Tag لاہور

لاہور(ویب ‌ڈیسک) کینال ہاؤسنگ سوسائٹی میں طالب علم کو سوشل میڈیا پر اسلحے کی ویڈیو اپ لوڈ کرنا مہنگا پڑگیا۔
حسین آصف نے کالج کے کلاس روم میں بیگ سے پستول نکل کر ویڈیوز اسنیپ چیٹ پر اپ لوڈ کر دی تھی۔ویڈیو اپ لوڈ ہوتے ہی امریکن انتظامیہ نے انٹرپول کے ذریعے رابطہ کیا کہ یہ لڑکا کالج میں فائرنگ اور طالب علموں کو قتل کرسکتا ہے اور جانی نقصان کا خطرہ ہے۔ انٹرپول سے پاکستان ایمرجنسی کال آئی کہ معاملے پر فوری کارروائی کی جائے۔
ڈی جی ایف آئی اے کی ہدایت پر سائبر ونگ نے فوری کارروائی کرتے ہوئے کینال ہاؤسنگ سوسائٹی سے حسین آصف کو گرفتار کر لیا جو ایک نجی کالج کا اسٹوڈنٹ ہے۔ ایف آئی اے سائبر ونگ کے مطابق ملزم سے برآمد پستول نقلی نکلا۔ایف آئی اے سائبر ونگ کے ڈائریکٹر بابر بخت قریشی نے رپورٹ ڈی جی کو بھجوا دی کہ پستول اصلی نہیں بلکہ کھلونا تھا۔ ڈی جی ایف آئی اے نے رپورٹ انٹر پول کے ذریعے امریکن انتظامیہ کو بھجوا دی۔

لاہور(ویب ڈیسک)میڈیارپورٹس کے مطابق لاہور کے علاقے شیراکوٹ کی رہائشی خاتون نے طلاق دینے پر شوہر پر تیزاب پھینک دیا، پولیس نے کارروائی کرتے ہوئے ملزمہ کو گرفتار کرلیا۔ ملزمہ صدف کو سابق شوہر ساجد خان نے 3 سال پہلے طلاق دے دی تھی اور ایک ہفتہ قبل ہی دوسری شادی کی۔
دوسری شادی کے رنج میں ملزمہ نے بھکارن کا بھیس بدل کر گلی میں ساجد خان پر تیزاب پھینکا، جس کے نتیجے میں مدعی مقدمہ ساجد خان کی گردن، کان اور کمر کا حصہ متاثر ہوا۔
ایس ایچ او شیراکوٹ عظیم انور گہلن نے کارروائی کرکے ملزمہ کو گرفتار کر لیا۔ ایس پی اقبال ٹاؤن ڈاکٹر رضا تنویر نے ایس ایچ او شیراکوٹ عظیم انور گہلن اور پولیس ٹیم کو شاباش دی۔
پولیس کے مطابق خاتون نے اپنے بیان میں کہا ہے کہ تین سال پہلے ساجد سے شادی ہوئی، پھر اس نے طلاق دی، پھر میرا حلالہ کروایا جس کے بعد خود دوسری شادی کررہا ہے اور مجھ سے شادی نہیں کی، جس پر مجھے غصہ آیا اور میں نے یہ کام کیا، میری ڈھائی سال کی چھوٹی سی بچی بھی ہے۔

لاہور(ویب ڈیسک) گندم کی قیمت 2360 روپے من، راولپنڈی میں 2400 روپے، سندھ میں2410 روپے اور پختونخوا میں گندم کی قیمت 2365 روپے تک جا پہنچی۔
پنجاب میں آبادی کی بنیاد پر بعض شہروں میں کم مقدار میں گندم کوٹہ کی فراہمی سمیت ڈیڑھ سو کے لگ بھگ غیر فعال فلور ملز کو سرکاری گندم کوٹہ کی عدم فراہمی کے نتیجے میں بچنے والی سرکاری گندم فعال فلور ملز کو نہ دینے کی وجہ سے مارکیٹ کی طلب کے مطابق آٹا کی فراہمی میں ملز کو شدید مشکلات کا سامنا ہے۔
محکمہ خوراک اور ضلعی انتظامیہ نے مارکیٹ میں سرکاری گندم سے تیار آٹا کی مقررہ مقدار میں سپلائی اور سرکاری نرخوں پر فروخت کو یقینی بنانے کیلیے سخت اقدامات شروع کر دیئے۔سرکاری گندم سے تیار آٹے کی سبز تھیلوں میں پیکنگ کی تجویز پر غور کیا جارہا ہے جبکہ تمام مل مالکان کو یہ ہدایت بھی کی گئی کہ وہ اپنے آٹا تھیلوں پر سرکاری قیمت 1100 روپے نمایاں انداز میں پرنٹ کروائیں۔مزید برآں 29 ستمبر کو 6 لاکھ40 ہزار ٹن گندم کی امپورٹ کیلیے کھولے گئے ٹینڈرز میں پیش کی گئی سب سے کم قیمت 377 ڈالر فی ٹن پر مختلف کمپنیوں نے 5 لاکھ50 ہزار ٹن گندم فراہم کرنے پر رضامندی ظاہر کردی۔

لاہور(ویب ڈیسک) ہائیکورٹ نے کالعدم تحریک لبیک کے سربراہ حافظ سعد رضوی کی دوبارہ نظر بندی کالعدم قرار دیتے ہوئے رہا کرنے کا حکم دے دیا۔

میڈیارپورٹس کے مطابق لاہور ہائیکورٹ کے جسٹس طارق سلیم شیخ نے سعد رضوی کے چچا امیر حسین کی درخواست پر سماعت کی، درخواست میں وفاقی و صوبائی حکومت.چیف سیکرٹری. ہوم سیکرٹری پنجاب.ائی جی پنجاب پولیس. ڈی سی لاہور اور سی سی پی او کو فریق بنایا گیا، اسپیشل سیکرٹری ہوم عدالت کے روبرو پیش ہوئے۔

درخواست گزار کے وکیل نے مؤقف پیش کیا کہ سعد رضوی کو نظر بندی کے بعد 14 مختلف مقدمات میں ملوث کیا گیا، لاہور ہائیکورٹ کے ریویو بورڈ نے بھی نظر بندی میں توسیع کرنے سے انکار کر دیا تھا، درخواست گزار کی جماعت مکمل مذہبی جماعت ہے جس کا ملکی سیاست سے کوئی تعلق نہیں، جب کہ حکومت نے سیاسی بنیادوں پر درجنوں رہنماؤں کو گرفتار کیا اور نقص امن عامہ کے تحت نظر بند کر دیا۔
وکیل نے کہا کہ 3 ماہ نظر بندی کے بعد درخواست گزار کو لاہور ہائی کورٹ کے ریویو بورڈ کے سامنے پیش کیا گیا، لیکن ریویو بورڈ نے نظر بندی میں توسیع نہ کی، اب دوبارہ غیر قانونی طور پر سعد رضوی کو دہشت گردی ایکٹ کی دفعہ 11 ٹرپل ای کے تحت نظر بند کر دیا گیا ہے، جس کی کوئی قانونی حیثیت نہیں ہے، عدالت سے استدعا ہے کہ سعد رضوی کی نظر بندی کالعدم قرار دے،اور حکومت کو سعد رضوی کو کسی دوسرے کیس میں گرفتار کرنے سے روکے۔ عدالت نے فریقین کے وکلا کے دلائل سننے کے بعد تحریک لبیک پاکستان کے سربراہ سعد رضوی کی نظر بندی کالعدم قرار دے دی۔

لاہور(ویب ڈیسک) تھانہ فیکٹری ایریا پولیس نے خواتین کو جنسی ہراساں کرنے والا جعلی پیر اصغر قریشی گرفتار کرلیا۔
میڈیارپورٹس کے مطابق لاہور کے علاقے تھانہ فیکٹری ایریا میں خواتین کو جنسی ہراساں کرنے والا جعلی پیر گرفتار کرلیا گیا، جعلی پیر کو تھانہ فیکٹری ایریا پولیس نے گرفتار کیا۔ ملزم کی شناخت اصغر قریشی کے نام سے ہوئی ہے۔ایس پی کینٹ عیسیٰ سیکھیرا کا کہنا تھا کہ ملزم اصغر قریشی تعویذ دینے کے بہانے خاتون کے گھر گیا اور خاتوں کو جنسی ہراساں کرنے کی کوشش کی، خاتون کی جانب سے درخواست موصول ہونے پر پولیس نے فورا کارروائی کرتے ہوئے جعلی پیر کو گرفتار کرلیا اور اس کے خلاف مقدمہ درج کر لیا گیا ہے۔

لاہور(ویب ڈیسک)مسلم لیگ ن کی نائب صدر مریم نواز کا کہنا ہےکہ نواز شریف کا وژن تھا سی پیک بناؤ ، سرمایہ کاری لاؤ ، آج عمران خان کا کوئی بیان اٹھالیں وہ بھیک مانگتا نظر آئےگا۔

لاہور میں تقریب سے خطاب کرتے ہوئے مریم نواز کا کہنا تھا کہ منتخب وزیراعظم کہتا تھا ہمیں سرمایہ کاری دو، بھیک نہیں چاہیے، اب عمران خان دنیا کو کہتا ہےکورونا آیا ہے ، پاکستان کی مدد کرو ، معاشی بحران آتا ہے تو دنیا سے ایک ارب اور 50 کروڑ ڈالر مانگتا ہے۔
مریم نواز کا کہنا تھا کہ عوام کو کہا جاتا تھا ووٹ دینا آپ کا حق نہیں، بھیک کے طور پر دیا جاتا ہے، نوازشریف کے بیانیے کی پہلے ہی جیت ہوچکی ہے، قوم کو شعور دلانا لیڈر کے بیانیےکی جیت ہوتی ہے، نواز شریف نےقوم کوبتادیا عوام کےحقوق کیا ہیں، ان کو غصب کون کرتا ہے۔
ان کا کہنا تھا کہ یہ ہمیں ہماری قیادت سے علیحدہ نہیں کرسکتے، جماعت کو نہیں توڑ سکتے،کہاجاتا ہے مسلم لیگ ن میں مفاہمت اور مزاحمت میں بڑی کنفیوژن ہے، یہ کنفیوژن صرف دشمن کی طرف سے پلان کی جاتی ہے، ہمارے بیانیے پر تنقید اس لیے ہوتی ہے کہ بیانیہ صرف ن لیگ کے پاس ہے،کیا نواز شریف کا ووٹ کو عزت دو کا بیانیہ درست ہے یا وہ جو کہتا ہے کہ ووٹ کو پیروں تلے کچل دو ،عوام نے جن کو ووٹ دیا ان کو آر ٹی ایس کے ذریعے ہرا دیا گیا۔مریم نواز کا مزید کہنا تھا کہ اس کے لیے آپ نے ظلم بھی برداشت کرنا ہے اور برے کو برا نہیں کہنا، کیا بیانیہ یہ ہے کہ عوام کے ووٹ کی حرمت جوتےکےنیچے روندکر دوسرےکے ہاتھ میں پکڑادو۔

لاہور(ویب ڈیسک) ورلڈکپ کے امیدوار گھر میں ہی مشکلات کا شکار نظر آنے لگے۔
پنڈی اسٹیڈیم میں بلوچستان نے ٹاس جیت کر بیٹنگ کا فیصلہ کیا، کپتان امام الحق(8) فہیم اشرف،بسم اللہ خان(21)عثمان قادر جبکہ عبدل بنگلزئی(19)وہاب ریاض کی وکٹ بنے،عثمان قادرنے ایاز تصور(2)،اکبرالرحمان(11) اور عماد بٹ(11) کا شکار کیا،کاشف بھٹی(27)کو وہاب ریاض نے میدان بدر کردیا، عمید آصف32 پر ناٹ آؤٹ رہے۔
بلوچستان نے 7وکٹ پر 142رنز بنائے، عثمان قادر نے4شکار کیے،وہاب ریاض2وکٹیں لیں، حسن علی 46رنز دینے کے باوجود وکٹ سے محروم رہے۔
جواب میں سیینٹرل پنجاب کے اوپنر کامران اکمل(1)کو جنید خان، احمد شہزاد(4) کو عاکف جاوید نے دھر لیا، رنز بنانے کی ذمہ داری کپتان بابر اعظم نے اٹھالی،محمد اخلاق(14)کاشف بھٹی کی وکٹ بن گئے، فہیم اشرف(2)کو کاشف بھٹی،حسین طلعت(5) کو یاسر شاہ نے چلتا کیا،بابر اعظم(65)بھی مشن ادھورا چھوڑ گئے، انھیں عاکف جاوید نے بولڈ کیا،جنید خان نے احمد صفی(2) اور حسن علی(19)کی وکٹ اڑائی تو 3اوورز میں 23رنز درکار تھے،عمید آصف نے 3 رنز دیے، جیند خان نے 22 کی پٹائی برداشت کی۔
سینٹرل پنجاب نے ایک اوور قبل ہی 2وکٹ سے فتح پالی، وہاب ریاض نے 8گیندوں پر 20رنز بنائے، عثمان قادر 3پر ناٹ آؤٹ رہے،جنید خان3 جبکہ عاکف جاوید اور کاشف بھٹی 2،2وکٹیں لینے میں کامیاب رہے۔قبل ازیں پہلے میچ میں سندھ نے ٹاس جیت کر بولنگ کا فیصلہ کیا، زین عباس(25) محمد حسنین کا شکار بنے تو سدرن پنجاب کا ٹوٹل 59تھا، اگلے اوور میں ذیشان اشرف(34)زاہد محمود،خوشدل شاہ(21) انور علی کی وکٹ بن گئے،کپتان صہیب مقصود (18) رن آؤٹ ہوئے، اعظم خان(20)کو شاہنواز دھانی نے میدان بدر کیا، حسان خان(4)کو رومان رئیس نے آؤٹ کردیا، عامر یامین 38گیندوں پر 43کی اننگز کھیل کر آخری اوور میں محمد حسنین کا شکار بنے۔سدرن پنجاب نے 7وکٹ پر 175کا مجموعہ حاصل کیا،محمد حسنین نے 2جبکہ انور علی، شاہنواز دھانی، رومان رئیس اور زاہد محمود نے ایک ایک وکٹ حاصل کی۔
جواب میں سندھ کے اوپنر شرجیل خان کو عامر یامین،شان مسعو کو محمد الیاس نے زیر کرلیا،دونوں نے 10،10 رنز بنائے، سرفرازاحمد (15)رن آؤٹ ہوئے، حسن محسن(7)کو نسیم شاہ نے رخصت کیا،خرم منظور(84)رن آؤٹ ہوئے تو آخری 3اوورز میں 12.33کا رن ریٹ درکار تھا، انور علی نے صرف 9گیندوں پر 29رنز بناکر ہدف کا حصول 4بالز قبل ہی ممکن بنا دیا، دانش عزیز 17پر ناٹ آؤٹ رہے۔

سندھ (ویب ڈیسک)محکمہ موسمیات کے مطابق مون سون کا نیا سسٹم سندھ میں داخل ہو گیا ہے جس کے باعث کراچی میں کہیں تیز بارش اور کہیں بوندا باندی کی پیشگوئی کی گئی ہے ۔تفصیلات کے مطابق مون سون ہوائیں آج سے صوبہ سندھ پر اپنا اثر دکھائیں گی جبکہ کراچی میں آج مطلع جزوی ابر آلود رہنے اور بوندا باندی کا امکان ظاہر کیا گیا ہے.محکمہ موسمیات کا اس حوالے سے کہنا ہے کہ حیدرآباد، ٹھٹھہ، سکھر، لاڑکانہ میں 23 سے 25 ستمبر تک بارش ہو سکتی ہے جبکہ خیرپور، جیکب آباد، شکارپور اور جامشورو میں بھی 23 سے 25 سمتبر تک بارش کا امکان ہے۔دوسری جانب لاہورسمیت پنجاب کے مختلف شہر فیصل آباد، جہلم، شیخو پورہ، ملتان اور بہاولپور سمیت کئی شہروں میں بادل خوب برسے۔

لاہور(ویب ڈیسک) صوبائی دارلحکومت لاہور میں ڈیلٹا اور ایپسیلون وائرس کے کیسز میں اضافہ جاری ہے ، 24گھنٹےمیں ڈیلٹا کے 12 اورایپسیلون کے 3 کیسز سامنے آئے۔

تفصیلات کے مطابق صوبائی دارلحکومت لاہور میں کورونا سے متاثر تشویشناک مریضوں میں اضافہ ہوتا جارہا ہے ، شہر میں ڈیلٹا اور ایپسیلون وائرس کے کیسز میں سامنے آرہے ہیں۔محکمہ صحت کا کہنا ہے کہ 24گھنٹےمیں ڈیلٹا کے 12 اورایپسیلون کے 3 کیسز رپورٹ ہوئے ، صوبے میں اس وقت 550 مریض ڈیلٹا وائرس کےموجودہیں جبکہ ایپسیلون وائرس کے ابتک 49 مریض رپورٹ ہوچکےہیں۔

محکمہ صحت پنجاب نے کہا ہے کہ صرف اور صرف ویکسینیشن ہی کورونا کیخلاف موثرعلاج ہے، کوروناویکسین لگوانے والے افراد متاثرہوسکتے ہیں مگر شدت کم ہوگی۔ان کا مزید کہنا تھا کہ 15سال سے زائدعمر کے تمام افراد کا فوری ویکسین لگوانا ناگزیر ہے۔

لاہور (ویب ڈیسک)لاہور میں زیادتی کا ایک اور افسوسناک واقعہ پیش آیا ہے.تفصیلات کے مطابق لاہور کے علاقے ملت پارک میں لڑکی سے مبینہ اجتماعی زیادتی کی گئی ہے۔پولیس کا اس حوالے سے کہنا ہے کہ اس معاملے میں ایک ملزم کو گرفتار کر لیا گیا ہے جبکہ2 کی تلاش جاری ہے۔ملتان کی رہائشی خاتون نے ایف آئی آردرج کراتے ہوئےملزم پر الزام عائد کیا کہ وہ کراچی جا رہی تھی کہ ایک شخص ظفر نے فون کر کے اسے لاہور بلا لیا اور اسے ملت پارک کے ایک ہوٹل میں ٹھہرایا۔خاتون کے مطابق ملت ہوٹل میں ظفر، اعظم اور حمزہ نے اسے زیادتی کا نشانہ بنایا اور اس کے 6 لاکھ روپے بھی چھین لیے .لڑکی کی درخواست پر ۔پولیس نےمقدمہ درج کر کے ایک ملزم کو گرفتار کر لیا۔