک نہیں ہے جبکہ این سی اے میں جاری کیمپ کے دوران بھی کھلاڑیوں نے ان کے رویے کی شکایت کی تھی اور یواے ای میں ویسٹ انڈیز کیخلاف سیریز میں بھی وہ ریڈ لائن پر آئے تھے۔
نجم سیٹھی نے مزید کہا کہ ڈومیسٹک کرکٹ کے ڈھانچے کو مضبوط کرنے پر تمام تر توجہ مرکوز کررکھی ہے جس سے ٹیلنٹ ابھر کر سامنے آئے گا ،بھارت کیخلاف قانونی جنگ کے حوالے سے نجم سیٹھی کا کہنا تھا کہ یہ ایک اصولی لڑائی ہے جس سے ہم کسی صورت پیچھے نہیں ہٹ سکتے ،انہوں نے کہا بھارت نے بگ تھری بنتے وقت ہمارے ساتھ سیریز کھیلنے کا وعدہ کیا تھا لیکن پھر ٹال مٹول شروع کردی جس سے ہمیں بھاری مالی نقصان ہوا۔ عمران خان کی جانب سے تنقید کے سوال پر نجم سیٹھی نے کہا کھیل اور سیاست کو الگ رکھنا چاہیے میں اس بارے میں کچھ نہیں کہوں گا۔ انہوں نے کہا جسٹس قیوم رپورٹ پرانی بات ہے جن لوگوں کا رپورٹ میں تذکرہ ہے انہیں ہیرو عوام نے بنایا ہے ،انہوں نے مشورہ دیا کہ رپورٹ پر بات کرنے کے بجائے اس سے سبق سیکھ کر آگے بڑھا جائے۔

لاہور: پاکستان کرکٹ بورڈ کی جانب سے ٹیم کے فزیو تھراپسٹ شین ہیز کو ڈسپلن کی خلاف ورزیوں اور سینئر کھلاڑیوں کی شکایات پر ہٹا دیا گیا ہے۔
پی سی بی کے نو منتخب چیئرمین نجم سیٹھی نے اس بات کا اعلان اپنی پہلی پریس کانفرنس میں کیا۔ اُنہوں نے بتایا کہ دیگر غیر ملکی کوچز کے ساتھ معاہدے پورے کیے جا رہے ہیں۔ ذرائع کا کہنا ہے کہ شین ہیز کے خلاف متعدد بار ڈسپلن کی خلاف ورزی کی شکایتیں موصول ہوئیں تھیں۔
دوسری جانب پاکستان کے 2 سینئر کھلاڑیوں نے شین ہیز کے کام کے طریقہ کار پر شدید تحفظات کا اظہار کیا تھا۔ کھلاڑیوں نے مینجمنٹ سے درخواست کی تھی کہ شین ہیز کو تبدیل کیا جائے۔ ذرائع کا کہنا ہے کہ ہیڈ کوچ مکی آرتھر نے بھی شین ہیز کی حمایت سے انکار کر دیا تھا جس کے بعد اُنہیں فارغ کرنے کا فیصلہ کیا گیا ۔

(میڈیا پاکستان):یونیک گروپ کی جانب سے جشن آزادی کی مناسبت سے بوائز انٹرکیمپس بیڈمنٹن ٹورنامنٹ کا انعقاد کیا گیا۔ٹورنامنٹ میں شرکا نےجہاں کھیل انجوائے کیا،وہیں آزادی کے لیےلازوال قربانیوں کو ہمیشہ یاد رکھنے کا عزم بھی کیا گیا۔
پنجاب یونیورسٹی سپورٹس کمپلیکس میں یونیک گروپ کی جانب سےبوائزانٹر کیمپس بیڈمنٹن ٹورنامنٹ کا انعقاد کیا گیا۔ ٹورنامنٹ میں شہربھرسےیونیک کے70سےزائد طلباء نے شرکت کی۔
طلباءکاکہناتھاکہ جشن آزادی کواس سےزیادہ بہترین طریقے سے نہیں منایا جاسکتا۔انہوں نے اپنے سکول کی جانب سے ٹورنامنٹ کے انعقاد کو خوش آئند قرار دیا۔ جشن آزادی کے سلسلے میں یونیک گروپ کی جانب سے لڑکوں اور لڑکیوں کے لیئے مختلف کھیلوں کی سرگرمیاں 14 اگست تک جاری رہیں گی۔

پاکستان کرکٹ بورڈ (پی سی بی) نے دونوں ملکوں کےدرمیان سیاسی کشیدگی کے باعث ہندوستان میں ہونے والے انڈر19 ایشیا کپ کو دوسرے ملک منتقل کرنے پر زور دیتے ہوئے اس پر اعتراض کرنے کا فیصلہ کرلیا ہے۔
ہندوستان کو انڈر 19 ایشیا کپ کی میزبانی کے تمام حقوق تفویض کردیے گئے ہیں لیکن پی سی بی رواں ماہ 11 اگست اور 12 اگست کو ایشین کرکٹ کونسل (اےسی سی) کے دوروزہ اجلاس میں اس حوالے سے قرار داد لانے کو تیار ہے۔
پی سی بی کی ایگزیکیٹیو کمیٹی کے سربراہ اور بورڈ کے متوقع نئے چیئرمین نے کرک انفو کو ایک انٹرویو میں کہا ہے کہ ‘اس وقت پاکستان اے سی سی کا سربراہ ہے اور ہم 12 اگست کو کولمبو میں اس معاملے پر بات کریں گے’۔
واضح رہے کہ پی سی بی سابق چیئرمین شہریارخان اس وقت اےسی سی کے صدر ہیں۔
پی سی بی ذرائع کا کہنا ہے کہ پاکستان ٹورنامنٹ میں حصہ لینا چاہتا ہے لیکن ٹیم کو کسی غیرمتوقع صورت حال سے دوچار کرنا نہیں چاہتے۔
ان کا کہنا تھا کہ ‘ہندوستان اور پاکستان کے باہر بھی کئی محفوظ اورغیرجانبدار مقامات ہیں جہاں چیمپیئن شپ کھیلی جاسکتی ہے’۔
پی سی بی کے ایک عہدیدار کا کہنا تھا کہ ‘ہم اے سی سی کے ایک اہم رکن کی حیثیت سے ٹورنامنٹ کھیلنا چاہتے ہیں لیکن موجودہ صورت حال میں ہندوستان میں کھیلنا ممکن نہیں ہے’۔
انھوں نے کہا کہ ‘ویزا اور دیگر مسائل بدستور موجود ہیں اور ہم ٹورنامنٹ کے حوالے سے کوئی خطرہ مول لینا نہیں چاہتے’۔
انڈر-19 ایشیا کپ کا انعقاد رواں سال نومبر میں بنگلور میں ہوگا۔
دوسری جانب پی سی بی نے بی سی سی آئی کو 2014 میں ہونے والے معاہدوں کی پاسداری کے لیے بھی ایک نوٹس بھیج دیا ہے جس میں 2015 سے 2023 کےدوران دوطرفہ سیریز کی میزبانی پر معاہدے پر دستخط کیے گئے تھے۔
یاد رہے کہ پاکستان اور ہندوستان کی ٹیموں کے درمیان 13-2012 میں کھیلی گئی تین میچوں کی ایک روزہ سیریز کے بعد اب تک کوئی دو طرفہ سیریز نہیں کھیلی تاہم اس دوران دونوں ٹیمیں 8 مرتبہ مدمقابل ہوچکی ہیں۔

’’فواد عالم مستقبل میں قومی ٹیم کے کپتان بن سکتے ہیں، وہ بہت باصلاحیت کرکٹر ہیں‘‘ چند برس قبل چیئرمین پی سی بی شہریارخان کا یہ بیان شہ سرخی میں شائع ہوااور اسی کے ساتھ فواد کے بُرے دن شروع ہو گئے، ٹیم کی طاقتور شخصیات کو لگا کہ یہ ہمارے لیے ہی مسئلہ نہ بن جائے لہذا انھیں دانستہ نظر انداز کرنا شروع کر دیا گیا، پھر سلیکشن کمیٹی بھی اس کام میں شامل ہو گئی اور اب فواد بھولی بسری داستان بنتے جا رہے ہیں۔
ان کی عدم شمولیت پر انضمام الحق سب سے مضحکہ خیز جواز یہ دیتے ہیں کہ ’’پہلے والے چیف سلیکٹر نے بھی تو فواد کو نہیں لیا ان سے تو کسی نے نہیں پوچھا، ہم پر کیوں تنقید ہورہی ہے‘‘ ، اگر یہ بات مان لیں پھر تو شہریارخان کو آپ کو چیف سلیکٹر بھی نہیں بنانا چاہیے تھا کیونکہ پہلے والے کسی چیئرمین نے بھی آپ کو یہ ذمہ داری نہیں سونپی تھی،یہ بالکل غلط جواز ہے، ایک کھلاڑی اگر اچھا ہے تو اسے موقع دیں۔
اگر آپ سے پہلے والے لوگ اسے نظر انداز کر رہے تھے تو آپ اس غلطی کا ازالہ کریں، اسے دہرائیں تو نہیں، ان دنوں فواد عالم انگلش لیگ کھیل رہے ہیں، گزشتہ دنوں میری بات ہوئی تو محسوس ہوا کہ وہ اپنے ساتھ ہونے والی ناانصافیوں کے بعد اب بکھر سے گئے ہیں۔
اگر مزید چند ماہ یہ سلسلہ جاری رہا تو شاید وہ کھیلنا ہی چھوڑ دیں، یہ ملکی کرکٹ کے ساتھ بھی بڑی زیادتی ہوگی کہ ایک بہترین بیٹسمین محض کسی کی پسند ناپسند کی بھینٹ چڑھ جائے، فواد اتنا برا بھی نہیں کہ سینٹرل کنٹریکٹ کی کسی کیٹیگری میں بھی نہ آئے، سلیکٹرز کو بھانجوں،بھتیجوں کا نام یاد رہا مگر ملک کیلیے خدمات انجام دینے والے کو بھول گئے یہ کیسا انصاف ہے، مصباح الحق اور یونس خان کی ریٹائرمنٹ کے بعد پاکستان کو بیٹنگ آرڈر میں تجربہ کار کھلاڑیوں کی ضرورت پڑے گی۔
فواد میں یہ صلاحیت موجود ہے کہ ایک اینڈ روک کر طویل اننگز کھیل سکیں، وہ ڈیبیو ٹیسٹ میں سنچری بنا چکے، اب بھی ان میں بڑی کرکٹ باقی ہے،اسی سال پاکستان کپ میں 130 رنز کی اننگز بھی کھیل چکے،ایونٹ میں ان کی اوسط 81 تھی، اس سے صاف ظاہر ہے کہ ابھی ان میں بڑی کرکٹ باقی ہے،نت نئے تجربات کرنے کے بجائے آزما کر دیکھ لیں، ابھی کیمپ لگنے والا ہے۔
اس میں بلائیں،مکی آرتھر کو دکھائیں، اگر کارکردگی اچھی لگے تو موقع دیں، میں یا پاکستان کا کوئی بھی کرکٹ شائق یہ بات ماننے کو تیار نہیں ہوگا کہ فواد عالم ملکی کرکٹ کے ٹاپ30 کھلاڑیوں میں بھی نہیں آتا، مگر سلیکٹرز ایسا ہی سمجھ رہے ہیں، پہلے مصباح الحق نے فواد کو نظر انداز کیا اب دوسروں نے یہ کام سنبھال لیا ہے، فواد کو شاہد آفریدی سے دوستی کی وجہ سے بھی مسائل کا سامنا کرنا پڑا، جو لوگ آفریدی کا کچھ نہیں بگاڑ سکتے تھے انھوں نے فواد کو نقصان پہنچایا، اس کی یہ خامی ہے کہ اپنے کام سے کام رکھتا اور کسی گروپنگ کا حصہ نہیں بنا اس سے بھی مسئلہ ہوا اور بُرے وقت میں آواز اٹھانے کیلیے کوئی نہیں سامنے آیا۔
اب فواد32 سال کے بھی نہیں ہوئے مگر چیف سلیکٹر کو ایسا محسوس ہوتا ہے کہ 62 سال کے کوئی بابا جی ہو گئے جنھیں گھر پر پوتے پوتیوں کے ساتھ کھیلنا چاہیے ، حالانکہ یہی انضمام الحق 42 برس کے مصباح الحق اور 39 سالہ یونس خان کو بخوشی منتخب کرتے رہے،اب بھی ٹیم میں شامل اظہر علی فواد سے عمر میں بڑے ہیں، اسٹرائیک ریٹ بھی ان سے کم ہے مگر مصباح الحق کی سپورٹ نے انھیں کپتان تک بنوا دیا تھا، کبھی اوپنر، ون ڈاؤن تو مڈل آرڈر کہیں نہ کہیں فٹ کر کے ٹیم میں جگہ برقرار رکھی گئی، مگر فواد کے سر پر کسی بڑی شخصیت کا ہاتھ نہ تھا اس لیے آج اداس بیٹھے ہیں۔
سلیکٹرز کو جواب ضرور دینا چاہیے کہ آخر کس بنیاد پر فواد ان کو ناپسند ہیں، کیوں انھیں کیمپ کے 30،32 کھلاڑیوں میں بھی شامل نہیں کیا جاتا، آخر ان کا قصور کیا ہے، گزشتہ دنوں چیف سلیکٹر کی ایک قریبی شخصیت نے یہ بھی کہا کہ فواد کے نام سے بعض منفی باتیں جڑی ہیں۔ اگر ایسا ہے توانھیں عوام کے سامنا لانا چاہیے، اگر ثبوت سامنے آئے تو تاحیات پابندی لگا دیں میں خود اس کی حمایت کروں گا مگر میں نے جب اپنے طور پرایک بورڈ آفیشل سے پوچھا تو انھوں نے اس تاثر کو غلط قرار دیتے ہوئے گیند چیف سلیکٹر کے کورٹ میں ڈال دی۔
اگرفواد پر کوئی الزام ہے تو وہ فرسٹ کلاس کرکٹ کیوں کھیل رہے ہیں صرف قومی ٹیم میںآنے پر ہی کیوں پابندی ہے، کون سا راز ہے جسے حکام سینے میں دبائے بیٹھے ہیں؟اس قسم کے کئی سوالات سامنے آتے ہیں، بورڈ کو ان کی وضاحت کرنی چاہیے۔
فواد کی ٹیسٹ اور ون ڈے دونوں میں 40 سے زائد اوسط ہے، ایسا کسی عام کھلاڑی کے ساتھ نہیں ہوتا، ایشیا کپ و دیگر ایونٹس میں ان کی اننگز اب بھی شائقین کو یاد ہیں، لوگ مجھ سے پہلے عبدالرزاق کا پوچھتے رہتے تھے کہ انھیں کیوں نہیں کھلایا جا رہا، کب واپسی ہو گی، اب فواد عالم کے بارے میں سب سے زیادہ سوال ہوتے ہیں مگر افسوس میرے پاس ان کا کوئی جواب نہیں ہے، وقت تیزی سے گزرتا جا رہا ہے۔
میری انضمام الحق سے درخواست ہے کہ یا تو وہ صاف بات بتائیں کہ کیوں فواد کو منتخب نہیں کر رہے، کیا ذاتی رنجش یا کوئی اور بات ہے اسے عوام کے سامنے لائیں، یا پھر انھیں موقع دیں، آج کسی کے ساتھ ناحق زیادتی کریں گے تو کل اس کا خمیازہ بھی بھگتنا پڑے گا، میں توصیف احمد، وسیم حیدر وغیرہ کی بات نہیں کرتا یہ بیچارے تو ڈمی سلیکٹرز ہیں مگر انضمام توکچھ کریں، آج آپ چیمپئنز ٹرافی کی فتح پر ہواؤں میں اڑ رہے ہیں، مگر مظلوموں کی آہ نہ لیں،اب بھی وقت ہے اپنی غلطیاں سدھار لیں۔

لاہور: پاکستان کرکٹ بورڈ (پی سی بی) کے دو سابقہ چیئرمین نے بورڈ کے نئے چیئر مین کی تقرری کے لیے نجم سیٹھی کو بہترین امید وار قرار دے دیا۔
پی سی بی کے نئے چیئرمین کے انتخاب کے لیے رواں ہفتے الیکشن متوقع ہیں، جس کے لیے ایگزیکٹو کمیٹی کے موجودہ چیئرمین نجم سیٹھی نمایاں امید وار ہیں۔
ایک نجی ٹیلی وژن سے بات چیت کرتے ہوئے پی سی بی کے سابق چیئرمین خالد محمود نے پاکستان سپر لیگ (پی ایس ایل) کے انعقاد اور بورڈ کے دیگر انتظامی امور کو احسن طریقے سے چلانے پر نجم سیٹھی کی تعریف کی۔
ان کا کہنا تھا کہ’جب پہلی مرتبہ 2013 میں نجم سیٹھی سے میری ملاقات ہوئی تو وہ اس وقت میں ان سے کچھ زیادہ متاثر نہیں ہوا تاہم وقت کے ساتھ ساتھ ان کے لیے میری رائے تبدیل ہوئی‘۔
ان کا یہ بھی کہنا تھا کہ نجم سیٹھی نے اپنے آپ کو ایک بہترین منتظم کے طور پر منوایا ہے جس کی سب سے بڑی مثال دو مرتبہ پی ایس ایل کا انعقاد شامل ہے۔
پی سی بی کے سابق چیئرمین نے کہا کہ پی ایس ایل نے پاکستان میں نوجوان کھلاڑیوں کے لیے ایک بہترین پلیٹ فارم فراہم کیا اور آئی سی سی چیمپیئنز ٹرافی میں پاکستان کا نیا ٹیلنٹ نظر آیا۔
پی سی بی کے ایک اور سابق چیئرمین جنرل توقیر ضیاء نے بھی خالد محمود کے خیالات کو دہرایا اور نجی ٹیلی وژن پر گفتگو کرتے ہوئے انہوں نے نجم سیٹھی کو بورڈ کی سربراہی کے لیے بہترین امیدوار قرار دیا۔
ان کا کہنا تھا کہ ’نجم سیٹھی میری نظر میں پی سی بی کے امور چلانے کے لیے ایک بہترین امیدوار ہیں، اگر مجھے چیئرمین کی تقرری کے الکیشن میں نامزد کیا گیا تو میں نجم سیٹھی کے حق میں دستبردار ہو جاؤں گا۔‘
لیفٹیننٹ جنرل ریٹائر توقیر ضیاء نے کہا کہ پی سی بی اور پاکستان کرکٹ کے معاملات میں نجم سیٹھی کی گہری نظر ہے جو دن بدن مزید گہری ہوتی جارہی ہے، نجم سیٹھی کو ایک ایجنڈے کے تحت تنقید کا نشانہ بنایا جاتا رہا لیکن انہیں ان سب چیزوں سے پریشان ہونے کی ضرورت نہیں ہے۔

معین علی کی شاندار باؤلنگ کے باعث انگلینڈ نے جنوبی افریقہ کو چوتھے ٹیسٹ میچ میں 177 رنز سے شکست دے کر چار میچوں کی سیریز 1-3 سے اپنے نام کرلی۔
اولڈ ٹریفرڈ میں کھیلا میچ کھیل کے چوتھے روز ہی ختم ہوگیا، جبکہ جوئے روٹ کی قیادت میں یہ پہلی سیریز ہے جو انگلینڈ نے اپنے نام کی۔
جنوبی افریقہ کوآخری ٹیسٹ میں جیت کے لیے 380 رنز کا ہدف ملا لیکن اس کی پوری ٹیم چوتھے روز چائے کے وقفے کے فوری بعد 202 رنز پر ڈھیر ہوگئی۔
جنوبی افریقہ کی آخری دونوں وکٹیں معین علی نے دو گیندوں پر مورنے مورکل اور ڈُوانے اولیور کو آؤٹ کرکے حاصل کیں۔
اس طرح معین علی نے میچ میں 69 رنز کے عوض 5 جبکہ سیریز میں مجموعی طور پر 25 وکٹیں حاصل کیں۔
انگلینڈ کی یہ 1998 کے بعد جنوبی افریقہ کے خلاف ہوم ٹیسٹ سیریز میں پہلی کامیابی ہے۔
چوتھےروز کھانے کے وقفے تک جنوبی افریقہ کے 40 رنز پر 3 کھلاڑی آؤٹ تھے اور ہاشم آملہ اور کپتان فاف ڈوپلیسی کریز پر موجود تھے۔
دونوں کھلاڑیوں نے 123 رنز کی شاندار شراکت قائم کی اور ٹیم کے اسکور کو 163 پر پہنچایا لیکن پھر ہاشم آملہ 83 رنز بنا کر ایل بی ڈبلیو آؤٹ ہوگئے۔
یہ وہ موقع تھا جب جنوبی افریقہ کے ہاتھ سے میچ نکلنا شروع ہوا اور کوئی کھلاڑی زیادہ دیر تک کریز پر نہ رُک پایا۔
جنوبی افریقہ کی پانچویں اور چھٹی وکٹ 173 پر گری جب کوئنٹن ڈی کوک ایک اور تھونِس ڈی برون صفر پر پویلین لوٹے۔
183 کے مجموعی اسکور پر فاف ڈوپلیسی بھی ہمت ہار گئے اور 61 رنز کی اننگز کھیل کر وکٹوں کے پیچھے کیچ آؤٹ ہوئے۔
کگیسو ربادا ایک جبکہ مورنے مورکل اور ڈُوانے اولیور بغیر رن بنائے آؤٹ ہوئے۔
شاندار پرفارمنس پر معین علی مین آف دی میچ اور مین آف دی سیریز کے حقدار قرار پائے۔

بی سی سی آئی نے ٹویٹر پر ایشون کی ایک ویڈیو جاری کر دی جس میں وہ پریتی کا انٹرویو کر رہے ہیں، اس دوران دونوں کے درمیان دلچسپ باتیں ہوئی، پریتی نے بتایا کہ انھوں نے ایشون کو گال کے قلعے سے وکٹیں لیتے ہوئے دیکھا تھا، انھوں نے اپنا پسندیدہ وینیو میلبورن کرکٹ گراؤنڈ کو قرار دیا جبکہ ایشون کے پہلے انٹرنیشنل شکار کے بارے میں بھی درست جواب دیا۔
واضح رہے کہ کولمبو میں ان کی جانب سے شاندار پرفارمنس کا سلسلہ جاری ہے جبکہ کولمبو میں بھی میزبان سائیڈ پر کو انھوں نے خوب پریشان کیا

یونس خان نے پاکستان کرکٹ بورڈ سے عالمی کرکٹ کے لیے آگے آنے کی اپیل کی ہے۔
یونس خان نے کہا کہ پاکستان سپرلیگ کے میچوں کو ہر شہر میں ممکن بنایا جائے، جس نے وعدے پورے نہیں کیے ان کو بار بار یاد کرانا چاہیے۔
قومی کرکٹر نے سیاست پر بھی بات چیت کرتے ہوئے کہا کہ مجھے نہیں لگتا میرا سیاست میں کوئی مستقبل ہے۔
یونس خان کا کہنا تھا کہ کرپشن سے ملک اور ادارے متاثر ہوتے ہیں۔