Tag daily jang

اسلام آباد(وقت نیوز آن لائن)وزیراعظم عمران خان کے دورہ ملائیشیا کا مشترکہ اعلامیہ جاری کردیا گیا۔
جاری اعلامیہ میں کہا گیا ہے کہ وزیراعظم عمران خان نے 3 سے 4 فروری تک ملائیشیا کا دورہ کیا،دورہ دونوں ممالک کے درمیان سٹرٹیجک تعلقات کو مزید مضبوط بنانے کیلئے تھا،وزیراعظم عمران خان کا گرمجوشی سے استقبال کیاگیا۔اعلامیہ میں کہاگیاہے کہ ون آن ون اور وفود کی سطح پر دونوں ممالک کے درمیان بات چیت ہوئی ،دونوں ممالک نے ہائی لیول رابطے تمام شعبوں میں تعاون بڑھانے پر اتفاق کیا،دونوں ممالک میں تعلقات سٹرٹیجک پارٹنرشپ میں تبدیل ہو چکے ہیں ،اعلامیہ میں مزید کہاگیا ہے کہ مختلف شعبوں میں دوطرفہ تعاون نئی بلندیوں کو پہنچ چکا ہے ،دونوں وزرائے اعظم نے اعلیٰ سطح پر رابطوں کو جاری رکھنے پر اتفاق کیا۔اعلامیہ میں کہاگیا ہے کہ اسلام آبادمیں چوتھے مشترکہ کمیشن کااجلاس بلانے کافیصلہ کیا ہے ،کمیشن اقتصادی سائنس اورفنی شعبے میں تعاون کیلئے پہلے سے موجود ہے ۔

راولپنڈی (وقت نیوز آن لائن ) چینی شہری کو کرونا وائرس میں مبتلا ہونے کے شبے میں اسے اسلام آباد کے پمز ہسپتال میں الگ وارڈ میں منتقل کر دیا گیاہے ۔
تفصیلات کے مطابق پاکستان اور چین کے درمیان فلائٹ آپریشن پیر کے روزبحال کر دیا گیا تھا جس کے بعد طیار 122 مسافروں کو لے کر چین سے اسلام آباد پہنچا تھا تاہم سکریننگ کے عمل کے دوران ایک چینی شہری کو تیز بخار کا انکشاف ہوا جو کہ کرونا وائرس کی ایک بڑی علامت میں سے ہے ۔

وزیراعظم عمران خان کے معاون خصوصی برائے صحت ڈاکٹر ظفر مرزا نے حکام کو ایئر پورٹ پر متاثرہ علاقے سے آنے والے مسافروں کی سخت نگرانی اور ان کا معائنہ کرنے کے احکامات جاری کر رکھے ہیں ۔احکامات کے مطابق چین سے آنے والے ہر مسافر کو میڈیکل کاﺅنٹرز سے گزرنا ہو گا جہاں ڈاکٹرز اور پیرامیڈیکس کا سٹاف اس کامعائنہ کریں گے ۔اسلام آباد پہنچنے والے چینی شہر ی کو حکام نے کرونا وائرس کی علامات ظاہر ہو نے پر طریقہ کار کے مطابق فوری دیگر مسافروں سے علیحدہ کیا اور ایمبولینس کے ذریعے پمز ہسپتال منتقل کیا ۔کرونا وائرس کے باعث اب تک 425 افراد جان کی بازی ہار چکے ہیں جبکہ 20 ہزار سے زائد افراد اس کے متاثر ہوئے ہیں ۔

راولپنڈی(وقت نیوز آن لائن)آرمی چیف جنرل قمر جاوید باجوہ نے کہا ہے کہ کشمیریوں کیلئے ہماری غیر متزلزل حمایت جاری رہے گی۔ امن کی خواہش اور بھارت کے ہاتھوں کشمیریوں کے نقصان کے پیش نظر صبر کررہے ہیں۔
آرمی چیف جنرل قمر جاوید باجوہ نے یوم یکجہتی کشمیر پر دیئے گئے اپنے بیان میں کہا ہے کہ بھارتی جبر کا ثابت قدمی سے مقابلہ کرنے والے بہن بھائیوں کو سلام پیش کرتے ہیں،اس جدودجہد میں وہ اکیلے نہیں ہم ان کے ساتھ کھڑے ہیں۔رپورٹس کے مطابق آرمی چیف نے کہا ہے کہ بھارت مقبوضہ کشمیر ریاستی جبر جارحیت مسلط کئے ہوئے ہے۔کشمیریوں کے حقوق غصب کرکے طاقت کا اندھا دھند استعمال کیا جارہاہے۔وادی کو جیل میں تبدیل کر لاکھوں کشمیریوں کو قید کردیا گیا ہے۔

آرمی چیف نے کہاکشمیری اقوام متحدہ سے اپنا حق خود ارادیت مانگ رہے ہیں۔مرد خواتین بوڑھے بچے حق خودارادیت کیلئے جدوجہد کررہے ہیں۔بھارتی جبر کا ثابت قدمی سے مقابلہ کرنے والے بہن بھائیوں کو سلام پیش کرتے ہیں۔
انہوں نے کہاہم مقبوضہ کشمیر میں جاری مظالم پر دنیا کا ضمیر جھنجھوڑنے میں اہم کرداراداکرتے رہیں گے۔ کشمیریوں کیلئے ہماری غیر متزلزل حمایت جاری رہے گی۔انہوں نے کہااس جدوجہد میں کشمیری اکیلے نہیں ہیں ہم ان کے ساتھ کھڑے ہیں۔آرمی چیف نے کہابھارتی افواج ایل او سی پر اشتعال انگیزی کرتی ہے۔جان بوجھ کر آزاد کشمیر کی شہری آبادی کو نشانہ بنایا جا رہا ہے۔ جوانوں شہریوںکی لازوال قربانیاں جدوجہد آزادی کو زندہ رکھے ہوئے ہیں۔انہوں نے کہاپاک فوج اپنے فرائض کی انجام دہی کیلئے مستعد ہے۔ پاک فوج ہر قسم کی جارحیت کا مقابلہ کرنے کی استعداد رکھتی ہے۔آرمی چیف نے واضح کیا کہ امن کی خواہش کے پیش نظر صبر کررہے ہیں،بھارت کے ہاتھوں کشمیریوں کے نقصان کے پیش نظر صبر کررہے ہیں۔

مظفرآباد(وقت نیوز آن لائن)صدرآزادکشمیر سردار مسعود خان نے یوم یکجہتی کشمیر پر اپنے پیغام میں کہاہے کہ دنیا کی کوئی طاقت کشمیریوں کو آزادی سے نہیں روک سکتی ۔
صدرآزادکشمیر سردارمسعود خان نے اپنے پیغام میں ہے کہ کشمیرمیں نوجوانوں کاقتل عام کیاگیا بچوں کو اغوا کیا گیا،9 لاکھ بھارتی قابض فوج کشمیریوں کو دہشتگردی کانشانہ بنا رہی ہے،کشمیریوں کا ساتھ دینے پر پاکستانی عوام کے مشکور ہیں ۔ وزیراعظم آزادکشمیر راجہ فاروق حیدر کاکہنا ہے کہ پانچ اگست کے بعداقدامات کشمیریوں نے مسترد کردیئے ،کشمیری عوام نے بھارتی مظالم کے سامنے سر نہیں جھکایا،راجہ فاروق حیدر کاکہنا ہے کہ کشمیر کے عوام نے بھارتی مظالم پر سرفخر سے بلند رکھا۔

لاہور(وقت نیوز آن لائن ) حکومتی جماعت تحریک انصاف اور ان کی اتحادی جماعت مسلم لیگ (ق) کے مابین برف نہ پگھل سکی اور ق لیگی قیادت نے وفاقی وزیرشفقت محمود سے اتحاد کے معاملے پر بات کرنے سے معذرت کرلی۔ ایکسپریس نیوزکے مطابق وزیر اعظم عمران خان کی قائم کردہ رابطہ کمیٹی کے رکن وفاقی وزیر شفقت محمود نے اسپیکر پنجاب اسمبلی چوہدری پرویز الہی سے ملاقات کی، جس میں اتحادی حکومت کے تحفظات اور باہمی دلچسپی پر بات چیت کی گئی۔

چینل ذرائع کا کہنا ہے کہ اتحادی حکومت کے الجھے ملاقات کی اندرونی کہانی سامنے آگئی، وفاقی وزیر شفقت محمود اور اسپیکر پنجاب اسمبلی چوہدری پرویز الہی کے درمیان ملاقات میں برف نہ پگھل سکی، شفقت محمود، مسلم لیگ (ق) کی قیادت کو نئی کمیٹی سے مذاکرات کے لئے قائل نہ کرسکے، مسلم لیگ (ق) کی قیادت نے نئی حکومتی کمیٹی کے رکن شفقت محمود سے اتحاد کے معاملات پر بات چیت سے گریز کیا اور کہا کہ وفاقی وزیر کی ملاقات ذاتی حیثیت میں ہوئی۔ ذرائع کا کہنا ہے کہ مسلم لیگ (ق) اپنے مطالبے پر ڈٹ گئی ہے اور ان کی قیادت کا کہنا ہے کہ پہلے جہانگیر ترین اور پرویز خٹک کی کمیٹی میں طے شدہ معاملات پر عملدرآمد کیا جائے پھر نئی کمیٹی سے بات ہو گی، نئے سرے سے زیرو سے دوبارہ اتحاد کے معاملات پر بات نہیں کر سکتے، جہانگیر ترین کی کمیٹی میں جو طے ہوا اس پر عمل کیا جائے، شفقت محمود سے ملاقات حکومتی کمیٹی کے رکن کی حیثیت سے نہیں ذاتی حیثیت میں ہوئی۔

دوسری جانب ملاقات کے بعد شفقت محمود نے اکیلے ہی میڈیا سے بات کی اور ان کے ساتھ مسلم لیگ (ق) کا کوئی رہنما شریک نہ ہوا۔ وزیراعظم کی جانب سے قائم کمیٹی کے آج پہلے رابطے کے حوالے سے وفاقی وزیر شفقت محمود کا کہنا تھا کہ چودھری پرویز الہٰی سے ون ٹو ون ملاقات ہوئی ہم ان سے بہت کچھ سیکھتے ہیں اور ملاقات اعزاز کی بات ہے۔
وفاقی وزیر نے کہا کہ (ق) لیگی قیادت سے انتہائی خوشگوار ماحول میں ملاقات ہوئی، ہمارا تحریک انصاف سے ہمارا کچھ لو اور کچھ دو کا رشتہ نہیں، ہماری سوچ ایک ہے، ہمارا ساتھ اب بھی ہے اور آئندہ بھی رہے گا، مسلم لیگ (ق) کے جو خدشات تھے وہ بڑی حد تک حل ہو چکے ہیں۔

شفقت محمود کا کہنا تھا کہ مسلم لیگ (ق) کو خدشہ تھا کہ نئی کمیٹی بنی ہے تو دوبارہ شروع سے بات ہوگی، ہماری کمیٹی کی مسلم لیگ (ق) کی کمیٹی کے ساتھ ملاقات جلد ہوگی، نئی کمیٹی بننے کا مقصد پرانے معاہدوں کو زیربحث لانا نہیں تھا، ق لیگ سے کیے گئے پرانے معاہدوں میں کوئی تبدیلی نہیں ہوگی بلکہ جو معاہدے کیے ہیں انہیں ہی ساتھ لے کر چلیں گے، جو معاملات ہیں ان پر تفصیل سے بات چیت ہو گی، کمیٹیاں جب بیٹھیں گی تو معاہدوں پر عملدرآمد پر بات ہو گی۔

اسلام آباد(وقت نیوزآن لائن) پاکستان میں تعینات چین کے سفیر یاﺅژنگ کا کہنا ہے کہ ووہان کے سوا چین کے دیگر شہروں سے پاکستانیوں کوواپس بھیجا جائے گا۔اسلام آباد میں معاون خصوصی برائے صحت ظفر مرزا نے چینی سفیر یاﺅژنگ کے ہمراہ پریس کانفرنس کے دوران کہا کہ ملک میں کورونا وائرس کا ایک بھی کیس نہیں، وائرس کے مشتبہ 7 لوگوں کے نمونے منفی آنا خوش آئند ہے، کورونا وائرس سے متعلق حکومت روزانہ کی بنیاد پر انتظامات کا جائزہ لیتی ہے، کوئی بھی پاکستانی یا چینی اس وقت تک چین نہیں چھوڑ سکتا جب تک ان کا معائنہ نہ کیا جائے،چین سے آنے والوں میں کوئی مشتبہ مسافر نہیں ملا، چین سے آنے والا کوئی مسافر ایسا نہیں جسے آبزرویشن کی ضرورت ہو۔
پریس کانفرنس کے دوران چینی سفیر یاﺅ ژنگ کا کہنا تھا کہ کورونا وائرس سے 371 افراد ہلاک ہو چکے ہیں، اس سے نمٹنے کے لیے ہر ممکن کوشش کررہے ہیں، چین میں تمام تقریبات منسوخ کر دی گئی ہیں، ہم عالمی ادارہ صحت اور دیگر حکام سے مسلسل رابطے میں ہیں۔ عالمی ادارہ صحت نے ہمارے اقدامات کو سراہا ہے، ہم پرامید ہیں اس وبا سے نمٹ لیں گے۔ ہم کرونا وائرس پر قابو پانے کی صلاحیت رکھتے ہیں، وائرس کی ویکسین بنانے کیلئے بھی تحقیق جاری ہے، کرونا وائرس میں مبتلا 500 سے زائد مریض صحت یاب ہوچکے ہیں، دنیا کو اپنے اقدامات سے آگاہ کررہے ہیں۔ یاﺅژنگ نے کہا کہ چین میں پاکستانیوں کی کثیر تعداد ہے اور چین میں پاکستانی شہریوں کو اپنا ہم وطن سمجھتے ہیں، ہم تمام پاکستانیوں کے ساتھ رابطے میں ہیں پاکستان کی حمایت کو سراہتے ہیں، ووہان کے علاوہ چین کے دیگر شہروں سے پاکستانیوں کوواپس بھیجا جائے گا۔

اسلام آباد(وقت نیوز آن لائن) وفاقی حکومت کی جانب سے گیس کی قیمتوں میں پانچ سے 15 فیصد تک اضافہ کیے جانے کا امکان ہے۔تفصیلات کے مطابق وفاقی حکومت کی جانب سے آئی ایم ایف کی شرط پوری کرنے کے لیے گیس کی
قیمتوں میں 5 فیصد سے 15 فیصد تک اضافہ کیے جانے کا امکان ہے، اس حوالے سے مشیر خزانہ عبدالحفیظ شیخ کی زیر صدارت منگل کو کابینہ کی اقتصادی رابطہ کمیٹی (ای سی سی) کا اجلاس معنقد ہوگا۔ ذرائع کے مطابق اوگرا نے گیس کی قیمتوں میں 245 فیصد تک اضافے کی تجویز دی تھی جسے مسترد کرتے ہوئے پٹرولیم ڈویژن نے 15 فیصد تک اضافہ کی سفارش کی ہے، اب حتمی فیصلہ ای سی سی کرے گی اس کے بعد ای سی سی کے فیصلے کی وفاقی کابینہ سے توثیق کروائی جائے گی۔

ذرائع کے مطابق حکومت نے آئی ایم ایف کے ساتھ گیس کی قیمتوں میں اضافہ پر اتفاق کررکھا ہے اور یہ اضافہ یکم جنوری سے ہونا تھا لیکن سیاسی و عوامی ردعمل کے باعث دو مرتبہ ای سی سی کے اجلاس میں سمری پیش ہونے کے باوجود اس حوالے سے کوئی فیصلہ نہ ہوسکا تھا، تاہم اب آئی ایم ایف کا جائزہ مشن پاکستان پہنچ چکا ہے اور مذاکرات بھی شروع ہیں اس لیے توقع کی جارہی ہے کہ کل ہونے والے ای سی سی کے اجلاس میں سمری کی منظوری دے دی جائے گی۔

دوسری جانب وزیراعظم عمران خان نے وزارت پٹرولیم کو ہدایت دی ہے کہ گیس کی قیمتوں میں اضافے کا گھریلو صارفین پر کم سے کم بوجھ ڈالا جائے، وزیراعظم کی ہدایات کو مدنظر رکھتے ہوئے گھریلو صارفین کے لیے گیس کی قیمتوں میں صرف پانچ فیصد اضافے کی تجویز دی گئی ہے تاہم اس کے ساتھ ساتھ گھریلو صارفین کے لیے میٹر رینٹ 20 روپے سے بڑھا کر 80 روپے ماہانہ، 40 سے 50 یونٹ ماہانہ تک گیس استعمال کرنے والے گھریلو صارفین کے ساتھ ساتھ تندور سیکٹر کے لیے کم ازکم ماہانہ بل 220 روپے کرنے کی تجویز دی گئی ہے۔ ذرائع کا کہنا ہے کہ پاور سیکٹر کے لیے گیس کی قیمتوں میں 12 فیصد او انڈسٹریل کیپٹو پاور پلانٹس اور سی این جی اسٹیشنز کے لیے گیس کی قیمتوں میں 15 فیصد اضافہ تجویز کیا گیا ہے، البتہ فرٹیلائزر سیکٹر کے لیے گیس کی موجودہ قیمتیں ہی برقرار رکھنے کی تجویز ہے جب کہ گیس کی مجوزہ قیمتوں کا اطلاق یکم فروری 2020ءسے کرنے کی تجویز دی گئی ہے۔

(ایمرا نیوزآن لائن) فرض کیجئے آج چین میں چھائی کرونا کی قیامت خیزی کے دوران وزیراعظم کے معاون خصوصی برائے صحت ظفر مرزا کا لخت جگر، بھائی، بھتیجا، کسی دوست ،عزیز کا خونی رشتہ بیجنگ، شنگھائی، سینکیانگ،ارمچی، شیانزن، تیانجن گینگزو یا ہینگزو میں پھنسا ہوتا تو کیا ہوتا ؟ کیا موصوف پھر بھی وہ وسیع تر قومی مفاد اور خطے کی بھلائی کیلئے انہیں چین سے واپس نہ لانے کا موقف اختیار کرتے؟ چلئے چھوڑیئے ، اگر یہ صورتحال وزیر اعظم کے کسی بھانجے، جہانگیر ترین کے کسی دورکے رشتہ دار، شاہ محمود قریشی پر جاں نچھاور کرنے والےان کے کسی ہردلعزیز مرید پیروکار، شہزاد مرزا کےصاحبزادے، فواد چودھری کے عزیز، مراد سعید کے حلقہ کے سرگرم کارکن کے ساتھ پیش آتی تو کیا وہ اپنے بیانیہ پر قائم او رموجود رہ پاتے؟
یقین جانئے صورتحال بدلی ہوتی تو ظفز مرزا کو وسیع تر مفاد یاد ہوتا نہ خطے کی بھلائی، ایسی صورتحال میں وہ کبھی نہ کہہ پاتے کہ ملک اور خطے کے مفاد میں چین میں پھنسے پاکستانیوں کو وطن نہ لانے کا فیصلہ کیا ہے،اگر ایسا ہوتا تو پھر وقت کے جغادری کو نیوزی لینڈ ، امریکہ، برطانیہ کی مثالیں یاد آجاتیں کہ جنھوں نے فوری طور پر اپنے شہریوں کو چین کے قیامت خیز حالات سے نکالنے کا فیصلہ کیا،اگر ایسا ہوتا تو عام پاکستانیوں کے لئے سوئی ڈیزاسٹر منیجمنٹ اتھارٹی بھی جاگ اٹھتی، ملک میں ایمرجنسی نافذ ہو جاتی، دورکسی صحرا میں یا پہاڑوں پر آئی سولیشن سینٹر ڈکلیئر کیا جاتا اور چین میں پھنسے بے چارے پاکستانیوں کوانسانی ہمدردری اور قومی فریضہ کی ادائیگی کے تحت وہاں منتقل کردیا جاتا، لیکن بدقسمتی سے ایسا نہیں ہے۔۔۔
کرونا کے عذاب میں گرفتار چین میں پھنسے پاکستانیوں میں سے کوئی ایک بھی ظفر مرزا کا قریبی ہے ناوزیر اعظم کا بھانجا، نا جہانگیر ترین کا رشتہ دار اورنا ہی شاہ محمود قریشی کا مرید ہے ۔ پھنسے ہوئے پاکستانیوں میں کوئی فواد چودھری کا عزیز یا مراد سعید کے حلقے کا سرگرم کارکن بھی نہیں،یہ وہ عام پاکستانی ہیں جو اپنی آنکھوں میں چھبتے بہتر زندگی کے خوابوں کی تعبیر کیلئے سستی مگر معیاری اعلیٰ تعلیم کی بھٹی میں خود کو جھونکنے کیلئے چین میں عرصے سے مقیم ہیں،ان میں وہ بھی شامل ہیں جو ملک کے بازاروں کو سستی چینی ٹیکنالوجی سے سجانے اور بال بچوں کیلئے روٹی روزی کا بندوبست کرنےسرحد پار گئے ہیں۔ معاون خصوصی کو شاید بہت کم لوگ ہی جانتے ہوں مگرقوم فی الحال ان کی پہچان نہیں بھولی جنھوں نے اقتدارسے پہلے تبدیلی کے نام پر لمبے لمبے بھاشن دیئے، سہانے خواب دکھا ئے اورایک نئے پاکستان کا مژدہ جانفزا سنایا، یہی بازی گر آج کل اسلام آباد کے ایوانوں سے قوم کو ریاست مدینہ کی گونج سنا رہے ہیں ،قوم کے ان کرم فرماؤں سے یہ پوچھنا تو بنتا ہے کہ بدترین حالات میں پھنسے پاکستانی کیا خود ساختہ ریاست مدینہ کی ذمہ داری نہیں؟
اپوزیشن کی مخالفت کے باوجود اور حکومت کے اس اقدام کو اقدام قتل کے برابر قرار دینے پر بھی وزیر اعظم کے معاون خصوصی ظفر مرزا اپنے موقف پر ڈٹے نظر آئے ،گزشتہ روز انہوں نے سینٹ کمیٹی کے روبرو کہا عالمی ادارہ صحت نے خبردار کیا ہے کہ چین میں موجود پاکستانی شہریوں کو وطن واپس لائے تو کورونا وائرس کےپھیلاؤ پر قابو پانا ممکن نہیں رہے گا۔وسیع تر قومی مفاد میں قوم کے بچوں کو موت کے جنگل میں بے آسرا چھوڑنے والے ان بھاشن بازوں کو یہ بتانا ضروری ہے کہ ڈبلیوایچ اونےسنگین وائرس کےباوجود چین سےسرحدوں کی بندش کوغیرضروری قراردیاہے۔عالمی ادارہ صحت کاموقف ہےکہ اگرچین کے ساتھ سرکاری سرحدیں بند کردی گئیں تو وائرس سےمتاثرہ افراد کی ٹریکنگ مشکل ہو جائیگی۔دوسری جانب امریکہ،برطانیہ اوردیگر یورپی ممالک اپنےشہریوں کوتمام خطرات کے باوجود باہر نکال رہے ہیں۔اپنےشہریوں کو سنگین صورتحال سےباہر نکالنےوالوں میں نیوزی لینڈ،انڈونیشیا،فلپائن،جاپان،آسٹریلیابھی شامل ہیں۔عرب ٹی وی الجزیرہ نےاپنی ایک رپورٹ میں نشاندہی کی ہےکہ پاکستان کی حکومت نے تعلیم اورکاروبارکیلئےچین میں پھنسے30ہزارپاکستانیوں کو مہلک وائرس سے بچانے کیلئے تاحال فیصلہ نہیں کیا۔
عالمی سیاست کے خدوخال میں دوسرے ملکوں کی پالیسیوں کے جائزے کے بعد ہمیں یہ بات اچھی طرح سمجھ لینی چاہئے کہ اگر حکومت نے چین میں پھنسے پاکستانیوں کو وطن واپس لانے کا فیصلہ نہ کیا اور انہیں حالات کے رحم و کرم پر چھوڑ دیا تویقین جانئے دنیا انسانی حقوق اور فلاحی ریاست کے معاملے میں ہم پر کبھی بھی اعتبار نہیں کریگی۔کرونا کا خطرہ بڑا ہو یا چھوٹا فی الوقت اقوام عالم کا چلن انخلا ہے۔اس لئے ہمالیہ سے بلند پاک چین دوستی اوراعتبار کے مضبوط رشتے کے باوجود ہمیں پھنسے پاکستانیوں کوواپس لانا ہے،حکمران یاد رکھیں یہ اقدام جہاں دنیا کے ساتھ قدم سے قدم ملا کر چلنے کے برابر ہوگا ،وہیں اپنے پیاروں کی آس میں نم دیدہ مائیں ، بہنیں اور بیٹیوں کے چہروں پر مسکان لانے کا انتظام بھی ۔

واشنگٹن(وقت نیوز آن لائن) : امریکا جانے والی خواتین اور حضرات بسا اوقات ٹرانسپورٹ سیکیورٹی ایسوسی ایشن (ٹی ایس اے) کے سخت رویے کی شکایت کرتے ہیں۔ اس کی وجہ یہ ہے کہ امریکا آنے والے افراد عجیب وغریب طریقے سے ممنوعہ اشیا لانے کی کوشش کرتے ہیں اور دھر لیے جاتے ہیں۔ ثبوت کے طور پر ٹی ایس اے نے اپنے آفیشل انسٹا گرام اکاؤنٹ پر بعض تصاویر جاری کی ہیں جنہیں دیکھ کر حیرانی ہوتی ہے۔ ان تصاویر میں دیکھا جاسکتا ہے کہ مسافر کتنی چالاکی سے انتہائی خوفناک اشیا اسمگل کرنے کی کوشش کرتے ہیں۔

ملزم نے بالکل نیا لیپ ٹاپ خریدا اور اس کے کی بورڈ کے نیچے سیریئل یا دلیے کی شکل کا ایک مواد چھپایا۔ ہمیں تصویر میں یہ ایک بے ضرر شے لگتی ہے لیکن اصل میں یہ ڈائنامائٹ کے ٹکڑے ہیں!
اس تصویر کو دیکھئے کے پھولوں کے گلدستے میں کس طرح ایک خنجر چھپایا گیا ہے۔
ٹی ایس اے کا اصرار رہتا ہے کہ مسافروں کے پاس اگر آتشیں ہتھیار یا بارود ہے تو پہلے ہی بتادیں۔ اب اس تصویر میں دیکھیں تو مجرم نے کس طرح ٹائروں کے اندر پسٹل ، گولیاں اور میگزین چھپائے ہیں۔
لپ اسٹک جیسی بے ضرر شے کو تبدیل کرکے ایک تیزدھارچھری میں تبدیل کیا گیا ہے اور یوں ٹی ایس اے کے لوگوں نے اسے ضبط کرلیا۔
درج ذیل تصویر میں ننجا کے ہولناک ہتھیار اور خنجر دکھائی دے رہے ہیں اور یہ مسافر کے ہینڈ کیری سے ملے ہیں۔ جب نیچے موجود فون ٹی ایس اے افسر نے دیکھا تو اسے مشکوک محسوس ہوا۔ غور سے دیکھیں اس کے سرے پر دو ابھار نظر آرہے ہیں اور جو ظاہر کرتے ہیں کہ یہ الیکٹرک گن یا ٹیسر ہے نہ کہ فون۔ اس مشکوک شے پر مجرم گرفتار ہوگیا ہے۔

لاہور(وقت نیوز آن لائن)مریم نوازکی بیرون ملک جانے کی اجازت کیلئے درخواست پر سماعت ہائیکورٹ کے دو رکنی بنچ کی عدم دستیابی کی وجہ سے آج نہیں ہوگی۔
تفصیلات کے مطابق مسلم لیگ ن کی نائب صدر مریم نوازنے ای سی ایل سے نام کے اخراج کیلئے ہائیکورٹ سے رجوع کر رکھا ہے، مریم نواز کی بیرون ملک جانے کی اجازت کیلئے درخواست پر سماعت آج ہونا تھی تاہم دو رکنی بنچ کی عدم دستیابی کی وجہ سے آج نہیں ہوگی،مریم نواز کی درخواست پر سماعت کیلئے نئی تاریخ کا اعلان بعد میں کیا جائے گا۔