Tag بریکنگ نیوز

نیوزی لینڈ(ویب ڈیسک) نیوزی لینڈ کے میڈیا نے دعویٰ کیا ہےکہ انٹیلی جنس اتحاد کی جانب سے خطرے سے آگاہ کرنے پر نیوزی لینڈ نے پاکستان کا دورہ منسوخ کرنے کا فیصلہ کیا۔
نیوزی لینڈ میڈیا کی رپورٹ میں کہا گیا ہےکہ پانچ ملکی انٹیلی جنس اتحاد نے نیوزی لینڈ ٹیم کو دورہ پاکستان ختم کرنے کا کہا، نیوزی لینڈ،آسٹریلیا،کینیڈا،امریکا اور برطانیہ کے انٹیلی جنس اتحاد نے خطرے سے آگاہ کیا۔

نیوزی لینڈ میڈیا کا کہنا ہے کہ پانچ ملکی انٹیلی جنس اتحاد کا بتایا گیا سکیورٹی خطرہ قابل اعتماد سمجھا گیا اور نیوزی لینڈ کی حکومت نے کرکٹ حکام کے فیصلے کی حمایت کی۔میڈیا رپورٹ کے مطابق نیوزی لینڈ، پاکستان کی حکومتوں اورکرکٹ بورڈزکے درمیان 12 گھنٹے گفتگو ہوئی، حکومتوں اور بورڈز کی اس طویل گفتگو کے بعد دورہ ختم کیا گیا۔
واضح رہےکہ گزشتہ روز پاکستان اور نیوزی لینڈ کے میچ سے کچھ دیر پہلے نیوزی لینڈ نے سکیورٹی وجوہات کو بنیاد بناکر پاکستان کا دورہ منسوخ کردیا جس کے بعد دونوں ممالک کے درمیان سیریز بھی ملتوی ہوگئی۔

جنوبی وزیرستان(ویب ڈیسک) دہشت گردوں کی فائرنگ سے پاک فوج کے 7 جوان شہید ہوگئے۔
پاک فوج کے شعبہ تعلقات عامہ آئی ایس پی آر کے مطابق فورسز نے جنوبی وزیرستان کے ضلع آسمان منزا میں دہشت گردوں کی موجودگی کی خفیہ اطلاع پر آپریشن کیا ۔ اس دوران فائرنگ کے تبادلے میں 5 دہشت گرد ہلاک ہوگئے۔
دہشت گردوں کی فائرنگ سے پاک فوج کے 7 جوان بھی شہید ہوگئے۔ فورسز کی جانب سے مزید دہشت گردوں کا قلع قمع کرنے کےلیے علاقے میں سرچ آپریشن جاری ہے۔ وزیر داخلہ شیخ رشید احمد نے پاک فوج کے جوانوں کی شہادت کی اطلاع پرغم کا اظہار کرتے ہوئے وطن کی خاطر جان قربان کرنے والے جوانوں کو خراج تحسین پیش کیا۔ انہوں نے کہا کہ وطن کی خاطر جان دینے والوں پر پوری قوم کو ناز ہے، دہشت گردوں کے خلاف آپریشن جاری رکھیں گے۔

لاہور(ویب ڈیسک)تحریک انصاف کی لاہور کنٹونمنٹ بورڈ میں انتخابی شکست کے بارے میں ابتدائی رپورٹ مرتب کرلی گئی۔رپورٹ میں لاہور میں ترقیاتی کام سے متعلق اہم سوال اٹھاتے ہوئے صوبائی دارالحکومت کو ترقیاتی کاموں کے حوالے سے ترجیح نہ دینے کو شکست کی اہم وجہ قرار دیا گیا۔ لاہور کے حوالے سے پارٹی کے مختلف رہنماؤں کا منفی پراپیگنڈہ بھی پی ٹی آئی کی عدم مقبولیت کی وجہ بنا۔

ذرائع کے مطابق تحریک لبیک کے خلاف محاذ کھولنے کے بارے میں بھی تحفظات کا اظہار کیا گیا۔ رپورٹ میں دعویٰ کیا گیا کہ دیہی سطح پر پی ٹی آئی کی مقبولیت بڑھی لیکن شہری حلقوں میں تاحال چیلنجز کا سامنا ہے۔
تحریک انصاف کی قیادت نے لاہور میں جعلی ووٹوں پر بھی اصرار کرتے ہوئے کہا کہ پنجاب میں پچیس فیصد کے قریب جعلی ووٹ ہیں جو سابق دور حکومت میں بنے، لاہور اور شہری حلقوں میں جعلی ووٹوں کے خلاف الیکشن کمیشن سے رجوع بھی کرچکے ہیں اور کمیشن کو اس حوالے سے خط بھی لکھ چکے ہیں ، رپورٹ میں جعلی ووٹوں کے اخراج کے لئے الیکشن کمیشن اوردیگر متعلقہ فورمزسے ریلیف لینے کی کوششوں کو تیز کرنے کی تجویز دی گئی۔

رپورٹ میں کہا گیا کہ ٹکٹ کی تقسیم میں کوئی ایشو پیدا نہیں ہوا ، تاہم کچھ پارٹی رہنماؤں نےمہم میں کام نہیں کیا۔ رپورٹ میں پارٹی قیادت اورحکومتی قیادت کےدرمیان رابطے کو بہتر بنانے کی تجویز دیتے ہوئے کہا گیا کہ پارٹی کی تنظیم کی حکومتی سطح پر شنوائی نہ ہونا بھی شکست کی وجہ ہے۔گزشتہ انتخابات کے قومی اور صوبائی اسمبلی کے امیدواران کی عدم دلچسپی کو بھی شکست کی اہم وجہ قرار دیتے ہوئے کہا گیا کہ 2018 کے انتخابات کے بعد امیدواران نے حلقے کا رخ نہیں کیا۔ رہنماؤں کی عدم دلچسپی کے باعث کارکنان تذبذب کا شکار رہے۔
دوبارہ گنتی کی درخواست دینے کا فیصلہ
علاوہ ازیں تحریک انصاف کے کم ووٹوں سے ہارنے والے امیدواروں نے دوبارہ گنتی کی درخواست دینے کا فیصلہ کیا ہے۔ تحریک انصاف نے 6 نشستیں معمولی ووٹوں سے ہارنے کا دعوی کیا ہے۔ صدر وسطی پنجاب اعجاز چوہدری نے بتایا ہے کہ کم ووٹوں والی نشستوں پر دوبارہ گنتی کی درخواست دے رہے ہیں۔
وارڈ نمبر دس لاہور کنٹونمنٹ سے امیدوار حافظ ابرار، وارڈ نمبر چار والٹن سے امیدوار چوہدری اسلم جٹ، وارڈ نمبر 8 سے ہمایوں رشید اور وارڈ نمبر پانچ والٹن سے میجر ریٹائرجاوید ضمیر نے دوبارہ گنتی کی درخواست دیدی ہے ۔ عرفان اکبر اور راجہ شہزاد بھی تھوڑے ووٹوں سے ہارے ہیں۔

کورونا کے باعث بند کیے گئے سکولوں کے بارے میں بڑا فیصلہ کیاگیاہے.
انسداد کورونا کے ادارے نیشنل کمانڈ اینڈ آپریشن سینٹر (این سی او سی) کی ہدایت پر وزیر تعلیم پنجاب نے صوبے کے اسکولوں کی بندش میں مزید تین روز کا اضافہ کر دیا۔وزیر تعلیم پنجاب مراد راس کے مطابق تمام سرکاری اور نجی اسکول 15 ستمبر تک بند رہیں گے۔انہوں نے بتایا کہ اسکولوں کی بندش کا فیصلہ کورونا کی صورتحال کو مدنظر رکھتے ہوئے کیا گیا ہے۔خیال رہے کہ اس سے قبل صوبے بھر کے اسکول 12 ستمبر تک بند رکھنے کا فیصلہ کیا گیا تھا تاہم اب اسکول 15 ستمبر تک بند ہوں گے۔اُدھر پنجاب کے ہائی رسک 15 اضلاع میں ٹرانسپورٹ سروس بھی 15 ستمبر تک بند رہے گی۔

اسلام آباد (میڈیا 92 نیوز آن لائن ) اسلام آباد ہائی کورٹ نے جج احتساب عدالت ارشد ملک کو برطرف کرنے کے بعد بڑا فیصلہ کر لیا ہے ، قائم مقام چیف جسٹس اسلام آباد ہائی کورٹ عامر فاروق نے جج ارشد ملک کی برطرفی کا خط وزارت قانون کو بھیجنے کے بعد ویڈیو کے متعلق جج ارشد ملک کا بیان حلفی اور جواب کو نوازشریف کی بریت کے کیس کا حصہ بنانے کا بھی حکم دے دیا ہے !

ترجمان اسلام آباد ہائیکورٹ کے مطابق قائم مقام چیف جسٹس، جسٹس عامر فاروق نے احتساب عدالت کے جج ارشد ملک کے خط کا جائزہ لینے کے بعد انہیں عہدے سے ہٹانے کا فیصلہ کیا ہے اور اس حوالے سے وزارت قانون و انصاف کو خط بھی لکھ دیا ہے۔

ترجمان نے بتایا کہ قائم مقام چیف جسٹس اسلام آباد ہائیکورٹ کے حکم پر جج ارشد ملک کا خط اور بیان حلفی نوازشریف کی بریت کی درخواست کے ریکارڈ کاحصہ بنا دیا گیا۔

اسلام آباد (اپنے رپورٹر سے ) قومی اسمبلی میں قائد حزب اختلاف شہباز شریف نے پبلک اکاونٹ کمیٹی(پی اے سی) کے سربراہی چھوڑنے کا اعلان کردیا ہے۔

ذرائع ابلاغ سے بات چیت کرتے ہوئے انہوں نے بتایا کہ رانا تنویر پی اے سی کے چئیرمین ہوں گے، میں نہیں۔

شہباز شریف کا کہنا تھا کہ دو ماہ پہلے پارٹی کا فیصلہ ہوا کہ رانا تنویر پی اے سی کے چئیر مین ہوں گے۔

خیال رہے کہ شہباز شریف کو دسمبر 2018 میں پبلک اکاونٹ کمیٹی کا سربراہ بنایا گیا تھا اور یہ عہدہ آئین کے تحت قائد حزب اختلاف کے پاس ہوتا ہے۔

مسلم لیگ (ن) کے سابقہ دور حکومت میں پی اے سی کے سربراہ سابق اپوزیشن لیڈر سید خورشید شاہ تھے اور پیپلزپارٹی کی دور میں چوہدری نثار علی خان اس کمیٹی کی سربراہی کر چکے ہیں۔

پاکستان تحریک انصاف کی حکومت نے شہباز شریف کو چیئرمین پی اے سی بنانے پر اعتراض اٹھاتے ہوئے کہا تھا کہ جس پر کرپشن کا الزام ہو وہ اس عہدے کے لیے اہل نہیں ہو سکتا۔

پی ٹی آئی نے کہا تھا کہ جس شخص پر مقدمات ہوں اس کو چئیرمین پی اے سی نہیں بنا سکتے، اپوزیشن میں کئی ایسے ارکان موجود ہیں جو اس عہدے کیلیے موزوں ہیں۔

حکومت اور اپوزیشن کے درمیان پی اے سی کی سربراہی پر شدید اختلافات پیدا ہوگئے تھے جس کے سبب دیگر کمیٹیوں کی تشکیل میں بھی تاخیر ہوئی۔