Tag اردو کالم

جاوید چوہدری کے قلم سے..

پاکستانی تاریخ میں بے شمار بھائی گزرے ہیں لیکن ’’بخاری برادرز‘‘ دو ہی تھے اور ان کا متبادل آج تک مارکیٹ میں نہیں آیا‘ بڑے بھائی کا نام پیر احمد شاہ بخاری تھا‘ یہ لوگ پشاور کی مشہور پیر فیملی سے تعلق رکھتے تھے‘ پشاور کے گورنمنٹ ہائی اسکول میں پڑھتے تھے‘ انگریز ٹیچر واٹکنز پرنسپل تھے‘وہ پیر احمد شاہ بخاری کو فرانسیسی لہجے میں پیر کہتے تھے‘ فرنچ زبان میں پیر کو پیٹر کہا جاتا ہے اور پیٹر فارسی میں پطرس ہو جاتا ہے۔
احمد شاہ نے جوان ہو کر پطرس بخاری کے قلمی نام سے مضامین لکھنا شروع کر دیے اور پھر پطرس بخاری کے نام سے پورے ہندوستان میں شہرت پائی‘ یہ آل انڈیا ریڈیو کے ڈی جی بھی رہے‘ گورنمٹ کالج لاہور کے پرنسپل بھی بنے اور اقوام متحدہ میں پاکستان کے مستقل نمایندے بھی تھے‘ دوسرے بھائی پیر ذوالفقار احمد بخاری تھے‘ یہ زیڈ اے بخاری کے نام سے مشہور ہوئے اور ہندوستان میں ریڈیو کی بنیاد رکھی‘ زیڈ اے بخاری قیام پاکستان کے بعد ریڈیو پاکستان کے پہلے ڈائریکٹر جنرل بنے‘ بخاری برادرز بلا کے ذہین‘ انتہائی پڑھے لکھے‘ ادب فہم‘ اعلیٰ پائے کے براڈکاسٹر اور ادیب تھے۔
دونوں مزاح کی دولت سے بھی مالا مال تھے‘ پطرس بخاری کے مضامین کے بغیر اردو اور اردو ادب دونوںگھنٹے کے بغیر چرچ یا وضو کے بغیر نماز ہے جب کہ زیڈ اے بخاری کے بغیر اردو زبان میں الیکٹرانک میڈیا کی تاریخ مکمل نہیں ہوتی‘مشترکہ ہندوستان میں ایک وقت تھا جب ان دونوں بھائیوں کی وجہ سے ریڈیو بی بی سی (بخاری برادرز کارپوریشن) کہلاتا تھا‘ زیڈ اے بخاری نے 1961 میں سرگزشت کے نام سے اپنی بائیوگرافی لکھی ‘ یہ کتاب ہر دور میں مشہور رہی‘ میں نے سرگزشت پہلی بار طالب علمی کے دور میں پڑھی تھی۔
اس کا اثر مدتوں شعور کی دیوار پر آکاس بیل کی طرح منڈھا رہا لیکن پھر روزگار کی گرد اس کے نقش دھندلا گئی‘ میں نے چند ماہ قبل برادر عرفان جاوید کی تحریک پر پرانی کتابیں دوبارہ پڑھنا شروع کیں‘ سرگزشت بھی ان میں شامل تھی‘ یہ کتاب شروع کی تو پھر کوئی اور کام نہ کر سکا‘ بڑے لوگوں کی کتابیں بھی واقعی بڑی ہوتی ہیں۔
میں آج اس مشیر کے بارے میں بھی لکھنا چاہتا تھا جس نے چند دن قبل وزیراعظم کو مشورہ دیا تھا آپ سلیکٹرز کے ساتھ سیدھے ہو جائیں‘ وزیراعظم نے وجہ پوچھی تو اس نے جواب دیا‘ ہمارا گراف دو برسوں میں بہت نیچے چلا جائے گا‘ اپوزیشن آپ کو پانچ سال پورے دے کر 2023کے فیئر الیکشن کا مطالبہ منوا چکی ہے لہٰذا اگلا وزیراعظم شہباز شریف ہو گا یا بلاول بھٹو‘ حکومت الیکٹورل ریفارمز کا بل پاس کرا کر بھی ای وی ایم لا سکے گی اور نہ اوورسیز پاکستانیوں کو ووٹ کا حق دلا سکے گی لہٰذا ہمارے پاس سیاسی شہادت کے سوا کوئی آپشن نہیں بچتا‘ آپ سیدھے ہو جائیں۔

مناظرعلی کے قلم سے…

سکھو کے بعد بھینسوں اور زمین کی دیکھ بھال کی تمام ذمہ داری ریاض کے ذمہ لگ گئی اور ریاض چونکہ چاچا امانت کا بیٹاہے اس لیے اسے سکھو سے ذرا زیادہ ذمہ دار سمجھا جارہاہے اور کسی حد تک وہ ہے بھی مگر اتنا بھی نہیں کہ سارا مال ڈنگر اسی کے رحم وکرم پر چھوڑ دیاجائے اور اسے جدید سکیورٹی سسٹم کے مترادف بھی سمجھاجائے،جہاں حکام کے ہزاروں دعووں کے باوجود رسہ گیروں کے خطرات منڈلا رہے ہوں وہاں اپنی بھینسوں کی حفاظت بھی پوری حکمت عملی کیساتھ کی جائے تو کسی حد تک مال ڈنگر محفوظ رہے گاورنہ قدیم راستے پر بنے ڈیرے سے گزرنے والے کسی بھی چور یا غیر چورکی نیت خراب ہوسکتی ہے،ایسے ہی جیسے منگل اور بدھ کی درمیانی شب ہوا اور یہ کسی کے وہم وگمان میں بھی نہیں تھا۔

ریاض نے چارہ ڈالااور جانوروں کا کمرہ حبس زدہ ہونے کی وجہ سے کھلی ہوا میں بھینسوں کو باندھ کر کھاناکھایا،دودھ کا گلاس پیا اور وہ گیا،پھرحسب معمول سب کچھ اللہ کے حوالے اور جب سورج طلوع ہوا تو ایک بھینس کھرلی سے غائب تھی،ذہن تسلیم کرنے کو تیار نہیں تھا کہ بھینس چوری ہوچکی ہے کیوں کہ سالوں سے کبھی ایسا ہوا ہی نہیں وہ بھی بزرگوں کی اولاد کیساتھ؟۔۔علاقے میں بھی یہی مشہورہے کہ داد شیخ موسیٰ کی اولاد کی چوری نہیں ہوتی اور ہوجائے تو چور اندھا ہوجاتاہے،یہی ایک ڈر ہے جو کئی چوروں کو ادھر کا رخ کرنے سے روک لیتاہے۔۔بحرحال واقعات ہوجاتے ہیں اور یہی کچھ اب بھی ہوا۔۔خیرکھوجی بلا کر اور معززین علاقہ کی موجودگی میں کھرا چل پڑا۔۔چور کبھی بھینس کو کچے راستے پر اتارتاہے تو کبھی پکے پرچڑھا لیتاہے،یہی اس کی حکمت عملی تھی کہ ساری رات مختلف راستوں سے ہوتاہوا اپنے پیچھے والے ممکنہ خطرات سے بچنے کی کوشش کرتارہا،،کھوجی تقریبا بیس سے پچیس کلو میٹر دور دریائے چناب کے قریب ایک گنے کے کھیت تک پہنچا تو کھرا غائب ہوگیا،ایک طرح سے مایوسی بھی ہوئی مگر کھوجیوں کے قافلے میں چلنے والے دیگر لوگ بھی ایک طرح سے کھوجی ہی ہوتے ہیں کیوں کہ دیہات میں بھینسیں چوری کرنے کے واقعات اکثر ہوتے ہیں اور انہیں تلاش کرنے کے لیے کھوجیوں کا سہارا لیاجاتا ہے اور کھوجی کے پاس پاوں کے نشان پرچلتے رہنے کے سوا کوئی دوسرا حل نہیں ہوتا۔۔خیر۔۔۔۔مایوسی کے عالم میں واپس مڑنے ہی والے تھے کہ چند افراد نے گنے کے کھیت میں جا کر چیک کرنے کا ارادہ کیا۔۔۔اورپھر وہی ہواجس کی امید تھی،ضیغم اور ریاض احمد نے گنے کے کھیت سے بھینس تلاش کرلی،اس کا منہ باندھا ہواتھا اور وہ مشکل سے سانس لے رہی تھی،یقینا چوروں نے دن کی روشنی اور بھینس کی تھکاوٹ کے باعث یہ عارضی فیصلہ کیا ہوگا کہ رات کے وقت یہاں سے بھینس کو منڈی لیجایاجائے گا یا کسی دوسری جگہ منتقل کیاجائے گا۔۔

مویشی پال حضرات کی بروقت اپنی مدد اپ کے تحت کوشش سے بھینس تو مل گئی مگر ان دعووں کی قلعی ضرور کھل گئی جو پولیس افسران رسہ گیروں کے خاتمے کے بارے میں کرتے ہیں۔یہ کوئی من گھڑت کہانی نہیں بلکہ سو فیصد حقیقی واقعہ تھانہ جلالپوربھٹیاں کے نواحی گاوں ڈیرہ شیخاں میں ہوا جو کہ ضلع حافظ اباد کی حدود ہے۔۔چناب کے بیلے سالوں سے جرائم پیشہ عناصر کے گڑھ رہے ہیں اور چناب کے کنارے کئی ایسے لوگ موجود ہیں جو یا تو چوری میں ملوث ہوتے ہیں یا پھر چوروں کی پشت پناہی کرتے ہیں۔ائی جی پنجاب اور ڈی پی او حافظ اباد کو ایسے عناصر کی فوری سرکوبی کرنے کی ضرورت ہے تاکہ اس طرح کے واقعات کی روک تھام ممکن ہوسکے،یہ ذہن میں رہے کہ ایک کسان،مویشی پال فرد کیلئے اس کی بھینس اپنے بچوں کی طرح قیمتی ہوتی ہے اور اس کی موت یا چوری اسے گہرے صدمے سے دوچار کردیتی ہے،یہ اہمیت وہی جان سکتاہے جس کاتعلق گاوں سے ہوگا یا پھر وہ کسی طرح سے مویشیوں سے نسبت رکھتاہوگا ورنہ ایک عام بندے کیلئے بھینس کی چوری شاید بڑی چوری نہ ہو۔۔اعلیٰ حکام کو اس پر خاص طورتوجہ دینے کی ضرورت ہے بصورت دیگر لوگ مویشی پالنے سے گریز کریں گے اور نتیجتا لائیوسٹاک،ڈیری کی پروڈکشن متاثر ہونے کاخدشہ ہے۔۔

تعارف:

بلاگر مناظرعلی مختلف اخبارات اور ٹی وی چینلز کے نیوزروم سے وابستہ رہ چکے ہیں ، آج کل لاہور کے ایک ٹی وی چینل پر کام کررہے ہیں۔ ۔ ان سے فیس بک آئی ڈی munazer.ali پر رابطہ کیا جاسکتا ہے۔

نوٹ:یہ بلاگر کا ذاتی نقطہ نظر ہے جس سے ادارے کا متفق ہونا ضروری نہیں۔

بشکریہ:. ڈیلی پاکستان

جاویدچوہدری کے قلم سے.

’’میرا نام احسان اللہ ہے اور میں گجرات کی تحصیل سرائے عالم گیر کے چھوٹے سے گائوں کریالی سے تعلق رکھتا ہوں‘ میرا گائوں شہر سے تین کلومیٹر کے فاصلے پر واقع ہے‘ میں یہ خط پاکستانی معاشرے کی چند کوتاہیوں اور اپنی ایک چھوٹی سی خدمت کے اعتراف میں لکھ رہا ہوں‘ میری درخواست ہے، آپ بھی میرا یہ خط پڑھیں اور عوام کو بھی پڑھائیں‘ شاید میری مثال سے میرے معاشرے کے لوگوں میں ہمت پیدا ہو جائے اور یہ بھی اپنے شہروں اور دیہات کے لیے کوشش شروع کر دیں‘ میں نے گائوں کے اسکول سے میٹرک کیا‘ جہلم ٹیکنیکل کالج سے تین سال کا ایسوسی ایٹ ڈپلومہ کیا اور پھر اسلام آباد سے مکینیکل میں بی ٹیک کر لیا‘ میںیونیورسٹی میں داخل ہوا‘ میرا پہلا سمسٹر چل رہا تھا کہ میں فیملی کے ساتھ نیویارک منتقل ہو گیا‘ میں پانچ سال پہلے امریکا آیا‘ یہاں شادی کی‘ اﷲ نے دو بچے دیے‘ الحمدﷲ نوکری بھی اچھی مل گئی اور میں اب نوکری کے ساتھ ساتھ تعلیم بھی حاصل کر رہا ہوں‘‘ ۔

’’یہ میرا تعارف تھا‘میں اب خط کے مقصد کی طرف آتا ہوں‘ میں نے امریکا میں پانچ برسوں میں جو کچھ سیکھا وہ میں پاکستان میں 21 برسوں میں نہیں سیکھ سکا اور میرا خیال ہے میں اگر گجرات یا اسلام آباد رہتا تو شاید اگلے اکیس برسوں میں بھی نہ سیکھ پاتا‘ میں نے امریکا میں سب سے پہلے خود کو اور اپنے ماحول کو صاف رکھنا سیکھا‘ لائن میں کس طرح کھڑے ہو کر اپنی باری کا انتظار کرناچاہیے اور کس طرح اگر کوئی سویپر ہے تو اس کی عزت کرنی ہے‘ ایک کمپنی کے مالک اور ملازم میں کوئی فرق نہیں ہوتا اور لیبر کے حقوق کیا ہیں وغیرہ وغیرہ‘ یہ بھی میں نے یہاں سیکھا‘ امریکا میں کالج جانے کے لیے عمر کی کوئی قید نہیں‘ میرے لیے یہ بات بالکل نئی تھی‘ کس طرح لڑکیاں لڑکے ایک کلاس میں اپنی مرضی کا لباس پہن کر آتے ہیں اور ایک ہی کلاس میں بیٹھتے ہیں اور کسی کو کوئی فرق نہیں پڑتا‘ کم کھانا صحت ہے زیادہ کھانا بیماری ہے یہ بھی سیکھا‘ میں جب یہاں آیا تو اﷲ کی توفیق سے نماز کی پابندی شروع کر دی‘ ایک دن دوران کام میں وضو کرنے کے لیے واش روم گیا اور وضو شروع کر دیا‘ آس پاس دوسرے لوگ بھی تھے‘ میں جانتا ہی نہیں تھا واش بیسن میں پائوں دھونا انتہائی بدتہذیبی ہوتی ہے‘ میں نے جوں ہی پائوں دھونے شروع کیے واش روم میں موجود لوگ فوراً سب کچھ چھوڑ کر دور کھڑے ہو گئے اور حیرت سے مجھے دیکھنے لگے‘ ایک افریقن امریکن نے مجھے گالی دے کر اپنے کولیگ سے کہا‘ کسی شخص نے اس کو یہ تمیز تک نہیں سکھائی واش بیسن میں پائوں نہیں دھوئے جاتے ‘ یہ دیکھو یہ یہاں غلاظت پھیلا رہا ہے اور اس نے ہر طرف پانی ہی پانی کر دیا‘ اس کی آواز میرے کانوں تک بھی پہنچ رہی تھی‘ مجھے غصہ آگیا لیکن پھر میں نے سوچا اس کی بات غلط نہیں‘ مجھے واش بیسن میں پائوں نہیں دھونے چاہیے تھے‘ میں نے اگلے دن اس شخص سے معذرت کی اور اپنی لاعلمی اور کم عقلی کا اعتراف کیا‘ میں نے اس کے بعد سوچا میں اگر غلطی کر سکتا ہوں تو دوسرے بھی کر سکتے ہیں لہٰذا میں نے اپنی کمپنی کے ہر مسلمان کو یہ واقعہ سنایا اور اسے مشورہ دیا تم نے وضو کے دوران واش بیسن میں پائوں نہیں دھونے‘ یہ امریکا میں بدتمیزی سمجھی جاتی ہے یوں میں نے اپنا فرض بھی پورا کیا اور آیندہ احتیاط کا وعدہ بھی کیا۔ دوسری چیز جو مجھے پسند آئی وہ تھی گاربیج ڈیوٹی ٹرک (Garbage duty truck)۔ لوگ ہر سوموار اور جمعرات کو اپنا سارا کچرا بڑے بیگز میں ڈال کر گھر کے باہر رکھ دیتے ہیں اور ہر صبح تقریباً چھ بجے کے قریب ٹرک والے آتے ہیں اور کوڑا اٹھا کر لے جاتے ہیں‘ ہر اتوار کو دوسرا ٹرک آتا ہے جو صرف پلاسٹک اور ری سائیکل والی چیزیں لے کر جاتا ہے‘ پلاسٹک اور ری سائیکل والا علیحدہ ڈبہ ہوتا ہے جس کا رنگ نیلا ہوتا ہے‘‘۔
’’مجھے یہ چیز بہت پسند آئی اور میں نے سوچا یہ بندوبست ہمارے جیسے چھوٹے دیہات میں بھی ہونا چاہیے‘ ہم چھ کزن ہیں‘ ہم سب نیویارک میں ایک ہی گھر میں رہتے ہیں‘ میں نے سب سے مشورہ کیا اور اس مشن کو آگے بڑھانے کے لیے ہاتھ پائوں مارنا شروع کر دیے‘ میں جنوری 2020میں پاکستان آیا‘ گائوں میں سب دوستوں کو اکٹھا کیا اور ان سے اپنا آئیڈیا شیئر کیا‘ سب کو میرا آئیڈیا پسند آیا‘ ہم نے اس کے بعد گائوں کے ٹیچرز اور نمبردار کو بلایا‘ ان کے ساتھ ملاقات کی اورگائوں میں ایک سوسائٹی کا سنگ بنیاد رکھ دیا‘ اس کا نام ’’سویرا ویلفیئر سوسائٹی‘‘ہے‘ ممبران کی تعداد 30 ہے اور سب فی سبیل اللہ کام کر رہے ہیں‘ کسی بھی ممبر کا کسی بھی سیاسی جماعت سے کوئی تعلق نہیں‘ ہم تین کزنز نے مل کر ایک رکشا لیا یا لوڈر کہہ لیں اور یہ سوسائٹی کے حوالے کر دیا‘ سوسائٹی والوں نے دو لوگوں کو ہائر کیا اور گائوں کو سروس دینی شروع کر دی‘ ہر گھر سے 200 روپے مہینہ طے ہوا‘ سوسائٹی نے اس رقم سے لوڈر کے اخراجات اور ملازمین کی تنخواہ پوری کرنی تھی‘ گائوں میں 600 گھر ہیں لیکن ان میں سے صرف 150 گھر دوسو روپے ماہانہ ادا کرنے کے لیے تیار ہوئے اور آپ کمال دیکھیے‘ تین مہینے بعد یہ 150 گھر بھی 60 ہو گئے‘ گائوں کے 540 گھر دو سو روپے ماہانہ دینے کے لیے بھی تیار نہیں تھے‘ دوبارہ میٹنگ ہوئی اور سوسائٹی نے فیصلہ کیا اخراجات پورے نہیں ہو رہے لہٰذا سوسائٹی یہ سروس بند کرنے پر مجبور ہو گئی ہے‘ مجھے نیویارک میں یہ خبر ملی تو میں نے یہ ذمے داری اٹھا لی‘ میں نے دونوں ڈرائیورز کی تنخواہ اپنے ذمے لے لی‘یہ 40 ہزارروپے ہیں اور الحمد للہ یہ سلسلہ چلتا آ رہا ہے‘ ہم نے ایک اور لوڈر کے لیے بھی پیسوں کا بندوبست کر لیا ہے‘ وہ بھی جلد سروس شروع کر دے گا‘ سوسائٹی کے ساتھ اب مزید مال دار اور بیرون ملک مقیم لوگ بھی منسلک ہو رہے ہیں‘ ہم اب سوسائٹی کو بڑھا کر باقی فلاحی کام بھی شروع کر رہے ہیں‘ مثلاً ہم نے جنازہ گاہ کی تعمیر اور قبرستان کی چار دیواری اور رمضان کے مہینے میں 200 مستحق خاندانوں کو راشن کی فراہمی‘ غریب بچیوں کی شادی اور بیمار لوگوں کو ادویات پہنچانے جیسے کام بھی شروع کر دیے ہیں‘ میرے ذہن میں اب دو تجاویزہیں‘ میں ان پر کام کر رہا ہوں۔ ایک‘ غریب لوگوں اور یتیموں کے لیے دو رومز کے اپارٹمنٹ تعمیر کرنا ‘دو‘ مسجد میں آنے والے بچوں کو قرآن کے ساتھ ساتھ اخلاقیات اور دینیات پڑھانا۔ آپ یقین کریں میں ایک دفعہ امریکا میں ایک صاحب کے گھر بیٹھا تھا‘ دین کے بارے میں بات شروع ہو گئی‘ کسی شخص نے کسی صحابیؓ کے بارے میں بات کی اور وہ اس صحابیؓ کا نام بھول گیا‘ وہاں بیٹھے ایک سات سال کے بچے نے اس شخص کو فوراً صحابیؓ کا نام یاد دلا دیا‘ مجھے بہت تجسس ہوا کیوں کہ یہ نام مجھے 29 سال کی عمر میں بھی معلوم نہیں تھا‘ اس سات سال کے بچے کو یہ امریکا میں کیسے معلوم ہو گیا؟ میں نے بچے سے کچھ اور سوال پوچھے‘ ان میں وضو ‘غسل اورنماز کے فرائض بھی شامل تھے‘ بچے نے مجھے ہر سوال کا صحیح جواب دیا‘ میں نے اس سے پوچھا تمہیں یہ کس نے سکھایا ؟ اس نے بتایا وہ ہفتے والے دن (جس کو یہاں Saturday School کہتے ہیں) صرف دو گھنٹے کے لیے مسجد جاتا ہے‘ اس نے یہ سب کچھ وہاں سے سیکھا ‘ میں اسی ہفتے اس مسجد پہنچ گیا اور دیکھا تین استاد ہیں‘ ایک قرآن سکھاتا ہے‘ دوسرا عبادات اور تیسرا اخلاقیات اور انھوں نے باقاعدہ انگلش میں کتابیں بنائی ہوئی ہیں اور باقاعدہ ان کا امتحان بھی ہوتا ہے اور یہ ہر بچے نے پاس کرنا ہوتا ہے‘ آپ یقین کریں اس کتاب میں جو کچھ سکھایا جا رہا تھا اس کا پچاس فیصد میرے لیے نیا تھا‘ وہ لوگ امریکا میں مسجد میں بیٹھ کر جو باتیں بچوں کو سکھا رہے تھے وہ ہمیں پاکستان میں یونیورسٹی میں بھی معلوم نہیں ہوتیں‘ میں نے اسی دن فیصلہ کر لیا میں یہ سارا سلیبس اردو میں ترجمہ کر کے اپنے گائوں کی مسجد میں اپنے بچوں کو پڑھائوں گا‘ ہمارے ملک میں بچے روز صبح ایک سے ڈیڑھ گھنٹہ مسجد جاتے ہیں لیکن وہ وہاں وہ کچھ نہیں سیکھ پاتے جو امریکا میں بچے ہفتے میں صرف ایک بار دو گھنٹے مسجد میں جا کر سیکھ لیتے ہیں‘ شاید اس کی وجہ یہ ہے پاکستان میں کوئی سسٹم نہیں ہے‘ شاید ہمارے ملک میں گائیڈ لائنز نہیں ہیں جن کو ہمارے علماء فالو کریں‘ لوگ اگر فرقہ واریت سے نکل کر ایک ہو کر سوچیں گے تو یہ پاکستان میں بھی ممکن ہو جائے گا اور ہمارے بچے بھی کل ان ملکوں میں آ کر بدنامی کا باعث نہیں بنیں گے لیکن کیا کریں دیوبندی کہتے ہیں نصاب میں بریلویت ہے اور بریلوی کہتے ہیں اس میں دیو بندیت ہے لیکن ان شاء اللہ ایک دن ہم سب اسلام پر ضرور راضی ہو جائیں گے‘‘۔
’’میںڈاکٹر جاوید اقبال کی وڈیوز سنتا ہوں‘ ڈاکٹر صاحب نے وزیراعظم کے سامنے نقطہ اٹھایا تھا ہم علمائے کرام اور مذہبی اداروں کے ذریعے عوام کی تربیت کر سکتے ہیں لیکن بدقسمتی سے وزیراعظم صاحب نے ایک میٹنگ میں تمام علماء کو بلایا اور جو کچھ ڈاکٹر صاحب نے کہا تھا وہی اپنی زبانی سنا کر سب کو واپس بھجوا دیا۔ اﷲ ہم سب لوگوں کو خدمت کرنے کی توفیق عطا فرمائے۔اگر آپ کو وقت ملے تو ضرور سوسائٹی کے آفس جائیے گا اور ان کی رہنمائی کر دیجیے گا۔

احسان اﷲ ‘نیویارک‘‘

میں نے احسان اﷲ کا خط پڑھا اور اس کے بعد اپنے آپ سے سوال کیا‘ یہ شخص اگر اپنے گائوں میں تبدیلی لا سکتا ہے تو ہم سب لوگ مل کر اپنے اپنے دیہات کو کیوں نہیں بدل سکتے؟ یہ سوال آپ کے لیے بھی ہے۔

بشکریہ:. ایکسپریس نیوز

جاویدچوہدری کے قلم سے…

واش روم بہت ہی گندا تھا‘ فرش گیلا تھا‘ واش بیسن میں داغ تھے‘ ٹوائلٹ پیپر غائب تھا اور کموڈ میں غلاظت تھی‘ ہاتھ دھونے کے لیے صابن لگایا‘ ایک ٹونٹی کے نیچے ہاتھ رکھا ‘وہ نہیں چل رہی تھی‘ دوسری کے نیچے ہاتھ رکھا‘ وہ بھی ٹس سے مس نہ ہوئی‘ میں نے تیسری پر قسمت آزمائی وہ چل پڑی‘ ڈرائیر بھی نہیں چل رہا تھا اور ٹشو پیپر کا باکس بھی خالی تھا‘ باتھ روم کی صفائی کا لڑکا دوڑ کر آیا اور مجھے چند ٹشو پیپر پکڑا دیے۔

میں نے اس کا شکریہ ادا کیا اور اس سے پوچھا ’’کیا آپ کافی پیتے ہو‘‘ اس نے حیرت سے میری طرف دیکھا اور پھر ناں میں سر ہلا دیا‘ میں نے پوچھا ’’اور چائے‘‘ اس نے ہاں میں سر ہلایا اور حیرت سے مجھے دیکھتا رہا‘ میں نے پوچھا ’’کیا آپ میرے ساتھ ایک کپ چائے پئیں گے‘‘ اس نے میری طرف دیکھا‘ اس کے بعد اپنی طرف دیکھا اور بولا ’’نہیں نہیں‘ آپ کا بہت بہت شکریہ‘‘ میں نے ہنس کر کہا ’’آپ کو میرے ساتھ چائے پینی پڑے گی‘‘ وہ گومگو کی حالت میں بولا ’’سر میں ڈیوٹی پر ہوں۔

میں یہ کیسے کر سکتا ہوں‘‘ میں نے ہنس کر جواب دیا ’’میں اگر آپ کو ڈیوٹی منیجر سے اجازت لے دوں تو کیا آپ میرے ساتھ چائے پی لیں گے‘‘ اس نے غیر یقینی حالت میں ہاں کر دی‘ میں اسے لے کر ایئرپورٹ کے ڈیوٹی منیجر کے کمرے میں چلا گیا‘ وہ بڑے تپاک سے ملے‘ میں نے ان سے اپنا مدعا بیان کیا تو وہ تھوڑی دیر تک مجھے اور سویپر لڑکے کو دیکھتے رہے اور پھر بولے ’’اس نے کوئی گڑ بڑ تو نہیں کی‘‘ میں نے ہنس کر جواب دیا ’’کیا آپ گڑبڑ کے بعد لوگوں کو چائے پلاتے ہیں‘‘ اس نے قہقہہ لگایا اور لڑکے کو آدھ گھنٹے کے لیے چھٹی دے دی۔
میں اسے ساتھ لے کر کافی شاپ پر گیا‘ اس کے لیے چائے اور اپنے لیے کافی آرڈر کی اور ہم میز پر بیٹھ گئے‘ وہ بے چارہ زندگی میں پہلی مرتبہ کافی شاپ کی کرسی پر بیٹھا تھا لہٰذا مجھے اس کے جسم میں ہلکا ہلکا ارتعاش صاف دکھائی دے رہا تھا‘ میں نے تھوڑی دیر گپ لگا کر اسے ایزی کیا اور پھر اس سے کہا ’’باتھ رومز کو صاف رکھنا آپ کی ذمے داری ہے۔

آپ اپنی ڈیوٹی صحیح طریقے سے کیوں نہیں کرتے؟ مسافروں کو آپ کے سامنے کتنی دقت ہورہی تھی‘‘ اس نے خوف سے میری طرف دیکھا اور پوچھا ’’کیا آپ میری شکایت لگانا چاہتے ہیں‘‘ میں نے ہنس کر جواب دیا ’’میں نے اگر شکایت کرنی ہوتی تو میں آپ کو چائے کیوں پلاتا‘‘ اس نے اطمینان سے سانس لیا اور پھر کہا ’’آپ وعدہ کریں آپ میری باتیں ڈیوٹی منیجر کو نہیں بتائیں گے‘ میری جاب چلی جائے گی‘‘ میں نے وعدہ کر لیا‘ وہ مسکرا کر بولا ’’سر واش روم میں صفائی کے لیے ہم دو لوگ ہوتے ہیں‘ ہم دس گھنٹے مسلسل کام کرتے ہیں۔

ہمارا سارا واشنگ مٹیریل روزانہ ختم ہو جاتا ہے لیکن اس کے باوجود واش رومز صاف نہیں ہوتے‘ ہم کیا کریں‘‘ میں نے پوچھا ’’کیاصفائی کے لیے لوگ کم ہیں‘‘ وہ بولا ’’ہرگز نہیں‘ دنیا میں ایک واش روم میں ایک بندہ ہوتا ہے جب کہ ہم دو دو ہیں‘‘ میں نے پوچھا ’’پھر ایشو کیا ہے؟‘‘ وہ بولا ’’آپ لوگ‘‘ میں اس کی طرف دیکھتا رہا‘ وہ بولا ’’سر یہ ایئرپورٹ ہے‘ یہاں خوش حال اور پڑھے لکھے لوگ آتے ہیں لیکن 99فیصد لوگوں کو واش روم استعمال کرنا نہیں آتا‘ یہ فلش نہیں کرتے اور اگر کرتے ہیں تو بٹن کو اتنی زور سے دبا دیتے ہیں کہ وہ خراب ہو جاتا ہے۔

کموڈ کے اوپر چڑھ کر بیٹھ جاتے ہیں جس سے کور ٹوٹ جاتے ہیں‘ فرش گیلا کرتے ہیں‘ واش بیسن میں ناک اور گلا صاف کرتے ہیں جس سے غلاظت جالی میں پھنس جاتی ہے‘ ڈرائیر کو دیر تک استعمال کرتے رہتے ہیں‘ ہاتھ صاف کرنے کے لیے دس دس ٹشو ضایع کر دیتے ہیں اور وضو خانے کے بجائے ٹوائلٹ اور واش بیسن میں وضو کرتے ہیں لہٰذا ایک فلائٹ کے بعد واش رومز استعمال کے قابل نہیں رہتے‘ ہم ابھی صفائی کر رہے ہوتے ہیں تو دوسری فلائٹ آ جاتی ہے اور وہ مسافر گند ڈالنے کے ساتھ ساتھ ہمیں برا بھلا بھی کہنا شروع کر دیتے ہیں چناں چہ آپ خود بتائیں جب ایک گھنٹے میں دو سو لوگ واش رومز گندے کریں گے تو کیا ہم دو لوگ انھیں صاف کر سکیں گے۔

آپ یقین کریں لوگ جیبوں میں مٹی کے ڈھیلے ڈال کر آتے ہیں اور کموڈ میں پھنسا کر چلے جاتے ہیں‘ یہ ٹشو پیپر کا پورا پورا رول کموڈ میں پھینک دیتے ہیں اور خواتین بچوں کے پیمپر کموڈ میں ڈال دیتی ہیں‘ ہم یہ گند کیسے صاف کر سکتے ہیں؟‘‘ میں حیرت سے اس کی کہانی سنتا رہا‘ وہ خاموش ہوا تو میں نے اس سے پوچھا ’’اس کا حل کیا ہے‘‘ وہ ہنس کر بولا ’’آپ لوگ‘ آپ لوگ جب تک گند مچانا بند نہیں کریں گے‘ اس وقت تک صورت حال ٹھیک نہیں ہو گی‘ خواہ آپ واش رومز کی صفائی کے لیے دو دو ہزار بندے بھی رکھ لیں‘‘ میں نے مسکرا کر شکریہ ادا کیا‘ اس کو تھپکی دی اور ایئرپورٹ سے باہر آ گیا۔

میرے لیے زندگی کا یہ ایک نیا زاویہ تھا‘ پاکستان میں صرف ایک فیصد لوگ ہوائی سفر کے قابل ہیں اور یہ لوگ خوش حال اور پڑھے لکھے بھی ہیں لیکن آپ ان کی سیوک سینس اور لائف ٹریننگ دیکھ لیں‘ ان لوگوں کو بھی واش روم استعمال کرنا نہیں آتا‘ آپ جہازوں کے واش رومز کی حالت بھی دیکھتے ہوں گے۔

یہ بھی کسی طرح قابل ستائش نہیں ہوتی لہٰذا آپ خود سوچیے جو لوگ جہاز کے اندر اور ایئرپورٹ پر اپنا گند صاف نہیں کرتے وہ لوگ شہروں‘ محلوں اور گھروں میں کیا کرتے ہوں گے اور دوسرا ملک میں جب ایک فیصد خوش حال لوگوں کی صورت حال یہ ہے تو باقی 99 فیصد لوگوں کا معیار کیا ہو گا؟ اب سوال یہ ہے ان لوگوں کو ٹھیک کرنا کس کی ذمے داری ہے؟ کیا یہ حکومت کی ڈیوٹی ہے؟ کیا صدر یا وزیراعظم آ کر انھیں ٹریننگ دیں گے؟ جی نہیں یہ معاشرے کی اجتماعی ڈیوٹی ہے‘ ہم لوگ جب تک ایک دوسرے کو ٹرینڈ نہیں کریں گے۔

ہم سب لوگ جب تک اپنا بوجھ خود اٹھانا شروع نہیں کریں گے ملک کے مسئلے حل نہیں ہوں گے لہٰذا میری حکومت سے درخواست ہے آپ مہربانی فرما کر دو کام کریں‘ پانچویں جماعت تک ایتھکس‘ ویلیوز اور سیوک سینس کو سلیبس کا حصہ بنا دیں‘ اسکولوں میں بچوں کو پڑھایا جانا چاہیے واش روم کیا ہوتے ہیں‘ یہ کیسے استعمال کیے جاتے ہیں اور ہر شخص کو استعمال کے بعد ان کی صفائی کرنی چاہیے‘ ہاتھ دھونا‘ ہاتھ خشک کرنا اور ایک دوسرے کو سلام کرنا بھی کیوں ضروری ہے اور دوسروں سے ہاتھ کیسے ملانا چاہیے اور ملاقات کے دوران کس شخص سے کتنے فاصلے پر کھڑا ہونا چاہیے؟یہ تمام اصول بچوں کو اسکول میں سکھانے چاہییں۔

میں نے تین ماہ قبل ڈاکٹروں کو ایک سیشن دیا تھا‘ میں نے انھیں بتایا ہم جب کسی شخص سے ملنے جاتے ہیں تو ہم سے ہاتھ ملانے کا فیصلہ اس شخص نے کرنا ہوتا ہے‘ وہ اگر ہاتھ ملانے میں پہل کرتا ہے تو ہمیں اس کی طرف ہاتھ بڑھا نا چاہیے ورنہ صرف منہ سے السلام و علیکم کافی ہوتا ہے‘ ہم ہر شخص کی طرف ہاتھ بڑھا دیتے ہیں یا دوسروں سے گلے ملنے کے لیے بے تاب رہتے ہیں یہ بدتمیزی ہوتی ہے‘ آپ یقین کریں ہال میں موجود تمام لوگوں کا کہنا تھا ہمیں زندگی میں یہ اصول پہلی مرتبہ معلوم ہوا‘معاشرے کو یہ اصول بتانا کس کی ذمے داری تھی؟ یہ حکومت کی ذمے داری تھی اور یہ کوتاہی کی مرتکب ہوتی رہی لہٰذا حکومت اسے سلیبس میں شامل کرے‘ دوسری درخواست‘ پورا ملک نالی‘ گلی‘ سڑک‘ پائپ اور پانی کی دہائی دے رہا ہے۔

ریاست کو یہ کام کرنے چاہییں لیکن جس ملک کے قرضے جی ڈی پی کا نوے فیصد حصہ ہوں گے وہ ملک کس کس کی سڑک‘ گلی اور نالی بنائے گا؟ ہمیں یہ سمجھنا ہوگا یہ کام ہمیں خود کرنے ہوں گے‘ عوام تھوڑی تھوڑی رقم جمع کریں‘ ہفتے میں ہر شخص چند گھنٹے دے اور اپنی گلی‘ اپنی نالی اور اپنی سڑک بنا لے‘ یہ پائپ بچھائے اور پھر حکومت سے درخواست کرے آپ اب ہمیں گیس سپلائی کر دیں اور کھمبوں اور تاروں کا بندوبست خود کر یں اور بجلی سرکار سے لے لیں۔

لوگ ماضی میں پانی کا کنواں خود کھود لیا کرتے تھے‘ یہ سرکار کا انتظار کیوں کر رہے ہیں؟ آپ کی شلوار پھٹی ہوئی ہے یا آپ کی قمیض کا کپڑا کم ہے تو یہ پورا کرنا اور اسے ری پیئر کرنا آپ کی ذمے داری ہے حکومت کی نہیں‘عوام کو یہ نقطہ سمجھنا ہوگا اور یہ باریک نقطہ سمجھانے کے لیے ہمیں سوشل لیڈرز کی ضرورت ہے۔

عمران خان خود ایک سوشل لیڈر ہیں‘ یہ کینسر اسپتال بھی بنا چکے ہیں اور یونیورسٹی بھی قائم کر چکے ہیں‘ یہ اچھی طرح جانتے ہیں عوام جب تک سامنے نہیں آتے‘ یہ جب تک خود گڑھے نہیں بھرتے ملک اس وقت تک ترقی نہیں کرتے لہٰذاحکومت کو ڈاکٹرامجد ثاقب جیسے سوشل لیڈرز کی مدد لینی چاہیے‘ڈاکٹر امجد ثاقب نے اخوت کے ذریعے اڑھائی کروڑ لوگوں کو غربت سے لڑنا سکھا دیا‘ حکومت اگر ان جیسے دو سو لوگوں کی ٹیم تیار کر دے اور یہ لوگ عوام کا ہاتھ پکڑ کر انھیں یہ سمجھا دیں یہ مسئلے آپ کے ہیں اور انھیں حل بھی آپ نے کرنا ہے تو آپ یقین کریں ملک میں پانچ دس برسوں میں بڑی تبدیلی آ جائے گی۔

میری حکومت سے درخواست ہے آپ اخلاقیات کو سلیبس کا حصہ بنا دیں اور ملک میں سوشل لیڈرز کی ٹریننگ کا ادارہ بنادیں‘ یہ ادارہ سوشل لیڈرز تیار کرے‘ لیڈرز آگے لیڈرز تیار کریں اور یہ لیڈرز عوام کی رہنمائی شروع کر دیں‘ ملک پھر بدلے گا ورنہ لوگ گلی‘ سڑک اور سویپر تلاش کرتے کرتے مر جائیں گے۔

بشکریہ:.ایکسپریس نیوز

سلیم صافی کے قلم سے…

انہیں اقتدار دلوایا گیا لیکن افسوس کہ عمران خان کو یہ نہیں سمجھایا گیا کہ پاکستان جیسے ملک کا اقتدار کس قدر ذمہ داری کا متقاضی ہے۔ حکمران بنانے سے قبل انہیں یہ نہیں سمجھایا گیا کہ حکمران بننے کے بعد زبان کس قدر احتیاط سے استعمال کرنی ہے اور نہ انہیں اختلافِ رائے کی اہمیت باور کروائی گئی اور نہ عمران خان کو مشاورت کے فن سے آشنا کرایا گیا۔

اپنے آپ کو عقل کل پہلے سےسمجھتے تھے اور جب وزیراعظم بنوائے گئے تو اس کے بعد تو وہ اپنے آپ کو ہر فن مولا بھی سمجھنے لگے ۔وہ بہرحال وزیراعظم پاکستان ہیں، یوں ان کے منہ سے نکلنے والا ہر لفظ ریکارڈ کا حصہ بنتا ہے ۔ دنیا پاکستانی ریاست کی پالیسی سمجھتی ہے، یہ ردعمل ظاہر کرتی اور پاکستان سے متعلق اپنی پالیسی بناتی ہے۔

اب وہ اقوام متحدہ کی جنرل اسمبلی کے اجلاس سے خطاب کرتے ہوئے امریکہ اور دنیا پر احسان جتارہے تھے کہ پاکستان نے ان کا ساتھ دے کر اسی ہزار جانوں کی قربانی دی ہے ۔ لیکن وہ ممالک ان کی بات پر کیوں کر یقین کریں گے جبکہ وہ دیکھ چکے ہیں کہ یہی عمران خان بطور وزیراعظم اپنی اسمبلی کے فلور پر اسامہ بن لادن کو شہید جبکہ دوسری طرف طالبان کو غلامی کی زنجیریں توڑنے والے قرار دے چکے ہیں۔

جنرل اسمبلی سے اسی خطاب میں ایک طرف امریکہ اورعالمی برادری کو یہ باور کرارہے تھے کہ وہ طالبان کے خلاف اقوام متحدہ کی چھتری تلے جنگ میں پاکستان کی قربانیوں کا ادراک کرے اور یہ کہ ان کے ملک پر ڈبل گیم کا الزام غلط ہے اور دوسری طرف اسی خطاب میں طالبان کی وکالت کرکے ان کی حکومت کو تسلیم کرنے کا مطالبہ کررہے تھے(انہوں نے تسلیم کرنے کا واشگاف مطالبہ نہیں کیا لیکن ان کی حکومت کی مدد کرنے اور دیگر مطالبات کا لب لباب یہی تھا) ۔

دوسری طرف اسی خطاب میں انہوں نے طالبان کے قہر کو بھی دعوت دی۔ انہوں نے افغان طالبان کی تحریک کو پختون قوم پرستی سے جوڑ دیا حالانکہ طالبان نے کبھی پختون نیشنلزم کی بات نہیں کی۔ ان کا نعرہ شریعت ہے ۔ وہ اپنی منزل خلافت قرار دیتے ہیں۔ طالبان کے مقابلے میں جو لوگ امریکہ اور نیٹو کی چھتری تلے حکمران بنے ، وہ حامد کرزئی تھے یا اشرف غنی اور دونوں پختون تھے ۔

اقوام متحدہ کی جنرل اسمبلی کے فورم پر اپنے اس خطاب میں انہوں نے پاکستانی عسکریت پسندوں کی طرف سے طالبان کی سپورٹ میں بندوق اٹھانے کی وجہ یہ بیان کی کہ دونوں طرف (افغانستان اور پاکستان) پختون تھے اور پختون نیشنلزم کی بنیاد پر پاکستانی طالبان نے افغان طالبان کی حمایت میں ہتھیار اٹھائے حالانکہ ہر کوئی جانتا ہے کہ اس کی وجہ پختون قوم پرستی نہیں بلکہ مذہبی نظریاتی ہم آہنگی یاپھر سٹریٹیجک گیم ہے۔

طالبان کے پہلے دور میں ان کا حامی اخبار وزیرستان یا پشاور نہیں بلکہ کراچی سے نکلتا تھا جو ایک اردو بولنے والے عالم دین کے زیراہتمام شائع ہوتا تھا۔ ان کے سب سے بڑے حامی جنرل حمید گل (جنرل صاحب مرحوم بتایا کرتے تھے کہ ان کے آباواجداد ملاکنڈ ڈویژن کے علاقے بونیر سے آئے تھے اور وہ نسلا پختون ہیں ۔لیکن اس حساب سے پھر مولانا صوفی محمد صاحب تاجک النسل ہیں جو طالبان کے حق میں ہزاروں لوگ افغانستان لے گئے تھے )اور کرنل امام تھے جو ظاہر ہے کہ پختون قوم پرست ہر گز نہیں تھے۔

نائن الیون کے بعد ان کے حق میں پہلا فتوی لال مسجد کے امام کی طرف سے آیا ۔بلاشبہ مولوی نیک محمد پاکستانی طالبان کے پہلے لیڈر تھے لیکن انہوں نے پناہ عرب اور ازبک مجاہدین کو دی تھی۔ اس وقت عمران خان کے چہیتے بیوروکریٹ اور ان کے موجودہ پرنسپل سیکرٹری اعظم ، جنوبی وزیرستان ایجنسی کےپولیٹیکل ایجنٹ تھے ۔

طالبان کی پہلی حکومت کے پاکستان میں جو شدید ترین مخالف تھے وہ بھی اے این پی اور پختونخوا ملی عوامی پارٹی کے لیڈر تھے اور اب دوبارہ ان کی کامیابی پر بھی سب سے زیادہ ماتم یہ قوم پرست جماعتیں کررہی ہیں۔ تحریک طالبان پاکستان میں پنجابی طالبان بھی شامل تھے ۔ لشکر جھنگوی کے لوگ زیادہ تر پنجاب اور سندھ سےتھے اور کراچی سے تعلق رکھنے والے سابق جماعتی ارشد وحید اور اکمل وحید جیسے لوگ بھی شامل تھے تو پھر کیسے یہ پختون نیشنلزم کی تحریک تھی یا ہے؟

اردو بولنےوالے سید منورحسن کی وہ بہت عزت کرتے تھے لیکن پختون قاضی حسین احمد پر مہمند ایجنسی میں پختون میجر مست گل نےخودکش حملہ کروایا تھا۔ پاکستانی طالبان نے سب سے زیادہ پختون قوم پرست جماعت اے این پی کے رہنماؤں اور کارکنوں کو قتل کیا۔ سب سے زیادہ پختونخوا کے پولیس اہل کار ان کے ہاتھوں مارے گئے ۔ پختون آفتاب شیرپاؤ، پختون امیر مقام اورپختون مولانافضل الرحمان پر بار بار خود کش حملے ہوئے لیکن الحمداللہ میاں نواز شریف یا عمران خان کبھی نشانہ نہیں بنائے گئے ۔

بیت اللہ محسود پختون تھے اور ان کے نمبرون حریف اسفندیارولی خان بھی پختون ہیں۔ مولانا فضل اللہ بھی سواتی پختون تھے اور ان کے بندوں کے ہاتھوں نشانہ بننے والی ملالہ یوسفزئی بھی پختون ہے ۔ اے پی ایس پر حملے کا ماسٹر مائند عمر منصور عرف نرے بھی پختون تھے اور وہاں پر لقمہ اجل بننے والے بچے بھی پختون تھے۔

دوبارہ منظم ہونے کے بعد ٹی ٹی پی نے جو پہلی ٹارگٹ لسٹ جاری کی ہے ، اس میں آفتاب شیرپاؤ اور میاں افتخار جیسے پختونوں کےنام تو ہیں لیکن پنجابی لیڈروں کے نام نہیں ۔ پھر آخر عمران خان کس بنیاد پر کہہ رہے ہیں کہ پختون نیشنلزم کی وجہ سے پاکستانی عسکریت پسندوں نے پاکستانی ریاست کے خلاف ہتھیار اٹھائے؟

پختونوں کی یہ بدقسمتی ہے کہ کمیونزم اور کیپٹلزم کی جنگ ہو یا پھر القاعدہ اور طالبان کی امریکہ اور اسکے اتحادیوں کیساتھ نظریاتی اور تزویراتی جنگ ہو، اس کیلئے میدان پختونوں کی سرزمین بن جاتا ہے ۔ اس وقت پاکستان میں ایک ایسی حکومت ہے جس میں وزرا بھی بڑی تعداد میں پختون ہیں اور اعظم خان جیسے بیوروکریٹس بھی پختون ہیں لیکن وہ عمران خان کے سامنے حق بات کا اظہار کرسکتے ہیں نہ ان کو تاریخی حقائق بتاسکتے ہیں۔

بشکریہ:. جیو نیوز

مناظرعلی کے قلم سے…

ایک لکھاری کواگرانصاف کیساتھ لکھناہے،سماجی مسائل پرخاص طورپرلکھتے وقت اسے معاشرے کے تمام طبقات پر نظررکھنا پڑتی ہے اور جہاں کہیں کسی کی پریشانی نظر آئے تواسےدور کرنے کیلئے قلم اٹھانی چاہیے، آج بہت دل دکھ رہاتھا جب مجھے معلوم ہوا کہ مہنگائی کے جن نے نسوارکو بھی نہیں بخشا،سب کچھ مہنگاہوگیا اوریہاں تک کہ نسوار بھی؟۔۔۔حد ہے ویسے۔۔خود ہی سوچیں کہ انسان اگر نسوار کا عادی ہے تو وہ کتنی کھاجاتاہوگا؟ذرا سوچیں۔۔۔!!
ہم فرض کرلیتے ہیں کہ آپ،یعنی جو بلاگ پڑھنے والے صاحب ہیں،،روٹی سے پیٹ کی آگ بجھاتے ہیں تو پھرجب یہ آگ سلگتی ہے اسے بجھانے کا بندوبست کچھ نہ کچھ کرنا پڑتاہے ورنہ یہ بڑھتی جاتی ہے اور اگر بروقت کنٹرول نہ ہو توروح جسم کا ساتھ چھوڑ جاتی ہے،سانسیں اُکھڑ جاتی ہیں،آنکھوں کے آگے اندھیرا چھاجاتاہے،یعنی کہ زندگی کا چراغ گل ہوجاتاہے،بچنے کایہی طریقہ ہے کہ پیٹ کو خوراک سے بھردو،کیوں کہ یہ ظالم ایسے نہیں چھوڑے گا۔۔پھرانسان جائز،ناجائزسب حلال ٹھہرا لیتاہے کیوں کہ اسے زندہ رہناہے،دنیا اسے اچھی لگتی ہے اور اچھی چیز کو کوئی نہیں چھوڑنا چاہتا۔
جب جیب خالی ہوگی،جب مہنگائی کا جن بے قابو ہوگا تو پھر انسان مجبور ہوگا،انسان بے بس ہوگا،وہ محروم ہوگا اور محرومی جرائم کو جنم دیتی ہے،جرائم معاشرے کے افراد کا سکون چھین لیتے ہیں،مجرم خود بھی اپنی زندگی جہنم بنالیتاہے اور دوسروں کی بھی،یعنی یہ ایک زندگی عذاب میں نہیں ہوگی،بلکہ اس سے کسی بھی طرح جڑی کئی زندگیاں کٹھن راہوں میں،اندھیروں میں اور مشکلات میں رہیں گی۔معاملہ سارا پیٹ کی آگ کاہے،جب تک یہ بجھی رہے گی،سکون رہےگا،انسان کو خود بھی اور انسان سے جڑے سبھی افراد کو۔
مجھے لگتاہے کہ جیسے عام انسان کیلئے روٹی اہم ہے،اس سے کہیں بڑھ کرعادی افراد کیلئے نسوارہے،اگرآپ نسوار کے عادی نہیں تو پھر میری طرح شاید آپ بھی نسوار کی عدم دستیابی یا اس کی قیمت بڑھنے کا اس سطح پر غم محسوس نہ کرپائیں،جتنا وہ شخص محسوس کرے گا جس کی جیب میں دو چار نسوار کی پڑیاں ہروقت دستیاب رہتی ہیں بلکہ سگریٹ کے عادی افراد کی طرح،جب سگریٹ مہنگے ہوتے ہیں، تو سموکرز گالیاں دیتے ہوئے بالکل اسی طرح آج نسواروالوں کی صورتحال بھی وہی ہے، میں یہ سمجھتاہوں کہ یہ سراسر زیادتی ہے،ضلع دیر کے نسوار فروشوں نےیہ جو ظلم عظیم کیاہےاس پر نسوار کے عادی افراد میں غم وغصہ بھی یقینی طورپر پایاجارہاہوگا،تیمرگرہ سمیت دیگرعلاقوں سے البتہ ابھی تک کوئی صدائے احتجاج تو بلند نہیں ہوئی البتہ لاہور میں بیٹھے ایک لکھاری کو دیر کے بے چارے نسوار کے عادی اور ملک بھر میں بسنے والے نسوار والوں کی فکر ہورہی ہے،یہ مشورہ ضرور دوں گا کہ آپ نسوار کو سستا ہی رہنے دیں اگر ممکن ہے کیوں کہ عادی افراد کیلئے یہ نسوار بھی کسی کڑاہی گوشت سے کم نہیں۔۔سوچیں تو انسان ایک دن میں کتنی نسوار کھاجائے گا،یعنی سستی کردیں تو ان کے منہ کا ذائقہ بھی ان کی چوائس کے مطابق نسوار زدہ رہے گا ورنہ اک چٹکی نسوار کی خاطر وہ ڈکیتی کرنے سے تو رہے۔۔البتہ یہ ضرور کہیں گے جیسا کہ لفٹ میں ملنے والے ایک پٹھان سے میں نے پوچھا کہ نسوار کیوں کھاتے ہو لالہ۔۔کہنے لگے۔۔تم کیا جانو،اک چٹکی نسوار کی قیمت؟۔

تعارف:
مناظر علی
بلاگر مناظرعلی مختلف اخبارات اور ٹی وی چنلز کے نولزروم سے وابستہ رہ چکے ہں ، آج کل لاہور کے ایک ٹی وی چنل پر کام کررہے ہں ۔ عوامی مسائل اجاگر کرنے کےلےے مختلف ویب سائٹس پر بلاگ لکھتے ہں ۔ ان سے فسل بک آئی ڈی munazer.ali پر رابطہ کا۔ جاسکتا ہے۔

بشکریہ..ڈیلی پاکستان

جاویدچوہدری کے قلم سے….

چترال کے دو حصے ہیں‘ اپر چترال اور لوئر چترال‘ دونوںاضلاع الگ الگ ہیں‘ لوئر چترال دریا کے کنارے آباد ہے اور وادی نما ہے جب کہ اپر چترال پہاڑوں پر چپکے‘ لٹکے اور پھنسے ہوئے دیہات کی خوب صورت ٹوکری ہے‘ ہم اتوار کی صبح اپر چترال کے ضلعی ہیڈ کوارٹر بونی کے لیے روانہ ہوئے‘ سفر مشکل اور دشوار گزار تھا‘ دریا کے ساتھ ساتھ وقفے وقفے سے گاؤں آ رہے تھے۔

چترال پاکستان کے باقی علاقوں سے مختلف ہے‘ اس میں دریا کی دونوں سائیڈز پر خشک سنگلاخ پہاڑ ہیں‘ ان پر اچانک کیک پر چاکلیٹ کی ڈریسنگ کی طرح مٹی کی دو تین میٹر موٹی تہہ آ جاتی ہے اور اس تہہ پر دور سے گھر‘ کھیت اور باغ چپکے ہوئے نظر آتے ہیں‘ ان دیہات کی تین اطراف میں سنگلاخ چٹانیں ہوتی ہیں اور چوتھی سائیڈ پر گہرائی میں دریا لہٰذایہ اس لحاظ سے ایک منفرد علاقہ ہے۔

ہماری بائیں جانب وقفے وقفے سے گاؤں آرہے تھے‘ ان میں جوار اور مکئی کی فصلیں لہلہا رہی تھیں اور ناشپاتی‘ سیب‘ انگور اور شہتوت کے باغ جھوم رہے تھے‘ ہمیں راستے میں ہموار خشک میدان بھی ملے‘ وہ شاید پانی کی کمی کی وجہ سے خشک رہ گئے تھے‘ بونی لوئر چترال سے تین گھنٹے کے فاصلے پر تھا‘ قصبہ پرانا اور دھیما سا ہے‘ آبادی کا زیادہ حصہ اسماعیلی کمیونٹی پر مشتمل ہے لیکن مذہبی منافرت نہ ہونے کے برابر ہے‘ یہ لوگ ایک دوسرے کو سنی اور اسماعیلی کی حیثیت سے نہیں پہچانتے چترالی کی حیثیت سے جانتے ہیں‘ ہم بونی میں پروفیسر علی نگاہ کے گھر گئے۔

یہ اسماعیلی مشنری رہے‘ چالیس سال تک دنیا کو اسماعیلی کمیونٹی کی روایات کے بارے میں بتاتے رہے‘ چھ کتابوں کے مصنف بھی ہیں لیکن میں یہ جان کر حیران رہ گیا یہ اسماعیلی ہونے کے باوجود جماعت اسلامی میں ہیں اور اس کے لیے باقاعدہ ووٹ بھی مانگتے ہیں‘ ان کے صاحب زادے معراج پیرا گلائیڈر ہیں‘ وہ مقامی لوگوں کو ٹریننگ بھی دیتے ہیں اور سیاحوں کو گلائیڈ بھی کراتے ہیں‘ چترالی اپنے گھر تین حصوں میں بناتے ہیں‘ فیملی حصہ‘ اس میں عورتیں اور بچے رہتے ہیں‘ مہمان خانہ‘ اس میں مہمانوں کو ٹھہرایا اور کھلایا پلایا جاتا ہے اور باغ‘ اس میں فروٹ کے درخت لگائے جاتے ہیں۔

جانور پالے جاتے ہیں اور کھیتی باڑی ہوتی ہے‘ پروفیسر علی نگاہ کا گھر بھی اسی ترتیب سے بنا ہوا تھا‘ باغ میں سیب اور ناشپاتی کے درخت پھلوں سے لدے ہوئے تھے اور ان پر انگوروں کی بیلیں چڑھی ہوئی تھیں‘ چترالی بانس نما لمبی چھڑی سے پھل توڑتے ہیں‘ چھڑی کے آخر میں غلیل بنی ہوتی ہے‘یہ لوگ پھل کو اس کے درمیان پھنسا کر چھڑی گھماتے ہیں اور وہ نیچے آ گرتا ہے جب کہ سیب کے درخت زیادہ اونچے نہیں ہوتے لہٰذا پھل آسانی سے توڑے جا سکتے ہیں۔

ہم نے جی بھر کر پھل توڑے جب کہ معراج ہمارے لیے تازہ انگور توڑ کر لائے‘ پروفیسر صاحب کا مہمان خانہ بھی چھوٹا سا باغ تھا‘کچی اینٹوں کی دیواروں کے درمیان گھاس کا قطعہ تھا‘ دیواروں کے ساتھ درخت اور انگور کی بیلیں تھیں اور ان کے درمیان ہم بیٹھے تھے‘ چترالی مہمان کو میز پر کھانا نہیں کھلاتے‘ مہمان خانے میں زمین پر دستر خوان بچھاتے ہیں‘ اسے پھلوں اور کھانوں سے بھر دیتے ہیں اور پھر مہمان کو بٹھا کر کھلاتے ہیں اور اسے دیکھ دیکھ کر خوش ہوتے ہیں‘ کھانا روایتی اور ثقافتی تھا‘ ہماری طبیعت خوش ہو گئی۔

ہمیں پی آئی اے کے نوجوان انجینئر افسرالدین نے پروفیسر علی نگاہ کے گھر سے اچک لیا‘ نوجوان بہت متحرک اور شان دار انسان ہے‘ بونی میں اس کے سسرال رہتے ہیں جب کہ خود بونی سے ذرا سے فاصلے پر دوسرے گاؤں میں رہتا ہے‘ افسر ہمیں اپنے سسرالی گھر لے گیا‘ اس کے سسر کو باغ بانی کا شوق ہے چناں چہ اس نے اپنے باغ میں ہر قسم کا پھل دار درخت اور پودا لگا رکھا ہے‘ آلوچے بھی پک چکے تھے‘ سیب بھی تیار تھے اور ناشپاتیاں بھی تاہم آڑو کے درخت پر شاخوں اور پتوں کے درمیان صرف ایک آڑو چھپا بیٹھا تھا اور ہم نے اسے کھوج کرنکال لیا‘ افسرالدین نے بھی پرتکلف کھانے کا اہتمام کر رکھا تھا اور اس نے اور اس کے برادرنسبتی نے ہمیں جس محبت اور لگاؤ سے کھلانا شروع کیا وہ قابل ستائش تھا۔

بونی کی فضا میں ایک بالکل مختلف قسم کی خوشبو اور کھلا پن تھا‘ ہم نے اس فضا میں تین گھنٹے گزارے‘ مجھے اس سارے عرصے میں یوں محسوس ہوتارہا یہ شہر شاید میری روح کا کوئی بچھڑا ہواٹکڑا یا روح کے آرکسٹرا کا کوئی ٹوٹا ہوا ساز ہے اور میں اسے آرکسٹرا میں دوبارہ جوڑنے یا اس سے گلے ملنے کے لیے یہاں پہنچا ہوں‘ گلیاں گندی‘ سڑکیں ٹوٹی ہوئیں اور ماحول میں ریت کے ذرے تھے لیکن اس کے باوجود اس شہر میں ابتدائی محبت کا سرور اور بے اختیار آوارہ بوسے کا ذائقہ ہے اور یہ گہری نیند میں کھلنے والی آنکھ‘ رخصت ہوتی دلہن کے وسوسوں اور خشک بنجر زمین پر پہلی بارش جیسا ہے‘ اس شہر میں کچھ تھا‘ شاید میں اسی لیے اپنے دل کی چند دھڑکنیں آلوچے کے درخت کے ساتھ باندھ آیا‘ اس امید کے ساتھ کہ شاید قدرت اس جنم میں ایک بارپھر اس شہر میں چند سانس لینے کی مہلت دے دے۔

ہم بونی سے واپس آ گئے‘ راستے میں لوئر چترال کی سرحد پر ضیاء صاحب کا گھر تھا‘ یہ بھی پی آئی اے کے ملازم ہیں‘ رائل فیملی سے تعلق رکھتے ہیں‘ چہرے پر شاہی خاندان کی تمکنت اور انداز میں اعلیٰ نسب کی عاجزی تھی‘ ہم نے ان کے ساتھ لنچ کرنا تھا لیکن دن کو منت کر کے آگے نکل گئے مگر واپسی پر ان سے بچنا محال تھا‘ ان کے گھر میں بھی باغ‘ فیملی کوارٹر اور مہمان خانہ تھا‘ ہم ان کی منتیں کرتے رہے مگر انھوں نے کھانا لگا دیا‘ یہ ہمارا اس دن میں چوتھا کھانا تھا‘ میں دن میں صرف دو بار کھاتا ہوں۔

لہٰذا یہ مہمان نوازیاں میرے لیے بھاری ثابت ہو رہی تھیں لیکن آپ یقین کریں میں نے زندگی میں ضیاء صاحب کے دسترخوان سے بہتر کھانا نہیں کھایا‘ تمام ڈشز لوکل تھیں بالخصوص مارخور کے گوشت کا ذائقہ ناقابل فراموش تھا‘ یہ گوشت انھیں کسی دوست نے گفٹ کیا تھا اور یہ اسے گھر میں رکھ کر کسی ’’حق دار‘‘ کا انتظار کر رہے تھے اور ہم اپنا حق وصول کرنے کے لیے ان کے گھر پہنچ گئے‘ ہم اٹھتے ہوئے ان کے دستر خوان کی مہک اور مہمان نوازی کی گرمائش ہمیشہ ہمیشہ کے لیے ساتھ لے آئے۔

پیر کو ہماری فلائٹ تھی‘ صبح مغفرت شاہ ہمارا ناشتہ لے کر ہوٹل پہنچ گئے‘ شاہ صاحب دو بار چترال کے ناظم رہے ہیں‘ جماعت اسلامی سے تعلق رکھتے ہیں‘ طویل قامت‘ خوش لباس اور مضبوط کاٹھی کے انسان ہیں‘ ان کے پاس ہزاروں کہانیاں اور سیکڑوں مسئلوں کے حل موجود ہیں‘ منظور احمد کے برادرنسبتی بھی ہیں‘ شاہ جی پیر کی صبح مقامی ناشتہ لے آئے‘ میں بار بار کھانوں کا ذکر کر کے خود کو سہیل وڑائچ محسوس کر رہا ہوں لیکن کیا کروں یہ حقیقت ہے چترال کے کھانے اور چترالیوں کی مہمان نوازی کو اگنور نہیں کیا جا سکتا‘ مغفرت شاہ نے انور امان صاحب کو بھی دعوت دے رکھی تھی‘ انور صاحب ایک دل چسپ کردار ہیں‘ اسماعیلی ہیں‘ بچپن اور لڑکپن چترال میں گزرا‘ جوانی میں امریکا گئے اور وہاں اربوں روپے کمائے‘ یہ اب چترال میں دو بڑے پراجیکٹس پر کام کر رہے ہیں۔

گرم چشمہ روڈ پر علاقے کا پہلا فائیو اسٹار ہوٹل بنا رہے ہیں‘ آٹھ ارب روپے کا منصوبہ ہے‘ یہ اس کے بعد بونی میں سائنس اینڈ ٹیکنالوجی کی یونیورسٹی بنائیں گے اور پھنڈر میں دریا کے درمیان جزیرے پر ریزارٹ بنائیں گے‘ میں نے ان سے اس معاشی خودکشی کی وجہ پوچھی تو انھوں نے قہقہہ لگا کر جواب دیا‘ چترالی لوگ ہر وقت پاکستان سے سڑک‘ پل‘ بڑا ایئرپورٹ اور نوکریاں مانگتے رہتے ہیں‘ کوئی ان سے یہ نہیں پوچھتا بھائی تم بتاؤ‘ تم نے آج تک پاکستان کو کیا دیا؟ ہم اگر ملک کو کچھ دیں گے تو ملک بھی ہمیں دے گا لہٰذا میں یہاں فائیو اسٹار ہوٹل کی شکل میں چترال کی طرف سے پاکستان کو تحفہ دے رہا ہوں‘ لوگ اس میں آ کر ٹھہریں گے اور اس سے چترال کی گڈوِل بنے گی۔

سائنس اینڈ ٹیکنالوجی کی یونیورسٹی بھی چترال کے لیے ایمبیسی ثابت ہو گی‘ پاکستان کے مختلف علاقوں سے نوجوان آئیں گے‘ ہمارے علاقے میں رہیں گے‘ کلچر سے واقف ہوں گے اور واپس جا کر دوسروں کو چترال کی بیوٹی کے بارے میں بتائیں گے لہٰذا میرا مقصد پورا ہو جائے گا‘ مغفرت شاہ نے بتایا چترال میں کریم آباد نام کا ایک گاؤں ہے‘ انور امان نے اس گاؤں میں بہت کام کیا‘ وہاں تعلیم سو فیصد ہے اور لوگ ہنرمند اور برسر روزگار ہیں‘ انور امان یہ سن کر مسکرائے اور بتایا‘میرے یہ سارے کام اہم ہوں گے لیکن میں جس کام کا کریڈٹ لیتا ہوں وہ پشاور میں ’’اسپارک آف ہوپ‘‘ نام کا ادارہ ہے۔

میں اور میری بیوی نے امریکا میں اپنے بیڈ پر لیٹے لیٹے بی بی سی کی ایک ڈاکومنٹری دیکھی تھیPakistan’s Hidden Shame ‘فلم میں انکشاف ہوا پشاور شہر میں سیکڑوں معصوم بچے دو دو ‘تین تین سو روپے کے لیے ٹرک ڈرائیوروں کی ہوس کا نشانہ بنتے ہیں‘ فلم دیکھنے کے بعد ہم میاں بیوی کی آنکھوں میں آنسو آگئے اور ہم نے ان بچوں کی مدد کا فیصلہ کیا‘ ہم پشاور آئے‘ ادارہ بنایا اور سڑک سے اٹھا اٹھا کر بچے اپنے ادارے میں آباد کر دیے‘ ہمارے پاس اس وقت دو ہزار بچے ہیں۔

ہم انھیں تعلیم بھی دے رہے ہیں‘ ہنر بھی اور ان کی عزت نفس بھی بحال کر رہے ہیں‘ انور امان نے اس کے ساتھ ہی موبائل فون سے ادارے کی تصویریں دکھائیں‘ وہ واقعی بین الاقوامی معیار کا ادارہ تھا‘ وہ تصویریں آگے کھسکاتے کھسکاتے ایک تصویر پررک گئے‘ یہ آٹھ نو برس کے خوب صورت بچے کی تصویر تھی‘ انور امان نے دکھی آواز میں بتایا‘ یہ بچہ تین سال کی عمر میں ڈرائیوروں کی ہوس کا نشانہ بننا شروع ہوا اور ایڈز کا شکار ہو گیا‘ ہم اس کا علاج بھی کرا رہے ہیں اور اسے انسانیت کا حق بھی لوٹا رہے ہیں‘ یہ سن کر میری آنکھوں میں آنسو آ گئے‘ میں نے اٹھ کر انور امان کو سیلوٹ بھی کیا اور اس کا ہاتھ پکڑ کر اسے بوسا بھی دیا‘ میرے سامنے دو ہزار مظلوم بچوں کامحسن کھڑا تھا‘ یہ شخص واقعی عظیم ہے۔

بشکریہ:.ایکسپریس نیوز

امجداسلام امجد کے قلم سے….

ایک رستے پہ ہوں‘ سب یہ پیر و جواں

عزم ہوں بے لچک حوصلے ہوں جواں

ہم تیرے ہم قدم‘ ہم تیرے ہم زُباں
اے زمینِ وطن‘ مادرِ مہرباں

6 ستمبر کی شام یوم شہداء اور یوم دفاع کی خصوصی تقریب میں جب پروگرام کے آغاز میں میرے لکھے ہوئے قومی گیت مادر مہربان کی پیشکش کا اعلان کیا گیا تو میرا ذہن یک دم نومبر 2020کی اس شام کی طرف چلا گیا جب آئی ایس پی آر کی ٹیم اس قومی گیت کا آئیڈیا لے کر پہلی مرتبہ میرے گھر تشریف لائی تھی۔ یہ آئیڈیا بیک وقت اتنا نیا اور تجرباتی تھا کہ مجھے اس کی نوعیت اور اس کی فارم کو سمجھنے کے لیے آیندہ دو ماہ میں ان سے مزید کئی ملاقاتیں کرنا پڑیں۔

کسی قومی گیت میں وعدے اور ورثے کے حوالے سے پرانی اور نئی نسل کو یکجا کرنا اور انھیں ایک ہی زنجیر کی کڑیوں کی شکل میں پیش کرنے تک تو بات آسان تھی مگر یہ پابندی کہ سینئر اور جونیئر گلوکاروں میں براہ راست خونی رشتہ بھی ہو کہ باپ یا ماں کے ساتھ ان کا سگا بیٹا یا بیٹی مل کر اپنے حصے کے بند کو گائیں اور اس کے ساتھ ساتھ شاعری کے حوالے سے اس کی بحر، ردیف، قافیہ اور مصرعوں کی ترتیب اس کی کمپوزیشن اور بانٹ میں بھی برابری رہے اور یہ کہ ہر بند میں سینئر نسل وعدے اور جونیئر نسل ورثے کی حفاظت کا اعلان کرے۔

ایک پیچیدہ معاملہ تھا۔ خیر اللہ کا نام لے کر اس تھیم کو پیش نظر رکھتے ہوئے میں نے تین چار ابتدائی لائنیں جنھیں موسیقی کی زبان میں استائی کہا جاتا ہے ترتیب دیں جن میں ہم تیرے ہم قدم ہم تیرے ہم زباں… اے زمین وطن مادر مہربان کو زیادہ پسند کیا گیا۔

اسی اثنا میں پاکستان کے تمام بڑے اور نامور گلوکاروں سے آئی ایس پی آر کے ماہرین کا رابطہ جاری رہا جب کہ دوسری طرف میں اور کمپوزر ساحر علی بگا اس کی کمپوزیشن کے حوالے سے مختلف طرح کے تجربات میں مصروف رہے۔

میرا مشورہ تھا کہ اس گیت کی تھیم، اس کا مزاج اور اس کی مخصوص پابندیاں اس بات کی متقاضی ہیں کہ اس میں نفس مضمون اور میلوڈی کو زیادہ اہمیت دی جائے۔ پوری ٹیم نے میری اس بات سے اصولی طور پر اتفاق کر لیا۔

اس گیت کے تین بند ہیں جنھیں بالترتیب شفقت امانت علی، ان کے بیٹے سادات، سجاد علی اور ان کی بیٹی ضو علی۔ عابدہ پروین اور ان کے صاحبزادے سارنگ لطیف نے گایا ہے۔ فارم کے لحاظ سے میرے لیے ایک نیا تجربہ تھا کہ جس لائن پر سینئر گلوکار ختم کرے اس کے جونیئر کی اگلی دونوں لائنیں بات کو اس طرح سے آگے بڑھائیں کہ ان میں قافیے کو برقرار رکھا جائے کہ یوں نہ صرف ان کی نغمگی میں اضافہ ہوگا بلکہ اس سے اگلی چاروں لائنوں کے ردھم اور موسیقیت میں بھی اضافہ ہوگااور ایسا ہی ہوا اور یوں وعدے کے تسلسل کو، ورثے کی شکل میں آگے بڑھانے کا آئیڈیا نومبر 2020 میں ایک پودے کی شکل میں سامنے آیا تھا اور وہ دس ماہ کے اندر ایک تناور اور سایہ دار درخت کے روپ میں ڈھل گیا۔

اور یوں ہم قوم کے سامنے ایک ایسے گیت کو پیش کر پائے جس میں ہماری تاریخ، قومی امنگیں، نئی اور پرانی نسل کی ہم آہنگی اور وہ خوبصورت مستقبل یک جان ہو گئے جس کی خاطر ہمارے لوگوں نے وردی میں اور وردی کے بغیر بھی بے شمار قربانیاں دی ہیں اور مجھے بہت خوشی ہے کہ آئی ایس پی آر کی اس خوبصورت اور بامعنی پیش کش میں مجھے بھی اپنی بساط بھر حصہ ڈالنے کا موقع ملا ہے. یقینا ڈی جی آئی ایس پی آر، ان کی ٹیم اور وہ سب لوگ بھی مبارکباد کے مستحق ہیں جنھوں نے کسی بھی شکل میں اس کی تکمیل میں ہاتھ بٹایا ہے۔ آج ہم سب بھی ایک کورس کی شکل میں ان گلوکاروں کی آواز میں آواز ملا کر یہی کہنا چاہتے ہیں کہ

ہم تیرے ہم قدم ، ہم تیرے ہم زباں

اے زمین وطن، مادر مہربان

بشکریہ:.ایکسپریس نیوز

جاویدچوہدری کے قلم سے….

میں اگر چیف الیکشن کمشنر سکندر سلطان راجہ کی ایک فقرے میں تشریح کروں تو یہ کہہ دینا کافی ہو گا ’’حکومت غلط آدمی سے ٹکرا گئی ہے‘ اس لڑائی میں صرف ایک فریق کو نقصان ہو گا اور وہ ہو گی حکومت‘‘۔

سکندر سلطان راجہ بھیرہ کے قریب چھوٹے سے گائوں چھانٹ میں پیدا ہوئے‘ گائوں میں بجلی تھی‘ سڑک تھی اور نہ ہی اسکول‘ والد آرمی میں میجر تھے‘ان کی سینئر افسر سے لڑائی ہو گئی اور وہ پری میچور ریٹائرمنٹ لے کر گائوں آ گئے‘ یہ نو بہن بھائی تھے‘ سکندر سلطان والدین کی آٹھویں اولاد تھے‘ یہ چار سال کے تھے‘ والد کا انتقال ہو گیا‘ بھیرہ میں ٹاٹ اسکول سے پڑھے‘ آٹھویں جماعت میں تھے‘ حسن ابدال کیڈٹ کالج کے انگریز پرنسپل نے پنجاب کے ہائی اسکولز کو خط لکھ دیا۔

آپ اپنے بچے نامزد کریں‘ ہم ٹیسٹ لیں گے اور اہل بچوں کو کیڈٹ کالج میں داخلہ دیں گے‘ ہیڈ ماسٹر نے سکندر سلطان کا نام بھجوا دیا‘ یہ آٹھویں جماعت میں پہلی بار لاہور گئے‘ ٹیسٹ ہوئے‘ انٹرویو دیا اور یہ پاس ہو کر کیڈٹ کالج پہنچ گئے‘ ایف ایس سی کی‘ میڈیکل کالج میں داخلہ ہوا‘ ڈاکٹر بنے اور میڈیکل آفیسر بن کر سرگودھا کے ایک گائوں میں پہنچ گئے‘ سی ایس ایس کی تیاری کی‘ امتحان دیا اور ڈی ایم جی میں سلیکٹ ہو گئے‘ ان کی پہلی پوسٹنگ اسلام آباد میں تھی۔
یہ اے سی تھے اور سعید مہدی چیف کمشنر‘ ایک خاتون کے ذریعے سعید مہدی کی صاحب زادی کے ساتھ شادی ہو گئی لیکن مہدی صاحب اور راجہ صاحب کے مزاج میں زمین آسمان کا فرق ہے‘ سسر صاحب دھیمے ہیں لیکن داماد سیدھے اور ڈٹ جانے والے ہیں۔یہ مختلف پوزیشنوں پر کام کرتے ہوئے نومبر2019 میںسیکریٹری ریلوے کی حیثیت سے ریٹائر ہو گئے‘ شیخ رشید ان کے فین اور ’’ویل وشر‘‘ ہیں‘ شیخ رشید نے وزیراعظم سے انھیں فیڈرل پبلک سروس کمیشن کا ممبر تعینات کرنے کی سفارش کی لیکن پرائم منسٹر آفس نے انکار کر دیا، یوں یہ ریٹائرمنٹ کے بعد لاہور شفٹ ہو گئے۔

21جنوری 2020 کی شام ان کے دوست آغا حسن جان نے انھیں فون کیا اور مبارک باد دی’’ آپ سی ای سی نامزد ہو گئے ہیں‘‘ سکندر سلطان راجہ نے فوراً پوچھا ’’یہ سی ای سی کیا ہوتا ہے‘‘ یہ اس وقت تک چیف الیکشن کمشنر (سی ای سی) کے بارے میں کچھ نہیں جانتے تھے‘ آغا حسن جان کی بیگم رابعہ جویریہ شیریں مزاری کی سیکریٹری ہیں‘ خبر شیریں مزاری کے ذریعے نکلی تھی اور یہ بھی پتا چلا تھا ان کا نام وزیراعظم نے تجویز کیا تھا‘کیوں کیا تھا؟

یہ راز آج تک نہیں کھل سکا تاہم میں اتنا جانتا ہوں سکندر سلطان راجہ ای وی ایم (الیکٹرانک ووٹنگ مشین) کے بہت بڑے حامی تھے اور ان کا خیال تھا یہ چیف الیکشن کمشنر بننے کے بعد دو کام ضرور کریں گے‘ یہ ووٹنگ کے پراسیس کو مشین پر شفٹ کریں گے اور پاکستان میں کم از کم ایک ایسا الیکشن ضرور کرائیں گے جس پر تمام پارٹیوں کو اعتماد ہو۔

میں اسٹوری کی طرف واپس آتا ہوں‘ وزیراعظم انھیں خود لے کر آئے تھے‘ عمران خان کے ساتھ ان کی پہلی ملاقات 2013 میں ہوئی تھی‘ یہ ڈی جی پاسپورٹ تھے اور عمران خان ایم این اے بننے کے بعد پاسپورٹ بنوانے ان کے دفتر گئے تھے‘ یہ 2018کے بعد بطور سیکریٹری ریلوے وزیراعظم کے پاس جاتے رہے لیکن وہ ملاقاتیں زیادہ خوش گوار نہیں تھیں‘ یہ بہرحال چیف الیکشن کمشنر بن گئے اور حکومت سے ان کا پہلا پھڈا لوکل باڈیز الیکشن پر پڑگیا۔

سپریم کورٹ نے بلدیاتی الیکشن کرانے کا حکم دیا تھا‘ بلدیاتی الیکشن نہ ہوئے تو جسٹس قاضی فائز عیسیٰ نے 28 جنوری 2021کو چیف الیکشن کمشنر کو طلب کر لیا‘یہ عدالت میں پیش ہوئے‘ جج صاحب نے ان سے اور اٹارنی جنرل خالد جاوید سے پوچھا ’’آپ ادارے سے بالاتر ہو کر صرف پاکستانی کی حیثیت سے جواب دیں ‘کیا بلدیاتی اداروں کی معطلی آئینی تھی‘‘ دونوں نے جواب سے بچنے کی کوشش کی لیکن جسٹس قاضی فائز عیسیٰ جواب چاہتے تھے۔

اٹارنی جنرل نے جواب دیا‘ یہ غیر آئینی اور غلط تھا‘ سکندر سلطان راجہ نے اٹارنی جنرل کی تائید کر دی اور جسٹس قاضی فائز عیسیٰ نے الیکشن کمیشن کو بلدیاتی انتخابات کی تاریخ کے لیے ایک ہفتے کی مہلت دے دی اور وزیراعظم سپریم کورٹ میں اعتراف پر چیف الیکشن کمشنر سے ناراض ہو گئے۔ دوسرا ایشو ڈسکہ کے ضمنی الیکشن نے پیدا کر دیا‘ یہ مسئلہ آراوز سے شروع ہوا تھا‘ پارٹی کے چند لوگ حلقے میں اپنی مرضی کے آراوز لگوانا چاہتے تھے‘ الیکشن کمشنر نے صاف انکار کر دیا‘ الیکشن کی شام 20 پریذائیڈنگ آفیسرز رزلٹ سمیت غائب ہوگئے۔

یہ لوگ سیالکوٹ شہر کے ایک احاطے میں جمع کیے گئے تھے‘ پارٹی کے ایک اہم عہدیدار سے اس حرکت کی وجہ پوچھی گئی تو اس نے ہنس کر جواب دیا ’’ہم چاہتے تھے باقی پولنگ اسٹیشنز کے رزلٹ آ جائیں تاکہ جتنی کمی بیشی ہو ہم وہ ان 20 پولنگ اسٹیشنز سے پوری کر لیں‘‘ عثمان ڈار نے بھی الیکشن کمیشن کے ایک سینئر ممبر کے سامنے اپنی غلطی کا اعتراف کیا لیکن بہرحال ڈسکہ میں دوبارہ الیکشن بھی ہوا اور الیکشن کمیشن نے تحقیقات کے لیے دو انکوائری کمیٹیاں بھی بنا دیں۔

الیکشن کمیشن کو 20 پریذائیڈنگ آفیسرز کے اغواء کی رپورٹ موصول ہو چکی ہے جب کہ افسروں کے رویے کی رپورٹ تین دن میں آ جائے گی‘ الیکشن کمیشن یہ دونوں رپورٹس اگلے ہفتے جاری کر دے گا اور یہ رپورٹس حکومت کو جڑوں سے ہلا کر رکھ دیں گی۔تیسری ناراضگی سینیٹ کے تین مارچ 2021ء کے الیکشن کے دوران پیدا ہوئی‘ حکومت اوپن بیلٹ کے ذریعے الیکشن کرانا چاہتی تھی‘ معاملہ سپریم کورٹ میں گیا۔

پانچ رکنی بینچ بنا اور سپریم کورٹ نے چیف الیکشن کمشنر کو بلالیا‘ حکومت چاہتی تھی سکندر سلطان راجہ عدالت میں ’’یہ ہو سکتا ہے‘‘ کہہ دیں لیکن انھوں نے ڈٹ کر جواب دیا ’’آئین کی شق 226 کے تحت یہ غیر آئینی ہو گا‘‘ عدالت نے حکومت کے خلاف فیصلہ دے دیا‘ وزیراعظم ناراض ہو گئے اور انھوں نے اپنی تقریروں میں باقاعدہ اس ناراضگی کا اظہار شروع کر دیا‘ وزراء نے اسے حکومتی پالیسی سمجھ لیا اور یہ بھی الیکشن کمیشن کے خلاف سرعام بولنے لگے۔چوتھی ناراضگی الیکٹورل ریفارمز بل تھا۔

حکومت نے 10 جون 2021 کو قومی اسمبلی سے الیکٹورل ریفارمز بل پاس کرا لیا‘ یہ بل جب الیکشن کمیشن پہنچا تو چیف الیکشن کمشنر نے اس پر 28 اعتراضات اٹھا دیے‘ حکومت نے حلقہ بندیوں اور ووٹرز کے تعین کا اختیار الیکشن کمیشن سے لے کر نادرا کو دے دیا تھا‘ نادرا براہ راست وزارت داخلہ کے ماتحت ادارہ ہے چناں چہ حکومت نادرا کے ذریعے الیکشن سے پہلے وسیع پیمانے پر دھاندلی کرا سکتی تھی اور یہ غیرآئینی تھا‘یہ بل بابر اعوان نے بنایا تھا اور اس میں وسیع پیمانے پر غیرآئینی شقیں تھیں۔

الیکشن کمیشن کی نشان دہی پر یہ بل سینیٹ میں رک گیا اور حکومت غیرآئینی شقیں واپس لینے پر مجبور ہو گئی۔پانچویں ناراضگی پی ٹی آئی میں انٹرا پارٹی الیکشن کے ایشو پر پیدا ہوئی‘ الیکشن کمیشن نے 29 جولائی 2021 کو انٹراپارٹی الیکشن نہ کرانے پر عمران خان کو نوٹس جاری کر دیا اور حکومت نے اسے جانب داری قرار دے دیا‘وزراء نے الیکشن کمیشن پر توپوں کے دھانے کھول دیے۔

حکومت نے الیکشن کمیشن کے فیصلے کو چیلنج بھی کر دیا لیکن پھر حکومتی وکیل شاہ خاور درخواست واپس لینے الیکشن کمیشن پہنچ گئے‘ ایک ممبر نے وجہ پوچھی تو وکیل نے بتایا‘ ہم نے پارٹی منشور نہیں پڑھا تھا‘ منشور کے مطابق ہمارے الیکشن واقعی ڈیو تھے‘ اس معاملے میں بھی حکومت غلط تھی لیکن وزیراعظم کو الیکشن کمیشن کا نوٹس برا لگا اور چھٹا اور تازہ ترین ایشو الیکٹرانک ووٹنگ مشین (ای وی ایم) ہے۔

سکندر سلطان راجہ ای وی ایم کے حامی ہیں‘ یہ الیکشن کے عمل کو مشین پر شفٹ کرنا چاہتے ہیں لیکن حکومتی ای وی ایم میں تین خوف ناک ایشوز ہیں‘ حکومت دعویٰ کر رہی ہے یہ مشین وزارت سائنس اینڈ ٹیکنالوجی نے بنائی جب کہ مشین پرائیویٹ کمپنی ریپڈیو (Rapidev) نے تیار کی‘ کمپنی کا ہیڈکوارٹر دوبئی میں ہے تاہم کمپنی نے ایک دفتر نسٹ میں بھی قائم کر رکھا ہے‘ یہ کمپنی کس کی ہے اور کمپنی کو کس نے اور کیوں مشین بنانے کا ٹاسک دیا؟

یہ راز کوئی نہیں جانتا‘دوسرا حکومت ایک سیاسی جماعت ہے اور یہ 2023 کے الیکشنز کی سٹیک ہولڈر بھی ہو گی لہٰذا الیکشن کمیشن حکومت کی پسند کی کسی پرائیویٹ کمپنی کی مشین کو کیوں اجازت دے دے؟ الیکشن کمیشن کا خیال ہے مشین کے بارے میں فیصلہ الیکشن کمیشن کا مینڈیٹ ہے‘ حکومتی پارٹی جب اپنی مشین کے ذریعے الیکشن کرائے گی تو اس کی کیا کریڈیبلٹی رہ جائے گی اور تیسری وجہ الیکشن کمیشن میں انتخابی عمل کو فوری طور پر مشین پر شفٹ کرنے کی کیپسٹی نہیں۔

کمیشن کو تیاری کے لیے وقت چاہیے لیکن حکومت ہر صورت مشین ’’نافذ‘‘ کرانا چاہتی ہے اور الیکشن کمیشن اس کے لیے تیار نہیں‘ دوسرا وزراء نے 10ستمبر کو سینیٹ کی اسٹینڈنگ کمیٹی اور صدر عارف علوی کے دفتر میں الیکشن کمیشن کے عملے کی خوف ناک بے عزتی کی‘ الیکشن کمیشن کے ڈی جی آئی ٹی آپریشنز محمدخضر عزیز اور دو ڈائریکٹرز صدر کی دعوت پر ایوان صدر گئے لیکن وہ روتے ہوئے واپس آئے۔

ان کا کہنا تھا وزراء ہماری بے عزتی کر رہے تھے اور صدر صاحب ہنس رہے تھے لہٰذا الیکشن کمیشن نے فیصلہ کیا یہ کسی قیمت پر حکومت کا کوئی ناجائز مطالبہ نہیں مانے گا‘ یہ فواد چوہدری اور اعظم سواتی کے خلاف قانونی کارروائی بھی کرے گا‘ ڈسکہ الیکشن کی دونوں رپورٹس بھی سامنے آئیں گی اور فارن فنڈنگ کیس کی رپورٹ بھی اسی مہینے ریلیز ہو جائے گی چناں چہ میں ایک بار پھر کہوں گا حکومت نے غلط آدمی سے پنگا لے لیا ہے‘ سکندر سلطان راجہ کسی قیمت پر پیچھے نہیں ہٹے گا۔

بشکریہ:.ایکسپریس نیوز

مناظرعلی کے قلم سے…
دیہات کا پُرفضاماحول چھوڑے سالوں گزرگئے اور یہ خواہش دل ہی دل میں کہیں دم توڑ رہی تھی کہ کاش کچھ ہفتے مسلسل ان درختوں کے نیچے بیٹھ کرگزارے جائیں جہاں بچپن کے دن گزرے تھے۔۔۔اسی دوران کوروناکی وباپھوٹی اورپھر’ورک فرام ہوم‘ کے احکامات نے کورونا کی تباہ کاریوں سے پیدا ہونے والی غمی کو خوشی میں بدل دیا۔۔۔رخت سفرباندھا اور موٹروے پر ایسے گاڑی دوڑائی جیسے کورونا ایک خوفناک جن کی صورت میں ہمارے پیچھے بھاگ رہاہو اور ہم اس سے بچنے کی کوشش میں ہوں۔۔۔ہینڈ سینٹائزرہاتھوں پر بار بار ملتے،منہ پر ماسک چڑھائے اورسماجی فاصلے برقرار رکھتے ہوئے جب گاؤں پہنچے توہمارے ماسک دیکھ کر ڈیرے کے کتے خوب بھونکے۔۔۔ماسک اتارا تو کتوں نے پہچانا کہ بڑے صاحب اور چھوٹے صاحب تشریف لاچکے ہیں لہذا دُم دباتے قدرے شرمسار سے ہوگئے کہ اب ڈانٹ ڈپٹ نہ شروع ہوجائے۔خیروہ انسان تھوڑے ہی تھے کہ جنہیں ڈانٹاضروری تھا۔۔۔وہ اپنی غلطی پر ہی پشیماں تھے تو بات ختم۔۔۔مزید انہیں ڈانٹ کر حالات خراب کرنے کا فائدہ بھی نہیں تھا کہ اب شب و روز انہیں کتوں نے ہماری رکھوالی کرنی ہے لہذا ان کیساتھ بگاڑنے کی بجائے تعلقات ٹھیک رکھے جائیں تو یہی بہتررہے گا۔

سورج ڈھلتے ہی رات کی تاریکی نے پَر کھولے تو آسمان تاروں سے بھر گیا اورچاندکی روشنی نے گاؤں کی چھت سے چناب کے کنارے بھی دکھا دئیے۔۔۔گھاس کے پتوں سے اڑان بھرتے جگنؤؤں نے بچپن کی شامیں یاد کرادیں اور کہیں دور ٹمٹاتی روشنیوں نے مٹی کے تیل پر جلنے والے دئیے کی یاد تازہ کردی ،جب گاؤں میں بجلی نہیں تھی اور ہم سکول کا سبق لالٹین کی روشنی میں یاد کرتے تھے،وہ تو بھلا ہو واپڈا والوں کا جب انہوں نے پورے 14ہزار روپے رشوت لے کر ہمارے گاؤں کو بھی برقی روشنیوں سے منور کردیا۔۔۔یاد ہے وہ دن جب گاؤں میں ہمارے گھر پہلا بلب جلا تو سارا گاؤں ہمارے گھر جمع ہوگیا،پھر اگلے ہی دن سارے گھروں میں وائرنگ ہوگئی اور وہ بلیک اینڈ وائٹ انٹینے والا ٹی وی جو ٹریکٹر کی بیٹری پر چلتا تھا بجلی پر چل پڑا۔۔۔

صاف رزلٹ کیلئے ایک بچے نے چھت پر چڑھ کر انٹینا ہلانا اور اور دوسرے نے ٹی وی پر نظر رکھنی۔۔۔کبھی موسم اچھا ہونا تو پڑوسی ملک کا کوئی چینل نظر آجانااور یہ خاصی حیرت کی بات ہوا کرتی تھی۔۔۔ پختہ مکان کی پکی چھت پر کھڑے ہوکر وہ کچے مکان یاد آگئے جب بارش کے پانی میں کاغذکی کشتی چلاتے تو دوسری طرف کم سن بچیاں اپنی گڑیا کے کپڑے تیار کرتی تھیں۔۔۔۔چوبارے کی چھت سے گھرکے صحت میں دیکھاتو جیسے ماضی کی فلم دماغ کے کمپیوٹرپرچلنا شروع ہوگئی ہو۔۔۔

یہ وہ دور تھا جب اتنی بڑی حویلی میں ایک بیٹھک،دو کمرے،ایک کچن،ذرا ہٹ کر ایک جانوروں کا کمرہ،جس کیساتھ ایک مرغیوں کا ڈرباتھا،سامنے لئی کی چھمکوں (لئی دریائی علاقوں میں قدرتی اگتی ہے جس کی ٹہنیاں آگ جلانے یا ٹوکرے بنانے کے کام آتی ہیں)سے بنے ٹوکرے کے نیچے لال رنگ کا مرغا ہوا کرتاتھا جو مسجد کے میناروں سے اذان کی آواز بلند ہوتے ہی اپنی اذان دے دیتاجس سے پورے گاؤں کو فجر کی خبر ہوجاتی،لوگ سورج کی کرنیں پھوٹنے سے قبل کھیتوں میں کام کاج کو پہنچ جاتے اور گھر کی خواتین نماز،تلاوت قرآن کے بعد ناشتہ بنانے کی تیاری میں مصروف ہوجاتی تھیں، بجلی کا تصورتھا مگر میسر نہ تھی اس لیے دودھ میں مدھانی ہاتھوں سے ہی چلائی جاتی جس سے تازہ مکھن اور لسی ناشتے کامرکزی جزو بنتی،تب ناشتے میں چوپڑی روٹی،اچار،مکھن اور لسی ہوا کرتی تھی اور اگر موسم ہوتا تو پھر پراٹھے پر ساگ رکھ کر اوپرمکھن رکھاجاتااور یوں ایک خالص ناشتہ سارے دن کے لیے جسم کی توانائی کا سبب بن جاتا۔۔۔۔

سورج کی کرنیں نمودار ہوتیں تو گھاس پر پڑے شبنم کے قطرے موتیوں کی طرح چمکنے لگتے اور مرغیاں اپنے ڈربوں سے نکال دی جاتیں جو دانہ دنکا کھانے کے لیے گھر کے سامنے باغ میں پہنچ جاتیں،اس دوران انسانی آوازیں کانوں میں پڑتے ہی بانس اور آم کے درختوں کے پتوں میں چھپی چڑیاں،بلبلیں اور جل ککڑ اڑ کر اپنے اپنے مشن پر نکل جاتے، کوے تب تک کچے مکانوں کے بنیرے پر آکر اپنی اپنی پوزیشنیں سنبھال لیتے تاکہ کسی بچے کے ہاتھ میں روٹی کا لقمہ ہو تو وہ جھپٹ کر اسے اپنے بچوں کو کھلا سکے،صبح صبح مرغیوں کے ننھے چوزے بھی کوؤں کا خاص ہدف ہوا کرتے تھے،اگر کوئی چوزہ کوا یا چیل اٹھا کر لے جاتی تو پھر بچے اس چوزے کو چھڑانے میں کسی فوجی لشکر کی طرح آخر تک پیچھا کرتے یہاں تک کہ وہ چیل یا کوا چوزے کوبلندی سے ہی پھینک دیتا ،کوے سے چوزہ چھڑانے کی کہانی پھر بچوں کے ذریعے جنگل کی آگ کی طرح مساجد میں سپارہ پڑھنے والے دیگر بچوں اور پرائمری سکول میں کچی اور پکی کے طالب علموں تک بھی کچھ ہی دیر میں پہنچ جاتی۔۔۔تب خالص جذبے،خلوص اور پیارسے بھرپورانسان تھے اورہرطرف چھوٹی چھوٹی خوشیوں سے لبوں پر مسکراہٹوں کے پھول بکھرجاتے تھے۔۔۔

گاؤں کے چپے چپے،درخت،درخت اور کھیتوں کی پگڈنڈیوں پر جگہ جگہ یادوں کے موتے بکھرے پڑے ہیں،کورونا نے موقع دیا اور ہم نے ان موتیوں میں سے کچھ موتی سمیٹ لیے،کچھ کو سمیٹنے کے لیے وقت کا انتظار ہے مگرمیں یہ دعا نہیں کرتاکہ کرونا کی لہر طویل ہو اور میں یہ موتی سمیٹتا رہوں۔۔۔بے شک اس وبا نے مجھے میرا بچپن یاد کرادیا مگر خدا سے دعا ہے کہ وہ جلدی انسانیت کو اس تکلیف دہ وائرس سے چھٹکارہ عطافرمائے،البتہ آپ میں سے بھی اگرکسی کو شہرکی مصروف زندگی سے کچھ وقت ملے تو اپنے آبائی گاؤں ضرورجائیں، جگنؤؤں سے ملیں،تتلیوں کے پیچھے بھاگیں اور چوزوں کو کو ؤں سے بچانے کی کوشش کریں،بکری کے بچے کے معصوم ہونٹ گھاس پر خوراک تلاش کرتے دیکھیں،طلوع آفتاب کے وقت چمکتے شبنم کے قطرے دیکھ کرمحظوظ ہوں،غروب آفتاب کے وقت گھونسلوں کو لوٹتے پرندے دیکھیں،نیلے آسمان پرتاروں کا جھرمٹ دیکھیں اور چودہویں کے چاندپرغورکریں،،چاند کے داغ کو چرخا کاتتی بڑھیا تصورکریں۔۔یقین جانیے آپ کو ایسا لگے گا جیسے آپ کا بچپن لوٹ آیا ہو۔۔۔

(بلاگرمناظرعلی مختلف اخبارات اورٹی وی چینلز کےنیوزروم سے وابستہ رہ چکےہیں،آج کل لاہور کےایک ٹی وی چینل پرکام کررہے ہیں۔عوامی مسائل اجاگرکرنےکےلیےمختلف ویب سائٹس پربلاگ لکھتے ہیں۔ان سےفیس بک آئی ڈی munazer.ali پر رابطہ کیا جاسکتا ہے)