Tag اسلام آباد

اسلام آباد (میڈیا 92 نیوز آن لائن ) پاکستان کی تاریخ میں سب سے سستا دورہ امریکا عمران خان کا ہو گا جبکہ وزیر اعظم نے اشیائے خوردونوش کی قیمتوں میں اضافہ پر تشویش کا اظہار کیا۔

وفاقی وزیر شفقت محمود نے کابینہ اجلاس کے بعد پریس کانفرنس کرتے ہوئے کہا کہ ملک بھر میں اشیائے خوردونوش کی قیمتوں میں اضافہ پر وزیر اعظم نے تشویش کا اظہار کیا ہے اور مشیر خزانہ کو اس حوالے سے ہدایات جاری کر دی گئی ہیں۔

وزیر اعظم کے غیر ملک دورے سے متعلق تفصیلات بتاتے ہوئے انہوں نے کہا کہ وزیر اعظم عمران خان امریکی صدر ڈونلڈ ٹرمپ کی دعوت پر امریکہ جا رہے ہیں اور وزیر اعظم کے ہمراہ صرف سیکیورٹی افسران اور وزیر خارجہ جائیں گے۔ عمران خان پاکستانی سفیر کے گھر قیام کریں گے جبکہ ساتھ جانے والے افراد تھری اسٹار کے ہوٹل میں رہائش رکھیں گے۔

انہوں نے کہا کہ پاکستان کی تاریخ میں اتنا سستا دورہ کسی نے نہیں کیا ہوگا جتنا سستا دورہ عمران خان کا ہو گا۔

وفاقی وزیر نے کہا کہ کابینہ نے قطری شہریوں کو ویزہ آن آرائیول کی سہولت دینے کا فیصلہ کیا ہے جبکہ لوک ورثہ کو وزارت اطلاعات سے ہٹا کر نیشنل ہیریٹیج ڈویژن کے حوالے کرنے کا فیصلہ کیا گیا ہے اور رپورٹ پر عملدر آمد کے لیے کمیٹی بھی تشکیل دے دی ہے۔

انہوں نے کہا کہ اجلاس کے دوران وزیر اعظم ہاؤس میں یونیورسٹی بنانے سے متعلق امور زیر غور رہا، کابینہ نے پورٹ قاسم اتھارٹی کے نئے چیئرمین تعینات کرنے کی منظوری دی اور گندم کے ذخائر پر اطمینان کا اظہار کیا گیا۔ وزیر اعظم نے آٹے کی قیمت میں مزید اضافہ نہ کرنے کی ہدایت کی ہے۔

شفقت محمود نے کہا کہ مریم نواز نے جج پر سنگین الزامات لگائے ہیں جو عدلیہ پر حملہ ہے اور اب بار ثبوت پیش کرنا مسلم لیگ نون کا کام ہے۔ ویڈیو کی تصدیق کے لیے فارنزک بھی ان کو خود ہی کرانا چاہیے تاہم کابینہ میں اس پر کوئی بات نہیں ہوئی۔

وفاقی وزیر نے کہا کہ سابق صدر آصف علی زرداری نے اپنے دور حکومت میں 134 غیر ملکی دورے کیے جس میں وہ مجموعی طور پر 257 دن ملک سے باہر رہے اور ان کے ہمراہ 3 ہزار کے قریب لوگ باہر گئے۔ آصف زرداری کے غیر ملکی دوروں پر ایک ارب 42 کروڑ روپے خرچ ہوئے۔

انہوں نے کہا کہ آصف زرداری نے 17 دورے لندن کے کیے جس پر 32 کروڑ روپے خرچ ہوئے اور 51 دفعہ دبئی گئے جس پر 10 کروڑ روپے کے اخراجات ہوئے۔ سابق صدر کے 48 غیر ملکی دورے ذاتی نوعیت کے تھے۔

نواز شریف کے غیر ملکی دوروں کی تفصیلات بتاتے ہوئے شفقت محمود نے کہا کہ نواز شریف نے اپنی 4 سالہ وزارت اعظمیٰ کے دوران غیر ملکی دوروں پر ایک ارب 84 کروڑ روپے خرچ کیے۔ انہوں نے لندن کے 24 دوروں کے دوران 22 کروڑ 49 لاکھ روپے خرچ کیے جبکہ انہوں نے سعودی عرب کے 12 سے زائد دورے کیے۔

انہوں نے کہا کہ نواز شریف کے غیر ملکی دوروں کے دوران قومی ائر لائن کو بھی 30 سے 40 کروڑ روپے کا نقصان ہوا۔

شفقت محمود نے مزید کہا کہ گزشتہ دور حکومت میں وزرا دوسری جگہوں پر بھی نوکریاں کرتے نظر آئے، مسلم لیگ نون کے رہنما خواجہ آصف وزیر ہونے کے باوجود اقامہ کے ذریعہ ایک کمپنی کو ایڈوائز کرتے رہے جہاں سے انہیں 15 سے 20 لاکھ روپے کی تنخواہ بھی ملتی تھی۔ بہر حال اب اس معاملے کو ایف آئی اے کے حوالے کر دیا گیا ہے۔

انہوں نے کہا کہ پروڈکشن آرڈر کے دوران میڈیا کو انٹرویو دینے کے حوالے سے پیمرا سے پوچھا جائے گا کہ کیا قوانین میں انٹرویو کی اجازت ہے ؟

اسلام آباد (مانٹرنگ ڈیسک ) مشیر تجارت رزاق داؤد نے کہا ہے کہ رواں سال برآمدات گزشتہ سال جتنی ہی رہی ہیں تاہم درآمدات میں چھ ارب ڈالر کمی آئی ہے۔

پریس کانفرنس کرتے ہوئے انہوں نے بتایا کہ گزشتہ سال 23 ارب ڈالر کی برآمدات رہی تھیں جب اس سال حکومت نے 24 ارب ڈالر کا ہدف مقرر کیا تھا۔

ان کا کہنا تھا کہ گارمنٹس کی برآمدات میں 33 فیصد، باسمتی چاول میں 20 فیصد، ادویات سازی میں 26 فیصد اضافہ ہوا تاہم بین الاقوامی مارکیٹ میں کم قیمت ہونے کے باعث برآمدات کا حجم نہ بڑھ سکا۔

مشیر تجارت کا کہنا تھا کہ ہمارا تجارتی خسارہ 5.9 ارب ڈالر رہا ہے جبکہ پاکستان آہستہ آہستہ عالمی مارکیٹ میں جگہ بنا رہا ہے۔

انہوں نے کہا کہ گیس کی قیمتوں میں اضافے کے باعث فرٹیلائزر صنعت کی جانب سے کہا گیا کہ قیمتوں میں اضافہ کیا جائے۔

ان کا کہنا تھا کہ وزارت صنعت و پیداوار اور اسٹیک ہولڈرز کی مشاورت کی بعد کھاد کی قیمتوں میں اضافہ ہو گا تاہم حکومت چاہتی ہے کہ قیمتیں نہ بڑھیں اور کسان پر کم سے کم بوجھ ڈالا جائے۔

انہوں نے بتایا کہ فرٹیلائزر صنعت کی جانب سے ایک کھاد کی بوری پر 200 روپے بڑھانے کی تجویز دی گئی ہے جبکہ وزارت کی جانب سے 100 روپے فی کھاد بیگ میں اضافے کی تجویز دی ہے۔

ان کا کہنا تھا کہ عالمی مالیاتی فنڈ (آئی ایم ایف) کے ساتھ گیس کی مد میں حاصل ہونے والا ریونیو طے ہے۔

رزاق داؤد نے بتایا کہ لاہور میں ایک بڑی فیکٹری لگ رہی ہے جبکہ فیصل آباد میں بھی چینی سرمایہ کار آئے ہیں۔

انہوں نے بتایا کہ پاکستان سے کچھ مال قطر جانا شروع ہو چکا یے جبکہ ایران نے بھی پانچ لاکھ ٹن چاول طلب کیے ہیں۔

مشیر تجارت کا کہنا تھا کہ وہ بجٹ کے بعد پہلی بار وزیر اعظم کے ساتھ کراچی جائینگے جہاں تاجروں سے ملاقات ہوگی۔

ان کا کہنا تھا کہ اس بجٹ میں ہم ٹیکس سے متعلق لوگوں کا ذہن تبدیل کر رہے ہے ہیں، ہم صحیح سمت میں جارہے ہیں،کچھ مشکل وقت ہے۔

اسلام آباد (میڈیا 92 نیوز آن لائن ) پاکستان پیپلزپارٹی کے چیئرمین بلاول بھٹوزرداری نے کہاہے کہ قائمہ اسمبلیوں کے بلائے گئے اجلاس منسوخ کرنا پارلیمنٹ پر حملہ ہے۔ پارلیمان کے اندر سے پارلیمان پر حملہ ہوا ہے۔

اسلام آباد میں پریس کانفرنس کرتے ہوئے بلاول بھٹو نے کہا کہ اسپیکر صاحب کے دفتر سے ایک نوٹفکیشن نکلا جس میں کہا گیاکہ قائمہ کمیٹیوں کے بلائے گئے اجلاس منسوخ کیے جاتے ہیں۔

انہوں نے کہا کہ قائمہ کمیٹیاں کام نہیں کریں گی تو پارلیمنٹ ادھوری ہے۔ کفایت شعاری کے نام پر اجلاس منسوخ کردیے گئے ہیں اور اسپیکر اور ڈپٹی اسپکر بیرون ملک ہیں اوردونوں سرکاری خرچے پرکرکٹ کھیل رہے ہیں۔ حکومت کو سمجھنا چاہیے کہ پارلیمان چلانا کرکٹ کا میچ نہیں ہے۔

چیئرمین پاکستان پیپلز پارٹی جو قائمہ کمیٹی برائے انسانی حقوق کے چیئرمین بھی ہیں نے کہا کہ آج قائمہ کمیٹی میں 5 بلز پر بحث کرنا تھی۔ رولز کے مطابق اسپیکر کو یہ اختیار حاصل نہیں ہے۔

بلاول بھٹو نے کہا کہ اسپیکر کوفوری طور پر یہ فیصلہ واپس لینا چاہیے ،بصورت دیگر ہم پارلیمان کے خلاف ہونے والے کسی بھی اقدام کے خلاف لڑیں گے۔

انہوں نے کہا کہ پارلیمان کسی بھی جمہوریت کے لیے اہم ترین ادارہ ہے ،یہاں جمہور کے مسائل ڈسکس ہوتے ہیں۔ لوگ اپنے معاملات کے لیے اس فورم کو استعمال کرکے ایک دوسرے کی بات سنتے اور سناتے ہیں۔

بلاول بھٹو نے کہا کہ اگر آپ جمہوری راستے بند کرینگے تو اسکے سنگین نتائج برآمد ہونگے۔ انہوں نے کہا کہ گزشتہ روز تین ٹی وی چینلز کی نشریات بند کردی گئیں۔ یہ کسی بھی طور پر قابل قبول نہیں۔ یہ آزادی اظہار پر حملہ ہے ، آزادیٔ صحافت پر حملہ ہے کسی بھی طور پر یہ قابل قبول نہیں ہے۔

بلاول بھٹو نے کہا کہ آج صحافی نہ اخبارات میں اپنی بات کرسکتے ہیں اور نہ ہی سوشل میڈیا کے ذریعے اپنا موقف دے سکتے ہیں۔ ٹوئٹر اکاؤنٹ بند کرائے جارہے ہیں۔سنسرشپ سے مسائل حل نہیں ہونگے بلکہ مزید بڑھیں گے۔

چیئرمین پاکستان پیپلزپارٹی نے کہا کہ دنیا کو اس کا جواب کون دیگا کہ اس ملک میں احسان اللہ احسان کا انٹرویو چل سکتاہے، کلبھوشن یادیو کا انٹرویو چل سکتاہے مگر قبائلی جوانوں اور سابق صدر کے انٹرویوز انکے موقف نہیں چل سکتے۔

انہوں نے کہا کہ چیئرمین سینیٹ خود سے استعفی دے دیں تو انکے لیے بہتر ہوگا۔ انہوں نےایک سوال کے جواب میں کہا کہ جب ہم صادق سنجرانی کو لائے تھے تو حکومت کسی اور کے پاس تھی اور اپوزیشن میں کوئی اور تھا۔ اب صورتحال مختلف ہے۔

بلاول بھٹو نے کہا کہ وہ ذاتی طور پر صادق سنجرانی کی عزت کرتے ہیں اس لیے وہ چاہتے ہیں کہ وہ خود استعفی دے دیں اگر وہ نہیں ہونگے تو انتخابات میں جانا پڑیگا۔

چیئرمین پیپلزپارٹی نے کہا کہ پاکستان پیپلزپارٹی نے ہمیشہ جمہوری جدوجہد کی ہے۔ جب سے یہ دھاندلی زدہ حکومت بنی ہے ہماری کوشش رہی ہے کہ ہم نے جمہوری نظام کا تحفظ کرنا ہے۔ اسی لئے جب انتخابات کے بعد اپوزیشن پارٹیوں نے پارلیمان میں جانے سے انکار کیا تو پاکستان پیپلزپارٹی سب کو پارلیمان میں لیکر گئی ۔

انہوں نے کہا کہ اب جب اس نظام پر پارلیمان کے اندر اور باہر سے حملے ہورہے ہیں تو اب بھی ہم جمہوری جدوجہد میں مصروف عمل ہیں۔

بلاول بھٹو نے کہا کہ حکومت کی طرف سے عوام دشمن بجٹ پیش کیے جانے کے بعد میں نے خود 5جلسے کیے ہیں ،عوام رابطہ مہم اس لیے شروع کی ہے کہ عوام کو بتایا جائے کہ جمہوریت کے نام پر حکومت انکے حقوق کیسے غصب کررہی ہے۔

انہوں نے ایک سوال کے جواب میں کہا کہ اپوزیشن جماعتیں جب کسی معاملے پر اکٹھے مل کر بیٹھتی ہیں تو آپس میں صلاح مشورے کرتی ہیں اور اپنی اپنی آراء بھی دیتی ہیں۔ ظاہر ہے وہ آراء مختلف ہوسکتی ہیں ، رائے کا مختلف ہونا اپوزیشن میں اختلاف نہیں ہوتا۔

ایک سوال کے جواب میں چیئرمین پیپلزپارٹی نے کہا کہ وہ پی ٹی آئی کے ساتھ کسی قسم کا اتحاد نہیں کرینگے سینیٹ چیئرمین کے انتخاب کے سلسلے میں کیونکہ پی ٹی آئی جمہوریت اور پارلیمان کو چلانا ہی نہیں چاہتی ۔

بلاول بھٹو نے ایک سوال کے جواب میں کہا کہ وہ نہیں سمجھتے کہ مریم نواز نے عدلیہ کے خلاف پریس کانفرنس کی ۔ انہوں نے ایک جج کے حوالے سے وڈیو دکھائی ہم سمجھتے ہیں کہ اس معاملے کی تحقیقات ہونی چاہیئں ۔

چیئر مین پیپلزپارٹی نے کہا کہ عدلیہ کو بھٹو شہید کا کیس بھی ری وزٹ کرنا چاہیئے ۔ اگر عدلیہ نے ایسا کردیا تو اس کی ساکھ بہتر ہوگی۔

انہوں نے کہا کہ وہ خود بھی سپریم کورٹ میں گئے کہ انہیں بھی شہید بھٹو کے قتل کیس میں فریق بنائیں ۔ انہوں نے کہا کہ یہ ہمارا پرانا مطالبہ ہے اور یہ مطالبہ وہ آج بھی دہراتے ہیں۔

بلاول بھٹو نے کہا کہ پاکستان پیپلزپارٹی سمجھتی ہے کہ عدلیہ دباؤکے معاملات کو دیکھے اگر کوئی سیاسی جماعت سمجھتی ہے کہ اسکے ساتھ زیادتی ہوئی ہے تو عدلیہ کو اسکے کنسرن مد نظر رکھنے چاہئیں۔

اسلام آباد (میڈیا 92 نیوز آن لائن ) معاون خصوصی اطلاعات فردوس عاشق اعوان کا کہنا ہے کہ رانا ثنا اللہ آسان پیسہ کمانے کے چکر میں گرفتار اور بدنام ہوئے اور ان کے اسکواڈ کی گاڑیاں ہیروئن باہر بھیجنے کے لیے استعمال ہورہی تھیں۔

وفاقی کابینہ کے اجلاس کے بعد پریس کانفرنس کرتے ہوئے معاون خصوصی برائے اطلاعات فردوس عاشق اعوان کا کہنا تھا کہ کل ایک نامور شخصیت نے ایک کارنامہ سر انجام دیا جس سے تمام ارکان پارلیمنٹ کے سرشرم سے جھک گئے، قوم سوچ بھی نہیں سکتی تھی کہ وہ جنہیں رہبر مانتی تھی وہ اتنے بڑے رہزن ہیں، ارکان پارلیمنٹ رول ماڈل ہیں، ان کے پاس غلطی کی کوئی گنجائش نہیں، اگر ہم رہزن بن کر لوٹنا شروع کردیں گے تو معاشی بحران جنم لیتے رہیں گے۔

فردوس عاشق اعوان کا کہنا تھا کہ اپوزیشن نے سیاسی رہنما کی گرفتاری کو حکومت کی انتقامی کارروائی قرار دیا جب کہ رانا ثنا اللہ کو پولیس نے نہیں اے این ایف نے گرفتار کیا، اے این ایف ایک آزاد اور خود مختار ادارہ ہے جس کا مقصد ملک کو منشیات سے پاک کرنا ہے، اے این ایف کے اہلکاروں نے جب گاڑی روکی تو بریف کیس کے اندر ہیروئن برآمد ہوئی، دوسری گاڑی نے رانا ثناء اللہ کو فرار کروانے کی کوشش کی لیکن وہ گرفتار ہوگئے۔

معاون خصوصی نے کہا کہ رانا ثنا اللہ کی ایک طویل داستان ہے، ان کی گرفتاری کو سیاسی انتقامی کارروائی کہنے والے وہ داستاں ضرور پڑھیں، اسکواڈ کی گاڑیاں وائٹ پاؤڈر باہر بھیجنے کے لیے استعمال ہورہی تھیں اور رانا ثنا اللہ مونچھوں کو تاؤ دے کر دامن جھاڑ کر نکل جاتے تھے، بدقسمتی سے رانا ثناء اللہ آسان پیسہ کمانے کے چکر میں گرفتار اور بدنام ہوئے، ہمیں تکلیف ہے کہ ایک ایم این اے پر ہیروئن اسمگلنگ کا داغ لگ گیا ہے، اگر رانا ثناء اللہ بے گناہ ہیں تو عدالت میں جاکر اپنی بے گناہی ثابت کریں۔

فردوس عاشق اعوان کا کہنا تھا کہ مجرموں کے ساتھ کسی قسم کی مفاہمت نہیں ہوسکتی، مجرموں کی کوشش ہے کہ کسی طرح ان کو این آر او حاصل ہوجائے، بدقسمتی سے جو منی لانڈرنگ اور منشیات فروشی میں ملوث ہیں وہ جیلوں میں اے کلاس لے کر پروڈکشن آرڈر لے لیتے ہیں، جو بجٹ میں پارلیمنٹ آنے کے لیے پروڈکشن آرڈر جاری کروا کے لائے تھے وہ پارلیمنٹ کی راہداریوں میں نظر آئے۔

رہنما پی ٹی آئی نے کہا کہ اب وزیراعظم نے پروڈکشن آرڈر کے حوالے سے ترجیحات طے کرنے اور اس قانون کو صوبائی حکومتوں سے مل کر تبدیل کرنے کی ہدایت کردی ہے، وزیراعظم نے اسمگلنگ اور منی لانڈرنگ کو ختم کرنے کی ہدایت کی ہے، ڈالرکی منی لانڈرنگ کوروکنے کے لیے ایک اعلیٰ سطح کی کمیٹی بنانے کا فیصلہ کیا ہے، کمیٹی اسمگلنگ اور منی لانڈرنگ روکنے سے متعلق رپورٹ پیش کرے گی۔
معاون خصوصی نے بتایا کہ حج پالیسی 2019ء عوام کے مفاد میں بنائی گئی ہے جس میں حاجیوں کی سہولت کے لیے ہر ممکن اقدام کیا گیا ہے، کابینہ نے حج کے اضافی کوٹا کو سرکاری حج اسکیم کے تحت بروئے کار لانے کا فیصلہ کیا ہے، اس حج کو اسکینڈل فری حج بنایا جائے گا۔ پہلی حج پرواز جمعہ کے روز روانہ ہوگی اور وزیر اعظم عمران خان پہلی حج فلائٹ کے حاجیوں کو خود الوداع کہیں گے جب کہ پرواز کے تمام مسافروں کے لیے امیگریشن کا عمل اسلام آباد میں ہی ہوگا۔

فردوس عاشق اعوان نے بتایا کہ کابینہ نے 40 ہزارمالیت کے پرائز بانڈ ختم کرنے کی منظوری دی ہے، اب بانڈ کا پیسہ کیش ہوکر اکاؤنٹ میں جائے گا، بانڈ کیش کرانے کے طریقہ کار میں تبدیلی لائی جارہی ہے اور کیش کروانے کے لیے مناسب وقت دیا جائے گا، ماضی میں کچھ ایسے سیاستدان تھے جن پر پرائز بانڈ عاشق تھے اور پرائز بانڈ بھی انہی سے نکلتے تھے لیکن اب بانڈ سے جن لوگوں کا عشق تھا وہ اب دم توڑ جائے گا۔

معاون خصوصی کا کہنا تھا کہ وہ اسٹیل مل جو سفید ہاتھی تھا وزیراعظم نے فیصلہ کیا ہے کہ اس کی نجکاری نہیں کی جائےگی، اسٹیل ملز حکومت کی ملکیت ہی رہے گی اور اسے پبلک پرائیویٹ پارٹنر شپ سے چلایا جائےگا، سرمایہ کاری کے لیے اوورسیز پاکستانیوں کو پارٹنرشپ میں لایا جائے گا۔

کیسا دل کا مریض ہے جو سری پائے اور مرغن کھانے کھاتا ہے

فردوس عاشق اعوان نے نواز شریف کو مرغن غذائیں چھوڑ کر پرہیزی کھانے کا مشورہ دیتے ہوئے کہا کہ وہ کون سا دل کا مریض ہے جو سری پائے اور مرغن کھانے کھاتا ہے؟ سابق وزیراعظم کی دل کی دھڑکن چیک کرنے کے لیے 21 بندے ہوتے ہیں، 21 ڈاکٹرز کی ٹیم نواز شریف کو دیکھتی ہے، یہاں ایک بیمار ہے اور اس کے لیے سو انار ہیں، نوازشریف دل چھوٹا نہیں بڑا کریں۔

اسلام آباد (میڈیا 92 نیوز آن لائن ) چیئرمین فیڈرل بورڈ آف ریوینیو (ایف بی آر) شبر زیدی نے کہا ہے کہ اثاثہ جات اسکیم میں اب تک 95000 افراد نے خود کو رجسٹر کرایا ہے۔

ایک خبر رساں ایجنسی سے بات کرتے ہوئے انہوں نے کہا کہ معمولی سے ٹیکس کے عوض اپنے اثاثوں کو قانونی بنانے کا یہ بہت اچھا موقع ہے، ملکی تعمیر و ترقی میں اپنا حصہ ڈالنے کے لیے ٹیکس گوشوارے جمع کرانا ہر شخص کی ذمہ داری ہے۔

انہوں نے اس امید کا اظہار کیا کہ اثاثے ڈیکلیئر کرنے کی اسکیم کامیاب ہو گی تاہم چیئرمین ریوینیو بورڈ نے یہ بات واضح کی کہ اس میں مزید توسیع نہیں کی جائے گی۔

شبر زیدی نے کہا کہ اس اسکیم کا مقصد محصولات میں اضافہ نہیں بلکہ زیادہ سے زیادہ لوگوں کو ٹیکس نیٹ میں لا کرمعیشت کو دستاویزی شکل دینا ہے۔

انہوں نے کہا کہ ایف بی آر نے پہلے ہی لوگوں کی جائیداد اور اثاثہ جات کی تفصیلات حاصل کر لی ہیں اور انہیں ویب سائیٹ پر ڈال دیا ہے۔

ایف بی آر میں اصلاحات کے حوالے سے ایک سوال پر انہوں نے کہا کہ ٹیکس بیس کو بڑھانے کے لیے ہم اس ادارے کے پورے ڈھانچے میں تبدیلی لا رہے ہیں۔

چیئرمین ایف بی آر کا کہنا تھا کہ اب کسی بھی شخص کے لیے ٹیکس کے نظام سے باہر رہنا انتہائی مشکل ہو گا کیونکہ حکومت نے مختلف اقدامات کے ذریعے ٹیکس ادا نہ کرنے کا تصور ختم کر دیا ہے۔

اسلام آباد (میڈیا 92 نیوز آن لائن ) قومی احتساب بیورو (نیب) نے سابق صدر آصف علی زرداری کو پارک لین کیس میں بھی گرفتار کر لیا۔

نیب ذرائع کے مطابق پہلے سے زیر حراست سابق صدر آصف علی زرداری کو نیب راولپنڈی کے افسران نے وارنٹ گرفتاری حوالے کیا۔

آصف زرداری پر پارک لین کمپنی اور اس کے ذریعے اسلام آباد میں 2 ہزار 460 کنال اراضی خریدنے کا الزام ہے جب کہ اس کیس میں بلاول بھٹو زردای بھی ملزم ہیں۔

نیب ذرائع کے مطابق اسلام آباد میں خریدی گئی تقریباً ڈھائی ہزار کنال زمین کی اصل مالیت دو ارب روپے ہے لیکن اسے صرف 62 کروڑ روپے میں خریدا گیا۔

یاد رہے کہ سابق صدر آصف علی زرداری جعلی اکاؤنٹس کیس میں پہلے ہی گرفتار ہیں اور ان سے تفتیش کی جارہی ہے۔

نیب ذرائع کا کہنا ہے کہ آصف زرداری پارک لین اسٹیٹس پرائیویٹ لمیٹڈ کمپنی کے مالک اور شیئر ہولڈر ہیں، اُن پر دیگر ملزمان کی مدد سے پارک لین کی ڈمی فرنٹ کمپنی ‘پیراتھنن پرائیویٹ لمیٹڈ’ بنانے کا الزام ہے۔

نیب حکام کے مطابق پیراتھنن پرائیوٹ لمیٹڈ کی مدد سے 2009 میں بینکوں سے ڈیڑھ ارب روپے کا فائدہ حاصل کیا گیا اور یہ اضافی رقوم اپنی کمپنی میں بدنیتی پر مبنی ایک جوائنٹ وینچر معاہدے کے ذریعے منتقل کی گئیں۔

نیب حکام کا مزید کہنا ہے کہ آصف زرداری پر پارک لین کمپنی کے اکاؤنٹ استعمال کرنے اور ان میں فراڈ سے لیےگئے قرضوں کی رقوم کے لین دین کا الزام ہے۔

26 جون کو آصف زرداری نے احتساب عدالت میں ضمانت کی درخواست جمع کرائی لیکن بعدازاں انہوں نے ضمانت کی درخواست واپس لے لی تھی، انہیں شبہ تھا کہ انہیں ایک اور کیس میں گرفتار کرلیا جائے گا۔

اسلام آباد (میڈیا 92 نیوز آن لائن ) وزیراعظم پاکستان عمران خان نے دنیا بھر سمیت بھارت کی جیلوں میں قید پاکستانیوں کو بھی رہا کرانے کا فیصلہ کیا ہے۔

ذرائع نے خبر دی ہے کہ اس حوالے سے یکم جولائی کو وزارت خارجہ حکام کی اسلام آباد میں ایک میٹنگ رکھی گئی ہے جس میں پاکستان اور بھارت کے درمیان قیدیوں کے تبادلے پر گفتگو و شنید ہوگی۔

وزارت خارجہ نے جیلوں میں اسیر بھارتی قیدیوں کی تفصیلات چاروں صوبوں سے طلب کی ہیں۔ چاروں آئی جیز جیل خانہ جات کے علاوہ چیف سیکرٹری گلگت بلتستان اور آزاد کشمیر کو بھی وزارت خارجہ نے مراسلہ بھجوا کر تفصیلات منگوائی ہیں۔

ذرائع نے بتایا ہے کہ وزیراعظم بھارتی جیلوں میں قید تمام پاکستانیوں کو وطن واپس لانا چاہتے ہیں اور اس کے بدلے ہمسایہ ملک کے قیدی رہا کیے جائیں گے۔

خیال رہے کہ گزشتہ روز ہی وزیراعظم نے اعلان کیا تھا کہ دنیا بھر کی جیلوں قید پاکستانیوں کو رہائی دلا کر وطن واپس لایا جائے گا۔

جن ممالک کے ساتھ پاکستان کے اچھے سفارتی تعلقات ہیں ان سے قیدیوں کی بلامعاوضہ رہائی کی بات کی جائے اور جو خاندان جرمانے کی رقوم ادا نہیں کر سکتے ان کی مدد حکومت کرے گی۔

خیال رہے کہ اس سے قبل ملائیشیا میں قید 320 پاکستانیوں کو رہائی دلا کر وطن واپس لایا گیا ہے جب کہ متحدہ عرب امارات میں قید 572 قیدی بھی اپنے گھر پہنچ چکے ہیں۔

غریب عوام کیلئے دو وقت کی روٹی ناممکن بنا کر استعفے دیکر بھاگنے والوں کو شرم آنی چاہئے ،حکمران اپنی ذمہ داریوں سے جان چھڑا کر بھاگ رہے ہیں لیکن عوام انہیں بھاگنے نہیں دیگی، رہنماء مسلم لیگ (ن) کا بیان
اسلام آباد (ایمرا نیوز آن لائن)
قومی اسمبلی میں پاکستان مسلم لیگ (ن) کے چیف وہیپ مرتضیٰ جاوید عباسی نے کہا ہے کہ اسد عمر کے استعفیٰ سے یہ ثابت ہو چکا یہ نااہلوں کی حکومت ہے ،غریب عوام کیلئے دو وقت کی روٹی ناممکن بنا کر استعفے دیکر بھاگنے والوں کو شرم آنی چاہئے ،نا اہل حکومت اپنی ناکامی چھپانے کیلئے یہی ڈرامے پانچ سال کرتے رہے گی، حکمران اپنی ذمہ داریوں سے جان چھڑا کر بھاگ رہے ہیں لیکن عوام انہیں بھاگنے نہیں دے گی ۔

وزیر خزانہ اسد عمر کے استعفے پر قومی اسمبلی میں مسلم لیگ (ن) کے چیف وہیپ مرتضیٰ جاوید عباسی نے اپنے ردعمل میں کہا کہ اسد عمر کے استعفیٰ سے یہ ثابت ہو چکا ہے کہ یہ نااہلوں کی حکومت ہے ۔ انہوں نے کہا کہ غریب عوام کیلئے دو وقت کی روٹی ناممکن بنا کر استعفے دیکر بھاگنے والوںکو شرم آنی چاہئے۔ انہوں نے کہا کہ الیکشن سے پہلے قوم کو جھوٹے خواب دکھانے کا مقصد صرف پاکستان کا اقتدار حاصل کرنا تھا۔

انہوں نے کہا کہ ثابت ہو چکا کہ تحریک انصاف کے پاس کوئی ٹیم نہیں تھی ،ان کے پاس کوئی منصوبہ نہیں تھا۔ انہوں نے کہاکہ حکومت نے اپنی ناکامیوں کو چھپانے کیلئے وزیر خزانہ کی قربانی دی۔ انہوں نے کہا کہ نا اہل حکومت اپنی ناکامی چھپانے کے لئے یہی ڈرامے پانچ سال کرتے رہے گی، حکمران اپنی ذمہ داریوں سے جان چھڑا کر بھاگ رہے ہیں لیکن عوام انہیں بھاگنے نہیں دے گی ۔

انہوں نے کہاکہ نا اہل حکمرانوں سے معیشت کی تباہی کا پورا حساب لیا جائے گا، ان نا تجربہ کاروں نے پاکستان کی معیشت کا بیڑہ غرق کردیا ہے، ان کی ناتجربہ کاری کی وجہ سے پاکستان معاشی بحران کا شکار ہوگیا ہے۔ انہوں نے کہاکہ آج ملک میں مہنگائی کا جو طوفان ہے وہ ان حکمرانوں کی ناکام معاشی پالیسی کی وجہ سے ہے۔

اسلام آباد(مہڈیا92نیوزآن لائن)
رواں مالی سال 2018۔19ء4 میں جولائی تا مارچ کے دوران سوزوکی موٹر سائیکلوں کی پیداوار میں 9.02 فیصد جبکہ فروخت میں 11.90فیصد کا اضافہ ریکارڈ کیا گیا ہے۔پاکستان آ ٹو موٹیو مینو فیکچررز ایسو سی ایشن (پاما) کی رپورٹ کے مطابق گزشتہ مالی سال 2017۔18ء4 کے پہلے 9 ماہ کے دوران سوزوکی موٹر سائیکلوں کی پیداوار 16ہزار 480 یونٹس رہی جو رواں مالی سال 2018۔19ء4 کے اسی عرصہ کے دوران 17ہزار 968 یونٹس تک بڑھ گئی۔ اس طرح گزشتہ مالی سال 2017۔18ء4 میں جولائی تا مارچ کے مقابلہ میں رواں مالی سال 2018۔19ء4 کے اسی عرصہ کے دوران سوزوکی موٹر سائیکلوں کی پیداوار میں 14سو 88 یونٹس یعنی 9.02 فیصد کا اضافہ ریکارڈ کیا گیا ہے.

رپورٹ کے مطابق گزشتہ مالی سال 2017۔18ء4 کے پہلے 9 ماہ کے دوران سوزکی موٹر سائیکلوں کی فروخت 15ہزار 971 یونٹس رہی جو رواں مالی سال 2018۔19ء4 کے اسی عرصہ کے دوران 17ہزار 873 یونٹس تک بڑھ گئی۔ اس طرح گزشتہ مالی سال 2017۔18ء4 میں جولائی تا مارچ کے مقابلہ میں رواں مالی سال 2018۔19ء4 کے اسی عرصہ کے دوران سوزکی موٹر سائیکلوں کی فروخت میں 19سو 2یونٹس یعنی 11.90فیصد کا اضافہ ریکارڈ کیا گیا۔

عمران خان امن و امان کی صورت حال پر اعلی سطح اجلاس کی صدارت کریں گے ، ہزار گنجی واقعہ میں جاں بحق افراد کے لواحقین سے بھی ملاقاتیں کریں گے

اسلام آباد(ایمرا نیوزآن لائن)
وزیر اعظم عمران خان کل ( جمعرات کو ) کوئٹہ کا ایک روزہ دورہ کریں گے جہاں پر وہ ہزار گنجی واقعہ میں جاں بحق افراد کے لواحقین سے ملاقات و امن و امان سے متعلق اجلاس کی صدارت کریں گے ۔ تفصیلات کے مطابق وزیر اعظم عمران خان کل ( جمعرات کو ) کوئٹہ کا ایک روزہ دورہ کریں گے جہاں پر وہ ایک امن و امان سے متعلق اعلی سطح کا اجلاس کی صدارت کریں گے اور ہزار گنجی واقعہ میں جاں بحق افراد کے لواحقین سے بھی ملاقاتیں کریں گے ۔اس کے علاوہ عمران خان کوئٹہ میں پاکستان ہاؤسنگ سکیم کا بھی افتتاح کریں گے ۔