Tag bol

لاہور(نیٹ نیوز/ایمرا نیوز) لاہور سمیت پنجاب بھر میں لوڈشیڈنگ کا سلسلہ جاری ہے، جس کا شہروں میں 6 جبکہ دیہات میں 12 سے 16 گھنٹے تک دورانیہ برقرار ہے۔وزارت پاور ڈویژن کی طرف سے واضح شیڈول جاری نہ کیے جانے کے باعث ڈسکوز بھی من مانی کر رہی ہیں کسی قسم کا شیدول جاری نہیں کیا گیا بلکہ کوٹے کے مطابق بجلی کی بندش کا سلسلہ جاری ہے۔اس صورت حال کے باعث گھریلو اور کمرشل صارفین کو انتہائی مشکلات کا سامنا ہے۔صارفین کا شکوہ ہے کہ اس شدید سردی میں جب بجلی کی طلب کئی گنا کم ہو جاتی ہے، اے سی اور پنکھے تک نہیں چل پاتے صرف بلب کی ضرورت ہوتی ہے، وہ بھی حکومت پورا نہیں کر پا رہی۔اس ساری صورت حال سے فیکٹری مالکان و ورکرز اور دکاندار سخت نالاں ہیں جن کا کاروبار تباہ ہو کر رہ گیا ہے۔دوسری طرف لیسکو حکام کا کہنا ہے کہ کم سے کم لوڈشیڈنگ کی جا رہی ہے، جونہی کوٹہ بڑھایا گیا، شیڈول واپس لے لیں گے ۔

اسلام آباد(نیٹ نیوز/ایمرا نیوز) چیف جسٹس آف پاکستان میاں ثاقب نثار نے کہا ہے کہ اومنی گروپ کے خلاف اتنامواد آ چکا ہے کہ کوئی آنکھیں بند نہیں کر سکتا۔سپریم کورٹ آف پاکستان میں مبینہ جعلی بینک اکاؤنٹس کیس کی سماعت کے دوران اٹارنی جنرل نے 172 افراد کے نام ای سی ایل میں ڈالنے سے متعلق وضاحت پیش کرد ی۔اٹارنی جنرل نے عدالت کے روبرو مؤقف اختیار کیا کہ کابینہ نے ای سی ایل میں ڈالے گئے ناموں کا معاملہ کمیٹی کو بھیج دیا ہے۔انہوں نے مزید کہا کہ 10 جنوری کو ای سی ایل والے معاملے میں مزید پیش رفت متوقع ہے۔اومنی گروپ کے وکیل نے کہا کہ معاملہ کمیٹی کو بھیج کر الجھا دیا گیا ہے، معلوم نہیں کمیٹی کب اقدامات کرے۔چیف جسٹس پاکستان اومنی گروپ کے وکیل کی بات پر برہم ہوگئے، انہوں نے کہاکہ آپ کو مسئلہ ہے تو میں نام ڈال دیتا ہوں ای سی ایل میں؟ چھوڑیں کابینہ کو،اصل کیس کی طرف آپ آ نہیں رہے۔انہوں نے مزید کہا کہ اومنی کے خلاف اتنامواد آ چکا ہے کہ کوئی آنکھیں بند نہیں کر سکتا، اوپر سے چینی کی بوریاں بھی اٹھا لی گئیں، یہ بتائیں کہ معاملہ اب کس کورٹ کو بھیج دیں؟

لاہور(نیٹ نیوز/ایمرا نیوز) وفاقی وزیر ریلوے شیخ رشید احمدکا کہنا ہے کہ بے نظير کی شہادت کا پوری قوم کو نقصان ہوا ، آصف زرداری کو فائدہ ہوا۔ دنیا میں کوئی ایسا قصہ ہے کہ وصیت نوکرانی کے پرس سے نکلی ہو؟وزیرریلوے نے لاہور میں پریس کانفرنس کرتے ہوئے کہا کہ میری زندگی کا اصول ہے کہ نمبر ون سے دوستی کرتا ہوں اور نمبر ون سے ہی دشمنی کرتا ہوں۔ جس کا مورل کریکٹر نہ ہو، جس پر لاتعداد کیسز ہوں، اس چور کو چوکیدار نہیں بنایا جاسکتا۔انہوں نے کہا کہ شاہد خاقان ایل این جی کا چور ہے اس کو جیل جانا ہے ،چیف جسٹس نے ریلوے سے متعلق کیسز جلد نمٹانے کی ہدایت کی ہے، اس سال کے آخر تک 20نئی ٹرینیں چلانے کا ہدف ہے۔شیخ رشید کا کہنا ہے کہ ریلوے پولیس کی تنخواہ پنجاب پولیس کے برابر کی جا رہی ہے، بغیر ٹکٹ سفر کرنے والوں سے گزشتہ ماہ 6کروڑ روپے جرمانے کی مد میں وصول کیے۔انہوں نے مزید کہا کہ دو وی وی آئی پی ٹرینیں چلائی جارہی ہیں، ریڈیو پاکستان ریلوے بھی شروع کیا جارہا ہے، جس کا لائسنس حاصل کیا جارہا ہے، اس ایف ایم ریڈیو چینل میں خبریں اور انٹرٹینمنٹ ہوگی۔وفاقی وزیر ریلوے نے کہا کہ یہ تبدیلیوں کا سال ہے، پاکستان ریلوے میں بھی تبدیلیاں آئیں گی، فوڈ ڈپارٹمنٹ نے اپنی عدالت لگائی ہوئی ہے، غریبوں کی دکانیں بند کررہے ہیں۔ان کا کہنا ہے کہ غریبوں پر 50ہزار روپے کے بجائے 5 ہزار روپے تک کا جرمانہ کیا جائے، وزیراعلیٰ پنجاب سے ملاقات میں فوڈ ڈپارٹمنٹ کی کارروائیوں اور نالہ لئی پر بات ہوگی۔شیخ رشید نے مزید کہاکہ دنیائے سیاست کے سب سے بڑے ڈاکو کو پبلک اکاؤنٹس کمیٹی کا چیئرمین بنایا گیا، چیئرمین پبلک اکاؤنٹس کمیٹی کا تقرر پی ٹی آئی کا مسئلہ ہے۔انہوں نے کہا کہ آصف زرداری کا لیول فالودہ والا، گول گپے والا تھا، مجھے خدشہ ہے کہ بلاول بھٹو زرداری کو پھنسایا گیا، کرپشن پر بات کروں تو میرے پیچھے میراثی چھوڑ دیتے ہیں۔وزیر ریلوے نے کہا کہ جس جس آدمی کا کیس ہو، اس پر 30مارچ سے پہلے جھاڑو پھرے گی، بھارت کی 5ریاستوں میں مودی کی گؤ ماتا ہار گئی۔ان کا مزید کہنا ہے کہ وزیر اعظم عمران خان نے زلمے خلیل زاد کے ساتھ مل کر بھارت کی پوزیشن کمزور کی، جس کے بعد امریکا کے صدر اب پاکستان سے بہتر تعلقات کی بات کر رہے ہیں۔شیخ رشید نے یہ بھی کہا کہ پاکستان علاقائی قوتوں سے بہتر تعلقات بنا رہا ہےاور جلد معاشی بحران سے نکلنے جا رہا ہے، ترک وزیر سے بھی کہا ہے کہ پاکستان ریلوے میں سرمایہ کاری کریں۔انہوں نے کہا کہ ہم کرپشن کریں تو 14 سال کی سزا ہونی چاہیے، پیپلزپارٹی جو کیسز لڑ رہی ہے اس میں پی ٹی آئی کا کیا معاملہ ہے؟شیخ رشید نے یہ بھی کہا کہ غیر ضروری نام ای سی ایل سے نکال دینا چاہئیں،کاش قوم یہ سیکھے کہ کرپٹ لوگوں کی زندگی کا انجام بیماریاں اور قحط ہوتی ہیں.

لاہور(نیٹ نیوز/ایمرا نیوز) چیف جسٹس آف پاکستان جسٹس میاں ثاقب نثار کہتے ہیں کہ انگریز کے دور میں نافذ کیا گیا قانون ہماری روایات اور اسلام سے مطابقت نہیں رکھتا۔چیف جسٹس پاکستان نے لاہور انسٹی ٹیوٹ آف ہیلتھ سائنسز کی تقریب میں خطاب کرتے ہوئے مزید کہا کہ جس معیار کا معاشرہ اسلامی ریاست میں ہونا چاہیے، وہ موجود نہیں۔انہوں نے کہا کہ تعلیم کے بغیر کوئی معاشرہ آگے نہیں بڑھ سکتا، بلوچستان کے دور افتادہ علاقوں میں اسکول موجود ہی نہیں، بلوچستان میں جہاں اسکول ہیں وہاں چار دیواری، پانی اور دیگر بنیادی سہولتیں دستیاب نہیں۔چیف جسٹس کا کہنا ہےکہ ترقی کے 4بنیادی عناصر میں دیانت دار قیادت بھی شامل ہے، زندگی صرف زندہ رہنے کا نام نہیں، اس کے کئی پہلو ہیں۔انہوں نے مزید کہا کہ انسانوں ہی کے نہیں، جانوروں، کیڑے مکوڑوں اور نباتات کے بھی حقوق ہیں، انسان کے دو بنیادی حقوق ہیں، عدلیہ ہی انسان کے بنیادی حقوق کو تحفظ فراہم کرتی ہے۔چیف جسٹس پاکستان نے یہ بھی کہا کہ ہمیں اس قانون کو موجودہ دور کے مطابق ڈھالنے کے لیے قانون سازی کرنا ہوگی، اسی وجہ سے معاشرے میں بے چینی پھیلتی ہے۔

لاہور(نیٹ نیوز/ایمرا نیوز) مسلم لیگ (ن) کے سینئر رہنما خواجہ سعد رفیق نے کہا ہےکہ عمران خان کو حکمران بنانے والے خود پچھتا رہے ہیں، انصاف اور احتساب کے نام پر انتقام ہو رہا ہے جوزیادہ دیر نہیں چلے گا۔خواجہ سعد رفیق نے لاہور کی نیب عدالت میں پیشی کے موقع پر میڈیا سے گفتگو کرتے ہوئے کہا کہ نالائقوں کے حوالے پاکستان کردیا ہے،منی بجٹ آرہا ہے جو مہنگائی کا طوفان لا رہا ہے۔خواجہ سعد رفیق نے مزید کہا کہ سول آمریت کی حکومت سے عوام کی جان جلد چھوٹے گی، یہ نااہل حکمران ہے جو اس وقت بھکاری بنا ہوا ہے، پاکستان کا وزیر اعظم کشکول لے دنیا میں گھوم رہا ہے۔سابق وفاقی وزیر کا کہنا تھا کہ ملک میں انصاف اور احتساب کے نام پر انتقام ہورہا ہے جو زیادہ دیر نہیں چلے گا، یہ وقت بدلے اور بہت جلد بدلے گا، ہمارے ہاتھ صاف ہیں، ضمیر مطمئن ہے۔

گلیات(نیٹ نیوز/ایمرا نیوز) گلیات ڈیولپمنٹ اتھارٹی (جی ڈی اے) کے ترجمان احسن حمید کا کہنا ہے کہ گلیات میں ڈیڑھ فٹ تک برف پڑ چکی ہے۔گلیات میں ہونے والی برف باری کے حوالے سے گلیات ڈیولپمنٹ اتھارٹی کی جانب سے سیاحوں کے لیے ٹریفک ایڈوائزری جاری کی گئی ہے۔

جی ڈی اے کی ٹریفک ایڈوائزری میں ترجمان نے مزید کہا کہ شدید برف باری کے پیش نظر اضافی اسٹاف تعینات کر دیا ہے،برف باری تھم جانے کے بعد سڑکوں کو کلیئر کر دیا جائے گا۔انہوں نے ہدایت کی ہے کہ گلیات میں سیاح صرف پیٹرول گاڑی پر ہی سفر کریں، اترائی میں کم گیئرز اور حد رفتار کی پابندی کریں۔احسن حمید نے یہ بھی کہا ہے کہ گلیات ڈیولپمنٹ اتھارٹی کے عملے کی چھٹی منسوخ کر دی گئی ہے اور انہیں فیلڈ میں رہنے کی ہدایت بھی کی گئی ہے۔

لاہور(نیٹ نیوز/ایمرا نیوز) لاہور کی احتساب عدالت نے نیب کو مسلم لیگ ن کے صدرشہباز شریف سے آمدن سے زائد اثاثوں کے کیس میں جیل میں تفتیش کی اجازت دیدی ۔نیب لاہور کی جانب سے احتساب عدالت میں درخواست دی گئی کہ وہ شہباز شریف سے جیل میں تفتیش کرنا چاہتے ہیں۔درخواست میں موقف اختیار کیا گیا تھا کہ شہباز شریف کے اثاثے ذرائع آمدن سے مطابقت نہیں رکھتے جبکہ آمدن سے زائد اثاثوں کےکیس میں شہبازشریف سے تفتیش بھی مکمل نہیں ہوئی ہے۔نیب حکام کی جانب سے عدالت سے درخواست کو منظور کرنے کی استدعا کی گئی، جس کے بعد عدالت نے نیب حکام کی درخواست منظور کرتے ہوئے شہباز شریف سے جیل میں تفتیش کرنے کی اجازت دیدی ہے ۔

لاہور(نیٹ نیوز/ایمرا نیوز) رواں سال کا پہلا سورج گرہن کل ہوگا، مگر اس کا مشاہدہ پاکستان میں نہیں کیا جاسکے گا۔محکمہ موسمیات کے مطابق سورج کو کل جزوی گرہن کل لگے گا، اس سوج گرہن کا آغاز پاکستانی وقت کے مطابق شام 4 بجکر 34 منٹ پر ہوگا جس کے بعد 6 بجکر 41 منٹ پر یہ گرہن اپنے عروج پر ہوگا۔جزوی سورج گرہن کا یہ عمل 8 بجکر 49 منٹ پر اختتام پذیر ہو جائے گا، سورج گرہن کا یہ نظارہ شمال مشرقی ایشیا، شمالی پیسفک، روس، کوریا، تائی پے اور ٹوکیو میں ممکن ہوگا۔

کیپ ٹاؤن(سپورٹس ڈیسک/ایمرا نیوز) کیپ ٹاؤں میں پاکستان کی دوسری اننگ کا آغاز بھی مایوس کن رہا اور اوپنر امام الحق 6 رنز بنا کر ڈیل اسٹین کا شکار بنے۔اس سے قبل دوسرے ٹیسٹ میں میزبان جنوبی افریقا اپنی پہلی اننگ میں 431 رنز بنا کر آوٹ ہوگئی۔پاکستان کے خلاف جاری 3 ٹیسٹ میچوں کی سیریز کے دوسرے میچ میں جنوبی افریقا نے پاکستان کی پہلی اننگ کے اسکور 177 رنز کے جواب میں 431 رنز بنائے اور یوں اس کو پاکستان پر 254 رنز کی سبقت حاصل ہے۔جنوبی افریقا کی جانب سے کپتان ڈوپلیسی نے 103 رنز بنائے جبکہ مارکہم 78 ،بووما 75 اور ڈی کوک نے 59 رنز بنائے۔پاکستان کی جانب سے شاہین آفریدی اور محمد عامر نے چار چار کھلاڑیوں کو آؤٹ کیا جبکہ محمد عباس اور شان مسعود نے ایک ایک وکٹ حاصل کی۔

لاہور(نیٹ نیوز/ایمرا نیوز) اطالوی نوجوان نے اپنی محبوبہ کو دوران پرواز درجنوں مسافروں کے سامنے شادی کی پیشکش کرڈالی۔اٹلی سے تعلق رکھنے والے نوجوان نے اپنی محبوبہ کو دوران پرواز درجنوں مسافروں کے سامنے شادی کی پیشکش کرڈالی۔محبوبہ جو کہ ایئرلائن میں اسٹیورڈکے فرائض انجام دے رہی تھی۔نوجوان نے دوران پروازعملے کے ساتھ ملکر سرپرائز دیا جس پر اُسکی محبوبہ حیران رہ گئی اورپھر خوشی و حیرت کے ملے جلے تاثرات کے ساتھ ہاں کردی۔