Tag چین

طالبان کی سپریم کونسل کا اجلاس ختم ہوگیا جس میں حکومت سازی سے متعلق اہم فیصلے کرلیے گئے ہیں۔طالبان کے ترجمان ذبیح اللہ مجاہد نے ٹوئٹ کرتے ہوئے بتایا کہ سپریم کونسل کا 3 روزہ اجلاس طالبان کے امیر ملا ہیبت اللہ اخوندزادہ کی زیر صدارت قندھار میں ہوا جبکہ یہ اجلاس ہفتے کے روز سے پیر تک جاری رہا۔
انہوں نے بتایا کہ اجلاس میں ملک کی موجودہ سیاسی اور سکیورٹی صورتحال کے ساتھ ساتھ دیگر مسائل پر تفصیلی تبادلہ خیال کیا گیا۔ذبیح اللہ مجاہد کا کہنا تھاکہ اجلاس میں اشیائے ضروریہ کی حفاظت کے ساتھ ساتھ شہریوں کو بنیادی سہولیات کی فراہمی اور ان سے اچھے برتاؤ کا فیصلہ کیا گیا۔

چین کے ’تربیتی ‘ کیمپ سے فرار ہونے والی ایک مسلمان خاتون نے بتایا ہے کہ کیمپوں میں قیدیوں کو اجتماعی ریپ، تشدد اور سائنسی تجربات کا نشانہ بنانے کے علاوہ سور کھانے پر مجبور کیا جاتا ہے۔

سیرہ گل سیوتبے قازق نسل کی چینی مسلمان ہیں۔ سیرہ کے مطابق انہیں نومبر 2017 میں حراست میں لیا گیا تھا۔

اسرائیلی اخبار ہاریٹز کے مطابق 43 سالہ استاد سیرہ کو مسلح افراد کیمپ تک لے کر گئے تھے، جہاں وہ کئی ماہ تک رہیں۔ انہیں چینی قیدیوں کو پڑھانے کا کہا گیا تھا۔

ان کا کہنا ہے ’وہاں قیدیوں سے بات کرنے، ہنسنے یا رونے اور کسی کے سوال کا جواب دینے پر پابندی تھی۔ وہاں 16 مربع میٹر کے کمرے میں 20 لوگ رکھے جاتے تھے، کمروں میں کیمرے موجود تھے یہاں تک کے برآمدے میں بھی ہر جگہ کیمرے نصب تھے۔‘

’ہر کمرے میں ٹوائلٹ کے لیے ایک بالٹی موجود رہتی تھی۔ قیدیوں کو ٹوائلٹ استعمال کرنے کے لیے دو منٹ دیے جاتے تھے اور اس بالٹی کو دن میں صرف ایک بار خالی کیا جاتا تھا۔‘

سیرہ کا کہنا ہے کہ خواتین کو منظم انداز سے ریپ کا نشانہ بنایا جاتا تھا اور انہیں بھی ایک خاتون کو بار بار تشدد کا نشانہ بنتے ہوئے دیکھنے پر مجبور کیا گیا۔

انہوں نے ہاریٹرز کو بتایا:’ پولیس اہلکاروں نے اس خاتون کو برہنہ ہونے کا کہا اور باری باری اس کا ریپ کیا۔ ایسا سب کے سامنے کیا جا رہا تھا، جب وہ اس کا ریپ کر رہے تھے تو وہ ہمیں دیکھ رہے تھے تاکہ ہمارا رد عمل جان سکیں۔ ‘

’وہ لوگ جو نیچے دیکھ رہے تھے یا آنکھیں بند کر رہے تھے یا وہ افراد جو غصے یا صدمے میں نظر آرہے تھے انہیں وہاں سے لے جایا گیا اور پھر ہم نے انہیں کبھی نہیں دیکھا۔ یہ بہت اذیت ناک تھا، میں لاچارگی کا وہ احساس کبھی نہیں بھول سکتی، میں اس کی مدد نہیں کر سکی، یہ بات میں کبھی نہیں بھولوں گی۔‘

ان کا مزید کہنا تھا’ تقریباً روز ہی پولیس اہلکار خوبصورت قیدی خواتین کو ساتھ لے جاتے اور وہ پوری پوری رات واپس نہیں آتی تھیں۔‘

ایسا مانا جا رہا ہے کہ چین میں 2017 سے دس لاکھ سے زیادہ مسلمانوں کو زیر حراست رکھا جا رہا ہے، جن میں اکثریت سنکیانگ سے تعلق رکھنے والے مسلمانوں کی ہے۔

حالیہ مہینوں میں ان کیمپوں کے حوالے سے عالمی برادی نے تشویش کا اظہار کیا ہے۔ امریکی وزیر خارجہ مائیک پومپیو نے چینی اقلیتوں سے بیجنگ کے سلوک کو ’اس صدی کا سب سے بڑا داغ‘ قرار دیا ۔

سیرہ کے مطابق تشدد کے علاوہ قیدیوں پر عجیب و غریب تجربات بھی کیے جاتے تھے۔

ان کا کہنا ہے ’ قیدیوں کو انجیکشن یا گولیاں دی جاتی تھیں، جو ان پر مختلف انداز سے اثر کرتی تھیں۔ کچھ قیدیوں کو جانتے بوجھتے کمزور کیا جا رہا تھا۔ خواتین کو ماہواری نہیں آرہی تھی اور مرد اولاد پیدا کرنے کے قابل نہیں تھے۔‘

43 سالہ سیرہ کو قیدیوں کو کمیونسٹ پارٹی کے گانے اور نعرے سکھانے کا کہا گیا تھا۔

کیمپ میں پڑھانے کی وجہ سے وہ اس بدتر سلوک سے محفوظ رہیں۔ ان کا کہنا ہے :’ قیدیوں کو مجبور کیا جاتا تھا کہ وہ ’مجھے چین سے محبت ہے‘ جیسے نعرے لگائیں، یا ’ کمیونسٹ پارٹی کا شکریہ‘ یا ’میں چینی ہوں مجھے شی جن پنگ سے پیار ہے‘ جیسے نعرے سکھائے جاتے تھے۔ ان کے مطابق تمام قیدیوں بشمول مسلمانوں کو سور کا گوشت کھانے پر مجبور کیا جاتا تھا۔

’وہاں کا کھانا بہت برا تھا اور سونے کے لیے دیا جانے والا وقت بھی کافی نہیں ہوتا تھا۔ صفائی کی صورتحال بھی ابتر تھی۔‘

مارچ 2018 میں سیرہ کو آزاد کیا گیا تاکہ وہ اپنے پانچ نرسریوں کی ڈائریکٹر کی سابقہ ملازمت کو جاری رکھ سکیں۔ ان کے واپس آنے کے تین دن بعد انہیں نوکری سے برخاست کر دیا گیا اور پولیس نے پھر سے ان کی تفتیش کی، جس کے بعد انہیں غدار قرار دے دیا گیا۔

سیرہ کو بتایا گیا کہ اب وہ استاد کے بجائے قیدی کے روپ میں کیمپ واپس جائیں گی۔

ان کا کہنا ہے :’ کیمپ میں رہنے کے بعد میں جانتی تھی اس کا کیا مطلب ہے۔ میں جانتی تھیں وہاں جو ہو رہا ہے ،میں اس کو برداشت نہیں کر سکوں گی بلکہ مر جاؤں گی۔ میں نے خود سے کہا اگر میری قسمت میں ایسے ہی مرنا لکھا ہے تو میں فرار ہونے کی کوشش کروں گی۔‘

وہ کھڑکی سے اپنے ہمسائے کے گھر کودنے اور وہاں سے ٹیکسی پر قازقستان کی سرحد تک گئیں جہاں انہوں نے کامیابی سے سرحد پار کر لی۔

سیرہ کہتی ہیں:’ قازقستان میں مجھے میرے خاندان والے مل گئے، میرا خواب پورا ہو گیا، میں اس سے زیادہ کچھ نہیں چاہتی تھی۔‘

سیرہ کو قازقستان کی سیکریٹ سروس نے سرحد پار کرنے پر گرفتار کیا لیکن پھر انہیں سویڈن میں سیاسی پناہ مل گئی۔

ان کا کہنا ہے ’ دنیا کو اس مسئلے کا حل ڈھونڈنا ہو گا تاکہ میرے لوگ سکون سے رہ سکیں۔ جمہوری حکومتوں کو چین کو ان اقدامات سے باز رکھنے کے لیے وہ سب کرنا ہوگا جو وہ کر سکتے ہیں۔‘

بیجنگ نے سیرہ کے الزامات کی تردید کی ہے۔ دی انڈپینڈنٹ نے لندن میں واقع چینی سفارت خانے سے اس
بارے میں موقف لینے کے لیے رابطہ کیا ہے۔

وزیرخارجہ شاہ محمود قریشی نے کہا ہے کہ چین نے مقبوضہ کشمیر کے حوالے سے پاکستان کے موقف کی تائید کی ہے اور وہ اقوام متحدہ کی سلامتی کونسل جانے کے ہمارے فیصلے پر تعاون کرے گا۔

شاہ محمود قریشی نے بیجنگ میں چینی ہم منصب وانگ ژی سے ملاقات کے بعد ایک ویڈیو بیان میں کہا کہ چین کے وزیر خارجہ کے ساتھ میری ڈھائی گھنٹے کی نشست ابھی مکمل ہوئی ہے، جو مفید اور ان کے بقول بروقت نشست تھی۔

ادھر چین کی وزارت خارجہ سے جاری بیان میں کہا گیا کہ ‘پاکستان کے حقوق اور مفادات کے تحفظ کے لیے عالمی سطح پر تعاون جاری رکھیں گے’۔

بیان کے مطابق وزیرخارجہ وانگ ژی نے کہا کہ ‘چین کو کشمیر میں بڑھتی ہوئی کشیدگی پر تشویش ہے اور یکطرفہ اقدامات سے صورت حال مزید خراب ہوگی لہٰذا ایسے اقدامات نہیں کرنے چاہئیں’۔

‘وانگ ژی نے کہا کہ پاکستان اور بھارت دونوں چین کے دوست ہمسایہ اور اہم ترقی پذیر ممالک ہیں جو ترقی کے اہم موڑ پر ہیں، لہٰذا دونوں سے مطالبہ کرتے ہیں کہ وہ اپنی قومی ترقی اور جنوبی ایشیا میں امن کے لیے یکطرفہ اقدامات سے گریز کرتے ہوئے تاریخی اختلافات کو ختم کریں’۔

چینی وزیر خارجہ کا حوالے دیتے ہوئے شاہ محمود قریشی کا کہنا تھا کہ ‘وانگ ژی نے مجھ سے کہا کہ مصروفیات اور شارٹ نوٹس کے باوجود وہ یہ نشست صدر شی جن پن کے حکم کے مطابق کر رہے ہیں کیونکہ پاکستان اور چین کی دوستی کی نوعیت مختلف ہے اور ہمارے ردعمل کی سطح بھی مختلف ہونی چاہیے’۔

انہوں نے کہا کہ ‘آج میں نے مقبوضہ جموں اور کشمیر سے متعلق بھارت کے حالیہ اقدامات پر پاکستان کے تحفظات اور تشویش کو ان کے سامنے رکھا اور ان کا جواب سنا جو پریس ریلیز کی شکل میں سامنے آ جائے گا’۔

چینی وزیر خارجہ سے ملاقات کی تفصیلات سے آگاہ کرتے ہوئے انہوں نے کہا کہ ‘مجھے یہ بتاتے ہوئے انتہائی مسرت ہو رہی ہے کہ چین نے آج ایک مرتبہ پھر ثابت کیا کہ وہ پاکستان کا بااعتماد دوست ہے اور یہ دوستی لازوال ہے اور اس پر جتنا فخر کیا جائے وہ کم ہے’۔

شاہ محمود قریشی نے کہا کہ ‘انہوں نے پاکستان کے موقف کی مکمل تائید کی اور ہم سے اتفاق کیا کہ یہ اقدامات یکطرفہ ہیں اور انہوں نے اتفاق کیا کہ اس سے مقبوضہ جموں و کشمیر کی حیثیت اور ہیئت میں تبدیلی واقع ہوئی ہے’۔

ان کا کہنا تھا کہ ‘چینی وزیرخارجہ نے اتفاق کیا کہ اس سے خطے کے امن و استحکام کو خطرہ لاحق ہو سکتا ہے’۔

وزیرخارجہ نے چین کے موقف کے حوالے سے بتایا کہ ‘انہوں نے اتفاق کیا کہ مقبوضہ جموں و کشمیر ایک متنازع مسئلہ تھا اور ہے اور اقوام متحدہ نے اس کو تسلیم کیا ہوا ہے جبکہ اس کا حل بھی اقوام متحدہ کی قراردادوں کو بنیاد بنا کر نکلنا ہے’۔

انہوں نے کہا کہ ‘ان کی خواہش ہے کہ اس مسئلے کو پُر امن طریقے سے حل کیا جائے اور اس وقت جو کشیدگی ہے اس میں اضافہ نہ ہو’ ۔

پاکستان کے خدشات کے حوالے سے انہوں نے کہا کہ ‘میں نے انہیں پاکستان کی تشویش کے بارے میں آگاہ کیا کہ ترامیم کے بعد ہمیں خدشہ ہے کہ مقبوضہ جموں و کشمیر میں جب کرفیو ہٹے گا تو وہاں ظلم و بربریت کا نیا دور شروع ہو سکتا ہے، جس سے نہ صرف مزید انسانی حقوق پامال ہوں گے بلکہ مزید خون خرابے کا اندیشہ ہے اور اس کا ردعمل بھی ہو سکتا ہے جبکہ اس ردعمل سے توجہ ہٹانے کے لیے کوئی پلوامہ جیسی حرکت دوبارہ کی جاسکتی ہے’۔

شاہ محمود قریشی کا کہنا تھا کہ ‘انہوں نے کہا کہ پاکستان کی حکومت نے جو فیصلے کیے ہیں اور سلامتی کونسل میں جانے کا فیصلہ کیا ہے تو چین، پاکستان کی مکمل حمایت کرے گا اور پاکستان کے ساتھ مکمل تعاون رکھے گا’۔

چین کے تعاون کے حوالے سے ان کا کہنا تھا کہ ‘ہماری وزارتیں اور مشنز آپس میں تبادلہ خیال جاری رکھیں گے تاکہ ہماری رسائی اور حکمت عملی مشترکہ ہو اور آپس میں یکسوئی سے ہم آگے بڑھ سکیں’۔

قبل ازیں وزیر خارجہ شاہ محمود قریشی بھارت کی جانب سے 5 اگست کو مقبوضہ جموں و کشمیر کی خصوصی حیثیت ختم کرنے اور مقبوضہ وادی میں جاری انسانی حقوق کی سنگین خلاف ورزیوں سمیت دیگر غیر آئینی اقدامات کے مضمرات سے چینی حکام کو آگاہ کرنے کے لیے بیجنگ پہنچے تھے۔

دائیو تائ اسٹیٹ گیسٹ ہاؤس بیجنگ میں چینی وزیر خارجہ وانگ ژی نے شاہ محمود قریشی کا پرتپاک استقبال کیا تھا اور دونوں وزرائے خارجہ کے مابین تہنیتی جملوں کا تبادلہ ہوا، جس کے بعد ملاقات شروع ہوئی تھی۔

خیال رہے کہ بھارتی کی جانب سے مقبوضہ کشمیر کی خصوصی حیثیت میں تبدیلی کے حوالے سے کیے جانے والے اقدامات کے بعد پاکستان کی قومی سلامتی کمیٹی نے نئی دہلی سے سفارتی تعلقات محدود اور دوطرفہ تجارت معطل کردی تھی۔

یہ فیصلہ وزیر اعظم عمران خان کی زیر صدارت کمیٹی کے اجلاس میں سامنے آیا تھا جبکہ اجلاس میں جموں اور کشمیر اور لائن آف کنٹرول کی صورتحال پر بھی غور کیا گیا تھا۔

واضح رہے کہ نئی دہلی کی جانب سے مقبوضہ کشمیر میں مواصلاتی بندش اور سیکیورٹی کریک ڈاؤن کے بعد سے قابض سیکیورٹی فورسز نے 500 سے زائد افراد کو گرفتار کیا جاچکا ہے جبکہ وادی میں لاک ڈاون کی وجہ سے عوام اپنے گھروں میں محصور ہوکر رہ گئے ہیں۔

چین نے مقبوضہ کشمیر کی موجودہ صورتحال پر شدید تشویش کا اظہار کرتے ہوئے کہا ہے کہ کسی بھی فریق کو یکطرفہ طور پر وہاں کی موجودہ حیثیت تبدیل کرنے سے گریز کرنا چاہیے۔

بھارت کی حکومت نے گزشتہ روز مقبوضہ جموں و کشمیر اور لداخ کو خصوصی حیثیت فراہم کرنے والے آئین کے آرٹیکل 370 کو ختم کردیا۔

چینی وزارت خارجہ کی ترجمان ہوا چوینگ نے پاکستان اور بھارت کے درمیان لائن آف کنٹرول پرکشیدگی اور آرٹیکل 370 کو ختم کرنے سے متعلق سوالات پر تحریری جواب میں کہا کہ چین کو کشمیر کی موجودہ صورتحال پر ‘شدید تشویش’ ہے۔

چینی وزارت خارجہ کی ترجمان نے بھارت کی جانب سے لداخ کو مرکز کا حصہ بنانے کا فیصلہ ‘ناقابل قبول’ قرار دیا۔ ترجمان نے کہا کہ کسی بھی فریق کو یکطرفہ طور پر موجودہ حیثیت کو تبدیل کرنے سے گریز کرنا چاہیے۔

ترجمان کے مطابق کشمیر پر چین کا مؤقف واضح ہے، یہ پاکستان اور بھارت کے درمیان ایک تاریخی مسئلہ ہے اور اس پر عالمی برادری کا بھی اتفاق ہے۔

بھارت سرحدی معاملات پر بیان اور عمل میں ہوشمندی کا مظاہرہ کرے: چین
ترجمان چینی وزرات خارجہ کا لداخ کے حوالے بھارتی اقدام پر کہنا ہے کہ چین نے سرحدی علاقے میں بھارتی مداخلت کی ہمیشہ مخالفت کی ہے اور اس بارے میں ہمارا مؤقف واضح اور مستقل ہے۔

انہوں نے کہا کہ بھارت نے اپنا قانون یکطرفہ تبدیل کرکے ہماری خودمختاری کو نقصان پہنچایا، ایسے اقدامات ناقابل قبول اور کبھی قابل عمل نہیں ہوسکتے۔

ترجمان کے مطابق بھارت سرحدی معاملات پر بیان اور عمل میں ہوشمندی کا مظاہرہ کرے اور بھارت چین سے کیے گئے معاہدوں پر قائم رہے، بھارت ایسے کسی بھی عمل سے باز رہےجو سرحدی امور کو مزید مشکل بنادے۔

امریکی صدر ڈونلڈ ٹرمپ نے چین کی مزید 3 کھرب ڈالر مالیت کی مصنوعات پر 10 فیصد ٹیکس عائد کرنے کا اعلان کر دیا۔

ڈونلڈ ٹرمپ نے چین کی مصنوعات پر نئے ٹیکس عائد کرتے ہوئے کہا کہ چین اپنی مصنوعات امریکا میں فروخت کر کے فائدہ اٹھاتا ہے، چینی اپنی کرنسی کی قدر میں کمی کرتے ہیں اور زیادہ منافع کما کر رقم لے جاتے ہیں۔

امریکی صدر نے چین کی کمیونسٹ پارٹی کی جانب اشارہ کرتے ہوئے کہا کہ ہماری سرمایہ کاری سے نا کوئی حکومت چلتی ہے اور نا کوئی سیاسی جماعت فائدہ اٹھاتی ہے۔

چین کے وزیر خارجہ وانگ یی کا امریکی پابندیوں پر ردعمل میں کہنا ہے کہ نئی پابندیاں کسی بھی طور پر معاشی اور تجارتی تنازعات کے حل کا طریقہ کار ہیں اور نا ہی یہ صحیح طریقہ کار ہے۔

خیال رہے کہ امریکی صدر ڈونلڈ ٹرمپ پہلے ہی چین کی 250 ارب ڈالر کی مصنوعات پر 25 فیصد ٹیکس عائد کر چکے ہیں۔

امریکی وزیر خارجہ مائیک پومیو نے اس حوالے سے کہا کہ نا ہی ہم چین کی قومی سلامتی کو کچلنے کے لیے کوئی راہ ہموار کر رہے ہیں اور نا ہی ہم بیجنگ کی وفارادیاں بدلنے کے لیے کوئی فنڈنگ کر رہے ہیں۔

چین نے بھی ردعمل کے طور پر امریکا کی 110 ارب ڈالر کی مصنوعات پر ٹیکسز عائد کر دیئے تھے۔

ایک نئی تحقیق میں یہ انکشاف ہوا ہے کہ چین جان بوجھ کر اپنے مغربی صوبے سنکیانگ کے مسلمان بچوں کو ان کے خاندان، مذہب اور زبان سے الگ کر رہا ہے۔ایک ایسے وقت میں جب سنکیانگ میں ہزاروں افراد کو ’تربیتی کیمپوں‘ میں زیر حراست رکھا جا رہا ہے، وہیں وسیع پیمانے پر ایک اور مہم کا آغاز بھی کیا گیا ہے جس میں بورڈنگ سکول تعمیر کیے جا رہے ہیں۔

بی بی سی نیوز نے اس سلسلے میں ٹھوس ثبوت اکٹھے کئے ہیں جن کی بنیاد عوامی سطح پر دستیاب دستاویزات پر ہے اور انھیں بیرون ملک مقیم افراد نے اپنی شہادتوں سے مزید سہارا دیا ہے۔

دستاویزات کے مطابق صرف ایک شہر میں ہی 400 سے زیادہ بچوں کو اپنے والدین سے الگ کیا گیا ہے۔ ان والدین کو کیمپوں یا جیلوں میں زیرِ حراست رکھا گیا ہے۔

اور اب چینی انتظامیہ اس کا تعین کر رہی ہے کہ کیا ایسے بچوں کے لیے مرکزی دیکھ بھال ضروری ہے۔

سنکیانگ میں جہاں ایک طرف مسلمانوں کی شناخت تبدیل کرنے کی کوششیں ہو رہی ہیں تو دوسری طرف شواہد سے ظاہر ہوتا ہے کہ بچوں کو منظم طریقے سے ان کی جڑوں سے دور کیا جارہا ہے۔

سنکیانگ میں چین کے قانون نافذ کرنے والے ادارے سخت نگرانی کرتے ہیں اور یہاں بیرون ملک سے آئے صحافیوں کا 24 گھنٹے پیچھا کیا جاتا ہے۔ ایسے حالات میں کسی عام شہری سے اس بات کی شہادت لینا ناممکن ہے۔ لیکن چین سے باہر دوسرے ممالک، جیسے ترکی، میں ایسا کیا جا سکتا ہے۔

استنبول کے بڑے ہال میں درجنوں افراد اپنی کہانیاں سنانے کے لیے بےتاب تھے۔ ان میں سے کئی لوگوں کے ہاتھ میں اپنے بچوں کی تصاویر ہیں، جو سنکیانگ میں رہ گئے تھے۔

بی بی سی سے بات کرتے ہوئے ایک ماں نے بتایا کہ ’مجھے نہیں معلوم ان (بچوں) کی دیکھ بھال کون کررہا ہے‘۔ ان کے ہاتھ میں اپنی تین بیٹیوں کی تصویر ہے۔ وہ مزید کہتی ہیں کہ ’میرا ان (بچوں) سے کوئی رابطہ نہیں۔‘

ایک اور والدہ اپنے تین بیٹوں اور ایک بیٹی کی تصویر لیے اپنے آنسو پونچھ رہی تھیں۔ انھوں نے بتایا ’میں نے سنا ہے انھیں ایک یتیم خانے میں لے جایا جا چکا ہے‘۔

بی بی سی نے اس سلسلے میں 60 انٹرویو کیے اور یہ تمام انٹرویو بچوں اور والدین کے بچھڑنے کی دکھ بھری داستان سناتے ہیں۔ اس طرح والدین اور رشتہ داروں نے تقریباً 100 بچوں کی گمشدگی کی تصدیق کرتے ہوئے مزید معلومات فراہم کی ہیں۔

یہ تمام لوگ اویغور ہیں جو ترکی النسل مسلمان ہیں اور چین کے مغربی علاقے میں آباد رہے ہیں جہاں ان کی تعداد تقریباً ایک کروڑ دس لاکھ ہے۔ وہ خود کو ثقافتی اور نسلی طور پر وسط ایشیائی علاقوں سے قریب تر دیکھتے ہیں اور ان کی زبان ترک زبان سے بہت حد تک مماثلت رکھتی ہے۔

ہزاروں اویغور تعلیم، کاروبار، رشتے داروں سے ملنے، چین میں بچوں کی پیدائش کے حوالے سے سخت قوانین یا بڑھتے ہوئے مذہبی دباؤ سے بچنے کے لیے ترکی آ چکے ہیں۔

لیکن گذشتہ تین برسوں کے دوران جب سے چینی حکومت نے ہزاروں اویغور مسلمانوں اور دوسری اقلیتوں سے تعلق رکھنے والے افراد کو حراست میں لینا شروع کیا ہے کئی لوگ چین میں پھنس بھی گئے ہیں۔

چین کا کہنا ہے کہ اویغوروں کو ’ووکیشنل تربیتی مراکز‘ میں تعلیم دی جا رہی ہے تاکہ وہ مذہبی انتہا پسندی کا مقابلہ کر سکیں لیکن ثبوتوں کے مطابق کئی لوگ صرف اپنے مذہب کے اظہار، جیسے نماز پڑھنے یا نقاب کرنے، یا دوسرے ممالک جیسے ترکی میں بسنے والوں سے تعلقات رکھنے پر حراست میں لیے گئے ہیں۔

بیرون ملک مقیم اویغور مسلمانوں کے لیے چین واپس جانے کا مطلب حراست میں لیا جانا ہے جبکہ سنکیانگ میں رہ جانے والوں کا ان افراد سے رابطہ کرنا بھی خطرے سے خالی نہیں۔

ایک شخص نے بی بی سی کو بتایا کہ اس کی بیوی چین کی حراست میں ہے اور اب اسے ڈر ہے کہ اس کے آٹھ بچوں میں سے کوئی نہ کوئی ضرور چینی حکومت کے پاس ہوگا۔

اس نے کہا ’مجھے لگتا ہے کہ اب انھیں بچوں کے تعلیمی کیمپوں میں لے جایا جا چکا ہے۔‘

بی بی سی کی نئی تحقیق میں اسی بات کا اندازہ لگانے کی کوشش کی گئی ہے کہ چین میں ہزاروں اویغور بچوں کے ساتھ کیا ہورہا ہے۔

جرمن محقق ڈاکٹر ایڈریان زینز چین کے صوبے سنکیانگ میں اویغور مسلمانوں کی گرفتاریوں کو منظرعام پر لائے تھے۔ عوامی سطح پر موجود دستاویزات پر مبنی ان کی رپورٹ میں سنکیانگ کے بورڈنگ سکولوں کے پھیلاؤ کی مہم کے بارے میں بتایا گیا ہے۔

سنکیانگ میں بورڈنگ سکولوں کے بڑے کیمپ بنائے گئے ہیں جن میں رہائش کے لیے بڑے کمرے ہیں اور ان میں بڑی تعداد میں طلبہ کے رہنے کی گنجائش ہے۔ بڑوں کے لیے حراستی مراکز بناتے وقت ہی بڑی تعداد میں بچوں کے لیے سکول تعمیر کیے جارہے تھے تاکہ انھیں ان کے والدین سے الگ ہونے کے بعد دیکھ بھال کے لیے یہاں رکھا جا سکے۔

اور یہ سب ایک ہی اقلیت کو نشانہ بنانے کے لیے کیا جارہا ہے۔

سنہ 2017 میں سنکیانگ میں کنڈرگارٹن سکولوں میں داخل ہونے والے بچوں کی تعداد پانچ لاکھ سے زیادہ بڑھ گئی تھی۔ اس میں 90 فیصد سے زائد تعداد اویغور اور دوسرے مسلمان بچوں کی تھی۔

اس کے نتیجے میں سنکیانگ میں بچوں کے داخلے کی شرح، جو چین میں پہلے سب سے کم تھی، ملک میں سب سے زیادہ ہے۔

صرف جنوبی سنکیانگ میں، جہاں سب سے زیادہ اویغور آبادی ہے، حکام نے کنڈرگارٹن سکولوں کی تعمیر اور اپ گریڈنگ کے لیے ایک ارب 20 کروڑ ڈالر خرچ کیے ہیں۔

ڈاکٹر زینز کا تجزیہ ہمیں یہ بتاتا ہے کہ بڑے پیمانے پر ان تعمیرات میں رہائش کے لیے بڑے کمرے شامل ہیں۔

سنکیانگ کی تعلیم پھیلاؤ مہم کے پیچھے بھی وہی سوچ ہے جو بڑوں کی بڑی تعداد میں جیلوں میں بند کرنے کے پیچھے تھی اور اسے سے تمام اویغور اور دیگر اقلیتی بچے متاثر ہوئے ہیں چاہے ان کے والدین تربیتی کیمپوں میں ہیں یا نہیں۔

گذشتہ سال اپریل میں چین کے حکام نے آس پاس کے دیہات سے 2000 بچوں کو یچینگ کاؤنٹی نمبر چار نامی ایک بڑے بورڈنگ مڈل سکول میں منتقل کیا۔

چینگ کاؤنٹی مڈل سکولز 10 اور 11
نیچے دی گئی تصویر میں دیکھا جا سکتا ہے کہ سنکیانگ کے جنوب میں واقع شہر یچینگ (اویغر میں کارگیلک) میں زمین کو دو نئے بورڈنگ سکولز تیار کرنے کے لیے کیسے استعمال کیا گیا۔

جب آپ تصویر پر موجود سلائیڈر کو ہلاتے ہیں تو آپ کو اندازہ ہوتا ہے کہ ان پر کام کتنی تیزی سے جاری ہے۔ دونوں مڈل سکولز کے درمیان ایک کھیلوں کا میدان ہے جبکہ دونوں سکولوں کا حجم قومی اوسط سے تین گنا زیادہ ہے اور ان کی تعمیر کو شروع ہوئے ایک سال سے زائد کا عرصہ بیت چکا ہے۔

حکومتی پروپیگینڈے کے مطابق ان بورڈنگ سکولز کی افادیت بہت زیادہ ہے اور ‘ان کی مدد سے معاشرے میں استحکام اور امن’ لانے میں مدد مل سکتی ہے کیونکہ ‘یہ سکول بچوں کے والدین کی جگہ لے لیتے ہیں’ لیکن زینز کے مطابق ان کا مقصد مختلف ہے۔

ان کا کہنا ہے کہ ‘بورڈنگ سکولز اقلیتی برادریوں کی تہذیب کو یکسر تبدیل کرنے کے لیے ایک معقول ماحول فراہم کرتے ہیں۔’

بالکل ویسے ہی جیسے کیمپس میں ہوتا ہے۔ ان کی تحقیق کے مطابق ایک مہم کا آغاز کیا گیا ہے جس کے مطابق اویغور سمیت دوسری مقامی زبانوں کا استعمال سکولوں کے اندر مکمل طور پر ختم کر دیا جائے۔

کچھ سکولوں میں چینی زبان کے علاوہ کسی اور زبان کے استعمال پر اساتذہ اور طالب علموں دونوں کے خلاف پوائنٹس کی بنیاد پر سخت سزائیں متعارف کروائی گئی ہیں۔

اور یہ سب ان حکومتی بیانات سے مماثلت رکھتا ہے جن میں یہ دعویٰ کیا گیا تھا کہ سنکیانگ کے ہر سکول میں صرف چینی زبان میں تعلیم دی جاتی ہے۔

بی بی سی سے بات کرتے ہوئے سنکیانگ کے محکمہ پروپیگینڈا کے ایک سینیئر افسر ژو گوئی ژیانگ نے اس بات کی تردید کی کہ چینی حکومت نے خود سے بڑی تعداد میں ایسے بچوں کی دیکھ بھال کا بیڑا اٹھایا ہے جنھیں اپنے گھر چھوڑنے پڑے ہیں۔

‘اگر کسی گھرانے کے تمام افراد کو پیشہ ورانہ مہارت حاصل کرنے لیے بھیجا گیا ہے تو یقیناً اس گھرانے کو شدید مسائل کا سامنا ہو گا۔‘

انھوں نے ہنستے ہو ئے کہا کہ ’اس قسم کی کوئی مثال نہیں میری نظر سے نہیں گزری۔‘

لیکن زینز کی تحقیق کا سب سے اہم حصہ وہ ثبوت ہیں جو یہ بتاتے ہیں کہ قید میں موجود لوگوں کے بچوں کی بڑی تعداد کو واقعی بورڈنگ سکول سسٹم میں داخل کیا جا رہا ہے۔

مقامی حکام تفصیلی فارمز کا استعمال کرتے ہوئے ان بچوں کی تفصیلات درج کرتے ہیں جن کے والدین یا تو پیشہ ورانہ مہارت حاصل کر رہے ہیں یا جیلوں میں بند ہیں اور وہ اس بات کا اندازہ بھی لگا رہے ہیں کہ آیا ان بچوں کو انفرادی یا مرکزی طور پر دیکھ بھال کی ضرورت ہے۔

زینز کے ہاتھ ایک ایسا حکومتی دستاویز لگی جس میں ‘ضرورت مند گروہوں’ کو مختلف سبسڈیز فراہم کیے جانے کے حوالے سے معلومات درج ہیں۔ اس میں ان گھرانوں کا بھی ذکر ہے جن کے ‘دونوں میاں بیوی پیشہ وارانہ مہارت’ حاصل کر رہے ہیں۔

کاشغر کے تعلیمی بیوروز کو ہدایت نامہ جاری کیا گیا ہے کہ وہ خاص طور پر ان طالب علموں کی ضرورتوں کا خیال رکھیں جن کے والدین کیمپس میں موجود ہیں۔

ہدایت نامے کے مطابق سکولوں کو ‘نفسیاتی کاؤنسلنگ کو بہتر بنانے’ کی تنبیہ کی گئی ہے اور کہا گیا ہے کہ ‘طالب علموں کی تعلیمی سوچ’ کو سنوارنے کی ضرورت ہے۔

اس جملے کی گونج ان کیمپس میں بھی سنائی دیتی ہے جن میں ان بچوں کے والدین موجود ہیں۔ یہ واضح ہے کہ بچوں کی ان بورڈنگ سکولوں میں داخلے کو ایک معاشرتی مسئلے کے طور پر دیکھا جا رہا ہے اور اس حوالے سے کام بھی کیا جا رہا ہے لیکن حکام اس کی تشہیر کرنے سے گریزاں ہیں۔

کچھ متعلقہ حکومتی دستاویزات میں ‘پیشہ وارانہ مہارت حاصل کرنے کی ٹریننگ’ کے فقرے کی جگہ غیر واضح الفاظ کا استعمال کر کے انھیں ‘سرچ انجنز’ سے بظاہر جان بوجھ کر چھپایا گیا ہے۔

کچھ مواقع پر بڑی عمر کے افراد کے قید خانوں کے قریب بچوں کے سکول یعنی کنڈر گارڈن سکول بھی بنائے گئے ہیں جن کے گن چینی سرکاری میڈیا گاتا ہے۔

ان کے مطابق ان بورڈنگ سکولوں کے ذریعے اقلیتی بچوں کو زندگی میں ‘بہتر عادات’ سکھائی جاتی ہیں اور حفظانِ صحت سے متعلق گھر سے بہتر معلومات فراہم کی جاتی ہیں جبکہ کچھ بچوں نے اپنی استانیوں کو ‘ممی’ کہنا شروع کر دیا ہے۔

ہم نے متعدد مقامی تعلیمی بیوروز کو سنکیانگ میں یہ جاننے کے لیے ٹیلی فون کیا کہ اس حوالے سے سرکاری پالیسی کیا ہے۔ اکثر نے جواب دینے سے انکار کیے لیکن کچھ بیوروز نے ہمیں موجودہ نظام کے بارے میں مختصر حقائق بتائے۔

ہم نے ایک خاتون سرکاری افسر سے پوچھا کہ ان بچوں کا پرسانِ حال کیا ہے جن کے والدین کو کیمپس منتقل کر دیا جاتا ہے۔

انھوں نے بتایا کہ ‘وہ بورڈنگ سکولوں میں داخل ہیں۔ ہم انھیں رہائش، کھانا اور کپڑے فراہم کرتے ہیں۔۔۔اور ہمیں حکومتی اداروں کی جانب سے بتایا گیا ہے کہ ہم ان کی اچھی دیکھ بھال کریں۔

استنبول کے ہال میں جیسے جیسے بکھرے ہوئے گھرانوں کی کہانیاں سامنے آ رہی تھیں ویسے ہی ناامیدی اور شدید نفرت بھی دیکھنے میں آئی۔

وہاں موجود ایک ماں نے بتایا کہ ‘ہزاروں بچوں کو ان کے والدین سے الگ کیا جا رہا ہے اور ہم اس حوالے سے مسلسل گواہیاں بھی دے رہے ہیں۔’

ان کا سوال تھا کہ ‘دنیا یہ سب جاننے کے باوجود بھی خاموش کیوں ہے؟’

سنکیانگ میں کی جانے والی تحقیق کے مطابق تمام بچے اب ایسے سکولوں میں تعلیم حاصل کریں گے جن کا ’انتظام انتہائی الگ تھلگ انداز میں چلایا جاتا ہے۔‘

بہت سے سکولوں میں بھرپور جاسوسی کا نظام موجود ہے، سکولوں کے احاطے میں الارمز اور 10 ہزار کلو وولٹ بجلی گزارنے والی باڑیں موجود ہیں۔ یہاں تک کہ کچھ سکولوں کی سکیورٹی پر کیے جانے والا خرچ حراستی کیمپس سے بھی زیادہ ہے۔

اس پالیسی کو سنہ 2017 کے اوائل میں متعارف کروایا گیا تھا جب حراست میں لیے جانے والے افراد کی تعداد ڈرامائی طور پر بڑھ گئی تھی۔

زینز اب یہ سوچتے ہیں کہ کیا ریاست نے اس وقت یہ پالیسی اس لیے متعارف کروائی تھی تاکہ والدین اپنے بچوں کو جبری طور پر بازیاب نہ کروا سکیں۔

انھوں نے بتایا کہ ‘میرا خیال ہے کہ بچوں اور والدین کو منظم طور پر الگ رکھنے کا ثبوت اس بات کی واضح نشاندہی ہے کہ سنکیانگ کی حکومت چاہتی ہے کہ نئی نسل کو اپنی جڑوں، مذہبی عقائد اور زبان سے علیحدہ کیا جا سکے۔‘

’ثبوت اس بات کی جانب اشارہ کرتا ہے کہ ہمیں اسےثقافت کی نسل کشی کہنا چاہیے۔’

چین (وقت نیوزآن لائن)
چین میں رنگوں کی سالانہ ریس کا انعقاد کیا گیا جس میں رنگوں سے کھیلنے کیلئے لوگوں کی بڑی تعدادنے شرکت کی۔ اس دلچسپ ریس میں سفید ٹی شرٹ پہنے ہزاروں افراد جمع ہوئے اور چار کلو میٹر طویل ریس کے دوران ایک دوسرے کو قوس و قزح کے رنگوں میں نہلا کر خوب لطف اُٹھایا۔

چین (میڈیا 92نیوز آن لائن)
چین میں دلچسپ لائٹ شو کا انعقاد کیا گیا جس میں عمارتوں پر لائٹ پراجیکشن کے ذریعے ایسے دلچسپ نظارے ترتیب دیئے گئے کہ دیکھنے والے مبہوت رہ گئے اور شہر روشنیوں سے جگمگا اُٹھا۔ چین میں منعقد ہونے والے اس لائٹ شو میں شہر کی 9سو سے زائد عمارتوں تھری ڈی آرٹ اور لائٹ پراجیکشن کے ذریعے ایسے خوبصورت اور دلچسپ نظارے ترتیب دیئے گئے کہ دیکھنے والے مبہوت رہ گئے۔

(ایمرا نیوز آن لائن)

چین میں سالانہ ڈریگن بوٹ ریس کے دلچسپ مقابلے کاانعقاد کیا گیا جس میں سیکڑوں افراد نے بھرپورشرکت کی اور کشتیاں چلاتے ہوئے خوب ریس لگائی۔ اس سالانہ ٹورنامنٹ میں چین کے مختلف صوبوں سے تعلق رکھنے والی پچاس ٹیموں کے 1,130کھلاڑیوں نے حصہ لیا اور کشتیوں کی ریس لگائی۔

اس مقابلے کے کے دوران کھلاڑیوں نے کشتیوں کی ریس لگاتے ہوئے نہ صرف سو،دو سو، اور پانچ سو میٹر کا مقررہ فاصلہ طے کیا بلکہ اپنی ماہرانہ صلاحیتوں کا عملی مظاہرہ بھی خوب کیا۔

بیجنگ( ایمرا نیوزآن لائن )
چین نے مختلف اشیا پر ٹیکسوں کی شرح میں کمی کا اعلان کیا ہے۔ محکمہ ٹیکس کے اعلامیہ کے مطابق اشیا خورد ونوش ، ادویات ، ٹیکسٹائیل کے علاوہ آئی ٹی مصنوعات پر ٹیکس کی شرح کم کر دی گئی ہے۔اشیا خوردنوش ، فرنیچر اور ادویات پر ٹیکس کی شرح 15فیصد سے کم کر کے 13فیصد کر دی گئی ہے اس کے علاوہ الیکٹرونکس ،کھیلوں کے سامان وغیرہ پر ٹیکس 25 فیصد سے کم کر کے 20 فیصد کردیا گیا ہے۔سرکاری ترجمان کے مطابق ٹیکسوں کی شرح میں کمی کا مقصد مقامی مصنوعات کے استعمال کی حوصلہ افزائی اور برآمدات میں اضافہ کرنا ہے۔