Category کھیل

کراچی یونیورسٹی کی طالبہ فاطمہ خان نے پاکستان فٹبال میں تاریخ رقم کردی.

فاطمہ خان نے ماشا یونائیٹڈ یوتھ کپ فٹبال ٹورنامنٹ کے افتتاحی میچ میں پاکستان کی پہلی خاتون میچ کمشنر ہونے کا اعزاز حاصل کرلیا، میچ میں ماشا یونائیٹڈ فٹبال اکیڈمی نے گلشن ساکر اکیڈمی کو 10 گول سے شکست دی۔

فیضان علی موسیٰ اور عزیر نے 2،2 گول کیے، افتتاحی تقریب کے مہمان خصوصی رانا محمد اشرف تھے۔ اس موقعع پر ناصر اسمعیل اور زاہد بلوچ سمیت دیگر بھی موجود تھے۔

پاکستان میں بیس بال کو فروغ دینے کے مشن کے تحت امریکن کوچ کی خدمات حاصل کر لی گئی ہیں۔

بیس بال ٹیم اور دیگر کھلاڑیوں کو کھیل کے اسرار ورموز سکھانے امریکن بیس بال کوچ برائن فرچز پاکستان پہنچ گئے ہیں۔

امریکی کوچ برائن فرچز قومی کیمپ میں کھلاڑیوں کو بیس بال کی جدید تکنیک سکھائیں گے۔

خبریں ہیں کہ پاکستان بیس بال فیڈریشن نے امریکی کوچ برائن فرچز سے ایک سال کا معاہدہ کیا ہے۔

ابتدائی طور پر برائن فرچز ایک ہفتے پاکستان میں قیام کرینگے، وہ اگست میں پھر سے پاکستان آئینگے اور ہیڈ کوچ کی ذمہ داری سنبھالیں گے۔

برائن فرچز کو پاکستان کے مختلف شہروں میں بیس بال کی اکیڈمیوں کا دورہ بھی کرایا جائے گا۔

فٹ بال کے بعد پاکستان چیس فیڈریشن پر بھی پابندی کے بادل منڈلانے لگے۔

فیڈے نے وارننگ لیٹر جاری کر دیا، جس کی وجہ 8 جولائی کو اسلام آباد میں ہونے و الے الیکشن کو روکنے کیلئے ایف آئی اے کی طرف سے فیڈے (فیڈریشن آف انٹرنیشنل چیس) کے مقرر کردہ کمشنر کو گرفتار کرنا اور پھر ان کو رہا کرنا بنا ہے۔

فیڈے حکام نے محمد سلیم کی گرفتاری اور رہائی پر شدید ردعمل ظاہر کیا ہے، گزشتہ روز فیڈے مینجمنٹ کی طرف سے جاری ہونے والے مراسلے میں پاکستانی حکام کو شدید الفاظ میں احتجاج کرتے ہوئے پاکستان چیس فیڈریشن کی معطلی اور پابندی کا عندیہ دے دیا ہے۔

جاری مراسلے میں کہا گیا ہے کہ پاکستان کے فوجداری سسٹم میں مداخلت کئے بغیر ہمیں اس بات سے زیادہ دلچسپی ہے کہ اس گرفتاری کا تعلق پاکستان چیس فیڈریشن کے الیکشن سے نا ہو اگر ایسا ہوا تویہ یقیناً پاکستان چیس فیڈریشن کیلئے بہت افسوس ناک ہوگا۔ اس سلسلے میں پاکستان چیس فیڈریشن کے ترجمان محمد وقار نے تصدیق کی ہے کہ فیڈے نے وارننگ لیٹر جاری کر دیا ہے۔

کرکٹر عمران نذیر کا کہنا ہےکہ ٹی ٹوئنٹی ورلڈکپ سے قبل کھلاڑیوں کو موقع دیں اگر یکدم ورلڈکپ میں کھلایا تو کھلاڑیوں پر دباؤ ہوگا۔

صحافیوں سے گفتگو کرتے ہوئے کرکٹر عمران نذیر نے کہا کہ تجربے کا کوئی نعم البدل نہیں ہے اور شعیب ملک اس وقت ٹیم کی ضرورت ہیں انہیں تو کپتان ہونا چاہیے، وہ دباؤ سے نمٹنا جانتے ہیں انہیں سنگلز لینے کا پتا ہے اور فٹنس بہت اعلی ہے، ان کے بارے کہا جاتا ہے کہ ان کی بال پر آنکھ پہلے جیسی نہیں رہی، انہوں نے ابوظبی میں جس طرح کی اننگز رات میں کھیلی وہ سب کے سامنے ہے، اگر کسی کو ان کی نظر کا مسئلہ ہے تو آئی ٹیسٹ لے لیں۔

انہوں نے کہا کہ ٹی ٹوئنٹی ورلڈ کپ سر پر ہے لیکن ابھی تک ٹیم کا نہیں پتا کونسی کھیلے گی، ابھی سے ٹیم بنائیں اور اسے اعتماد دے کر مستحکم کریں، یہاں کسی کو علم نہیں کہ کسے کہاں کھیلنا ہے جو ایک بار اوپننگ پر کامیاب ہو گیا اسے اوپنر بنا دیتے ہیں، ہر کھلاڑی کو اس کے نمبر کا علم ہوناچاہیے، شرجیل خان اور فخر زمان کو اوپنر ہونا چاہیے، بابراعظم کو ون ڈاؤن آنا چاہیے، ون ڈے میں محمد رضوان کو مڈل آرڈر میں آنا چاہیے کیونکہ وہ سنگلز لینا جانتے ہیں۔

عمران نذیر کا کہنا تھا کہ ایک مرتبہ بیٹنگ نمبر تشکیل دیں اور پھر اس پر عمل کریں، حیدر علی میں اوپنر کا ٹچ نظر آتا ہے وہ جہاں ڈومیسٹک میں کھیلتے رہے ہیں انہیں وہاں کھلائیں، ڈومیسٹک میں پختہ ہونے پر کھلاڑیوں کو موقع دیں ایک دو ٹی ٹوئنٹی کی بنیاد پر پاکستان کی طرف سے نہ کھلادیا کریں۔

کرکٹر نے کہا کہ ٹی ٹوئنٹی ورلڈکپ سے قبل کھلاڑیوں کو موقع دیں اگر یکدم ورلڈکپ میں کھلایا تو کھلاڑی پر دباؤ ہوگا، شرجیل خان میں اوپنر کا ٹیلنٹ ہے اگر ٹیم میں لائے ہیں تو تسلسل کے ساتھ کھلائیں ان میں اعتماد آئے گا۔

عمران نذیر کا کہنا تھا کہ پی ایس ایل کا شروع ہونا خوش آئند ہے، یہ پاکستان کی خوبصورتی ہے کرکٹ لورز کو پی ایس ایل سے خوشیاں ملتی ہی جب کہ ہمیشہ لاہور قلندرز کو اسپورٹ کیا ہے، لاہور قلندرز اس وقت بھی فیورٹ تھی جب کوئی پسند نہیں کرتا تھا اوراب بھی فیورٹ ہے اس نے نے نوجوانوں کے لیے وہ کام کیا ہے جو کسی نے نہیں کیا۔

حارث رؤف ٹی ٹوئنٹی وکٹوں کی سنچری مکمل کرنے والے تیسرے تیز ترین پاکستانی بولر بن گئے۔

پیسر حارث رؤف نے پی ایس ایل 6میں پشاور زلمی کیخلاف مقابلے میں یہ سنگ میل عبور کیا،یہ ان کے کیریئر کا 71واں میچ تھا، اس سے قبل سعید اجمل اور عمر گل 68، 68 میچز میں وکٹوں کی سنچری مکمل کرنے میں کامیاب ہوئے ہیں۔

اعزاز چیمہ 73، شاہین شاہ آفریدی 74،رانا نوید الحسن79، حسن علی و سہیل خان 80، 80، شاداب خان اور یاسر عرفات82،82 میچز میں 100وکٹیں حاصل کرچکے ہیں۔

’’آبیل مجھے مار‘‘ کے مصداق بنگلہ دیش کے معروف آل راونڈر شکیب الحسن پر تین میچز کی پابندی کے ساتھ پانچ لاکھ روپے جرمانہ عائد کردیا گیا۔

میڈیا رپورٹس کے مطابق ڈھاکا میں جاری بنگلہ دیش ڈویژن پریمیئر لیگ میں محمڈن اسپورٹس کلب کے کپتان شکیب الحسن نے ابایانی لمیٹڈ کے خلاف میچ میں اپیل رد کرنے پر امپائر کے سامنے لگی وکٹوں کو ٹھوکر مار کراپنی ناراضی کا اظہار کیا تھا۔

اس میچ میں شکیب الحسن نے دوسری باربھی ڈسپلن کی دھجیاں اس وقت اڑائیں جب کم روشنی کی وجہ سے امپائر نے کھیل روک کر کور بلانے کا اشارہ کیا۔ اس موقع پر بھاگتے ہوئے شکیب الحسن نے تینوں وکٹ زمین سے اکھاڑ کر پٹخ دیں تھیں۔

شکیب الحسن نے مخالف ٹیم کے کوچ خالد محمد جو بنگلہ دیش بورڈ کے ڈائریکٹر بھی ہیں سے بھی تلخ جملوں کے تبادلہ کیا تھا۔

میچ کے اختتام پر انہوں نے سوشل میڈیا پر اپنی غلطی کا اعتراف کرتے ہوئے معافی بھی مانگی۔ لیگ انتطامیہ نے میچ ریفری کی رپورٹ پر شکیب الحسن کے خلاف ایکشن لیتے ہوئے تین میچز کی پابندی لگانے کے ساتھ پانچ لاکھ جرمانہ بھی عائد کیا جسے شکیب الحسن نے قبول کرلیا۔

24ویں ایشین تائیکوانڈوچیمپئین شپ اور بیروت اوپن میں شرکت کیلئے قومی تائیکوانڈو اسکواڈ کراچی سے بیروت روانہ ہوگیا۔

پاکستان تائی کوانڈو فیڈریشن کے مطابق 13 جون کو بیروت میں ہونے والی ایشین تائیکوانڈو جنرل اسمبلی میں پاکستان کی نمائندگی عمرسعیداورمرتضی بنگش کریں گے جبکہ قومی ٹیم 14 جون کو کھیلے جانے والے تائیکوانڈو پومزے ایونٹ میں حصہ لے گی۔

ایشین تائیکوانڈو چیمپئین 16 تا 18 جون تک کھیلی جائے گی دوسری ایونٹ بیروت اوپن کے مقابلے 19 تا 21 جون تک منعقد ہوں گے، پاکستانی ٹیم بیروت پہنچنے کے بعد اپنے ٹریننگ سیشن کا أغازکریں گے

لاہور: اسلام آباد یونائیٹڈ کی مہم کوبڑا دھچکا لگ گیا،آل راؤنڈر فہیم اشرف ہاتھ پر 5ٹانکے لگنے کے بعدکم ازکم 3میچز نہیں کھیل پائیں گے۔

لاہور قلندرز سے میچ کے ابتدائی2اوورز میں فہیم اشرف نے فخرزمان کی قیمتی وکٹ حاصل کی،مگر پھر حسن علی کی بولنگ کے دوران شارٹ فائن لیگ پوزیشن پر فیلڈنگ کرتے ہوئے بائیں ہاتھ پر شہادت کی انگلی اور انگوٹھے کے درمیان کی جگہ پھٹ گئی، ان کو فوری طور پر طبی امداد کیلیے باہر لے جایا گیا۔

ڈاکٹرز نے اینٹی بائیوٹک اور درد کش دوا دی، ہاتھ پر 5ٹانکے لگانے پڑے، بعد ازاں ڈاکٹرز نے انھیں فوری طور پر بولنگ کی اجازت نہیں دی، بیشتر وقت آل راؤنڈر میدان سے باہر رہے۔
بالآخر قواعد و ضوابط کے مطابق امپائرز کی اجازت ملنے پر انھوں نے اننگز کا 14واں اور 17واں اوور کرایا، مجموعی طور پر 4اوورز میں فہیم اشرف نے 31 رنز دے کر ایک وکٹ حاصل کی، اس سے قبل بیٹنگ کرتے ہوئے بھی انھوں نے اپنی ٹیم کی جانب سے سب سے زیادہ 27رنز بنائے تھے۔

فہیم اشرف چند روز آرام کریں گے،وہ کم از کم اگلے 3میچز کیلیے اسلام آباد یونائیٹڈ کو دستیاب نہیں ہوں گے، ان کا خلا پْر کرنے کیلیے عاکف جاوید اور محمد موسٰی میں سے کسی ایک کو موقع دیا جائیگا۔

ٹیم ذرائع کے مطابق تھوڑا انتظار کرنے کے بعد فہیم کی انجری کو دیکھتے ہوئے انھیں میدان میں اتارنے کا فیصلہ کیا جائے گا، پی ایس ایل کے فوری بعد قومی ٹیم کو انگلینڈ روانہ ہونا ہے، اس لیے آل راؤنڈر کی فٹنس پر کسی قسم کا سمجھوتہ نہیں کیا جائے گا۔

این سی او سی کی جانب سے کھیلوں پر پابندیوں کی نرمی کے بعد پاکستان ہاکی فیڈریشن نے ڈومیسٹک ہاکی سرگرمیوں کے آغاز کا اعلان کر دیا ہے۔

اس حوالے سے صدر پاکستان ہاکی فیڈریشن بریگیڈئر (ر)خالد سجاد کھوکھر سے سیکرٹری جنرل پی ایچ ایف آصف باجوہ کی ملاقات ہوئی۔

ملاقات میں ایشین ہاکی فیڈریشن کے سی ای او سیکرٹری جنرل طیب اکرام چودھری بھی شریک تھے۔ پاکستان ہاکی فیڈریشن کے سیکرٹری جنرل اولمپیئن آصف باجوہ نے کہا کہ انشاء اللہ ہم پی ایچ ایف ڈومیسٹک سیزن کو بہترین انداز میں ترتیب دیں گے، ہماری بھرپور کوشش ہے پی ایچ ایف کے زیر اہتمام جولائی میں ہاکی فائیو لیگ کے انعقاد کیا جائے۔

تیسرا چیف آف نیول سٹاف آل پاکستان ہاکی ٹورنامنٹ یکم سے 8 اگست تک کراچی میں کھیلا جائیگا، اس کے علاوہ ماڑی پیٹرولیم آزادی ہاکی کپ 8 سے 14 اگست ایوب پارک راولپنڈی میں کھیلا جائیگا۔

مذکورہ ایونٹس میں پی ایچ ایف رینکنگ کی ٹاپ آٹھ ٹیمیں ایونٹ میں شریک ہونگیں جس میں میں واپڈا، نیشنل بینک، سوئی سدرن گیس، نیوی، ماڑی پیٹرولیم، ایئر فورس، پنجاب اور پاکستان آرمی شامل ہیں۔

انہوں نے کہا کہ ہماری بھرپور کوشش ہے کہ انٹرنیشنل ہاکی کو پاکستان میں لایا جائے جس سے پاکستان کی رینکنگ بہتر بنانے میں مدد ملے گی۔

بھارت کی فٹبال ٹیم کے کپتان سنیل چھیتری نے بین الاقوامی مقابلوں میں زیادہ گول کرنے کی دوڑ میں ارجنٹائن کے اسٹار فٹبالر لیونل میسی کو پیچھے چھوڑ دیا۔

بین الاقوامی میڈیا رپورٹس کے مطابق سنیل چھیتری نے قطر کے درالحکومت دوحہ میں ورلڈکپ 2022 کے کوالیفائی میچ میں بنگلادیش کے خلاف 2 گول کرنے ٹیم کی فتح میں اہم کردار ادا کیا جبکہ بھارت نے اس میچ 0-2 سے کامیابی حاصل کی۔

میچ میں شاندار کارکردگی کے ساتھ ساتھ بھارتی ٹیم کے کپتان نے انٹرنیشنل گولز میں ارجنٹائن کے لیونل میسی کو بھی پیچھے چھوڑیا ہے اور ساتھ ہی وہ سب سے زیادہ گول کرنے والے دنیا کے دوسرے کھلاڑی بن گئے ہیں۔

سنیل نے بین الاقوامی مقابلوں میں 74 گول کیے ہیں جبکہ میسی اب تک 72 گول کرسکے ہیں اور یوں وہ چوتھی پوزیشن پر چلے گئے ہیں۔

بین الاقوامی میچز میں 103 گول کے ساتھ پرتگال کے کرسٹیانو رونالڈو سرفہرست ہیں جبکہ متحدہ عرب امارات کے علی مختوب تیسری پوزیشن پر آگئے ہیں۔