Tag cricket

سری لنکا(ایمرا نیوزآن لائن) سری لنکامیں خوفناک دہشتگردی کے واقعات نے پاکستانی کرکٹرز کو بھی غمگین کردیا۔ کئی موجودہ اور سابق کھلاڑیوں نے سوشل میڈیا پر غمزدہ خاندانوں سے یکجہتی اور افسوس کا اظہار کیا۔قومی ٹیم کے کپتان سرفراز احمد کا کہنا ہے کہ ہماری دعائیں سری لنکا کے لوگوں کے ساتھ ہیں اور ہم مشکل وقت میں ان کے ساتھ کھڑے ہیں۔سابق کرکٹر شاہد آفریدی نے بھی سماجی رابطے کی ویب سائٹ پر سری لنکا کے عوام سے تعزیت کی۔ شاہد آفریدی نے لکھا کہ بم دھماکوں میں قیمتی جانوں کے ضیاع پر شدید دکھ ہوا۔ سری لنکا میں اپنے بھائی اور بہنوں کے لیے دعاگو ہوں۔انہوں نے مزید کہا کہ ہم سب مل کر تمام دہشت گردوں کو شکست دیں گے۔سابق کرکٹر اور کمنٹیٹر رمیز راجہ نے سری لنکا میں ہونے والے بم دھماکوں پر اپنے دکھ کا اظہار کرتے ہوئے کہا کہ مشکل وقت میں ہم سری لنکا کے عوام کے ساتھ کھڑے ہیں۔

اسلام آباد:(ایمرا نیوزآن لائن) ورلڈ کپ کے لیے منتخب ہونے والی قومی ٹیم کی وزیر اعظم عمران خان سے ملاقات جاری ہے۔وزیراعظم آفس میں ہونے والی ملاقات میں 17 کھلاڑیوں کے ہمراہ چیئرمین پاکستان کرکٹ بورڈ احسان مانی، کوچ مکی آرتھر اور چیف سلیکٹر انضمام الحق بھی شریک ہیں۔پاکستان کرکٹ بورڈ کی مینجمنٹ کے حکام بھی ملاقات کا حصہ ہیں۔ذرائع کے مطابق وزیر اعظم قومی کھلاڑیوں کو ورلڈ کپ کی تیاریوں کے لئے مشورے دیں گے اور بڑے ٹورنامنٹ سے متعلق قومی ٹیم کی حوصلہ افزائی کریں گے۔ واضح رہے کہ انگلینڈ میں ہونے والے ورلڈ کپ 2019 کے لیے قومی ٹیم کا اعلان گزشتہ روز کیا گیا جس میں کپتان سرفراز احمد، فخر زمان، امام الحق عابد علی، حارث سہیل، بابراعظم، شعیب ملک، محمد حفیظ، شاداب خان، عماد وسیم، حسن علی، فہیم اشرف، شاہین شاہ آفریدی اور محمد حسنین شامل ہیں۔فاسٹ بولر محمد عامر کو ڈراپ کر کے جنید خان کو ٹیم میں شامل کیا گیا ہے اور ان کی شمولیت کا دار و مدار ورلڈ کپ سے قبل انگلینڈ کے خلاف کھیلی جانے والی سیریز میں پرفارمنس پر ہوگا۔

کراچی:(ایمرا نیوزآن لائن) غیر ملکی دورں پر قومی ٹیم کے کھلاڑی اپنے اہل خانہ کے ہمراہ سفر کرتے ہیں تاہم اب ایسا نہیں ہوگا اور ورلڈ کپ کھیلنے کے لیے انگلینڈ روانہ ہونے والے کھلاڑی اپنے اہلخانہ کو ساتھ نہیں لے جاسکیں گے۔2009ء میں سری لنکن کرکٹ ٹیم پر لاہور میں ہونے والے دہشت گردی کے حملے کے بعد سے جب قومی ٹیم کو متحدہ عرب امارات کو ہوم سیریز کے لیے ہوم گراؤنڈ بنانا پڑا تو مصباح الحق کے کپتان بنتے ہی یہ روایت پڑی۔

جب غیر ملکی دوروں پر ٹیم کے اہل خانہ کے ساتھ ٹیم مینجمنٹ کے اہل خانہ بھی تواتر کے ساتھ دورے کرنے لگے، اگرچہ ماضی میں بھی ایسا ہوا کرتا تھا، تاہم 2010ء کے بعد سے اگر یہ کہا جائے کہ یہ معمول بن گیا تو ایسا کہنا غلط نہ ہوگا۔

جب پی سی بی نے غیرملکی دوروں پر کھلاڑیوں کے اہل خانہ کو جانے سے روکا تو بورڈ اور کھلاڑیوں کے درمیان تناؤ کی کیفیت پیدا ہوئی، اور اب یہ صورت حال پھر اس وقت سامنے آئی ہے جب ورلڈ کپ کے لئے قومی ٹیم کے کھلاڑیوں کو اپنے اہل خانہ کو ساتھ لے جانے کی اجازت نہیں ہوگی۔اس صورت حال میں بورڈ نے کھلاڑیوں پر واضح کر دیا ہے کہ آئی سی سی ورلڈ کپ سے قبل انگلینڈ کے خلاف پانچ ون ڈے میچوں کے دوران کھلاڑی اہلیہ اور بچوں کو ساتھ رکھ سکتے ہیں تاہم دوران ورلڈ کپ انہیں اہل خانہ کو ساتھ رکھنے کی اجازت نہیں ہوگی۔

دوسری جانب اس تمام صورت حال میں کھلاڑی بورڈ کے اس فیصلے سے زیادہ خوش دکھائی نہیں دیتے، ان کا مؤقف ہے کہ ورلڈ کپ کا آخری گروپ میچ بنگلہ دیش کے خلاف پاکستان کو 5 جولائی کو کھیلنا ہے، اور اگر ٹیم پاکستان نے فائنل کھیلا تو 15 جولائی کو وطن واپسی ہوگی، اس اعتبار سے دو ماہ طویل دورے میں کھلاڑیوں کو اہل خانہ کو ساتھ رکھنے کی اجازت نہ دینا افسوسناک ہے۔یاد رہے 2017ء میں آئی سی چیمپئینز ٹرافی کے دوران کھلاڑیوں کے اہل خانہ ان کے ساتھ موجود تھے۔

لاہور:(ایمرا نیوزآن لائن) چیف سلیکٹر نے اپنی بنائی ہوئی پالیسی کو بولڈ کردیا اور انہوں نے فٹنس ٹیسٹ میں ناکام عماد وسیم کو تھوڑی ’’فیور‘‘ دینے کا اعتراف کرلیا۔قذافی اسٹیڈیم لاہور میں ورلڈکپ اسکواڈ کا اعلان کرنے کے بعد میڈیا سے گفتگوکرتے ہوئے چیف سلیکٹر انضمام الحق نے کہا کہ ہم نے گزشتہ چند برس سے فٹنس کا ایک خاص معیار وضع کیا لیکن کبھی کبھار ٹیم کمبی نیشن کیلیے تھوڑا مشکل فیصلہ کرنا پڑ جاتا ہے۔

انہوں نے کہا کہ سچ ہے کہ عماد وسیم ٹیسٹ میں دیتے ہوئے ایک دو چیزوں میں تھوڑا پیچھے رہ گئے،گھٹنے کی انجری کے حوالے سے ڈاکٹر کی ہدایات بھی ہیں۔ ہم نے ان کو تھوڑی ’’فیور‘‘ دی اورامید ہے کہ وہ فٹ ہوجائیں گے، محمد حفیظ کی فٹنس کے حوالے سے بھی ایسی ہی توقعات وابستہ ہیں۔
محمد حسنین کو صرف رفتار کی وجہ سے تجربہ کار پیسرز پر ترجیح دینے کے سوال پر انھوں نے صحافی کو کہا کہ کبھی آپ نے 150کلومیٹر کی اسپیڈ سے آنے والی گیند کھیلی ہوتی تو بخوبی ہماری سلیکشن کی وجہ جان جاتے، حسن علی، جنید خان اور فہیم اشرف تجربہ کار ہیں لیکن ان کی رفتار ایک جیسی ہے۔ ان کے ساتھ کوئی ایکسپریس بولر ردھم میں آجائے تو کسی بھی ٹیم کی بیٹنگ تہس نہس کرسکتا ہے، محمد حسنین پاکستان ٹیم کا سرپرائز پیکیج ثابت ہوسکتے ہیں۔

محمد عامر کی اسکواڈ میں واپسی کے بارے میں بات کرتے ہوئے انضمام الحق نے کہا کہ پیسر ایک سال سے اچھا پرفارم نہیں کررہے لیکن ردھم میں آگئے تو بہت خوش آئند بات ہوگی، چیمپئنز ٹرافی فائنل میں انھوں نے بھارتی بیٹنگ لائن تباہ کردی تھی، اسی لیے ان کو انگلینڈ ساتھ لے کر جارہے ہیں، عثمان شنواری اور وہاب ریاض بھی اچھے بولر ہیں لیکن 8 پیسرز میں سے 5کو شامل کرنا ہو تو کسی نہ کسی کو ڈراپ کرنا ہی پڑے گا۔اسکواڈ کا اعلان کرتے ہوئےانضمام بار بار غلطیاں کرتے رہے
ورلڈکپ کیلیے اسکواڈ کا اعلان کرتے ہوئے چیف سلیکٹر انضمام الحق بار بار غلطیاں کرتے رہے،پہلے فہرست میں حارث سہیل کا نام چھوڑ گئے، محمد حسنین کو ایم حسن کہہ گئے۔صحافیوں نے تصحیح کرائی اور ساتھ یہ بھی بتایا کہ ابھی 14کرکٹرز کے نام لیے گئے ہیں،فہرست دوبارہ پڑھنا شروع کی تو اندازہ ہوا کہ حارث سہیل کا نام رہ گیا تھا، میڈیا کے نمائندوں نے کہا کہ کسی غلط فہمی سے بچنے کیلیے سارے نام دوبارہ پڑھ دیں،تیسری کوشش میں انضمام الحق پوری فہرست درست پڑھنے میں کامیاب ہوگئے۔

لاہور:(ایمرا نیوزآن لائن) پاکستان کرکٹ ٹیم کے ہیڈ کوچ مکی آرتھر نے ورلڈکپ سے قبل معاہدے میں توسیع کی خواہش کا اظہار کیا ہے جب کہ بیٹنگ کوچ گرانٹ فلاور ورلڈ کپ کے بعد قومی ٹیم کے ساتھ مزید کام کرنے کے خواہشمند نہیں ہیں۔ ذرائع کے مطابق قومی کرکٹ ٹیم کے کوچز کے معاہدے ورلڈ کپ تک ہیں جب کہ ہیڈ کوچ مکی آرتھر نے کرکٹ بورڈ کے اعلیٰ عہدیدار سے خواہش کا اظہار کیا ہے کہ ورلڈ کپ سے پہلے ان کے معاہدے میں توسیع کی جائے۔ذرائع کا کہنا ہے کہ پی سی بی نے مکی آرتھر کی خواہش پر خاموشی اختیار کر رکھی ہے، مکی آرتھر اس سے قبل بھی مزید کام کرنے کی خواہش کا اظہار کئی بار میڈیا میں بھی کر چکے ہیں۔ذرائع کے مطابق قومی ٹیم کے بیٹنگ کوچ گرانٹ فلاور مزید کام کرنے کے خواہش مند نہیں اور انہوں نے ورلڈ کپ کے بعد مزید کام نہ کرنے کا پیغام پی سی بی کو پہنچا دیا ہے۔یاد رہے کہ گرانٹ فلاور سے پہلی بار مئی 2014 میں دو سالہ معاہدہ کیا گیا تھا۔قومی ٹیم کے سابق کوچ وقار یونس کے استعفے کے بعد پی سی بی نے 6 مئی 2016 کو جنوبی افریقا سے تعلق رکھنے والے مکی آرتھر کو قومی ٹیم کا ہیڈ کوچ مقرر کیا تھا۔مکی آرتھر اس سے قبل 2011 سے 2013 تک آسٹریلیا اور 2005 سے 2010 تک جنوبی افریقا کی ٹیم کے کوچ کی حیثیت سے خدمات انجام دے چکے ہیں۔

کوئٹہ: (ایمرا نیوزآن لائن) پاکستان کرکٹ بورڈ کی گورننگ باڈی کے کوئٹہ میں ہونے والے اجلاس کا ممبران نے بائیکاٹ کر دیا۔ ایم ڈی وسیم خان کی تقرری اور ڈومیسٹک سٹرکچر میں تبدیلی کو بھی مسترد کر دیا۔پاکستان کرکٹ بورڈ میں بغاوت سامنے آگئی، پاکستان کرکٹ بورڈ کی گورننگ باڈی کے کوئٹہ میں ہونے والے اجلاس میں پانچ ممبران نئے ایم ڈی وسیم خان کی تقرری کے خلاف قرارداد پیش کر دی۔ ممبران نے ڈومیسٹک اسٹرکچر میں تبدیلی کو بھی مسترد کر دیا۔ اجلاس کا بائیکاٹ کرنے والوں میں شہ زر، عبداللہ، ایاز بٹ، کبیر احمد، نعمان بٹ اور شاہ دوست شامل ہیں۔ممبران کا موقف ہے کہ ڈیپارٹمنٹ کرکٹ اور ریجن کرکٹ میں تبدیلی منظور نہیں۔ چئیر مین پی سی بی احسان مانی دیکھتے ہی رہ گئے جبکہ سب اٹھ کر چلے گئے۔

لاہور(ایمرا نیوزآن لائن) ورلڈ کپ کے لیے قومی ٹیم میں فٹنس ٹیسٹ میں فیل ہونے والے کھلاڑیوں کی شمولیت کا بھی قوی امکان ہے۔پاکستان کرکٹ ٹیم کے ہیڈ کوچ مکی آرتھر نے کہا تھا کہ ورلڈ کپ کی ٹیم منتخب کرتے وقت فٹنس پر کوئی سمجھوتہ نہیں کیا جائے گا لیکن لاہور میں فٹنس ٹیسٹ میں تین ایسے کھلاڑی ناکام رہے جن کا پاکستان ٹیم میں شمولیت کے لئے امکان روشن ہے۔ورلڈ کپ کے لیے پاکستانی کرکٹ ٹیم کی سلیکشن میں کیا واقعی فٹنس ہی اصل پیمانہ ہو گی اور مقررہ معیار کی فٹنس حاصل کرنے والے کھلاڑی کو 15 رکنی ٹیم میں جگہ ملے گی یا ان فٹ کھلاڑی بھی لندن کی فلائٹ کا ٹکٹ حاصل کر سکیں گے۔تاہم اس بات کے امکانات دکھائی دے رہے ہیں کہ کچھ لو کچھ دو کی بنیاد پر سلیکشن میں سمجھوتہ ہوجائے گا، آل راونڈر عماد وسیم اور اوپنر عابد علی فٹنس ٹیسٹ میں ناکام رہے لیکن دونوں پاکستانی ٹیم میں شمولیت کے لیے مضبوط امیدوار دکھائی دے رہے ہیں۔عماد وسیم نے یویو ٹیسٹ میں شرکت نہیں کی، بدھ کو جب لاہور میں کھلاڑی سیڑھیاں چڑھ رہے تھے اس وقت عماد وسیم کو لنگڑاتے ہوئے دشواری کا سامنا تھا، ان کی فوٹیج دیکھ کر لگ رہا تھا کہ وہ وہ مکمل فٹ نہیں ہیں۔مصدقہ ذرائع کا بتانا ہے کہ پی سی بی انتظامیہ نے عماد وسیم کو فٹنس ٹیسٹ پاس کرنے کے لیے مزید وقت دینے کا فیصلہ کیا ہے۔حیدرآباد کے نوجوان فاسٹ بولر محمد حسنین بھی فٹنس کے معیار کو حاصل نہ کر سکے لیکن ان کو ورلڈ کپ کی 15 رکنی ٹیم میں جنید خان اور عثمان خان شنواری پر فوقیت مل رہی ہے۔آسٹریلیا کے خلاف سیریز میں دو سنچریاں بنانے والے محمد رضوان فٹنس ٹیسٹ میں سب سے آگے رہے لیکن انہیں 15 رکنی ٹیم میں جگہ بنانے میں مشکل پیش آرہی ہے۔چیف سلیکٹر انضمام الحق ساتھی سلیکٹرز کے ساتھ لاہور میں موجود ہیں، مکی آرتھر اور انضمام الحق سلیکشن کے معاملات پر ایک پیج پر ہیں تاہم کپتان سرفراز احمد اور مکی آرتھر کی سلیکٹرز کے ساتھ فیصلہ کن میٹنگ بدھ کو ہوگی جس کے بعد جمعرات کو سلیکٹرز ورلڈ کپ کے لئے پندرہ رکنی ٹیم کا اعلان کریں گے۔تیسرے اوپنر کے لیے شان مسعود اور عابد علی کے درمیان سخت مقابلہ ہے لیکن ایسا لگ رہا ہے کہ یہ ریس عابد علی جیت جائیں گے۔سلیکٹرز عابد علی کو حالیہ کارکردگی پر ورلڈ کپ کھلانے کے حق میں دکھائی دیتے ہیں۔ذرائع کا کہنا ہے کہ پاکستان ٹیم کے اعلان سے قبل ورلڈ کپ کے لیے 15 رکنی ٹیم پر تقریباً اتفاق رائے ہو گیا ہے تاہم جب کپتان سلیکٹرز کے ساتھ بیٹھیں گے تو انہیں بھی اپنی رائے ٹھوس دلائل کے ساتھ دینا ہوگی۔حدردجہ مصدقہ ذرائع کا کہنا ہے کہ ورلڈ کپ میں پاکستانی اوپنرز میں امام الحق اور فخر زمان کی شمولیت یقینی ہے جبکہ تیسرے اوپنر کے لیے عابد علی اور شان مسعود میں مقابلہ ہے۔عابد علی نے آسٹریلیا کے خلاف پہلے ون ڈے انٹر نیشنل میں سنچری بنائی تھی پھر پاکستان کپ کے فائنل میں 132 میچ وننگ اننگز کھیلی لیکن ان کی فٹنس سب سے بڑی رکاوٹ ہے جب کہ شان مسعود سپر فٹ ہیں، آسٹریلیا کے خلاف پانچ ون ڈے میچوں میں ان کی بیٹنگ فارم خراب رہی تھی تاہم جنوبی افریقا میں شان مسعود نے اپنی کارکردگی سے سب کو متاثر کیا تھا۔مڈل آرڈر میں بابر اعظم، شعیب ملک، محمد حفیظ، حارث سہیل اور کپتان سرفراز احمد شامل ہیں۔آل راونڈرز میں عماد وسیم اور شاداب خان ہیں جب کہ 5 فاسٹ بولروں میں محمد عامر، حسن علی، شاہین شاہ آفریدی، فہیم اشرف اور محمد حسنین شامل ہو سکتے ہیں۔انگلینڈ کے لیے جو دو اضافی کھلاڑی ٹیم کے ساتھ جائیں گے ان میں آصف علی، عثمان خان شنواری اور جنید خان میں سے دو کھلاڑی ٹیم کے ساتھ جائیں گے۔اس بات کے امکانات بھی روشن ہیں کہ اگر عابد علی اور شان مسعود کی سلیکشن پر ڈیڈ لاک ہوجاتا ہے تو ایک اوپنر کو انگلینڈ کی سیریز میں بھیجا جا سکتا ہے۔آصف علی کی بیٹی شدید علیل ہے اس لیے ان کی سلیکشن کرتے وقت بیٹی کی میڈیکل ایڈوائس کو سامنے رکھا جائے گا تاکہ وہ سکون کے ساتھ ٹورنامنٹ پر توجہ دے سکیں۔

سڈنی:(ایمرا نیوزآن لائن) پاکستان کی بھی ایڈیلیڈ میں نائٹ ٹیسٹ کھیلنے میں دلچسپی ختم ہونے لگی جب کہ کرکٹ آسٹریلیا نے پی سی بی کو منانے کی کوششیں تیز کردیں، کھلاڑیوں کو ایک ملین ڈالر کا خصوصی پیکج بھی دیا جا سکتا ہے۔آسٹریلیا ایڈیلیڈ میں ڈے اینڈ نائٹ ٹیسٹ کے تسلسل سے انعقاد کیلیے کوشاں تاہم مہمان سائیڈز مسلسل انکار کررہی ہے، گذشتہ برس بھارت نے رات کو پنک گیند سے طویل طرز کی کرکٹ کھیلنے سے انکار کردیا تھا۔ کرکٹ آسٹریلیا کو امید تھی کہ رواں برس پاکستانی ٹیم ایڈیلیڈ میں نائٹ ٹیسٹ کھیلے گی۔

آسٹریلوی میڈیا کی رپورٹ کے مطابق پی سی بی اس پر تیار بھی ہوگیا تھا تاہم آسٹریلیا کی جانب سے پاکستان کے ٹور سے انکار پر اس نے بھی سخت ردعمل کا فیصلہ کیا،اب کرکٹ آسٹریلیا پر واضح کیا گیا ہے کہ وہ نائٹ ٹیسٹ نہیں کھیل سکتا۔ پاکستان کرکٹ بورڈ کی جانب سے آسٹریلیا سے گزشتہ ماہ یو اے ای میں کھیلی جانے والی 5 ون ڈے کی سیریز کے 2 میچز اپنے ملک میں کھیلنے کی درخواست ہوئی تھی جسے سی اے نے اپنے سیکیورٹی ماہرین بھیجے بغیر ہی مسترد کردیا تھا۔

رپورٹ میں کہا گیاکہ جس طرح کرکٹ آسٹریلیا نے ایڈیلیڈ میں تاریخ کے پہلے نائٹ ٹیسٹ کے انعقاد کو یقینی بنانے کیلیے مہمان پلیئرز کو ایک ملین ڈالر کا خصوصی پیکج دیا تھا، ایسا اس بار بھی کیا جا سکتا ہے۔دوسری جانب کرکٹ آسٹریلیا پہلے ہی اس موسم گرما کی اپنی دوسری مہمان سائیڈ نیوزی لینڈ کو پرتھ میں نائٹ ٹیسٹ کھیلنے پر راضی کرچکا ہے۔ادھر کرکٹ آسٹریلیا پر بھارت کی جانب سے بھی دباؤ ہے کہ وہ جنوری میں ون ڈے سیریز کیلیے اپنی ٹیم ان کے ملک بھیجے، گذشتہ 40 برس کے دوران کبھی بھی کینگروز نے اپنے ہوم سیزن کے دوران کسی دوسرے ملک کا ٹور نہیں کیا، اسی لیے بھارتی مطالبے پر بھی حکام پریشانی میں مبتلا ہیں۔

لاہور(ایمرا نیوزآن لائن) ورلڈ کپ 2019ءکے سکواڈ میں شمولیت کے امیدوار عابد علی نے اپنی فٹنس کی ابتدائی طور پر آزمائش کر لی ہے ۔ پاکستان ون ڈے کپ میں خیبرپختونخواکی نمائندگی کرنے والے31سالہ اوپنر جمعہ کو فائنل سے قبل 2روز کا وقفہ ہونے کی وجہ سے لاہور آئے تھے، نیشنل کرکٹ اکیڈمی میں ٹریننگ کے دوران انفرادی طور پر انھوں نے اپنی فٹنس کو جانچا،ذرائع کے مطابق یویو ٹیسٹ میں عابد نے17.4 پوائنٹس حاصل کیے ہیں۔دوسری جانب بابر اعظم، شاداب خان، عماد وسیم، محمد عامر، محمد عباس اور محمد حسنین کے ساتھ شاہین شاہ آفریدی اور فہیم اشرف نے بھی نیشنل کرکٹ اکیڈمی میں ٹریننگ اور فٹنس ٹیسٹ کی تیاریوں کا آغاز کر دیا،سب کی پوری کوشش ہے کہ فٹنس ٹیسٹ کی تیاریوں میں کوئی کسر باقی نہ رکھی جائے، عابد علی پاکستان کپ کے فائنل میں شرکت کے لیے راولپنڈی روانہ ہوگئے تھے۔ یاد رہے کہ ورلڈکپ کے امیدوار قومی کرکٹرز کے فٹنس ٹیسٹ 15اور 16اپریل کو نیشنل کرکٹ اکیڈمی میں ہی ہوں گے، ورلڈکپ کیلئے قومی سکواڈ کا اعلان 18اپریل کو کیا جائے گا۔

اسلام آباد(ایمرا نیوزآن لائن) : قومی کرکٹ ٹیم کے کپتان سرفراز احمد نے ورلڈکپ ٹرافی کو شوکیس میں سجانے کا عزم کرلیا۔آئی سی سی ورلڈ کپ ٹرافی ایک مرتبہ پھر پاکستان پہنچ گئی۔ قومی ٹیم کے کپتان سرفراز احمد گذشتہ روز اسے دبئی سے اسلام آباد لے کر آئے، آئی سی سی کا معاون اسٹاف بھی ہمراہ تھا، سخت سیکیورٹی میں ٹرافی کو ایئرپورٹ سے ہوٹل پہنچایا گیا جو وہاں موجود میڈیا اور لوگوں کی بھرپور توجہ کا مرکز بنی، سرفراز احمد نے پریس کانفرنس بھی کی۔جمعے کو مقامی شاپنگ مال میں رونمائی ہوگی،شائقین ٹرافی کے ساتھ تصاویر بھی بنوا سکیں گے،اسے وزیر اعظم ہاؤس لے جانے کا امکان ہے، ٹرافی ہفتے کو لاہور اور اگلے روزکراچی میںجلوے بکھیرے گی، شہر قائد میں کنسرٹ کا انعقاد اور آتش بازی کا مظاہرہ بھی کیا جائے گا۔یاد رہے کہ ٹرافی اس سے قبل گذشتہ سال اکتوبر میں بھی پاکستان آچکی، اس وقت میزبانی اور سیکیورٹی کی ذمہ داریاں پی سی بی کے سپرد تھیں، ٹرافی کو لاہور میں گھمایا بھی گیا تھا، میگا ایونٹ سے قبل اب اس کی آمد اور تقریبات کا اہتمام ایک اسپانسر ادارے کی جانب سے کیا جا رہا ہے۔اسلام آباد میں میڈیا سے بات چیت کرتے ہوئے سرفراز احمد نے کہا کہ کرکٹ کو پاکستان بھر میں بہت پسند کیا جاتا ہے، گذشتہ 3 سال میں یہاں انٹرنیشنل کرکٹ کی واپسی کا عمل بڑی تیزی سے ہوا، عوام کو اپنے میدانوں پر کرکٹرز کو ایکشن میں دیکھنے کا موقع ملا، یہ سب چیف آف آرمی اسٹاف، پاک فوج اور پی سی بی کی کوششوں سے ممکن ہوا۔انھوں نے کہا کہ میں ٹرافی کے پاکستان آنے پر بہت پُرجوش ہوں، عام لوگوں کو اسے دیکھنے اور سیلفیز بنانے کا موقع مل رہا ہے، قوم میں ایک جذبہ پیدا ہو گا، عوام گرین شرٹس کی کامیابی کیلیے دعا کریں۔ ہم کوشش کریں گے کہ چیمپئن بن کر ٹرافی کو وطن واپس لائیں،انھوں نے کہا کہ مشن ورلڈ کپ مشکل اور تمام ہی ٹیمیں مضبوط ہیں،ہماری کوشش ہوگی کہ عمدہ کارکردگی کا مظاہرہ کرتے ہوئے عوام کی توقعات پر پورا اتریں۔سرفراز نے کہا کہ قومی ٹیم کی مڈل آرڈر بیٹنگ مضبوط اوراس میں بابر اعظم اور حارث سہیل جیسے بیٹسمین موجود ہیں، اس لیے کسی تبدیلی کی ضرورت نہیں، اضافی وکٹ کیپر کی ضرورت ہوئی تو محمد رضوان کو لے جایا سکتا ہے، انھوں نے کہا کہ محمد عامر کو فٹنس ٹیسٹ پاس کرنا ہوگا، انگلینڈ کیخلاف سیریز اور وارم اپ میچز میں خامیاں دور کرنے کی کوشش کریں گے۔یاد رہے کہ انگلینڈ میں شیڈول ورلڈکپ کا آغاز 30مئی کو ہوگا۔