Category کھیل

گوجرانوالہ میں ہونے والی آل پنجاب فٹ بال چمپئین شپ کا اعزاز سیالکوٹ کی ٹیم نے اپنے نام کر لیا، فائنل میچ میں لاہور کی ٹیم کو 2-1 سے شکست دی۔

گوجرانوالہ میں ہونے والے آل پنجاب فٹ بال چمپئین شپ کا فائنل میچ لاہور اور سیالکوٹ کی ٹیموں کے درمیان کھیلا گیا۔ میچ کے پہلے ہاف میں دونوں ٹیموں کی جانب سے سر توڑ کوششوں کے باجود کوئی گول سکور نہ ہوسکا۔ دونوں ٹیموں کے کھلاڑیوں نے میچ جیتنے کے لیے خوب محنت کر رکھی تھی، میچ دیکھنے کے لیے شائقین کی بھی بڑی تعداد موجود تھی۔

دوسرے ہاف میں دونوں ٹیموں کی جانب سے ایک ایک گول کیا گیا لیکن میچ کے آخری لمحات میں سیالکوٹ کی ٹیم نے ایک گول مزید کر کے 2-1سے لاہور کی ٹیم کو شکست دے دی، ٹورنامنٹ کے انعقاد سے کھلاڑی بہت خوش تھے۔

میچ کے اختتام پر کھلاڑیوں کی حوصلہ افزائی کے لیے انہیں ٹرافی اور نقد انعامات دیئے گئے۔

زخمی ہونے کے باعث انگلینڈ کے خلاف ون ڈے سیریز میں پاکستانی مڈل آرڈر بلے باز حارث سہیل کی شرکت پر سوالیہ نشان لگ گیا ہے۔

پاکستان کرکٹ بورڈ (پی سی بی) نے بیان جاری کرتے ہوئے کہا کہ انگلینڈ کے شہر ڈربی میں قومی کرکٹ ٹیم کی میزبان ٹیم انگلینڈ کے خلاف تین ون ڈے میچز اور ٹی ٹوئنٹی سیریز کے لیے پریکٹس جاری ہے۔

پی سی بی کے مطابق مڈل آرڈر بلے باز حارث سہیل اپنے دائیں پیر میں تاحال درد محسوس کر رہے ہیں، وہ شیڈول پریکٹس سیشنز میں بھی حصہ نہیں لے رہے، گزشتہ ہفتے زخمی ہونے کے بعد حارث سہیل انٹرا اسکواڈ پریکٹس میچ بھی نہیں کھیل سکے۔

انہوں نے مزید بتایا کہ بائیں ہاتھ کے بلے باز نے انجری سے بحالی کے لیے علاج شروع کردیا ہے، 6 جولائی کو کارڈِف میں ان کا ایم آر آئی اسکین کیا جائے گا جس کے بعد انہیں انگلینڈ کے خلاف ون ڈے میچز میں شامل کرنے کا فیصلہ کیا جائے گا۔

حارث سہیل اس سے قبل بھی زخمی ہونے کے باعث 2012 سے متعدد سیریز کا حصہ نہیں بن پائے ہیں، زخمی ہونے کے باعث وہ بھارت، افغانستان اور جنوبی افریقہ کے خلاف میچ نہیں کھیل سکے تھے۔

گزشتہ سال انہوں نے انگلینڈ کے دورے پر جانے سے انکار کردیا تھا، رپورٹس کے مطابق وہ کورونا کی صورتحال میں سفر نہیں کرنا چاہتے تھے۔

انگلینڈ اینڈ ویلز کرکٹ بورڈ (ای سی بی) کے مطابق تین کھلاڑیوں اور عملے کے 4 اراکین کا کورونا ٹیسٹ کا نتیجہ مثبت آگیا ہے۔

انگلینڈ کرکٹ بورڈ نے بتایا کہ برسٹل میں پی سی آر ٹیسٹ کرانے والے ون ڈے کے تین کھلاڑیوں اور انتظامی ٹیم کے چار ممبران نے کورونا وائرس کا مثبت تجربہ کیا۔

بیان میں کہا گیا کہ ’پبلک ہیلتھ انگلینڈ، پبلک ہیلتھ ویلز اور برسٹل لوکل ہیلتھ اتھارٹی کے اشتراک سے متاثرہ افراد 4 جولائی سے آئیسولیشن میں ہیں اور برطانوی حکومت کے قرنطینہ پروٹوکول پر عمل پیرا ہیں‘۔

ای سی بی کے بیان میں کہا گیا کہ ٹیم کے دیگر ممبران کو قریبی رابطے کی وجہ سے قرنچینہ میں رہیں گے۔

بیان میں کہا گیا کہ ’ای سی بی نے تصدیق کی ہے کہ پاکستان کے خلاف ون ڈے اور ٹی 20 سیریز آگے بڑھے گی، بین اسٹوکس انگلینڈ واپس آئیں گے اور ٹیم کی کپتانی سنبھالیں گے، ٹیم کا نام آئندہ چند گھنٹوں میں سامنے آجائے گا‘۔

بیان میں کہا گیا کہ آنے والا اسکواڈ اور سپورٹ ٹیم کے اراکین کیمپ میں محفوظ داخلے کو یقینی بنانے کے لیے پی سی آر ٹیسٹ اور برجنگ پروٹوکول پر عمل کریں گے۔

اس پیشرفت پر تبصرہ کرتے ہوئے ای سی بی کے سربراہ ٹام ہیریسن نے کہا کہ بورڈ کو کورونا وائرس کی ڈیلٹا قسم کے پھیلاؤ کا علم تھا۔

انہوں نے کہا کہ ’ہم نے پروٹوکول کو اپنانے کی کوشش میں ایک حکمت عملی کا انتخاب کیا تاکہ ہمارے کھلاڑیوں اور انتظامیہ کے عملے کی صحت بہتر رہے جنہوں نے گزشتہ 14 مہینوں کا بیشتر حصہ انتہائی پابندیوں میں گزارا ہے‘۔

ان کا کہنا تھا کہ ’ہم نے ایک نیا اسکواڈ پیش کرنے کے لیے تیز رفتاری سے کام کیا ہے اور ہم بین اسٹوکس کے مشکور ہیں جو کپتان کی ذمہ داری پر واپس آئیں گے‘۔

انہوں نے مزید کہا کہ ’ہم اس خبر کے ہماری فرسٹ کلاس کاؤنٹیز اور ان میں شامل کھلاڑیوں پر پڑنے والے اثرات کا علم رکھتے ہیں اور اس وبا سے نمٹنے میں ان کے اور ہمارے شراکت دار اسکائی اور رائل لندن کے تعاون کا شکریہ ادا کرتے ہیں’۔

واضح رہے کہ یہ پیش رفت ایسے وقت میں سامنے آئی ہے جب پاکستان کی قومی ٹیم, انگلینڈ کے دورے کی تیاری کر رہی ہے جس کے دوران پاکستانی کرکٹ ٹیم تین ون ڈے اور تین ہی ٹی 20 انٹرنیشنل میچز کھیلے گی۔

پہلا ون ڈے 8 جولائی کو کارڈف میں کھیلا جائے گا، دیگر میچز 10 جولائی کو لارڈز کرکٹ اسٹیڈیم اور 13 جولائی کو ایجبسٹن میں کھیلے جائیں گے۔

انگلینڈ نے نئے اسکواڈ کا اعلان کردیا
بعد ازاں ای سی بی نے پاکستان کے خلاف تین ون ڈے میچز کے لیے ایک نئے اسکواڈ کا اعلان کردیا۔

کرکٹ بورڈ نے کہا کہ ’بین اسٹوکس ٹیم کی کپتانی کے لیے ٹیم میں واپس آئیں ہیں اور کرس سلور ووڈ ہیڈ کوچ کے عہدے پر واپس آئے ہیں جبکہ 9 نئے کھلاڑی شامل کیے گئے ہیں۔

انگلینڈ کے منیجنگ ڈائریکٹر ایشلے گِلز نے کہا کہ ’یہ سب سے بڑے اسٹیج پر کھیلنے کا ایک بہت اچھا موقع ہے اور بیشتر کھلاڑیوں کے لیے یہ ضروری نہیں ہے کہ وہ 24 گھنٹے پہلے ایسی توقع کررہے ہوں‘۔

انہوں نے کہا کہ ’یہ کھلاڑیوں کا ایک دلچسپ گروپ ہے جس میں چند نوجوان کھلاڑی ہیں جو طویل عرصے سے ڈومیسٹک کرکٹ میں متاثر کن پرفارمنس دیتے رہے ہیں‘۔

ایشلے گِلز نے کہا کہ کرکٹ بورڈ نے پورے اسکواڈ اور انتظامی ٹیم کو تبدیل کرکے ’بے مثال کام‘ کیا ہے۔

انہوں نے کہا کہ ’میں اس موقع پر پر ای سی بی کی طرف سے پاکستان کرکٹ بورڈ کو معاملے کو سمجھنے اور تعاون کرنے پر شکریہ ادا کرنا چاہتا ہوں‘۔

انگلینڈ کے ون ڈے اسکواڈ میں بین اسٹوکس (کپتان)، جیک بال، ڈینی برِگز، برائیڈن کارسے، زیک کرولے، بین ڈوکیٹ، لیوس گریگوری، ٹام ہیلم، ول جیکس، ڈین لارنس، ثاقب محمود، ڈیوڈ ملان، کریگ اوورٹن، میٹ پارکنسن، ڈیوڈ پینے، فِل سالٹ، جان سمپسن اور جیمز ونس شامل ہیں۔

انگلینڈ کرکٹ بورڈ سے رابطے میں ہیں، پی سی بی
ادھر پی سی بی نے بیان جاری کرتے ہوئے کہا ہے کہ انگلینڈ کیمپ میں کورونا کیسز مثبت آنے کی خبر ملنے کے بعد سے پی سی بی اپنے کھلاڑیوں کی صحت اور حفاظت کے پیش نظر انگلینڈ اور ویلز کرکٹ بورڈ کے ساتھ رابطے میں ہے۔

بیان میں کہا گیا کہ پی سی بی، ای سی بی کے میڈیکل پینل کی یقین دہانی پر اطمینان کا اظہار کرتا ہے اور اپنے کھلاڑیوں کی صحت اور حفاظت کے لیے کیے جانے والے پروٹوکولز پر مطمئن ہے۔

ان کا کہنا تھا کہ پی سی بی اس سلسلے میں انگلینڈ میں موجود قومی کرکٹ ٹیم کی مینیجمنٹ کے ساتھ بھی مسلسل رابطے میں ہے اور انہیں ہوٹل اور اسٹیڈیم میں مزید احتیاطی تدابیر اختیار کرنے کی ہدایت کی گئی ہے۔

قومی ٹیم کے باولنگ کوچ وقار یونس نے محمد عامر کی پاکستان کرکٹ بورڈ کے چیف ایگزیکٹو سے ہوئی مبینہ ملاقات کے حوالے سے لاعلمی کا اظہار کرتے ہوئے کہا ہے کہ فاسٹ باؤلر کو انٹرنیشنل کرکٹ میں واپسی کے لیے ڈومیسٹک کرکٹ میں کارکردگی دکھانا ہوگی۔

برطانیہ سے ورچوئل پریس کانفرنس کرتے ہوئے وقار یونس نے بیٹنگ کوچ یونس خان کے مستعفی ہونے پر افسوس کا اظہار کرتے ہوئے کہا کہ یہ بدقسمتی کی بات ہے کہ اتنے اہم دورے سے چند دن قبل یونس خان نے بیٹنگ کوچ کے عہدے سے استعفیٰ دے دیا ہے لیکن ایسا نہیں ہونا چاہیے تھا۔

گزشتہ ماہ پاکستان کرکٹ بورڈ (پی سی بی) نے ایک بیان جاری کیا تھا جس میں اعلان کیا گیا تھا کہ پی سی بی اور یونس خان نے باہمی اتفاق رائے سے راہیں جدا کرنے کا فیصلہ کیا ہے۔

اس پیشرفت پر تبصرہ کرتے ہوئے پی سی بی کے چیف ایگزیکٹو وسیم خان نے کہا تھا کہ یونس جیسے قدآور اور تجربہ کار ماہر کی خدمات سے محرومی افسوسناک ہے۔

ان کا کہنا تھا کہ بات چیت کے سلسلے کے بعد ہم دونوں نے ہچکچاتے ہوئے لیکن باہمی اور دوستانہ انداز میں اس بات پر اتفاق کیا کہ اب مختلف سمت جانے کا وقت ہے۔

انہوں نے کہا تھا کہ میں مردوں کی قومی ٹیم کے بیٹنگ کوچ کے عہدے پر مختصر مدت کے لیے خدمات انجام دینے پر ان کا شکریہ ادا کرتا ہوں اور اُمید کرتا ہوں کہ وہ ابھرتے ہوئے کرکٹرز کے ساتھ اپنی وسیع معلومات شیئر کرنے کے لیے پی سی بی کی معاونت کرنے کو دستیاب ہوں گے۔

پی سی بی کے بیان میں مزید کہا گیا تھا کہ پاکستان مینز کی قومی کرکٹ ٹیم بغیر کسی بیٹنگ کوچ کے برطانیہ کا سفر کرے گی جبکہ دورہ ویسٹ انڈیز کے لیے یونس خان کے متبادل کے تقرر کا فیصلہ بعد میں کیا جائے گا۔

اس معاملے پر آج وقار یونس نے تبصرہ کرتے ہوئے کہا کہ پی سی بی اور یونس دونوں نے آپسی اختلافات پر وضاحتیں پیش کیں۔

باؤلنگ کوچ نے مزید کہا کہ یونس ایک بہت زیادہ مددگار فرد تھے اور ان کا کام کا طریقہ کار ہمیشہ اچھا رہا ہے۔

آل راؤنڈر حارث سہیل کے بین الاقوامی دوروں کے دوران اکثر انجری کا شکار ہونے کے حوالے سے سوال کے جواب میں وقار نے جواب دیا کہ یہ بھی بدقسمتی کی بات ہے، ورنہ ہم سب جانتے ہیں کہ وہ ایک عمدہ بلے باز ہیں۔

وقار سے جب انگلینڈ کے موسم کے بارے میں پوچھا گیا تو انہوں نے بتایا کہ یہ ٹیم کی بدقسمتی ہے کہ فی الحال موسم کی صورتحال پریکٹس کے لیے اچھی نہیں ہے لیکن باؤلر بہترین انداز میں ٹریننگ کررہے ہیں اور ساتھ ہی خصوصاً شاہین آفریدی اور حسن علی کی کارکردگی پر مکمل اطمینان کا اظہار کیا۔

ان کا کہنا تھا کہ ٹیم کو جب بھی موقع میسر آیا تو وہ آئندہ میچوں کے لیے بھرپور پریکٹس کرے گی۔

ٹی 20 ورلڈ کپ کے دوران باؤلرز سے وابستہ توقعات کے بارے میں پوچھے جانے پر انہوں نے جواب دیا کہ ٹی 20 فارمیٹ میں عمدہ کارکردگی کا مظاہرہ کرنے کے لیے لازم ہے کہ کھلاڑی فارم میں ہوں۔

وقار یونس نے اس بات کی نشاندہی کی کہ پاکستانی کھلاڑیوں نے حال ہی میں متحدہ عرب امارات میں پاکستان سپر لیگ کھیلی ہے اور انہیں وہاں پچوں کا اندازہ ہے لہٰذا میں توقع کرتا ہوں کہ فاسٹ باؤلرز اور اسپنرز دونوں ہی متحدہ عرب امارات میں شیڈول ٹی 20 ورلڈ کپ میں عمدہ کارکردگی کا مظاہرہ کریں گے۔

جب ان کی نشاندہی کی گئی کہ شاید یہ پہلا موقع ہے کہ کھیل کے تینوں فارمیٹ میں کوئی بھی پاکستانی باؤلر انٹرنیشنل رینکنگ کے سرفہرست باؤلرز میں شامل نہیں تو انہوں نے جواب دیا کہ اگر پاکستانی ٹیم میچز جیتنے کا سلسلہ برقرار رکھتی ہے تو رینکنگ خاص اہمیت کی حامل نہیں۔

انگلینڈ کے خلاف سیریز کے حوالے سے منصوبہ بندی کے حوالے سے انہوں نے کہا کہ ہم انگلینڈ کے کھلاڑیوں کے کھیل پر گہری نظر رکھے ہوئے ہیں اور اُمید ہے کہ ہم جو بھی منصوبے بنائیں گے ان کے اچھے نتائج برآمد ہوں گے۔

باولنگ کوچ نے محمد عامر کی پاکستان کرکٹ بورڈ کے چیف ایگزیکٹو سے رواں سال کے اوائل میں مبینہ طور پر ہوئی ملاقات کے حوالے سے لاعلمی کا اظہار کیا۔

پی سی بی چیف ایگزیکٹو وسیم خان کی گزشتہ سال انٹرنیشنل کرکٹ سے ریٹائر ہونے والے فاسٹ بولر محمد عامر سے ملاقات کے حوالے سے وقار یونس نے انکشاف کیا کہ انہیں بھی اس حوالے سے میٹیا کے ذریعے پتا چلا اور عامر سے ملاقات پی سی بی سربراہ کا حق ہے۔

انہوں نے واضح کیا کہ اس میں کوئی شک نہیں کہ عامر ایک اچھے کرکٹر ہیں لیکن اگر وہ ریٹائرمنٹ واپس لیں اور کرکٹ کھیل کر سلیکٹرز کو متاثر کرنا نہیں چاہتے تو پھر ان کی ٹیم میں واپسی مشکل ہے۔

ان کا کہنا تھا کہ یہ پاکستان کی کرکٹ ہے، یہ میری یا آپ کی کرکٹ ٹیم نہیں، اپنے ملک کے لیے کھیلنے کے لیے آپ کو درست انداز میں چیزیں کرنا ہوں گی، آپ کو یہ بات یاد رکھنی چاہیے کہ یہ فرنچائز کرکٹ نہیں۔

واضح رہے کہ محمد عامر نے گزشتہ سال قومی ٹیم مینجمنٹ کو مور الزام ٹھہراتے ہوئے انٹرنیشنل کرکٹ سے ریٹائرمنٹ لے لی تھی اور اس کے بعد سے ان کی جانب سے مستقل قومی ٹیم کی مینجمنٹ کے خلاف بیان بازی کا سلسلہ جاری ہے۔

اس بیان بازی کے برعکس عامر کی کارکردگی ہر گزرتے دن کے ساتھ گرتی جا رہی ہے اور ٹیسٹ کرکٹ سے علیحدگی اس سلسلے میں ان کے کچھ خاص کارگر ثابت نہ ہو سکی۔

فاسٹ باؤلر نے حال ہی میں پاکستان سپر لیگ میں کراچی کنگز کی نمائندگی کی تھی جہاں وہ 11 میچوں میں تقریباً 70 کی اوسط سے صرف 5 وکٹیں لے سکے تھے۔

تیسرے ٹی ٹوئنٹی انٹرنیشنل میچ میں ویسٹ انڈیز ویمنز ٹیم نے پاکستان ویمنز ٹیم کو 6 وکٹوں سے ہرا کر سیریز 0-3 سے اپنے نام کرلی۔

نارتھ ساؤنڈ میں کھیلے جانے والے میچ میں پاکستانی ویمنز پُر اعتماد بیٹنگ نہ کر سکیں، پو ری ٹیم 20 ویں اوور میں 102 رنز بنا کر آؤٹ ہو گئی۔

پاکستان کی جانب سے مبینہ علی 18، عالیہ ریاض 29 اور ندا ڈار 17 رنز کے سارتھ نمایاں رہیں۔

اننگز کے آخری اوور میں ویسٹ انڈیز کی بولر اسٹیفنی ٹیلر نے شاندار ہیٹ ٹرک کی اور میچ میں 4 کھلاڑیوں کو آؤٹ کیا۔

جواب میں پاکستانی بولرز نے ہوم ٹیم کی 3 کھلاڑیوں کو 17رنز پر پویلین پہنچا دیا لیکن پھر کپتان اسٹیفنی ٹیلر ڈٹ گئیں، پہلے اُن کا ساتھ چیڈن نیشن نے دیا، وہ 20رنز بنا کر آؤٹ ہو گئیں، پھر کپتان اور کیسیا نائٹ نے آخری اوور میں ہدف پورا کر دیا۔

اسٹیفنی ٹیلر 43 اور کیسیا 24 رنز بناکر ناٹ آؤٹ رہیں، میچ میں عمدہ کارکردگی دکھانے پر کپتان اسٹیفنی ٹیلر کو میچ کا بہترین کھلاڑی قرار دیا گیا۔

پاکستان سمیت 17 ملکوں نے انٹر نیشنل کرکٹ کونسل ( آئی سی سی) کے اگلے مینز سرکل (2031 -2024) کی میزبانی کے لیے درخواستیں جمع کروادی ہیں۔

درخواست دینے والے 17 ملکوں میں 10 آئی سی سی کے فل ممبرز آسٹریلیا، پاکستان، بنگلا دیش، انگلینڈ، بھارت،آئرلینڈ، نیوزی لینڈ، جنوبی افریقا، سری لنکا، ویسٹ انڈیز اور زمبابوے شامل ہیں جبکہ 7 ایسوسی ایٹ رکن میں ملائیشیا ، نمیبیا، عمان ، اسکاٹ لینڈ ، متحدہ عرب امارات اور امریکا شامل ہیں۔

آئی سی سی نے اگلے مینز سرکل کےایونٹس کیلئے17ممالک سےابتدائی درخواستیں ملنے کی تصدیق کردی ہے ۔

آئی سی سی کا کہنا ہے کہ ایونٹس کی میزبانی کیلئے17ممالک سے درخواستیں ملیں جن میں پاکستان بھی شامل ہے جبکہ ممبرز ممالک سے ملی درخواستوں پر پہلے مرحلے میں عمل کا آغاز کر دیا گیا ہے۔

آئی سی سی کے مطابق مینز وائٹ بال ایونٹس کے اگلے مینز سرکل کا آغاز 2023 کے بعد سے ہو گا جس میں اگلے 2 آئی سی سی ورلڈکپ، 4 ٹی ٹوئنٹی ورلڈ کپ اور 2 چیمپئنز ٹرافی شامل ہیں جبکہ ورلڈ ٹیسٹ چیمپئن شپ فائنل، ویمنز اور انڈر19 ایونٹس کا فیصلہ بعد میں ہو گا۔

آئی سی سی نے ٹی ٹوئنٹی ورلڈکپ بھارت سے یو اے ای منتقل ہونےکا عندیہ دیدیا

واضح رہےآئی سی سی نے رکن ممالک سے ایونٹس کی میزبانی میں اظہار دلچسپی کی درخواستیں طلب کی تھیں۔

یاد رہے 1996 ورلڈکپ کے بعد پاکستان نے کسی بھی آئی سی سی ایونٹ کی میزبانی نہیں کی ہے۔

دورہ ویسٹ انڈیز کے لیے اعلان کردہ قومی اسکواڈ میں شامل ٹیسٹ کرکٹرز7 جولائی سے کراچی میں ٹریننگ کا آغاز کریں گے۔ یہ دس روزہ کیمپ بائیو سیکیور ماحول میں لگایا جائے گا ۔

کیمپ مکمل کرنے کے بعد یہ تمام کھلاڑی 21 جولائی کو لاہور کے مقامی ہوٹل میں آئسولیشن کریں گے۔ قومی ٹیم26 جولائی کو بارباڈوس روانہ ہوگی۔

تربیتی کیمپ کی نگرانی ہیڈآف پلیئرز ڈویلمپنٹ ثقلین مشتاق کریں گے۔اس دوران نیشنل ہائی پرفارمنس سینٹر کے دیگر کوچز محمدیوسف ،مشتاق احمد ،عمر رشید اور عتیق الزمان بھی ان کی معاونت کریں گے۔ فزیوتھراپسٹ امتیاز احمد، اسٹرینتھ اینڈ کنڈیشنگ کوچ صبوراحمداورمساجر عمران سلطان بھی کیمپ میں شرکت کریں گے۔

اس کیمپ میں گیارہ ٹیسٹ کھلاڑیوں عابد علی، اظہر علی، فواد عالم،عمران بٹ،محمد عباس، نسیم شاہ،نعمان علی،ساجد خان،شاہنواز دھانی،یاسر شاہ اور زاہد محمود کے علاوہ چھ اضافی کھلاڑیوں کو بھی طلب کیا گیا ہے۔ ان چھ کھلاڑیوں میں عاکف جاوید، عرفان اللہ شاہ،میر حمزہ،محمد حسن، محمد عمر اور سیف اللہ بنگش شامل ہیں۔

کیمپ میں طلب کردہ 25 کھلاڑیوں، کوچز سمیت اور کیمپ میں شامل دیگر پانچ ارکان کی اتوار کے روز کویڈ 19 ٹیسٹنگ کی گئی، جس کے نتائج منفی آئے ہیں۔ یہ تیس ارکان اب منگل کو کراچی میں اکھٹےہوں گے جہاں ان کی دوسری کوویڈ 19 ٹیسٹنگ کی جائے گی۔

برسٹل: ٹام کرن نے سری لنکا کے خلاف ون ڈے میچ میں اپنے بھائی سیم کرن کے نقش قدم پر چلتے ہوئے بہترین باؤلنگ کا مظاہرہ کیا تاہم بارش ان کی اس عمدہ کارکردگی کو بہا لے گئی اور انگلینڈ تیسرے اور آخری ون ڈے انٹرنیشنل میں فتح اور سیریز میں کلین سوئپ سے محروم رہا۔

رپورٹ کے مطابق ٹی 20 سیریز 0-3 سے جیتنے کے بعد انگلینڈ ون ڈے سیریز میں بھی اسی طرح کے نتائج کا خواہشمند تھا اور انگلینڈ نے تیسرے ون ڈے میچ میں پوری سری لنکن ٹیم کو صرف 41.1 اورز میں ہی پویلین بھیج کر اس خواب کو تقریباً پورا کر لیا تھا لیکن بارش نے مداخلت کردی۔

سری لنکا کی پوری ٹیم صرف 166 رنز پر ڈھیر ہو گئی جس کے ذمے دار ٹام کرن تھے جنہوں نے 10 اوورز میں 35 رنز دے کر 4 وکٹیں لیں۔

اس سے قبل سیم کرن نے جمعرات کے روز اوول میں کھیلے گئے میچ میں 48 رنز دے کر 5 وکٹیں حاصل کی تھیں اور انگلینڈ نے یہ میچ 8 وکٹوں سے جیت لیا تھا۔

تاہم سری لنکا کی اننگز کے بعد اس سے پہلے انگلینڈ کی ٹیم بیٹنگ شروع کرتی، میچ میں تیز بارش کی آمد ہو گئی۔

یہ پہلا موقع تھا کہ ٹام کرن نے انٹرنیشنل کرکٹ میں انگلینڈ کے لیئے وکٹیں حاصل کیں جہاں اس سے قبل وہ مجموعی طور پر پانچ ٹی20 اور و ن ڈے میچوں میں 34 اوورز کرانے کے باوجود وکٹ لینے سے محروم رہے تھے۔

سری لنکا کی جانب سے صرف داسن شناکا نے بلے سے کچھ مزاحمت دکھائی اور 48 رنز بنا کر ناٹ آؤٹ رہے۔

سری لنکا کا ٹاپ آرڈر تقریباً 15 میچز سے مشکلات کا شکار ہے اور نئے بال پر تمام ہی بلے باز جلد پویلین لوٹ جاتے ہیں۔

کاؤنٹی گراؤنڈ میں بھی کچھ ایسا ہی ہوا اور 15 اوورز میں 63 رنز کے اسکور پر 5 وکٹیں گر گئی تھی، کرس ووکس اور ڈیوڈ وِلی نے ابتدائی وکٹیں حاصل کیں۔

کرس ووکس نے سری لنکا کے کپتان کوشل پریرا کو 9 رنز پر اسٹمپ آؤٹ کیا۔

ڈیوڈ ولی نے سیم کرن کے بعد نیا بال سنبھالا اور 2 اوورز میں 17 رنز دے کر ایوشکا فرنینڈو کو ایل بی ڈبلیو کردیا۔

اوول کے میدان پر 91 رنز بنانے والے دھننجیا ڈی سلوا میچ میں صرف 4 رنز بنا کر آؤٹ ہوگئے۔

پورے دورے کے دوران وکٹوں کے درمیان سری لنکن کھلاڑیوں کی رننگ کی صورتحال بہت بری رہی اور اس میچ میں ان کی اننگز 9 اوورز پہلے ہی ختم ہوگئی۔

یوں ایک میچ بارش کی نذر ہونے کی وجہ سے انگلینڈ نے 3 میچز کی سیریز میں 0-2 سے کامیابی حاصل کرلی۔

قبل ازیں چیسٹر لی اسٹریٹ انگلینڈ مییں کھیلے گئے میچ میں انگلینڈ نے 5 وکٹوں سے کامیابی حاصل کی تھی جبکہ اوول میں کھیلے گئے دوسرے میچ میں 8 وکٹوں سے فتح سمیٹی تھی۔

جاپان میں 23 جولائی کو شروع ہونے والے ٹوکیو گیمز سے قبل بہت سی غیر ملکی اولمپک ٹیمیں جاپان پہنچنا شروع ہو گئی ہیں۔

جاپانی نشریاتی ادارے کے مطابق حکومت جاپان کا کہنا ہے کہ 18 ممالک اور علاقہ جات کی اولمپک ٹیموں کے تقریباً 400 ارکان کی ملک میں آمد متوقع ہے۔

ٹوکیو کے قریب ناریتا ہوائی اڈے، ٹوکیو میں واقع ہانیدا ہوائی اڈے یا ناگویا کے قریب چُوبُو ہوائی اڈے پر پہنچنے کے بعد یہ ٹیمیں ملک بھر میں اُن مقامات کا رخ کریں گی جہاں کھیلوں سے قبل اِن کے کیمپ منعقد ہونا ہیں۔

گزشتہ روز امریکہ کی باکسنگ ٹیم کے 20 ارکان ناریتا پہنچے۔ انہوں نے کورونا وائرس انفیکشن سے بچنے کی کوشش میں ہوائی اڈے کے دیگر استعمال کنندگان کے رابطے میں آئے بغیر، داخلے کے طریقہ کار کے لئے مختص گزرگاہ کو استعمال کیا۔

برطانیہ سے کشتی رانی کی ایک ٹیم ہانیدا پہنچی اور توقع کی جا رہی ہے کہ وہ کاناگاوا پریفیکچر میں اپنے میزبان قصبے ’ہایاما‘ میں قیام کرے گی۔جاپانی حکام پر زور دیا جا رہا ہے کہ وہ بہت سی غیر ملکی ٹیموں کی آمد کے تناظر میں سرحدوں پر کنٹرول سمیت مختلف اقدامات کو استعمال کرتے ہوئے وائرس کے پھیلاؤ پر قابو پائیں۔

کوپا امریکا کپ میں برازیل کے اسٹرائیکر گیبریئل جیزز نے گیند کے حصول کی جدوجہد کے دوران چلی کے کھلاڑی کو فلائنگ کک مار دی جس پر انہیں ریڈ کارڈ دکھا کر میدان سے باہر بھیج دیا گیا۔

ریو دی جنیرو میں جمعہ کو چلی اور میزبان برازیل کے درمیان کھیلے گئے کوپا امریکا کپ کے میچ میں 1-0 کی فتح کی بدولت برازیل کی ٹیم سیمی فائنل میں پہنچنے میں کامیاب ہو گئی۔

میچ کے پہلے ہاف میں کوئی بھی ٹیم گول اسکور نہ کر سکی لیکن کھیل کے 46ویں منٹ میں برازیل نے گول اسکور کرکے برتری حاصل کی جو میچ کے اختتام تک برقرار رہی۔

البتہ میچ کے دوسرے ہاف کے تیسرے منٹ میں ایک واقعہ پیش آیا جس کے باعث برازیل کی ٹیم اپنے اہم اسٹرائیکر کی خدمات سے محروم ہو گئی۔

کوارٹر فائنل کے 48 ویں منٹ میں گیند چلی کے کھلاڑی یوجینیو مینا کے پاس جا رہی تھی اور گیند کے حصول کے لیے گیبریئل جیزز نے گیند کو فلائنگ کک مارنے کی کوشش کی لیکن اس وقت تک گیند نکل چکی تھی اور ان کی کک سیدھا چلی کے کھلاڑی کے منہ پر جا لگی اور وہ زمین پر ڈھیر ہو گئے۔

گیبریئل کو جیزز کو اس حرکت پر فوراً ریڈ کارڈ دکھا کر میدان سے باہر بھیج دیا گیا لیکن کھیل کے بقیہ 42 منٹ اہم کھلاڑی سے محروم ہونے کے باوجود برازیل کی ٹیم کامیابی سے دفاع میں کامیاب رہی اور 0-1 سے فتح حاصل کر لی۔

برازیل کے مشہور اسٹار نیمار اور کوچ ٹائٹ نے میچ کے بعد کہا کہ گیبریئل نے مینا کو نہیں دیکھا تھا اور مڈفیلڈ میں گیند حاصل کرنے کی جدوجہد میں حادثاتی طور پر انہیں کک مار بیٹھے۔

برازیل کے تھیاگو سلوا نے کہا کہ بہترین انداز میں دفاع ہمارے کھلاڑیوں کی اہم خوبی ہے، جو کچھ آج ہوا اس سے قطع نظر ہم پر ایک بھی گول نہیں پڑا، 10 کھلاڑی ہونے کے باوجود ہم نے گول کے مواقع بھی پیدا کیے اور ٹیم کی فائٹنگ اسپرٹ پر بہت فخر محسوس کرتا ہوں۔

نیمار نے کہا کہ ایک کھلاڑی سے محروم ہونے کے بعد یہ 10 کھلاڑیوں کے ساتھ کھیلنے والی برازیل کی ٹیم کا بہترین امتحان تھا۔

ان کا کہنا تھا کہ ہر میچ میں مختلف طرح کے امتحانات سے کامیابی سے گزرنے کے بعد ہم مزید مضبوط ہوتے جا رہے ہیں جو ہمیں یہ یقین فراہم کرتا ہے کہ ہم کسی بھی حال میں جیتنے کی صلاحیت رکھتے ہیں۔

ادھر میچ میں شکست کے بعد ٹورنامنٹ سے باہر ہونے والی چلی کی ٹیم کے آرٹیورو ویڈال نے پورے ایونٹ میں شاندار کھیل پر اپنی ٹیم کو خراج تحسین پیش کیا۔

ادھر ٹورنامنٹ میں پیرو کی ٹیم پیراگوئے کو شکست دے کر سیمی فائنل میں جگہ بنانے میں کامیاب ہو گئی جہاں اس نے مقررہ وقت میں مقابلہ 3-3 سے برابر ہونے کے بعد پینالٹی ککس پر فتح اپنے نام کی۔

2019 میں کھیلے گئے آخری کوپا امریکا کپ کا فائنل برازیل اور پیرو کے درمیان کھیلا گیا تھا جس میں برازیل نے 1-3 سے کامیابی حاصل کر کے چیمپیئن بننے کا اعزاز حاصل کیا تھا۔

یہاں یہ بات قابل ذکر ہے کہ 2019 میں ریو ماراکانہ اسٹیڈیم میں کھیلے گئے فائنل میچ میں بھی گیبریئل جیزز کو ریڈ کارڈ دکھا کر میدان سے باہر بھیج دیا گیا تھا۔