Tag express news

(میڈیا 92 نیوز آن لا ئن) اکسینٹ روم سے تعلق رکھنے والا ایک معروف پاپ بینڈ ہے جن کے پاکستان میں بھی بے شمار مداح ہیں اور یہ بینڈ پاکستان میں متعدد کانسرٹس بھی کر چکا ہے۔

اکسینٹ بینڈ ایک مرتبہ پھر پاکستان میں کانسرٹ کے لیے آ رہا ہے اور اس حوالے سے پاپ بینڈ نے ایک دلچسپ ٹوئٹ کیا۔

معروف پاپ بینڈ نے مائیکرو بلاگنگ سائٹ ٹوئٹر پر پاکستان میں ہونے والے کانسرٹ کا اعلان کرتے ہوئے بتایا کہ اکسینٹ بینڈ لاہور میں 24 نومبر کو کانسرٹ کے لیے آ رہے ہیں۔ پاپ بینڈ نے اس ٹوئٹ میں ڈی جی آئی ایس پی آر میجر جنرل آصف غفور کو بھی ٹیگ کیا اور ان کے ساتھ ایک کپ چائے پینے کی بھی خواہش ظاہر کی۔

(میڈیا 92 نیوز آن لا ئن) پاکستان پیپلز پارٹی کے چیئرمین بلاول بھٹو زرداری نے وزیراعظم عمران خان پر شدید تنقید کرتے ہوئے کہا ہے کہ وہ جمہوریت کی بحالی اور معیشت کی درستگی کی راہ میں رکاوٹ ہیں۔

راولپنڈی میں میڈیا سے گفتگو کرتے ہوئے چیئرمین پیپلز پارٹی کا کہنا تھا کہ ہم سب کا مطالبہ ہے کہ نئے الیکشن کرائے جائیں اور نئے الیکشن کے لیے انتخابی اصلاحات ہونی چاہئیں کیونکہ اس کے بغیر الیکشن کا کوئی فائدہ نہیں، اگر انتخابی اصلاحات نہ ہوئیں تو پھر یہ الیکشن نہیں سلیکشن ہو گا۔

انہوں نے کہا کہ عمران خان سے استعفیٰ لیکر سارے مسائل حل ہو سکتے ہیں کیونکہ وہ جمہوریت کی بحالی، معیشت کی درستی اور میڈیا کی آزادی کی راہ میں رکاوٹ ہیں۔

اس دوارن بلاول بھٹو نے قومی احتساب بیورو (نیب) پر بھی برہمی کا اظہار کرتے ہوئے کہا کہ نیب آمریت کا ادارہ ہے، یہ سیاسی مخالفین کے خلاف استعمال ہوتا ہے۔ ان کا کہنا تھا کہ آج نیب کھلا ہے ہمیں اس انتقامی ادارے کو بند کرنا ہے، اسی وجہ سے حکومت اوردوسرے اداروں کا مؤقف بھی یہی ہے کہ نیب اور معیشت ساتھ نہیں چل سکتے۔

دوسری جانب بلاول بھٹو نے آزادی مارچ میں پیپلز پارٹی کی شمولیت سے متعلق سوال پر جواب دیا کہ ہم تو مولانا کے آزادی مارچ میں بھرپور سہولت فراہم کر رہے ہیں، ہمارے کارکن مولانا صاحب کی مدد اور آزادی مارچ کا استقبال کریں گے۔ انہوں نے مزید کہا کہ میں خود عوامی رابطےکی مہم پر ہوں، 23 اکتوبر کو تھرپارکر میں جلسے سے خطاب کروں گا۔

(میڈیا 92 نیوز آن لا ئن) اسلام آباد: سینٹرل پاور پرچیزنگ کمپنی نے نیشنل الیکٹرک پاور ریگولیٹری اتھارٹی (نیپرا) کو فی یونٹ بجلی 2 روپے 97 پیسے مہنگی کرنے کی درخواست کی ہے۔

ذرائع نیپرا کے مطابق بجلی مہنگی کرنےکی درخواست ستمبر کی فیول پرائس ایڈجسٹمنٹ کی مد میں کی گئی ہے۔

سینٹرل پاور پرچیزنگ کمپنی کی درخواست میں مؤقف اختیار کیا گیا کہ ستمبر میں 13 ارب 62 کروڑ یونٹ بجلی پیدا کی گئی جس کی وجہ سے بجلی پیداوار پر لاگت 70 ارب روپے سے زائد رہی۔ ذرائع کے مطابق نیپرا 20 اکتوبر کو درخواست کی سماعت کرے گا۔

واضح رہے کہ رواں ماہ 8 اکتوبر کو نیپرا نے جولائی کے مہینے کے لیے فیول ایڈجسٹمنٹ چارجز کی مد میں بجلی کی فی یونٹ قیمت میں ایک روپیہ 78 پیسے اضافہ کیا تھا اور مزید اضافے سے عوام پر مہنگائی کا بوجھ مزید بڑھ جائے گا۔

(میڈیا 92 نیوز آن لا ئن) لاہور میں میڈیا سے بات کرتے ہوئے وقار یونس کا کہنا تھا کہ محدود اوورز کی کرکٹ بولرز کے لیے آسان نہیں ہے۔

وقار یونس نے کہا کہ ون ڈے کرکٹ میں دو نئے بالز بھی بولرز کے لیے مشکلات کا باعث ہیں۔

انہوں نے کہا کہ بطور کوچ نئے بولرز کی اسپیڈ اور اس کا اسمارٹ ہونا دیکھنا پڑتا ہے۔

سابق اسپیڈ اسٹار نے کہا کہ خوش قسمت ہوں ٹی ٹوئنٹی کرکٹ نہیں کھیلی کیونکہ اس طرز کی کرکٹ بولرز کے لیے مشکل ہوتی ہے۔

انہوں نے مزید کہا کہ ٹی ٹوئنٹی کرکٹ میں یارکرز زیادہ اہمیت کے حامل ہوتے ہیں۔

پاکستان میں بولنگ ٹیلنٹ کے حوالے سے بات کرتے ہوئے وقار یونس نے کہا کہ نئے ڈومیسٹک فارمیٹ کا پہلا سال ہے، ابتداء میں مشکلات ہوتی ہی، ہمیں نئے ڈومیسٹک فارمیٹ کو وقت دینا ہو گا، مستقبل میں اس کے اچھے نتائج ملیں گے۔

وقار یونس نے کہا کہ انٹرنیشنل کرکٹ میں فٹنس کے بغیر کچھ بھی حاصل نہیں ہوتا

(میڈیا 92 نیوزآن لا ئن) گزشتہ روز نواز شریف کو طبیعت ناساز ہونے پر نیب حکام نے انہیں سروسز اسپتال لاہور منتقل کیا تھا جب کہ ان کے ذاتی معالج ڈاکٹر عدنان کا کہنا تھا کہ نواز شریف کے پلیٹلیٹس 12 ہزار سے بھی کم رہ گئے ہیں۔

دوسری جانب سابق وزیراعظم نواز شریف کے صاحبزادے حسین نواز نے سوشل میڈیا پر ایک رپورٹ پوسٹ کرتے ہوئے والد کو زہر دیئے جانے کا خدشہ بھی ظاہر کیا تھا۔ مسلم لیگ ن کے صدر شہباز شریف نے بھی نواز شریف کی صحت کے حوالے سے جاری بیان میں کہا تھا کہ اگر نواز شریف کو کچھ ہوا تو عمران خان کو قتل کا ذمے دار ٹھہرائیں گے۔

اب ترجمان وزیراعلیٰ پنجاب کی جانب سے جاری بیان میں بتایا گیا ہے کہ وزیراعلیٰ عثمان بزدار نے سروسز اسپتال کی انتظامیہ کو ہدایت کی ہے کہ نواز شریف کو علاج و معالجے کی بہترین سہولیات فراہم کی جائیں۔

وزیراعلیٰ پنجاب نے ہدایت کی ہے کہ علاج کے حوالے سے سابق وزیراعظم نواز شریف کے ذاتی معالج سے بھی مشاورت کی جائے۔ عثمان بزدار نے امید ظاہر کی ہے کہ نواز شریف کے ذاتی معالج بھی اس حوالے سے تعاون کریں گے۔

(میڈیا 92 نیوزآن لا ئن) نیٹ فلیکس پر مختلف فلمیں اور ویب سیریز سے لطف اندوز ہونے والے صارفین اب ہوشیار ہو جائیں کیونکہ نیٹ فلیکس پاس ورڈ شیئرنگ کو بند یا محدود کرنے پر غور کر رہی ہے۔

امریکا کی بین الاقوامی ویڈیو اسٹریمنگ کمپنی نیٹ فلیکس استعمال کرنے والے صارفین لاتعداد فلمیں اور ویب شوز کے عوض کمپنی کو ماہانہ معاوضہ ادا کرتے ہیں۔

ویڈیو اسٹریمنگ سائٹ نیٹ فلیکس اپنے صارفین سے فور اسکرین اکاؤنٹ (یعنی ایسا اکاؤنٹ جسے 4 افراد استعمال کر سکتے ہیں) سروس کے 6 سے 12 ڈالر تک کی رقم لیتا ہے۔

مگر اس فور اسکرین اکاؤنٹ سروس کا فائدہ بے شمار لوگ اٹھاتے ہیں کیونکہ صارفین اکاؤنٹ کا پاس ورڈ اپنے دوست احباب کے ساتھ بھی شیئر کرتے ہیں۔ کمپنی کے چیف پراڈکٹ آفیسر گیگر پیٹر نے ایک وی لاگ میں بتایا کہ وہ اب ایک ایسا طریقہ ڈھونڈ رہے ہیں جس سے ایک صارف کے اکاؤنٹ کا پاس ورڈ ان کے باقی دوست اور خاندان کے افراد استعمال نہیں کر سکیں گے۔

کمپنی کے پراڈکٹ آفیسر نے ایک انٹرویو میں بتایا کہ فی الحال پاس ورڈ شیئرنگ کے مسئلے کے حوالے سے فوری طور پر اقدامات کرنے کے لیے کوئی لائحہ عمل نہیں بنایا مگر ہم اس صورتحال سے نمٹنے کے لیے پاس ورڈ شیئر کرنے والے صارفین کے اکاؤنٹ پر نظرثانی کر رہے ہیں۔

ان کا کہنا ہے کہ اکاؤنٹ کا پاس ورڈ دیگر لوگوں کے ساتھ شیئر کرنا کمپنی کو نقصان پہنچانے کا باعث بن رہا ہے۔ واضح رہے کہ نیٹ فلیکس پر 9 فیصد سے زیادہ صارفین اپنا پاسورڈ شیئر کرتے ہیں، بظاہر یہ تعداد اتنی زیادہ نہیں لگ رہی مگر اس سے نیٹ فلیکس کو لاکھوں ڈالرز کا تقصان ہو رہا ہے۔

(میڈیا 92 نیوزآن لا ئن) خوراک کا انسان کی صحت سے براہ راست تعلق ہوتا ہے، آپ کیا کھاتے ہیں اس کا اندازہ صحت سے بخوبی لگایا جا سکتا ہے، اگر آپ اچھا کھائیں گے تو آپ کی صحت بھی بہتر ہوگی۔

ماہرین کے مطابق ہم اچھی اور صحت مند خوراک کا استعمال کرکے ذہنی تناؤ یعنی “اسٹریس” کی کیفیت پر قابو پا سکتے ہیں۔

غذا میں صحت مند بنانے والی چیزوں کا استعمال کرکے اور وہ چیزیں جو صحت کے لیے مضر ہیں اُن کو خوراک سے نکالنے سے تناؤ کو کم کیا جا سکتا ہے۔

ماہرین خوراک نے 4 ایسی غذائی تبدیلیاں بتائی ہیں جو کہ انسان کے اندر تناؤ کی کیفیت کو کم کرنے میں بہت مددگار ثابت ہوتی ہیں جبکہ ایسی غذا جو کہ صحت کے لیے مضر ہیں ان کا استعمال نا کرنے سے دباؤ کی کیفیت میں کمی لائی جا سکتی ہے۔

ماہرین خوراک نے یہ 4 غذائی تبدیلیاں بتائی ہیں جو کہ انسان کے اندر تناؤ کی کیفیت کو کم کرنے میں بہت مددگار ثابت ہوتی ہیں۔

پھل اور سبزیوں کا زائد استعمال: ماہرین کا کہنا ہے کہ صحت کو بہتر بنانے کے لیے سب سے آسان چیز یہ ہے کہ آپ مختلف اقسام کی سبزیاں اور پھلوں کے استعمال کو بڑھا دیں۔

ہر روز 5 مختلف رنگ کی سبزیاں کھانے کی کوشش کریں اس لیے کہ ہمارے جسم میں پائے جانے والے گڈ بیکٹیریا کے لیے کم سے کم پروسیس شدہ کھانے بہترین ہیں کیونکہ یہ فائبر سے مالا مال ہوتے ہیں۔

چینی کے استعمال سے گریز کریں: اگر آپ تناؤ اور دباؤ کی کیفیت میں مبتلا ہیں اور آپ یہ سمجھتے ہیں کہ آئس کریم یا کچھ میٹھا کھانے سے یہ کیفیت فوراً ٹھیک ہوجائے گی تو یہ بالکل غلط ہے۔

جب آپ چینی کا بہت زیادہ استعمال کرتے ہیں تو آپ کا جسم اضافی گلوکوز جذب کرنے اور خون میں شوگر کی سطح کو منظم کرنے کے لیے انسولین بناتا ہے جس کی وجہ سے جسم کا نظام کہیں نہ کہیں متاثر ہوتا ہے اور اس وجہ سے انسان تھکن اور تناؤ محسوس کرنے لگتا ہے۔

کیفین کا استعمال کم کریں: کیفین چائے، کافی اور چاکلیٹ میں زیادہ مقدار میں پائی جاتی ہے۔ کیفین کا زیادہ استعمال آپ کی نیند متاثر کر سکتا ہے جس کی وجہ سے انسان چڑ چڑا پن اور تناؤ کا شکار ہوجاتا ہے۔

اگر آپ کو محسوس ہو کہ کیفین کا استعمال کرنے سے آپ کے جسم پر منفی اثرات مرتب ہورہے ہیں تو اچھا ہے کہ آپ اس کا استعمال نہ کریں یا آہستہ آہستہ اس کے استعمال کو کم کرنا شروع کردیں۔

بھوک اور تناؤ کا تعلق سمجھیے: کبھی بھی کسی ایسی جگہ بھوکے مت جائیں جہاں آپ کو لگتا ہے کہ آپ پریشانی میں مبتلا ہوسکتے ہیں۔ کسی تناؤ بھری صورتحال میں اگر آپ خالی پیٹ جائیں گے تو یہ منفی جذبات کو بڑھا سکتا ہے۔

اگر آپ کسی ایسی جگہ جارہے ہیں جہاں دباؤ اور تناؤ کی کیفیت پیدا ہوسکتی ہے تو اپنے ساتھ کچھ ایسے اسنیک رکھیں جس کو کھانے سے صحت متاثر نہ ہو۔

(میڈیا 92 نیوزآن لا ئن) کینیڈا کے وزیراعظم جسٹن ٹروڈوکی جماعت اتحادی حکومت بنانےکی پوزیشن میں آگئی لیکن انہیں ایک چھوٹی بائیں بازو کی جماعت کی حمایت کی ضرورت ہو گی۔

کینیڈاکے پارلیمانی انتخابات میں پولنگ کے بعد ووٹوں کی گنتی کا سلسلہ جاری ہے اور ابتدائی نتائج کے مطابق وزیراعظم ٹروڈوکی لبرل جماعت اتحادیوں کے ساتھ مل کر نئی حکومت کی تشکیل کی پوزیشن میں آگئی ہے۔

غیر ملکی خبر رساں ادارے کے مطابق کینیڈا میں عام انتخابات کے لیے پیر کو ہونے والی ووٹنگ کے بعد نتائج کی آمد کا سلسلہ جاری ہے اور اب تک حکمراں جماعت لبرل پارٹی سب سے زیادہ 146 نشستوں کے ساتھ سرفہرست ہے۔

ابتدائی نتائج کے مطابق علیحدگی پسند جماعت بلاک کیوبیکوز 33 نشستیں حاصل کرنے میں کامیاب ہوئی ہے جب کہ کنزرویٹو پارٹی کو 12، نیو ڈیمو کریٹک پارٹی چار اور گرین پارٹی ایک نشست حاصل کرنے میں کامیاب ہوئی۔

اکثریتی حکومت بنانے کے لیے کسی بھی جماعت کو 338 کے ایوان میں 170 نشستیں درکار ہیں۔ حکومت بنانے اور نئی قانون سازی کے لیے جسٹن ٹروڈو کو بائیں بازو کی حزب اختلاف کی جماعتوں پر انحصار کرنا ہو گا۔

پارلیمانی انتخاب میں ایک بار پھر کامیابی حاصل کرنے پر جسٹن ٹروڈو نے سوشل میڈیا کے ذریعے سب کا شکریہ ادا کیا اور لکھا کہ ان کی ٹیم مستقبل میں کینیڈا کے تمام لوگوں کے لیے سخت محنت کرے گی۔

دوسری جانب کوئنز یونیورسٹی میں شعبہ سیاسیات کے پروفیسر جوناتھن روز کا کہنا ہے کہ نیو ڈیمو کریٹک پارٹی کی کارکردگی مایوس کن رہی اور بلاک کیوبیکوز نے انتخابات میں سب کو حیران کیا۔

اُن کا کہنا تھا “میرے خیال میں بلاک کیوبیکوز کی 20 نشستوں پر کامیابی کا امکان تھا لیکن اس نے 30 سے زائد نشستیں حاصل کر کے حیران کر دیا ہے۔ پروفیسر جوناتھن کے بقول، اکثریتی جماعت کے مقابلے میں اتحادی حکومت غیر مستحکم رہتی ہے۔ جسٹس ٹروڈو اور ان کی جماعت لبرل پارٹی کو بلاک کیوبیکوز کی ضرورت نہیں ہے۔

یاد رہے کہ وزیرِ اعظم جسٹن ٹروڈو کو انتخابات سے چند روز ایک پرانی نسل برستانہ تصویر پر شدید تنقید کا سامنا تھا جس میں وہ سیاہ دکھائی دے رہے تھے اور اس پر اُنہیں معافی بھی مانگنا پڑی۔

(میڈیا 92 نیوزآن لا ئن) تھائی لینڈ کے بادشاہ نے اپنی رائل نوبل کنسورٹ سنینات وونگوا جیراپاکڈی کو ان کے عہدے سے برطرف کردیا۔

تھائی لینڈ کے شاہی محل کے اعلامیے کے مطابق تھائی فوج کی میجر جنرل سنینات وونگوا جیراپاکڈی کو نامناسب رویے اور تھائی بادشاہ مہا وجیرا لانگ کورن سے بے وفائی پر عہدے سے ہٹایا گیا جب کہ ان سے رائل نوبل کنسورٹ کا خطاب بھی واپس لے لیا گیا ہے۔

34 سالہ سنینات وونگوا جیراپاکڈی تھائی لینڈ کے 67 سالہ بادشاہ مہا وجیرا لانگ کورن کی رائل نوبل کنسورٹ تھیں اور یہ درجہ بادشاہ کی اہلیہ یا پھر کسی ایسی خاتون کو دیا جاتا ہے جو بادشاہ کے ساتھ تعلقات میں تو ہو لیکن ان کی باقاعدہ شادی نہ ہوئی ہو۔

اعلامیے کے مطابق سنینات وونگوا جیراپاکڈی اپنی حدود سے باہر آرہی تھیں اور خود کو تھائی لینڈ کی ملکہ کے برابر لانے کی کوشش کررہی تھیں ۔

34 سالہ سنینات وونگوا کو تھائی فوج میں میجر جنرل کا عہدہ بھی دیا گیا تھا جہاں انہوں نے نرس کی حیثیت سے خدمات انجام دینا شروع کی تھی اس کے علاوہ وہ ایک تربیت یافتہ پائلٹ بھی ہیں۔

بادشاہ مہا وجیرا لانگ کورن نے رواں برس جولائی میں ملکہ ستھیدا سے اپنی چوتھی شادی کے دو ماہ بعد سنینات وونگوا جیراپاکڈی کو باضابطہ طور پر رائل نوبل کنسورٹ کا درجہ دیا تھا۔

سنینات وونگوا تھائی بادشاہت کی 100 سالہ تاریخ میں رائل نوبل کنسورٹ کا درجہ پانے والی پہلی خاتون تھیں۔

تھائی شاہی اعلامیے کے مطابق سنینات وونگوا نے ستھیدا کو ملکہ بننے سے روکنے کیلئے ہر ممکن کوشش اور مزاحمت کی تھی اور خود کو ملکہ بنانے کیلئے دباؤ ڈالا تھا تاہم اس وقت تھائی بادشاہ نے کشیدگی کم کرنے کیلئے انہیں رائل کنسورٹ کا اعزاز دے دیاتھا تاکہ ان کی وجہ سے باشاہت پر کسی قسم کا کوئی اثر نہ پڑے۔

لیکن اس کے باوجود سنینات وونگوا کی جانب سے بادشاہ اور ملکہ کے خلاف مزاحمت دکھائی گئی ا ور انہوں نے اپنے اختیارات کا بھی غلط استعمال کیا۔

بادشاہ مہا وجیرا لانگ کورن نے رواں برس جولائی میں ملکہ ستھیدا سے اپنی چوتھی شادی کی ،فوٹو:فائل
سنینات وونگوا کی ایسی ہی نامناسب حرکات اور رویے نے بادشاہ کو یہ سوچنے پر مجبور کیا کہ خاتون اس عہدے کیلئے مناسب نہیں ہے۔

یاد رہے کہ مہاوجیرالانگ کورن 2016 میں اپنے والد بھومیبول ادولیاج کے انتقال کے بعد بادشاہ بنے تھے۔

تھائی بادشاہ اب تک چار شادیاں کرچکے ہیں اور ان کے مجموعی طور پر 7 بچے ہیں۔

(میڈیا 92 نیوز آن لا ئن) بھارت اپنے آرمی چیف کی جانب سے لائن آف کنٹرول(ایل او سی) پر مبینہ کیمپوں کو نشانہ بنانے کے بیان کے بعد پاکستان کی پیشکش پر ٹال مٹول سے کام لینے لگا۔

بھارت کی جانب سے فرار کی کوششوں پر ترجمان پاک فوج نے بھارتی سفارت خانے کو ایک اور آپشن دیا ہے۔

ترجمان پاک فوج میجر جنرل آصف غفور کا کہنا ہے کہ بھارت کے پاس اپنے آرمی چیف کے جھوٹے دعوے کو درست ثابت کرنے کیلئے کوئی جواز نہیں ہے۔

انہوں نے کہا کہ اگر بھارتی سفارت خانے کے اہلکار ایل او سی پر نہیں جانا چاہتے تو وہ ہمارے دفتر خارجہ کو وہ جگہ بتادیں جہاں ان کے بقول بھارت نے مبینہ کیمپوں کو نشانہ بنایا ہے، ہم کل اس مقام پر غیر ملکی سفارتکاروں اور میڈیا کو لے جائیں گے تاکہ وہ اصل حقائق جان سکیں۔

بھارت کے پاس اپنے آرمی چیف کا دعویٰ سچ ثابت کرنے کیلئے کچھ نہیں، دفتر خارجہ
ترجمان دفتر خارجہ ڈاکٹر محمد فیصل کا کہنا ہے کہ ڈی جی آئی ایس پی آر کی پیشکش پر بھارتی سفارت خانے کی جانب سے اب تک کوئی جواب نہیں آیا جو یہ ظاہر کرتا ہے کہ ان کے پاس اپنے آرمی چیف کے غلط دعوے کو درست ثابت کرنے کیلئے کچھ نہیں ہے۔

ڈاکٹر محمد فیصل نے امید ظاہر کی ہے کہ بھارت ہماری پیشکش کا جلد جواب دے گا۔

واضح رہے کہ گذشتہ روز بھارتی فوج کی لائن آف کنٹرول (ایل او سی) پر بلااشتعال فائرنگ کے نتیجے میں پاک فوج کا جوان اور 5 شہری شہید ہوگئے تھے۔

بھارت کی جانب سے لائن آف کنٹرل پر بلا اشتعال فائرنگ اور معصوم شہریوں کو نشانہ بنائے جانے کے بعد بھارتی آرمی چیف نے ایل او سی پر تین مبینہ کیمپوں کو نشانہ بنانے کا مضحکہ خیز دعویٰ کیا تھا۔

بھارت کے دعوے پر پاک فوج کے ترجمان ڈی جی آئی ایس پی آر میجر جنرل آصف غفور نے بھارتی آرمی چیف کے دعوے کو مایوس کن قرار دیتے ہوئے کہا تھا کہ جب وہاں کوئی کیمپ ہی نہیں، تو کارروائی کیسی ؟

ڈی جی آئی ایس پی آر نے پیشکش کی تھی کہ پاکستان میں بھارتی سفارت خانہ کسی بھی غیر ملکی سفارت کار اور میڈیا کے ساتھ دورہ کر کے اس دعوے کو ثابت کر کے دکھائے۔

ڈی جی آئی ایس پی آر نے کہا کہ پلوامہ واقعے کے بعد بھارتی سینیئر عسکری قیادت مسلسل ایسے جھوٹے دعوے کر چکی ہے جو خطے کے امن کیلئے خطرہ ہیں، بھارتی فوج کی جانب سے ایسے جھوٹے دعوے داخلی فائدے کیلئے کیے جا رہے ہیں جو پیشہ وارانہ عسکری اخلاقیات کے منافی ہیں۔