Category فٹ بال

برازیل(وقت نیوزآن لائن) کے لیجنڈ فٹبالر کاکا کے ساتھ سیلفی لینے کے لیے خاتون ریفری نے انہیں یلو (پیلا)کارڈ دکھا کر میچ رکوا دیا۔

برازیلی فٹبال ٹیم کے سابق اسٹار کھلاڑی کاکا کی مقبولیت آج بھی برقرار ہے ۔ اس کا مظاہرہ گزشتہ روز اُس وقت دیکھنے میں آیا جب ایک چیریٹی میچ کے دوران خاتون ریفری نے غیر متوقع طورپر سیٹی بجا کر میچ رکوا دیا۔

خاتون ریفری کی جانب سے میچ اُس وقت رکوایا گیا جب گیند کاکا کے کنٹرول میں تھی۔ ریفری کی جانب سے میچ رکوانے پر کاکا سمیت دونوں ٹیموں کے کھلاڑی حیران تھے کہ ریفری بھاگتی ہوئی کاکا کے پاس آئی اور انہیں یلو کارڈ دکھا دیا جس پر تمام کھلاڑی اور شائقین ششدر رہ گئے۔

تایم ریفری نے سب کی حیرت ختم کرتے ہوئے اپنا موبائل نکالا اور کاکا کے ساتھ سیلفی لے لی، جس پر گراؤنڈ کا ماحول یکسر تبدیل ہوگیا اورکاکا بھی خاتون ریفری کی اس حرکت پر مسکرائے بغیر نہ رہ سکے۔ واضح رہے کہ انٹرنیشنل کیریئر سے 2 سال قبل ریٹائرمنٹ لینے والے 37 سالہ کاکا کا شمار برازیل کی قومی ٹیم کے انتہائی اہم مڈفلیڈرز میں ہوتا تھا۔

2007 میں انہیں فٹبال کی عالمی تنظیم فیفا کی جانب سے سال کے بہترین کھلاڑی کا اعزاز بھی دیا گیا تھا۔ وہ اٹلی کے معروف فٹبال کلب اے سی میلان اور نامور ہسپانوی کلب ریال میڈرڈ کا بھی حصہ رہ چکے ہیں۔

(ایمرا نیوزآن لائن) پرتگال کے معروف فٹبالر کریسٹیانو رونالڈو سوشل میڈیا پر فٹبال سے زیادہ معاوضہ وصول کرنے والے کھلاڑی بن گئے۔

ہاپر ایچ کیو کے بز بنگو میں شائع ہونے والے مطالعے کے مطابق پرتگال کے معروف فٹبالر رونالڈو کھیل کے میدان سے زیادہ انسٹاگرام پر اسپانسرڈ پوسٹ سے کما لیتے ہیں۔

ایک رپورٹ کے مطابق رونالڈو نے گزشتہ سال کھیل کے میدان سے 3 کروڑ 40 لاکھ ڈالر معاوضہ وصول کیا تھا جس کے بعد یہ دنیا میں دوسرے نمبر پر سب سے زیادہ معاوضہ وصول کرنے والے ایتھلیٹ بنے تھے۔ اب رونالڈو صرف انسٹاگرام سے سالانہ 4 کروڑ 78 لاکھ ڈالرز کما کر ریکارڈ توڑ معاوضہ وصول کرنے والے کھلاڑیوں کی فہرست میں پہلے نمبر پر آگئے ہیں۔

انسٹاگرام پر سب سے زیادہ کمانے والوں کی فہرست میں رونالڈو کے بعد ارجنٹینیا کے فٹبالر لیونل میسی ہیں جو سوشل میڈیا ایپ کے ذریعے 2 کروڑ 33 لاکھ ڈالر سالانہ کمائی کے ساتھ دوسرے نمبر پر ہیں جب کہ اس فہرست میں تیسرا نمبر کینڈل جینر کا ہے جو اس پلیٹ فارم سے سالانہ ایک کروڑ 60 لاکھ ڈالر ڈالر کماتی ہیں۔ سوشل میڈیا کی معروف ایپ انسٹاگرام پر رونالڈو کے 187 ملین فالورز ہیں اور یہ سوشل میڈیا پر سب سے زیادہ فالووز رکھنے والے کھلاڑی ہیں۔

انسٹاگرام پر اتنی تعداد میں فالوورز ہونے کی وجہ سے کمپنیاں رونالڈو کے ساتھ کام کرنے کی خواہش رکھتی ہیں جس میں جوتوں کی بین الاقوامی کمپنی نائکی اور شیمپو کی معروف کمپنی کلیئر بھی شامل ہے۔

( میڈیا 92 نیوز آن لا ئن ) امریکی ریاست اوہایو میں مسلمان ایتھلیٹ کو حجاب پہننے کی وجہ سے مقابلے سے باہر کردیا گیا۔

برطانوی نشریاتی ادارے کے مطابق 16 سالہ مسلم ایتھلیٹ نور ابوکارام کے مطابق حجاب پہننے پر انہیں کہا گیا کہ ان کا لباس ریس میں حصہ لینے کے قواعد و ضوابط کے خلاف ہے۔

ایتھلیٹ نور نے اپنی فیس بک پوسٹ پر بتایا کہ ضلعی سطح پر مقابلوں میں ان کے حجاب کو کبھی بھی مسئلہ نہیں بنایا گیا، وہ ہمیشہ سے سیلوانیا نارتھ ویو اسکول ٹیم کی نمائندگی کرتی آرہی ہیں۔ نور نے مزید بتایا کہ جب سرکاری انتظامیہ ان کی ٹیم کا معائنہ کرنے کے لیے آئی تو انہوں نے ٹیم کی ایک ممبر کو شارٹس تبدیل کرنے کو کہا کیونکہ یہ ان کے قواعد کی خلاف ورزی تھی مگر انتظامیہ نے انہیں اس وقت حجاب کے حوالے سے کچھ بھی نہیں کہا۔

ایتھلیٹ کا کہنا تھا کہ اسی دوران انہوں نے اپنے کوچ کو انتظامیہ سے کچھ نجی گفتگو کرتے ہوئے بھی دیکھا تھا۔ نور ابو کارام نے بتایا کہ جیسے ہی انہوں نے 5 کلو میٹر کی دوڑ کو عبور کیا تو وہ یہ دیکھ کر حیران رہ گئیں کہ اسکور بورڈ پر ان کا نام موجود نہیں تھا جس پر ان کے کچھ ساتھیوں نے بتایا کہ انہیں حجاب کی وجہ سے مقابے کیلئے نااہل قرار دیا گیا ہے۔

نور ابوکارام نے کہا کہ اس معاملے پر کافی مسئلہ کھڑا ہوجانے کے بعد اوہایو ہائی اسکول ایتھلیٹک ایسوسی ایشن نے آئندہ مذہبی قواعد و ضوابط میں چھوٹ دینے پر نظر ثانی کی یقین دہانی کرائی ہے۔ واضح رہے کہ حجاب کے حوالے سے یہ تنازع کوئی نئی بات نہیں ہے، اس سے قبل بھی گزشتہ سال پینسلوینیا کے شہر فلاڈیلفیا میں باسکٹ بال کی 16 سالہ کھلاڑی کو اس کے حجاب پہننے پر کھیل چھوڑنے کا کہا گیا تھا۔

پرتگال (ایمرا نیوز آن لائن) پرتگال کے عالمی شہرت یافتہ فٹبالر کرسٹیانو رونالڈو اپنی بے پناہ مقبولیت اور شہرت سے تنگ آگئے۔ایک برطانوی ٹی وی کو انٹرویو دیتے ہوئے پرتگالی اسٹار اور اٹلی کے معروف فٹبال کلب یووینٹس کے کھلاڑی کرسٹیانو رونالڈو نے کہا کہ وہ بے پناہ مقبولیت اور شہرت سے تنگ آچکے ہیں، رونالڈو کا کہنا تھا کہ اس وجہ سے میں اپنے بچوں کے ساتھ سکون سے پارک بھی نہیں جاسکتا۔

رونالڈو کا کہنا تھا کہ اخبارات اور ٹی وی میں نمایاں جگہ ملنا یہ سب شروع میں اچھا لگتا تھا تاہم اب 15 سال بعد میں ان سب سے عاجز آچکا ہوں اور اب کچھ پرائیویسی چاہتا ہوں۔فٹبالر کا کہنا تھا کہ گذشتہ 10 سالوں میں میری پرائیویسی تباہ ہوچکی ہے اگر میں اپنے چار بچوں کے ساتھ پارک چلا بھی جاؤں تو مداحوں کے رش کی وجہ سے میرے بچے گھبرا جاتے ہیں یہاں تک کہ میں بھی پریشان ہوجاتا ہوں اس لیے میں دوبارہ وہی پرانی آزادی چاہتا ہوں۔

دنیا بھر میں اپنے لاکھوں مداح رکھنے والے رونالڈو کا کہنا تھا کہ ان کے بہت سے قریبی دوست اور احباب ہیں لیکن صرف چار ایسے لوگ ہیں جن پر وہ 100 فیصد اعتبار کرسکتے ہیں۔واضح رہے کہ پرتگالی فٹبالر کرسٹیانو رونالڈو کا شمار دنیا میں کھیل کے ذریعے سب سے زیادہ دولت کمانے والوں میں دوسرے نمبر پر ہوتا ہے ،اس دوڑ میں صرف ان کے پرانے حریف لاینل میسی ہی آگے ہیں۔معروف امریکی جریدے فوربس کی رواں سال کی رپورٹ کے مطابق رونالڈو کی سالانہ آمدنی 10 کروڑ 90 لاکھ ڈالر سالانہ ہے جو کہ پاکستانی روپے میں 16 ارب روپے سے زائد بنتی ہے۔

کراچی (ایمرا نیوز آن لائن) پاکستان کےغذائی قلت کے شکار صحرائے تھر کی دو ہندو لڑکیا ں دیوی میگھواڑ اور جمنا بھیل چین میں منعقدہ نوجوانوں کے فٹبال ورلڈ کپ میں پاکستان کی نمائندگی کریں گی ۔کمسن لڑکیا ں ملک میں فٹبال کے فروغ کے سلسلے میں عملی طور پر کوشاں ہیں اور چین میں منعقدہ یوتھ فٹبال ورلڈکپ میں بھرپور صلاحیتوں کے جوہر دکھانے کو تیار ہیں۔

سماجی تنظیم نے حال ہی میںان دونوں لڑکیوں کو کراچی میں دس روزہ تربیتی کیمپ میں حصہ دلوایا جہاں انہوں نے پریکٹس میچ بھی کھیلے۔ جمنا بھیل دفاعی کھلاڑی جبکہ دیوی میگھواڑ گول کیپر ہیں۔گوتھیا یوتھ فٹبال ورلڈ کپ کا آغاز14اگست سےچین کے صوبے چنگ ڈاؤ میں ہورہا ہے۔ اس ٹورنامنٹ کا اختتام 17اگست کو ہوگا۔

واضح رہے کہ اس سالانہ ٹورنامنٹ کا انعقاد پیشہ ورانہ فٹبال کلب بی ۔ کے ہیکن 1975 سے سوڈان کے شہر گوتھن برگ میں کرتا آیا ہے اور اس میں ہر سال 80 ممالک کی 1700 سے زائد ٹیمیں حصہ لیتی ہیں اور 1100 فٹبال میدانوں میں 4500 میچ ہوتے ہیں۔

گوتھیا یوتھ فٹبال ٹورنامنٹ میں اس سال 36ملکوں کی 340 ٹیمیں حصہ لیں گے۔ اس ٹورنامنٹ کا میلہ 42مقامات پر سجے گا۔ٹورنامنٹ کے جنرل سیکرٹری ڈینس اینڈرسن نےبتایا کہ گوتھیا فٹبال ٹورنامنٹ میں ہر قومیت، نسل، جنس اور رنگ کے نوجوان حصہ لیتے ہیں۔

قاہرہ (ایمرا نیوز آن لائن) افریقن کپ آف نیشنز میں سپر اسٹار محمد صلاح کی مصری ٹیم جنوبی افریقہ سے ہار کر باہر ہو گئی، ادھر کوپا امریکا ایونٹ میں چودہ سال بعد ریڈ کارڈ پر آؤٹ ہونے والے میسی کی ٹیم ارجنٹائن نے چلی کو شکست دے دی۔

دنیا کے ہردلعزیز کھیل فٹبال کے دوبڑے ایونٹس میں تگڑے مقابلے، افریقہ کپ آف نیشنز میں سپر سٹار محمد صلاح کی ٹیم مصر اور جنوبی افریقہ مدمقابل ہوئے۔ زور کے جوڑ میں پہلے ہاف تک کوئی گول نہ ہوا، دوسرے ہاف کے آخری منٹس میں لورچ نے گیند کو جال میں ڈال کر پروٹیز کو برتری دلائی، یہی سبقت فیصلہ کن ثابت ہوئی۔

دوسرا میچ کوپا امریکا کپ میں ہوا، تیسری پوزیشن کے لیے ارجنٹائن اور چلی آمنے سامنے آئے، ارجنٹائن کی طرف سے بارہویں اور بائیسویں منٹ میں گول ہوئے، سینتیسویں منٹ میں مایہ ناز لیونل میسی ریڈ کارڈ پر آؤٹ، چودہ سال بعد یہ ان کے کیرئر میں دوسری بار ہوا۔ اس تاریخی واقعے کے بعد ارجنٹائن کو دو ایک سے فتح یعنی تیسری پوزیشن ملی۔

سویڈن (ایمرا نیوز لاہور) ویمنز ورلڈ کپ فٹبال: سوئیڈن سیمی فائنل میں پہنچ گیا سوئیڈن کی ٹیم دوبار کی عالمی چیمپئن جرمنی کو سنسنی خیز مقابلے کے بعد ایک کے مقابلے میں دو گول سے شکست دیکر فیفا ویمنز ورلڈ کپ فٹبال ٹورنامنٹ کے سیمی فائنل میں پہنچ گئی۔
سیمی فائنلز میں منگل 2جولائی کو دفاعی چیمپئن امریکا اور انگلینڈ جبکہ 3 جولائی بدھ کو ہالینڈ اور سوئیڈن کے درمیان مقابلہ ہوگا-
جبکہ تیسری پوزیشن کا میچ6 جولائی کو اور فائنل7جولائی کو لیون میں کھیلا جائے گا۔ فرانس کے رہوزون پارک اسٹیڈیم میں کھیلے جانے والے ٹورنامنٹ کے آخری کوارٹر فائنل میں جرمنی کے ہاتھوں کئی بڑے ایونٹس میں شکست کھانے والی سوئیڈن کی ٹیم نے حیران کن کارکردگی کا مظاہرہ کرتے ہوئے ٹاپ ٹیم کو ایک کے مقابلے میں دو گول سے زیر کیا-

کھیل کے 16ویں منٹ میں جرمنی کی ماگل نے گول کرکے ٹیم کو ایک صفر کی برتری دلا دی- سوئیڈن نے جوابی کارروائی کرتے ہوئے 22 ویں منٹ میں جیکب سن کے خوبصورت گول کی بدولت مقابلہ ایک ایک گول سے برابر کردیا-

دوسرے ہاف میں بھی سوئیڈن کا پلہ بھاری رہا اور سوئیڈن کی بلاگٹ نے 48ویں منٹ میں گول کرکے ٹیم کی برتری 2-1 کی جو آخر تک برقرار رہی-

کمبوڈیا (ایمرا نیوز آن لائن لاہور) قومی فٹبال ٹیم کی مایوس کن پرفارمنس کمبوڈیا نے پاکستان کو دو میچوں کی ہوم اینڈ اوے کی بنیاد پر کھیلی جانے والی سیریز میں 2-0 سے شکست دیکر فیفا ورلڈ کپ کوالیفائر 2022ء کے اگلے رائونڈ میں کھیلنے کا اعزاز حاصل کرلیا۔ پاکستانی ٹیم کی برسوں سے دنیا کے سب سے بڑے ایونٹ میں کھیلنے کی آس و تمنا ایک بار پر بآور ثابت نہ ہوسکی اور ورلڈ کپ میں شرکت کا خواب چکنا چور ہوگیا۔ کمبوڈیا میں کھیلے جانے والے اوے میچ میں 2-0 کی شکست کے بعد قومی ٹیم سے دوسرے میچ 3-0 کی کامیابی ناممکن نظر آرہی

تھی اور چونکہ دوسرا میچ ایک رسمی کارروائی تھی اسے مکمل ہونا تھا اور وہی ہوا پاکستانی ٹیم نے دوسرا میچ صرف اور صرف رسمی کارروائی نبھانے کیلئے ہی کھیلا۔ دوحا، قطر کا حماد بن خلیفہ فٹبال اسٹیڈیم پاکستانی ٹیم کا ہوم گرائونڈ قرار دیا گیا لیکن اس پر بھی قومی ٹیم کی کارکردگی بہتر نہ ہوسکی۔ پاکستانی فٹ بال ٹیم کے برازیلین کوچ جوز نوگیرا جوز نے فیفا ورلڈ کپ ایشیا کوالیفائرز میچز میں پاکستان میں مختلف ڈپارٹمنٹس اور کلبوں سے کھیلنے والے کھلاڑیوں پر انحصار کرنے

کے بجائے پاکستان سے باہر کھیلنے والے پاکستانی کھلاڑیوں پر انحصار کیا اور ان میچز میں واپڈا کے عمر حیات اور کے الیکٹرک کے محمد ریاض کو چانس دیا گیا۔سندھ فٹ بال کے نائب صدر اور فٹبال فیڈریشن ضلع حیدرآباد کے صدر اعظم خان نے کہا ہے کہ پاکستان میں فٹبال کے کھیل کو حکمرانوں کی عدم دلچسپی سے بچایا جائے۔ فیفا کے عالمی قوانین پر عملدرآمد، اصلاحات پر عمل نہ ہونے کے باعث کہیں ایسا نہ ہو کہ پھر سے فٹبال کھیل پر پہلے کی طرح عالمی پابندیاں عائد کردی جائیں

اگر ایسا ہوا تو اس کے ذمہ دارا ارباب اختیار ہوں گے کیونکہ پابندیوں اور بحران سے ملک کے کھلاڑی، ریفریز، کوچز عالمی سطح پر براہ راست متاثر ہوں گے۔ تین سال کی پابندی کے بعد پاکستان فٹبال کا کھیل ایک بار پھر ترقی کی جانب گامزن تھا اور پاکستان کی ٹیم عالمی سطح پر انپی جگہ بنانے میں مصروف عمل تھی لیکن اچانک دیکھا جارہا ہے کہ ایک دفعہ پھر فٹبال فیڈریشن بحران کی جانب جاری ہے۔

ارجنٹینا (ایمرا نیوز آن لائن لاہور)

ارجنٹینا کی فٹ بال ٹیم کے عظیم کھلاڑی لیونل میسی آج اپنی32 ویں سالگرہ منا رہے ہیں۔

ہسپانوی کلب بارسلونا کے سپر اسٹار کھلاڑی لیونل میسی 24 جون 1987کو ارجنٹائن کے شہر روزاریو میں پیدا ہوئے۔

فٹ بال کا جنون میسی کو بچپن سے ہی اس کھیل کی جانب لے آیا، یہ ہی وجہ ہے کہ چھوٹی سی عمر میں اس عظیم کھلاڑی نے بڑے بڑے ایوارڈز اپنے نام کیے۔ میسی نے صرف 13 سال کی عمر میں فٹ بال کلب جوائن کیا۔

لیونل میسی اور ساتھی کھلاڑی لوئی سوارئز کا چلڈرن اسپتال کا دورہ

میسی کی نمائندگی میں اسپینش کلب نے 6 لیگ ٹائٹل ، 3 چئمپینز لیگ،2 اسپینش کپ،2 یورپین سپر کپ،6 اسپینش سپر کپ اور 2 دفعہ ورلڈ کلب کپ کے ٹائٹل اپنے نام کیے۔

میسی نے13 سے 16 برس کے درمیان 466 میچ کھیل کر 381 گول اسکور کیے، جو کہ ایک عالمی ریکارڈ ہے۔
2010ء اور 2011ء میں مسلسل فیفا بالن ڈی اور کا اعزاز حاصل کیا، اس کے بعد 2010-2011 میں میسی نے یورپ میں یوئیفاکپ کے بہترین کھلاڑی کا ایوارڈ بھی جیت لیا۔

’ہیپی برتھ ڈے میسی‘
فٹ بال کلب سے اپنے کیریئر کا آغاز کرنے والے لیونل میسی کا شمار دنیائے فٹ بال کے اول درجے کے کھلاڑیوں میں کیا جاتا ہے جو فٹ بال کی دنیا کے کئی اعزازات اپنے نام کرچکے ہیں۔

بحرین (ایمرا نیوز آن لائن)
بیرون ملک مقیم بیشتر کھلاڑیوں نے بحرین میں جاری پاکستان فٹبال ٹیم کے تربیتی کیمپ میں رپورٹ کردی۔ پاکستان ٹیم فیفا ورلڈ کپ کوالیفائرز میں 6 اور 11جون کو کمبوڈیا کے خلاف دو میچز کھیلے گی۔
ورلڈ کپ کوالیفائرز کے لیے بحرین میں جاری تربیتی کیمپ میں بیرون ملک مقیم کھلاڑی عمر حیات، علی خان نیازی، عبداللہ قاضی، محمد ریاض، رئیس نبی، نوید رحمن، علی عزیر محمود، شابان حسین، محمود خان، احمد فہیم، سمیر نبی، تابش حسین، محمد علی اور حسن بشیر رپورٹ کر چکے ہیں، ذیشان رحمان، یعقوب اعجاز اور محمد عدنان یعقوب کی آمد ایک دو روز میں متوقع ہے، تین گول کیپرز یوسف بٹ، احسان اللہ، مزمل حسین گول کیپنگ کوچ مارسیلو کوسٹا کی نگرانی میں ٹریننگ کر رہے ہیں۔

پاکستان اور کمبوڈیا کا پہلا میچ 6 جبکہ دوسرا 11 جون کو ہوگا، مارچ 2018 میں فیفا کی تسلیم شدہ پی ایف نے عدالتی حکم پر تعینات کیے جانے والے ایڈمنسٹریٹر سے چارج لیا تو سرگرمیاں بحال ہوئیں جس کے بعد پاکستان ٹیم صرف5 انٹرنیشنل میچ کھیل پائی اور عالمی رینکنگ میں اس وقت 197ویں نمبر پر ہے، پاکستان ٹیم نے کم میچ کھیل کے بھی گہرا تاثر چھوڑاہے۔

گزشتہ سال ساف کپ میں تیسری پوزیشن حاصل کی، ٹیم تعطل کے دور میں ہونے والے نقصان کا ازالہ کرنے کے لیے کوشاں تھی کہ ایک بار پھر پی ایف ایف کے نئے انتخابات کا حکم جاری ہوگیا، گزشتہ 10 انٹرنیشنل میچز میں صرف2 فتوحات سمیٹنے والی کمبوڈیا کی ٹیم اس وقت عالمی رینکنگ میں 172ویں نمبر ہے۔

کمبوڈیا نے اپنے ہوم گرائؤنڈ پر 6 اور بیرون ملک 3 میچز میں مات کھائی ہے، ورلڈ کپ کوالیفائرز میں پاکستان ٹیم کمبوڈیا پر حاوی ہونے کی بھرپور صلاحیت رکھتی ہے۔

گرین شرٹس کے ہیڈ کوچ جوز انتونیو نوگیرا کا کہنا ہے کہ کھلاڑیوں کا مورال بلند اور وہ حریف کے خلاف عمدہ کارکردگی دکھانے کے لیے پر عزم ہیں، بہتر کمبی نیشن کے ساتھ میدان میں اترتے ہوئے فتح حاصل کریں گے۔

انہوں نے کہا کہ فٹنس ٹرینر بیٹو پورٹیلا نے کہا کہ کھلاڑیوں کی فٹنس سے مطمئن ہوں، اسکواڈ کا اعلان کرتے ہوئے فٹنس کو خاص طور پر پیش نظر رکھیں گے۔

یاد رہے کہ بحرین میں تربیتی کیمپ فیفا کی تسلیم کردہ پی ایف ایف کے زیر نگرانی ہو رہا ہے۔

سندھ فٹبال ایسوسی ایشن کے صدر سید خادم علی شاہ کا کہنا ہے کہ در حقیقت فیفا کی تسلیم شدہ فیڈریشن نے پاکستان فٹبال کو عالمی تنہائی سے بچانے کے لیے ایک ٹھوس قدم اٹھایا ہے۔