Tag cricket

لاہور:(ایمرا نیوزآن لائن) پاکستان کرکٹ بورڈ نے سری لنکن بورڈ سے پاکستان میں ٹیسٹ سیریز کھیلنے کے لیے رابط کیا ہے۔پی سی بی ذرائع کے مطابق پاکستان اور سری لنکا کی ٹیموں کے درمیان 2 ٹیسٹ میچز پاکستان میں کھیلنے کے لیے کوششیں تیز کردی گئی ہیں۔ذرائع کا کہنا ہے کہ سری لنکا نے ٹیم پاکستان بھیجنے کے لیے مثبت اشارہ دیا ہے، مہمان ٹیم کے پاکستان آنے کی صورت میں میچز کی میزبانی لاہور اور کراچی کریں گے۔ذرائع کے مطابق آئندہ چند ہفتوں میں سیریز پاکستان میں ہونے کا باقاعدہ اعلان بھی متوقع ہے۔یاد رہے کہ 3 مارچ 2009 کو سری لنکن ٹیم پر لاہور میں حملے کے بعد سے اب تک پاکستان نے اپنی سرزمین پر کسی بھی ٹیسٹ میچ کی میزبانی نہیں کی تاہم وقتاً فوقتاً انٹرنیشنل کرکٹرز اور ٹیمیں پاکستان آکر ون ڈے اور ٹی ٹوئنٹی میچز کھیلتے رہے ہیں۔پاکستان نے 2015 میں قذافی اسٹیڈیم میں لاہور میں ون ڈے اور ٹی ٹوئنٹی سیریز کے لیے زمبابوے کی میزبانی کی جس کے بعد 2017 میں ورلڈ الیون کے کھلاڑیوں نے 3 ٹی ٹوئنٹی میچز پاکستان میں کھیلے اور اسی سال سری لنکن ٹیم نے لاہور میں ہی ایک ٹی ٹوئنٹی میچ کھیلا۔2018 میں ویسٹ انڈیز کی ٹیم نے پاکستان کا دورہ کیا اور کراچی کے نیشنل اسٹیڈیم میں تین ٹی ٹوئنٹی میچز کھیلے اور اب پی سی بی ملک میں مکمل طور پر عالمی کرکٹ کی بحالی کے لیے کوشاں ہے۔

لاہور(ایمرا نیوزآن لائن) معروف سپورٹس صحافی اور تجزیہ کار سید یحیی حسینی نے دعوی کیا ہے کہ کپتان سرفرا ز احمدکو ورلڈ کپ کے دوران ہی بنچ پر بٹھانے کا پلان مکمل طور پر تیار ہے ۔ نجی ٹی وی کے پروگرام میں گفتگو کرتے ہوئے یحیی حسینی کا کہنا تھا کہ سرفراز احمد انسان تو بہت اچھے ہیں لیکن کپتان بہت کمزور ثابت ہوئے ہیں ،انہوں نے ہیڈ کوچ مکی آرتھر اور چیف سلیکٹر انضمام الحق کو بہت زیادہ چھوٹ دی جس کے باعث اب ان کے لیے مشکلات بڑھ گئی ہیں ،اگر ان کی جگہ کوئی اور کپتان ہوتا تو آسٹریلیا کے خلاف ون ڈے سیریز کے لیے آرام دیئے جانے پر انضمام الحق سے کہتا کہ ورلڈ کپ میں بھی آپ ہی کپتانی کرلیں۔یحیی حسینی کا مزید کہنا تھا کہ ورلڈ کپ کے لیے سکواڈ کو اب تک حتمی شکل نہیں دی جاسکی ہے ،پی سی بی تین کھلاڑیوں محمد رضوان ، شان مسعود اور محمد نواز کو انگلینڈ بھجو ا رہا ہے جو ٹریننگ کریں گے اور کسی کھلاڑی کے زخمی ہونے کی صورت میں ٹیم کو جوائن کرلیں گے۔یحیی حسینی کا کہنا تھا کہ سرفراز احمد نے بھی اب نوشتہ دیوار پڑھ لیا ہے اور اسی لیے ایک انٹر ویو میں کہا ہے کہ وہ ورلڈ کپ میں چوتھے نمبر پر بلے بازی کریں گے ،اگر وہ بطور بلے باز سکور نہ کرسکے تو انہیں ورلڈکپ کے دوران ہی بنچ پر بٹھادیا جائے گا اور ان کی جگہ محمد رضوان کو ٹیم میں شامل کرلیا جائے گا جبکہ شعیب ملک ٹیم کی کپتانی کریں گے۔

لاہور(ایمرا نیوز آن لائن) لاہور ہائیکورٹ نے اسپاٹ فکسنگ میں سزایافتہ کرکٹر ناصر جمشید کا نام ای سی ایل سے نکالنے کا حکم دیا ہے۔لاہور ہائیکورٹ میں سابق کرکٹر ناصر جمشید کا نام ایگزٹ کنٹرول لسٹ سے نکالنے کے لیے دائر درخواست کی سماعت ہوئی، درخواست گزار کی جانب سے موقف اپنایا گیا کہ اسپاٹ فکسنگ میں سزا کے بعد ناصر جمشید کا نام ای سی ایل میں ڈالا گیا، غیر قانونی طور پر ای سی ایل میں نام شامل کر کے قانون کی خلاف ورزی کی گئی۔ڈپٹی اٹارنی جنرل نے وزارت داخلہ کی جانب سے جواب دیتے ہوئے کہا کہ ایف آئی اے کی سفارش پر نام ای سی ایل میں ڈالا۔ وکیل ایف آئی اے نے دلائل میں کہا کہ ای سی ایل میں نام ڈالنا وزارت داخلہ کا اختیار ہے، ناصر جمشید کی کوئی انکوائری ایف آئی اے کے پاس زیرالتوا نہیں۔عدالت نے فریقین کے دلائل سننے کے بعد اسپاٹ فکسنگ میں سزا یافتہ کرکٹر ناصر جمشید کا نام ای سی ایل سے نکالنے کا حکم دے دیا۔واضح رہے کہ پاکستان کرکٹ بورڈ (پی سی بی) کے 3 رکنی اینٹی کرپشن ٹربیونل نے اسپاٹ فکسنگ کیس کا فیصلہ سناتے ہوئے ناصر جمشید پر ایک سال کی پابندی عائد کی تھی۔

دھول کلکرنی کی ڈلیوری پر ان سائیڈ ایج پر گیند سٹمپس سے ٹکرائی، بیلز اچھلیں مگر پھر اپنی جگہ پر آگئیں
جے پور(ایمرا نیوز آن لائن)انڈین پریمیئر لیگ( آئی پی ایل) میں گیند وکٹوں پر لگنے کے باوجود بیلز نہ گرنے کے واقعات میں اضافہ ہوگیا۔آئی پی ایل کے رواں ایڈیشن میں تین بار اس وجہ سے بیٹسمین آٹ ہونے سے بچے ہیں، کولکتہ نائٹ رائیڈرز کے اوپنر کرس لین گذشتہ روز گیند سٹمپس میں لگنے کے باوجود آٹ ہونے سے محفوظ رہے تھے۔یہ واقعہ چوتھے اوور میں پیش آیا جب کولکتہ نائیٹ رائیڈرز کے کرس لین 13 رنز پر بیٹنگ کررہے تھے، دھول کلکرنی کی ڈلیوری پر ان سائیڈ ایج پر گیند سٹمپس سے ٹکرائی، بیلز اچھلیں مگر پھر اپنی جگہ پر آگئیں، قانون کی رو سے بیلز نہ گرنے کی وجہ سے لین کو بیٹنگ جاری رکھنے کا موقع مل گیا۔یاد رہے کہ انڈین پریمیر لیگ کا بارہواں ایڈیشن 23 مارچ سے شروع ہو چکا ہے اور ٹور نا منٹ کے تمام میچز بھارت میں کھیلے جارہے ہیں۔بھارتی کرکٹ بورڈ کی طرف سے جاری کردہ بیان کے مطابق رواں برس لیگ کی تاریخیں ملک میں عام انتخابات سے متصادم ہیں اسلئے انتخابات کی تاریخوں کے اعلان کے بعد حتمی طور پر لیگ کے میچز کے شیڈول اور مقامات کا اعلان کیا گیا ہے۔ دفاعی چمپئن چنائی سپر کنگز ٹائٹل کا دفاع کرے گی اور دفاعی چمپئن ہونے کی حیثیت سے چنائی لیگ کے افتتاحی اور فائنل میچ کی میزبانی کا حق حاصل ہے ۔

لاہور (ایمرا نیوز آن لائن) پاکستان کرکٹ بورڈ (پی سی بی) نے جنوبی افریقہ ویمن کرکٹ ٹیم کیخلاف 3ایک روزہ میچوں پر مشتمل سیریز سے پہلے فرسٹ کلاس کرکٹر اقبال امام کو قومی ویمن کرکٹ ٹیم کا بیٹنگ کوچ مقرر کر دیا ہے۔یہ سیریز آئی سی سی ویمنز چیمپین شپ کا حصہ ہیں جس میں پاکستانی ٹیم اس وقت چھٹے نمبر پر ہے۔ امام اقبال اینڈی رچرڈز سے چارج سنبھالیں گے جنہوں نے جولائی 2018ء میں بیٹنگ کوچ کا عہدہ سنبھالا تھا۔پی سی بی کے منیجنگ ڈائریکٹر وسیم خان کا کہنا ہے کہ اقبال ایک محنتی شخص اور بہترین کوچ ہیں جو ویمن کرکٹ ٹیم سے متعلق پی سی بی کے ویڑن پر پورا اترتے ہیں، اور یہ ویڑن قومی ویمن ٹیم کو ایسے انفرادی ماہرین فراہم کرنا ہے جو ان کی ترقی اور کارکردگی میں اضافہ کر سکیں۔

بارباڈوس(ایمرا نیوز آن لائن )ویسٹ انڈیز کے مایہ ناز کرکٹر کرس گیل کا کہنا ہے کہ مجھے چھکوں کی مشین سمجھا جاتا ہے کہ وکٹ پر آﺅں ، بٹن دباں اور چھکے پہ چھکا لگا ﺅں۔ انہیں خود کیا اچھا لگتا ہے، کیرئر کے آخری ورلڈ کپ سے پہلے کرس گیل نے سب بتا دیا۔انتالیس سالہ کرس گیل جو کرکٹ کو جارحانہ انداز سے کھیلتے اور تیکھے بلے باز کی شہرت رکھتے ہیں، کہتے ہیں کہ پرستار انہیں چھکوں کی مشین سمجھتے ہیں کہ آں بٹن دباں اور چل سو چل، کہا کہ خود انہیں بھی بانڈری سے باہر گیند کو پھینکنا اچھا لگتا ہے۔کرس گیل ٹیسٹ، ون ڈے اور ٹی ٹوئنٹی کرکٹ میں پانچ سو سترہ چھکے مارنے کا منفرد ریکارڈ رکھتے ہیں، ویسٹ انڈیز کی طرف سے کیرئر کے آخری ورلڈ کپ کو کیسے یادگار بنانا چاہتے ہیں، لیجنڈری آئن بشپ کو انٹرویو میں سب بتا دیا۔

اہم ایونٹ کیلئے عمر اکمل، وہاب ریاض اور احمد شہزاد کو نظر انداز کرنے کی وجہ سامنے نہ آسکی
اسلام آباد(ایمرا نیوز آن لائن) عمراکمل، وہاب ریاض اور احمد شہزاد کو ورلڈکپ کے ممکنہ کھلاڑیوں میں بھی شامل نہ کرنے پر شائقین کرکٹ نے سوشل میڈیا پر کوچ اور سلیکٹرز کو آڑھے ہاتھوں لے لیا۔میڈیا رپورٹس کے مطابق اس وقت پاکستان کرکٹ ٹیم کے ہیڈ کوچ مکی آرتھر اور چیف سلیکٹر انضام الحق کو سخت تنقید کا سامنا کرنا پڑ رہا جبکہ سینئر صحافیوں اورتجزیہ کاروں نے بھی تینوں اہم کھلاڑیوں کو نظرانداز کیے جانے کی وجہ پوچھ لی،ورلڈکپ جیسے اہم ایونٹ سے عمر اکمل، وہاب ریاض اور احمد شہزاد کو نظر انداز کیے جانے کی ٹھوس وجہ معلوم نہ ہو سکی۔عمر اکمل پاکستان ون ڈے کپ میں مسلسل اچھی کارکردگی دکھانے کے باوجود ورلڈکپ 2019ء کے ممکنہ کھلاڑیوں میں جگہ نہیں بنا سکے۔ڈسپلن کی خلاف ورزی کرنے پر پاکستان کرکٹ بورڈ (پی سی بی) نے ان پرجرمانہ عائد کیا تھا۔ آسڑیلیا کےخلاف سیریز کے دوران عمراکمل کسی کو بتائے بغیر رات بھر ایکون کے کنسرٹ میں شریک رہے تھے۔عمر اکمل کی ویڈیو سوشل میڈیا پر وائرل ہونے کے بعد ٹیم مینجمنٹ کو ہوش آیا جس کے بعد عمراکمل ورلڈکپ کے ممکنہ کھلاڑیوں کے پول سے باہر کردیے گئے۔

لاہور (ایمرا نیوز آن لائن)قومی کرکٹ ٹیم کے سابق کپتان اظہر علی نے کہا ہے کہ کسی بھی ٹورنامنٹ میں پاکستان کو کمزور حریف خیال نہیں کیا جاسکتا۔قومی ٹیم کے ٹیسٹ کرکٹراظہر علی نے کہا کہ کپتان سرفراز احمد کو باصلاحیت کرکٹرز کی خدمات میسر ہیں، پاکستان کی بولنگ ہمیشہ سے مضبوط رہی ہے، چیمپئنز ٹرافی میں اس کی جھلک بھی نظر آئی، ورلڈ کپ میں بھی گرین شرٹس سے توقعات وابستہ ہوں گی لیکن ٹاپ آرڈر کو بڑے اسکور کیلیے اچھی بنیاد فراہم کرنا ہوگی تاکہ بولرز کو اپنی صلاحیتوں کے بھر پور اظہار کا موقع مل سکے۔انہوں نے کہا کہ ورلڈ کپ میں بھارت، پاکستان، آسٹریلیا اور جنوبی افریقہ کی ٹیمیں فیورٹ ہوں گی، کیویز بھی اکثر چھپے رستم ثابت ہوتے ہیں، گرین شرٹس ردھم میں آ گئے تو حریفوں کو زیر کرتے جائیں گے۔ انہوں نے کہا کہ فخر زمان اور امام الحق جیسے اوپنرز سامنے آنے کے بعد ون ڈے کرکٹ سے ریٹائرمنٹ کا بروقت فیصلہ کیا، پوری توجہ ٹیسٹ میچز پر مرکوز رکھنا چاہتا ہوں۔

محمد عامر کا پہلا ورلڈ کپ کھیلنے کا خواب چکنا چور ہونے کا امکان
”لاڈلے“ پیسر ہیڈ کوچ مکی آرتھر کے دل سے اتر گئے
لاہور(ایمرا نیوز آن لائن) ”لاڈلے“ محمد عامر مسلسل ناقص کارکردگی کے سبب ہیڈ کوچ مکی آرتھر کے دل سے بھی اتر گئے۔ورلڈکپ کیلئے حتمی پاکستانی سکواڈ کا اعلان 18 اپریل کو ہونا ہے‘ جس سے قبل 15 اور 16 تاریخ کو 23کھلاڑیوں کے فٹنس ٹیسٹ لیے جائینگے۔ ذرائع کے مطابق اب بھی مختلف آپشنز پر غور جاری ہے تاہم بیشتر پلیئرز پر ٹیم مینجمنٹ اور سلیکٹرز میں اتفاق رائے ہو چکا ہے،طویل عرصے سے آوٹ آف فارم محمد عامر اب ہیڈ کوچ مکی آرتھر کے دل سے بھی اتر چکے ہیں اور پیسر شاید ہی انگلینڈ کا ٹکٹ حاصل کرسکیں گے، بعض ”حلقوں“ کی پوری کوشش ہے کہ کسی طرح عامر کو سکواڈ میں شامل کرا دیا جائے، عامر نے 18 جون 2017ئ کو بھارت سے چیمپئنز ٹرافی فائنل میں16رنز دیکر3 کھلاڑی آؤٹ کیے تاہم اس کے بعد وہ 14 ون ڈے میچز میں کبھی ایک سے زائد وکٹ حاصل نہ کر سکے، 9مقابلوں میں انہیں کوئی وکٹ نہ ملی ،اس دوران انھوں نے88.6 کی اوسط سے5 وکٹیں لی ہیں،آسٹریلیا سے یو اے ای میں منعقدہ گزشتہ سیریز کے افتتاحی میچ میں بغیر کسی وکٹ کے59رنز دینے کے بعد عامر کو بقیہ میچزمیں موقع نہ ملا، نوجوان پیسر محمد حسنین کو انگلینڈ لے جانے پر غور جاری ہے، انھوں نے 3ون ڈے میچز میں صرف 2 وکٹیں لیں تاہم اپنی رفتار سے سب کو بیحد متاثر کیا،شاہین شاہ آفریدی اور حسن علی کیساتھ ٹیم میں پیسرکی ایک اور خالی جگہ کیلئے محمد عباس،جنید خان اور عثمان شنواری میں مقابلہ ہے تاہم عثمان شنواری کی شمولیت کا امکان زیادہ روشن ہے۔

لاہور (ایمرا نیوز نیٹ نیوز) قومی کرکٹ ٹیم کے کپتان سرفراز احمد نے شائقین کرکٹ کیلئے خوشخبری جاری کرتے ہوئے عالمی کپ جیتنے کی یقین دہانی کرادی ہے ،ان کا کہنا ہے کہ میگا ایونٹ کے ہر میچ پر توجہ ہے جہاں ٹیم فائٹ کرتی دکھائی دے گی،بھرپور تیاریاں جاری ہیں اور مجھ سمیت ہر کوئی فٹنس پر محنت کر رہا ہے ،کپتان،کوچ اور سلیکٹرز ایک صفحے پر ہیں،اسکواڈ میں زیادہ تبدیلیاں نہیں کریں گے ،جلد ہی مشاورت کے بعد حتمی ٹیم کا انتخاب کرلیا جائے گا،آسٹریلیا کیخلاف سیریز میں آرام کرنے سے کافی فائدہ ہوا ہے ۔گزشتہ روز میڈیا سے گفتگو میں قومی ٹیم کے کپتان سرفراز احمد نے پاکستانی شائقین کرکٹ کو خوش خبری سنا دی ہے کہ وہ ورلڈ کپ جیتنے کیلئے انگلینڈ جا رہے ہیں کیونکہ انہوں نے ہر میچ کو اپنی توجہ کا مرکز بنایا ہوا ہے اور یقین ہے کہ میگا ایونٹ میں پاکستانی ٹیم فائٹ کرتی دکھائی دے گی۔ ایک سوال پر سرفراز احمد کا کہنا تھا کہ ورلڈ کپ دیگر تمام ممالک کی طرح ان کیلئے بھی اہمیت کا حامل ہے اور اس کیلئے بھرپور تیاریاں جاری ہیں۔قومی کپتان نے واضح کیا کہ ان سمیت تمام پلیئرز فٹنس کی بہتری پر سخت محنت کر رہے ہیں اور ٹیم کا مورال بلند کرنے کا منصوبہ بھی پیش نظر ہے ۔ان کا کہنا تھا کہ ٹیم کی تشکیل کیلئے وہ سلیکشن کمیٹی اور ہیڈ کوچ کے ساتھ ایک ہی صفحے پر ہیں لہٰذا اسکواڈ میں بہت زیادہ ردو بدل نہیں کیا جائے گا اور بہت جلد انضمام الحق اورمکی آرتھر سے مشاورت کے بعد حتمی ٹیم کا انتخاب کرلیا جائے گا۔سرفراز احمد کا کہنا تھا کہ ورلڈ کپ دو ہزار انیس کا فارمیٹ قدرے مشکل ہے تاہم بھارت کیخلاف اس ٹورنامنٹ میں میچ قدرے اہم ہوتا ہے لہٰذا اسے جیتنے کی پوری کوشش کریں گے کیونکہ انہیں یقین ہے کہ موجودہ ٹیم بہت اچھی ہے ۔وکٹ کیپر بیٹسمین کا کہنا تھا کہ ان کی بھی اولین خواہش یہی ہے کہ اس بار ورلڈ کپ میں ٹائٹل کامیابی حاصل کی جائے لیکن گرین شرٹس کو ٹرافی جیتنے میں ناکامی بھی ہوئی تو پلیئرز میدان میں بھرپور فائٹ کرتے دکھائی دیں گے ۔ قومی کرکٹ ٹیم کے کپتان کا کہنا تھا کہ پاکستان کی اصل قوت اس کی بالنگ کا شعبہ ہے جس میں شامل فاسٹ بالر محمد عامر کو اپنی کارکردگی پر فوکس کرنے کی ضرورت ہے جبکہ دیگر بالرز بھی اپنی خامیوں کو دور کرنے میں مصروف ہیں۔آسٹریلیا کیخلاف سیریز میں آرام سے متعلق سرفراز احمد کا کہنا تھا کہ اس فیصلے سے ان سمیت تمام پلیئرز کو فائدہ ہوا ہے کیونکہ لگاتار کرکٹ کی وجہ سے ریسٹ کی ضرورت محسوس ہو رہی تھی۔پی ایس ایل کے حوالے سے گفتگو کرتے ہوئے قومی کپتان کا کہنا تھا کہ پاکستان سپرلیگ میں ٹائٹل کامیابی کی انہیں بھی بہت زیادہ خوشی ہے کیونکہ یہ محض ایک ٹورنامنٹ نہیں بلکہ برانڈ بن چکا ہے اور اس مرتبہ انہیں اپنے شہر میں میچز کھیلنے کا زیادہ لطف محسوس ہوا جہاں انہیں شائقین کرکٹ کی بھرپور حمایت بھی حاصل تھی۔سرفراز احمد نے شائقین اور مداحوں سے ورلڈ کپ میں پاکستانی ٹیم کی کامیابی کیلئے دعا کی درخواست کرتے ہوئے کہا کہ انہیں اپنی کارکردگی کے ساتھ قوم کی دعائیں بھی درکار ہیں۔واضح رہے کہ سرفراز احمد کی قیادت میں مشن ورلڈ کپ 2019 ء کیلئے پاکستانی کھلاڑی 23 اپریل کو انگلینڈ روانہ ہوں گے جن کو اس سے قبل فٹنس ٹیسٹ کا مرحلہ بھی مکمل کرنا ہے جس کیلئے 23 کھلاڑیوں کے ناموں کا اعلان کردیا گیا ہے ۔فٹنس ٹیسٹ کے بعد 18 اپریل تک عالمی کپ کے حتمی اسکواڈ کا اعلان متوقع ہے اور سرفراز احمد پرامید ہیں کہ منتخب کھلاڑی انگلش کنڈیشنز میں بہترین کھیل کا مظاہرہ کریں گے ۔