Category فٹ بال

لاہور(ایمرا نیوزآن لائن):
بیرون ملک مقیم بیشتر کھلاڑیوں نے بحرین میں جاری پاکستان فٹبال ٹیم کے تربیتی کیمپ میں رپورٹ کردی۔

ورلڈ کپ کوالیفائرز کے لیے بحرین میں جاری تربیتی کیمپ میں بیرون ملک مقیم کھلاڑی عمر حیات، علی خان نیازی، عبداللہ قاضی، محمد ریاض، رئیس نبی، نوید رحمن، علی عزیرمحمود، شابان حسین، محمود خان، احمد فہیم، سمیر نبی، تابش حسین، محمد علی اور حسن بشیر رپورٹ کرچکے ہیں، ذیشان رحمان، یعقوب اعجاز اور محمد عدنان یعقوب کی آمد 1،2روز میں متوقع ہے، تین گول کیپرز یوسف بٹ، احسان اللہ، مزمل حسین گول کیپنگ کوچ مارسیلو کوسٹا کی نگرانی میں ٹریننگ کررہے ہیں، پاکستان اور کمبوڈیا کا پہلا میچ 6 جبکہ دوسرا 11 جون کو ہوگا۔

مارچ 2018 میں فیفا کی تسلیم شدہ پی ایف نے عدالتی حکم پر تعینات کیے جانے والے ایڈمنسٹریٹر سے چارج لیا توسرگرمیاں بحال ہوئیں جس کے بعد پاکستان ٹیم صرف 5 انٹرنیشنل میچز کھیل پائی اور عالمی رینکنگ میں اس وقت 197ویں نمبر پر ہے، پاکستان ٹیم نے کم میچ کھیل کے بھی گہرا تاثر چھوڑا، گذشتہ سال ساف کپ میں تیسری پوزیشن حاصل کی، ٹیم تعطل کے دور میں ہونے والے نقصان کا ازالہ کرنے کے لیے کوشاں تھی کہ ایک بار پھر پی ایف ایف کے نئے انتخابات کا حکم جاری ہوگیا۔
گزشتہ 10 انٹرنیشنل میچز میں صرف 2 فتوحات سمیٹنے والی کمبوڈیا کی ٹیم اس وقت عالمی رینکنگ میں 172ویں نمبر ہے، کمبوڈیا نے اپنے ہوم گراؤنڈ پر 6 اور بیرون ملک 3 میچز میں شکست کھائی ہے، ورلڈ کپ کوالیفائرز میں پاکستان ٹیم کمبوڈیا پر حاوی ہونے کی بھرپورصلاحیت رکھتی ہے، گرین شرٹس کے ہیڈ کوچ جوز انتونیو نوگیرا کا کہنا ہے کہ کھلاڑیوں کا مورال بلند اور وہ حریف کے خلاف عمدہ کارکردگی دکھانے کیلیے پُر عزم ہیں، بہتر کمبی نیشن کے ساتھ میدان میں اترتے ہوئے فتح حاصل کریں گے۔

فٹنس ٹرینر بیٹو پورٹیلا نے کہا کہ کھلاڑیوں کی فٹنس سے مطمئن ہوں، اسکواڈ کا اعلان کرتے ہوئے فٹنس کو خاص طور پر پیش نظر رکھیں گے۔ یاد رہے کہ بحرین میں تربیتی کیمپ فیفا کی تسلیم کردہ پی ایف ایف کے زیر نگرانی ہو رہا ہے۔

سندھ فٹبال ایسوسی ایشن کے صدر سید خادم علی شاہ کا کہنا ہے کہ در حقیقت فیفا کی تسلیم شدہ فیڈریشن نے پاکستان فٹبال کو عالمی تنہائی سے بچانے کے لیے ایک ٹھوس قدم اٹھایا ہے، فیفا کی تسلیم کردہ پی ایف ایف کے صدر مخدوم سید فیصل صالح حیات نے پاکستان ٹیم کی شرکت ممکن بنانے کے لیے نیک نیتی سے کوشش کی ہے۔

دوسری طرف فیفا کی مسترد کردہ پی ایف ایف کا تربیتی کیمپ بھی اسلام آباد میں جاری ہے، اشفاق حسین کی سربراہی میں کام کرنے والی فیڈریشن کو فیفا اور اے ایف سی نے تسلیم نہیں کیا، اس بے مقصد تربیتی کیمپ پر سوالات بھی اٹھائے جارہے ہیں، فٹبال حلقوں کا کہنا ہے کہ اگر ٹیم کسی انٹر نیشنل ایونٹ میں شرکت ہی نہیں کرسکتی تو پی ایف ایف کے وسائل ضائع کرنے کا کوئی فائدہ نہیں۔

انگلینڈ(ایمرا نیوز آن لائن)

ورلڈکپ سے قبل ٹیموں کے وارم اپ میچز کھیلے جارہے ہیں اور اس سلسلے میں پاکستان اپنا دوسرا میچ بنگلادیش کے خلاف آج کھیلے گا۔

پاکستانی وقت کے مطابق دونوں ٹیمیں دوپہر ڈھائی بجے کارڈف میں مدمقابل ہوں گی۔

اس سے قبل افغانستان کے خلاف وارم اپ میچ میں پاکستان کو 3 وکٹوں سے شکست کا سامنا کرنا پڑا تھا۔

قومی ٹیم کے جارح مزاج بلے باز آصف علی نے ٹیم کو جوائن کرلیا، وہ کینسر میں مبتلا اپنی کمسن بچی کی وفات کے باعث پاکستان آئے تھے۔

قومی اسکواڈ کپتان سرفراز احمد، فخر زمان، امام الحق، بابراعظم، آصف علی، حارث سہیل، شعیب ملک، محمد حفیظ، عماد وسیم، شاداب خان، محمد عامر، حسن علی، شاہین شاہ آفریدی، محمد حسنین اور وہاب ریاض پر مشتمل ہے۔

بنگلادیشی اسکواڈ کپتان مشرفی مرتضیٰ، تمیم اقبال، لٹن داس، سومیا سرکار، شکیب الحسن، ابو جاوید، مہدی حسن، محمد مٹھن، محمد سیف الدین، محمد اللہ، مصدق حصین، مشفق الرحیم، مستفیض الرحمان، روبیل حسین اور شبیر رحمان پر مشتمل ہے۔

لندن: (ایمرا نیوز) مانچسٹر سٹی کی بڑی جیت کا بڑا جشن شہر کی سڑکوں پر منایا گیا، ٹرافی پریڈ میں ہزاروں پرستاروں نے ہلہ گلہ کیا اور اپنے ہیروز کو دیکھنے کے لیے امڈ آئے، منیجر پیپ گوارڈیالو خوشی میں جھومتے رہے۔

انگلش کلب مانچسٹر سٹی کی سیزن میں فتوحات کا جشن، فاتح ٹیم نے ٹرافی کے ساتھ سڑکوں پر پریڈ کی جس میں ویمن کھلاڑی بھی شریک ہوئیں۔

سیزن میں جیتی جانے والے تینوں ٹرافیوں کا نظارہ کروایا گیا، ہیروز اور خاص طور پر کپتان وِنسنٹ کومپنی نے اپنے چاہنے والوں سے کامیابی کا سفر شیئر کیا۔ بس پر ٹیم کا سفر یادگار بن گیا، ہرطرف سے داد، واہ واہ کی صدائیں آتی رہیں جس سے کھلاڑیوں ایکشن دکھاتے رہے اور جشن سے سب محظوظ ہوئے۔

ہر طرف سے کلب پرچموں کی بہار آ گئی، پرستار دیوانہ وار اکٹھے ہو رہے تھے، اس سے پہلے ٹیم نے دعائیہ تقریب میں شرکت کی۔ کوچ پیپ گوارڈیالو گنگناتے اور خوشی سے جھومتے رہے۔ مانچسٹر سٹی نے فٹبال کے رواں سیزن میں پریمئر لیگ، لیگ کپ اور ایف اے کپ کا ٹائٹل جیتا ہے۔

سکر: (ایمرا نیوز) بولیویا میں فٹبال میچ کے دوران کھلاڑی سے خوفناک ٹکر سے ریفری کو سٹیڈیم سے ہسپتال منتقل کر دیا تاہم وہ جانبر نہ ہو سکے، ڈاکٹرز نے ہارٹ اٹیک کو موت کی وجہ قرار دے دیا۔

بولیوین فٹبال لیگ کے میچ میں ریفری زندگی کی بازی ہار گئے، اکتیس سالہ وکٹر ہگو کی میچ کے دوران کھلاڑی سے ٹکر ہوئی۔ میچ کے سینتالیسویں منٹ میں یہ خوفناک حادثہ پیش آیا جس کے بعد ریفری وکٹر کو سٹیڈیم سے سٹریچر میں ڈال کر ہسپتال پہنچایا گیا جہاں وہ جانبر نہ ہو سکے۔

ڈاکٹرز نے ہارٹ اٹیک کو موت کی وجہ قرار دے دیا، بولیوین صدر نے فٹبال ریفری کی ہلاکت پر شدید دکھ اور افسوس کا اظہار کیا۔

لندن(ایمرا نیوزآن لائن) مانچسٹر سٹی نے مسلسل دوسرے سال انگلش پریمیئر لیگ کا ٹائٹل جیت لیا۔انگلش فٹبال لیگ کے آخری لیگ میچ میں مانچسٹر سٹی نے برائٹن کو 4-1 گول سے شکست دے کر انگلشن پریمیئرلیگ کا ٹائٹل دوسری مرتبہ جیت کر ریکارڈ قائم کرلیا۔مانچسٹر سیٹی نے 98 پوائنٹس حاصل کیے جو پریمیئر لیگ کی تاریخ میں سب سے زیادہ 100 پوائنٹ کے ریکارڈ سے صرف 2 پوائنٹ کم ہے۔

لاہور(ایمرا نیوزآن لائن) قانون سب کے لئے اوراس کی خلاف ورزی پر سزا بھی سب کے لئے،لندن کی عدالت نے ایسا کر دکھایا۔دوران ڈرائیونگ موبائل فون استعمال کرنے پر سابق اسٹارانگلش فٹبالرپر 6 ماہ کیلئے گاڑی چلانے پر پابندی لگادی گئی۔مقامی میڈیاکے مطابق ڈیوڈ بیکھم کوشہری نے گزشتہ سال21 نومبر کو ڈرائیونگ کے دوران موبائل فون استعمال کرتے ہوئے دیکھا تھا۔

لاہور(ایمرا نیوزآن لائن) لیورپول کی بارسلونا کے خلاف معجزانہ فتح کے صرف 24 گھنٹے بعد یوئیفا چیمپیئنز لیگ (یو سی ایل) کے دوسرے سیمی فائنل میں اس سے بھی زیادہ سنسنی خیز نتیجہ سامنے آیا جب پریمئیر لیگ کے کلب ٹوٹین ہم ہاٹ سپرز نے آئیایکس کے خلاف کم بیک کرتے ہوئے مجموعی طور پر تین، دو سے کامیابی حاصل کر کے فائنل میں جگہ بنا لی۔ٹوٹین ہم کے لوکاس مورا اپنی ٹیم کے مسیحا ثابت ہوئے جنھوں نے نہ صرف پہلے دو گول کر کے اپنی ٹیم کو جیت کی کرن دکھائی اور اس کے بعد کھیل ختم ہونے سے محض چند سیکنڈ قبل تیسرا گول کر کے اپنی ہیٹ ٹرک مکمل کی اور ٹیم کو جیت سے ہمکنار کرایا۔

اس سنسنی خیز جیت کے صلے میں ٹوٹین ہم کی ٹیم جون کی پہلی تاریخ کو ہسپانوی شہر میڈریڈ کے وانڈا میٹروپولیٹانو میدان میں ہم وطن ٹیم لیورپول کا سامنا کرے گی۔ یہ 11 سال میں دوسرا موقع ہوگا جب دو برطانوی ٹیمیں یو سی ایل کا فائنل کھیلیں گی۔اس سے قبل سنہ 2008 میں مانچسٹر یونائیٹڈ اور چیلسی کے درمیان ماسکو میں فائنل ہوا تھا جس میں یونائیٹڈ کی ٹیم نے جیت حاصل کی تھی۔ لیورپول کی ٹیم گذشتہ سال بھی فائنل تک پہنچی تھی جہاں انھیں رئیل میڈریڈ کے ہاتھوں شکست ہوئی تھی۔

روس(ایمرا نیوزآن لائن) روس کی ایک عدالت نے قومی فٹ بال ٹیم کے دو اہم کھلاڑیوں پیول میمایو اور الیگزینڈر کوکورین کو نشے کی حالت میں تخریب کاری کے جرم میں ڈیڑھ سال قید کی سزا سنا دی۔غیر ملکی خبر ایجنسی ‘اے ایف پی’ کی رپورٹ کے مطابق عدالت نے پیول میمایو کو ایک سال اور 5 ماہ جبکہ کوکورین کو ایک سال 6 ماہ کی سزا سنائی، جبکہ کوکورین کے بھائی سمیت ان کے دیگر دو ساتھیوں کو بھی اتنی ہی سزا دی گئی ہے۔

دونوں بین الاقوامی فٹ بالرز پہلے ہی جیل میں ہیں جہاں انہیں 7 ماہ کا عرصہ گزر چکا ہے جس کو سزا میں شامل کر لیا جائےگا۔روسی قواعد کے مطابق سزا سے قبل جیل میں گزارے گئے ایک دن کو ڈیڑھ دن کے برابر شمار کیا جاتا ہے اور اب وہ بقیہ سزا پینل کالونیز (جیل) میں گزاریں گے۔کوکورین کی وکیل تاتیانا اسٹیوکالووا نے صحافیوں کو بتایا کہ ‘ہم دس روز کے اندر ہر صورت اپیل دائر کریں گے’۔انہوں نے دعویٰ کیا کہ یہ فیصلہ صرف متاثرہ افراد کے بیانات کی بنیاد پر کیا گیا ہے۔ان کا کہنا تھا کہ ‘ہمیں توقع ہے کہ عدالت سزا میں کمی کرے گی اور رحم کا مظاہرہ کرے گی لیکن عدالت نے کوئی رحم کا مظاہرہ نہیں کیا اور استغاثہ کی درخواست پر سزا برقرار رکھی’۔

یاد رہے کہ روسی فٹ بال ٹیم کے مڈفیلڈر میمایو اور کوکورین نے دارالحکومت ماسکو میں اکتوبر 2018 میں ایک کیفے میں نشے کی حالت میں لڑائی کی تھی جہاں کیفے کے عہدیدار کو بھی کرسی سے نشانہ بنایا گیا تھا۔دونوں کھلاڑیوں نے کار پارکنگ میں کھڑے ایک ٹی وی میزبان کے ڈرائیور پر بھی تشدد کیا تھا جس کے نتیجے میں ڈرائیور کو شدید چوٹیں آئی تھیں اور انہیں ہسپتال منتقل کردیا گیا تھا۔بعد ازاں دونوں کھلاڑیوں کے خلاف تفتیش شروع کردی گئی تھی۔

لندن: (نیٹ نیوز) چیپمئنز لیگ کھیلنے میں مصروف آئیکس کے حکیم زائیخ، نصیر مزروئی اور لیور پول کے محمد صلاح اور ساڈیو نے روزہ نہ رکھنے کے مطالبہ پر کلب انتظامیہ کے پریشر کو نظر انداز کر کے فٹبال میچ روزہ کی حالت میں کھیلنا کا فیصلہ کیا ہے۔

غیر ملکی خبر رساں ادارے کے مطابق چیمپیئنز لیگ اپنے آخری مراحل میں ہے۔ دونوں ٹیموں کے فٹنس کوچز نے کھلاڑیوں کو تنبیہ کی ہے کہ اتنے بڑے میچوں سے قبل روزہ رکھنے سے نہ صرف ان کی جسمانی صلاحیت کم ہوگی بلکہ کھیل کے دوران توجہ پر بھی اثر پڑے گا۔

برطانوی اخبار کیساتھ بات کرتے ہوئے آئیکس ٹیم کے فٹنس کوچ ریمنڈ ورہائین نے کہا ہے کہ اگر زائیخ اور مزروئی سیزن کے اس حصے میں روزہ رکھتے ہیں تو یہ کلب کیلئے نقصان دہ ہوگا۔ گیارہ ماہ تک کھلاڑیوں کے جسم ایک خاص غذا اور ٹریننگ کے ساتھ رہتے ہیں اور اسے اچانک بدلنا کھلاڑیوں کے جسموں پر منفی اثر ڈالے گا۔

حکیم زائیخ ٹیم کے مشہور کھلاڑی ہیں اور آئیکس کی ہر برتری میں اہم کردار رہا ہے۔ انہیں سیزن میں ماہرین آئیکس کا بہترین کھلاڑی قرار دے رہے ہیں۔ وہ ابھی تک اٹھارہ گول کرچکے ہیں۔ زائیخ کیلئے صورتحال اسلئے مشکل ہے کیونکہ دونوں اٹیکنگ مڈفیلڈر اور بعض اوقات رائٹ ونگر کی پوزیشن پر کھیلتے ہیں۔

آئیکس کا چیمپیئنز لیگ کا سیمی فائنل بدھ کی شام ہالینڈ کے وقت کے مطابق 9 بجے شروع ہوگا۔ جبکہ اس دن افطار کا وقت 9 بج کر 18 منٹ ہے۔ ایسے میں، آئیکس ٹیم کے فٹنس کوچ کا کہنا ہے کہ کھلاڑی بغیر کھائے پیے میچ شروع نہیں کرسکتے۔

دوسری طرف لیورپول کی طرف سے محمد صلاح اور ساڈیو مانے دو کھلاڑی ہیں جو کہ روزوں کی پابندی کرتے ہیں۔ مصر اور سینیگال سے تعلق رکھنے والے یہ دونوں کھلاڑی لیورپول کے لیے اتنے ہی اہم ہیں جتنے کہ بارسلونا کے لیے میسی اور سواریز۔ دونوں کھلاڑیوں نے اب تک مشترکہ طور پر چالیس سے زیادہ گول سکور کیے ہیں۔

صلاح اور ساڈیو مانے لیورپول کی مسلمان کمیونٹی میں بہت مشہور ہیں۔ دونوں کھلاڑی چیمپیئنز لیگ سیمی فائنل کے دن روزہ رکھیں گے۔ اطلاعات ہیں صلاح سیمی فائنل کا میچ فٹنس کی وجہ سے شاید نہ کھیل پائیں لیکن لیورپول کو اس کے علاوہ دیگر لیگز کے میچز ابھی کھیلنے ہیں۔

لاہور(ایمرا نیوزآن لائن) یوئیفا چیمپئنز لیگ سیمی فائنل سیکنڈ لیگ میں لیورپول کے ہاتھوں بارسلونا کو تاریخی شکست کا سامنا کرنا پڑا۔سیمی فائنل سیکنڈ لیگ میں لیورپول نے بارسلونا کو صفر کے مقابلے چار گول سے ہرا دیا۔لیورپول مجموعی طور پر گول اسکور کی بنیاد پر فائنل میں پہنچ گئی۔