Tag ادویات

لاہور: سابق صوبائی وزیر قانون اور پاکستان مسلم لیگ ن کے رہنما رانا ثنااللہ کا کہنا ہے کہ انہیں جیل میں میڈیکل رپورٹس اور ادویات نہیں دی جا رہیں۔

جوڈیشل ریمانڈ ختم ہونے پر لاہور کی سینٹرل اسپیشل عدالت میں پیشی کے دوران انہوں نے کہا کہ گرفتاری سے ایک ہفتہ پہلے ان کی سیکورٹی واپس لے لی گئی تھی۔ان کا کہنا تھا کہ گرفتاری کے بعد تھانے میں منتقل کیا گیا جہاں ان سے کوئی سوال جواب نہیں ہوا۔

رانا ثنااللہ کے وکیل نے کہا کہ چالان کے مکمل ریکارڈ موجود نہیں، اس لیے مقدمے کی سماعت ملتوی کی جائے۔ملزم کے وکیل نے کہا کہ سرکار ساری حدیں پار کر رہی ہے، گھٹن بہت ہے تھوڑی سی تازہ ہوا آنی چاہیئے۔

انہوں نے کہا کہ رانا ثنا اللہ کے دل کا آپریشن ہو چکا ہے، انہیں گھر کا کھانا دیا جائے اور ادویات بھی گھر سے لانے کی اجازت دی جائے۔عدالت نے وکیل کو اس بارے میں تحریری درخواست دینے کا حکم دیا۔

انسداد منشیات فورس کے پراسیکیوٹر کا کہنا تھا کہ چالان مکمل ہو چکا ہے لیکن باقی چیزیں ابھی تیار نہیں ہیں۔عدالت نے جیل حکام سے رانا ثناءاللہ کی میڈیکل رپورٹ طلب کرتے ہوئے سماعت یکم اگست تک ملتوی کر دی۔

سماعت کے بعد میڈیا سے گفتگو کرتے ہوئے انہوں نے کہا کہ وہ ویڈیو کہاں ہے جو گرفتاری کے وقت بنائی گئی؟رانا ثناءاللہ کا کہنا تھا کہ انہیں گرفتاری کے وقت کچھ نہیں بتایا گیا، اگلے روز 15 کلو منشیات ان پر ڈال دی گئی۔

مسلم لیگ ن کے قائد شہباز شریف بھی رانا ثناء اللہ سے اظہار یکجہتی کے لئے عدالت موجود تھے۔

یاد رہے کہ اے این ایف نے رانا ثنا اللہ سمیت 6 ملزمان پر مقدمہ درج کیا ہوا ہے۔ اے این ایف نے 60 سے زائد صفحات پر مشتمل چالان عدالت میں پیش کیا۔

رانا ثناءاللہ کی پیشی کے موقع پر جوڈیشل کمپلیکس کے گرد سیکیورٹی کے انتہائی سخت انتظامات کئے گئے تھے۔

سیکیورٹی اداروں نے عدالت کے اطراف غیر متعلقہ افراد کا داخلہ بند کر دیا گیا تھا جبکہ پولیس کی بھاری نفری احاطہ عدالت کے اندر اور باہر تعینات تھی۔

یاد رہے کہ رانا ثنا اللہ کو اینٹی نارکوٹکس فورس نے منشیات برآمد ہونے پر یکم جولائی کو گرفتار کیا تھا۔

بعد ازاں اے این ایف نے سابق وزیرقانون کو لاہور کی مقامی عدالت میں پیش کیا اور14 روزہ جوڈیشل ریمانڈ کی استدعا کی جو عدالت نے منظور کرلی۔

رانا ثنا اللہ اور دیگر6 ملزمان کو جوڈیشل مجسٹریٹ احمد وقاص کی عدالت میں پیش کیا گیا تھا۔دیگر ملزمان میں اکرم ، عمر فاروق ، عامر رستم ، عثمان احمد اور سبطین خان شامل ہیں۔

لاہور (وقت نیوز آن لائن ) پنجاب میں متعلقہ صحت حکام کی مبینہ غفلت سے کو-انفیکشن، ایچ آئی وی/ایڈز اور ہیپاٹائٹس سی کا شکار 1800 مریضوں کے لیے استعمال ہونے والی مہنگی ہیپاٹائٹس سی دوا حکومت کے میڈیکل اسٹور ڈیپو (ایم ایس ڈی) میں ایکسپائر (زائد میعاد) ہوگئی۔

اس کے علاوہ 3200 مریضوں کے علاج کے مقصد کےلیے گزشتہ 2 برس میں صوبے کے تمام علاج مراکز کو فراہم کی گئی دوا کی حالت کا ’علم نہیں‘ ہے۔

ڈان اخبار کی ایک رپورٹ میں بتایا گیا کہ اس ’اسکینڈل‘ کا سراغ ماہرین نے اس وقت لگایا جب ان کی ایک ٹیم نے گرومنگت روڈ گلبرگ میں ایک سرکاری ایم ایس ڈی کا دورہ کیا اور اس بارے میں رپورٹ کیا۔

اس حوالے سے ڈان کو دستیاب سرکاری رپورٹ میں کہا گیا کہ یہ دوا ایچ آئی وی/ایڈز کے ان مریضوں کے علاج کے لیے خریدی گئی تھی جو ہیپاٹائٹس سی کی مہلک بیماری کا بھی شکار تھے۔

خیال رہے کہ یہ مرکزی گودام ایم ایس ڈی صوبائی سطح پر محکمہ صحت کے آئی آر ایم این سی ایچ، ایکپینڈڈ پروگرام برائے امیونائزیشن (ای پی آئی)، مواصلاتی بیماری کنٹرول اور ٹی بی کنٹرول پروگرامز کے لیے خریدی گئی ادویات / سامان کو رکھنے کے لیے قائم کیا گیا تھا۔

رپورٹ کے مطابق بنیادی اور ثانوی صحت کی دیکھ بھال کے شعبے نے پنجاب ایڈز کنٹرول پروگرام (پی اے سی پی) کے تحت اپریل 2017 میں 5 ہزار مریضوں کے لیے 12 کروڑ 60 لاکھ روپے مالیت کی ہیپاٹائٹس/ایچ آئی وی-ایڈز کی دوا خریدی تھی۔

اس پی اے سی پی کی سربراہی بنیادی اور ثانوی صحت کی دیکھ بھال کے شعبے کے ایڈیشنل سیکریٹری (ٹیکنکل) ڈاکٹر عاصم الطاف کر رہے تھے۔ذرائع کے مطابق یہ ادویات رواں سال اپریل میں زائد المیعاد ہوگئی تھیں لیکن پروگرام کے سربراہ نے سزا سے بچنے کے لیے اس حقیقت کو مبینہ طور پر اسے اعلیٰ حکام سے چھپایا۔تاہم حکام کا کہنا تھا کہ پنجاب میں ایچ آئی وی-ایڈز کیسز کی تعداد میں تیزی سے اضافے کی رپورٹس کے بعد حکومت نے حال ہی میں ڈاکٹر عاصم الطاف کو اس پروگرام سے ہٹادیا۔

انہوں نے بتایا کہ حال ہی میں ماہرین نے ایم ایس ڈی گودام کا معائنہ کیا اور اس اسکینڈل کا پتہ چلایا۔ رپورٹ کے مطابق سوفی گیٹ (ٹیبلیٹس) ادویات کے 30 ہزار پیکٹس جو ایک ہزار 820 مریضوں میں تقسیم ہونی تھی وہ زائد المیعاد پائی گئی۔

اس میں بتایا گیا کہ پی اے سی پی کو 12 جولائی 2017 کو ہیپاٹائٹس سی کنٹرول پروگرام سے 12 کروڑ 60 لاکھ روپے مالیت کے (سوفی گیٹ +ریبازول) کے 30 ہزار کومبو پیکٹس موصول ہوئے تھے، جن کی ایکسپائری ڈیٹ اپریل 2019 تھی۔مذکورہ رپورٹ کے مطابق ’ایچ آئی وی/ایڈز اور ہیپاٹائٹس سی کو انفیکشن کے 5 ہزار مریضوں کے استعمال کے لیے ان ادویات کو ایم ایس ڈی گلبرگ میں رکھا گیا تھا‘۔

جس میں سے پی اے سی پی نے ہیپاٹائٹس سی کے علاج کے لیے 11 کروڑ 80 لاکھ روپے مالیت کے 28 ہزار 180 کومبو پیکٹس جاری کیے۔تاہم رپورٹ میں یہ کہا گیا کہ ’ان پیکٹس کو پنجاب میں علاج کرنے والے سینٹرز میں تقسیم کیا گیا اور ان کی موجودہ حالت کا علم نہیں‘۔

ساتھ ہی یہ بھی نشاندہی کی گئی کہ باقی رہ جانے والے ایک ہزار 820 کومبو پیکٹس کو پی اے سی پی کی جانب سے ایم ایس ڈی سے وصول نہیں کیا گیا اور یہ ایکسپائر ہوگئے۔رپورٹ میں ماہرین نے تجویز دی کہ اس معاملے کا نوٹس لینا چاہیے اور ’قومی خزانے کو بھاری نقصان‘ پہنچانے میں ملوث افراد کے خلاف تحقیقات ہونی چاہیے۔

لاہور(M92) پاکستان میں غیر ملکی ٖ غیر مستند جنسی ادویات غیر قانونی کاروبار بڑھتا جارہا ہے ۔ڈیلی پاکستان آن لائن کو لاہور میں ڈرگز کے ہول سیل ڈیلرز نے بتایا ہے کہ قانون کی عملداری نہ ہونے اور محکمہ صحت میں موجود کرپٹ مافیا کی وجہ سے پاکستان میں جنسی تسکین کی ادویات کی بھرمار ہو گئی ہے ۔ایک منظم مافیا انڈین ویگا ،پنگارہ ،ویاگرا اور اس طرح کی دیگر صحت دشمن ادویات غیر قانونی طور پر پاکستان بھر میں خاص طور پر بڑے ڈیپارٹمنٹل اسٹورز ،کاسمیٹک اسٹور اس مکرو ہ کاروبار میں ملوث ہے۔ ہول سیل ڈیلرز کے ترجمان اور معروف فارماسسٹ وقانون دان نور محمد مہر نے بتایا ہے کہ ملک میں جنسی ادویات سے متعلق 1.3 ارب ڈالر کا بزنس موجود ہے۔ یہ دوائیں فوڈ سپلیمنٹ، ڈراپس، سپرے، شربت اور گولیوں کی شکل میں مارکیٹ میں موجود ہیں۔ انہوں نے کہا کہ پاکستان میں افغانستان کے ذریعے یہ ادویات پہنچائی جاتی ہیں جبکہ اس حوالے سے ہندوستانی اور چینی دوائیں عام دستیاب ہیں۔معالجین کا کہنا ہے کہ ان ادویات میں سے 70 فیصد غیر معیاری ہیں جبکہ انہوں نے خبردار کیا کہ ان دواؤں سے انسانی صحت کو شدید نقصان پہنچ سکتا ہے۔انہوں نے صوبائی وزیر صحت کو بھی اس صورتحال سے آگاہ کیا ہے۔ ان کا کہنا ہے کہ ملک میں 30 کے قریب برانڈز نے مارکیٹ پر ‘قبضہ’ جمایا ہوا ہے۔ پشاور اور کوئٹہ کو ان ادویات کی سمگلنگ کا گڑھ مانا جاتا ہے۔ اس کے علاوہ کراچی، لاہور، فیصل آباد‘ سوات، چارسدہ اور دیگر مقامات پر جنسی صلاحیت بڑھانے والی غیر معیاری ادویات تیار کی جاتی ہیں۔ گزشتہ سال ایک ملٹی نیشنل فارماسوٹیکل کمپنی نے سیکس ادویات فروخت کرنے کے لیے منظوری حاصل کرنے کی کوشش کی تھی،تاہم اس اسکیم کو وفاقی حکومت نے مذہبی حلقوں کی جانب سے مذمت پر موخر کردیا تھا جو اس کاروبار کو غیر اسلامی تصوّر کرتے ہیں۔ ان کا مزید کہنا تھا کہ اس وقت بھی آٹھ ملٹی نیشنل کمپنیاں اس حوالے سے حکومتی منظوری کا انتظار کررہی ہیں۔وفاق اطبا کے صدر حکیم عرفان اللہ مرزا ایڈووکیٹ کے مطابق جنسی صلاحیت بڑھانے والی ادویات کے بے جا استعمال سے گردوں کی خرابی اور دل کا دورہ بھی پڑ سکتا ہے۔ انہوں نے کہا کہ مستندمعالج بغیر تحقیقات کے ایسی ادویات کے استعمال کی حوصلہ افزائی نہیں کرتے۔ ان کا کہنا تھا کہ مارکیٹ میں موجود زیادہ تر ادویات صحت کے لیے خطرناک ہیں۔ان کا مزید کہنا تھا کہ گردوں کی ناکامی کے 100 معاملات میں سے پانچ کی وجہ یہ ادویات ہوتی ہیں جو کہ پاکستان میں ہربل ادویات کے نام سے فروخت ہورہی ہیں جن کے اجزاء ایلوپیتھک ہوتے ہیں۔