Tag ایمرانیوز

نئی دہلی(ویب ڈیسک) بھارتی اداکارہ، ماڈل اور ڈانسر نورا فتیحی کو 200 کروڑ کے فراڈ اور منی لانڈرنگ کیس میں طلب کیا گیا ہے۔
بھارتی میڈیا کے مطابق نورافتیحی کو قانون نافذ کرنے والے ادارے انفورسمنٹ ڈائریکٹوریٹ، جسے مختصراً ای ڈی کہا جاتا ہے، نے کیس میں سمن جاری کیا ہے۔
بھارتی نیوز ایجنسی اے این آئی کے مطابق نورا کو سمن جاری ہونے کے بعد ای ڈی آفس کے باہر دیکھا گیا۔ اے این آئی نے آج صبح ٹوئٹ کیا کہ اداکارہ نورا فتیحی سکیش چندراشیکھر فراڈ کیس کے سلسلے کی تحقیقات میں شامل ہونے کے لیے انفورسمنٹ ڈائریکٹوریٹ کے آفس پہنچیں۔
اس سے قبل اداکارہ جیکولین فرنینڈس نے بھی اگست میں اسی کیس کے سلسلے میں انفورسمنٹ ڈائریکٹوریٹ میں بطور گواہ اپنا بیان ریکارڈ کروایا تھا۔ ای ڈی 5 گھنٹوں تک اداکارہ سے پوچھ گچھ کرتی رہی۔
بھارتی میڈیا کے مطابق انفورسمنٹ ڈائریکٹوریٹ نے اداکارہ جیکولین فرنینڈس کو 15 اکتوبر کو دوبارہ پوچھ گچھ کے لیے ای ڈی آفس بلایا ہے۔
واضح رہے کہ 200 کروڑ کے فراڈ، بھتہ خوری اور منی لانڈرنگ کیس میں سکیش چندرا شیکھر نامزد ملزم ہیں۔ اداکارہ جیکولین فرنینڈس اس شخص کی قریبی دوست اور پارٹنر لینا پال کے ذریعے اس ریکٹ کا شکار ہوئیں۔
بھارتی میڈیا کے مطابق سکیش چندرا شیکھر جیل کے اندر سے بھتہ خوری کا ریکٹ چلا رہاتھا اور ایک تاجر سے 200 کروڑ روپے بھتہ لیا۔ انفورسمنٹ ڈائریکٹر نے اپنے بیان میں کہاتھا کہ چندرا شیکھر اس فراڈ کا ماسٹر مائنڈ ہے۔ وہ 17 سال کی عمر سے جرائم کی دنیا کا حصہ رہا ہے۔ اس کے خلاف پولیس اسٹیش میں کئی شکایات درج ہیں اور وہ جیل میں بند ہے۔

لاہور(ویب ڈیسک)سابق کپتان فضل محمود اور عبدالقادر کو پی سی بی کے ہال آف فیم میں شامل کرلیا گیا ہے۔پاکستان کرکٹ بورڈ کے بیان کے مطابق قومی کرکٹ ٹیم کے سابق کپتان فضل محمود اور عبدالقادر کو پی سی بی کے ہال آف فیم میں شامل کرلیا گیاہے۔ اس سے قبل حنیف محمد، عمران خان، جاوید میانداد، وسیم اکرم، وقار یونس اور ظہیر عباس پی سی بی کے ہال آف فیم میں شامل ہوچکے ہیں۔
دونوں کھلاڑیوں کو ووٹنگ کے ایک شفاف عمل کے تحت پی سی بی کے ہال آف فیم کا حصہ بنایا گیا ہے۔ اس عمل کے تحت پی سی بی کی کرکٹ کمیٹی نے چند نامور کھلاڑیوں کی فہرست تشکیل دی۔ اس فہرست میں انہیں شامل کیا گیا جنہیں انٹرنیشنل کرکٹ سے ریٹائرمنٹ لیے ہوئے کم از کم پانچ سال کا عرصہ گزر چکا ہو۔
اس حوالے سے 13 رکنی آزاد ووٹنگ پینل میں آئی سی سی ہال آف فیم کے تین ارکان، پاکستان کے چار سابق کپتانوں اور پرنٹ اور الیکٹرانک میڈیا سے تعلق رکھنے والے چھ صحافیوں نے ووٹ کا استعمال کیا۔ایک انٹرنل آڈیٹر نے اس عمل کی نگرانی کی۔

پی سی بی ہال آف فیم میں شامل 8 کھلاڑیوں (بشمول پاکستان سے تعلق رکھنے والے آئی سی سی کے 6 ہال آف فیمرز) کی باضابطہ شمولیت اس کرکٹ سیزن کے دوران کی جائے گی۔چیئرمین پی سی بی رمیزراجا نے کہا کہ ہم سب جانتے ہیں کہ فضل محمود اور عبدالقادر دو مختلف ادوار میں کرکٹ کے لیجنڈز رہے ہیں۔ ان دونوں کھلاڑیوں کو اپنے ساتھیوں اور مداحوں کی طرف سے پی سی بی ہال آف فیم میں شامل کرنا ان کی مقبولیت اور کھیل کے لیے خدمات کا اعتراف ہے۔ فضل محمود کی بہادری نے پاکستان کرکٹ کو ابتدائی ایام میں دنیا کے سامنے ایک قوت کے طور پر متعارف کرایا ۔ انہوں نے اپنے کھیل کے ذریعے نوجوانوں کو فاسٹ باؤلنگ کے لیے بھی متاثر کیا۔ جادوگر اسپنر عبدالقادر نے کلائی کے استعمال سے اسپن باؤلنگ کے ختم ہونے والے فن کو دوبارہ زندہ کیا۔

رمیز راجا نے کہا کہ فضل محمود اور عبدالقادر 2 شاندار کھلاڑی ہونے کے ساتھ ساتھ پاکستان اور عالمی کرکٹ کے شاندار سفیر بھی تھے۔

فضل محمود کا تعارف:

فضل محمود کو پاکستان کی کرکٹ کا سب سے پہلا سپر اسٹار مانا جاتا ہے ،وہ 18 فروری 1927 کو لاہور میں پیدا ہوئے اور انہوں نے 1952 سے 1962 تک 34 ٹیسٹ میں 139 وکٹیں حاصل کیں جن میں 13 مرتبہ ایک اننگز میں پانچ وکٹیں اور ایک میچ میں چار مرتبہ 10 یا اس سے زیادہ وکٹیں حاصل کرنا شامل تھا۔ تاہم ، ان کے فرسٹ کلاس کیریئر کا آغاز چھ سال قبل ہوا تھا جب انہوں نے رانجی ٹرافی میں شمالی ہندوستان کی نمائندگی کی تھی۔ انہوں نے 112 میچوں میں 466 وکٹیں حاصل کیں۔

1952 میں بھارت میں پاکستان کی پہلی ٹیسٹ سیریز میں ، فضل محمود نے 20 وکٹیں حاصل کیں ، جس میں لکھنؤ ٹیسٹ میں 12 وکٹیں کرنا بھی شامل تھا ۔ پاکستان نےیہ ٹیسٹ ایک اننگز اور 43 رنز سے جیتا تھا۔ سیزن 55-1954 میں فضل محمود نے چار ٹیسٹ میچز میں 15 وکٹیں حاصل کیں ، جبکہ سیزن 61-1960 میں انہوں نے پانچ ٹیسٹ میچز میں نو وکٹیں حاصل کیں۔

فضل محمود 1955 میں ، ویزڈن کے پانچ کرکٹرز آف دی ایئر میں شامل ہونے والے پہلے پاکستانی کرکٹر تھے، ایک سال بعد ان کی پرفارمنس نے پاکستان کو انگلینڈ کے خلاف اپنی پہلی سیریز ڈرا کرنے میں مدد کی۔انہوں نے چار ٹیسٹ میچز پر مشتمل سیریز میں 20 وکٹیں حاصل کیں ۔

فضل محمود نے سیزن 58-1957 میں دورہ کیریبین میں 20 وکٹیں حاصل کیں۔ انہیں 1958 میں صدر پاکستا ن نے پرائیڈ آف پرفارمنس ایوارڈ دیا گیا۔ 2012 میں ، انہیں پاکستان کرکٹ کے لیے ان کی خدمات کے اعتراف میں ہلال امتیاز-دوسرا اعلیٰ ترین سول ایوارڈسے نوازا گیا۔

عبدالقادر کا تعارف:

عبد القادر نے کُل 236 وکٹیں حاصل کیں (15 مرتبہ ایک اننگز میں پانچ وکٹیں اور پانچ مرتبہ ایک میچ میں 10 وکٹیں) اور 1029 رنز بنائے ۔ وہ ایک روزہ کرکٹ میں انتہائی کارآمد ثابت ہو تے تھے ۔ 132 وکٹیں حاصل کر کے ۔ انہوں نے 1984 سے 1993 تک 104 ون ڈے میں 641 رنز بنائے۔ 1975 سے 1995 تک 209 فرسٹ کلاس میچز میں انہوں نے 960 وکٹیں حاصل کیں اور 3،740 رنز بنائے ، جس میں دو سنچریاں بھی شامل ہیں۔

15 ستمبر 1955 کو لاہور میں پیدا ہونے والے عبدالقادر نے 1977 میں انگلینڈ کے خلاف ٹیسٹ کیریئر کا آغاز کیا اور حیدرآباد میں صرف اپنے دوسرے میچ میں چھ وکٹیں حاصل کیں ۔ انہیں کچھ ہی عرصےبعد اپنی نوعیت کی “سب سے قابل ذکر دریافت” قرار دیا۔ انہوں نے لاہور میں کھیلے گئے ایک میچ میں نے 56 رنز کے عوض 9 وکٹیں حاصل کیں ۔

عبدالقادر کے یادگار باؤلنگ سپلیز میں سے ایک فیصل آباد ٹیسٹ1986 میں مضبوط ویسٹ انڈیز کے خلاف شامل تھا۔ انہوں نے اس میچ میں ویو رچرڈز کی ٹیم کو 53 رنز پر آؤٹ کرکے پاکستان کو 186 رنز سے فتح دلا دی ۔

عبدالقادر 1983 اور 1987 کے ورلڈ کپ میں بھی نمایاں رہے ، انہوں نے نو میچوں میں 24 وکٹیں حاصل کیں ، جن میں سری لنکا کے خلاف ہیڈنگلے میں 44 رنز دے کر پانچ وکٹیں حاصل کرنا بھی شامل تھا۔
د
1988 میں عبدالقادر کو پرائیڈ آف پرفارمنس ایوارڈ ملا جبکہ 2020 میں انہیں ستارہ امتیاز سے نوازا گیا ، جو پاکستان کا تیسرا اعلیٰ ترین سول ایوارڈ ہے ۔

لندن (ویب ڈیسک) عمران خان کی سابق اہلیہ جمائما نے شوہر سے علیحدگی اور پاکستان چھوڑنے سے متعلق کہا ہے کہ میرے خلاف سیاسی بنیادوں پر کیسز بنائے جارہے تھے جنہیں عمران خان کو نشانہ بنانے کے لیے استعمال کیا جارہا تھا۔
برطانوی ویب سائٹ ایوننگ اسٹینڈرڈ کو انٹرویو دیتے ہوئے جمائما نے کہا ہے کہ پاکستان اس لیے چھوڑا کہ میں نے خود سے کافی بڑی عمر کے شخص سے شادی کی تھی جو سیاسی طور پر طاقت ور تھا، مجھ پر سیاسی بنیادوں پر کیسز بنائے جارہے تھے اور انہیں عمران خان کو نشانہ بنانے کے لیے استعمال کیا جارہا تھا۔
جمائما ںے عنقریب آنے والے اپنے ایک شو کے بارے میں کہا کہ انہیں مونیکا لیونسکی اور اپنی کہانی میں بہت مماثلت لگتی ہے۔ واضح رہے کہ اس شو میں جمائما نے مونیکا لیونسکی کا انٹرویو کیا جس میں سابق امریکی صدر بل کلنٹن اور مونیکا لیونسکی کے تعلق سے پیدا شدہ سیاسی بحران پر بات کی گئی۔
جمائما نے ارینج میرج کے بیان پر بات کرتے ہوئے کہا کہ جب پاکستان گئی تو ارینج میرج کے بارے میں میرے خیالات منفی تھی تاہم دس سال بعد جب واپس لوٹی تو ارینج میرج کے کچھ فوائد نظر آرہے تھے، جب میں پاکستان میں تھی تو ارینج میرج بھی کرواتی تھی حتی کہ عمران خان کے بہت سے دوستوں کے بچوں کی شادیاں بھی کرائیں۔

جنیوا(ویب ڈیسک) یونیسیف کے ڈپٹی ایگزیکیٹو ڈائریکٹر عمر عبدی نے کہا ہے کہ طالبان بہت جلد ملک بھر میں چھٹی جماعت سے میٹرک تک لڑکیوں کی تعلیم کے لیے اسکول کھولنے کا اعلان کردیں گے۔
عالمی خبر رساں ادارے کے مطابق اقوام متحدہ کے ادارے برائے امدادِ اطفال ’’یونیسیف‘‘ کے ڈپٹی ایگزیکیٹو ڈائریکٹر عمر عبدی نے گزشتہ ہفتے افغانستان کا دورہ کیا اور جنگ کے زخم خوردہ ملک کے بچوں کی صحت، تعلیم، خوراک اور مستقبل کے حوالے سے طالبان حکومت کے نمائندوں سے گفتگو کی۔
اقوام متحدہ کے مرکزی دفتر میں میڈیا سے بات چیت میں عمر عبدی نے بتایا کہ طالبان حکومت بچیوں کے ماڈل سیکنڈری اسکول کے قیام پر کام کر رہی ہے اور ایک سے دو ماہ کے اندر ان اسکولوں کو کھولنے کا اعلان کردے گی۔
یونیسیف کے ڈپٹی ایگزیکیٹو ڈائریکٹر نے صحافیوں کو بتایا کہ اس وقت ملک بھر میں بچیوں کے پرائمری اسکول کھولے ہیں اور 34 صوبوں میں سے 5 صوبوں (بلخ، جوزجان، سمنگان، قندوز اور اروزگان) میں پہلے ہی سے لڑکیوں کی ثانوی تعلیم بھی جاری ہے۔
ڈپٹی ایگزیکیٹو ڈائریکٹر عمر عبدی کے مطابق طالبان حکومت کے وزیر تعلیم نے بتایا ہے کہ وہ ایک “فریم ورک” پر کام کر رہے ہیں جو تمام لڑکیوں کو چھٹی جماعت سے آگے اپنی تعلیم جاری رکھنے کی اجازت دے گا تاہم اس پر ایک سے دو ماہ میں عمل درآمد ہونا ممکن ہوگا۔
عمر عابدی نے مزید بتایا کہ افغانستان میں گزشتہ دو دہائیوں کے دوران 40 لاکھ لڑکیوں نے تعلیم جاری رکھی اور اسکولوں کی تعداد 6 ہزار سے بڑھ کر 18 ہزار ہو گئی تھی تاہم اب نئی صورت حال میں 26 لاکھ لڑکیوں سمیت 42 لاکھ بچے اسکول جانے سے محروم ہیں۔

اسلام آباد(ویب ڈیسک) حکومت نے پٹرولیم مصنوعات کی قیمتوں میں 12 روپے 44 پیسے فی لیٹر تک اضافہ کردیا۔
وزارت خزانہ نے آئندہ 15 روز کے لیے پیٹرولیم مصنوعات کی قیمتوں میں 12 روپے 44 پیسے فی لیٹر تک اضافہ کردیا ہے۔ نئی قیمتوں کا اطلاق 31 اکتوبر تک ہوگا۔
نوٹی فکیشن کے مطابق آج سے پیٹرول 10 روپے 49 پیسے فی لیٹر اضافے کے بعد 137روپے 79 پیسے فی لیٹر ملے گا۔ ہائی اسپیڈ ڈیزل کی قیمت میں 12روپے 44 پیسے اور لائٹ ڈیزل کی قیمت میں 8 روپے 84 پیسے اضافہ کیا گیا ہے، مٹی کے تیل کی قیمت 10روپے 95 پیسے اضافے کے بعد 110 روپے 26 پیسے فی لیٹر مقرر کی گئی ہے۔
اس طرح ہائی اسپیڈ ڈیزل کی قیمت 122.04 روپے سے بڑھ کر 134.48 روپے فی لیٹر اور لائٹ ڈیزل کی قیمت 99.51 روپے سے بڑھ کر 108.35 روپے فی لیٹر کردی گئی ہے۔یاد رہے کہ اوگرا کی جانب سے پیٹرول کی قیمت 5روپے 90پیسے فی لیٹر تک بڑھانےکی تجویز کی گئی تھی۔واضح رہے کہ گزشتہ روز وفاقی کابینہ نے بجلی مہنگی کرنے کی منظوری دے دی جس کے بعد بجلی کی قیمت میں ایک روپے 68 پیسے اضافہ کیا گیا ہے۔

دبئی(ویب ڈیسک) ٹی 20 ورلڈ کپ میں بھی ڈی آر ایس ڈیبیو کے لیے تیار ہے جب کہ مختصر فارمیٹ کے میگا ایونٹ میں بھی پلیئرز کو اب امپائرز کے فیصلے چیلنج کرنے کا اختیار ہوگا۔
آئی سی سی مینز ٹی 20 ورلڈ کپ میں پہلی بار ڈسیشن ریویو سسٹم ڈی آر ایس کا استعمال ہوگا، آئی سی سی نے میگا ایونٹ کیلیے سسٹم کی دستیابی کی تصدیق کردی ہے، ٹورنامنٹ کا آغاز 17 اکتوبر سے عمان میں ابتدائی راؤنڈ کے ساتھ ہوگا جبکہ باقی مقابلے متحدہ عرب امارات میں کھیلے جائیں گے۔
ہر ٹیم کو ایک اننگز میں زیادہ سے زیادہ 2 ریویوز حاصل ہوں گے، کھیل کی عالمی گورننگ باڈی نے گذشتہ برس جون میں ہی واضح کیا تھا کہ کوویڈ کی وجہ سے بانسبت کم تجربہ کار ہوم امپائرز کی وجہ سے تمام فارمیٹس میں ہر اننگز کے دوران ٹیموں کو 2 ریویوز دستیاب ہوں گے۔ اس کے بعد سفید بال کرکٹ میں اننگز میں 2 جبکہ ٹیسٹ کرکٹ میں اننگز میں 3 ریویو دیے جاتے ہیں۔
آئی سی سی نے بارش کی وجہ سے تاخیر کا شکار ہونے والے مقابلوں کیلیے کم سے کم اوورز کی تعداد میں اصافہ کردیا ہے، ڈی ایل ایس پر نتیجے کیلیے پر ٹیم کو کم سے کم 5 اوورز تک بیٹنگ کرنا ہوگی تاہم سیمی فائنلز اور فائنل کیلیے دونوں ٹیموں کا کم سے کم 10 اوورز تک کھیلنا ضروری ہے۔
گزشتہ برس ویمنز ٹی 20 ورلڈ کپ میں بھی یہی کنڈیشنز لاگو تھیں، جب سڈنی میں انگلینڈ اور بھارت کے درمیان پہلا سیمی فائنل بارش کی نذر ہوا اور ریزرو ڈے نہ ہونے کی وجہ سے اس قانون کو تنقید کا بھی نشانہ بنایا گیا تھا۔
یاد رہے کہ آخری مرتبہ مینز ٹی 20 ورلڈ کپ 2016 میں کھیلا گیا تھا جس میں ڈی آر ایس کا استعمال نہیں ہوا تھا۔ ویمنز ٹی 20 ورلڈ کپ میں ڈی آر ایس کا استعمال 2018 میں ہوا تھا۔

اسلام آباد(ویب ڈیسک) پولیس نے عدالتی حکم پر سابق وفاقی وزیر قانون وصی ظفر کے بیٹے وقار وصی کو گرفتار کرلیا۔سینئر سول جج فیملی کورٹ قدرت اللہ نے وقار وصی کی گرفتاری کا حکم سناتے ہوئے عدالتی فیصلے پر عملدرآمد نہ کرنے پر اسے ایک سال قید کی سزا سنا دی۔ عدالت نے حکم دیا کہ وقار وصی کو عدالتی فیصلے پر عملدرآمد کرنے پر ایک سال سے قبل ہی رہا کر دیا جائے۔عدالت نے 20 مارچ 2018 کو وقار وصی کو سابقہ بیوی کو زیورات واپسی کا حکم دیا تھا، لیکن وقار وصی نے عدالتی فیصلے کو طویل عرصہ گزرنے کے باوجود اپنی مطلقہ بیوی کو جہیز کا سامان واپس نہیں کیا۔
جج قدرت اللہ نے فیصلے میں کہا کہ وقار وصی عدالتی فیصلے پر عملدرآمد میں ناکام رہے اور جہیز کا سامان واپس نہ کرنے کا کوئی مناسب جواز بھی پیش نہ کر سکے۔
وصی ظفر کا تعلق مسلم لیگ (ق) سے تھا اور پرویز مشرف کی کابینہ میں وفاقی وزیرِ قانون تھے۔ وہ رواں سال 72 سال کی عمر میں انتقال کر گئے۔ انہوں نے ایک انٹرویو میں نازیبا زبان استعمال کی تھی جو وائرل ہوگئی تھی۔

کراچی(ویب ڈیسک) بختاور بھٹو زرداری کے ہاں بیٹے کی پیدائش ہوئی ہے۔سابق صدر آصف علی زرداری کی صاحبزداری بختاور بھٹو زرداری کے ہاں بیٹے کی پیدائش ہوئی ہے جس کی تصدیق خود بختاور بھٹو زرداری نے سماجی رابطے کی ویب سائٹ پر ٹوئٹ کرتے ہوئے کی۔بختاور بھٹو زرداری نے اپنی ٹوئٹ میں اللہ کا شکر ادا کرتے ہوئے کہا ’’یہ بتانے میں بہت خوشی محسوس ہورہی ہے کہ اللہ نے ہمیں بیٹے سے نوازا ہے‘‘۔ انہوں نے اپنی ٹوئٹ میں بچے کی تاریخ پیدائش 10 اکتوبر 2021 لکھی
دوسری جانب پاکستان پیپلزپارٹی کے چیئرمین بلاول بھٹو زرداری نے اپنی بہن بختاور بھٹو زرداری کی ٹوئٹ پر کہا ’’میں باقائدہ ماموں بن گیا ہوں‘‘۔آصف علی زرداری کی چھوٹی بیٹی آصفہ بھٹو زرداری نے ٹوئٹ کرتے ہوئے کہا ’’ الحمداللہ، میں باقاعدہ خالہ بن گئی ہوں‘‘۔واضح رہے بختاور بھٹو زرداری کی شادی رواں سال 29 جنوری کو محمود چوہدری سے ہوئی تھی۔

تل ابیب(ویب ڈیسک) اسرائیل کی عدالت نے مسجد اقصیٰ میں عبادت ادا کرنے والے یہودیوں کے حق میں ایک متنازع فیصلہ دیدیا جس پر فلسطین اتھارٹی نے شدید احتجاج کیا ہے۔
عالمی خبر رساں ادارے کے مطابق اسرائیلی آباد کار ربی عریح لیپو نے مسجد اقصیٰ کے مخصوص احاطے میں یہودیوں کے داخلے پر عارضی پابندی کے خلاف عدالت میں درخواست دائر کی تھی۔
مجسٹریٹ عدالت نے اس درخواست پر یک طرفہ اور متنازع فیصلہ سناتے ہوئے اسرائیلی پولیس کو حکم دیا کہ اگر مسجد اقصیٰ میں یہودی عبادت کرتے ہیں تو اسے مجرمانہ فعل نہ سمجھا جائے اور نہ ہی انھیں رو کا جائے۔
خیال رہے کہ 1994 میں عمان اور اسرائیل کے درمیان معاہدے کے تحت مسجد اقصیٰ کے مخصوص احاطے میں یہودیوں کو عبادت کی اجازت نہیں ہوگی اس حصے میں صرف مسلمان نمازیں ادا کرتے ہیں جب کہ یہودی قریبی مغربی دیوار پر عبادت کرسکتے ہیں۔
عدالتی فیصلے پر احتجاج کرتے ہوئے فلسطینی وزیر اعظم محمد ابراہیم شطیح نے امریکا سے مطالبہ کیا کہ وہ مخصوص احاطے میں یہودیوں کو داخل ہونے سے روکنے کے لیے اپنا کردار ادا کریں۔فلسطینی وزیراعظم نے عدالتی فیصلے کو یہودیوں کو مسلط کرنے کی سازش قرار دیتے ہوئے عرب ممالک سے بھی فلسطینیوں کے ساتھ اظہار یکجہتی کے لیے کھڑے ہونے کی بھی اپیل کی۔
ادھر مسجد اقصیٰ کے کسٹودین اردن نے بھی عدالتی فیصلے کو عمان اور تل ابیب کے درمیان امن معاہدے اور مسجد اقصیٰ کی تاریخی اور قانونی حیثیت کی سنگین خلاف ورزی قرار دیا ہے۔
دوسری جانب یروشلم اور مسجد الاقصیٰ کے امور کے ماہر وکیل خالد زبرقہ نے الجزیرہ کو بتایا کہ اسرائیلی عدالتی نظام کو مسجد اقصیٰ کی حرمت پر حکمرانی اور عرصے سے جاری روایت کو تبدیل کرنے کا کوئی قانونی اختیار نہیں ہے۔واضح رہے کہ مجسٹریٹ عدالت کے اس متنازع فیصلے کو اگرچہ اعلیٰ عدالت اور اتھارٹی سے توثیق کی ضرورت ہے تاہم اس فیصلے نے اسرائیل کے مسجد اقصیٰ کے احاطے پر ناجائز قبضے کے خدشات پیدا کر دیے ہیں۔

دبئی(ویب ڈیسک) ورلڈکپ سے قبل پاکستان کو ہتھیاروں کی آزمائش کا بھرپور موقع مل گیا۔
تفصیلات کے مطابق انٹرنیشنل کرکٹ کونسل نے ٹی 20 ورلڈ کپ سے قبل وارم اپ میچز کا شیڈول فائنل کرلیا ہے، ایونٹ میں براہ راست انٹری پانے والی 8 ٹیموں کو 2،2میچز میں میگا ایونٹ کیلیے تیاریوں کی جانچ کا موقع ملے گا، یہ میچز 18 اور 20 اکتوبر کو کھیلے جائیں گے۔
پاکستان ٹیم کو وارم اپ میچز میں مضبوط حریفوں کا سامنا ہوگا،نیوزی لینڈ اور انگلینڈ کی جانب سے آخری لمحات میں ٹورز ختم کرنے کی وجہ سے گرین شرٹس سے ورلڈ کپ کی تیاری کا موقع چھن گیا تھا، البتہ ٹورنامنٹ سے قبل طاقتور حریفوں سے میچز میں اپنے ہتھیاروں کی آزمائش کا بھرپور موقع میسر آئے گا۔
کھلاڑی کنڈیشنز سے ہم آہنگ ہو پائیں گے اور ٹیم مینجمنٹ کو شوپیس ایونٹ کیلیے حکمت عملی تیار کرنے میں بھی مدد ملے گی۔18 اکتوبرکو پاکستان ٹیم دفاعی چیمپئن ویسٹ انڈیز سے ٹکرائے گی جسے بہترین ہارڈ ہٹرز اور مختصر فارمیٹ کے اسپیشلسٹ کرکٹرز کا ساتھ حاصل ہے۔
اسی روز دیگر وارم اپ میچز میں افغانستان کا سامنا جنوبی افریقہ،آسٹریلیا کا نیوزی لینڈ اور بھارت کا انگلینڈ سے ہوگا۔ 20 اکتوبر کو گرین شرٹس کی آزمائش جنوبی افریقہ سے مقابلے میں ہوگی، دیگرپریکٹس میچز میں انگلینڈ کا سامنا نیوزی لینڈ سے ہوگا، بھارت کی ٹیم آسٹریلیا سے ٹکرائے گی، افغانستان کا میچ ویسٹ انڈیز سے ہوگا۔ورلڈ کپ کے نشریاتی حقوق کا حامل اسپورٹس چینل بھارت کے دونوں پریکٹس میچز براہ راست نشر کرے گا، بھارتی کرکٹ کے بھی براڈکاسٹنگ رائٹس اسی کے پاس ہیں۔