Tag cm punjab

وزیراعلیٰ پنجا ب عثمان بزدار نے ٹیم تبدیلی کا فیصلہ وفاق سے مشورہ کے بغیر کیا اور بعد ازاں حکومت کو اپنے فیصلے سے تحریری طور پر آگاہ کر دیا۔ ذرائع کے مطابق چیف سیکرٹری اور آئی جی پنجاب کوایک دوروز میں تبدیل کیے جانے کا امکان ہے، اسی طرح صوبائی کابینہ میں شامل وزرا کے محکمے بھی تبدیل ہوں گے۔ وزیراعلیٰ پنجاب عثمان بزدار نے چیف سیکرٹری اور آئی جی کے ناموں کا پینل وفاق کو بھجوادیا، لاہور سمیت دیگر شہروں کے پولیس چیف اوراعلیٰ انتظامی افسران بھی تبدیل کیے جائیں گے۔ اس سے قبل پنجاب کے اعلیٰ عہدوں پر وفاق سے تعیناتی کی جاتی رہی ہیں لیکن اس بار وزیراعلیٰ پنجاب نے کسی مشورے کے بغیرفیصلے کیے جن سے وفاق کوآگاہ کردیا گیا ہے۔ واضح رہے وزیراعلیٰ پنجاب اپنے پرنسپل سیکرٹری طاہر خورشید کو پہلے ہی تبدیل کر چکے ہیں۔

لاہور(وقت نیوز آن لائن)وزیر اعظم عمران خان نے پی ٹی آئی کے ارکان صوبائی و قومی اسمبلی کو واضح طور پر کہا ہے کہ عثمان بزدارہی وزیراعلیٰ پنجاب رہیں گے، اجلاس میں وزیراعظم نے عثمان بزدارکی تبدیلی کے حوالے سے قیاس آرائیوں کومسترد کردیا، انہوں نے کہا کہ وزیر اعلیٰ پنجاب سردار عثمان بزدار پر بھرپور اعتماد ہے، مجھے پتہ ہے سازش کون کررہا ہے اور اس کے پیچھے کون ہے، عثمان بزدارکو کسی صورت نہیں ہٹاؤں گا،عثمان بزدارہی وزیراعلیٰ پنجاب رہیں گے۔عثمان بزدارکی تبدیلی سے پنجاب میں پارٹی ختم ہوجائے گی۔عثمان بزدارکو ہٹایا تو نئے وزیراعلیٰ کو بھی ایسے ہی ہٹادیا جائے گا، وہ 20 روز بھی نہیں چل سکے گا۔

تفصیلات کے مطابق لاہور میں وزیر اعظم عمران خان سے ملاقات کے دوران تحریک انصاف کے ارکان قومی و صوبائی اسمبلی نے شکایتیوں کے انبار لگادیئے۔ وہ اپنے اپنے حلقوں میں ترقیاتی کام نہ ہونے اور بیوروکریسی کے رویے کیخلاف پھٹ پڑے۔ اراکین اسمبلی نے ویلج کونسل کے انتخابات کرانے کے بارے میں وزیراعظم کواپنے تحفظات سے آگاہ کیا، انہوں نے کہا کہ حلقے میں لوگوں کے کام نہ ہونے کی وجہ سے پارٹی کومشکلات کا سامنا ہوسکتا ہے۔

اجلاس کے دوران ملتان سے رکن قومی اسمبلی ملک احمد حسین ڈیہر نے وزیر خارجہ شاہ محمود قریشی اور عامر ڈوگر پر الزام لگایا کہ دونوں ارکان اسمبلی ان کے حلقے میں مداخلت کررہے ہیں۔ شاہ محمود سارے فنڈز لے جاتے ہیں اور ہمیں کچھ نہیں ملتا۔ جس پر شاہ محمود قریشی نے کہا کہ یہ الزام غلط ہے، حقیقت یہ ہے کہ 2018 کے عام انتخابات میں انہوں نے ہی احمد حسین کو پارٹی ٹکٹ دینے کی سفارش کی تھی۔

تحریک انصاف کے رکن قومی اسمبلی راجا ریاض نے بجلی کے زائد بلوں پر شدید تنقید کی، انہوں نے کہا کہ حلقے میں ہماری اور بزرگوں کی 100 سال کی عزت تھی وہ بھی چلی گئی ، حلقے کے عوام ہمیں مارنے کے درپے ہیں۔وزیر اعظم نے کہا کہ ہمیں مہنگائی کا بھی احساس ہے،ہم قرضوں کے بوجھ تلے دبے ہوئے ہیں۔ سابق حکومتوں نے پاکستان کو بے دردی سے لوٹا اور عوام کو غربت اور بے روزگاری کے اندھیروں میں دھکیل دیا، جو انتظامی، سماجی، معاشی اور اقتصادی تبدیلیاں ہم لے کر آ رہے ہیں ان سے ملک ترقی و خوشحالی سے ہمکنار ہوگا، قوموں کی زندگیوں میں نشیب و فراز آتے ہیں۔ لیکن ہمیں ہمت اور دلیری سے حالات کا مقابلہ کرنا ہے۔ پاکستان درست سمت میں رواں دواں ہے، 2019 معیشت کو سنبھالنے اور استحکام کا سال تھا۔ 2020 انشا اللہ ترقی کا سال ہوگا۔

لاہور (ڈیلی پاکستان آن لائن )پاکستانی کرکٹ ٹیم آج بنگلہ دیش کے خلاف پہلا ٹی ٹوینٹی میچ قذافی سٹیڈیم میں کھیلنے جارہی ہے جس پر وزیراعلیٰ پنجاب عثمان بزدارنے بھی قومی ٹیم کیلئے پیغام جاری کر دیاہے ۔

تفصیلات کے مطابق وزیراعلیٰ عثمان بزدار نے بنگلہ دیش کے خلاف ٹی 20 میچ کیلئے قومی کرکٹ ٹیم کیلئے نیک خواہشات کا اظہار کرتے ہوئے کہا کہ قومی کھلاڑیوں کومحنت اورجذبے سے کھیل کر جیت اپنے نام کرنا ہوگی ، کھلاڑیوں کو بیٹنگ، باو¿لنگ اور فیلڈنگ کے شعبوں میں اپنی صلاحیتیں دکھانا ہوں گی، ہماری دعائیں قومی کرکٹ ٹیم کے ساتھ ہیں۔انہوں نے کہا کہ شائقین کرکٹ کیلئے شاندار انتظامات کئے گئے ہیں، زندہ دلان لاہور آج پر امن اور بہترین ماحول میں کرکٹ سے محظوظ ہوں گے ،امید ہے آج پاکستانی کرکٹ ٹیم عمدہ کارکردگی کا مظاہرہ کرے گی۔

پاکستان اور بنگلہ دیش کے درمیان پہلا ٹی ٹوینٹی میچ آج دوپہر دو بجے شروع ہو گا جس حوالے سے تیاریاں مکمل کر لی گئیں ہیں تاہم اس موقع پر سخت سیکیورٹی انتظامات کیے گئے ہیں ۔بنگلہ دیش کے خلاف پہلے میچ میں ہیڈ کوچ اور بولنگ کوچ نے پاکستانی کھلاڑیوں کو جارحانہ انداز اپنانے کی ہدایت کی ہے جبکہ پلئینگ الیون میں کپتان با براعظم ، شعیب ملک ، محمد حفیظ، افتخار احمد ، محمد رضوان ، شاداب خان ، عماد وسیم ، شاہین شاہ آفریدی ، محمد حسین شامل ہیں ۔ ان کے علاوہ آج کے میچ میں احسان علی اور حارث روف ڈیبیو بھی کرنے جارہے ہیں ۔ یہاں یہ امر بھی قابل ذکر ہے کہ حارث روف نے بی بیش لیگ میں اپنی صلاحیتوں سے اپنا لوہا منوایا اور بیرون ملک پاکستان کا نام روشن کیا ، انہوں نے ٹی ٹوینٹی لیگ میں ہیٹر ک بھی کی اور بلے بازوں کے پرخچے اڑا کر رکھ دیئے ۔

لاہور(زیشان علی)ایوان وزیراعلی میں عثمان بزدار کو صوبے بھر کے ترقیاتی منصوبوں سے بریفنگ دی گئی۔وزیر اعلی پنجاب نے تمام نااہلی کا ملبہ انتظامی افسران پر ڈال دیا۔ ذرائع کے مطابق وزیر اعلی نے چیف سیکرٹری ،چیئرمین پلاننگ اینڈ ڈویلپمنٹ سمیت افسران کو 2 ماہ میں کارکردگی بہتری بنانے کی وارننگ دیدی۔

وزیراعلی پنجاب نے گجرات سمیت سیاسی اتحادیوں کے اضلاع میں ترقیاتی منصوبوں سے متعلق بھی بریفنگ لی۔عثمان بزدار نے تحریک انصاف کے ناراض اراکین اور اتحادیوں کو فوری طور پر فندز جاری کرنے کی ہدایت کردی۔

ذرائع کے مطابق عثمان بزدار نے کہا کہ وزیر اعظم کا آبائی شہر میانوالی ترقیاتی فنڈز کے اجرا کے حوالے سے سب سے پیچھے ہے۔وزیراعلی نے کہا کہ میانوالی کیلئے صرف دس فیصد ترقیاتی فنڈز جاری کیے گئے ہیں۔

لاہور(میڈیا 92نیوز آن لائن)پنجاب اور خیبرپختونخوا میں سردی کی شدت میں اضافے کے باعث اسکولوں میں موسم سرما کی تعطیلات میں مزید توسیع کا فیصلہ کیا گیا ہے۔ملک کے پہاڑی علاقوں میں ان دنوں برف ہی برف ہے جب کہ میدانی علاقے برفیلی ہواؤں کی لپیٹ میں ہیں۔پنجاب اور خیبرپختونخوا کے مختلف شہروں میں صبح کے اوقات میں دھند سے ٹریفک کی روانی متاثر ہے اور ٹرینیں، پروازیں بھی تاخیر کا شکار ہیں۔

سردی میں اضافے کے باعث کے پی کے انتظامیہ نے اسکولوں میں سردیوں کی چھٹیاں 7 جنوری تک بڑھا دی تھیں جس میں مزید توسیع کا فیصلہ کیا گیا ہے جس کے بعد اب خیبرپختونخوا کے اسکول 12 جنوری کو کھلیں گے۔

دوسری جانب بارشوں اور شدید سردی کے باعث پنجاب کے تمام سرکاری اور نجی اسکولوں میں بھی موسم سرما کی چھٹیاں ایک ہفتے کے لیے بڑھا دی گئیں جہاں اب اسکول پیر 13 جنوری کو کھلیں گے۔محکمہ تعلیم کی جانب سے اسکولوں کی چھٹیوں میں مزید توسیع کا باضابطہ نوٹی فیکیشن بھی آج جاری کیا جائے گا۔

لاہور(ایمرا نیوز آن لائن)رشوت کی روک تھام کیلئے متحرک محکمہ اینٹی کرپشن نے رشوت وصولی میں ملوث اراضی ریکارڈ سنٹرمظفر گڑھ کے دو ملازمین کو رشوت لیتے ہوئے رنگے ہاتھوں گرفتار کر لیا ۔

ذرائع کے مطابق کے ایمپلائز ایل آر او محمد عارف اور ایس ای او شاہد سلیم کو اراضی ریکارڈ سنٹر سے رشوت وصول کرتے گرفتار کیا گیا ۔ایس ای او شاہد سلیم کو جب رشوت لیتے ہوئے گرفتار کیا تو ایس ای او کی آگاہی اور نشاندہی کے نتیجے میں ایل آر او محمد عارف کو بھی گرفتار کر لیا گیا۔

ترجمان پنجاب لینڈ ریکارڈ اتھارٹی نے گرفتاریوں کی تصدیق کرتے ہوئے کرپٹ عناصر کے خلاف اس کاروائی کو احسن قرار دیا اور محکمانہ طور پر بھی ان کے خلاف انکوائری کرنے کا عندیہ دیدیا۔

اسلام آباد(ایمرا نیوز آن لائن)حضرت علیؓ سے کسی نے شکایت کی کہ آپ سے پہلی حکومتیں اچھی تھیں جبکہ آپ کی حکمرانی قابلِ ستائش نہیں ہے۔ آپ نے جواب میں فرمایا ’’اس لئے کہ اُن کے مشیر ہم تھے اور ہمارے مشیر آپ جیسے لوگ ہیں‘‘۔مدعا یہ کہ قیادت جتنی بھی اچھی، شریف، دیانتدار اور باصلاحیت ہو اگر اُس کے وزیر، مشیر اور دیگر عہدیداران اُس معیار کے نہیں ہونگے تو گڈ گورننس کا خواب کبھی شرمندہ تعبیر نہیں ہو سکے گا۔بظاہر یہ چیز خلافِ حکمت لگتی ہے کہ ہر چند ماہ کے بعد حکومتی عہدے داران میں ردو بدل کردیا جائے کیونکہ اس سے حکومتی مشینری کا اندرونی عدم استحکام جھلکتا ہے اور متعلقہ لوگ یہ کہنے میں حق بجانب ہوتے ہیں کہ ہمیں کام کرنے کا مناسب موقع تو دیا جائے لیکن اگر عزم اعلیٰ کارکردگی منوانے کا ہو تو پھر کسی کو بھی غیر محدود مواقع دینا مشکل ہو جاتا ہے۔

وفاق میں ہمارے وزیراعظم کی حکمرانی اور اسے درپیش چیلنجز کا تو ہمیں براہ راست زیادہ علم نہیں ہے لیکن کچھ مسائل تو ہیں جن کے باعث اتنی بڑی اور وسیع سفارتی و سیاسی تبدیلیاں عمل میں لائی جا رہی ہیں۔اقوامِ متحدہ میں پاکستان کی مستقل مندوب ملیحہ لودھی کو وزیراعظم کے حالیہ دورہ امریکہ کے فوری بعد یعنی وطن واپسی کے اگلے روز ہی ہٹانا ضروری سمجھا گیا ہے جس پر اندرونِ و بیرونِ ملک اچھی خاصی بحثیں ہو رہی ہیں۔یہ بھی بتایا جا رہا ہے کہ مستقل مندوب کا ماتحت عملہ اور ان کے کولیگ اُن کی گرم مزاجی سے نالاں و غیرمطمئن تھے جنہوں نے اپنی شکایات وزیراعظم کے گوش گزار کیں۔اُن کی کارکردگی بھی زیر بحث تھی، علاوہ ازیں اس نوع کی باتیں بھی سننے میں آرہی تھیں کہ وہ موجودہ سخت ترین حالات میں بھی مودی سرکار کے لئے کوئی نرم گوشہ رکھتی تھیں جبکہ اُن کی جگہ لائے گئے سابق ایمبسیڈر منیر اکرام کے متعلق بتایا جا رہا ہے کہ وہ بھارت یا مودی انتظامیہ کے حوالے سے خاصے سخت مؤقف کے حامل ہیں۔

درویش کی نظر میں یہ مسئلہ ایسا اہم نہیں ہے کسی کی ذاتی رائے کچھ بھی ہو سکتی ہے لیکن جب وہ سرکاری مشینری کا حصہ ہے تو اس نے تمام امور کی انجام دہی اُسی پالیسی کی روشنی میں کرنی ہے جس کی اُسے ہدایت کی جائے گی۔ اصل بات وہی ہے کہ اگر کسی بھی فرد کو کسی سرکاری ذمہ دارای پر فائز کیا جاتا ہے تو پھر اس سے یہ توقع رکھی جاتی ہے کہ وہ کم سے کم مدت میں کتنا ڈیلیور کرتا ہے۔اگر ڈیلیوری قابلِ اطمینان نہیں ہے تو پھر ایسے فرد کو چاہے وہ کتنا ہی اثر وسوخ کیوں نہ رکھتا ہو اپنے عہدے پر براجماں رہنے کا کوئی حق نہیں رہتا ہے لہٰذا وزیراعظم نے اپنے وزراء کو ہٹانے کا اعلان کر کے، وسیع پیمانے پر سیاسی و سفارتی تبدیلیاں لاتے ہوئے جو اقدام کیا ہے اُسے درست سمت میں ایک پیش رفت کے طور پر دیکھا جانا چاہئے۔

وزیراعظم جس طرح وفاق میں اعلیٰ کارکردگی کا مظاہرہ دیکھنا چاہتے ہیں اُسی طرح ان کی خواہش ہے کہ وہ پاکستان کے سب سے بڑے صوبے پنجاب میں بھی نہ صرف گڈ گورننس دیکھیں بلکہ وزیراعلیٰ پنجاب عثمان بزدار صاحب اُن کی تسلی و اطمینان کے عین مطابق کامیابیوں کے جھنڈے گاڑیں اور یہ اُسی صورت ممکن ہے جب انہیں اُسی نوع کا فری ہینڈ دیا جائے جس طرح کا وفاق میں خود وزیراعظم کو حاصل ہے۔یہ ممکن ہی نہیں ہے کہ غیر مناسب، غیر موزوں اور قدم سے قدم نہ ملا کر چلنے والی ٹیم کے ساتھ کوئی بھی کپتان کوئی معیاری و قابلِ ستائش نتائج یا کامیابیاں دے سکے۔پنجاب کی تاریخ میں پہلی مرتبہ ایک ایسے شخص کو وزیراعلیٰ منتخب کیا گیا ہے جس کی شرافت، وفاداری، منکسر المزاجی اور عزم و خلوص پر کوئی انگلی نہیں اٹھا سکتا۔ جس کی پشت پر کوئی اسٹرانگ لابی یا مفاداتی ٹولہ براجماں نہیں ہے، جو دلجمعی سے کام کرنے اور نتائج دینے پر یقین رکھتا ہے۔

پارٹی کے ذمہ داران تو رہے اپنی جگہ، بہت سے پارٹی ناقدین کی رائے میں بھی وزیراعظم کو بطور وزیراعلیٰ پنجاب جناب عثمان بزدار سے زیادہ قابلِ اعتماد شخص ملنا خاصا مشکل ہے کیونکہ اقتدار کی غلام گردشوں میں ہمیشہ سازشی تھیوریاں رنگ دکھاتی ہیں۔بات پھر وہیں آجاتی ہے کہ اگر کسی بھی ٹیم کے تمام کھلاڑی اپنے کپتان کے ساتھ ہم آہنگ ہو کر نہیں چلتے ہیں تو مطلوبہ کامیابیوں کا حصول مشکل تر ہوتا چلا جاتا ہے اس لئے جس نوع کی تطہیر وفاق میں کی جا رہی ہے اس کا عملی مظاہرہ پاکستان کے سب سے بڑے صوبے میں بھی ہونا چاہئے۔پنجاب ٹیم کے کپتان سے اگر آپ بھرپور ڈیلیوری چاہتے ہیں تو اُن کی معاونت کرتے ہوئے اُنہیں ایسی ٹیم بھی ملنی چاہئے جو اُن کی راہ میں روڑے اٹکانے کے بجائے روڑے ہٹانے کا کام کرے کیونکہ حکومتِ پنجاب کی اعلیٰ کارکردگی ہمیشہ وفاق اور وزیراعظم پاکستان کے لئے نیک نامی اور عوامی مقبولیت کا باعث ثابت ہوتی رہی ہے۔

اعلیٰ ڈسپلن، جانفشانی و لگن اور بھرپور اعتماد کے بغیر گڈ گورننس کے تقاضے پورے نہیں کیے جا سکتے۔ ترقی کے لئے خود احتسابی سے بڑھ کر کوئی امرت دھارا نہیں ہوتی لیکن خوف و ہراس اور بے یقینی و عدم اعتمادی سے چھٹکارا اتنا ہی ضروری ہے جتنا بالائی سطح پر عوام دوست پالیسیاں بنانا اور ان پر کماحقہ گراس روٹ لیول تک عملدرآمد کروانا، جس کا تقاضا نو آبادیاتی عہدوں یا ڈی سی اختیارات کی بحالی نہیں، اختیارات کی نچلی سطح تک تقسیم کرتے ہوئے مقامی حکومتوں کے ذریعے عوامی نمائندوں کی شمولیت ہے۔ جس کا کامیاب تجربہ ہم مشرف دور میں کر چکے ہیں۔اُس دور کی تعمیر و ترقی اور بلدیاتی مضبوطی ریکارڈ پر ہے جسے نقصان بالائی سطح سے پہنچا نہ کہ نچلی سطح سے۔ چار معصوم بچوں کا قاتل چونیاں سے جس طرح پکڑا گیا ہے اس پر پنجاب گورنمنٹ تحسین کی مستحق ہے اس تجویز کے ساتھ کہ سیف سٹی پروجیکٹ کا پھیلاؤ چھوٹے شہروں تک پہنچا دیا جائے البتہ مہنگائی اور ڈینگی پر قابو کو ایک چیلنج سمجھ کر قبول کیا جائے۔

لاہور(ایمرا نیوز آن لائن) وزیراعلیٰ پنجاب سردار عثمان بزدارنے کہا ہے کہ حکومت محنت کشوں کی فلاح کیلئے بہترین اقدامات کررہی ہے،جلد ثمرات ملنا شروع ہو جائیں گے،یہ دن ہمیں شکاگو کے مزدورں کی جبر اواستبدادکیخلاف جدوجہد کی یاددلاتا ہے۔

بدھ کو یوم مزدورکے عالمی دن پراپنے پیغام میںوزیراعلیٰ پنجاب نے کہا کہ دین اسلام محنت کش کی عظمت اورفلاح وبہبودکادرس دیتاہے،اسلام نے محنت کش کواللہ کا دوست دے کر اس کی عظمت کو اجاگر کیا ہے ،انہوں نے کہا کہ نئے پاکستان میں محنت کش کواس کے حقوق ملیں گے،نیا پاکستان محنت کشوں اور مزدوروں کاپاکستان ہے۔انہوں نے کہا کہ محنت کشوں کی فلاح کیلئے بہترین اقدامات کر رہے ہیں ،جلد ثمرات ملنا شروع ہو جائیں گے۔

ملتان(ایمرا نیوزآن لائن) وزیر اعلیٰ پنجاب عثمان بزدار آج ملتان اورڈیرہ غازی خان جائیں گے۔وزیراعلیٰ پنجاب سردارعثمان بزدار آج ملتان کادورہ کریں گے اور اس موقع پر وہ ایک ہزار بستر پر مشتمل نشتر اسپتال ٹو کا سنگ بنیاد رکھیں گے۔سردارعثمان بزدار بلیل شجاع آباد روڈ پرنشتراسپتال ٹوکاسنگ بنیادرکھیں گے، نشترٹو میں ایمرجنسی بلاک 120 بستروں کا ہوگا جبکہ میڈیکل کالج،پیرامیڈیکل، نرسنگ کالج بھی پروجیکٹ کاحصہ ہے۔نشتر ٹو کے لیے شجاع آباد روڈ پر58 ایکڑاراضی مختص کی گئی ہے۔

لاہور(ایمرا نیوزآن لائن) وزیر اعلیٰ پنجاب سردار عثمان بزدار نے کہا ہے کہ چینی کی قیمت میں بلاجواز اضافہ کسی صورت برداشت نہیں کیا جائے گا، پنجاب حکومت چینی کی قیمت میں استحکام کے لیے ہر ممکن اقدام کرے گی ۔لاہور سے جاری کیے گئے ایک بیان میں وزیر اعلیٰ پنجاب عثمان بزدار نے مزید کہا ہے عوام کو زیادہ سے زیادہ ریلیف فراہم کرنا ہماری حکومت کا ایجنڈا ہے۔

انہوں نے کہا کہ مجھے صوبے کے عوام کا مفاد بے حد عزیز ہے، کسی کو اس سلسلے میں من مانی نہیں کرنے دیں گے۔پنجاب کے وزیر اعلیٰ کا کہنا ہے کہ چینی کی قیمت میں بلاجواز اضافہ روکنے کے لیے ہر آپشن استعمال کیا جائے، متعلقہ محکمے چینی کے نرخوں میں استحکام کے لیے اقدامات اٹھائیں۔سردار عثمان بزدار نے یہ بھی کہا کہ اس سلسلے میں کسی کی پرواہ نہیں، صوبے کے عوام کو ریلیف دینے کے لیے ہر اقدام کیا جائے گا۔