Tag bollywood

لاہور (ایمرا نیوز آن لائن) پاکستان فیشن انڈسٹری کے معروف ڈیزائنر علی ذیشان گزشتہ روز اسلام آباد میں شادی کے بندھن میں بندھ گئے۔سوشل میڈیا پر ڈیزائنر علی ذیشان کی ان کی اہلیہ کے ساتھ شادی کے موقع پر لی گئی تصویریں اور ویڈیوز خوب وائرل ہو رہی ہیں۔تصویروں میں دیکھا جا سکتا ہے کہ شادی کے اس پُر مسرت موقع پر جوڑے نے روایتی لباس کا ہی انتخاب کیا۔

معروف ڈیزائنر کی اہلیہ مائرہ پیشے کے اعتبار سے ایک صحافی ہیں جنہوں نے شادی کے دن گلابی رنگ کا عروسی جوڑا زیب تن کیا ہوا ہے جب کہ علی ذیشان نے روایتی شیروانی پہن رکھی ہے۔وشل میڈیا پر وائرل ویڈیو میں علی ذیشان کو شادی کے موقع پر اہلیہ کے ساتھ رقص کرتے بھی دیکھا گیا۔

ان کی شادی میں پاکستان فیشن انڈسٹری سےتعلق رکھنے والی متعدد شخصیات نے بھی شرکت کی۔پاکستانی ڈیزائنر علی ذیشان کی شادی کی تصویریں سوشل میڈیا پر ٹرینڈ بنی ہوئی ہیں اور اس موقع پر متعدد اداکار اور اداکاراؤں نے انہیں مبارک باد دینے کے ساتھ ساتھ مستقبل کے لیے نیک خواہشات کا اظہار بھی کیا۔

واضح رہے کہ مشہور فیشن ڈیزائنر علی ذیشان منفرد لباس بنانے کی وجہ سے دنیا بھر میں جانے جاتے ہیں، یہ اپنے ملبوسات میں اکثر کسی نہ کسی طرح کے پیغام کو پھیلانے کا انتخاب بھی کرتے ہیں جب کہ ان کے ڈیزائن کردہ دلہن کےگاؤن بے حد مقبول ہیں۔

لاہور(ایمرا نیوز آن لائن)کرتار پور راہداری کے افتتاح کے موقع پر پاکستانی فلم و ڈرامہ انڈسٹری کی معروف شخصیات نے حکومت پاکستان کی جانب سے امن کے اس مثبت قدم کو خوب سراہا ہے حکومتِ پاکستان نے کرتار پور راہداری کا افتتاح کرکے دنیا میں امن، محبت اور رواداری کی ایک اعلیٰ مثال قائم کردی۔اس موقع پر پاکستانی شوبز انڈسٹری کی معروف شخصیات بھی حکومت کے اس اقدام کے حوالے سے اپنے جذبات کو ظاہر کرنے میں کسی سے پیچھے نہیں ہیں۔پاکستانی فلم و ڈرامہ انڈسٹری کی معروف شخصیات نے حکومت پاکستان کی جانب سے امن کے اس مثبت قدم کو خوب سراہا۔اس تاریخی موقع پر معروف اداکارہ ماہرہ خان، ارمینا خان، علی ظفر اور متعدد مشہور شخصیات نے اپنے جذبات کا اظہار کیا۔
ماہرہ خان
سپر اسٹار ماہرہ خان نے کرتار پور راہداری کے افتتاح کے موقع پر اپنے ٹوئٹر پیغام میں لکھا کہ ’مجھے پاکستان پر بہت فخر ہے، یہ قدم سب کے لیے محبت، امن اور رواداری کا پیغام ہے، یہ اقبال کا پاکستان ہے۔‘
ماورا حسین
اداکارہ ماورا حسین نے اپنے ٹوئٹر پیغام میں کہا کہ ’مجھے اپنے ملک اور وزیر اعظم پاکستان عمران خان پر ہمیشہ فخر ہے‘۔انہوں نے امید ظاہر کی کہ مستقبل میں امن و ترقی کی مزید راہداریاں کھلیں گی۔
مومنہ مستحسن
گلوکارہ مومنہ مستحسن نے کرتار پور راہداری کے افتتاح کے موقع پر وزیر اعظم عمران خان کا شکریہ ادا کرتے ہوئے کہا کہ ہمیں بحیثیت ایک قوم اپنے لیڈر پر فخر ہے۔انہوں نے کہا کہ ’جب ہم دیکھتے ہیں کہ ہمارا لیڈر خطے میں امن کی کرن ہے تو ہمیں ان پر فخر ہوتا ہے‘۔
ارمینہ خان
اداکارہ ارمینہ رانا خان نے کرتار پور راہداری کے افتتاح کے موقع پر اپنے جذبات کا اظہار کرتے ہوئے امن کے اس اقدام کو خوب سراہا۔ ارمینہ خان نے اپنی ٹوئٹ میں پاکستان کے کرتار پور راہداری کے افتتاح کے احسن قدم اور بھارت کی جانب سے بابری مسجد کے متعصبانہ فیصلے کا موازنہ بھی کیا۔
بلال اشرف
اداکار بلال اشرف نے اپنے ٹوئٹر پیغام میں سکھوں کو خوش آمدید کہتے ہوئے پاکستان زندہ باد کہا۔
احد رضا میر
معروف اداکار احد رضا میر نے پاکستان کی جانب سے امن اور بین المذاہب ہم آہنگی کے اس قدم کو تاریخی کہتے ہوئے وزیر اعظم پاکستان عمران خان کا شکریہ بھی ادا کیا۔
وزیر اعظم عمران خان نے کرتار پور راہداری کا افتتاح کیا
خیال رہے کہ وزیراعظم عمران خان نے گزشتہ برس 28 نومبر کو کرتارپور راہداری کا سنگ بنیاد رکھا تھا اور اس تقریب میں وزیراعظم کی دعوت پر کانگریس رہنما اور سابق بھارتی کرکٹر نوجوت سنگھ سدھو نے شرکت کی تھی جب کہ بھارتی حکومت کی طرف سے وزیر خوراک ہرسمرت کور اور وزیر تعمیرات ہردیپ سنگھ بھی شریک ہوئے تھے۔ وزیراعظم عمران خان نے کرتارپور راہداری کا افتتاح کردیا 11 ماہ میں راہداری کی تکمیل حکومتِ پاکستان نے 11 ماہ کی ریکارڈ مدت میں کرتارپور راہداری مکمل کی اورگوردوارہ دربار صاحب کودنیا کا سب سے بڑا گوردوارہ بنادیا۔گزشتہ روز 9 نومبر کو وزیراعظم عمران خان نے کرتارپور راہداری کا افتتاح کرکے تاریخ رقم کی۔سکھ یاتری اسے بابا گورونانک کے 550 ویں جنم دن پر حکومتِ پاکستان کی طرف سے تحفہ قرار دے رہے ہیں۔

(ایمرا نیوزآن لائن) علیزے پروڈکشنز کے بینر تلے بننے والی پہلی فلم ’سچ‘ کا ٹائٹل گانا ریلیز کردیا گیا ہے، جسے عالمی شہرت یافتہ مایہ ناز گلوکار استاد راحت فتح علی خان نے اپنی مسحور کن آواز میں گایا ہے۔

یہ بنیادی طور پر المیہ گانا ہے جس میں فلم کے مرکزی کرداروں کی غم و رنج اور اندرونی خلفشار کو بہترین انداز میں پیش کیا گیا ہے۔ اس گانے کی شاعرہ فاطمہ نجیب ہیں جبکہ اس فلم کے تمام گانے میوزک ڈائریکٹر سیماب سین کے تخلیق کردہ ہیں۔

اس گانے کی دل کو چھولینے والی شاعری اور راحت فتح علی خان کی پرسوز آواز سننے والوں کو اپنے سحر میں جکڑ لیتی ہے۔ یہ گانا فلم کی کہانی اور کرداروں کے آپسی رنجش کا بہترین عکاس ہے۔ اس گانے میں فلم کے کرداروں کی جاندار اداکاری کی وجہ سے دیکھنے والے ان کے جذبات کو محسوس کرسکتے ہیں۔

علیزے پروڈکشنز کے بینر تلے بننے والی اس فلم کی کہانی ایوارڈ یافتہ بالی ووڈ اسکرین رائٹر کمڈ چوہدری کی ہے جبکہ ہدایات کاری ذوالفقار شیخ کی ہے۔ اس فلم کے مکالمے معروف پاکستانی ڈاراما نگار حسینہ معین کے ہیں جبکہ فلم کے نمایاں کرداروں میں علیزے شیخ، اسد زمان خان، ہمایوں اشرف، جاوید شیخ، نعمان مسعود، عظمی گیلانی، فضیلہ قاضی، ذوالفقار شیخ، تسمینہ شیخ اور دیگر شامل ہیں۔ یہ فلم 20دسمبر کو نمائش کے لیے پیش کی جائے گی۔

(وقت نیوزآن لائن) تمغہ امتیاز کا اعزاز حاصل کرنے والی پاکستانی نامور اداکارہ مہوش حیات نے کرتارپور راہداری کے افتتاح پر مسرت کا اظہار کیا۔

اداکارہ مہوش حیات نے ایک ٹوئٹ کے ذریعے کرتارپور راہداری کے افتتاح کو سراہا۔ مہوش حیات ٹوئٹ میں لکھتی ہیں کہ ’امن کے لیے بابا گرونانک کے 550 ویں جنم دن پر کرتارپور راہداری کا افتتاح کرنا ایک حقیقی سنگ میل ہے، یہ سچی مذہبی ہم آہنگی اور پاکستانیوں کی کشادہ دلی ہونے کی نشانی ہے‘۔

کرتارپور راہداری افتتاح کے موقع پر اداکارہ نے مزید لکھا کہ اکثر افراد لوگوں کے درمیان نفرتوں کو ختم کرنے کے لیے پل کے بجائے دیواریں کھڑی کردیتے ہیں۔ آخر میں اداکارہ نے کرتارپور 2 خالصتان 2020 کو ہیش ٹیگ میں واضح بھی کیا۔

بالی وڈ اداکار(ایمرا نیوزآن لائن) اور بھارتی پنجاب کے شہر گرداسپور سے بھارتیہ جنتا پارٹی (بی جے پی) کے رکن اسمبلی سنی دیول نے کرتارپور راہداری کی افتتاحی تقریب میں شرکت کا اعلان کردیا۔

وزیراعظم عمران خان 9 نومبر کو سکھوں کے روحانی پیشوا بابا گرونانک کے 550 ویں جنم دن کے موقع پر کرتارپور راہداری کا افتتاح کریں گے اور اس حوالے سے ہونے والی تقریب میں تقریباً 10 ہزار افراد شرکت کریں گے۔ کرتارپور راہداری کی افتتاحی تقریب میں حکومت پاکستان کی جانب سے بھارت کی مشہور شخصیات کو مدعو کیا گیا ہے جن میں بھارتی سابق وزیر اعظم من موہن سنگھ، بھارتی سابق کرکٹر اور کانگریس رہنما نوجوت سنگھ سدھو، بھارتی پنجاب اسمبلی کے رکن و اداکار سنی دیول سمیت دیگر شامل ہیں۔

بھارتی میڈیا رپورٹس کے مطابق کرتار پور آنے والے پہلے وفد میں نوجوت سنگھ سدھو ، بھارتی پنجاب کے وزیر اعلیٰ، سابق وزیراعظم من موہن سنگھ اور اداکار سنی دیول شامل ہیں جو افتتاحی تقریب میں شرکت کریں گے۔ کرتارپور افتتاحی تقریب سے متعلق ایک انٹرویو میں اداکار سنی دیول نے کہا کہ ’اگر میں نہیں جاؤں گا تو کون جائے گا؟ میں ضرور جاؤں گا۔وہ (باباگرونانک صاحب) میرا علاقہ ہے اور میرا گھر ہے‘۔

واضح رہے کہ سنی دیول کا تعلق سکھ گھرانے سے ہے، وہ بالی وڈ کی نامور جوڑی دھرمیند اور ہیمامالینی کے بیٹے ہیں۔ اس کے علاوہ رواں برس بھارتی انتخابات میں انہوں نے بی جے پی کے امیدوار کے طور پر حصہ بھی لیا تھا۔

اقوام متحدہ(ایمرا نیوزآن لائن) کے ادارہ برائے مہاجرین (یو این ایچ سی آر) نے اداکارہ ماہرہ خان کو پاکستان میں اپنا خیرسگالی سفیر مقرر کر دیا۔

یو این ایچ سی آر نے ٹوئٹر پر ماہرہ خان کی ایک ویڈیو شیئر کی جس میں وہ اقوام متحدہ کا ٹوپی پہنے مہاجر بچوں کے ساتھ وقت گزار رہی ہیں۔ مذکورہ ویڈیو کے ساتھ یو این ایچ سی آر نے ماہر خان کو خیرسگالی سفیر مقرر کرنے پر مسرت کا اظہار کیا۔

مذکورہ ویڈیو کو ماہرہ خان نے اپنے ٹوئٹر اکاؤنٹ پر شیئر کیا اور لکھا کہ ’مہاجرین کی خیرسگالی سفیر بننا میرے لیے ایک بڑے اعزاز کی بات ہے، مجھے اپنے ملک جس نے 40 برسوں سے مہاجرین کے لیے اپنی باہیں پھیلائی ہوئی ہیں، میں پید ہونے پر فخر ہے‘۔ اسلام آباد میں اقوام متحدہ کے ہائی کمیشن برائے مہاجرین کی جانب سے ملک کی خیر سگالی سفیر ماہرہ خان کے اعزاز میں تقریب کا انعقاد بھی کیا گیا۔

تقریب سے خطاب کرتے ہوئے ماہرہ خان نے کہا کہ “میں خوش قسمت ہوں کہ اس نیک مقصد کے لیے مجھے منتخب کیا گیا۔” انہوں نے کہا کہ میں اقوام متحدہ کے ادارہ برائے مہاجرین (یو این ایچ سی آر) کی شکر گزار ہوں کہ جنہوں نے مجھ پر اعتماد کیا، اللّہ نے مجھے اس مقصد کے لیے چنا جس پر میں پوری اترنے کی کوشش کروں گی۔

ماہرہ خان کا کہنا تھا کہ پاکستانی عوام نے افغان مہاجرین کو کھلے دل سے خوش آمدید کہا، یہی وجہ ہے کہ پاکستان 4 دہائیوں سے 40 لاکھ افغان مہاجرین کی مدد کر رہا ہے۔ انہوں نے مزید کہا کہ ماضی میں مہاجرین کے مسائل کو اتنی اہمیت نہیں دی گئی لیکن یہ بات بھی اہم ہے کہ مہاجرین کا مسئلہ کسی ایک ملک کا نہیں بلکہ پوری دنیا کا ہے۔

یاد رہے کہ گزشتہ برس ماہرہ خان نے پشاور میں یو این سی ایچ آر کے کیمپ کا دورہ کیا تھا جہاں تقریب سے خطاب کرتے ہوئے ان کا کہنا تھا کہ ہمیں بے گھر بچوں کے مستقبل کے لیے مل کر کام کرنا ہوگا کیوں کہ بچے مستقبل کے معمار ہیں۔

کراچی(ایمرا نیوزآن لائن) کے رکشہ ڈرائیور قاسم علی خان کی سریلی آواز میں شہنشاہ غزل مرحوم مہدی حسن کا گانا گنگنانے کی ویڈیو وائرل ہوگئی۔

قاسم علی ایک رکشہ ڈرائیور ہونے کے ساتھ ساتھ خوبصورت اور جادوئی آواز بھی رکھتے ہیں۔ ٹوئٹر پر حال ہی میں ایک صارف نے ان کی ویڈیو شیئر کی جس میں یہ رکشہ ڈرائیور نہایت ہی سریلی آواز میں شہنشاہ غزل مہدی حسن کا گانا ’زندگی میں تو سب ہی پیار کرتے ہیں‘ گنگنا رہے ہیں۔

اس ٹوئٹ میں صارف نے رکشہ ڈرائیور کے بارے میں بتایا کہ قاسم علی کا کلاسیکل گلوکار بننے کا خواب تھا جو کہ غربت کی وجہ چکنا چور ہوگیا۔ قاسم علی اپنا پیٹ پالنے کے لیے رکشہ چلانے پر مجبور ہیں اور ان کا گلوکار بننے کا خواب شاید غربت کی وجہ سے پورا نہ ہوسکا۔

قاسم عل کی ویڈیو دیکھنے کے بعد صارفین اور دیگر معروف شخصیات ان کی آواز کی تعریف کیے بغیر رہ نہیں سکیں اور اس ویڈیو پر کمنٹس کا سلسلہ اب تک تھم نہیں سکا ہے۔ اداکارہ مہوش حیات نے ویڈیو پر کمنٹ کرتے ہوئے قاسم علی کی آواز کی تعریف کی۔ محمد سہیل نامی صارف نے کہا کہ اب انہیں کوک اسٹوڈیو میں بلانا لیں۔ رکشہ ڈرائیور کے اس ٹیلینٹ کو سراہنے کا سلسلہ سوشل میڈیا پر تا حال جاری ہے۔

لاہور (ایمرا نیوز آن لائن) پاکستانی فلم اور ڈرامہ انڈسٹری کی اداکارہ ماہرہ خان نے سوشل میڈیا پر اپنی قریبی دوست کے نام کہانی لکھتے ہوئے کچھ پرانی تصاویر بھی شیئر کیں۔ماہرہ خان نے انسٹاگرام اکاؤنٹ پر اپنی قریبی دوست کے ساتھ پرانی یادیں تازہ کرتے ہوئے چند تصاویر شیئر کرنے کے ساتھ ساتھ طویل کیپشن میں ایک کہانی بھی لکھی۔سپر اسٹار ماہرہ خان نے اپنی پوسٹ میں لکھا کہ ’میں آپ سب کو یہ کہانی بتانا چاہتی ہوں، ایک لڑکی کی کہانی جس سے میں کافی سالوں پہلے ملی تھی، یہ ایک ایسی لڑکی کی کہانی ہے جس کا دنیا میں سب سے بڑا دل ہے۔‘

اداکارہ نے اپنی پرانی اور سب سے قریبی دوست کی کہانی سناتے ہوئے بتایا کہ مجھے یاد ہے کہ میں ’نارو‘ سے کالج میں ملی تھی، یہ میرے ساتھ ہر اس وقت کھڑی تھی جب میرا ساتھ کسی نے نہیں دیا تھا، جب میں اسے اپنے تمام خوابوں کے بارے میں بتایا کرتی تھی تو یہ میری باتیں بہت ہی صبر کے ساتھ سنتی تھی۔ماہرہ خان نے اپنی دوست کے بارے میں مزید کہا کہ جب اس کے والد دنیا سے چلے گئے تھے تو یہ اپنی ماں کے سامنے کبھی نہیں روئی، یہ صرف میرے ساتھ کالج میں روتی تھی،

23 سال کی عمر سے اس نے اپنے والد کی چھوٹی سی کمپنی کو سنبھالا اور دن رات کام کرنے کے باوجود بھی یہ ہمیشہ میرے لیے حاضر ہوتی تھی۔ماہرہ نے اس کہانی میں اپنی دوست کی کامیابی کو سراہتے ہوئے کہا کہ جب آج میں نے اسے اسٹیج پر دیکھا، اس کے تمام خواب پورے ہو گئے، یہ پاکستان آٹو موٹو انڈسٹری کی واحد خاتون سی ای او ہے، اور یہ ہمیں بتاتی تھی کہ ’ایک دن ضرور مجھے اس طرح کانفرنس میں مدعو کیا جائے گا۔‘

اداکارہ ماہرہ خان نے اپنی قریبی دوست کی کامیابی کی وجہ محنت قرار دیتے ہوئے کہا کہ اچھی نیت اور محنت سے ہی کامیابی حاصل ہوتی ہے، مجھے یقین ہے کہ تمہاری اس کامیابی کا تعلق میری دعاؤں سے بھی ہے، میں تمہارے لیے بہت دعائیں کرتی ہوں، میری نارو میں تم سے بہت پیار کرتی ہوں اور مجھے تم پر فخر ہے۔

لاہور(ایمرا نیوز آن لائن)پاکستانی فلم اور ڈرامہ انڈسٹری کے اداکار شاز خان نے فلم ساز جامی کی فلم مور میں اداکاری دکھا کر شہرت حاصل کی تھی اور اب انہوں نے اپنی آنے والی فلم کے لیے خوب محنت کر کے اپنے آپ کو فائٹر میں تبدیل کر کے سب کو دنگ کر دیا ہے۔اداکار شاز خان اپنی آنے والی فلم ’دی مارشل آرٹسٹ‘ میں ایک ایم ایم اے فائٹر کا کردار نبھائیں گے جس کے لیے وہ کیلی فورنیا میں ٹریننگ حاصل کر رہے ہیں۔شاز خان نے اپنی چند تصاویر سوشل میڈیا ایپ انسٹاگرام پر شیئر کی ہیں جس میں انہوں نے اپنے کردار کی جھلک دکھائی، اور ان تصاویر میں وہ ایک فائٹر دکھائی دے رہے ہیں۔

اداکار اس فلم میں اپنے کردار کے لیے کیلی فورنیا میں معروف کوچ ایم ایم اے چیمپئن رافائل کورڈیرو کی سربراہی میں مارشل آرٹس کی ٹریننگ حاصل کر رہے ہیں۔’دی مارشل آرٹسٹ‘ فلم کا اسکرپٹ اداکار شاز خان نے خود ہی لکھا ہے اور اس فلم کی کہانی ایک مارشل آرٹسٹ پر مبنی ہے جو کہ کیلی فورنیا سے لڑتا ہے اور اچانک اسے پاکستان آنا پڑتا ہے۔اداکار نے فلم کے اسکرپٹ کے حوالے سے سوشل میڈیا پر ایک تصویر بھی شیئر کی تھی جس میں انہوں نے فلم کا اسکرپٹ مکمل ہونے کے بارے میں بتایا تھا۔شاز خان وقفے وقفے سے اس فلم کے حوالے سے اپنی ٹریننگ کی تصاویر سوشل میڈیا پر اپنے مداحوں کے ساتھ شئیر کر رہے ہیں مگر فلم کی مزید تفصیلات کے حوالے سے انہوں نے فی الحال کچھ نہیں بتایا۔

‘دی مارشل آرٹسٹ‘ فلم کی ریلیز کے حوالے سے بھی ابھی کوئی معلومات سامنے نہیں آ سکی ہیں۔واضح رہے کہ اداکار شاز خان پاکستانی فلم ’دوبارہ پھر سے‘ اور ’پرواز ہے جنون‘ جیسی فلموں میں اداکاری کر چکے ہیں، فلموں کے علاوہ شاز خان متعدد ٹی وی ڈراموں میں بھی کام کر چکے ہیں۔

(ایمرا نیوزآن لائن) بھوتوں اور چڑیلوں کے سالانہ تہوار ہیلووین کے لیے اداکار عثمان مختار انوکھا انداز اپناتے ہوئے ’جٹ اسپیرو‘ بن گئے اور اب آپ سوچ رہے ہوں گے کہ کیپٹن جیک اسپیرو کو تو دیکھا ہے یہ جٹ اسپیرو کیوں بنے ؟

فلم اور ڈراموں میں اداکاری کے جوہر دکھانے والے عثمان مختار نے انسٹاگرام پر ایک تصویر شیئر کی جس میں انہوں نے ہالی وڈ فکشن فلم ’پائیریٹ آف دی کیربین‘ کے مشہور کردار کیپٹن جیک اسپیرو کا روپ دھارا ہوا ہے۔

اداکار نے اس روپ کو دیسی بناتے ہوئے جیک اسپیرو کو ’جٹ اسپیرو‘ کہا اور پیغام دیا کہ ’کسی کی ماں بہن کو سڑکوں پر تنگ کرنے سے پہلے، اتنی سی، بس اتنی سی شرم کر لیا کرو‘۔

بعدازاں انہوں نے اپنے جٹ اسپیرو روپ کو ہیلووین سیزن کا روپ قرار دیا جس پر مداحوں نے ملے جلے ردعمل کا اظہار کیا۔ کچھ مداحوں نے اداکار کو کیپٹن جیک اسپیرو سے ہی تشبیہ دی جب کہ کچھ نے ناپسندیدگی کا اظہار کرتے ہوئے لکھا کہ یہ کیا کرلیا۔

رِڈز بیکر نامی مداح نے عثمان مختار کو ہیلووین کے روپ پر ’غریبوں کا پائیریٹ‘ قرار دیا جب کہ عریبہ مسکان نامی مداح نے انہیں جیک اسپیرو کا ’پاکستانی ورژن‘ کہہ ڈالا۔ فرحین نامی مداح نے اداکار کو تجویز پیش کی کہ آپ اچھے ہیں اس طرح کی حرکتیں نہ کریں۔

خیال رہے کہ ہیلووین کی مناسبت سے پاکستانی شوبز کے ستارے دلچسپ اور خوفناک حلیہ اپناتے ہوئے کافی انوکھے انداز میں نظر آتے ہیں اور وہ اپنے نت نئے انداز کے باعث مداحوں کی جانب سے تنقید کا شکار بھی بنتے ہیں۔