Category کھیل

امریکا میں باکسنگ کا تگڑا مقابلہ بے نتیجہ ختم ہو گیا، ناقابل شکست فلائیڈ مے ویدر نوجوان حریف لوگن پال کو ہرا نہ سکے۔

آٹھ کے آٹھ راؤنڈ مکمل ہوئے۔ سنسنی خیز فائٹ سے پرستار خوب محظوظ ہوتے رہے۔ آخر میں معروف فائٹر نے اعتراف کیا کہ میں 21 سالہ نوجوان نہیں ہوں کہ مدمقابل کو ناک آؤٹ کر دیتا۔

خیال رہے کہ مداحوں کی کافی عرصے سے اس مقابلے پر نظریں تھیں لیکن عالمی وبا کورونا کی وجہ سے یہ تقریباً چار ماہ تک ملتوی رہا۔

بالاخر امریکی ریاست فلوریڈا کے ہارڈ روک سٹیڈیم میں رِنگ سج گیا جہاں فلائیڈ مے ویدر اور لوگن پال کا آمنا سامنا ہوا۔

وزن کرانے کے بعد شو ٹائم کا ایونٹ مرکز نگاہ بنا رہا۔ دونوں فائیٹرز جوشیلے انداز میں جیت کے دعوے کرتے رہے۔

باکسنگ اعدادوشمار کے مطابق فلائیڈ مے ویدر کا وسیع تجربہ ہے، انہوں نے پچاس باؤٹ میں ناقابل شکست رہنے کا کارنامہ نام کر رکھا ہے جبکہ مدمقابل آںے والے ستائیس حریفوں کو انہوں نے ناک آؤٹ کیا ہے۔

سلویینیا کی ٹینس سٹار تامارا زیڈانسک اپنے مدمقابل سپین کی خاتون کھلاڑی پاؤلا بادوسا کو شکست دے کر فرنچ اوپن 2021ء کے سیمی فائنل میں پہنچ گئی ہیں۔

خٰیال رہے کہ تامارا زیڈانسک کا ٹینس کے کھیل میں عالمی سطح پر 85واں نمبر ہے۔ انہوں نے اس سے قبل کبھی بھی کسی بڑے ایونٹ کے دوسرے راؤنڈ میں رسائی تک حاصل نہیں کی تھی۔

انہوں نے سپین کی کھلاڑی پاؤلا بادوسا کیخلاف شاندار کھیل پیش کرتے ہوئے انھیں سات پانچ، چار چھ اور آٹھ چھ سے شکست دی اور فتح اپنے نام کی۔

اب 12 جون کو تامارا زیڈانسک کا مقابلہ روسی پلیئر اینا ستاسیا یا قازقستان کی ایلینا ریبیکینا سے ہوگا۔

خیال رہے کہ روسی پلیئر اینا ستاسیا بھی پہلی مرتبہ فرنچ اوپن کے کوارٹرز فائنل میں پہنچی ہیں۔ جبکہ ریبیکینا نے ورلڈ کلاس کھلاڑی سیرینا ولیمز کو شکست دے کر سب کیلئے خطرے کی گھنٹی بجائی ہوئی ہے۔

اسلام آباد: وفاقی وزیر اطلاعات فواد چوہدری کا کہنا ہےکہ قومی ٹیم اور انگلینڈ کے درمیان ہونے والی کرکٹ سیریز کو پاکستان میں نشر نہیں کیا جائے گا۔

وفاقی کابینہ کے اجلاس کے بعد میڈیا کو بریفنگ دیتے ہوئے فواد چوہدری نے بتایا کہ سرکاری ٹی وی نے اسٹار اور ایشیا سے کرکٹ کا کنٹریکٹ مانگا ہے، سرکاری ٹی وی کی بھارتی کمپنی کے ساتھ معاہدے کی درخواست کو منظور نہیں کیاگیا ہے، ہم کسی بھی بھارتی کمپنی کے ساتھ معاہدہ نہیں کرسکتے۔

انہوں نے کہا کہ جنوبی ایشیا کے تمام رائٹس بھارتی کمپنیوں کے پاس ہیں، اس وجہ سے پاکستان انگلینڈ کی کرکٹ سیریز نشر نہیں کی جائے گی البتہ کوشش کریں گے کہ انگلینڈ کرکٹ بورڈ کے ساتھ کوئی بیچ کا راستہ نکالیں کیونکہ پی سی بی اور سرکاری ٹی وی کو کرکٹ نشریات کے نا ہونے پر یقیناً نقصان ہوگا۔

واضح رہے کہ پاکستان اور انگلینڈ کے درمیان کرکٹ سیریز 8 جولائی سے شروع ہوگی جس میں تین ون ڈے اور تین ٹی ٹوئنٹی میچز شامل ہیں۔

وفاقی وزیر اطلاعات فواد چوہدری کا کہنا ہے کہ کسی بھی بھارتی کمپنی کے ساتھ معاہدہ نہیں کر سکتے، ہندوستان سے تعلقات 5 اگست کے فیصلے کی واپسی سے مشروط ہیں۔

انہوں نے کہا کہ وفاقی کابینہ نے طارق ملک کو نادرا کا نیا چیئرمین مقرر کرنے کا فیصلہ کیا ہے۔

ایک سوال کے جواب میں وفاقی وزیر نے کہا کہ پاکستان کے فوجی اڈے امریکا کو دینے کا سوال ہی پیدا نہیں ہوتا، پیپلزپارٹی اور مسلم لیگ ن بالکل بچوں کی طرح لڑ رہے ہیں، بلاول اورمراد علی شاہ پیپلزپارٹی کو سندھی قوم پرست جماعت بنانے پر تل گئے ہیں۔

لاہور: پاکستان سپر لیگ سیزن 6 کے لیے مزید 4 کھلاڑیوں کو متحدہ عرب امارات کا ویزہ جاری کردیا گیا۔

جن کھلاڑیوں کو ویزہ جاری کیا گیا ہے ان میں عمر امین، حماد اعظم، خالد عثمان اور آصف آفریدی کے نام شامل ہیں، جنہیں پہلی دستیاب فلائیٹ سے ابوظہبی پہنچانے کے انتظامات کیے جارہے ہیں، اب صرف ایک کھلاڑی عمران رندھاوا کا ویزہ تاحال جاری نہیں ہوا، ویزہ موصول ہوتے ہیں ان کی فوری ابوظہبی روانگی کا انتظام کیا جائے گا۔

یاد رہے کہ لاہور اور کراچی سے جانے والی دو چارٹرڈ پروازوں میں کرکٹرز، معاون اسٹاف ارکان اور پی سی بی آفیشلز کی بڑی تعداد ابوظہبی پہنچ گئی، تاہم 25افراد ویزا مسائل کی وجہ سے روانہ نہیں ہوسکے تھے، اوران کی ٹکڑوں میں روانگی کا سلسلہ جاری ہے۔ تاخیر سے پہنچنے والے کھلاڑی اور آفیشلز قرنطینہ ک مدت پوری ہونے پر اپنےاسکواڈز کو جوائن کر سکیں گے۔

لاہور: نوجوان لیگ اسپنر عثمان قادر اپنے ’دوست‘ بابر اعظم کی وکٹ اڑانے کو بیتاب ہیں۔

ان کا کہنا ہے کہ دوستی میدان سے باہر ہے، سامنا ہوا تو پہلی گیند پر آؤٹ کرنے کی کوشش کروں گا، ملتان سلطانز کا کمبی نیشن اچھا اور محمد رضوان کی قیادت میں یہ ٹیم بھی ٹرافی جیتنے کی اتنی ہی حقدار ہے جتنی دوسری ٹیمیں ہیں، شاہد آفریدی جیسے تجربہ کار کھلاڑی کی کمی یقینی طور پر محسوس ہوگی۔

ملتان سلطانز کی کامیابیوں میں اہم کردار کے ساتھ ٹرافی بھی اٹھانے کی تمنا ہے، ان خیالات کا اظہار انھوں نے کرکٹ پاکستان ڈاٹ کام ڈاٹ پی کو انٹرویو دیتے ہوئے کیا۔ عثمان قادر نے بولنگ میں نکھار لانے کا کریڈٹ عمران طاہر کو دیتے ہوئے انکشاف کیا کہ کراچی میں پی ایس ایل میچز ملتوی ہونے کے بعد لاہور میں عمران طاہر کے ساتھ مسلسل پریکٹس کی۔
انھوں نے سلائیڈر ورائٹی پر مہارت پانے میں بہت مدد دی، گھنٹوں پریکٹس کرنے کے ساتھ رن اپ میں بھی معمولی سی تبدیلی کی، جس سے زیادہ عمدہ بولنگ کرنے میں کامیاب رہا ہوں، یہی وجہ ہے کہ زمبابوے کے خلاف سیریز میں زیادہ کنٹرول سے بولنگ کی، اس چیز سے اعتماد میں بھی اضافہ ہوا، اب ایکشن بھی کچھ کچھ عمران طاہر جیسا ہوگیا۔

عثمان قادر نے کہا کہ جنوبی افریقہ کے خلاف آخری ون ڈے میں جان سومٹس جس بال پر آوٹ ہوئے وہ عمران کی سکھائی ہوئی سلائیڈر ڈیلیوری تھی، اس ورائٹی کو مزید بہتر کرنے پر کام کررہا ہوں، جب اس پر زیادہ مہارت حاصل کرلوں گا تو اس کا زیادہ استعمال دیکھنے کو ملے گا۔

دائیں ہاتھ کے اسپنر نے بابر اعظم کو مشکل بیٹسمین قرار دیتے ہوئے کہا کہ پی ایس ایل میں اب تک سب سے زیادہ ٹف بابر اعظم کو بولنگ کرنا لگا ہے۔ وہ زبردست تکنیک رکھتے ہیں، مشکل سے مشکل ورائٹی کو کمال مہارت سے کھیلنے میں ان کا کوئی ثانی نہیں، ہر کوئی دنیا کا نمبر ون بیٹسمین نہیں بن سکتا، بابر اعظم نے بڑی محنت کرکے یہ مقام پایا ہے۔ عثمان قادر نے کہا کہ موقع ملا تو ابوظبی کی پچز پر پہلی بار بولنگ کروں گا۔

یہاں پی ایس ایل میچز سے سب کو ٹی ٹوئنٹی ورلڈکپ کی تیاری کا بھی بہترین موقع ملے گا، بولنگ کے ساتھ بیٹنگ پر بھی توجہ دے رہا یوں، بطور آل راونڈر ٹیم کی کامیابیوں میں کردار ادا کرنا چاہتا ہوں، خواہش ہے کہ ٹیسٹ کرکٹ میں بھی پاکستان کی نمائندگی کا موقع ملے تاکہ تینوں فارمیٹ میں خود کو منواسکوں، ایک بڑے نام والے باپ کا بیٹا ہونے کا اضافی پریشر تھوڑا بہت تو ضرور ہوتا ہے لیکن اپنے والد عبدالقادر جیسا کبھی نہیں بن سکتا۔

ڈھاکا: ڈھاکا پریمیئر لیگ کے دوران قائم بائیو سیکیور ببل میں اجنبی کی انٹری نے کھلبلی مچادی، بنگلا دیشی بورڈ نے ڈومیسٹک ایونٹ کے دوران بائیو ببل قواعد کی خلاف ورزی کی تحقیقات شروع کردیں۔

رپورٹ کے مطابق یہ خلاف ورزی بنگہ بندھو لیگ میں محمڈن اسپورٹنگ کلب کے پریکٹس سیشن میں ہوئی ہے، اس معاملے کا بی سی بی اور کرکٹ کمیٹی آف ڈھاکا میٹروپولس نے فوری نوٹس لیا ہے، سی سی ڈی ایم کے چیئرمین قاضی انعام احمد کا کہنا ہے کہ بورڈ اور ہم نے اس معاملے کو انتہائی سنجیدگی سے لیا ہے۔

ہمیں اس واقعے پر بہت افسوس ہوا، ہماری ٹیموں کی صحت اور حفاظت ہمارے لیے سب سے اہم ہے،ہم نے بائیو سیکیور ببل کے قواعد پر عملدرآمد بنانے کے لیے خاصی بڑی رقم خرچ کی ہے، جس میں ٹیموں کو ہر ممکن بہترین رہائش اور دیگر سہولیات بہم پہنچانا شامل ہیں، اس واقعے کے تناظر میں ہم مزید احتیاطی اقدامات کریں گے۔

رپورٹ کے مطابق شکیب الحسن گذشتہ دن گراؤنڈ پر پریکٹس کررہے تھے کہ ایک غیرمتعلقہ شخص گراؤنڈ میں پہنچ گیا تھا، جس پر بورڈ حکام کی جانب سے بھی برہمی کا اظہار کیا جارہا اور اس بات کا پتہ چلایا جارہا ہے کہ آخر اس شخص کی سخت ترین بائیوسیکیور ببل میں انٹری کس طرح ممکن ہوئی۔

لاہور: پاکستان سپر لیگ (پی ایس ایل) سکس کے بقیہ 20 میچز کے لیے آفیشلز کا اعلان کردیا گیا، علیم ڈار اور احسن رضا فائنل میں امپائرنگ کے فرائض انجام دیں گے۔

پاکستان کرکٹ بورڈ نے ایچ بی ایل پاکستان سپر لیگ 6 کے ابوظہبی میں شیڈول بقیہ 20 میچز کے لیے میچ آفیشلز کا اعلان کردیا۔ یہ میچز 9 سے 24 جون تک شیخ زید کرکٹ اسٹیڈیم میں کھیلے جائیں گے۔

ان میچز کے دوران پاکستان کے سب سے سینئرامپائر اور آئی سی سی ایلیٹ پینل کے رکن علیم ڈار کے علاوہ پی سی بی ایلیٹ پینل میں شامل 6 دیگر امپائرز بھی امپائرنگ کی ذمہ داریاں ادا کریں گے۔

ان 6 امپائرز میں احسن رضا، آصف یعقوب(پی سی بی امپائر برائے 2020)، فیصل خان آفریدی، راشد ریاض، شوزب رضا اور ضمیر حیدر شامل ہیں۔

پی سی بی کےایلیٹ پینل برائے ریفری میں شامل محمد انیس ، علی نقوی، افتخار احمد اور محمد جاویدابوظہبی میں کھیلے جانے والے میچز کے دوران پلیئنگ کنٹرول ٹیم کی قیادت کریں گے۔

شیڈول کے مطابق ٹورنامنٹ کا مجموعی طور پر 15واں میچ 9 جون کو لاہور قلندرز اور اسلام آباد یونائیٹڈ کے مابین کھیلا جائے گا ۔

اس میچ میں علیم ڈار اور راشد ریاض آن فیلڈ امپائرز کی ذمہ داریاں ادا کریں گےجبکہ شوزب رضا تھرڈ امپائر اور فیصل آفریدی فورتھ امپائرہوں گے۔ محمد انیس اس میچ میں ریفری کے فرائض انجام دیں گے۔

24 جون کو ایونٹ کے فائنل میں علیم ڈاراوراحسن رضا آن فیلڈ امپائرز ہوں گے۔ آصف یعقوب تھرڈ امپائر جبکہ راشد ریاض فورتھ امپائر ہوں گے۔اس میچ میں بھی محمد انیس پلیئنگ کنٹرول ٹیم کی سربراہی کریں گے۔

پاکستان کرکٹ بورڈ (پی سی بی) نے دورہ انگلینڈ کیلئے لاہور سے ہی چارٹرڈ فلائٹ لینے کا فیصلہ کیا ہے۔

ذرائع کے مطابق پاکستان کرکٹ اسکواڈ اب دو حصوں میں انگلینڈ نہیں جائے گا بلکہ ایک ہی چارٹرڈ فلائٹ سے مانچسٹر پہنچیں گے۔

ذرائع نے بتایا کہ لاہور سے چارٹرڈ فلائٹ کی وجہ سے انگلینڈ روانگی کے شیڈول میں ردو بدل کیاگیا ہے۔

پاکستان میں موجود کوچز اور تمام کھلاڑی 23 جون کو انگلینڈ جانے کے بجائے اب 25 جون کی صبح لاہور سے بذریعہ چارٹرڈ فلائٹ ابوظبی جائیں گے۔

ابو ظبی سے ہی پی ایس ایل میں شامل کھلاڑی چارٹرڈ فلائٹ پر سوار ہوں گے۔

چارٹرڈ فلائٹ سے پاکستانی اسکواڈ 25 جون کو ہی ابوظبی سے مانچسٹر پہنچے گا جبکہ چارٹرڈ فلائٹ سے انگلینڈ پہنچنے والا اسکواڈ وائٹ بال کا ہوگا۔

ویسٹ انڈیز میں ٹیسٹ میچز چونکہ اگست میں کھیلے جانے ہیں اس لیے ٹیسٹ اسکواڈ کے کھلاڑی جولائی کے آخر میں کمرشل فلائٹ سے ویسٹ انڈیز جائیں گے۔

پاکستان کرکٹ بورڈ نے محمد عامر کو ریٹائرمنٹ کا فیصلہ واپس لینے پر منانے کی کوششیں شروع کردیں۔

ایک یوٹیوب چینل کو انٹرویو میں چیف ایگزیکٹیو وسیم خان نے کہاکہ حال ہی میں انگلینڈ میں میری عامر سے بات ہوئی، جس میں ان پر واضح کیا کہ جو راستہ انھوں نے اختیار کیا وہ ایک سینئر پلیئر کیلیے درست نہیں ہے، وہ اب بھی ہمارے لیے ایک اہم کھلاڑی ہیں، ہم ان کے اور کوچز کے درمیان صلح کرانے کی کوشش کرینگے۔ وسیم خان نے بہرحال عامر کی ٹیم میں دوبارہ واسپی کے حوالے سے کوئی ٹائم فریم نہیں دیا۔

یاد رہے کہ فاسٹ بولر ٹیم مینجمنٹ کے رویے کو وجہ قرار دیتے ہوئے انٹرنیشنل کرکٹ سے ریٹائرہوگئے تھے۔

امریکا میں لڑائی مارکٹائی کے کھیل باکسنگ کا بڑا رِنگ سج گیا، ناقابل شکست فلائیڈ مے ویدر اور لوگن پال مدمقابل ہوں گے، پاکستانی وقت کے مطابق کل صبح زور کا جوڑ پڑے گا۔

کورونا سے متاثرہ باکسنگ مقابلہ، چار ماہ تک التوا کا شکار اب ہو گا۔ امریکی ریاست فلوریڈا کے ہارڈ روک اسٹیڈیم میں رِنگ سج گیا، فلائیڈ مے ویدر اور لوگن پال کا آمنا سامنا، وزن کرانے کے بعد شو ٹائم کا ایونٹ مرکز نگاہ بنا رہا۔ دونوں فائیٹرز جوشیلے انداز میں جیت کے دعوے کرتے رہے۔

الٹی گنتی شروع، پرستاروں کو مقابلے کا انتظارہے۔ فلائیڈ مے ویدر کا وسیع تجربہ ہے، پچاس باؤٹ میں ناقابل شکست رہنے کا کارنامہ نام کر رکھا ہے۔ ستائیس حریفوں کو ناک آؤٹ کیا۔