Tag تحریک انصاف

کراچی (ویب ڈیسک) بجلی کے بلوں میں 35 فیصد تک انکم ٹیکس کے نفاذ کے حوالے سے بلاول بھٹو کابیان سامنے آگیا.ان کاکہنا ہے کہ پانی سر سے اونچا ہوچکا، عمران خان نے مہنگائی کو عوام کا سب سے بڑا مسئلہ بنا دیا۔
انہوں نے مزید کہا ہے کہ قوم فیصلہ کر لے کہ مہنگائی سے نجات حاصل کرنے کے لیے تحریک انصاف کی حکومت کو گھر بھیجنا ہوگا.انہوں نےعوام کو پیغام دیا کہ مہنگائی کے خلاف اگر عوام کمر کس کر باہر نہ نکلی تو عمران خان کے حملے نہیں رکیں گے.انہوں نے کہا کہ بجلی کے دس ہزار روپے تک کے بلوں پر 5 اور 20 ہزار تک کے بلوں پر 10 فیصد انکم ٹیکس کے فیصلے کومسترد کرتے ہیں۔ بجلی کے 30 ہزار روپے تک کے بلوں پر 20 فیصد جبکہ 40 ہزار روپے تک کے بلوں پر 20 فیصد انکم ٹیکس کی وجہ سے مہنگائی کا ایک نیا طوفان آئے گا.

لاہور(ویب ڈیسک)ہرجماعت کی حکومت جب جب پاکستان میں‌قائم ہوتی ہے تو اس کے حامی پرامید ہوتے ہیں کہ وہ اپنی مدت پوری کرے گی اور وعدے بھی پورے کرے گی،اسی طرح‌ تحریک انصاف کی حکومت بارے بھی سروے کیاگیاہے جس میں 70 فیصد پاکستانیوں نے تحریک انصاف کی حکومت کے 5 سال مکمل ہونے کی بھرپور امید کا اظہار کردیا۔
گیلپ پاکستان نے عوام کی آراء پر مبنی نیا سروے جاری کردیا جس کے مطابق 69 فیصد افراد کورونا کی وبا کے خلاف حکومتی کارکردگی اور 58 فیصد خارجہ پالیسی پرحکومتی کوششوں سے بھی مطمئن نظر آئے۔
سروے کے مطابق معاشی محاذ پر 45 فیصد نے حکومتی کوششوں سے مطمئن تو 44 فیصد نے غیرمطمئن ہونے کا کہا جب کہ کرپشن کے خاتمے میں 48 فیصد نے حکومت کو کامیاب تو 40 فیصد نے ناکام قرار دیا۔
سروے کے مطابق وزیراعظم عمران خان کی 3 سال حکومتی کارکردگی سے بھی 48 فیصد پاکستانی خوش تو 45 فیصد ناراض نظر آئے۔

لاہور(ویب ڈیسک) پنجاب میں نئے بلدیاتی نظام کے حوالے سے تحریک انصاف اور مسلم لیگ ق کی قیادت کی اعلی سطحی مشاورت ہوئی۔ دونوں جماعتوں نے صوبہ میں متوازن بلدیاتی نظام لانے پر اتفاق کیا۔
پنجاب میں نیا بلدیاتی نظام لانے کے معاملے پر پاکستان تحریک انصاف (پی ٹی آئی) اورمسلم لیگ ق کی قیادت میں اعلی سطحی مشاورت ہوئی۔ ویڈیو لنک پر ہونے والے اجلاس میں نئے بلدیاتی نظام پر تبادلہ خیال کیا گیا۔پی ٹی آئی سے وفاقی وزرا ء شاہ محمود قریشی ، اسد عمر، غلام سرور،پنجاب کے وزرا ء میاں محمود الرشید، راجہ بشارت ، میاں اسلم اقبال اور ہاشم جواں بخت نے شرکت کی۔
پاکستان مسلم لیگ ق کی جانب سے وفاقی وزرا ء طارق بشیر چیمہ اور مونس الہی نے اجلاس میں شرکت کی ۔۔دونوں حکمران جماعتوں نے پنجاب میں متوازن بلدیاتی نظام لانے پر اتفاق کیا۔پی ٹی آئی اور مسلم لیگ ق کے درمیان میئر کا انتخاب براہ راست کرانے پر اتفاق ہو گیا، اجلاس میں ضلع ناظم کا سیٹ اپ لانے پر بھی مشاورت کی گئی ۔ تحصیل اور ضلع کی سطح پر اختیارات کی تقسیم کی تجاویز پر غور کیا گیا۔
اجلاس میں طے تجاویز کی حتمی منظوری آئندہ ہفتے وزیر اعظم عمران خان سے لینے کا فیصلہ کیا گیا۔ اتحادی قیادت نے پنجاب میں جلد بلدیاتی انتخابات کروانے پر بھی اتفاق کیا۔اجلاس میں فیصلہ کیا گیا کہ تحریک انصاف اور مسلم لیگ ق ملکر پنجاب اسمبلی سے نیا قانون پاس کروائے گی۔

اسلام آباد(ویب ڈیسک) مسلم لیگ (ن) کی نائب صدر مریم نواز اب دبنگ بیانات کی وجہ سے خاصی مشہورہیں اور وہ مسلم لیگ نون کو اپنے والد کے بعدسرگرم رکھنے میں‌بھی اپنا ایک الگ مقام رکھتی ہیں،انہوں نے کہا ہے کہ مفاہمت تو دور حکومت سے بات بھی نہیں کی جانی چاہیے۔

اسلام آباد ہائی کورٹ کے باہر میڈیا سے بات کرتے ہوئے مریم نواز نے کہا کہ عوام پر ناجائز اور نااہل حکومت کو مسلط کیا گیا ہے، ملکی تاریخ میں اتنی نااہل حکومت کبھی نہیں آئی، حکومت کی کارکردگی نہیں تباہی کی بڑی داستان ہے، ملک میں لاقانونیت ہے، جگہ جگہ خواتین سے زیادتی کے واقعات ہورہے ہیں، کسی نے ملک میں تین سال کے دوران کسی چیز کے سستا ہونے کی کوئی خبرسنی، حکومت نے جو حال عوام کا کردیا ہے، اس سے مفاہمت کیسے ہوسکتی ہے، چاہتے ہیں کہ اس حکومت سے عوام کی جلد جان چھوٹے۔
مریم نواز نے کہا کہ مفاہمت تو دور حکومت سے بات بھی نہیں کی جانی چاہیے، ملک میں ظلم کی حکومت ہے، اس ناجائز اور مسلط حکومت کا احتساب نہیں انتقام ہے، اس حکومت کے انتقام کے آگے پیش ہونا کوئی عقلمندی نہیں، نواز شریف پر جو قرض تھا وہ اس سے زیادہ بھگت کر گئے ہیں، انہوں نے 3 سال سیاسی انتقام اور سزائیں بھگتی ہیں, اگر مگر کرنے والوں کو کہوں گی کہ نواز شریف ملک واپس آئیں گے، جب (ن) لیگ کو لگے گا کہ نواز شریف کو واپس آنا چاہیے تو وہ آجائیں گے اور پارٹی کی قیادت کریں گے۔
قومی حکومت سے متعلق شہباز شریف کے بیان کے حوالے سے مریم نواز نے کہا کہ شہبازشریف نے قومی حکومت کی نہیں قومی مفاہمت کی بات کی ہے، باقی سیاسی پارٹیوں کو سوچنا چاہئے کہ ملک کو کیسے آگے لے کر جانا ہے۔ تمام پارٹیوں کو حکومت کے خلاف متحد ہونے کی ضرورت ہے۔اپنے بیٹے جنید صفدر کی شادی سے متعلق مریم نواز نے کہا کہ میرا ایک ہی بیٹا ہے جس کے نکاح کے لئے باہرجانے کی حکومت سے اجازت نہیں مانگی۔

لاہور(ویب ڈیسک)ترجمان پنجاب حکومت فیاض الحسن چوہان نے کہاہے کہ چیئرمین پیپلز پارٹی بلاول بھٹو زرداری کچی عمر میں ہی اپنے والد آصف علی زرداری سے منفی سیاست کے سارے گُر سیکھ گئے ہیں۔بلاول بھٹو زرداری کے گزشتہ روز بیان پر رعمل دیتے ہوئے فیاض چوہان کا کہنا تھا کہ وزیراعلیٰ پنجاب نے اپنی پرفارمنس سے تمام وزرائے اعلیٰ کو مات دے دی ہے۔

فیاض الحسن چوہان کا کہنا تھا کہ موروثی سیاست کی پیداوار بلاول عثمان بزدار کو کٹھ پتلی کہنے سے پہلے اپنےگریبان میں جھانکیں، پنجاب صحت انصاف کارڈ اور یونیورسٹیاں بنا کر عوام کی خدمت کر رہا ہے جبکہ سندھ نے صاف پانی اور صحت کی مناسب سہولتیں بھی عوام سے چھین لی ہیں۔

ترجمان پنجاب حکومت نے کہاکہ پنجاب نے کورونا کو مات دیدی ہے لیکن سندھ کورونا کے سب سے زیادہ کیسز پیدا کرتا رہا، آصف علی زرداری کی کٹھ پتلی سندھ کابینہ اور رشتہ دار وزیر ہر محاذ پر فیل ہیں۔فیاض الحسن چوہان کا کہنا تھا کہ وزیر اعلیٰ عثمان بزدار آئے روز پرفارمنس کے نئے سنگ میل عبور کر رہے ہیں۔

اسلام آباد (ایمرا نیوز آن لائن) پاکستان کی قوم پر سابق چیف جسٹس ثاقب نثار اور موجودہ تحریک انصاف کی حکومت کا جو مشترکہ ظلم ہے وہ پاکستان کڈنی اینڈ لیور انسٹیٹیوٹ (PKLI) کو تباہ و برباد کرنا ہے۔ ایک ایسا اسپتال جس نے پاکستان میں گردوں اور جگر کی بیماریوں کے علاج اور ٹرانسپلانٹ کے لیے دنیا کی بہترین سہولتیں مہیا کرنا تھیں اور جہاں غریبوں کا علاج بشمول ٹرانسپلانٹ (جو انتہائی مہنگا علاج ہے) بالکل مفت اور بین الاقوامی معیار کے مطابق ہونا تھا، اُسے پہلے سابق چیف جسٹس ثاقب نثار اور اس کے بعد موجودہ تحریک انصاف کی حکومت نے اپنی اَنا کی بھینٹ چڑھا دیا۔

دی نیوز کے فخر درانی کی خبر کے مطابق جب سے حکومت پنجاب نے اس ادارے کا انتظام سنبھالا ہے، لیور ٹرانسپلانٹ (جگر کی پیوند کاری) کا عمل بند ہو چکا ہے۔ مارچ 2019ء سے ایک بھی لیور ٹرانسپلانٹ نہیں ہوا، صرف تین پیوند کاریاں ہوئیں، وہ بھی گزشتہ انتظامیہ کے تحت۔ اس کے علاوہ پاکستان کڈنی اینڈ لیور انسٹیٹیوٹ کا اوّلین ٹارگٹ رواں سال 200کڈنی ٹرانسپلانٹ (گردے کی پیوندکاری) تھا تاہم اب تک اس ہدف کا 25فیصد ہی حاصل ہو سکا ہے اور 50مریض ہی اس عمل سے گزرے، یعنی عملی طور پر جگر کی پیوندکاری کا کام بند ہو چکا جبکہ گردے کی پیوندکاری کا کام کافی متاثر ہوا ہے۔

اسپتال کو فنڈز کی بھی شدید کمی کا سامنا ہے اور یوں قوم کے اربوں روپے سے شروع کیا گیا ایک شاندار پروجیکٹ صرف اس لیے تباہ کر دیا گیا ہے کیونکہ ثاقب نثار کا بھائی اس کا مخالف تھا اور یہ بھی کہ شہباز شریف کا نام اس اسپتال کے ساتھ جڑا تھا۔شوکت خانم کو اپنے لیے جائز طور پر ایک اعزاز اور فخر سمجھنے والے عمران خان کی حکومت سے یہ توقع نہ تھی کہ وہ PKLIکو صرف سیاسی مخالفت کی بنیاد پر تباہ و برباد کر دیں گے۔

محترم پروفیسر ڈاکٹر سعید جنہوں نے یہ پروجیکٹ حکومت پنجاب کی مدد سے شروع کیا، تقریباً 25انتہائی ماہر اور کامیاب ڈاکٹرز اور سرجنز کو امریکہ، برطانیہ اور دیگر ممالک سے واپس اپنے ملک لانے میں کامیاب ہوئے تاکہ PKLIکے خواب کو شرمندۂ تعبیر کیا جا سکے۔ڈاکٹر سعید سمیت بیرونِ ملک سے آنے والے ڈاکٹرز جو اپنا پُرتعیش طرزِ زندگی اور مراعات چھوڑ کر وطن کی خدمت کا جذبہ لے کر واپس آئے، اُن کے خواب کو ثاقب نثار اور موجودہ حکومت نے چکنا چور کر دیا اور اب ان ماہرین کی بڑی اکثریت پی کے ایل آئی چھوڑ کر جا چکی ہے جبکہ باقی بھی کوچ کا سوچ رہے ہیں۔

خبر کے مطابق 25دسمبر 2017ء کو اپنے قیام کے بعد سے انسٹیٹیوٹ میں مارچ 2019ء تک 303423مریضوں کا علاج ہوا۔ اس کے تحت ہیپاٹائٹس پریوینشن اینڈ ٹریٹمنٹ پروگرام (ایچ پی ٹی پی) کے ذریعہ 279940مریض رجسٹر ہوئے، چار لاکھ افراد کو آگاہی دی گئی۔ پنجاب کے 23اضلاع میں ایچ پی ٹی پی کلینکس قائم کئے گئے جہاں 15ماہ میں مجموعی طور پر 914872 مریضوں کی اسکریننگ ہوئی۔ اب ان کلینکس کو بند کر کے پنجاب ہیپاٹائٹس پروگرام میں ضم کر دیا گیا ہے۔

پی کے ایل آئی کا یہ ہدف تھا کہ نہ صرف 2030ء تک ہیپاٹائٹس بی اور سی کا پاکستان سے خاتمہ کر دیا جائے گا بلکہ پاکستان میں جگر اور گردوں کے امراض بشمول ٹرانسپلانٹ کا ملک کے اندر مکمل انتظام فراہم کیا جائے گا اور سب سے اہم یہ کہ غریب مریضوں کا علاج مفت کیا جائے گا۔ یہاں تو امیر جگر کے علاج کے لیے 60، 70 ستر لاکھ خرچ کر کے بھارت یا چین سے علاج کرواتے رہے جبکہ غریب کے لیے تو کوئی امید ہی نہ تھی۔ ہر سال پاکستانی اربوں روپیہ خرچ کر کے بیرونِ ملک سے پیوند کاری کرواتے ہیں۔

یہاں ڈاکٹرز کا ایک مافیا ہے جس نے اپنی غیر قانونی کمائی اور ذاتی مفاد کے لیے PKLIجیسے خواب کو پاکستانی قوم سے چھینا۔ PKLIایک بہت بڑی اور مثبت امید بن کر ابھرا لیکن مافیا اور سیاسی رقابت نے پاکستانی قوم سے یہ خواب چھین لیا جو قوم پر بہت بڑا ظلم ہے۔

کراچی (میڈیا 92 نیوز آن لائن ) قومی اسمبلی کے حلقہ این اے 205 میں ہونے والے ضمنی انتخاب میں پاکستان پیپلز پارٹی (پی پی پی) کے امیدوار نے کامیابی حاصل کرکے پاکستان تحریک انصاف (پی ٹی آئی) سے یہ نشست چھین لی ہے۔

این اے 205 (گھوٹکی-ٹو) سے منتخب ہونے والے رکن قومی اسمبلی علی محمد مہر کے انتقال کے بعد یہ نشست خالی ہوئی تھی۔غیر حتمی اور غیر سرکاری نتائج کے مطابق پیپلز پارٹی کے امیدوار سردار محمد بخش مہر نے 89 ہزار 359 ووٹ حاصل کیے جبکہ آزاد امیدوار احمد علی مہر 70 ہزار 848 ووٹ حاصل کرنے میں کامیاب رہے۔

ضمنی انتخاب میں احمد علی مہر نے آزاد حیثیت سے حصہ لیا تھا۔ جس میں انہیں وفاق میں برسر اقتدار تحریک انصاف اور سندھ کی کئی جماعتوں کے اتحاد گرینڈ ڈیموکریٹک الائنس (جی ڈی اے) کی حمایت حاصل تھی۔

احمد علی مہر، علی محمد خان مہر کے بیٹے ہیں۔ جو اس سے قبل اسی نشست سے رکن قومی اسمبلی تھے۔

اس نشست پر مجموعی طور پر نو امیدوار میدان میں تھے۔ جن میں سے صرف محمد بخش مہر ہی پارٹی ٹکٹ پر ضمنی انتخاب میں حصّہ لے رہے تھے۔ باقی 8 امیدواروں نے آزاد حیثیت سے ہی انتخاب میں حصہ لیا۔

غیر حتمی اور غیر سرکاری نتائج کے مطابق ڈالے گئے ووٹوں کی شرح 48 فیصد سے زائد رہی۔

سیاسی تجزیہ کار پیپلز پارٹی کے لیے اس نشست سے کامیابی انتہائی اہم قرار دے رہے تھے۔ پیپلز پارٹی کی صوبائی حکومت نے اہم رہنما اور سکھر سے رکن سندھ اسمبلی ناصر شاہ سے وزرات سے استعفی لے کر حلقے میں انتخابی مہم کے لیے بھیجا تھا۔

پیپلز پارٹی کی نشستوں کی تعداد 55 ہو گئی

این اے 205 پر کامیابی کے بعد پیپلز پارٹی کی قومی اسمبلی میں نشستوں کی تعداد بڑھ کر 55 جبکہ تحریک انصاف کی 155 ہو گئی ہے۔

جولائی 2018 کے عام انتخابات میں اس نشست پر سردار علی محمد خان مہر آزاد حیثیت سے کامیاب ہونے کے بعد تحریک انصاف میں شامل ہوگئے تھے۔ وزیر اعظم عمران خان کی کابینہ میں وفاقی وزیر برائے نارکوٹکس کنٹرول رہے۔

علی محمد خان مہر ہی 2013 میں بھی اس نشست کامیاب ہوئے تھے لیکن اس وقت وہ پیپلز پارٹی کے ٹکٹ پر ایوان میں پہنچے تھے۔اس نشست پر کامیاب ہونے والے سردار محمد بخش خان مہر اس وقت قبیلے کے سربراہ بھی ہیں۔ وہ اس سے پہلے وزیر اعلیٰ سندھ کے مشیر برائے کھیل تھے۔ انہوں نے مستعفی ہو کر قومی اسمبلی کا انتخاب لڑا ہے۔

نو منتخب رکن اسمبلی سردار محمد بخش خان مہر کے والد غلام محمد خان مہر بھی محمد خان جونیجو کی حکومت میں وفاقی وزیر اور کئی بار رکن قومی اسمبلی منتخب رہ چکے ہیں۔ ان کی وفات کے بعد ان کے بیٹے سردار محمد بخش مہر قبیلے کے سردار مقرر ہوئے تھے۔

اہم امیدوار آپس میں رشتے دار

یہ نشست تحریک انصاف کے سابق وفاقی وزیرعلی محمد خان مہر کی وفات پر خالی ہوئی تھی۔ جس پر مہر قبیلے سے تعلق رکھنے والے ماموں اور بھانجے کے درمیان مقابلہ تھا۔نسبتاً قبائلی علاقے پر مشتمل حلقے میں تین لاکھ 60 ہزار 875 رجسٹرڈ ووٹرز تھے۔ جن میں سے مرد ووٹرز کی تعداد دو لاکھ چار ہزار 891 جبکہ خواتین ووٹرز کی تعداد ایک لاکھ 55 ہزار 935 تھی۔

انتخاب کے لیے حلقے میں 290 پولنگ اسٹیشنز قائم کیے گئے جبکہ تمام پولنگ اسٹیشنز کے اندر اور باہر امن و امان کے خدشات کے پیش نظر سیکیورٹی اہلکار تعینات تھے۔

ضمنی انتخاب میں کامیابی کے بعد پاکستان پیپلز پارٹی کے چئیرمین بلاول بھٹو زرداری اور وزیر اعلٰی سندھ مراد علی شاہ سمیت پارٹی کے دیگر رہنما عادل پور پہنچے اور کامیاب ہونے والے امیدوار محمد بخش مہر کو اس کامیابی پر مبارکباد دی۔

لاہور (میڈیا 92 نیوز آن لائن) گیلپ پاکستان کی جانب سے کرائے جانے والے حالیہ سروے میں اگرچہ اکثر پاکستانیوں نے حکومت کی کارکردگی پر عدم اطمینان کا اظہار کیا ہے لیکن پھر بھی اکثر لوگ تحریک انصاف کو ہی ووٹ دینا چاہتے ہیں۔

گیلپ کی جانب سے جون کے مہینے میں کرائے جانے والے سروے میں لوگوں سے یہ سوال پوچھا گیا کہ ’آئندہ جب کبھی انتخابات ہوں تو آپ کس پارٹی کے نمائندے کو ووٹ دیں گے۔‘ اس سوال کے جواب میں حکمران جماعت تحریک انصاف سب سے بڑی جماعت بن کر سامنے آئی اور اس کیلئے 31 فیصد لوگوں نے پسندیدگی کا اظہار کیا۔

یہاں یہ وضاحت بھی ضروری ہے کہ گیلپ کے عام انتخابات 2018 سے قبل کرائے گئے سروے میں 32 فیصد لوگوں نے پی ٹی آئی کیلئے پسندیدگی کا اظہار کیا تھا۔

سروے میں دوسرے نمبر پر مسلم لیگ ن رہی جسے 28 فیصد لوگوں نے ووٹ دینے کے عزم کا اظہار کیا۔ ن لیگ کیلئے عوام کی پسندیدگی میں اضافہ ہوا ہے کیونکہ الیکشن 2018 سے قبل صرف 24 فیصد لوگ ہی اسے ووٹ کرنا چاہتے تھے لیکن اب اس کے ووٹ بینک میں 4 فیصد اضافہ ہوگیا ہے۔

گیلپ سروے میں پیپلز پارٹی کو 15 فیصد ، آزاد امیدواروں کو 6 فیصد ، متحدہ مجلس عمل کو 5 فیصد اور دیگر سیاسی جماعتوں کو 15 فیصد لوگوں نے ووٹ دینے کا کہا۔

اسلام آباد (میڈیا 92 نیوز آن لائن) مسلم لیگ ن کے رہنما جاوید لطیف نے کہاہے کہ عمر ان خان نے بنی گالا کے بارے میں کتنی بارے موقف بدلا ہے ؟لیکن وہ صادق اورامین ٹھہرے لیکن ہم اس لئے صادق امین نہیں ٹھہر ے کے ہم نے عدالتوں کا احترام کیا ۔

جیونیوز کے پروگرام ”آپس کی بات“میں گفتگو کرتے ہوئے جاوید لطیف نے کہا کہ ایک بیانیہ تحریک انصاف کاہے جو انتقام ہے جو یہ پچھلے ایک سال سے لے رہے ہیں۔ان عدالتوں نے ایک فیصلہ ذوالفقار علی بھٹو کے خلاف دیا تھا اور ایک فیصلہ طیارہ کیس میں نواز شریف کے خلاف دیا تھا اور ایک فیصلہ اب سنایا گیاہے جس کے نتیجے میں نواز شریف جیل میں ہیں۔

ا س فیصلے کی ویڈیو آگئی ہے ، کیاملک وقوم کے لئے کام کرنے والے لوگ ہی اپنی گردنیں پیش کرتے رہیں ؟جاوید لطیف نے کہا کہ عمران خان نے بنی گالا کے بارے میں کتنی بارے موقف بدلا ہے لیکن وہ صادق اورامین ٹھہرے لیکن ہم اس لئے صادق امین نہیں ٹھہر ے کے ہم نے عدالتوں کا احترام کیا ۔

نئے مالی سال کے آغاز کے موقع پر گاڑی مالکان کو ود ہولڈنگ ٹیکسز کی مد میں 600 فیصد تک اضافے کا بڑا دھچکا لگا ہے۔

محکمہ ایکسائز اینڈ ٹیکسیشن سندھ سے حاصل اعداد و شمار کے مطابق نئے مالی سال سے گاڑیوں کی رجسٹریشن کی فیسوں میں تبدیلیوں کا اطلاق ہو گیا ہے جب کہ وفاقی حکومت نے گاڑیوں کی رجسٹریشن سے قبل ود ہولڈنگ ٹیکس کی نئی شرح کا بھی اطلاق کر دیا ہے۔

نئے قوانین کے مطابق 850 سی سی انجن تک کی گاڑیوں پر ود ہولڈنگ ٹیکس جو پہلے فائلرز کے لیے ساڑھے 7 ہزار اور نان فائلرز کے لیے 10 ہزار تھا اب اسے بڑھا کر فی سیٹ ساڑھے 7 اور 10 ہزار کر دیا گیا ہے یعنی گاڑی میں چار افراد کے بیٹھنے کی گنجائش ہے تو رقم کو چار سے ضرب دے دیں۔

ایک ہزار سے 1300 سی سی تک کی گاڑیوں پر فائلرز کے لیے 25 ہزار جب کہ نان فائلرز کے لیے ٹیکس کی شرح 40 ہزار فی سیٹ ہو گی یعنی ایک ہزار سے 1300 سی سی گاڑی پر ود ہولڈنگ ٹیکس کی مد میں فائلرز کو ایک لاکھ روپے جب کہ نان فائلر کو ایک لاکھ 60 ہزار روپے اضافی دینا ہوں گے۔

اسی طرح 1301 سے 1600 سی سی تک کی گاڑیوں پر فائلر کو 50 ہزار روپے فی سیٹ جب کہ نان فائلرز کو ایک لاکھ روپے فی سیٹ اضافی دینا ہوں گے۔

اعدادو شمار کے مطابق 1601 سے 1800 سی سی تک کی گاڑیوں پر ود ہولڈنگ ٹیکس کی مد میں فائلرز کو 75 ہزار جب کہ نان فائلرز کو ڈیڑھ لاکھ روپے فی سیٹ دینا ہوں گے۔

محکمہ ایکسائز کے مطابق 1801 سے 2000 سی سی تک کی گاڑیوں پر فائلرز کو ایک لاکھ اور نان فائلرز کو 2 لاکھ روپے فی سیٹ ود ہولڈنگ ٹیکس دینا ہو گا۔

2001 سے 2500 سی سی تک کی گاڑیوں پر فائلرز کو ڈیڑھ لاکھ اور نان فائلرز کو 3 لاکھ روپے اضافی ٹیکس دینا ہو گا۔

2501 سے 3000 سی سی تک کی گاڑیوں پر فائلرز کو 2 لاکھ جب کہ نان فائلرز کو 4 لاکھ روپے فی سیٹ ٹیکس دینا ہو گا۔

تین ہزار سی سی سے زائد کی گاڑیوں پر فائلرز کو ڈھائی لاکھ اور نان فائلرز کو ساڑھے 4 لاکھ روپے فی سیٹ ٹیکس دینا ہو گا۔

یہی نہیں پانچ سال سے کم عرصے میں گاڑی کی ملکیت ٹرانسفر کروانے کے لیے چار سیٹیوں والی کار پر 851 سے ہزار سی سی کی گاڑیوں کے مالکان اگر فائلر ہیں تو انہیں 20 ہزار اور نان فائلرز کو 60 ہزار ود ہولڈنگ ٹیکس دینا ہو گا۔

ایک ہزار سے 1300 سی سی کی کار کے ٹرانسفر پر فائلرز کو 30 ہزار جب کہ نان فائلرز کو ایک لاکھ روپے اضافی دینا ہوں گے۔

1300سے 1600 سی سی کی گاڑیوں کی ٹرانسفر پر فائلرز کو 12 ہزار 500 فی سیٹ اور نان فائلرز کو 65 ہزار روپے فی سیٹ ود ہولڈنگ ٹیکس ادا کرنا ہو گا۔

1600 سے 1800 سی سی گاڑیوں کی ٹرانسفر پر فائلرز کو 18 ہزار 750 روپے فی سیٹ جب کہ نان فائلرز کو ایک لاکھ روپے فی سیٹ دینا پڑیں گے۔

اگر گاڑی 2501 سے 3000 ہزار سی سی کی ہے تو ٹرانسفر کے وقت فائلرز کو 50 ہزار روپے فی سیٹ اور نان فائلرز کو 2 لاکھ 70 ہزار روپے فی سیٹ دینا ہوں گے۔

3000 ہزار سی سی سے زائد گاڑیوں کی ٹرانسفر کے وقت نان فائلرز کو 62 ہزار 500 فی سیٹ جبکہ نان فائلرز کو 3 لاکھ روپے فی سیٹ اضافی دینا ہوں گے۔

یہ بات بھی اہم ہے کہ سندھ کے محکمہ ایکسائز اینڈ ٹیکسیشن کی فیسیں اس کے علاوہ ہیں، یہ ٹیکسز تو وفاقی حکومت کے خزانے میں جمع کرائے جائیں گے۔

وزیر ایکسائز اینڈ ٹیکسیشن سندھ مکیش کمار چاولہ کہتے ہیں کہ ٹیکسوں کے اس بوجھ سے نہ صرف اوپن لیٹر پر اور غیر رجسٹرڈ گاڑیوں کے استعمال کو فروغ ملے گا بلکہ اسمگل شدہ گاڑیوں کا استعمال بھی بڑھے گا۔