Tag bollywood

کراچی(ایمرا نیوز آن لائن) سابق گلوکارہ رابی پیرزادہ نے اپنے سوشل میڈیا اکاؤنٹ پر ایک ویڈیو شیئر کی ہے جس میں وہ اردو ترجمے کے ساتھ قرآن پاک کی تلاوت کرتی ہوئی نظر آرہی ہیں۔
شوبزکی دنیا چھوڑ کر دین کی راہ اپنانے والی سابق گلوکارہ رابی پیرزادہ آج کل دین کی تعلیم حاصل کرنے میں مصروف ہیں۔ گزشتہ روز انہوں نے اپنے سوشل میڈیا اکاؤنٹ پر ایک ویڈیو شیئر کی جس میں وہ اپنے استاد کی رہنمائی میں قرآن پاک کو اردو ترجمے کے ساتھ پڑھ رہی ہیں۔

رابی پیرزادہ کے ساتھ بیٹھے ہوئے ان کے استاد نے کئی جگہ پر قرآن پڑھتے ہوئے ان کی رہنمائی بھی کی۔ ویڈیو کے ساتھ رابی پیرزادہ نے نئے سال کا عہد لیتے ہوئے لکھا کب سے میں لائیو قرآن پاک کی تلاوت کررہی ہوں ، مگر اس نئے سال میں مجھے دین سیکھنا اور پھیلانا ہے اور وہ بھی ترجمے کے ساتھ۔

رابی پیرزادہ نے تمام لوگوں کو نصیحت کرتے ہوئے لکھا کہ کچھ وقت اللہ کو دے کر آپ بھی دیکھیں کیا پتہ آپ کی زندگی بھی بدل جائے۔

واضح رہے رابی پیرزادہ میں تبدیلی گزشتہ برس اس وقت آئی تھی جب ان کے موبائل فون سے ان کی کچھ نجی ویڈیوز اورتصاویر لیک ہوگئی تھیں جس کے بعد رابی پیرزادہ نے خدا سے اپنے گناہوں کی معافی مانگتے ہوئے شوبز سے کنارہ کشی اختیار کرنے کا اعلان کیا تھا اور کہا تھا کہ اب وہ اپنی باقی زندگی دین اسلام کے مطابق گزاریں گی۔

لاہور(ایمرا نیوز آن لائن)اداکارہ مہوش حیات نے گزشتہ روز امریکی فضائی حملے میں جاں بحق ہونے والے ایرانی کمانڈر قاسم سلیمانی کے قتل کی مذمت کی ہے۔سیاست کی بات کی جائے یا کسی سماجی مسائل کی تو ستارہ امتیاز حاصل کرنے والی پاکستانی اداکارہ مہوش حیات ٹوئٹر پر اپنے خیالات کا اظہار کرنے میں کبھی پیچھے نہیں رہتی۔

مہوش حیات نے ٹوئٹر پر ایرانی کمانڈر قاسم سلیمانی کے قتل کی مذمت کرتے ہوئے لکھا کہ ’’یقین نہیں ہو رہا کہ نئے سال کے 72 گھنٹے گزرنے کے بعد ہی دنیا جنگ کے دہانے پر کھڑی ہے‘‘۔

اداکارہ نے مزید لکھا کہ ’’ایسا تب ہی ہوتا ہے جب آزاد ممالک کے رہنما بین الاقوامی قوانین اور حالات کی پرواہ کیے بغیر یکطرفہ فیصلےکرتے ہیں اور یہ صرف ایران اور امریکا تک ہی محدود نہیں، اللّہ ہماری حفاظت کرے‘‘۔

مہوش حیات اپنے ٹوئٹ پیغام کے اختتام میں ہیش ٹیگ ’سلیمانی‘ بھی لکھا۔ایک صارف نے مہوش کے ٹوئٹ پر طنزیہ کمنٹ لکھا کہ’جب سے خواتین نے بین الاقوامی امور میں دلچسپی لینا شروع کیا ہے۔‘

مہوش نے صارف کو جواب دیتے ہوئے لکھا کہ ’’فرانس کی عظیم خاتون جون آف آرک، حسن و خوبصورتی کی شاہکار قدیم مصری ملکہ قلوپطرہ، برطانیہ کی پہلی خاتون وزیرِاعظم مارگریٹ تھیچر اور پاکستان کی واحد خاتون وزیر اعظم بے نظیر بھٹو شہید کا نام لیتے ہوئے کہا کہ یہ تو محض چند نام ہیں‘‘۔

اداکارہ نے صارف کے کمنٹ کا جواب دیتے ہوئے مزید کہا کہ ’’وہ وقت آگیا ہے کہ آپ اپنی اس چھوٹی جگہ سے باہر آجائیں جہاں آپ رہ رہے ہیں اور کافی سے لطف اندوز ہورہے ہیں‘‘۔

واضح رہے کہ گزشتہ روز ایرانی پاسدارانِ انقلاب کی قدس فورس کے سربراہ میجر جنرل قاسم سلیمانی عراق میں امریکی راکٹ حملے میں جاں بحق ہوگئے تھے۔

لاہور(ایمرا نیوز آن لائن) قندیل بلوچ کیس: سعودی عرب میں گرفتار مقتولہ کا بھائی پاکستان کے حوالے ماڈل گرل قندیل بلوچ کو 15 جولائی 2016 کو مظفرآباد میں غیرت کے نام پر قتل کیا گیا تھا سعودی انٹرپول نے قندیل بلوچ قتل کیس کے اشتہاری ملزم اور مقتولہ کے بھائی ملزم مظفراقبال کو پاکستان کے حوالے کردیا۔ ماڈل گرل قندیل بلوچ کو 15 جولائی 2016 کو مظفرآباد میں غیرت کے نام پر قتل کیا گیا تھا، قتل کیس کی 152 سماعتیں ہوئیں جو 17 جولائی 2016 سے 26 ستمبر 2019 تک جاری رہیں۔

عدالت نے کیس کے مختصر فیصلے میں لکھا تھا کہ مقتولہ کے بھائی ملزم وسیم نے اقبال جرم کیا جس پر اسے عمر قید کی سزا سنائی جاتی ہے جب کہ دیگر تمام ملزمان جن میں مفتی عبدالقوی سمیت قندیل بلوچ کے بھائی عارف، مظفر اقبال، کزن حق نواز، اسلم شاہین اور ٹیکسی ڈرائیور عبدالباسط شامل تھے کو بری کر دیا گیا تھا۔

مقتولہ قندیل بلوچ کے دونوں بھائی عارف اور مظفر مقدمے میں نامزد تھے جو فرار ہو کر سعودی عرب چلے گئے تھے۔گزشتہ برس اکتوبر میں ملزم عارف کو انٹرپول کی مدد سعودی عرب سے گرفتار کر کے ملتان منتقل کیا گیا تھا اور اب دوسرے بھائی ملزم مظفراقبال کو پاکستان کے حوالے کر دیا گیا ہے۔واضح رہے کہ قندیل بلوچ کے والد عظیم کی جانب سے عدالت میں درخواست دائر کی گئی تھی جس میں کہا گیا تھا کہ ہم نے اللہ کی رضا کی خاطر اپنے بیٹوں کو معاف کر دیا ہے لہذا عدالت بھی انہیں معاف کر دیا جائے۔

لاہور(ایمرا نیوز آن لائن)ماہرہ شوٹنگ کس وجہ سے منسوخ کرتی ہیں؟ماہرہ خان نے انکشاف کیا ہے کہ وہ بالی ووڈ کی کامیاب ترین فلم ’دل والے دلہنیا لے جائیں گے‘ بغیر بور ہوئے 10 سے زائد بار دیکھ سکتی ہیں۔

مائیکرو بلاگنگ سائٹ ٹوئٹر پر ماہرہ خان نے ’آسک ماہرہ‘ کا سیشن رکھا جس میں انہوں نے مداحوں کے سوالوں کے جواب دیئے۔ماہرہ کے اس سیشن میں ناصرف ان کے مداحوں نے بڑھ چڑھ کر حصہ لیا بلکہ مشہور و معروف شخصیات نے بھی ماہرہ سے سوالات کئے۔صارف نے ماہرہ سے گلوکار عاطف اسلم کے پسندیدہ گانے پوچھے تو ماہرہ نے عاطف اسلم کے تین گانے میری کہانی، ہونا تھا پیار، ربا سچیا کا نام لیا۔

عثمان نامی ایک صارف نے پوچھا کہ کیا کبھی ایرانی فلم میں کام کرنے کے بارے میں سوچا ہے؟ماہرہ کا کہنا تھا کہ انشاء اللہ ایک دن ضرور کروں گی۔ایک صارف نے آخری دہائی کی بہترین یاد پوچھی تو ماہرہ نے بیٹے اذلان کی پیدائش کا کہا۔پاکستان کی صف اول کی اداکارہ ماہرہ خان نے بتایا کہ وہ صرف اپنے بیٹے کی وجہ سے کوئی بھی شُوٹنگ منسوخ کرواتی ہیں ۔

ایک صارف نے ماہرہ سے کہا کہ آپ کو عوام میں کبھی غصہ کرتے ہوئے نہیں دیکھا، آپ اس سب پہ کیسے قابو پاتی ہیں؟ماہرہ نے جواب دیا کہ مجھے غصہ آتا بھی ہے اور غصہ کرتی بھی ہوں لیکن صرف قریبی دوستوں پر ۔

ایک صارف کے جواب پر ماہرہ نے بریانی سے اپنی پسندیدگی کا اظہار کیا۔شادی کے بارے میں سوال کا جواب دیتے ہوئے ماہرہ نے کہا کہ جب انہیں لگا کہ شادی کرنی چاہیے وہ کر لیں گی۔سرحد پار بھارت سے بھی ماہرہ کے مداحوں نے ان کے اس سیشن میں حصہ لیا۔جویریہ صدیقی نے ماہرہ سے پچھلی صدی کا جائزہ لینے کا کہا تو ماہرہ نے بڑا دلچسپ جواب دیتے ہوئے لکھا کہ ’اس فلم میں پیار، ایکشن، جذبات، محبت، حادثات سب ہیں۔سیشن کے اختتام پر ماہرہ نے اپنے مداحوں کا شکریہ ادا کرتے ہوئے نئے سال کی مبارکباد بھی دی۔

لاہور(ایمرا نیوز آن لائن)اسٹیج اور ٹی وی کے معروف اداکار اشرف راہی انتقال کر گئے اسٹیج، ٹی وی اور فلم کے معروف اداکار اشرف راہی دل کا دورہ پڑنے سے انتقال کر گئے۔اداکار اشرف راہی کو دل کا دورہ پڑنے پر خاندانی ذرائع کے مطابق اشرف راہی دل کا دورہ پڑنے کے لاہور کے پنجاب انسٹی ٹیوٹ آف کارڈیالوجی (پی آئی سی) منتقل کیا گیا تاہم وہ جانبر نہ ہو سکے۔

خاندانی ذرائع کے مطابق اداکار اشرف راہی کی نماز جنازہ لال پل پنج پیر کے قریبی گراؤنڈ میں نماز ظہر کے بعد ادا کی جائے گی۔ مرحوم نے سوگواران میں تین بیٹے اور ایک بیٹی چھوڑی ہے۔اسٹیج، ٹی وی اور فلم اداکار اشرف راہی نے درجنوں اسٹیج ڈراموں، ٹی وی اور فلموٕں میں کام کیا اور وہ مزاح میں اپنا منفرد مقام رکھتے تھے۔

اشرف راہی نے اسٹیج ڈراموں شرطیہ مٹھے، مس رانگ کال، منڈے نا سمجھو، ماہی مینوں چھلا پوا دے کے علاوہ پنڈ دی کڑی اور مجاجن جیسی فلموں میں سائیڈ رول ادا کیے۔

(ایمرا نیوزآن لائن) 80 سے زائد خواتین کے ساتھ جنسی ہراسانی کے الزامات میں گرفتار ہالی وڈ پروڈیوسر ہاروی وائن اسٹین اور ان کے سابق فلم اسٹوڈیو بورڈ نے 2 کروڑ 50 لاکھ ڈالرز میں متاثری کے ساتھ تصفیہ کر لیا۔

غیر ملکی میڈیا کے مطابق ہاروی وائن اسٹین نے جنسی ہراسانی کے الزامات لگانے والے افراد سے 25 ملین ڈالرز کا معاہدہ کیا ہے جس کے تحت نا تو وہ کوئی بھی غلط کام قبول کریں گے اور نا ہی کوئی اور جرمانہ ادا کریں گے۔ وائن اسٹین کمپنی کی نمائندگی کرنے والی انشورنس کمپنیاں اس تصفیے کی لاگت کو پورا کریں گی۔

مجوزہ تصفیہ میں شامل بڑی جماعتوں سے ابتدائی منظوری حاصل ہو گئی ہے جب کہ اس معاہدے کو آگے بڑھنے کے لیے عدالت کی منظوری کی ضرورت ہو گی۔ خیال رہے کہ اکتوبر 2017 میں شائع ہونے والی نیویارک ٹائمز کی تہلکہ خیز تحقیقاتی رپورٹ نے اس اسکینڈل کا انکشاف کیا تھا جس کے بعد خواتین کی بڑی تعداد نے ہالی وڈ پروڈیوسر سے متعلق ہوشرُبا حقائق سے پردہ اٹھایا تھا۔

ان ہی انکشافات کے بعد ’می ٹو‘ مہم کا بھی آغاز ہوا تھا۔ وائن اسٹین پر الزامات لگانے والی خواتین میں ہالی وڈ کی صف اول کی اداکارائیں انجیلینا جولی، سلما ہائیک، گائینتھ پیلٹرو، ایشلے جَڈ، روز میک گوئن اور ہیتھر گراہم شامل ہیں۔

سلمیٰ ہائیک نے ہاروی وائن اسٹین کے حوالے سے بتایا تھا کہ کس طرح ان کو ہراساں کرتے تھے اور دھمکیاں دیتے تھے۔ سلمیٰ ہائیک نے بتایا تھا کہ 2002 میں فلم ” فریدا ” میں سرمایہ لگانے کے بعد ہاروی وائن اسٹین نے انہیں بلیک میل کرنا شروع کیا اور طرح طرح کی جنسی خواہشات کی بھرمار کی۔ اداکارہ کے مطابق ہر بار کا انکار وائن اسٹین کا غصہ بڑھاتا رہا یہاں تک کہ پروڈیوسر نے ایک بار قتل کی بھی دھمکی دی۔

پاکستان(ایمرا نیوز آن لائن) کے نامور آرٹسٹ علی گل پیر نے اپنے منفرد انداز میں بالی وڈ کی اداکارہ پریانکا چوپڑا کو طنز کا نشانہ بنایا ہے جو کہ سوشل میڈیا پر خوب وائرل ہورہا ہے۔

پریانکا چوپڑا نے رواں برس فروری میں اپنی ایک ٹوئٹ میں بھارت کے پلوامہ حملے کو سراہا اور پاکستان بھارت جنگ کو بڑھاوا دینے کا تاثر دیا تھا۔ جس کے بعد ایک ایونٹ کے دوران اداکارہ سے سوال و جواب کا سیشن ہوا جس میں ایک صحافی عائشہ ملک نے اداکارہ پر شدید تنقید کی تھی۔

انہوں نے کہا کہ آپ امن کے لیے اقوام متحدہ کے ذیلی ادارے یونیسیف کی خیرسگالی سفیر ہیں لیکن آپ نے ایٹمی لڑائی کو ترجیح دی جس میں کسی کی جیت نہیں۔ سوال کے دوران عائشہ ملک سے مائیک چھین لیا گیا تھا جب کہ اس دوران انہوں نے “when you are done venting” یعنی “جب آپ اپنی بھڑاس نکال لیں” کا جملہ استعمال کیا۔

اداکارہ پریانکا چوپڑا کے رویے پر انہیں اقوام متحدہ کے ادارے یونیسف کی خیرسگالی کی سفیر ہونے کی وجہ سے سماجی رابطے کی ویب سائٹ پر شدید تنقید کا سامنا کرنا پڑاتھا جو اب تک جاری ہے۔ گلوکار علی گل پیر نے اداکارہ پریانکا چوپڑا کے میٹ گالا لُک کا انتخاب کرکے انہیں کیپشن میں طنز کا نشانہ بنایا۔

اداکارہ پریانکا چوپڑا کے عائشہ ملک کو دیے جانے والے جواب کو مدِنظر رکھتے ہوئے علی گُل پیر نے بھی اپنے کیپشن میں “venting” یعنی “بھڑاس” کا الفاظ کا استعمال کرکے اداکارہ پر طنز کیا۔ علی گل پیر نے تصویر کے کیپشن میں لکھا کہ ’when you are done venting‘۔ سوشل میڈیا پر علی گل پیر کا انداز خوب وائرل ہورہا ہے اور اس پر صارفین کی جانب سے بھی دلچسپ تبصروں بھی کیے جا رہے ہیں۔

لاہور(ایمرا نیوزآن لائن) گلوکارہ میشا شفیع نے اپنے خلاف اداکار اور گلوکار علی ظفر کی جانب سے 100 کروڑ روپے ہرجانے کے دعوے میں بیان ریکارڈ کرا دیا۔

گلوکارہ میشا شفیع بیان ریکارڈ کرانے اپنی والدہ اداکارہ صبا حمید کے ساتھ تیسری بار ایڈیشنل سیشن جج امجد علی شاہ کی عدالت میں پیش ہوئیں، انہوں نے 3گھنٹے سے زائد وقت تک بیان ریکارڈ کرایا۔ میشا شفیع نے اپنے اس الزام کو دہرایا کہ انہیں ساتھی گلوکارعلی ظفر نے متعدد بار جنسی طور پر ہراساں کیا، انہوں نے انتہائی مجبوری کی حالت میں یہ بات ظاہر کی۔ گلوکارہ کے مطابق انہوں نے بہت عرصے تک ایک ساتھ پرفارم کرنا تھا لیکن وہ اس رویے کو مزید برداشت نہیں کرسکتی تھیں۔

‘شوہر تربیت یافتہ باکسر ہیں ،نہیں چاہتی تھی کہ لڑائی ہو ‘: میشا کے مطابق علی ظفر نے اپنے سسر کے گھر پر پہلی بار ہراساں کیا، علی ظفر کایہ رویہ ان کے لیے حیران اور پریشان کن تھا، انہوں نے فوری طور پر اس گھر کے لان میں موجود اپنے شوہر کو ان باتوں سے آگاہ کیا ،لیکن ساتھ ہی شوہر کو علی ظفر سے اس معاملے پر بات کرنے سے روک دیا کیونکہ ان کے شوہر تربیت یافتہ باکسر ہیں اور وہ نہیں چاہتی تھیں کہ لڑائی ہو۔

میشا شفیع نے یہ بھی بتایاکہ علی ظفر کی فیملی سے تعلق ہونے کی وجہ سے انہوں نے یہ بات ان کی بیوی کو نہیں بتائی، میشا شفیع نے عدالت میں مختلف واٹس ایپ میسجز بھی دکھائے۔ احاطہ عدالت میں میشا شفیع نےمیڈیا کو بتایا کہ انہیں ڈرانےاوردباؤ میں لانے کے لیے کیس فائل کیا گیا ہے ،ہراسانی کے الزامات لگانے کے بعد ان کاکافی مالی نقصان بھی ہوچکا ہے۔ عدالت نے کیس پر مزیدسماعت 20 دسمبر تک ملتوی کردی، آئندہ سماعت پرمزید گواہوں کے بیانات ریکارڈ کیے جائیں گے۔ میشا شفیع نے گلوکارعلی ظفر پر جنسی ہراساں کرنے کا الزام لگا دیا میشا شفیع کا کہنا تھا کہ جنسی ہراسانی پر بات کرنا آسان نہیں لیکن اس پر خاموش رہنا بھی بہت مشکل ہے، میں خاموش رہنے کے کلچر کو توڑوں گی جو معاشرے میں سرائیت کرچکا ہے۔

گلوکار و اداکار علی ظفر نے میشا شفیع کی جانب سے ہراساں کرنے کے الزامات کی تردید کر تے ہوئےکہا تھا کہ میں الزام کا جواب الزام سے نہیں دوں گا بلکہ میشا شفیع کے خلاف عدالت جاؤں گا اور مجھے پورا یقین ہے کہ سچ ہمیشہ غالب ہوتا ہے۔ علی ظفر کی جانب سے ہراسانی کا الزام لگانے پر میشا شفیع پر 100 کروڑ روپے ہرجانے کا مقدمہ دائر کیا گیا ہے۔

(وقت نیوزآن لائن) چند روز سے امریکی ریاست فلوریڈا کی ایک آرٹ گیلری میں ’دیوار پر ٹیپ سے چپکا کیلا‘ سب کی توجہ کا مرکز بنا ہوا ہے۔

یہ فن پارہ ایک اطالوی کامیڈین و آرٹسٹ ماریزیو کیٹیلان کا تھا جو میامی آرٹ بیزل میں ایک لاکھ 20 ہزار امریکی ڈالرز میں فروخت ہوا تھا۔ آرٹسٹ ماریزیو کی یہ کلیکشن 3 ایڈیشنز پر مشتمل تھی جس میں سے 2 ایڈیشن فروخت ہو چکے ہیں جب کہ اس ایڈیشن کا ایک پیس بچا ہوا ہے، اور یہ پیس 1 لاکھ 50 ہزار ڈالرز میں فروخت ہونے کی توقع کی جا رہی ہے۔

بعد ازاں ڈیوڈ دتونا نامی شخص نے آرٹ گیلری میں موجود لاکھوں روپے مالیت کا دیوار پر ٹیپ سے چپکا کیلا اتارکر کھا لیا تھا جس پر وہاں موجود سب لوگ حیران رہ گئے تھے۔ ڈیوڈ دتونا کی جانب سے کیلا کھانے کے فوری بعد آرٹ گیلری کے ایک اسٹاف ممبر کی جانب سے تھوڑے غصے اور ناراضگی کا اظہار کیا گیا تاہم اس پر ان کے خلاف کوئی کارروائی نہیں کی گئی اور دیوار پر ایک اور کیلا چپکا دیا گیا تھا۔

سوشل میڈیا پر جہاں اس کیلے کو لے کر بحث جاری ہے وہیں پاکستان کی نامور اداکارہ مہوش حیات نے بھی کروڑوں روپے مالیت کے کیلے کے آرٹ پیس پر دلچسپ تبصرہ کر ڈالا۔ اداکارہ مہوش حیات نے عجیب و غریب خبر پر ردِعمل کا اظہار کرتے ہوئے مائیکرو بلاگنگ سائٹ ٹوئٹر پر دلچسپ تبصرہ کیا۔ اداکارہ نے لکھا کہ ’میں خود آرٹ سے محبت کرنے والوں میں سے ایک ہوں لیکن میں کچھ چیزیں سمجھنے سے قاصر ہوں جسے آج کل آرٹ سمجھا جا رہا ہے۔‘

اداکارہ مہوش حیات سابق صدر پرویز مشرف کے حق میں بول پڑیں: مہوش حیات نے دلچسپ انداز اپناتے ہوئے کہا کہ ’دراصل میں بھی ایک آرٹسٹ بننے کے بارے میں سوچ رہی ہوں اور ایک کریلے کو بذریعہ ٹیپ دیوار پر چپکانے کے بارے میں سوچ رہی ہوں۔‘ تمغہ امتیاز حاصل کرنے والی اداکارہ مہوش حیات نے لکھا کہ ’اگر ایک کیلا کروڑوں میں فروخت ہوسکتا ہے تو کریلا دیوار پر چپکانے سے حیرت انگیز فائدہ مل سکتا ہے‘۔

مہوش حیات کے ٹوئٹ پر صارفین نے بھی ملے جلے انداز میں تبصرے کرنا شروع کر دیئے۔ یاسر احمد نامی صارف نے مزاحیہ انداز میں تبصرہ کرتے ہوئے لکھا کہ ’آپ کو ٹماٹر کا استعمال کرنا چاہیے کیونکہ ان دنوں اس کی قیمت بہت ہے‘۔ ایک اور صارف نے طنزیہ انداز اپناتے ہوئے لکھا کہ ’میں یہ سمجھنے سے قاصر ہوں، ہم اس آرٹ کو کیا نام دیں گے؟‘ ایک اور صارف نے ملے جلے انداز میں تبصرہ کیا کہ ’ایسا ٹماٹر کے ساتھ کریں، پاکستان کے موجوہ حالات میں اس کی قیمت بہت زیادہ ہے‘۔

(ایمرا نیوزآن لائن) بالی وڈ کی معروف اور کامیاب ترین فلم ’دبنگ‘ کا سیکیوئل ’دبنگ تھری‘ جلد سینما گھروں کی زینت بننے والا ہے لیکن سوشل میڈیا صارفین ’بائیکاٹ دبنگ تھری‘ کا ہیش ٹیگ کیوں استعمال کر رہے ہیں؟ بالی وڈ اداکار سلمان خان کے دنیا بھر میں بے شمار مداح ہیں اور لوگ انہیں بے حد پسند کرتے ہیں اور ان کی آنے والی ہر فلم اور گانے کو دیکھنے کے لیے بیتاب ہوتے ہیں۔

سلمان خان کی کامیاب ترین فلموں میں سے ایک ’دبنگ‘ تھی جس کا سیکیوئل جلد نمائش کے لیے پیش کر دیا جائے گا لیکن سوشل میڈیا پر صارفین کے مطابق سلمان خان کی آنے والی فلم ’دبنگ تھری‘ میں ہندوؤں کے جذبات کو مجروح کیا گیا ہے۔ صارفین کا کہنا ہے کہ اس فلم کے ایک گانے ’ہُڑہُڑ دبنگ‘ میں ہندو درویش ’سادھو‘ کی طرح لباس پہنے کچھ لوگ گٹار بجاتے ہوئے رقص کرتے دکھائی دے رہے ہیں۔

صارفین کے مطابق یہ گانا ان کے لیے ہندو ثقافت کی تذلیل ہے، یہی وجہ ہے کہ مداحوں کی جانب سے اس فلم پر پابندی لگانے کا مطالبہ کیا جا رہا ہے۔ بھارت میں لوگ اس حوالے سے نفرت ظاہر کرنے کے مختلف انداز اپنا رہے ہیں اور ٹوئٹر پر ’دبنگ تھری‘ پر پابندی لگانے کے حوالے سے ملے جلے تبصرے کیے جا رہے ہیں۔