Category کھیل

پاکستان کرکٹ بورڈ (پی سی بی) کے چیف ایگزیکٹیو وسیم خان نے کہا ہے کہ مِس منیجمنٹ کا الزام ہم پراس وقت لگائیں جب چیزیں ہمارے ہاتھ میں ہوں، بعض فیصلے ابوظبی حکومت کے ہاتھ میں تھے، برانڈ کیلئےضروری تھا کہ پاکستان سپر لیگ (پی ایس ایل) 6 مکمل ہوتا۔

ایک نجی ٹی وی سے بات چیت کرتے ہوئے وسیم خان نے کہا کہ پی ایس ایل ہونا بہت ضروری تھا، پی سی بی نے شروع ہی میں 3 سے4 شیڈول تیار کیے ہوئے تھے،اس سے آمدنی میں کمی ہوگی لیکن نقصان نہیں ہورہا۔

ایک سوال کے جواب میں انہوں نے واضح کیا کہ جب تک موجودہ فرنچائزز منافع میں نہیں آئیں گی ساتویں ٹیم نہیں لائیں گے، پی ایس ایل کا بزنس پلان تبدیل کررہے ہیں۔

غیرملکی کرکٹ ٹیموں کی آمد سے متعلق پی سی بی کے چیف ایگزیکٹو وسیم خان نے کہا کہ ستمبر کے وسط میں نیوزی لینڈ کی ٹیم پاکستان آئے گی، آسٹریلیا کی ٹیم سے سیریز فروری، مارچ میں کرانا چاہتے ہیں۔

انہوں نے کہا کہ سیریزسےمتعلق فرنچائز سے بات کریں گے، آسٹریلیا 22 سال بعد آرہی ہے،شیڈول بدلنا مشکل ہے، 2 سے3 ایونٹس یو اےای کے ساتھ شراکت میں کریں گے، ویسٹ انڈیز میں میزبان ملک کی خواہش پر ٹیسٹ میچ ختم کیا تھا۔

وسیم خان نے کہا کہ محمد عامر کا بورڈ سے کوئی مسئلہ نہیں،وہ اچھا لڑکا ہے، عامر سے کہا ہے کہ بیٹھ کر مسائل کا حل نکالتے ہیں۔

فاف ڈوپلیسی ابوظبی کی سخت کنڈیشنز میں بھی صلاحیتوں کی دھاک بٹھانے کیلیے بے تاب ہیں۔

پاکستان کرکٹ کی سب سے بڑی ویب سائٹ www.cricketpakistan.com.pk کے پروگرام ’’کرکٹ کارنز ود سلیم خالق‘‘ میں گفتگوکرتے ہوئے فاف ڈوپلیسی نے کہاکہ قرنطینہ میں وقت گزارنا مشکل ہے، مسلسل ایک کمرے میں رہنا آسان نہیں ہوتا، جم اور میدان میں جا کر ٹریننگ کا موقع نہیں ملتا، بہرحال کرکٹ کو جاری رکھنے کے لیے ایسا کرنا ضروری ہے، میں کمرے میں ٹریننگ کرتے ہوئے خود کو فٹ رکھنے کی ہر ممکن کوشش کرتا ہوں، ابوظبی میں سخت گرمی کا اندازہ ہے، جنوبی افریقہ میں سرد موسم تھا، یہاں کنڈیشنز سے ہم آہنگی کے لیے ہوٹل کی بالکونی میں سائیکل چلائی، کھلاڑی جسم کو کنڈیشنز کا عادی بنانے کی بہترین کوشش کر رہے ہیں۔

انھوں نے کہا کہ میں نے کراچی میں منعقدہ میچز میں اچھے آغاز کیے مگر انھیں بڑے اسکور میں تبدیل نہیں کر سکا، ابوظبی میں بہتر کارکردگی کی پوری کوشش کروں گا۔
پروٹیز بیٹسمین نے کہا کہ آئی پی ایل میں تیاری اور کنڈیشنز سے ہم آہنگی کے لیے ہمیں 10دن کا وقت مل گیا تھا، ایونٹ میں عمدہ پرفارمنس سے لطف اندوز ہوا، چند اچھی اننگز کھیل کر اعتماد میں اضافہ ہوگیا، پی ایس ایل کی تیاری کے لیے بہت کم وقت ملا تھا،اس بار بھی زیادہ موقع نہیں ہوگا، بہرحال پوری کوشش ہوگی کی ٹیم کی توقعات پر پورا اتروں۔

فاف ڈوپلیسی نے کہا کہ کراچی میں کھیلے جانے والے میچز میں کوئٹہ گلیڈی ایٹرز کے بیٹنگ اور بولنگ میں مسائل رہے،ہم بطور ٹیم زیادہ بہتر کارکردگی کا مظاہرہ نہیں کر پائے، ردھم میں واپس آتے ہوئے آخری میچ میں اچھا پرفارم کیا تھا کہ ایونٹ ہی ملتوی ہو گیا، اب نیا چیلنج ہے، نئے کھلاڑی بھی اسکواڈ میں شامل ہوں گے، اس لیے نئے سرے سے مہم کا آغاز کرنا ہوگا۔

پی ایس ایل کا معیار بہت اچھا فاسٹ بولرز بیحد متاثر کن ہیں

فاف ڈوپلیسی نے کہا کہ پی ایس ایل کا معیار بہت اچھا ہے، خاص طور پر فاسٹ بولرز بیحد متاثر کن ہیں،ایونٹ میں اچھے اسپنرز بھی نظر آتے ہیں مگر تسلسل کے ساتھ فاسٹ بولرز کا سامنے آنا خوش آئند ہے۔

انھوں نے کہا کہ میں جنوبی افریقہ میں تیز بولرز کا سامنا کرتے ہوئے جوان ہوا ہوں مگر پی ایس ایل میں 140سے زائد کی رفتار والے پیسر کا سامنے آنا حیران کن تھا، میرے خیال میں اس لیگ کی اصل پہچان فاسٹ بولرز ہیں۔

سرفرازکا انداز قیادت کوہلی جیسا ہے،پلیئرز سے بات کرتے رہتے ہیں

مہندرا سنگھ دھونی اور سرفراز احمد کی انداز قیادت میں فرق کے حوالے سے فاف ڈوپلیسی نے کہا کہ دونوں کا انداز قطعی مختلف ہے، بھارتی کپتان زیادہ تر سنجیدہ رہتے جبکہ سرفراز احمد ویرات کوہلی کی طرح ہیں،وہ ہمیشہ کھلاڑیوں اور بولرز سے بات کرتے رہتے اور میدان میں جذباتی نظر آتے ہیں، دونوں کا اپنا اپنا انداز ہے مگر اس میں کچھ غلط نہیں، سرفراز احمد نے بھی اپنی قیادت میں پاکستان ٹیم کے کھلاڑیوں سے بڑی عمدہ پرفارمنس لی، مختلف مزاج کے کپتانوں کے ساتھ کھیلنا میرے لیے بڑا دلچسپ تجربہ ہوتا ہے، اس سے سیکھنے کا موقع ملتا ہے۔

آئی پی ایل،سفر کے دوران کورونا بائیوببل میں داخل ہوا

فاف ڈوپلیسی نے کہا کہ آئی پی ایل بڑے اچھے انداز میں جاری تھی، دیگر معاملات بھی درست سمت میں گامزن اور ہم خود کو محفوظ سمجھ رہے تھے مگر میرے خیال میں سفر کے دوران کورونا وائرس کو بائیوببل میں داخلے کا راستہ ملا، ایونٹ ملتوی ہونے پر بڑا افسوس ہوا، میری اور چنئی سپرکنگز کی کارکردگی اچھی جا رہی تھی،اسی طرح کراچی میں اچھا وقت گزر رہا تھا، بدقسمتی سے کورونا کی وجہ سے ایونٹ ملتوی ہوگیا، یہ بھی کوئی اچھی خبر نہیں تھی، امکان ہے کہ آئی پی ایل اب ستمبر میں ہوگی۔

6،7اہم پلیئرزکی عدم موجودگی سے پروٹیز کوپاکستان سے شکست ہوئی

پاکستان کے ہاتھوں میزبان جنوبی افریقی ٹیم کی شکست پر ڈوپلیسی نے کہا کہ انٹرنیشنل کرکٹ بہت مشکل اور سخت مقابلہ ہوتا ہے، پروٹیز ٹیم میں 6یا 7اہم کھلاڑی موجود نہیں تھے، دوسری جانب ایک مضبوط پاکستان ٹیم کا سامنا تھا، بہرحال نوجوان کرکٹرز نے اچھا مقابلہ کیا۔

1،2 غلطیوں کی وجہ جنوبی افریقہ سیریز ضرور ہارا مگر اچھی کرکٹ کی وجہ سے میچز کا آخر میں فیصلہ ہوا،سیریز سے نوجوان پروٹیز کرکٹر کو سیکھنے کا اچھا موقع بھی ملا۔ ایک سوال پر انھوں نے کہا کہ ٹی ٹوئنٹی کیریئر کو طول دینے کے لیے ٹیسٹ کرکٹ چھوڑنے کا بروقت فیصلہ کیا،میں مختصر فارمیٹ میں مزید 3سال تک کھیلنا چاہتا تھا، وائٹ بال کرکٹ میں کارکردگی بھی اچھی ہے، اب ٹی ٹوئنٹی لیگز میں کھیل رہا ہوں اور کارکردگی پر توجہ دینے کا پورا موقع ہے۔

اعظم خان اچھے ہٹر اور اسٹروکس میں قوت ہے

فاف ڈوپلیسی نے کہا کہ میں اعظم خان کے ساتھ زیادہ نہیں کھیلا مگر وہ اچھے ہٹر اور ان کے اسٹروکس میں قوت ہے،وہ گیند کو زوردار ہٹ کرنے کی کوشش کرتے ہیں، انھوں نے آخر میں ایک جارحانہ ففٹی بنائی تھی، میرے لیے یہ دیکھنا دلچسپ ہوگا کہ وہ ابوظبی میں کیسا پرفارم کرتے ہیں،نوجوان بیٹسمین خود بھی دھاک بٹھانے کیلیے پْر جوش ہونگے۔

بابر اعظم ایک ٹھنڈے مزاج کے بہترین کرکٹر ہیں

فاف ڈوپلیسی نے کہا کہ مجھے بابر اعظم کے خلاف زیادہ کھیلنے کا موقع تو نہیں ملا مگروہ ایک ٹھنڈے مزاج کے بہترین کرکٹر ہیں، بطور بیٹسمین قیادت کا حق ادا کرتے ہیں، وقت کے ساتھ ایک اچھے کپتان بن جائیں گے۔

پاکستان سپر لیگ (پی ایس ایل) کی فرنچائز لاہور قلندرز میں شامل افغانستان کے کرکٹر راشد خان کا کہنا ہے کہ لاہور قلندرز کے ساتھ پہلے بھی اچھا وقت گزرا دو میچز کے لیے دو ہفتے گزارے ایسا لگا کہ دو سال گزارے ہیں۔

راشد خان کراچی میں ہونے والے پی ایس ایل میچز کے دوران نیشنل ڈیوٹی کی وجہ سے واپس قومی ٹیم کو جوائن کرنے کے لیے چلے گئے تھے اور پھر وہ انگلش کاؤنٹی سسیکس کے ساتھ معاہدہ ہونے کی وجہ سے ری پلیسمنٹ ڈرافٹ میں بھی شامل نہیں تھے۔

پی ایس ایل کے بقیہ میچز جب ابوظبی منتقل ہوئے تو پھر لاہور قلندرز کے لیے خوشخبری یہ آئی کہ راشد خان دستیاب ہیں، بنگلہ دیش کے شکیب الحسن کی عدم دستیابی کے بعد راشد خان پھر لاہور قلندرز کے ساتھ جڑ گئے۔

راشد خان کہتے ہیں کہ ہم سب نے لاہور قلندرز کے ساتھ ٹرافی جیتنے کا سوچا ہوا تھا لیکن میرا سسیکس کاؤنٹی کے ساتھ معاہدہ تھا لاہور قلندرز کے ساتھ کھیلنے کا مزہ آیا اس لیے دوبارہ آنے کا فیصلہ کیا۔

انہوں نے کہا ہم نے فائنل کھیلنا اور جیتنے کا نہیں سوچنا ایک ایک میچ سے آگے بڑھنا ہے ایسا سوچنے سے دباؤ بڑھے گا ، لاہور قلندرز کا اب ماضی کے مقابلے میں اچھا کمبی نیشن بن چکا ہے۔

انہوں نے کہا کہ میری ہر اپوزیشن کے خلاف کوشش ہو گی ٹیم کے لیے اچھا کروں اور چیزوں کو سادہ رکھوں کراؤڈ کے لیے میچز کی مختلف اہمیت ہو سکتی ہے لیکن ہمارے لیے یہی ہوتا ہے کہ ہر میچ میں اچھا کرنا ہے۔

راشد خان کا کہنا ہے کہ ٹریکنگ ڈیوائس کی وجہ سے کوئی دباؤ نہیں ہے کسی کے دماغ میں ایسا کچھ بھی نہیں ہے ہم سب عادی ہو چکے ہیں، کووڈ کی صورتحال میں اب یہ سب نارمل ہے قرنطینہ معمول کا حصہ بن چکا ہے اب فوکس کرکٹ پر ہے۔

قومی اسمبلی کی قائمہ کمیٹی برائے بین الصوبائی رابطہ کے اجلاس میں پاکستان کرکٹ بورڈ (پی سی بی) کے چیئرمین احسان مانی سے ان کی تنخواہ کی تفصیلات مانگ لی گئیں۔

آغا حسن بلوچ کی زیر صدارت قومی اسمبلی کی قائمہ کمیٹی برائے بین الصوبائی رابطہ کے اجلاس میں پی سی بی کے چیئرمین احسان مانی کی تنخواہ پر سوال اٹھایا گیا۔

کمیٹی رکن مہرین بھٹو نے چیئرمین پی سی بی سے ان کی تنخواہ سے متعلق دریافت کیا تو احسان مانی نے کہاکہ تنخواہ کی تفصیل اِن کیمرہ پوچھی جائے۔ اس پر مہرین بھٹو نے کہاکہ تنخواہ کب سے ملکی سلامتی کا ایشو ہوگیا جو اسے اِن کیمرہ ڈسکس کیا جائے؟

کمیٹی کے ایک اور رکن گل ظفر خان نے احسان مانی سے کہاکہ آپ نے ایسا کیا کیا، جو چھپا کر بتانا چاہ رہے ہیں؟

ممبر کمیٹی روبینہ جمیل نے کہا کہ پی سی بی کا بجٹ بتایا جائے، بتایا جائے کہ کتنا پیسہ کدھر جاتا ہے؟ اس پر احسان مانی کا کہنا تھاکہ کوئی تنخواہ نہیں لیتے، باقی تفصیلات ویب سائٹ پر موجود ہیں، چار لیول کے آڈٹ ہوتے ہیں جس میں کچھ نہیں چھپ سکتا۔

کمیٹی کے رکن اقبال خان نے چیف ایگزیکٹو آفیسر پی سی بی وسیم خان کی قابلیت کا پوچھا جس پر پی سی بی چیئرمین نے کہا کہ وسیم خان جتنا قابل پاکستان میں کوئی نہیں۔

جواباً پوری کمیٹی میں چیئرمین پی سی بی کے بیان پر قہقہے لگے۔

ٹینس کے گرینڈ سلیم ٹورنامنٹ فرنچ اوپن میں روسی کھلاڑی یانا سزی کووا کو میچ فکسنگ الزامات پر گرفتار کر کے تفتیش شروع کردی گئی ہے۔

خبر رساں ایجنسی رائٹرز کے مطابق پولیس ذرائع اور فرنچ ٹینس فیڈریشن نے کہا کہ کھلاڑی کو گرفتار کیا گیا ہے لیکن اس کی کوئی وجہ بیان نہیں کی گئی۔

اس حوالے سے باخبر ایک ذرائع نے بتایا کہ یہ گرفتاری میچ فکسنگ کی وجہ سے کی گئی ہے۔

گزشتہ ستمبر فرنچ پراسیکیوٹر نے فرنچ اوپن میں ویمنز ڈبل میچ کے دوران میچ فکسنگ کے مبینہ الزامات کی تفتیش کا آغاز کیا تھا۔

یہ تفتیش رومانیہ کی جوڑی آندریا میتو اور پیٹریشیا ماری اور روس کی سزی کووا اور امریکی میڈیسن برینگل کے درمیان کھیلے گئے میچ منظم گروپ کے فراڈ اور کرپشن کے حوالے سے تھی۔

مذکورہ میچ میں امریکی اور روسی کھلاڑیوں پر مشتمل جوڑی کو رومانیا کی جوڑی کے ہاتھوں فرنچ اوپن کے ابتدائی راؤنڈ میں شکست کا سامنا کرنا پڑا تھا۔

روسی ٹینس فیڈریشن کے صدر شامل ترپی شیو نے بتایا کہ انہیں سزی کووا کو حراست میں لیے جانے کا علم ہےاور پیرس میں روسی سفارتخانے کو صورتحال سے آگاہ کردیا گیا ہے۔

انہوں نے کہا کہ انہیں کوئی دستاویز موصول نہیں ہوئی ہے لہٰذا فی الحال یہ اندازہ لگانا مشکل ہے کہ کیا ہوا ہے۔

ٹینس میں شفافیت یقینی بنانے والی آزاد ایجنسی نے اس حوالے سے سوال پر کسی تبصرے سے انکار کردیا۔

26سالہ ڈبلز کی اسپیشلسٹ اس وقت عالمی درجہ بندی میں 101ویں نمبر پر موجود تھے اور ذرائع کے مطابق روسی کھلاڑی کے ساتھ ساتھ دیگر کھلاڑیوں سے بھی تفتیش کی جا رہی ہے۔

پیرس کے پراسیکیورٹر کے دفتر نے خبر رساں ایجنسی اے پی سے گفتگو کرتے ہوئے کہا کہ سزی کووا کو جمعرات کو کھیل میں رشوت اور منظم فراڈ کے الزامات کے تحت گرفتار کیا گیا ہے۔

یانا سزی کووا کو اس وقت گرفتار کیا گیا جب وہ جمعرات کو پہلے راؤنڈ کے میچ کے بعد مساج سیشن سے باہر آتے ہوئے گرفتار کیا گیا، مذکورہ میچ میں انہیں اور ان کی ساتھی یکے ترینا اور الیگزینڈرووا کو اسٹریٹ سیٹ میں آسٹریلین جوڑی کے ہاتھوں شکست ہوئی۔

گزشتہ سال پہلی مرتبہ فرنچ اوپن میں شرکت کی اہل قرار دی جانے والی روسی کھلاڑی سزی کووا کے ہوٹل کے کمرے کی تلاشی بھی لی گئی۔

قومی کرکٹ ٹیم کی سلیکشن کمیٹی نے انگلینڈ اور ویسٹ انڈیز میں 3 ون ڈیز، 2 ٹیسٹ اور 8 ٹی 20 میچز کھیلنے کے لیے پاکستانی کرکٹ ٹیم کے اسکواڈ کا اعلان کردیا۔

اس ضمن میں جاری کردہ پریس ریلیز کے مطابق حارث سہیل کی ون ڈے، عماد وسیم کی ٹی 20 میچز جبکہ محمد عباس اور نسیم شاہ کی ٹیسٹ میچز کے اسکواڈ میں واپسی ہوئی ہے۔

علاوہ ازیں مڈل آرڈر بیٹسمین اعظم خان کو پہلی مرتبہ قومی ٹی 20 ٹیم جبکہ سلمان علی آغا کو ون ڈے ٹیم کا حصہ بنایا گیا ہے۔

ون ڈے اسکواڈ: بابر اعظم (کپتان)، شاداب خان (نائب کپتان)، عبداللہ شفیق، فہیم اشرف، فخر زمان، حیدر علی، حارث رؤف، حارث سہیل، حسن علی، امام الحق، محمد حسنین، محمد نواز، محمد رضوان، سلمان علی آغا، سرفراز احمد، سعود شکیل، شاہین شاہ آفریدی، عثمان قادر۔

ٹی 20 اسکواڈ:: بابر اعظم (کپتان)، شاداب خان (نائب کپتان)، ارشد اقبال، اعظم خان، فہیم اشرف، فخر زمان، حیدر علی، حارث رؤف، حسن علی، عماد وسیم، محمد حفیظ، محمد حسنین، محمد نواز، محمد رضوان، محمد وسیم جونیئر، سرفراز احمد، شاہین شاہ آفریدی، شرجیل خان، عثمان قادر

ٹیسٹ اسکواڈ: بابر اعظم (کپتان)، محمد رضوان (نائب کپتان)، عبداللہ شفیق، عابد علی، اظہر علی، فہیم اشرف، فواد عالم، حارث رؤف، حسن علی، عمران بٹ، محمد عباس، محمد نواز، نسیم شاہ، نعمان علی، ساجد خان، سرفراز احمد، سعود شکیل، شاہین شاہ آفریدی، شاہنواز دھانی، یاسر شاہ(فٹنس سے مشروط)، زاہد محمود

پی سی بی کی جانب سے جاری بیان میں کہا گیا کہ کوئٹہ گلیڈی ایٹرز کے 22سالہ اعظم خان ٹی20 انٹرنیشنل میں نیا چہرہ ہیں۔

قومی ٹیم 8 سے 20 جولائی تک انگلینڈ کے خلاف تین ون ڈے اور اتنے ہی انٹرنیشنل ٹی20 میچ کھیلے گی جس کے بعد گرین شرٹس ویسٹ انڈیز روانہ ہوں گے جہاں وہ پانچ ٹی20 اور دو ٹیسٹ میچ کھیلیں گے۔

یاسر شاہ کی ٹیم میں شمولیت فٹنس سے مشروط ہے کیونکہ وہ گھٹنے کی انجری کا شکار ہیں اور اسی وجہ سے زمبابوے کے خلاف ٹیسٹ سیریز کھیلیں گے۔

اعلامیے میں کہا گیا کہ سلیکٹرز نے اسپنر زاہد محمود، نعمان علی اور ساجد خان کو اسکواڈ میں برقرار رکھا ہے، انجری کی وجہ سے جنوبی افریقہ کے خلاف ون ڈے سیریز سے باہر ہونے والے سعود شکیل بھی دوبارہ ٹیم میں جگہ پانے میں کامیاب رہے جبکہ سلمان علی آغا کو ون ڈے ٹیم میں طلب کر لیا گیا ہے۔

ٹیسٹ ٹیم مستحکم ہے، محمد وسیم
بعدازاں ایک پریس کانفرنس کرتے ہوئے چیف سیلیکٹر محمد وسیم نے کہا کہ فٹنس بہتر ہونا انتہائی اہم ہے لیکن ساتھ ہی اسکواڈ کی سلیکشن میں ٹیم کی ضرورت کو بھی مدِنظر رکھا گیا۔

عماد وسیم کے بارے میں ان کا کہنا تھا کہ متحدہ عرب امارات میں ورلڈ کپ ہونے کا امکان ہے اور عماد وسیم کی کارکردگی یو اے ای میں بہت اچھی رہی ہے اس لیے مستقبل کو سامنے رکھتے ہوئے انہیں ٹیم میں شامل کیا گیا۔

ڈومیسٹک کھلاڑیوں کے حوالے سے پوچھے گئے ایک سوال کے جواب میں محمد وسیم نے کہا کہ ٹیسٹ ٹیم مستحکم ہے اور اچھی کارکردگی والے کھلاڑی ٹیم میں شامل ہونے کے لیے تیار ہیں جن کی درجہ بندی ہم نے کی ہوئی ہے۔

کھلاڑیوں کی کارکردگی سے متعلق سوال کے جواب میں انہوں نے کہا کہ کوشش کررہے ہیں کہ ورلڈ کپ سے پہلے ٹیم مستحکم ہوجائے، کوئی بھی ٹیم ورلڈکپ سے پہلے 100 فیصد تیار نہیں ہوتی ایک سے 2 سلاٹ ایسے ہوتے ہیں جن پر دوبارہ غور کیا جاتا ہے اور آگر آئندہ ٹوور سے وہ سلاٹس پُر نہ ہوئے تو پی ایس ایل اور ڈومیسٹک کی کارکردگی دیکھی جائے گی۔

شعیب ملک اور محمد حفیظ کو ٹیم میں شامل نہ کرنے کے حوالے سے سوال کے جواب میں انہوں نے کہا کہ ان دونوں سے بات چیت جاری ہے لیکن مجھے یا کسی اور کو کسی کھلاڑی کے کیریئر کا فیصلہ کرنے کا حق نہیں ہے لیکن اس وقت جو بہتر آپشنز موجود تھے انہیں ٹیم میں شامل کیا گیا ہے۔

محمد وسیم نے کہا کہ سلیکشن میں پی سی بی کی مستقل مزاجی برقرار ہے اور انہی کھلاڑیوں کو برقرار رکھا ہے جو ایک عرصے سے نظام کا حصہ ہیں۔

ان کا کہنا تھا کہ یہ پاکستان کے لیے انتہائی اہم دورہ ہے کیونکہ قومی ٹیم انگلینڈ کے خلاف ورلڈ کپ سپر لیگ کے میچز کھیلے گی اور ٹی20 ورلڈ کپ کی تیاریوں کے سلسلے میں انگلینڈ اور ویسٹ انڈیز کے خلاف ٹی20 میچ کھیلے گی۔

انہوں نے کہا کہ ہم نے ٹیم میں فاتحانہ کمبی نیشن برقرار رکھنے کی کوشش کی ہے لیکن اس کے ساتھ ساتھ چار تجربہ کار کھلاڑیوں اور اعظم خان کو ڈومیسٹک کارکردگی کی بنیاد پر ٹیم میں شامل کیا ہے تاکہ انہیں مستقبل کے چیلنجز کے لیے درکار اعتماد بخشا جا سکے۔

ان کا کہنا تھا کہ محمد عباس، یاسر شاہ اور حارث سہیل فارم اور فٹنس کے حصول میں کامیاب رہے ہیں جس کی وجہ سے انہیں اسکواڈ میں شامل کیا گیا۔

چیف سلیکٹر نے کہا کہ چار کھلاڑیوں کی واپسی کی وجہ سے ہمیں کچھ کھلاڑیوں کو اسکواڈ سے باہر کرنا پرا اور ہمارے لیے یہ فیصلہ کرنا آسان نہیں تھا لیکن ہم نے آنے والے دوروں میں ٹیم کی ضروریات اور حریف کو مدنظر رکھتے ہوئے ٹیم کے بہترین مفاد میں متفقہ فیصلہ کیا۔

اعظم خان نے 30کلو وزن کم کیا
جارح مزاج مڈل آرڈر بلے باز اعظم خان کو پہلی مرتبہ قومی ٹیم کا حصہ بنا لیا گیا ہے۔

اعظم خان گزشتہ سال سے سلیکٹرز کی نظروں میں تھے لیکن انہیں قومی ٹیم میں سلیکشن کے لیے اپنا 130 کلو وزن کم کرنے کی ہدایت کی گئی تھی۔

قومی ٹیم کے سابق کپتان معین خان کے صاحبزادے اعظم خان نے دعویٰ کیا ہے کہ انہوں نے گزشتہ 12ماہ میں 30 کلو وزن کم کیا ہے اور وہ اب تک 36 ڈومیسٹک میچوں میں 157 کے استرائیک ریٹ سے بیٹنگ کرتے رہے ہیں۔

چیف سلیکٹر محمد وسیم نے کہا ہے کہ انگلینڈ اور ویسٹ انڈیز ٹور کے لیے سب کی مشاورت ،کنڈیشنز اور ابوظہبی میں ممکنہ ورلڈکپ کو سامنے رکھتے ہوئے لڑکوں کا انتخاب کیا ہے۔

دورہ انگلینڈ اور ویسٹ انڈیز کے لیے ٹیم کے حوالے سے پریس کانفرنس کرتے ہوئے چیف سلیکٹر نے کہا کہ عماد وسیم نے ابوظہبی میں کافی پرفارم کیا ہے، یہ ٹور اس کے لیے بڑا اہم ہے۔جب عماد وسیم کو ڈراپ کیا اس وقت حالات کچھ اور تھے اور اب حالات مختلف ہیں ۔ ورلڈ ٹی ٹونٹی متحدہ عرب امارات ہونے کی صورت میں عماد وسیم وہاں فائدہ مند ثابت ہوسکتے ہیں ۔وہ اس ٹور میں پرفارمنس دے کر اعتماد بحال کرنے کے ساتھ ورلڈکپ کے لیے اہم کردار ادا کرسکتے ہیں۔

محمد وسیم نے کہا کہ شرجیل خان اور اعظم خان کے انتخاب میں فٹنس میں بہتری کے ساتھ ان کی اسکلز کو بھی مدنظر رکھا ہے۔ہمیں دیکھنا ہے کہ ٹیم کی ضرورت کیا ہے۔ ہمیں فٹنس اور ٹیم کی ضروریات دونوں کو مدنظر رکھنا ہے ۔شرجیل خان کو ٹیم میں لیتے وقت ان کی فٹنس کے ٹارگٹس دیے تھے ۔ شرجیل خان اور اعظم خان کی فٹنس میں بہتری آئی ہے اور ان کومستقبل کے لیے بھی اہداف دئیے گئے ہیں۔

شعیب ملک اور وہاب ریاض کے بارے میں سوال پر محمد وسیم نے تھوڑے توقف کے بعد کہا کہ ان دونوں سے بات بھی ہوئی ہے، ان کے لیے ٹیم کے دروازے بند نہیں کیے۔اس وقت ہماری بولنگ بہت اچھی جارہی ہے، مستقبل میں اگر کہیں تبدیلی کی ضرورت پڑی تو ان کو زیر غور لایا جائے گا۔ ان کے ساتھ کوئی بھی پرفارمنس دے کر سلیکشن کا اہل ثابت کرسکتا ہے، پی ایس ایل سے پہلے ٹیم کا انتخاب لاجسٹک مسائل کی مجبوری کی وجہ سے کیا، پی ایس ایل پرفارمر پر بالکل نظر ہوگی، ورلڈکپ سے پہلے اگر کمبی نیشن میں بہتری کرنا پڑی تو ان پرفارمر کو یقینی طور پر زیر غور لائیں گے۔

ایک سوال پر چیف سلیکٹر کا کہنا تھا کہ عثمان صلاح الدین، وقاص مقصود ، ثمین گل اور دیگر کھلاڑی ہمارے پلان کا حصہ ہیں، ہماری ٹیسٹ ٹیم سیٹ ہے وہاں پر بلاوجہ تبدیلی کے حق میں نہیں ہیں۔ باؤلنگ میں کچھ چیزیں دیکھنا پڑتی ہیں ۔ہائی پرفارمنس کیمپ میں جتنے کھلاڑی آئے ہیں وہ پرفارم کرکے آئے ہیں۔

محمد وسیم نے تابش خان کے اخراج اور سوشل میڈیا کے دباؤ پر ٹیم سلیکشن کے سوال کا جواب دینے کے بجائے سنی ان سنی کرکے معاملہ گول کردیا۔

قیدِ تنہائی ختم ہونے کے بعد کرکٹرز پریکٹس میں سرگرم ہوگئے جب کہ حتمی شیڈول جاری کیے جانے پر جوش و خروش میں اضافہ ہوگیا۔

پی ایس ایل 6کے ابوظبی میں باقی میچز کیلیے لاہور اور کراچی سے روانہ ہونے والے 2 چارٹرڈ طیاروں میں پہنچنے والے کرکٹرز، معاون اسٹاف ارکان اور پی سی بی آفیشلز کا قرنطینہ مکمل ہوگیا۔

آخری کورونا ٹیسٹ بھی منفی آنے پر بائیوببل میں موجود کرکٹرز کو ٹریننگ کی آزادی مل گئی ہے، بدھ کو اسلام آباد یونائیٹڈ اور لاہور قلندر زکی ٹیموں نے شیخ زید اسٹیڈیم ابوظبی میں پریکٹس سیشنز کیے تھے۔

ایونٹ میں شریک دیگر 5ٹیموں دفاعی چیمپئن کراچی کنگز، اسلام آباد یونائیٹڈ، پشاور زلمی،کوئٹہ گلیڈی ایٹرز اور ملتان سلطانز نے بھی گذشتہ روز مشقوں کا آغاز کردیا، قید تنہائی ختم ہونے پر کھلاڑی پریکٹس میں سرگرم ہوگئے ہیں۔ پی ایس ایل کا حتمی شیڈول سامنے آنے اور غیر یقینی صورتحال ختم ہونے پر بھی ان کے جوش و خروش میں اضافہ ہوگیا۔

پی سی بی کے ترجمان کا کہنا ہے کہ کھلاڑیوں، فرنچائزز اورکمرشل پارٹنرز کی سہولت کے پیش نظر پی ایس ایل کا شیڈول قابل عمل بنانے کے لیے انگلینڈ اینڈ ویلز کرکٹ بورڈ سے رابطہ کرکے اسکواڈ کو 23کے بجائے 25 جون کو بھیجنے پر اتفاق کیا گیا ہے۔

کھلاڑی اور سپورٹ اسٹاف یو اے ای سے مانچسٹر روانہ ہوں گے،وہاں سے ڈربی پہنچ کر قرنطینہ اور ٹریننگ سیشنز میں حصہ لیں گے، قومی اسکواڈ 6 جولائی کو ڈربی سے کارڈف پہنچے گا،جہاں پہلا ون ڈے انٹرنیشنل 8 جولائی کوکھیلا جائے گا۔

قومی کرکٹر اور بہترین بلے باز احمد شہزاد کے ہاں دوسرے بچے کی پیدائش پر اسپورٹس شخصیات اور سیاستدانوں سمیت شوبز شخصیات نے انہیں مبارک باد پیش کی ہے۔

احمد شہزاد نے ستمبر 2015 میں ثنا احمد سے سادگی سے شادی کی تھی اور جوڑے کے ہاں شادی کے دو سال بعد 2017 میں پہلے بچے کی پیدائش ہوئی تھی۔

احمد شہزاد اور ثنا احمد کے ہاں 20 اپریل 2017 کو پہلے بچے کی پیدائش ہوئی تھی، ان کے ہاں پہلے بیٹا ہوا تھا، جو اب 4 سال کا ہو چکا ہے۔

قومی کرکٹر کے ہاں دو جون کو بیٹی کی پیدائش ہوئی اور انہوں نے مذکورہ خبر ٹوئٹ کے ذریعے مداحوں کو بتائی۔

احمد شہزاد نے مختصر ٹوئٹ میں خدا کا شکر ادا کیا اور بتایا کہ ان کے ہاں بیٹی کی پیدائش ہوئی ہے۔

قومی کرکٹر کی جانب سے ٹوئٹ کیے جانے کے بعد متعدد اسپورٹس کھلاڑیوں، سیاستدانوں، شوبز شخصیات اور دیگر افراد نے انہیں مبارک باد دی اور انہیں خوش قسمت قرار دیا کہ ان کے ہاں بچی کی پیدائش ہوئی۔

احمد شہزاد کو مبارک باد دینے والے افراد میں کرکٹر شاہد آفریدی، سینیٹر فیصل جاوید خان، اداکار شان، جنید خان، شاداب خان، انور علی خان، محمد نواز، اعزاز چیمہ اور دیگر افراد نے بھی مبارک باد دیتے ہوئے انہیں بیٹی کی پیدائش پر خوش قسمت قرار دیا۔

دبئی: انٹرنیشنل کرکٹ کونسل نے ایونٹس کی میزبانی کیلیے بڈنگ پر بھی یوٹرن لے لیا۔

انٹرنیشنل کرکٹ کونسل نے اپنی اکتوبر 2019 کی میٹنگ میں جو اہم فیصلے کیے ان میں اگلے دورانیے کے ٹورنامنٹس کیلیے میزبانوں کاانتخاب دوسرے کھیلوں کی طرح اوپن بڈنگ سے کرنا بھی شامل تھا، فروری 2020 میں آئی سی سی نے باقاعدہ بڈنگ کیلیے کارروائی شروع کرتے ہوئے ممبربورڈزکو ای میل بھیجی تھی جس میں انھیں کسی بھی ایونٹ کیلیے دلچسپی ظاہر کرنے کو کہا گیا تھا۔

اس حوالے سے تب کے چیف ایگزیکٹیو مانو سواہنے نے مختلف ممالک کا دورہ کرکے بڑے ٹورنامنٹس کی میزبانی کیلیے بڈ دینے کے شوق کو بھی ہوا دی، جس کے جواب میں کئی ممالک نے ٹورنامنٹس کی میزبانی میں دلچسپی بھی ظاہر کردی۔

اس میں پاکستان کرکٹ بورڈ، بنگلادیش اور کرکٹ جنوبی افریقہ بھی شامل تھا، بھارت، انگلینڈ اور آسٹریلیا کی جانب سے کسی بھی ٹورنامنٹ کی میزبانی کے حوالے سے بڈ دینے میں دلچسپی ظاہر نہیں ہوئی، بھارت اور انگلینڈ تو اس عمل کے حق میں ہی نہیں تھے، ان کا موقف تھا کہ بہت سے ممالک کے پاس بڑے ٹورنامنٹس کے انعقاد کا موزوں اسٹرکچر ہی موجود نہیں ہے۔

آسٹریلیا کا کہنا تھا کہ کچھ ٹورنامنٹس نفع بخش مارکیٹ میں بھی منعقد ہونا چاہیئں۔ اسی بات نے آئی سی سی کو اپنے ایک اور فیصلے سے یوٹرن لینے پر مجبور کردیا۔

اب میزبانی کیلیے اوپن بڈنگ نہیں ہوگی بلکہ کونسل کا بورڈ ہی موزوں میزبانوں کا انتخاب کرے گا، جس کیلیے عمل رواں ماہ سے شروع ہوجائے گا، ستمبر میں اگلے دورانیے کے میگا ایونٹس کے میزبانوں کا باقاعدہ اعلان بھی کردیا جائے گا۔

یاد رہے کہ بھارت، آسٹریلیا اور انگلینڈ نے گذشتہ دورانیے میں بگ تھری بنا کر رواں سائیکل کے تمام بڑے ٹورنامنٹس آپس میں بانٹ لیے تھے۔