Tag business

اسلام آباد(ایمرا نیوز آن لائن)رواں مالی سال کے ابتدائی9 ماہ کے دوران تجارتی خسارہ میں 14 فیصد کمی واقع ہوئی ہے اور تجارتی خسارہ 27 ارب 29 کروڑ ڈالر سے کم ہو کر23 ارب 45 کروڑ ڈالر رہا ہے۔ وزارت تجارت کے مطابق حکومت کی طرف سے ٹھوس پالیسی اقدامات، توانائی کی صورتحال میں بہتری، اقتصادی استحکام کےلئے کی جانے والی کوششوں اور مختلف درآمدی اشیاء پر ڈیوٹی کے نفاذ کی وجہ سے درآمدات میں کمی کا رجحان ہے اور جولائی 2018ء سے مارچ 2019ء کے دوران تجارتی خسارے میں 3 ارب 84 کروڑ ڈالر کی کمی معاشی صورتحال کو بہتر بنانے میں مدد گار ثابت ہوسکتی ہے جبکہ رواں مالی سال کے اختتام تک گزشتہ مالی سال کے مقابلہ میں تجارتی خسارے کا حجم 5 سے 7 ارب ڈالر کم رہنے کا امکان ہے۔مارچ 2018ء میں گزشتہ مالی سال کے اس ماہ کے مقابلہ میں تجارتی خسارہ میں 37.74 فیصد کمی ریکارڈ کی گئی ہے اور یہ 3 ارب 10 کروڑ ڈالر سے کم ہو کر ایک ارب 93 کروڑ ڈالر تک آگیا ہے۔ رواں مالی سال کے ابتدائی 9 ماہ کے دوران درآمدات کا حجم 40 ارب 66 کروڑ ڈالر ریکارڈ کیاگیا جو کہ گزشتہ مالی سال کے اسی عرصہ میں 44 ارب 32 کروڑ ڈالر تھا۔ رواں مالی سال کے دوران درآمدی حجم گزشتہ مالی سال کے اس عرصہ کے مقابلہ میں 8.25 فیصد کم ہے۔ رواں مالی سال کے ابتدائی 9 ماہ کے دوران برآمدات کا حجم 17 ارب 21 کروڑ ڈالر رہا جو کہ جولائی 2017ء سے مارچ 2018ئ کے عرصہ کے دوران 17 ارب 3 کروڑ ڈالر تھا۔

ایف پی پی سی آئی کی ایگزیکٹو کمیٹی کو نظر کر کے ذاتی مفادات کے حصول پر مشتمل تجاویز کو کسی صورت قبول نہیں کیا جائے گا‘ رکن ایگزیکٹو کمیٹی کا انتباع
اسلام آباد(ایمرا نیوز آن لائن ) فیڈریشن آف پاکستان چیمبرز آف کامرس اینڈ انڈسٹری کی ایگزیکٹو کمیٹی کے رکن و سابق نائب صدر FPCCIمرزا عبدالرحمان نے وزیر خرانہ اسد عمر سے مطالبہ کرتے ہوئے کہا کہ اگر حکومت کوئی نئی ٹیکس ایمنسٹی سکیم دینا چاہتی ہے تو پاکستان کے تمام ٹریڈ باڈیز کے ساتھ جامع مشاورت کر کے ایمنسٹی سکیم کا اعلان کرے تاکہ اُس ایمنسٹی سے پوری بزنس کمیونٹی اور اوور سیز پاکستانیز کو فائدہ ہو سکے نہ کہ چند افراد کو۔ انہوں نے کہا کہ دو دن پہلے ایف پی سی سی آئی نے حکومت کو ایمنسٹی سکیم کی تجاویز دینے کے لیے ایک میٹنگ بلائی تھی جس میں سے کراچی ‘ اسلام آباد اور لاہور ریجنل آفس سے صرف دس سے پندرہ افراد نے شرکت کی جب کہ ایگزیکٹو کمیٹی کا فورم تقریباً تین سو افراد پر مشتمل ہوتا ہے۔ جب تک ایگزیکٹو کمیٹی کے فورم دو تہائی اکثریت سے کوئی بھی اہم مسودہ منظور نہ ہو تو ایف پی سی سی آئی کس حیثیت میں حکومت کو ایمنسٹی سکیم پر تجاویز دے رہی ہے۔ مرزا عبدالرحمان نے کہا ہے کہ ایف پی سی سی آئی کی طرف سے دی گئی ایسی تجاویز کو مسترد کر تے ہیں جس میں ایگزیکٹو کمیٹی کی مکمل مشاورت شامل نہ ہو‘ اس سے یہ پتا چلتا ہے کہ یونائیٹڈ بزنس گروپ کے عہدیداران ایف پی سی سی آئی کے فورم کو استعمال کرتے ہوئے اپنے ذاتی مقاصد کے حصول کے لیے ایسی تجاویز کے لیے سرگرم عمل ہیں جس سے ان کے کالے دھن کو فائدہ ہو سکے۔ ایف پی سی سی آئی ملک کے تاجروں کی سب سے بڑی تنظیم ہے‘ ہم ایسے فورم کو کسی کے ذاتی مقاصد کے لیے استعمال نہیں ہونے دیں گے۔ ادھر جو بھی حکومت کو تجویز دینی ‘ چاہے وہ ایمنسٹی ہو‘ بجٹ ہو یا کچھ اور ہو اس تجویز کو پوری ایگزیکٹو کمیٹی کی تائید حاصل ہونی چاہیے اور یہی جمہوریت کا حسن ہے۔ انہوں نے صدر ایف پی سی سی آئی دارو خان اچکزئی کو بھی تجویز دیتے ہوئے کہا کہ آپ غیر جانبدار ہو کے اس ادارے کو آگے لے کے چلیں اور چند افراد کے ہاتھوں میں نہ کھیلیں۔

اسلام آباد / لاہور(ایمرا نیوز آن لائن) پاکستان کے دورے پر آئے ہوئے بین الاقوامی مالیاتی فنڈ(آئی ایم ایف) جائزہ مشن کے سربراہ انسٹرو رامیریز ریگو پاکستان کا دورہ مکمل کرکے واپس چلے گئے ہیں۔آئی ایم ایف وفد کے دورے کے دوران وزیر خزانہ اسد عمر سمیت دیگر حکام سے ہونیوالی ملاقاتوں میں آئی ایم ایف سے نئے پروگرام کیلیے جاری مذاکرات کے تناظر میں پاکستان میں آئی ہونیوالی حالیہ اقتصادی ڈویلپمنٹس پر تبادلہ خیال ہوا۔آئی ایم ایف نے دورہ مکمل ہونے کے بعد اعلامیہ جاری کردیا ہے جس میں کہا گیا ہے کہ آئی ایم ایف مشن چیف نے پاکستان میں قیام کے دوران اسلام آباد اور کراچی کے دورے کیے اور اہم حکام سے ملاقاتیں کیں۔

اسلام آباد(ایمرا نیوز آن لائن)رواں مالی سال 2018-19کے پہلے آٹھ ماہ میں جولائی تا فروری کے دوران چین کے ساتھ کی جانے والی باہمی تجارت کے تجارتی خسارہ میں 11.93 فیصد کی نمایاں کمی واقع ہوئی ہے۔ وزارت تجارت کی رپورٹ کے مطابق جاری مالی سال میں جولائی تا فروری 2018-19کے دوران پاک چین باہمی تجارت کا تجارتی خسارہ میں 1.74 ارب ڈالر یعنی 12فیصد کے قریب کمی سے تجارتی خسارہ 4.48 ارب ڈالر تک کم ہوگیا جبکہ گزشتہ مالی سال میں جولائی تا فروری 2017-18کے دوران پاک چین باہمی تجارت کا تجارتی خسارہ 6.22 ارب ڈالر رہا تھا۔

وقت نے ثابت کردیا کہ فیڈریشن چیمبر بزنس کمیونٹی کی وکالت کرنے میں بری طرح ناکام رہا ہے: احمد جواد
بزنس مین پینل کا اس بار منظم اور جارہانہ سرپرائز ہوگا ۔یو بی جی انتظار کرے : ترجمان بزنس مین
کراچی(ایمرا نیوز آن لائن) FPCCI میںبزنس مین پینل کے ترجمان احمد جواد نے کہا ہے کہ ایف پی سی سی آئی دن بدن زوال کا شکار ہے ملائیشیا اور سعودی قیادت کے دوروںکے موقع پر فیڈریشن چیمبر کے عہدیداران کو شامل نہ کرنا اس بات کی عکاسی کرتا ہے برسراقتدار گروپ یو بی جی کی ڈکٹیٹر شپ ایف پی سی سی آئی پر قابض ہے یہ ان کی ناکام پالیسیز کا نتیجہ ہے کہ حکومت پاکستان ایف پی سی سی آئی کی قیادت کو اہم ایشوز اور معاملات میں اعتماد میں نہیں لے رہی۔ بزنس کمیٹی کے لئے باعث تشویش ہے کےہ پریمیئر ادارے کا معیار حکومت کی نظروں میں گرتا جا رہا ہے تو یہ ادارہ بزنس کمیونٹی کے مسائل کے حل کے لیے کیا ایڈوکیسی کرے گا۔یوبی جی کے لیڈر یہ بات سمجھ لیں کہ بزنسمین پینل کی فیڈریشن چیمبر میں43 فیصد نمائندگی ہے لہٰذا یوبی جی کسی خام خیالی میں نہ رہے اور اس سال یو بی جی کو ایک سرپرائز ملے گا اور اس دفعہ الیکشن کمیشن میرٹ پر بنے گا اور اس کمیشن کوپوری ای سی اور جی بی ممبران کا اعتماد حاصل ہو گا۔ ایس ایم منیر اینڈ کمپنی کو اپنی مرضی کے الیکشن کمیشن بنانے نہیں دیں گے ایسے افراد کو الیکشن کمیشن بنایا جائے گا جو دونوں گروپس کے لئے قابل قبول ہو گا اور منظم دھاندلی نہیں کرنے دی جائے گی ۔احمد جواد نے آج ایک پریس ریلیز جاری کرتے ہوئے کہاریجنل آفس پنجاب میں پچھلے 3 ماہ سے کوئی قابل ذکر ایکٹیو یٹی نہیں ہو رہی اسی طرح پشاور بلوچستان گوادر کے ریجنل دفاتر خالی نظر آتے ہیںاور بزنس کمیونٹی کے لئے کوئی مسائل حل نہیں کئے کیے جا رہے ۔محض بیان بازی اور پریس ریلیز سے بزنس کمیٹی کے مسائل حل نہیں ہوں گے۔ پچھلے چار سالوں میں ایف پی سی سی آئی میں محض کاغذی اصلاحات آئی ہیں عملی کاہم نہیں ہوئے ۔ انھوں نے کہا کہ ملکی برآمدات کو 6 ارب ڈالر کا ٹیکا لگانے والے آج کس منہ سے بزنس کمیونٹی کے نام نہاد لیڈر بنے ہوئے ہیں۔ تاریخ ایسے شخص کو معاف نہیں کرے گی جس نے اپنا اصل کام چھوڑ کر تاجروں کی سیاست کی ملکی برآمدات کو بھی نقصان پہنچایا اور تاجروں کو بھی رسوا کیا۔احمد جواد نے کہاکہ ٹریڈ باڈیز کی فیڈریشن چیمبر کے ساتھ سالانہ ممبر شپ تجدید نو اور ایوارڈز سے ملنے والے فنڈز کا پیسہ کن کاموں پر استعمال ہو رہا ہے نہ ہی وہ پیسہ ا صلاحات پر لگ رہا ہے اور نہ ریسرچ اینڈ ڈویلپمنٹ پر استعمال ہو رہا ہے محض تنخواہوں اور بینک بیلنسز کے لئے اس فنڈ کو ضائع کیا جا رہا ہے۔ ایف پی سی سی آئی میں ریسرچ نام کی کوئی چیز نہیں ہے لاہور چیمبر اور کراچی چیمبر فیڈریشن چیمبر کی نسبت کہیں بہتر کام کر رہے ہیں۔ ایف پی سی سی آئی میں اپنی قدر و قیمت کھودی ہے پچھلے چار سالوں میں ایف پی سی سی آئی کی دی ہوئی بجٹ تجویز کا ایک مطالبہ بھی نہیں مانا گیا چونکہ ایف پی سی سی آئی میں میرٹ نہیں ہے اور اقرباءپروری ہے اور ہر بار منتخب حکومت کے گن گائے جاتے ہیں جاتے ہیں پہلے مسلم لیگ (نون ) کی تعریفیں کی جاتی تھی اور آج کل پی ٹی آئی کی تعریفوں کے پل باندھے جاتے ہیں۔ احمد جواد نے کہا کہ اس سال بزنس مین پینل ایک بھرپور سرپرائز دے گی اس کو پوری بزنس کمیونٹی سراہے گی۔

زرمبادلہ کے مجموعی ذخائر کی مالیت 15ارب ڈالر سے تجاوز کرگئی
کراچی(ایمرا نیوز آن لائن) زرمبادلہ کے مجموعی ذخائر کی مالیت 15ارب ڈالر سے تجاوز کرگئی ہے۔اسٹیٹ بینک آف پاکستان کے مطابق 15مارچ کو زرمبادلہ کے مجموعی ذخائر کی مالیت 15ارب 70کروڑ96لاکھ ڈالر ریکارڈ کی گئی۔ 15مارچ کو ختم ہونیوالے ہفتے کے دوران متحدہ عرب امارات سے ایک ارب ڈالر موصول ہوئے۔غیرملکی قرضوں اور آفیشل ادائیگیوں کے بعد سرکاری ذخائر میں 71کروڑ 60لاکھ ڈالر کا اضافہ ہوا، زرمبادلہ کے سرکاری ذخائر کی مالیت 8 ارب 83 کروڑ ڈالر تک پہنچ گئی۔

8 ماہ کے دوران متفرق کیمیکلز کی ملکی برآمدات میں 34.61 فیصد کا اضافہ ہوگیا
اسلام آباد(ایمرا نیوز آن لائن )رواں مالی سال 2018-19کے پہلے 8 ماہ کے دوران متفرق کیمیکلز کی ملکی برآمدات میں 34.61 فیصد کا اضافہ ریکارڈ کیا گیا ہے۔ ادارہ برائے شماریات پاکستان کی رپورٹ کے مطابق گزشتہ مالی سال 2017-18میں جولائی تا فروری کے دوران 37ہزار 651 ملین روپے کے متفرق کیمیکلز برآمد کئے گئے جبکہ رواں مالی سال 2018-19کے اسی عرصہ کے دوران متفرق کیمیکلز کی برآمدات50 ہزار 683 ملین روپے تک بڑھ گئیں۔اس طرح گزشہ مالی سال 2017-18کے پہلے 8 ماہ کے مقابلہ میں رواں مالی 2018-19سال کے دوران متفرق کیمیکلز کی ملکی برآمدات میں 13ہزار 32ملین روپے یعنی 34.61 فیصد کا اضافہ ریکارڈ کیا گیا ہے۔