Tag drugs

مسافر منشیات سمیت مزید تفتیش کےلئے اے این ایف سیل منتقل
اسلام آباد (ایمرا نیوز آن لائن) انٹرنیشنل ایئرپورٹ پراے ایس ایف نے کارروائی کرتے ہوئے مسافر سے 6 کلو گرام سے زائد منشیات برآمد کرلی۔ نیو اسلام آباد انٹرنیشنل ایئرپورٹ پر اے ایس ایف نے کارروائی کرتے ہوئے سعودی عرب جانے والے مسافر ممتازمحمد سے 6 کلو گرام سے زائد آئس منشیات برآمد کرلی۔ صوابی کے رہائشی ممتاز محمد نے منشیات کپڑوں کے آٹھ جوڑوں میں چھپا رکھی تھی۔اے ایس ایف راولپنڈی جوائنٹ سرچ کاؤنٹر پر اے ایس ایف کی نشاندہی پر چیکنگ کے دوران منشیات برآمد ہونے پرمسافر کو اے این ایف نے گرفتار کرلیا، مسافرکومنشیات سمیت مزید تفتیش کے لیے اے این ایف سیل منتقل کردیا گیا ہے۔

اسلام آباد (ایمرا نیوزآن لائن) پاکستان میں نوجوانوں میں منشیات کے استعمال میں خطرناک حد تک اضافہ ہو رہا ہے اقوام متحدہ کے عالمی ادارہ صحت کی رپورٹ کے مطابق دنیا بھر میں 35 کروڑ سے زائد افراد اس وقت مختلف اقسام کی منشیات کا استعمال کر رہے ہیں۔ اور ان کی تعدار میں روز بروز اضافہ ہو رہا ہے ۔ ایک رپورٹ کے مطابق پاکستان میں ہر سال ڈھائی لاکھ افراد منشیات کے استعمال کے نتیجے میں موت کے منہ میں چلے جاتے ہیں۔ منشیات پاکستان کے لئے کتنا بڑا مسئلہ ہے اس کا اندازہ اس بات سے لگایا جا سکتا ہے کہ پاکستان میں پچھلے دس سال میں دہشتگردی کے نتیجے میں 60 ہزار سے زائد افراد نے اپنی جانیں قربان کیں، لیکن اس سے چار گنا زیادہ تعدار میں ہر سال پاکستان میں منشیات کی وجہ سے ہلاکتیں ہوتی ہیں۔علاوہ ازیں مختلف اداروں کے اعداد و شمار کے مطابق پاکستان میں تقریبا 46 فیصد مرد اور 9 فیصد خواتین سگریٹ نوشی کرتی ہیں جو روزانہ تقریبا 18 کروڑ سگریٹ پی جاتے ہیں جن پر مجموعی طور پر 75 کروڑ روپے روزانہ خرچ ہوتے ہیں۔ایک رپورٹ کے مطابق دنیا بھر میں 80 فیصد منشیات کا استعمال ترقی پذیر ممالک میں کیا جا رہا ہے جن میں پاکستان، بھارت، بنگلہ دیش اور سری لنکا سرفہرست ہیں۔ امریکا سمیت دیگر یورپی ممالک نے منشیات پر کافی حد تک قابو پا لیا ہے ۔ رپورٹ کے مطابق پاکستان میں نشہ کرنے والوں کی زیادہ تعداد 13 سے 24 سال کے لوگوں کی ہے یہ وہ لوگ ہیں جو ایک یا ایک سے زائد بار نشے کی طرف مائل ہوئے ہیں۔ اسی لیے پاکستان میں اپر کلاس اورمڈل کلاس کے لوگوں کے نشے میں واضح فرق موجود ہے ۔عالمی ادارہ صحت کی رپورٹ کے مطابق دنیا بھر میں ہر سال 40 لاکھ افراد منشیات کے استعمال کی وجہ سے اپنی جان سے ہاتھ دھو بیٹھتے ہیں۔ پاکستان میں منشیات اور نشہ آور ادویات کا غیر قانونی استعمال کرنے والوں کی تعداد قریب 90 لاکھ ہے ، اور ان میں بڑی تعداد پچیس سے لے کر انتالیس برس تک کی عمر کے افراد کی ہے ۔ایک اندازے کے مطابق پاکستان میں ہر سال سگریٹ اور شراب کے علاوہ منشیات جن میں چرس، افیون، ہیروئن وغیرہ شامل ہیں پر چالیس ارب روپے خرچ کیے جاتے ہیں۔ منشیات کا استعمال صرف یہی نہیں کہ مذہبی اور اخلاقی طور پر ممنوع ہے بلکہ اس کی پیداوار اس کی خریدوفروخت کرنے والے بھی مذہبی اور اخلاقی جرم کے مرتکب ہوتے ہیں۔ منشیات کے استعمال سے دل، جگر، معدہ، پھیپھڑوں کی بیماری، فالج، ایڈز اور ہیپاٹائٹس جیسے موذی امراض کا شکار ہو کر ایڑیاں رگڑ رگڑ کر مرتے ہیں۔

برآمد ہونے والی منشیات کی مالیت عالمی مارکیٹ میں 4کروڑ 20لاکھ روپے کے لگ بھگ ہے‘ ترجمان کوسٹ گارڈز
کراچی(ایمرا نیوز آن لائن )کوسٹ گارڈز نے گوادر (بلوچستان) کے ساحلی مقام کے قریب چھاپے کے دوران ایک ہزار کلوگرام چرس قبضے میں لے لی۔ترجمان کوسٹ گارڈز کے مطابق خفیہ ذرائع سے ملنے والی اطلاعات کے مطابق سمندر کے راستے منشیات کی اسمگلنگ کا خدشہ تھا جس کی بنا پرڈی کوسٹ گارڈز کی جانب سے متعلقہ علاقہ کمانڈرز کو سخت احکام جاری کیے گئے اور موبائل پارٹیاں تشکیل دی گئیں۔اسی دوران مشکوک مقامات کی نگرانی کے دوران گوادرکے علاقے نیاآباد میں ایک غیرآبادگھر میں منشیات کی موجودگی کی اطلاع پرکوسٹ گارڈ کی چھاپہ مارٹیم نے ایک ہزارکلو چرس برآمدکرلی۔

منشیات کی اسمگلنگ میں ملوث 20 ملزمان گرفتار، 6گاڑیاں ضبط کرکے مقدمات درج کرلئے
اسلام آباد (ایمرا نیوز آن لائن)منشیات کی ترسیل و استعمال کے خلاف عدم برداشت کا سلسلہ جاری رکھتے ہوئے اینٹی نارکوٹکس فورس پاکستان نے 18ملک گیر کاروائیوں کے دوران 61کروڑ 91 لاکھ روپے بین الاقوامی مالیت کی240.502کلوگرام منشیات برآمد کر لی جبکہ منشیات کی اسمگلنگ میں ملوث20ملزمان کوگرفتاراور6گاڑ یاںبھی تحویل میں لے لی گئی۔ برآمد شدہ منشیات میں 154.742کلو گرام چرس،55.2کلو گرام افیون، 18.32کلوگرام ہیروئن،12.09کلو گرام میتھ ایمفیٹامائن اور 150 گرام ایمفیٹامائن شامل ہے۔ اے این ایف راولپنڈی نے اسلام آباد انٹرنیشنل ایئرپورٹ پر کاروائی کرتے ہوئے بذریعہ پرواز نمبر QR-633 دوحہ جانے والے ہنگو کے رہائشی احسان اللہ نامی مسافر کی تلاشی کے دوران اس کے جوتوں میں چھپائی گئی 1.12 کلو گرام چرس برآمد کر کے ملزم کو گرفتار کر لیا۔ دوسری کاروائی کے دوران اے این ایف راولپنڈی نے اسلام آباد انٹرنیشنل ایئرپورٹ سے بذریعہ پرواز نمبر QR-633 دوحہ جانے والے خیبر ایجنسی کے رہائشی محمد عزیز نامی مسافر کی تلاشی کے دوران اس کے جوتوں سے 800 گرام چرس برآمد کر کے ملزم کو گرفتار کر لیا۔تیسری کاروائی کے دوران اے این ایف راولپنڈی نے بسال روڈ، اٹک پر واقع سالار چوک کے قریب اٹک کے رہائشی محمد سعید نامی ملزم کے ذاتی قبضے سے 400 گرام چرس برآمد کر کے ملزم کو گرفتار کر لیا۔اے این ایف لاہور نے علامہ اقبال انٹرنیشنل ایئرپورٹ لاہور پر کاروائی کرتے ہوئے محمد حارث نامی برطانوی باشندے کے سامان کی تلاشی کے دوران اس کے پاس 3 عدد بیگوں میں موجود فوم میں جذب کی گئی 16.7 کلو گرام ہیروئن برآمد کر کے ملزم کو گرفتار کر لیا۔ملزم پرواز نمبر EK-623 کے ذریعے برطانیہ روانہ ہو رہا تھا۔دوسری کاروائی کے دوران اے این ایف لاہور نے بذریعہ پرواز نمبر PA-470 جدہ جانے والے شانگلہ کے رہائشی منظور الٰہی نامی مسافر سے 10.1 کلو گرام میتھ ایمفیٹامائن برآمد کر کے ملزم کو گرفتار کر لیا۔ برآمد شدہ منشیات ملزم کے ٹرالی بیگ میں موجود 19 عدد پوشاکوں، 1 عدد شال،1 عدد تولیہ اور ایک عدد احرام میں جذب کی گئی تھی۔ تیسری کاروائی کے دوران اے این ایف لاہور نے ایمپیریم مال، لاہور کے قریب ٹیوٹا کرولا کار کو روک کر دوران تلاشی گاڑی کے ڈرائیونگ سیٹ کے نیچے اور خفیہ خانوں میں چھپائی گئی 5 کلو گرام چرس برآمد کر کے پشاور کے رہائشی نوید احمد نامی ملزم کو گرفتار کر لیا۔چوتھی کاروائی کے دوران اے این ایف لاہور نے مین موٹروے ٹول پلازہ، سرگودھا روڈ، فیصل آباد کے قریب سرگودھا کے رہائشی سردار رشید نامی ملزم کے قبضے سے 1.2 کلو گرام چرس برآمد کر کے ملزم کو گرفتار کر لیا۔پانچویں کاروائی کے دوران اے این ایف لاہور نے فیروز پور روڈ، لاہور پر واقع فیصل بینک کے قریب لاہور کے رہائشی نذر حسین نامی موٹرسائیکل سوار کو روک کر اس کے قبضے سے ایک کلو گرام ہیروئن، 500 گرام چرس اور 150 گرام ایمفیٹامائن برآمد کر کے ملزم کو گرفتار کر لی۔چھٹی کاروائی کے دوران اے این ایف لاہور نے فیض پور موٹروے ٹول پلازہ، لاہور کے قریب شانگلہ کے رہائشی سرفراز خان نامی ملزم کے قبضے سے 2 کلو گرام چرس برآمد کر کے ملزم کو گرفتار کر لیا۔ساتویں کاروائی کے دوران اے این ایف لاہور نے مدینہ ٹاﺅن فیصل آباد میں واقع ایک نجی کوریئر آفس کے ذریعے برطانیہ بھیجے جانے والے ایک پارسل کو قبضے میں لیکر اس میں سے 620 گرام ہیروئن برآمد کر لی۔ برآمد شدہ منشیات لیڈیز جوتوں میں انتہائی مہارت سے چھپائی گئی تھیں۔ اے این ایف پشاور نے خفیہ اطلاع پر مبنی ایک کاروائی کے دوران رنگ روڈ پشاور پر واقع اباسین یونیورسٹی کے قریب لینڈ کروزر گاڑی کو روک کر دوران تلاشی گاڑی کے فیول ٹینک میں چھپائی گئی 55.2 کلو گرام افیون برآمد کر کے صوابی کے رہائشی سہراب خان اور جاوید نامی دو ملزمان کو گرفتار کر لیا۔دوسری کاروائی کے دوران اے این ایف پشاور نے انڈسٹریل ایریا روڈ، ہری پور کے قریب ایک ٹیوٹا ہائی لیکس گاڑی کو روک کر دوران تلاشی گاڑی سے 48 کلو گرام چرس برآمد کر کے پشاور کی رہائشی عشرت بی بی نامی خاتون کو گرفتار کر کے اس کے ساتھ موجود 3 سال کے بچے کو تحویل میں لے لیا۔تیسری کاروائی کے دوران اے این ایف پشاور نے جھاری کس انٹرچینج کے قریب ایک سیبرو کار کو روک کر دوران تلاشی گاڑی کے فیول ٹینک میں چھپائی گئی 4.8 کلو گرام چرس برآمد کر کے چارسدہ کے رہائشی فاروق، مانسہرہ کے رہائشی محمد سہیل اور محمد عابد نامی 3 ملزمان کو گرفتار کر لیا۔چوتھی کاروائی کے دوران اے این ایف پشاور نے پشاور انٹرنیشنل ایئرپورٹ سے بذریعہ پرواز نمبر PK-285 دوحہ جانے والے ہنگو کے رہائشی محمد منیر نامی مسافر کے بریف کیس سے 1.962 کلو گرام چرس برآمد کر کے ملزم کو گرفتار کر لیا۔پانچویں کاروائی کے دوران اے این ایف پشاور نے چم ہٹی، ایبٹ آباد میں واقع گورنمنٹ ہائی سکول کے قریب سے ایبٹ آباد کے رہائشی واجد خان نامی ملزم کے قبضے سے 1.5 کلو گرام چرس برآمد کر کے ملزم کو گرفتار کر لیا۔چھٹی کاروائی کے دوران اے این ایف پشاور نے پشاور انٹرنیشنل ایئرپورٹ سے بذریعہ پرواز نمبر QR-600 دوحہ جانے والے کرک کے رہائشی زین اللہ نامی مسافر کے سامان میں موجود انار ،مالٹوں اور جوتوں میں انتہائی مہارت سے چھپائی گئی 3.46 کلو گرام چرس برآمد کر کے ملزم کو گرفتار کر لیا۔ساتویں کاروائی کے دوران اے این ایف پشاور نے پشاور انٹرنیشنل ایئرپورٹ سے بذریعہ پرواز نمبر EK-637 ریاض جانے والے اپر دیر کے رہائشی ذاکر اللہ نامی مسافر کے سامان کی تلاشی کے دوران اس کے بیگ میں موجود نمکو میں چھپائی گئی 1.99 کلو گرام میتھ ایمفیٹامائن برآمد کر کے ملزم کو گرفتار کر لیا۔اے این ایف کراچی نے نیا ناظم آباد، منگھوپیر روڈ، قصبہ کالونی، کراچی میں کاروائی کے دوران کراچی کے رہائشی اسد اقبال نامی ملزم کے قبضے سے 84 کلو گرام چرس برآمد کر کے ملزم کو گرفتار کر لیا۔ملزم کے پاس موجود گاڑی بھی قبضے میں لے لی گئی۔تمام مقدمات اے این ایف کے متعلقہ تھانوں میں درج کر لئے گئے ہیں اور مزید تفتیش جاری ہے۔

اسلام آباد(نیٹ نیوز/ایمرا نیوز) منشیات کے خلاف مہم چلانے والے وزیر مملکت داخلہ شہر یار آفریدی کے بھتیجےکی گزشتہ ماہ منشیات سمیت گرفتاری کا انکشاف سامنے آیا ہے، پولیس نے ملزم طلال نادر آفریدی اور اس کے دو ساتھیوں کے خلاف دسمبر میں ایف آئی آر درج کر کے انہیں جیل بھیج دیا تھا۔طلال نادر آفریدی پر 11 دسمبر 2018 کو تھانہ جنڈ اٹک میں مقدمہ درج کیا گیا ،جس کی تفصیلات اب سامنے آئی ہیں، مقدمہ کی درج شدہ ایف آئی آر کے مطابق ایک مشکوک گاڑی کو روکنے کی کوشش کی گئی تو ملزمان نے گاڑی بھگا دی ۔پولیس نے گاڑی کا تعاقب کیا اور روک کر تلاشی لی تو اس میں سے آدھا کلو گرام سے زائد چرس برآمد ہوئی ، ملزمان میں سے ایک طلال نادر آفریدی نے اپنا حالیہ پتہ منسٹر کالونی اسلام آباد لکھوایا۔ذرائع کا کہنا ہے کہ طلال نادر آفریدی وزیر مملکت داخلہ شہر یار آفریدی کا بھتیجا ہے ، تھانہ جنڈ کے تفتیشی افسر محمد رمضان نے بتایا کہ ملزمان کو گرفتار کرکے جیل بھیج دیا گیا تھا ۔ذرائع کا کہنا ہے کہ طلال نادر آفریدی کو ضمانت پر جیل سے رہا کر دیا گیا ہے ، منشیات کے الزام میں طلال نادر آفریدی کی گرفتاری پر رد عمل میں وزارت داخلہ نے میڈیا سے بات کرتے ہوئے بتایا کہ وزیر اعظم کرپشن، دہشت گردی، قبضہ مافیا اور ڈرگ مافیا کے خلاف جنگ لڑ رہے ہیں ۔وزارت داخلہ کاکہنا تھا کہ وزیر مملکت داخلہ شہریار آفریدی اس جنگ میں صف اول کا کردار ادا کررہے ہیں ، قانون کے سامنے کوئی وزیر، مشیر یا تحریک انصاف کے کارکن سب برابر ہیں ، کوئی وزیر ہو یا اس کا رشتہ دار، قانون اپنا راستہ خود بنائے گا ۔

اسلام آباد:(نیٹ نیوز/ایمرا نیوز) اینٹی نارکوٹکس فورس انٹیلی جنس ونگ نے وفاقی دارالحکومت میں کارروائی کرکے منشیات سے بھرا ٹرک پکڑ لیا۔اے ایف این کے مطابق اینٹی نارکوٹکس فورس انٹیلی جنس نے 26 نمبر چورنگی پر بڑی کارروائی کی جس میں منشیات سے بھرا ٹرک پکڑا گیا۔اے این ایف کے مطابق ٹرک سے 42 پیکٹس، 50 کلو افیون اور 14 کلو حشیش برآمد ہوئی جو ٹرک کے ٹائروں میں چھپائی گئی تھی۔اے این ایف حکام نے بتایا کہ منشیات راولپنڈی، اسلام آباد اور فیصل آباد منتقل کی جانی تھی، کارروائی میں دو ملزمان کو گرفتار کیا گیا جن سے پوچھ گچھ جاری ہے۔

(نیٹ نیوز/ایمرا نیوز)
کسی بھی قوم یا ملک کی بنیاد اس کی نوجوان نسل ہوتی ہے، اس ملک کو بدلنے یا آگے لے کرجانے میں نسل نو بنیادی کردار ادا کرتی ہے۔اگر کسی ملک کی بنیاد کو کھوکھلا کرنا ہو، تو اس کے نوجوانوںکو منشیات کا عادی بناکر اسے بآسانی کمزور کیا جاسکتا ہے۔منشیات نے نہ صرف نسل نوکی زندگی مفلوج بناکررکھ دی ہے، بلکہ انہیں اپنے حلقہ احباب اور معاشرتی ذمے داریوں سے بھی دور کردیا ہے۔جس زندگی کی انہیں قدر کرنی چاہیے، جسے ملک و ملت کو سنوارنے ، اسے بام عروج پر پہنچانے میں صرف کرنا چاہیے، اسے نشے کا شکار ہو کر برباد کرنے پہ تلے ہوئے ہیں۔ نوجوانوں کی اکثریت ، تو اس بات تک سے انجان ہے کہ چند لمحوں کے سکون کے لیے جس زہر قاتل کا استعمال وہ کر رہے ہیں، وہ ان کی زندگی اور مستقبل کو دیمک کی طرح چاٹ رہا ہے۔ پہلے زمانے میں کم از کم اتنی تہذیب تو تھی کہ، نوجوان اپنے بڑوں، اساتذہ وغیرہ کے سامنے تمباکو نوشی تک کرنے سے گریز کرتے تھے لیکن آج تو حال یہ ہے کہ نوجوان کھلے عام تمباکو نوشی اور منشیات کا استعمال کرتے نظر آتے ہیں۔ جیسے یہ کوئی معیوب عمل نہیں بلکہ قابل فخر کام ہے،ان کی اکثریت مغربی طور طریقوں سے متاثر ہوکر نشے کی عادی ہورہی ہے،جب کہ چند نوجوان محض دوستوں کے سامنے ’’کول‘‘ یا دلیر بننے کے لیے ان کے کہنے پر منشیات کا استعمال کرنا شروع کر دیتے ہیں، کچھ نوجوان ایسے بھی ہیں، جواپنی پریشانیوں سے بھاگنے اور ذہنی سکون حاصل کرنےکے لیےاس زہر کو گلے لگالیتے ہیں۔منشیات میں مبتلا نوجوان معاشرے کے لیے ناسورہوتےہیں ، ہمارے ملک میں نشے کی لت میں مبتلا افراد میں سب سے زیادہ تعداد نوجوانوں کی ہے۔نشے کا آغاز عام طور پر تفریحاً کیا جاتا ہے،پہلے پہل دوستوں کے ساتھ مل کر یا کسی پارٹی وغیرہ میں کرتے ہیں،پھر رفتہ رفتہ یہ شوق ،عادت اور پھر نہ ختم ہونے والی ضرورت بن جاتا ہے۔ اس کا نتیجہ یہ نکلتا ہے کہ نوجوانوں کا جسم تیزی سے نشےکا عادی ہوجاتا ہے،جس کے بعد مختلف قسم کے نشوں میں اضافہ ہوجاتا ہے، یہ لت اتنی شدت اختیار کر لیتی ہے کہ نشئی ،منشیات کے حصول کے لیے کسی بھی حد تک جانے سے گریز نہیں کرتے، غیراخلاقی وغیرقانونی سرگرمیوں تک میں ملوث ہوجاتے ہیں۔، کیوں کہ انہیںاپنے اردگرد کے حالات کا شعور نہیں ہوتا۔

نوجوان دوستو! ذرا سوچیے کہ آپ کے چند دن یا محض دوستوں کے کہنے میں آکر کیے گئے نشے کی خبر جب آپ کے والدین کو ملے گی، توان پر کیا گزرے گی؟اس کی لت ایسا روگ ہے ،جو لگتی ایک فرد کو ہے، مگر تباہ پورے خاندان کوکرتی ہے،جس سےخوشیاں اور سکون بربادہوجاتا ہے۔ منشیات کے عادی نوجوان زیادہ عرصے تک اپنے والدین سے یہ عادت نہیں چھپا پاتے، کیوں کہ اسے خریدنے کے لیے انہیں پیسوں کی ضرورت پڑتی ہےیا ان کی صحت رفتہ رفتہ خراب ہونے لگتی ہے، جو گھر والوں کو شک میں مبتلا کر دیتی ہے۔ہمارے ملک کا اثاثہ 64 فیصد نوجوان آبادی ہے،جس کے کاندھوں پراپنا ہی نہیں ملک کے مستقبل کو سنوارنے کی ذمے داری بھی عائد ہے، لیکن نشے میں ڈوبی یہ قوت کیسے مستقبل روشن بنا سکے گی؟یہ لمحۂ فکریہ ہے کہ ہمارے ملک میں منشیات استعمال کرنے والےنوجوانوں کی تعداد لاکھوں میں ہے، جس میںدن بہ د ن تیزی سے اضافہ ہوتا جا رہا ہے، اکثریت 21 سال سے 30 سال کی ہے۔اس سے بھی زیادہ افسوس ناک بات یہ ہے کہ، منشیات فروشی اور نشہ آور چیزوں کی جانب تعلیم یافتہ نوجوان تیزی سے مائل ہو رہے ہیں، ایک اندازے کے مطابق تقریباً 70 فی صد طالب علم سگریٹ اور گٹکے کا استعمال کرتے ہیں۔اس سے بھی کہیںحیران کن،افسوس ناک بات یہ ہے کہ اکثر اسکول کےبچے بھی سگریٹ نوشی میں مبتلا نظر آتے ہیں۔مشاہدے میں آیا ہے کہ اکثر نوجوان دوستوں پر سبقت لے جانے یا ان کے سامنے اپنا رعب و دبدبہ قائم کرنے کے لیے تمباکو نوشی، گٹکا مین پوری اور دیگر چیزوں کا استعمال کرتے ہیں، جو وقت کے ساتھ ان کی عادت اورپھر ضرورت بن جاتی ہے، جس کا انجام سوائے تاریکی کے اور کچھ نہیں ۔ یقیناً نوجوان نسل اس بات سے ناواقف ہے کہ، تمباکونوشی ، نشے کی بنیاد بنتی ہے۔ کیا فائدہ ایسے عارضی سکون کا جس سے زندگی بھر کی تکلیف مقدر بن جائے۔تحقیق کے مطابق منشیات کے عادی 60 فی صد سے زائد نوجوان تعلیم یافتہ ہیں۔ اگر غور کیا جائے، تویہ ایک انتہائی تشویش ناک بات ہے کہ ہمارا پڑھا لکھا طبقہ فیشن کے دھوکے میں اپنی ہی بربادی کا سامان کر رہا ہے۔ اس کی اہم وجہ ان کےاردگرد کا ماحول اوردوست نما دشمن ہیں۔جہاں تعلیمی ادارے اتنی بھاری بھر کم فیسیں وصول کرتے ہیں، انہیں چاہیے کہ وہ یہ بھی نظرمیں رکھیں کہ ان کے ادارے میں زیر تعلیم نوجوان کن سرگرمیوں میں مشغول ہیں ،تعلیمی ادارے تو نسل نوکی تربیت کرنے اورذہنی شعور بلند کرنے کا ذریعہ ہوتے ہیں، لیکن جب ان اداروں میں نوجوان کو منشیات استعمال کرنے لگیںتو سمجھ جانا چاہیے کہ قوم کا سرمایہ خطرے میں ہے۔ حیران کن بات یہ ہے کہ کالجوں اور یونیورسٹیوں کی لڑکیوں میں شیشہ اور دیگر منشیات کا استعمال فیشن کے طور پر اپنا یاجارہا ہے۔ تحقیق سے پتا چلتا ہے ،کہ لڑکیاں زیادہ تر نشہ ذہنی دبائو، ڈپریشن اور احساس کمتری کی وجہ سے کرتی ہیں۔ جب نشے کی عادت میں مبتلا نوجوانوں کو پیسے نہیں ملتے، تووہ اپنے مقصد کےحصول کے لیے منفی سرگرمیوں میں ملوث ہوجاتے ہیں، اسٹریٹ کرائم میں اضافہ بھی اسی وجہ سے ہوتا ہے۔عالمی ادارۂ صحت نے نوجوانوں میں منشیات کے استعمال کی تین بنیادی باتیں بتائی ہیں۔ وہ نشے میں اپنے آپ کو اچھا اور مطمئن محسوس کرتے ہیں ، اپنے آپ کو طاقتور محسوس کرتے ہیں اور اپنے فیصلے خود کرنا چاہتے ہیں۔قومیں اپنے کردار، گفتار، عادات سے مقبولیت پاتی ہیں والدین اور اساتذہ کوپرائمری سطح پر تعلیم حاصل کرنے والے بچوں پر بطور خاص توجہ دینا ہوگی، کیوں کہ جو باتیں اس وقت ان کے ذہنوں میں بیٹھ جائیں گی وہ ہمیشہ ان کے دل و دماغ پر نقش ر ہیںگی۔ منشیات کے مسئلے سے لڑا جاسکتا ہے،اس میں تعلیم اور آگہی اہم کردار ادا کرسکتی ہے۔ والدین کا فرض بنتا ہے کہ وہ اپنے بچوں پر کڑی نظر رکھیں اور انہیں نشے جیسی لعنت سے بچانے کے لیے میدان عمل میں آئیں، تاکہ خاندان کسی بھی بڑی اذیت کا سامنا کرنے بچ جائیں۔سختی صرف اسکول ، کالج کے دنوں تک ہی نہیں بلکہ یونیورسٹی کی سطح پر بھی ضروری ہے۔سگریٹ نوشی، شیشہ اور دیگر منشیات کی برائیوں کی روک تھام کے لیے درسگاہوں کے سربراہوں، والدین اور سماجی تنظیموں کو مل کر اقدامات اٹھانے چاہئیں۔طلباء و طالبات کو منشیات کے حوالے سے باضابطہ طور پر گائیڈ لائن دی جائے اور اس کے نقصانات سے آگاہ کیا جائے ،جہاں نوجوانوں کو معاشرتی برائیوں سے دور رکھنا والدین اور اساتذہ کی ذمہ داری ہے، وہیںاہم ذمہ داری حکومت وقت کی بھی ہے، حکام منشیات فروشی کے رجحان کو روکنے کے لیے ہر ممکن وسائل بروئے کار لائیں۔ماہرین نفسیات کہتے ہیں کہ،نوجوانوں کے درمیان نشہ کے بڑھتےہوئے رجحان ،غیر اخلاقی دوستوںکا ساتھ، خاندانی دبائو ، ماں باپ کے جھگڑے ، انٹرنیٹ پر گھنٹوں وقت صرف کرنا اور خاندانی تضادات ہیں۔اس ضمن میں والدین اور اساتذہ کی ذمے داری ہے کہ نوجوانوں سے ان کے مسائل دریافت کریں ، ان کے لئے مسائل حل کریں، پیار و محبت سے سمجھایا اور منشیات کے نقصانات سے آگاہ کیا جائے۔ایک انگریزی مقولہ ہے کہ ’’اگر تم نے دولت کھو دی تو کچھ نہ کھویا، اگرصحت کھو دی تو کسی حد تک کھویا، لیکن اگرکردار کھو دیا، تو سب کچھ کھو دیا‘‘۔ نشہ ایک ایسی لعنت ہے جو انسان کے کردار پر سب سے پہلے اثر انداز ہوتا ہے اور اچھے سے اچھے انسان کو برائی کی طرف راغب کر دیتا ہے۔ نوجوان نسل ہی ہمارے مستقبل کا اثاثہ ہے۔بے روزگار یا ذہنی تناؤ کا شکار نوجوان ، کسی نہ کسی تعمیری سرگرمی میں مصروف رہنے کی کوشش کریں، مطالعہ کریں،اچھے دوستوںاور اساتذہ کے ساتھ وقت گزاریں ۔ کھیلوں میں دلچسپی لیں ،اقبال کے شاہین بنیں اور پہاڑوں کی چٹانوں پر بسیرا کرنے کی ٹھانیں، مایوسی یا ناامیدی کسی مسئلے کا حل نہیں ہے، ان سے وقتی فرار حاصل کرنے کے لیے منشیات کا استعمال نہ کریں۔ منشیات میں مبتلا نوجوانوں کو پیار و محبت اور شفقت سے گھر لوٹنے کی دعوت دیں ۔برے کو برا کہہ کر اس کے حال پر نہیں چھوڑا جاتا بلکہ ہر وقت اصلاح اور برائیوں کی نشاندہی کرتےرہنا چاہیے، واپسی کے لیے دروازے ہمیشہ کھلے رکھیں اور کھلی بانہوں سے قوم کے معماروں کا استقبال کریں ۔