Tag dailykhabrian

اسلام آباد (ایمرا نیوز آن لائن)وفاقی وزیر سائنس و ٹیکنالوجی فوادچودھری نے کہاہے کہ فوج کی مخالفت سے کوئی سیاسی لیڈر نہیں بن جاتا ،سیاسی جماعتوں نے درست فیصلہ کیا ،اداروں کے درمیان توازن کی ضرورت ہے ۔

وفاقی وزیر سائنس وٹیکنالوجی فوادچودھری نے سماجی رابطے کی ویب سائٹ ٹوئٹر پر اپنے ٹوئٹ میں کہاہے کہ فوج کی مخالفت سے کوئی سیاسی لیڈر نہیں بن جاتا ،فوج کے بغیر آپ انارکی میں چلے جائیں گے،مشرق وسطیٰ کو دیکھ لیں ۔

فوادچودھری نے کہاکہ آرمی ایکٹ پر سیاسی جماعتوں نے درست فیصلہ کیا ،اداروں کے درمیان توازن کی ضرورت ہے ،ان کاکہناتھا کہ فوج اور عدلیہ دونوں کو اپنی باﺅنڈریزخوددیکھنی چاہئیں،ان دونوں اداروں کامتنازع ہوناتباہ کن ہے ۔

لاس ویگاس(نیٹ نیوز) سام سنگ نے سالانہ ’ کنزیومر الیکٹرانکس شو‘ میں مصنوعی انسان پیش کردیئے ہیں جو ہوبہو حقیقی انسانوں کی طرح بات کرتے ہیں، تاثرات کا اظہار کرتے ہیں اور پوچھے گئے سوال کا سیکنڈوں میں جواب دیتے ہیں۔

ان ڈجیٹل کرداروں کو سام سنگ کی ذیلی کمپنی سٹار لیب نے بنایا جو بہت جلد چیٹ بوٹ اور ورچول اسسٹنٹ کی جگہ استعمال ہوسکیں گے تاہم اب بھی سام سنگ کا اصرار ہے کہ انہیں ’مصنوعی انسان‘ یا آرٹیفیشل ہیومن قرار دیا جائے ۔ویڈیو چیٹنگ بوٹس کو سام سنگ نے نیون کا نام دیا ہے اور کرداروں کے ان کی جنس کے لحاظ سے نتاشا اور فرینک جیسے نام بھی رکھے گئے ہیں۔

اگر آپ چاہیں تو انہیں اپنی تنہائی کا ساتھی اور دوست بھی بناسکتے ہیں۔تمام ڈجیٹل انسان مصنوعی ذہانت یا ’آرٹی فیشل انٹیلی جنس‘ سے کام کرتے ہیں۔ اگر آپ اداس ہوں تو یہ ہمدردی کا اظہار کرتے ہیں اور کسی بات پر حیران بھی ہوسکتے ہیں۔نیون بنانے میں سب سے اہم کردار ادا کرنے والے پرانوو مستری نے کہا ہے کہ تمام مصنوعی کردار مسلسل سیکھتے ہیں، وہ خود کو بھی یاد رکھتے ہیں۔

کراچی(ایمرا نیوز آن لائن) سندھ حکومت نے وفاق کو صوبے میں گیس بحران ختم نہ ہونے پر بلو چستان کے ساتھ ملکر احتجاج کی دھمکی دے دی۔سندھ کے وزیر زراعت اسماعیل راہو نے اپنے بیان میں کہا ہے کہ سندھ میں گیس کا بحران ختم نہ ہواتوبلوچستان کے ساتھ ملکر احتجاج کریں گے۔ وفاق سندھ میں گیس کے بحران کا مسئلہ حل کرنے کے بجائے اور کاموں میں لگا ہواہے۔

انہوں نے کہا کہ گیس فراہمی بند ہونے سے صنعت کار،ٹرانسپورٹرز اور گھریلو صارفین کوشدید مشکلات کا سامنا ہے، گیس پیداکرنے والے صوبے کو گیس نہیں دی جارہی دیگر صوبوں میں فراہمی جاری ہے، آئین میں کہیں نہیں لکھا کہ پہلا حق دوسروں کا ہے، سندھ اپنا آئینی حق مانگ رہا ہے، عمر ایوب کو آئین کے اے بی سی کا نہیں پتا، عمر ایوب کواچھی تربیت کی ضرورت ہے۔

وفاق نے خود تسلیم کیا ہے کہ سندھ 72 فیصد گیس پیدا کررہا ہے،سندھ کے لوگ لکڑیاں استعمال کرنے پر مجبور ہیں،سندھ آئین کے تحت اپنے حصے کا گیس مانگ رہا ہے، گیس بحران پر ابھی تک وزیرا عظم نے نوٹس تک نہیں لیا۔اسماعیل راہو نے کہا کہ خان صاحب نہ تجرباکار وفاقی وزرا کو بنی گالا میں ٹریننگ دلوائیں تاکہ ان کو آئین کاپتا چل سکے، سندھ کو 1600 ملین کیو بک گیس کی ضرورت ہے۔

بغداد(ایمرا نیوز آن لائن) عراقی دارالحکومت میں امریکی سفارتخانے پر راکٹوں سے حملہ کیا گیا ہے۔غیر ملکی خبر رساں ادارے کے مطابق عراق کے دارالحکومت بغداد میں امریکی سفارتخانے پر راکٹوں سے حملہ کیا گیا، امریکی سفارتخانے کے گرین زون میں 3 راکٹ داغے گئے جب کہ گرین زون میں 2 راکٹ امریکی سفارتخانے کے قریب گرے تاہم امریکی سفارتخانے کو راکٹ حملے سے کوئی نقصان نہیں پہنچا۔ وائٹ ہاؤس یا پینٹاگون کی جانب سے تاحال اس حملے کے حوالے سے کوئی بیان سامنے نہیں آیا۔

خبر ایجنسی کے مطابق عراقی فوج کی جانب سے بتایا گیا ہے کہ کٹیوشا کے 2 راکٹ گرین زون کے اندر گرے اور یہ زون امریکی سفارت خانہ، مغربی ممالک کے دیگر سفارت خانوں اور غیر ملکی تجارتی مراکز پر مشتمل ہے تاہم اس حملے میں کسی جانی نقصان کی اطلاع نہیں ملی۔

واضح رہے کہ گزشتہ روز ایران کی جانب سے عراق میں 2 فوجی اڈوں پر12 سے زائد زمین سے زمین پرمارکرنے والے ایرانی میزائل داغے گئے اور ایران کی جانب سے اس حملے میں 80 افراد کے ہلاک ہونے کا دعوی کیا گیا۔

بغداد(ایمرا نیوز آن لائن)عراقی وزیراعظم عادل عبدالمہدی کا کہنا ہےکہ ایران نے امریکی فوجی اڈوں پر حملے سے پہلے عراق کو آگاہ کردیا تھا۔عرب خبر رساں ادارے کے مطابق اپنے ایک بیان میں عراقی وزیراعظم عادل عبدالمہدی نے کہا کہ انہیں آدھی رات کو ایران کی طرف سے زبانی آگاہ کیا گیا کہ قاسم سلیمانی کے قتل پر جوابی کارروائی کا آغاز کردیا ہے اور حملہ جلد کیا جائے گا۔انہوں نے کہا کہ ایران کی طرف سے کسی حتمی مقام کی نشاندہی نہیں کی گئی تھی بلکہ صرف امریکی فوجیوں پر حملے سے آگاہ کیا گیا تھا۔

عبدالمہدی نے مزید کہا کہ یہ انتہائی خطرناک بحران عراق، خطے اور دنیا کے لیے تباہ کن جنگ کے خطرات ہیں۔عرب خبر رساں ادارے کے مطابق عراقی وزیراعظم نے حملے کی اطلاع ملنے پر عراقی فورسز کو خبردار کیا تھا۔واضح رہے کہ ایران نے جنرل قاسم سلیمانی کے قتل پر انتقامی کارروائی کرتے ہوئے عراق میں امریکی فوجی اڈوں پر حملہ کیا اور ایران کا دعویٰ ہے کہ اس حملے میں 80 افراد ہلاک ہوئے جب کہ امریکی فوجی تنصیبات کو بھی نقصان پہنچا۔امریکی صدر ٹرمپ نے ایران کے حملے پر کہا ہےکہ سب کچھ ٹھیک ہے۔

لاہور(ایمرا نیوز آن لائن)پاکستان لائرز بی کرکٹ ٹیم نے ساتویں لائرز ورلڈ کپ کا پلیٹ چیمپئن شپ ٹائٹل جیت لیا۔فاتح ٹیم نے فائنل میں بھارت کو24 رنز سے شکست دے کر نیوزی لینڈ میں سبز ہلالی پرچم بلند کردیا، بدھ کو منعقدہ میچ میں پہلے بیٹنگ کرتے ہوئے پاکستان نے مقررہ اوورز میں 9 وکٹ پر 192 رنز اسکور کیے،

عاطف بیگ نے49 گیندوں پر سب سے زیادہ 48 رنز بنائے، دیگر تمام بیٹسمینوں نے بھی دہرے ہندسوں میں رسائی پاتے ہوئے ٹیم کی پوزیشن بہتر کی۔جواب میں بھارتی ٹیم 169 رنز پر آؤٹ ہوگئی، نجیب جمالی اور محمد علی لاکھانی نے بہترین بولنگ کرتے

ہوئے 3،3 وکٹیں حاصل کیں، حسن مرزا نے 2 اور کپتان سلیمان ہدیٰ نے ایک کھلاڑی کو آؤٹ کرکے حریف پر دباؤ بڑھایا، محمد نجیب جمالی کو عمدہ کارکردگی پر میچ کا بہترین کھلاڑی قرار دیا گیا۔

لاہور(ایمرا نیوز آن لائن) وزیر اطلاعات پنجاب فیاض الحسن چوہان کا کہنا ہے کہ آئین اور قانون کے مطابق کورا ان پڑھ شخص ایم این اے یا ایم پی اے بن سکتا ہے۔اپنے ایک بیان میںٰ فیاض چوہان نے کہا کہ وزیراعلیٰ عثمان بزدار کے دور میں ملکی تاریخ میں پہلی مرتبہ اقتدارگراس روٹ لیول تک پہنچا ہے، پنجاب لوکل گورنمنٹ ایکٹ سے عوام اور منتخب نمائندوں کو بااختیار بنایا گیا ہے، جب کہ ماضی کی حکومتوں میں کسی وزیرمشیر کے پاس کوئی اختیار نہیں تھا۔

انہوں نے سابق وزیراعلیٰ پنجاب شہباز شریف پر تنقید کرتے ہوئے کہا کہ حبیب جالب کے شعر پڑھنے والے وزیراعلیٰ کی توجہ کبھی بھی عوامی مسائل کی طرف نہیں گئی، نام نہاد خادم اعلیٰ نے تمام تر اختیارات اپنی ذات تک محدود کررکھے تھے اور ان کے ساتھ دائیں بائیں بیٹھے لوگ بھی اختیارات کا ناجائز استعمال کرتے رہے۔

وزیر اطلاعات نے سابق حکومتوں پر طنز کرتے ہوئے کہا کہ نواز شریف اور آصف زرداری نے انتخابات میں امیدوار کیلئے بی اے کی شرط کا خاتمہ کیا، یعنی آئین اور قانون کے مطابق کورا انپڑھ شخص ایم این اے یا ایم پی اے بن سکتا ہے اور پھر جو ایم این اے یا ایم پی اے بنے گا وہی وزیر مشیر بھی ہو گا۔

فیاض چوہان نے اعتراف کیا کہ کوئی شک نہیں مہنگائی بہت زیادہ ہے لیکن حکومت اسے قابو میں کرنے کی کوشش کر رہی ہے، حکومت کفایت شعاری کی مہم پر کاربند ہے جلد نتائج بھی سامنے آئیں گے۔واضح رہےکہ خیبرپختونخوا میں وزیر تعلیم مقرر کیے جانے والےتحریک انصاف کے رکن اکبر ایوب خان کی تعلیم میٹرک ہے جس پر انہیں تنقید کا نشانہ بنایا گیا تھا۔

نیویارک(ایمرا نیوز آن لائن) ایک سروے سے یہ بات سامنے آئی ہے کہ گھروں کے باغات اور فصلوں میں عام استعمال ہونے والی ایک دوا امراضِ قلب کے ساتھ ساتھ کئی طرح کی جان لیوا بیماریوں کی وجہ بھی بن سکتی ہے۔

یہ کیڑے مار دوا اب بھی عام استعمال ہورہی ہے جسے پائریتھرائیڈز کا نام دیا گیا ہے۔ اسے زراعت اور گھروں میں کیڑے مکوڑے مارنے کے لیے استعمال کیا جاتا ہے اور بہت سی گھریلو اشیا میں بھی اس کا استعمال طویل عرصے سے جاری ہے۔

اگرچہ یہ ایک چھوٹا مطالعہ ہے لیکن اس میں کیمیکل کے جان لیوا خطرات سامنے آئے ہیں جس کے بعد اس پر مزید تحقیق ضروری ہوگئی ہے۔ تحقیقی مقالے کے مصنفین کے مطابق پائریتھرائیڈز کا مسلسل استعمال کیا جائے تو یہ دوا جسم میں جاکر جان لیوا دل کی بیماریوں اور دیگر مہلک امراض کی وجہ بنتی ہے۔
پائریتھرائیڈز ایک عام کیڑے مار دوا ہے جو باغیچوں میں اسپرے کے علاوہ شیمپو، جوئیں مار ادویہ اور مچھر بھگانے کے اسپرے میں بھی پایا جاتا ہے۔

دنیا بھر میں استعمال ہونے والی کیڑے مار ادویہ کی 30 فیصد تعداد میں پائریتھرائیڈز موجود ہوتا ہے۔ اس سے قبل آرگینو فاسفیٹس کا استعمال بہت زیادہ تھا لیکن اس پر پابندی کے بعد پائریتھرائیڈز کا استعمال بڑھا ہے۔ یہ کیمیکل جلد اور سانس کے ذریعے جسم میں داخل ہوتا ہے اور چند گھنٹوں بعد پیشاب میں ظاہر ہوتا ہے لیکن دھیرے دھیرے جسم کو نقصان پہنچاتا رہتا ہے۔

یہی وجہ ہے کہ جسم میں پائریتھرائیڈز کی زائد مقدار کو پیشاب کے ٹیسٹ کے ذریعے معلوم کیا جاسکتا ہے۔ اگرچہ کم مقدار میں استعمال کے بعد فوری طور پر اس کے منفی اثرات سامنے نہیں آتے لیکن پائریتھرائیڈز ایک طویل عرصے تک جسم میں جاتا رہے تو اس کے خطرناک نتائج برآمد ہوتے ہیں۔

ماہرین نے اپنے مطالعے سے بتایا کہ یہ کیمیکل زیادہ عرصے تک جسم میں جائے تو اس سے اعصابی امراض، ذیابیطس، پارکنسن اور امراضِ قلب کا خطرہ بڑھ جاتا ہے۔

کولمبیا یونیورسٹی کے ماہرین نے 20 سال سے اوپر کے2116 افراد کاجائزہ لیا ۔ 1999ء اور 2002ء میں تمام افراد کی پیشاب کے ٹیسٹ لیے گئے جس سے پائریتھرائیڈز کی مقدار کو نوٹ کیا گیا۔ اس کے بعد 2015ء تک مسلسل یہ تحقیق جاری رہی۔

اس پورے عرصے میں 246 افراد اس دنیا سے رخصت ہوگئے اور معلوم ہوا کہ جس کی پیشاب میں پائریتھرائیڈز کی زائد مقدار تھی ان میں قبل از وقت ہلاکت کا خدشہ بھی زیادہ دیکھا گیا۔ اس تحقیق سے معلوم ہوا کہ اگر صحت مند انسان طویل عرصے تک پائریتھرائیڈز کے ماحول میں رہے تو اس کے دیگر امراض سے مرنے کے خطرے میں 56 فیصد تک اضافہ ہوسکتا ہے۔

لاہور(ایمرا نیوز آن لائن) شان مسعود سپر فٹ کرکٹرزکی دوڑ میں سب سے آگے ہیں جب کہ سابق کپتان سرفرازاحمد کے فٹنس لیول میں نمایاں بہتری آگئی۔پیر کے روز نیشنل کرکٹ اکیڈمی لاہورمیں شروع ہونے والے فٹنس ٹیسٹ کا دوسرا مرحلہ گذشتہ روز جاری رہا، 10قومی کرکٹرز کو مختلف آزمائشوں سے گزارتے ہوئے ڈیٹا مرتب کیا گیا، ہیڈکوچ مصباح الحق اور بولنگ کوچ وقاریونس بھی ٹیسٹ کے مختلف مراحل میں کھلاڑیوں کی فٹنس کا جائزہ لیتے رہے۔

ذرائع کے مطابق شان مسعود سپر فٹ قرار پائے،یویو ٹیسٹ میں ان کا اسکور20رہا، سابق کپتان سرفرازاحمد کے لیول میں نمایاں بہتری آئی ہے، امام الحق، شاہین شاہ آفریدی اور محمد عباس بھی اپنا معیار برقرار رکھنے میں کامیاب رہے، عمادوسیم، یاسر شاہ اورعابد علی چند آزمائشوں میں تھوڑا مشکل میں دکھائی دیے۔ 1،2 روز میں مرتب کی جانے والی ٹرینر یاسر ملک کی حتمی رپورٹ میں تعین ہوسکے گا کہ مجموعی فٹنس تسلی بخش رہی یانہیں۔
یاد رہے کہ پی سی بی کو تمام سینٹرل کنٹریکٹ یافتہ کرکٹرز کے فٹنس ٹیسٹ لینا تھے، انجریز سے نجات کیلیے کوشاں حسن علی اور فخرزمان میڈیکل پینل سے کلیئرنس کے بعد جانچ کرانے کے قابل ہوں گے۔

وائرل انفیکشن کے شکار کرکٹراظہرعلی،اسد شفیق، محمد رضوان، ٹائیفائیڈ میں مبتلا عثمان شنواری کا ٹیسٹ چند روز بعد لیا جائے گا، وہاب ریاض، محمد عامر اور شاداب خان بنگلہ دیش پریمیئرلیگ سے واپسی پر 20جنوری کو نیشنل کرکٹ اکیڈمی میں رپورٹ کریں گے۔

پی سی بی نے اعلان کررکھاہے کہ جس کرکٹر کا فٹنس لیول مطلوبہ معیار سے کم ہوا اس کی تنخواہ سے 15فیصد کٹوتی شروع ہوجائے گی، یہ سلسلہ بہتری آنے تک جاری رہے گا۔

تہران(ایمرا نیوز آن لائن) ایران کے سپریم لیڈر آیت اللہ خامنہ ای کا کہنا ہے کہ میزائل حملہ امریکا کے منہ پر طمانچہ ہے اور صرف فوجی کارروائی کافی نہیں بلکہ خطے میں امریکا کی موجودگی ختم ہونی چاہیے۔

ایرانی میڈیا کے مطابق عراق میں امریکی فوجی اڈوں پر حملوں کے بعد ایران کے سپریم لیڈر آیت اللہ خامنہ ای نے اپنے خطاب میں کہا کہ ایرانی قوم آج دنیا کے غنڈوں کے خلاف متحد ہوگئی ہے، امریکی اور اتحادی افواج پر حملہ کامیاب رہا، امریکا جہاں بھی جاتا ہے تباہی اور فساد لاتا ہے لیکن ایران مخالفین کا مقابلہ کرنے کے لیے تیار ہے۔

آیت اللہ خامنہ ای نے کہا کہ امریکا کے خلاف صرف فوجی حملہ کافی نہیں بلکہ خطے میں امریکا کی موجودگی ختم ہونی چاہیے، قاسم سلیمانی مغربی ایشیا میں امریکی سازشوں کے خلاف رکاوٹ تھے، قاسم سلیمانی کو خطرات کا سامنا تھا پر انھوں نے ہمیشہ دوسروں کی جان کی پرواہ کی، جنرل سلیمانی نے اسرائیل کے خلاف جدوجہد میں فلسطینیوں کی بہت مدد کی۔
اس خبر کو بھی پڑھیں؛ امریکی فوجی اڈوں پرحملوں میں 80 افراد ہلاک ہوئے، ایران کا دعوی

ایرانی سپریم لیڈر نے کہا کہ جنرل قاسم سلیمانی ایران کا بہادر سپوت تھا، جنرل قاسم سلیمانی میں منافقت نہیں تھی، جنرل سلیمانی نے اپنی زندگی انقلاب کے لیے وقف کر رکھی تھی، آج کا ایرانی نوجوان ماضی کی نسبت انقلاب پر زیادہ اور کامل یقین رکھتا ہے، قاسم سلیمانی صرف فوجی نہیں تھے بلکہ وہ سیاسی میدان میں بھی جرات کا مظاہرہ کرتے تھے۔