Tag ایمرانیوز

کراچی(ویب ڈیسک) بیرون ملک جانے والے ممتاز بیٹسمین عمر اکمل نے امریکہ میں لیگ کرکٹ کھیلنا شروع کر دی۔
ذرائع کے مطابق 31 سالہ عمر اکمل کا ناردرن کیلیفورنیا کرکٹ ایسوسی ایشن سے محدود مدت کا معاہدہ طے پاگیا، تاہم میچ فکسنگ کے مجرم کرکٹرکا امریکہ میں ناکام آغاز ہوا۔
اطلاعات کے مطابق عمر اکمل اپنے پہلے ہی میچ میں ناکام رہے۔ کیلیفورنیا زلمی کی نمائندگی کرنیوالے عمر اکمل صفر کی خفت کا شکار ہوگئے۔ وہ بغیر کوئی رنز بنائے پویلین واپس لوٹ گئے۔
ذرائع کا کہنا ہے کہ عمر اکمل امریکہ میں مستقل قیام کے خواہاں ہیں اور قانونی قیام کے لیے امریکہ میں طویل مدتی معاہدہ کرنا چاہتے ہیں، ڈومیسٹک سیزن میں نظر انداز کیے جانے پر بددل ہونے والے عمر اکمل اب امریکہ میں مستقل قیام پر غور کر رہے ہیں۔

لاہور(ویب ڈیسک)میڈیارپورٹس کے مطابق لاہور کے علاقے شیراکوٹ کی رہائشی خاتون نے طلاق دینے پر شوہر پر تیزاب پھینک دیا، پولیس نے کارروائی کرتے ہوئے ملزمہ کو گرفتار کرلیا۔ ملزمہ صدف کو سابق شوہر ساجد خان نے 3 سال پہلے طلاق دے دی تھی اور ایک ہفتہ قبل ہی دوسری شادی کی۔
دوسری شادی کے رنج میں ملزمہ نے بھکارن کا بھیس بدل کر گلی میں ساجد خان پر تیزاب پھینکا، جس کے نتیجے میں مدعی مقدمہ ساجد خان کی گردن، کان اور کمر کا حصہ متاثر ہوا۔
ایس ایچ او شیراکوٹ عظیم انور گہلن نے کارروائی کرکے ملزمہ کو گرفتار کر لیا۔ ایس پی اقبال ٹاؤن ڈاکٹر رضا تنویر نے ایس ایچ او شیراکوٹ عظیم انور گہلن اور پولیس ٹیم کو شاباش دی۔
پولیس کے مطابق خاتون نے اپنے بیان میں کہا ہے کہ تین سال پہلے ساجد سے شادی ہوئی، پھر اس نے طلاق دی، پھر میرا حلالہ کروایا جس کے بعد خود دوسری شادی کررہا ہے اور مجھ سے شادی نہیں کی، جس پر مجھے غصہ آیا اور میں نے یہ کام کیا، میری ڈھائی سال کی چھوٹی سی بچی بھی ہے۔

کراچی(ویب ڈیسک) آل پاکستان ایل پی جی ڈسٹری بیوٹرز ایسوسی ایشن نے حکومت سے ایل پی جی کی قیمت میں کمی کے لیے اوگرا پرائسنگ فارمولے کو مقامی پیداواری قیمت کے ساتھ منسلک کرنے اور فی ٹن پیداواری قیمت 90 ہزار روپے پر منجمد کرنے کا مطالبہ کردیا۔
یہ مطالبہ ایسوسی ایشن کے سینئر وائس چئیرمین علی حیدر، وائس چئیرمین حاجی محمد اسحاق خان سمیت دیگر عہدے داروں نے کراچی پریس کلب میں پریس کانفرنس کرتے ہوئے کیا۔
انہوں نے کہا کہ ایل پی جی کی قیمتوں میں کمی کا اقدام نہ اٹھایا گیا تو ڈسٹری بیوٹرز و فروخت کنندگان ملک گیر شٹر ڈاؤن ہڑتال پر مجبور ہوجائیں گے، پاکستان میں ایل پی جی کی قیمت 204روپے کی بلند ترین سطح پر پہنچ گئی ہے، مہنگی ایل پی جی عوام کے لیے مہنگائی کا بم ثابت ہورہی ہے جس کی وجہ سے دور دراز اور پس ماندہ علاقوں کے صارفین قیمتی لکڑی کو ایندھن کے طور پر استعمال کررہے ہیں۔
انہوں نے کہا کہ وزیراعظم عمران خان جن اشیاء کی قیمتوں کا نوٹس لیتے ہیں وہ چیزیں عوام کی دسترس سے باہر ہوجاتی ہیں، اوگرا صرف پوسٹ مین کا کردار ادا کررہا ہے جس کا پرائسنگ فارمولا ناقابل سمجھ ہے۔
انہوں نے بتایا کہ ملک میں ایل پی جی سعودی آرامکو کنٹریکٹ پرائس سے کم قیمت پر عراق، ایران اور متحدہ عرب امارات سے درآمد کی جارہی ہے جبکہ مقامی طور پر فی ٹن ایل پی جی پیداواری لاگت 35 سے 40 ہزار روپے ہے لیکن اس کے باوجود اوگرا ایل پی جی کی قیمتوں کا تعین کنٹریکٹ پرائس کے تناسب سے کررہا ہے۔
انہوں نے بتایا کہ جنوری 2021ء سے اب تک ایل پی جی کی قیمت میں 27.5 فیصد اضافہ ہوچکا ہے، سال 2016ء میں حکومت نے صارفین کو سستی گیس کی فراہمی کے لیے دو سرکاری گیس کمپنیوں کو ایل پی جی کی درآمد پر سبسڈی فراہم کرنے کی غرض سے درآمدہ ایل پی جی پر پیٹرولیم ڈیولپمنٹ لیوی عائد کیا لیکن اربوں روپے کی وصولیوں کے باوجود صارفین کو کوئی ریلیف نہیں ملا۔
انہوں نے مزید کہا کہ ضرورت اس امر کی ہے حکومت دونوں گیس کمپنیوں کو پی ڈی ایل فنڈ سے ایل پی جی درآمد کرنے کی ہدایت کرے۔

کمانڈر رائل سعودی نیول فورسز وائس ایڈمرل فہد بن عبداللہ الغفیلی نے منگل کے روز پاکستان نیول ہیڈکوارٹرز کا دورہ کیا۔
ڈائریکٹوریٹ جنرل پبلک ریلیشنز (نیوی) کے پریس ریلیز کے مطابق نیول ہیڈکوارٹرز آمد پر پاک بحریہ کے سربراہ ایڈمرل محمد امجد خان نیازی نے معزز مہمان کا استقبال کیا۔ معزز مہمان کو روایتی انداز میں گارڈ آف آنر پیش کیا گیا۔
بعد ازاں معزز مہمان کا پرنسپل اسٹاف آفیسرز سے تعارف کرایا گیا۔ دورہ کے موقع پر معزز مہمان نے سربراہ پاک بحریہ ایڈمرل محمد امجد خان نیازی سے ملاقات کی۔ملاقات کے دوران باہمی دلچسپی کے امور اور علاقاٸی میری ٹاٸم سکیورٹی صورتحال پر تبادلہ خیال کیا گیا۔
معزز مہمان کو پاک بحریہ کی ذمہ داریوں اور استعداد کار کے حوالے سے بریفنگ بھی دی گئی۔ معزز مہمان نے خطے میں بحری سکیورٹی اور استحکام کے حوالے سے پاک بحریہ کی کاوشوں کو سراہا۔پاکستان اور سعودی عرب کے مابین مضبوط مذہبی، ثقافتی اور دفاعی روابط قائم ہیں۔ کمانڈر رائل سعودی نیول فورسز کے اس دورے سے دونوں برادر ممالک کے مابین تعلقات کو مزید فروغ ملے گا۔

کراچی(ویب ڈیسک) اداکارہ وینا ملک نے وزیراعظم عمران خان کے ساتھ ورلڈ ٹور پر جانے کی خواہش کا اظہار کیا ہے۔
اداکارہ وینا ملک نے حال ہی میں دئیے گئے انٹرویو میں سات سال بعد مزاحیہ سیاسی شو میں واپسی سمیت اپنی زندگی سے متعلق دلچسپ گفتگو کی۔
ویناملک کے کیریئر میں جہاں فلمز اور بھارتی رئیلیٹی شو بگ باس شامل ہیں تو وہیں انہوں نے مزاحیہ سیاسی شو ’’ہم سب امید سے ہیں‘‘ کے ذریعے بھی لوگوں کو کئی برسوں تک خوب تفریح فراہم کی۔
وینا ملک تقریباً سات سال بعد ایک بار پھر اسی طرح کے شو کے ذریعے ٹی وی پر واپسی کررہی ہیں۔ اس حوالے سے انہوں نے بتایا کہ اپنے بچوں اور فیملی کی وجہ سے وہ ٹی وی پر زیادہ سرگرم نہیں تھیں لیکن اب وہ واپس اپنے پسندیدہ موضوع کو لے کر بہت جلد ایک شو میں نظر آئیں گی۔
وینا ملک سے جب پوچھا گیا کہ آپ اپنے کیریئر میں مزاحیہ سیاسی شو کو ترجیح دیتی ہیں یا فلموں کو؟ تو وینا نے کہا فلمیں ان کے دل کے بہت قریب ہیں۔
میزبان نے وینا سے پوچھا اگر آپ کو کبھی بلاول بھٹو زرداری، عمران خان یا نواز شریف میں سے کسی ایک کے ساتھ ورلڈ ٹور پر جانے کا موقع ملے تو آپ کس کے ساتھ جائیں گی؟ وینا نے جواب دیا کہ ظاہر ہے میں عمران خان کےساتھ جاؤں گی۔
وینا ملک نے عمران خان کے ساتھ ورلڈ ٹور پر جانے کی وجہ بتاتے ہوئے کہا کہ عمران خان ایک دور اندیش شخصیت ہیں لہذا میں ان سے بہت کچھ سیکھوں گی۔

تاریخ گواہ ہے، نبی کریم (صلی اللہ علیہ وسلم) کے دور ہی میں ان کا مذاق اڑانے والے عبرتناک موت مرے ہیں۔

اِنَّا کَفَیۡنٰکَ الۡمُسۡتَہۡزِءِیۡنَ○
“بلاشبہ آپ کی جانب سے ہم مذاق اڑانے والوں کے لیے کافی ہیں۔” (سورة الحجر:95)

اسٹاک ہوم(ویب ڈیسک) سویڈن میں توہین آمیز خاکے بنانے والا کارٹونسٹ کار حادثے میں ہلاک ہوگیا۔
بی بی سی کے مطابق سویڈن کی حکومت نے توہین آمیز خاکے بنانے والے لارس ولکس نامی شخص کو کئی برسوں سے پولیس کی سیکیورٹی دے رکھی تھی، لارس ولکس اتوار کے روز اپنی پولیس سیکیورٹی میں جارہا تھا کہ مارکیریڈ نامی قصبے کے قریب اس کی گاڑی ایک ٹرک سے ٹکرا گئی۔
گاڑی اور ٹرک کے درمیان تصادم کے نتیجے میں لارس ولکس اور اس کی حفاظت پر مامور 2 پولیس اہلکار موقع پر ہی ہلاک ہوگئے، مقامی پولیس نے اپنے بیان میں کہا ہے کہ یہ ابھی تک واضح نہیں کہ کار اور ٹرک کی ٹکر کیسے ہوئی تاہم ابتدائی طور پر واقعہ کسی بھی طرح سے قاتلانہ کارروائی یا حملہ نہیں لگتا۔
2007 میں لارس ولکس نے توہین آمیز خاکے بنائے تھے، جس پر پاکستان سمیت دنیا بھر میں مسلمانوں نے شدید احتجاج کیا تھا، القاعدہ نے کارٹونسٹ کو مارنے والے کو ایک لاکھ ڈالر انعام دینے کا اعلان کیا تھا، 2015 میں ولکس پر ایک مباحثے میں شرکت کے دوران حملہ ہوا تھا لیکن وہ بچ نکلا تھا۔

اسلام آباد(ویب ڈیسک)وزیرخزانہ شوکت ترین کا کہنا ہے کہ ماضی میں متوسط طبقے کی آمدن کیلئے کچھ نہیں کیا گیا، غریب صرف ترقی کے خواب ہی دیکھتا رہا۔
کامیاب پاکستان پروگرام کی تقریب سے خطاب کرتے ہوئے وزیرخزانہ شوکت ترین کا کہنا تھا کہ پروگرام سے محروم طبقات کو با اختیار بنانے میں مدد ملے گی، معاشی ترقی کے لیے طویل المدتی منصوبے بنانے ہوتے ہیں، لیکن افسوس کے ساتھ ماضی میں متوسط طبقے کی آمدن کیلئے کچھ نہیں کیا گیا، غریب صرف ترقی کے خواب ہی دیکھتا رہا، موجودہ حکومت پائیدار ترقی اور مستحکم معیشت کیلئے اقدامات کررہی ہے اور مزید کام کرے گی۔وزیرخزانہ کا کہنا تھا کہ وزیراعظم نے غریبوں کیلئے کام کرنے کی ہدایت کی، اور کہا کہ غریب کو بااختیار بنانے کےلیے کام ہونا چاہیے، پہلی بار ترقی کے سفر میں نچلے طبقے کو ترجیح دی گئی ہے، کاروبار کے لیے 5 لاکھ تک بلا سود قرضے دئیے جائیں گے، چھوٹے قرضوں کی وصولی کی شرح 99 فیصد ہے، ہر گھر کے ایک فرد کو ٹیکنیکل ٹریننگ دیں گے۔

برلن(ویب ڈیسک) جرمنی میں عمرشریف کی نماز جنازہ ادا کردی گئی ہے۔
میڈیارپورٹ کے مطابق جرمنی کے شہر نیورمبرگ میں عمر شریف کی جنازہ نماز ادا کردی گئی، نماز جنازہ میں پاکستانی سفارتی عملے کے علاوہ جرمنی بھر سے آنے والے پاکستانیوں نے شرکت کی۔نماز جنازہ کی ادائیگی سے قبل عمرشریف کی میت ورثا کے حوالے کی گئی۔ عمرشریف کا ڈیتھ سرٹیفکیٹ جاری کئے جانے کے بعد میت کو مقامی مسجد منتقل کیا گیا۔عمرشریف کے بیٹے کے مطابق ان کے والد کی میت منگل یا بدھ کوکراچی لائی جائے گی تاہم ابھی اس بات کا تعین نہیں کیا گیا کہ میت کوچارٹرڈ فلائٹ یا پھرعام پروازکے ذریعے وطن واپس لایا جائے گا۔واضح رہے کہ عمرشریف کی میت گلشن اقبال، کے ڈی اے نزد صدیق اکبرمسجد والے گھرسے اٹھائی جائے گی، جب کہ نمازجنازہ عمرشریف پارک کلفٹن میں ادا کی جائے گی

کراچی(ویب ڈیسک) سندھ ہائیکورٹ نے کرپٹو کرنسی پر پابندی سے متعلق درخواست پر ڈپٹی گورنر اسٹیٹ بنک، سیکریٹری فائنانس اور ڈائریکٹر ایف آئی اے سائبر کرائم کو ذاتی حیثیت میں طلب کرلیا۔
جسٹس کے کے آغا کی سربراہی میں دو رکنی بینچ کے روبروکرپٹو کرنسی پر پابندی سے متعلق درخواست کی سماعت ہوئی۔ جسٹس کے کے آغا نے ریمارکس دیئے کرپٹو کرنسی پر پابندی کس نے لگائی ہے؟ کیا اسٹیٹ بینک نے لگائی ہے؟ تو کیوں لگائی ہے؟۔
اسٹیٹ بینک کے وکیل نے موقف دیا کہ ڈیجیٹل کرنسی غلط طریقے سے استعمال ہوسکتی ہے، اس لیے پابندی لگائی۔
عدالت نے ریمارکس دیئے قانون سازی کس کا کام ہے؟ غلط کاموں میں استعمال کی روک تھام کرنا کس کا کام ہے۔
عدالت نے ڈپٹی گورنر اسٹیٹ بنک، سیکیورٹی ایکسچینج کمیشن افسر، سیکریٹری فائنانس اور ڈائریکٹر ایف آئی اے سائبر کرائم کو ذاتی حیثیت میں طلب کرتے ہوئے کرپٹو کرنسی کے استعمال کے لیے قانون سازی سے متعلق رپورٹ طلب کرلی۔
عدالت نے پرائیوٹ کمپنیوں کیخلاف کارروائی کرکے رپورٹ بھی پیش کرنے اور فریقین کو 19 اکتوبر کو تفصیلی جواب جمع کرانے کا حکم دیدیا۔
دائر درخواست میں موقف اپنایا گیا تھا کہ کئی افراد کا ذریعہ معاش کرپٹو کرنسی سے وابستہ ہے۔ پاکستان میں کئی غیر رجسٹرڈ کمپنیاں ڈیجیٹل کرنسی میں کام کررہی ہیں۔ سیکیورٹی ایکسچینج کمیشن آف پاکستان نے بھی ریگولیٹ کردیا ہے۔ کئی ممالک میں ڈیجیٹل کرنسی میں کاروبار کرنے کی اجازت ہے۔ لیکن اسٹیٹ بینک بٹ کوائن کا اکاونٹ نہیں کھول رہا۔

جاویدچوہدری کے قلم سے.

’’میرا نام احسان اللہ ہے اور میں گجرات کی تحصیل سرائے عالم گیر کے چھوٹے سے گائوں کریالی سے تعلق رکھتا ہوں‘ میرا گائوں شہر سے تین کلومیٹر کے فاصلے پر واقع ہے‘ میں یہ خط پاکستانی معاشرے کی چند کوتاہیوں اور اپنی ایک چھوٹی سی خدمت کے اعتراف میں لکھ رہا ہوں‘ میری درخواست ہے، آپ بھی میرا یہ خط پڑھیں اور عوام کو بھی پڑھائیں‘ شاید میری مثال سے میرے معاشرے کے لوگوں میں ہمت پیدا ہو جائے اور یہ بھی اپنے شہروں اور دیہات کے لیے کوشش شروع کر دیں‘ میں نے گائوں کے اسکول سے میٹرک کیا‘ جہلم ٹیکنیکل کالج سے تین سال کا ایسوسی ایٹ ڈپلومہ کیا اور پھر اسلام آباد سے مکینیکل میں بی ٹیک کر لیا‘ میںیونیورسٹی میں داخل ہوا‘ میرا پہلا سمسٹر چل رہا تھا کہ میں فیملی کے ساتھ نیویارک منتقل ہو گیا‘ میں پانچ سال پہلے امریکا آیا‘ یہاں شادی کی‘ اﷲ نے دو بچے دیے‘ الحمدﷲ نوکری بھی اچھی مل گئی اور میں اب نوکری کے ساتھ ساتھ تعلیم بھی حاصل کر رہا ہوں‘‘ ۔

’’یہ میرا تعارف تھا‘میں اب خط کے مقصد کی طرف آتا ہوں‘ میں نے امریکا میں پانچ برسوں میں جو کچھ سیکھا وہ میں پاکستان میں 21 برسوں میں نہیں سیکھ سکا اور میرا خیال ہے میں اگر گجرات یا اسلام آباد رہتا تو شاید اگلے اکیس برسوں میں بھی نہ سیکھ پاتا‘ میں نے امریکا میں سب سے پہلے خود کو اور اپنے ماحول کو صاف رکھنا سیکھا‘ لائن میں کس طرح کھڑے ہو کر اپنی باری کا انتظار کرناچاہیے اور کس طرح اگر کوئی سویپر ہے تو اس کی عزت کرنی ہے‘ ایک کمپنی کے مالک اور ملازم میں کوئی فرق نہیں ہوتا اور لیبر کے حقوق کیا ہیں وغیرہ وغیرہ‘ یہ بھی میں نے یہاں سیکھا‘ امریکا میں کالج جانے کے لیے عمر کی کوئی قید نہیں‘ میرے لیے یہ بات بالکل نئی تھی‘ کس طرح لڑکیاں لڑکے ایک کلاس میں اپنی مرضی کا لباس پہن کر آتے ہیں اور ایک ہی کلاس میں بیٹھتے ہیں اور کسی کو کوئی فرق نہیں پڑتا‘ کم کھانا صحت ہے زیادہ کھانا بیماری ہے یہ بھی سیکھا‘ میں جب یہاں آیا تو اﷲ کی توفیق سے نماز کی پابندی شروع کر دی‘ ایک دن دوران کام میں وضو کرنے کے لیے واش روم گیا اور وضو شروع کر دیا‘ آس پاس دوسرے لوگ بھی تھے‘ میں جانتا ہی نہیں تھا واش بیسن میں پائوں دھونا انتہائی بدتہذیبی ہوتی ہے‘ میں نے جوں ہی پائوں دھونے شروع کیے واش روم میں موجود لوگ فوراً سب کچھ چھوڑ کر دور کھڑے ہو گئے اور حیرت سے مجھے دیکھنے لگے‘ ایک افریقن امریکن نے مجھے گالی دے کر اپنے کولیگ سے کہا‘ کسی شخص نے اس کو یہ تمیز تک نہیں سکھائی واش بیسن میں پائوں نہیں دھوئے جاتے ‘ یہ دیکھو یہ یہاں غلاظت پھیلا رہا ہے اور اس نے ہر طرف پانی ہی پانی کر دیا‘ اس کی آواز میرے کانوں تک بھی پہنچ رہی تھی‘ مجھے غصہ آگیا لیکن پھر میں نے سوچا اس کی بات غلط نہیں‘ مجھے واش بیسن میں پائوں نہیں دھونے چاہیے تھے‘ میں نے اگلے دن اس شخص سے معذرت کی اور اپنی لاعلمی اور کم عقلی کا اعتراف کیا‘ میں نے اس کے بعد سوچا میں اگر غلطی کر سکتا ہوں تو دوسرے بھی کر سکتے ہیں لہٰذا میں نے اپنی کمپنی کے ہر مسلمان کو یہ واقعہ سنایا اور اسے مشورہ دیا تم نے وضو کے دوران واش بیسن میں پائوں نہیں دھونے‘ یہ امریکا میں بدتمیزی سمجھی جاتی ہے یوں میں نے اپنا فرض بھی پورا کیا اور آیندہ احتیاط کا وعدہ بھی کیا۔ دوسری چیز جو مجھے پسند آئی وہ تھی گاربیج ڈیوٹی ٹرک (Garbage duty truck)۔ لوگ ہر سوموار اور جمعرات کو اپنا سارا کچرا بڑے بیگز میں ڈال کر گھر کے باہر رکھ دیتے ہیں اور ہر صبح تقریباً چھ بجے کے قریب ٹرک والے آتے ہیں اور کوڑا اٹھا کر لے جاتے ہیں‘ ہر اتوار کو دوسرا ٹرک آتا ہے جو صرف پلاسٹک اور ری سائیکل والی چیزیں لے کر جاتا ہے‘ پلاسٹک اور ری سائیکل والا علیحدہ ڈبہ ہوتا ہے جس کا رنگ نیلا ہوتا ہے‘‘۔
’’مجھے یہ چیز بہت پسند آئی اور میں نے سوچا یہ بندوبست ہمارے جیسے چھوٹے دیہات میں بھی ہونا چاہیے‘ ہم چھ کزن ہیں‘ ہم سب نیویارک میں ایک ہی گھر میں رہتے ہیں‘ میں نے سب سے مشورہ کیا اور اس مشن کو آگے بڑھانے کے لیے ہاتھ پائوں مارنا شروع کر دیے‘ میں جنوری 2020میں پاکستان آیا‘ گائوں میں سب دوستوں کو اکٹھا کیا اور ان سے اپنا آئیڈیا شیئر کیا‘ سب کو میرا آئیڈیا پسند آیا‘ ہم نے اس کے بعد گائوں کے ٹیچرز اور نمبردار کو بلایا‘ ان کے ساتھ ملاقات کی اورگائوں میں ایک سوسائٹی کا سنگ بنیاد رکھ دیا‘ اس کا نام ’’سویرا ویلفیئر سوسائٹی‘‘ہے‘ ممبران کی تعداد 30 ہے اور سب فی سبیل اللہ کام کر رہے ہیں‘ کسی بھی ممبر کا کسی بھی سیاسی جماعت سے کوئی تعلق نہیں‘ ہم تین کزنز نے مل کر ایک رکشا لیا یا لوڈر کہہ لیں اور یہ سوسائٹی کے حوالے کر دیا‘ سوسائٹی والوں نے دو لوگوں کو ہائر کیا اور گائوں کو سروس دینی شروع کر دی‘ ہر گھر سے 200 روپے مہینہ طے ہوا‘ سوسائٹی نے اس رقم سے لوڈر کے اخراجات اور ملازمین کی تنخواہ پوری کرنی تھی‘ گائوں میں 600 گھر ہیں لیکن ان میں سے صرف 150 گھر دوسو روپے ماہانہ ادا کرنے کے لیے تیار ہوئے اور آپ کمال دیکھیے‘ تین مہینے بعد یہ 150 گھر بھی 60 ہو گئے‘ گائوں کے 540 گھر دو سو روپے ماہانہ دینے کے لیے بھی تیار نہیں تھے‘ دوبارہ میٹنگ ہوئی اور سوسائٹی نے فیصلہ کیا اخراجات پورے نہیں ہو رہے لہٰذا سوسائٹی یہ سروس بند کرنے پر مجبور ہو گئی ہے‘ مجھے نیویارک میں یہ خبر ملی تو میں نے یہ ذمے داری اٹھا لی‘ میں نے دونوں ڈرائیورز کی تنخواہ اپنے ذمے لے لی‘یہ 40 ہزارروپے ہیں اور الحمد للہ یہ سلسلہ چلتا آ رہا ہے‘ ہم نے ایک اور لوڈر کے لیے بھی پیسوں کا بندوبست کر لیا ہے‘ وہ بھی جلد سروس شروع کر دے گا‘ سوسائٹی کے ساتھ اب مزید مال دار اور بیرون ملک مقیم لوگ بھی منسلک ہو رہے ہیں‘ ہم اب سوسائٹی کو بڑھا کر باقی فلاحی کام بھی شروع کر رہے ہیں‘ مثلاً ہم نے جنازہ گاہ کی تعمیر اور قبرستان کی چار دیواری اور رمضان کے مہینے میں 200 مستحق خاندانوں کو راشن کی فراہمی‘ غریب بچیوں کی شادی اور بیمار لوگوں کو ادویات پہنچانے جیسے کام بھی شروع کر دیے ہیں‘ میرے ذہن میں اب دو تجاویزہیں‘ میں ان پر کام کر رہا ہوں۔ ایک‘ غریب لوگوں اور یتیموں کے لیے دو رومز کے اپارٹمنٹ تعمیر کرنا ‘دو‘ مسجد میں آنے والے بچوں کو قرآن کے ساتھ ساتھ اخلاقیات اور دینیات پڑھانا۔ آپ یقین کریں میں ایک دفعہ امریکا میں ایک صاحب کے گھر بیٹھا تھا‘ دین کے بارے میں بات شروع ہو گئی‘ کسی شخص نے کسی صحابیؓ کے بارے میں بات کی اور وہ اس صحابیؓ کا نام بھول گیا‘ وہاں بیٹھے ایک سات سال کے بچے نے اس شخص کو فوراً صحابیؓ کا نام یاد دلا دیا‘ مجھے بہت تجسس ہوا کیوں کہ یہ نام مجھے 29 سال کی عمر میں بھی معلوم نہیں تھا‘ اس سات سال کے بچے کو یہ امریکا میں کیسے معلوم ہو گیا؟ میں نے بچے سے کچھ اور سوال پوچھے‘ ان میں وضو ‘غسل اورنماز کے فرائض بھی شامل تھے‘ بچے نے مجھے ہر سوال کا صحیح جواب دیا‘ میں نے اس سے پوچھا تمہیں یہ کس نے سکھایا ؟ اس نے بتایا وہ ہفتے والے دن (جس کو یہاں Saturday School کہتے ہیں) صرف دو گھنٹے کے لیے مسجد جاتا ہے‘ اس نے یہ سب کچھ وہاں سے سیکھا ‘ میں اسی ہفتے اس مسجد پہنچ گیا اور دیکھا تین استاد ہیں‘ ایک قرآن سکھاتا ہے‘ دوسرا عبادات اور تیسرا اخلاقیات اور انھوں نے باقاعدہ انگلش میں کتابیں بنائی ہوئی ہیں اور باقاعدہ ان کا امتحان بھی ہوتا ہے اور یہ ہر بچے نے پاس کرنا ہوتا ہے‘ آپ یقین کریں اس کتاب میں جو کچھ سکھایا جا رہا تھا اس کا پچاس فیصد میرے لیے نیا تھا‘ وہ لوگ امریکا میں مسجد میں بیٹھ کر جو باتیں بچوں کو سکھا رہے تھے وہ ہمیں پاکستان میں یونیورسٹی میں بھی معلوم نہیں ہوتیں‘ میں نے اسی دن فیصلہ کر لیا میں یہ سارا سلیبس اردو میں ترجمہ کر کے اپنے گائوں کی مسجد میں اپنے بچوں کو پڑھائوں گا‘ ہمارے ملک میں بچے روز صبح ایک سے ڈیڑھ گھنٹہ مسجد جاتے ہیں لیکن وہ وہاں وہ کچھ نہیں سیکھ پاتے جو امریکا میں بچے ہفتے میں صرف ایک بار دو گھنٹے مسجد میں جا کر سیکھ لیتے ہیں‘ شاید اس کی وجہ یہ ہے پاکستان میں کوئی سسٹم نہیں ہے‘ شاید ہمارے ملک میں گائیڈ لائنز نہیں ہیں جن کو ہمارے علماء فالو کریں‘ لوگ اگر فرقہ واریت سے نکل کر ایک ہو کر سوچیں گے تو یہ پاکستان میں بھی ممکن ہو جائے گا اور ہمارے بچے بھی کل ان ملکوں میں آ کر بدنامی کا باعث نہیں بنیں گے لیکن کیا کریں دیوبندی کہتے ہیں نصاب میں بریلویت ہے اور بریلوی کہتے ہیں اس میں دیو بندیت ہے لیکن ان شاء اللہ ایک دن ہم سب اسلام پر ضرور راضی ہو جائیں گے‘‘۔
’’میںڈاکٹر جاوید اقبال کی وڈیوز سنتا ہوں‘ ڈاکٹر صاحب نے وزیراعظم کے سامنے نقطہ اٹھایا تھا ہم علمائے کرام اور مذہبی اداروں کے ذریعے عوام کی تربیت کر سکتے ہیں لیکن بدقسمتی سے وزیراعظم صاحب نے ایک میٹنگ میں تمام علماء کو بلایا اور جو کچھ ڈاکٹر صاحب نے کہا تھا وہی اپنی زبانی سنا کر سب کو واپس بھجوا دیا۔ اﷲ ہم سب لوگوں کو خدمت کرنے کی توفیق عطا فرمائے۔اگر آپ کو وقت ملے تو ضرور سوسائٹی کے آفس جائیے گا اور ان کی رہنمائی کر دیجیے گا۔

احسان اﷲ ‘نیویارک‘‘

میں نے احسان اﷲ کا خط پڑھا اور اس کے بعد اپنے آپ سے سوال کیا‘ یہ شخص اگر اپنے گائوں میں تبدیلی لا سکتا ہے تو ہم سب لوگ مل کر اپنے اپنے دیہات کو کیوں نہیں بدل سکتے؟ یہ سوال آپ کے لیے بھی ہے۔

بشکریہ:. ایکسپریس نیوز