Tag geo news lahore

اسلام آباد(وقت نیوز آن لائن)وزیراعظم عمران خان کے دورہ ملائیشیا کا مشترکہ اعلامیہ جاری کردیا گیا۔
جاری اعلامیہ میں کہا گیا ہے کہ وزیراعظم عمران خان نے 3 سے 4 فروری تک ملائیشیا کا دورہ کیا،دورہ دونوں ممالک کے درمیان سٹرٹیجک تعلقات کو مزید مضبوط بنانے کیلئے تھا،وزیراعظم عمران خان کا گرمجوشی سے استقبال کیاگیا۔اعلامیہ میں کہاگیاہے کہ ون آن ون اور وفود کی سطح پر دونوں ممالک کے درمیان بات چیت ہوئی ،دونوں ممالک نے ہائی لیول رابطے تمام شعبوں میں تعاون بڑھانے پر اتفاق کیا،دونوں ممالک میں تعلقات سٹرٹیجک پارٹنرشپ میں تبدیل ہو چکے ہیں ،اعلامیہ میں مزید کہاگیا ہے کہ مختلف شعبوں میں دوطرفہ تعاون نئی بلندیوں کو پہنچ چکا ہے ،دونوں وزرائے اعظم نے اعلیٰ سطح پر رابطوں کو جاری رکھنے پر اتفاق کیا۔اعلامیہ میں کہاگیا ہے کہ اسلام آبادمیں چوتھے مشترکہ کمیشن کااجلاس بلانے کافیصلہ کیا ہے ،کمیشن اقتصادی سائنس اورفنی شعبے میں تعاون کیلئے پہلے سے موجود ہے ۔

مظفرآباد(وقت نیوز آن لائن)صدرآزادکشمیر سردار مسعود خان نے یوم یکجہتی کشمیر پر اپنے پیغام میں کہاہے کہ دنیا کی کوئی طاقت کشمیریوں کو آزادی سے نہیں روک سکتی ۔
صدرآزادکشمیر سردارمسعود خان نے اپنے پیغام میں ہے کہ کشمیرمیں نوجوانوں کاقتل عام کیاگیا بچوں کو اغوا کیا گیا،9 لاکھ بھارتی قابض فوج کشمیریوں کو دہشتگردی کانشانہ بنا رہی ہے،کشمیریوں کا ساتھ دینے پر پاکستانی عوام کے مشکور ہیں ۔ وزیراعظم آزادکشمیر راجہ فاروق حیدر کاکہنا ہے کہ پانچ اگست کے بعداقدامات کشمیریوں نے مسترد کردیئے ،کشمیری عوام نے بھارتی مظالم کے سامنے سر نہیں جھکایا،راجہ فاروق حیدر کاکہنا ہے کہ کشمیر کے عوام نے بھارتی مظالم پر سرفخر سے بلند رکھا۔

لاہور(وقت نیوز آن لائن ) حکومتی جماعت تحریک انصاف اور ان کی اتحادی جماعت مسلم لیگ (ق) کے مابین برف نہ پگھل سکی اور ق لیگی قیادت نے وفاقی وزیرشفقت محمود سے اتحاد کے معاملے پر بات کرنے سے معذرت کرلی۔ ایکسپریس نیوزکے مطابق وزیر اعظم عمران خان کی قائم کردہ رابطہ کمیٹی کے رکن وفاقی وزیر شفقت محمود نے اسپیکر پنجاب اسمبلی چوہدری پرویز الہی سے ملاقات کی، جس میں اتحادی حکومت کے تحفظات اور باہمی دلچسپی پر بات چیت کی گئی۔

چینل ذرائع کا کہنا ہے کہ اتحادی حکومت کے الجھے ملاقات کی اندرونی کہانی سامنے آگئی، وفاقی وزیر شفقت محمود اور اسپیکر پنجاب اسمبلی چوہدری پرویز الہی کے درمیان ملاقات میں برف نہ پگھل سکی، شفقت محمود، مسلم لیگ (ق) کی قیادت کو نئی کمیٹی سے مذاکرات کے لئے قائل نہ کرسکے، مسلم لیگ (ق) کی قیادت نے نئی حکومتی کمیٹی کے رکن شفقت محمود سے اتحاد کے معاملات پر بات چیت سے گریز کیا اور کہا کہ وفاقی وزیر کی ملاقات ذاتی حیثیت میں ہوئی۔ ذرائع کا کہنا ہے کہ مسلم لیگ (ق) اپنے مطالبے پر ڈٹ گئی ہے اور ان کی قیادت کا کہنا ہے کہ پہلے جہانگیر ترین اور پرویز خٹک کی کمیٹی میں طے شدہ معاملات پر عملدرآمد کیا جائے پھر نئی کمیٹی سے بات ہو گی، نئے سرے سے زیرو سے دوبارہ اتحاد کے معاملات پر بات نہیں کر سکتے، جہانگیر ترین کی کمیٹی میں جو طے ہوا اس پر عمل کیا جائے، شفقت محمود سے ملاقات حکومتی کمیٹی کے رکن کی حیثیت سے نہیں ذاتی حیثیت میں ہوئی۔

دوسری جانب ملاقات کے بعد شفقت محمود نے اکیلے ہی میڈیا سے بات کی اور ان کے ساتھ مسلم لیگ (ق) کا کوئی رہنما شریک نہ ہوا۔ وزیراعظم کی جانب سے قائم کمیٹی کے آج پہلے رابطے کے حوالے سے وفاقی وزیر شفقت محمود کا کہنا تھا کہ چودھری پرویز الہٰی سے ون ٹو ون ملاقات ہوئی ہم ان سے بہت کچھ سیکھتے ہیں اور ملاقات اعزاز کی بات ہے۔
وفاقی وزیر نے کہا کہ (ق) لیگی قیادت سے انتہائی خوشگوار ماحول میں ملاقات ہوئی، ہمارا تحریک انصاف سے ہمارا کچھ لو اور کچھ دو کا رشتہ نہیں، ہماری سوچ ایک ہے، ہمارا ساتھ اب بھی ہے اور آئندہ بھی رہے گا، مسلم لیگ (ق) کے جو خدشات تھے وہ بڑی حد تک حل ہو چکے ہیں۔

شفقت محمود کا کہنا تھا کہ مسلم لیگ (ق) کو خدشہ تھا کہ نئی کمیٹی بنی ہے تو دوبارہ شروع سے بات ہوگی، ہماری کمیٹی کی مسلم لیگ (ق) کی کمیٹی کے ساتھ ملاقات جلد ہوگی، نئی کمیٹی بننے کا مقصد پرانے معاہدوں کو زیربحث لانا نہیں تھا، ق لیگ سے کیے گئے پرانے معاہدوں میں کوئی تبدیلی نہیں ہوگی بلکہ جو معاہدے کیے ہیں انہیں ہی ساتھ لے کر چلیں گے، جو معاملات ہیں ان پر تفصیل سے بات چیت ہو گی، کمیٹیاں جب بیٹھیں گی تو معاہدوں پر عملدرآمد پر بات ہو گی۔

(ایمرا نیوزآن لائن) فرض کیجئے آج چین میں چھائی کرونا کی قیامت خیزی کے دوران وزیراعظم کے معاون خصوصی برائے صحت ظفر مرزا کا لخت جگر، بھائی، بھتیجا، کسی دوست ،عزیز کا خونی رشتہ بیجنگ، شنگھائی، سینکیانگ،ارمچی، شیانزن، تیانجن گینگزو یا ہینگزو میں پھنسا ہوتا تو کیا ہوتا ؟ کیا موصوف پھر بھی وہ وسیع تر قومی مفاد اور خطے کی بھلائی کیلئے انہیں چین سے واپس نہ لانے کا موقف اختیار کرتے؟ چلئے چھوڑیئے ، اگر یہ صورتحال وزیر اعظم کے کسی بھانجے، جہانگیر ترین کے کسی دورکے رشتہ دار، شاہ محمود قریشی پر جاں نچھاور کرنے والےان کے کسی ہردلعزیز مرید پیروکار، شہزاد مرزا کےصاحبزادے، فواد چودھری کے عزیز، مراد سعید کے حلقہ کے سرگرم کارکن کے ساتھ پیش آتی تو کیا وہ اپنے بیانیہ پر قائم او رموجود رہ پاتے؟
یقین جانئے صورتحال بدلی ہوتی تو ظفز مرزا کو وسیع تر مفاد یاد ہوتا نہ خطے کی بھلائی، ایسی صورتحال میں وہ کبھی نہ کہہ پاتے کہ ملک اور خطے کے مفاد میں چین میں پھنسے پاکستانیوں کو وطن نہ لانے کا فیصلہ کیا ہے،اگر ایسا ہوتا تو پھر وقت کے جغادری کو نیوزی لینڈ ، امریکہ، برطانیہ کی مثالیں یاد آجاتیں کہ جنھوں نے فوری طور پر اپنے شہریوں کو چین کے قیامت خیز حالات سے نکالنے کا فیصلہ کیا،اگر ایسا ہوتا تو عام پاکستانیوں کے لئے سوئی ڈیزاسٹر منیجمنٹ اتھارٹی بھی جاگ اٹھتی، ملک میں ایمرجنسی نافذ ہو جاتی، دورکسی صحرا میں یا پہاڑوں پر آئی سولیشن سینٹر ڈکلیئر کیا جاتا اور چین میں پھنسے بے چارے پاکستانیوں کوانسانی ہمدردری اور قومی فریضہ کی ادائیگی کے تحت وہاں منتقل کردیا جاتا، لیکن بدقسمتی سے ایسا نہیں ہے۔۔۔
کرونا کے عذاب میں گرفتار چین میں پھنسے پاکستانیوں میں سے کوئی ایک بھی ظفر مرزا کا قریبی ہے ناوزیر اعظم کا بھانجا، نا جہانگیر ترین کا رشتہ دار اورنا ہی شاہ محمود قریشی کا مرید ہے ۔ پھنسے ہوئے پاکستانیوں میں کوئی فواد چودھری کا عزیز یا مراد سعید کے حلقے کا سرگرم کارکن بھی نہیں،یہ وہ عام پاکستانی ہیں جو اپنی آنکھوں میں چھبتے بہتر زندگی کے خوابوں کی تعبیر کیلئے سستی مگر معیاری اعلیٰ تعلیم کی بھٹی میں خود کو جھونکنے کیلئے چین میں عرصے سے مقیم ہیں،ان میں وہ بھی شامل ہیں جو ملک کے بازاروں کو سستی چینی ٹیکنالوجی سے سجانے اور بال بچوں کیلئے روٹی روزی کا بندوبست کرنےسرحد پار گئے ہیں۔ معاون خصوصی کو شاید بہت کم لوگ ہی جانتے ہوں مگرقوم فی الحال ان کی پہچان نہیں بھولی جنھوں نے اقتدارسے پہلے تبدیلی کے نام پر لمبے لمبے بھاشن دیئے، سہانے خواب دکھا ئے اورایک نئے پاکستان کا مژدہ جانفزا سنایا، یہی بازی گر آج کل اسلام آباد کے ایوانوں سے قوم کو ریاست مدینہ کی گونج سنا رہے ہیں ،قوم کے ان کرم فرماؤں سے یہ پوچھنا تو بنتا ہے کہ بدترین حالات میں پھنسے پاکستانی کیا خود ساختہ ریاست مدینہ کی ذمہ داری نہیں؟
اپوزیشن کی مخالفت کے باوجود اور حکومت کے اس اقدام کو اقدام قتل کے برابر قرار دینے پر بھی وزیر اعظم کے معاون خصوصی ظفر مرزا اپنے موقف پر ڈٹے نظر آئے ،گزشتہ روز انہوں نے سینٹ کمیٹی کے روبرو کہا عالمی ادارہ صحت نے خبردار کیا ہے کہ چین میں موجود پاکستانی شہریوں کو وطن واپس لائے تو کورونا وائرس کےپھیلاؤ پر قابو پانا ممکن نہیں رہے گا۔وسیع تر قومی مفاد میں قوم کے بچوں کو موت کے جنگل میں بے آسرا چھوڑنے والے ان بھاشن بازوں کو یہ بتانا ضروری ہے کہ ڈبلیوایچ اونےسنگین وائرس کےباوجود چین سےسرحدوں کی بندش کوغیرضروری قراردیاہے۔عالمی ادارہ صحت کاموقف ہےکہ اگرچین کے ساتھ سرکاری سرحدیں بند کردی گئیں تو وائرس سےمتاثرہ افراد کی ٹریکنگ مشکل ہو جائیگی۔دوسری جانب امریکہ،برطانیہ اوردیگر یورپی ممالک اپنےشہریوں کوتمام خطرات کے باوجود باہر نکال رہے ہیں۔اپنےشہریوں کو سنگین صورتحال سےباہر نکالنےوالوں میں نیوزی لینڈ،انڈونیشیا،فلپائن،جاپان،آسٹریلیابھی شامل ہیں۔عرب ٹی وی الجزیرہ نےاپنی ایک رپورٹ میں نشاندہی کی ہےکہ پاکستان کی حکومت نے تعلیم اورکاروبارکیلئےچین میں پھنسے30ہزارپاکستانیوں کو مہلک وائرس سے بچانے کیلئے تاحال فیصلہ نہیں کیا۔
عالمی سیاست کے خدوخال میں دوسرے ملکوں کی پالیسیوں کے جائزے کے بعد ہمیں یہ بات اچھی طرح سمجھ لینی چاہئے کہ اگر حکومت نے چین میں پھنسے پاکستانیوں کو وطن واپس لانے کا فیصلہ نہ کیا اور انہیں حالات کے رحم و کرم پر چھوڑ دیا تویقین جانئے دنیا انسانی حقوق اور فلاحی ریاست کے معاملے میں ہم پر کبھی بھی اعتبار نہیں کریگی۔کرونا کا خطرہ بڑا ہو یا چھوٹا فی الوقت اقوام عالم کا چلن انخلا ہے۔اس لئے ہمالیہ سے بلند پاک چین دوستی اوراعتبار کے مضبوط رشتے کے باوجود ہمیں پھنسے پاکستانیوں کوواپس لانا ہے،حکمران یاد رکھیں یہ اقدام جہاں دنیا کے ساتھ قدم سے قدم ملا کر چلنے کے برابر ہوگا ،وہیں اپنے پیاروں کی آس میں نم دیدہ مائیں ، بہنیں اور بیٹیوں کے چہروں پر مسکان لانے کا انتظام بھی ۔

واشنگٹن(وقت نیوز آن لائن) : امریکا جانے والی خواتین اور حضرات بسا اوقات ٹرانسپورٹ سیکیورٹی ایسوسی ایشن (ٹی ایس اے) کے سخت رویے کی شکایت کرتے ہیں۔ اس کی وجہ یہ ہے کہ امریکا آنے والے افراد عجیب وغریب طریقے سے ممنوعہ اشیا لانے کی کوشش کرتے ہیں اور دھر لیے جاتے ہیں۔ ثبوت کے طور پر ٹی ایس اے نے اپنے آفیشل انسٹا گرام اکاؤنٹ پر بعض تصاویر جاری کی ہیں جنہیں دیکھ کر حیرانی ہوتی ہے۔ ان تصاویر میں دیکھا جاسکتا ہے کہ مسافر کتنی چالاکی سے انتہائی خوفناک اشیا اسمگل کرنے کی کوشش کرتے ہیں۔

ملزم نے بالکل نیا لیپ ٹاپ خریدا اور اس کے کی بورڈ کے نیچے سیریئل یا دلیے کی شکل کا ایک مواد چھپایا۔ ہمیں تصویر میں یہ ایک بے ضرر شے لگتی ہے لیکن اصل میں یہ ڈائنامائٹ کے ٹکڑے ہیں!
اس تصویر کو دیکھئے کے پھولوں کے گلدستے میں کس طرح ایک خنجر چھپایا گیا ہے۔
ٹی ایس اے کا اصرار رہتا ہے کہ مسافروں کے پاس اگر آتشیں ہتھیار یا بارود ہے تو پہلے ہی بتادیں۔ اب اس تصویر میں دیکھیں تو مجرم نے کس طرح ٹائروں کے اندر پسٹل ، گولیاں اور میگزین چھپائے ہیں۔
لپ اسٹک جیسی بے ضرر شے کو تبدیل کرکے ایک تیزدھارچھری میں تبدیل کیا گیا ہے اور یوں ٹی ایس اے کے لوگوں نے اسے ضبط کرلیا۔
درج ذیل تصویر میں ننجا کے ہولناک ہتھیار اور خنجر دکھائی دے رہے ہیں اور یہ مسافر کے ہینڈ کیری سے ملے ہیں۔ جب نیچے موجود فون ٹی ایس اے افسر نے دیکھا تو اسے مشکوک محسوس ہوا۔ غور سے دیکھیں اس کے سرے پر دو ابھار نظر آرہے ہیں اور جو ظاہر کرتے ہیں کہ یہ الیکٹرک گن یا ٹیسر ہے نہ کہ فون۔ اس مشکوک شے پر مجرم گرفتار ہوگیا ہے۔

لاہور(وقت نیوز آن لائن)مریم نوازکی بیرون ملک جانے کی اجازت کیلئے درخواست پر سماعت ہائیکورٹ کے دو رکنی بنچ کی عدم دستیابی کی وجہ سے آج نہیں ہوگی۔
تفصیلات کے مطابق مسلم لیگ ن کی نائب صدر مریم نوازنے ای سی ایل سے نام کے اخراج کیلئے ہائیکورٹ سے رجوع کر رکھا ہے، مریم نواز کی بیرون ملک جانے کی اجازت کیلئے درخواست پر سماعت آج ہونا تھی تاہم دو رکنی بنچ کی عدم دستیابی کی وجہ سے آج نہیں ہوگی،مریم نواز کی درخواست پر سماعت کیلئے نئی تاریخ کا اعلان بعد میں کیا جائے گا۔

کراچی (وقت نیوز آن لائن) : رکشا مکینک کی چوری کی وارداتوں سے تنگ بھائی بہن نے سنگین قدم اٹھایا۔ کراچی کے علاقے کورنگی میں گلا کٹی لاش ملنے کا معمہ حل، سگے بھائی کو قتل کرنے والے بھائی بہن کو گرفتار کرکے آلہ قتل برآمد کر لیا گیا۔تفصیل کے مطابق کراچی کے علاقے کورنگی میں گلا کٹی لاش ملنے کا معمہ حل ہو گیا ہے۔ چار روز قبل مقتول عابد کی لاش رکشے سے ملی تھی۔ پولیس نے مقتول کے قتل میں ملوث سگے بھائی بہن کو گرفتار کرلیا ہے۔
پولیس کے مطابق ملزمان نے بیان میں قتل کی وجہ بھی بتا دی اور کہا ہے کہ مقتول عابد عادی چور تھا، شک سے بچنے کیلئے چوری کی وارادتوں میں اپنی بہن ثمرین کو زبردستی شریک کرتا تھا۔ عادتوں سے تنگ آ کر بھائی کو گلا کاٹ کر قتل کیا۔پولیس کے مطابق ملزمان کے قبضے سے آلہ قتل برآمد کر لیا گیا ہے جبکہ ملزم عامر، کامران اور ثمرین کے خلاف مقدمہ درج کر کے مزید تفتیش کی جا رہی ہے۔

اسلام آباد(وقت نیوز آن لائن)سپریم کورٹ میں پنجاب56 کمپنیاں مبینہ کرپشن و بے ضابطگیوں سے متعلق کیس میں چیف جسٹس گلزاراحمد نے ریمارکس دیتے ہوئے کہا کہ کسی زمانے میں ایسٹ انڈیا کمپنی چلاکرتی تھی ،آخر میں اس ایسٹ انڈیا کمپنی نے کیا کیا ،آپ بھی ایسٹ انڈیا والی چیزیں شروع کررہے ہیں ،پنجاب حکومت کو کافی وقت مل گیاہے اب اس مسئلے کو حل کرے ۔
تفصیلات کے مطابق سپریم کورٹ آف پاکستان میں پنجاب 56 کمپنیاںمبینہ کرپشن وبے ضابطگیاں کیس کی سماعت ہوئی،پنجاب حکومت نے 56 کمپنیوں میں سے غیرضروری کمپنیوں کو ختم کرنے کافیصلہ کیا ہے،ایڈووکیٹ جنرل نے حکومت پنجاب کے فیصلے سے عدالت کو آگاہ کردیا،ایڈووکیٹ جنرل نے کہا کہ جن کمپنیوں کی ضرورت نہیں انہیں بند کردیا جائے گا،چیف جسٹس گلزاراحمد نے استفسار کیا کہ تمام کمپنیوں کوبند کیوں نہیں کررہے ؟،کیاپنجاب حکومت اپنے قوانین پر کمپنیوں کے ذریعے عمل کروائے گی ۔چیف جسٹس پاکستان نے ریمارکس دیتے ہوئے کہا کہ کسی زمانے میں ایسٹ انڈیا کمپنی چلاکرتی تھی ،آخر میں اس ایسٹ انڈیا کمپنی نے کیا کیا ،آپ بھی ایسٹ انڈیا والی چیزیں شروع کررہے ہیں ،پنجاب حکومت کو کافی وقت مل گیاہے اب اس مسئلے کو حل کرے ۔چیف جسٹس گلزاراحمد نے کہاکہ سپریم کورٹ نے کچھ کمپنیوں کے سربراہان سے پیسے واپس لینے کا حکم دیاتھا،کچھ لوگوں نے عدالتی فیصلے کے باوجود تنخواہیں اورمراعات واپس نہیں کیں۔پراسیکیوٹرجنرل نیب نے کہا کہ جن لوگوں نے پیسے واپس نہیں کئے ان کیخلاف ریفرنس دائر کردیئے ہیں ،سپریم کورٹ نے کیس کی سماعت ایک ماہ تک ملتوی کردی۔

(وقت نیوز آن لائن) باشعور قومیں اپنے محسنین کی خدمات کو کبھی فراموش نہیں کرتیں بلکہ ہمیشہ یاد رکھتی ہیں۔ تحریک پاکستان کے بانیوں میں سے ایک اور پاکستان کا نام تجویز کرنے والے چوہدری رحمت علی حقیقی معنوں میں پاکستان کے ہیرو اور محسن ہیں، جنہوں نے 1915ءمیں پہلی مرتبہ اسلامیہ کالج لاہور میں بزم شبلی کے افتتاحی اجلاس میں یہ تجویز پیش کی تھی کہ ہندوستان کے شمالی علاقوں کو ایک مسلم ریاست میں تبدیل کردیا جائے۔ آپ نے یہ نظریہ پیش کرتے ہوئے فرمایا”ہندوستان کا شمالی منطقہ اسلامی علاقہ ہے ، ہم اسے اسلامی ریاست میں تبدیل کریں گے ، لیکن یہ اس وقت ہو سکتا ہے جب اس علاقے کے باشندے خود کو باقی ہندوستان سے منقطع کر لیں۔ اسلام اور خود ہمارے لئے بہتری اسی میں ہے کہ ہم ہندوستانیت سے جلد سے جلد جان چھڑا لیں“ ۔
چودھری رحمت علی 16نومبر1897ءمیں مشرقی پنجاب کے ضلع ہوشیار پور کے گاﺅں مو ہراں میں ایک متوسط طبقے کے زمیندار حاجی شاہ گجر کے ہاں پیدا ہوئے، ابتدائی تعلیم دینی مکتب سے حاصل کی ، جبکہ میٹرک اینگلو سنسکرت ہائی اسکول جالندھر سے کیا۔ 1914ءمیں مذید تعلیم کےلئے لاہور تشریف لائے اور اسلامیہ کالج لاہور میں داخلہ لیا۔ اسلامیہ کالج کے مجلے ”دی کریسنٹ “کے ایڈیٹر اور طلباءسے متعلق کئی بزموں کے عہدیدار رہے، دی فادرلینڈ آف پاک نیشن، مسلم ازم اور انڈس ازم کتابچے لکھے۔
دوران طالب علمی اسلامیہ کالج میں بزم شبلی کی بنیاد رکھی کیونکہ وہ مولانا شبلی سے بہت متاثر تھے اور پھر اس بزم کے پلیٹ فارم سے1915ءمیں تقسیم ہند کا نظریہ پیش کیا۔ 1918ءمیں بی اے کرنے کے بعد جناب محمد دین فوق کے اخبار کشمیر گزٹ میں اسسٹنٹ ایڈیٹر کی حیثیت سے اپنے کیئریر کا آغاز کیا ۔ 1928ءمیں ایچی سن کالج میں لیکچرار مقرر ہوئے۔کچھ عرصہ بعد انگلستان تشریف لے گئے جہاں کیمبرج اور ڈبلن یونیورسٹیوں سے قانون اور سیاست میں اعلیٰ ڈگریاں حاصل کیں۔ اس طرح 1933ءمیں انہوں نے برصغیر کے طلباءپر مشتمل ایک تنظیم پاکستان نیشنل لبریشن موومنٹ کے نام سے قائم کی۔ 1933 ءمیں چودھری رحمت علی نے دوسری گول میز کانفرنس کے موقع پر اپنا مشہور کتابچہ ” نائو آر نیور“ ( اب یا کبھی نہیں) شائع کیا جس میں پہلی مرتبہ لفظ پاکستان استعمال کیا گیا، جو تحریک پاکستان کے قلعے کی آ ہنی دیوار ثابت ہوا ، اور برصغیر کے مسلمان و دیگر اقوام لفظ ”پاکستان“ سے آشنا ہوئے۔
آپ کے مطابق آپ نے یہ نام پنجاب (پ) افغانیہ (ا) کشمیر (ک) سندھ (س) اور بلوچستان (تان) سے اخذ کیا جہاں مسلمان 1200 سال سے آباد تھے، اسی وجہ سے انہیں دنیا کا پہلا پاکستانی کہا جاتا ہے۔اس کے علاوہ انہوں نے پاکستان، بنگلستان اور عثمانستان کے نام سے تین ممالک کا نقشہ بھی پیش کیا۔پاکستان میں کشمیر، پنجاب ، دہلی سمیت، سرحد، بلوچستان اور سندھ شامل تھے۔ جبکہ بنگلستان میں بنگال، بہار اور آسام کے علاقے شامل تھے۔ اس کے علاوہ ریاست دکن کو عثمانستان کا نام دیا۔ انہوں نے 1935ءمیں ایک ہفت روزہ اخبار”پاکستان“ کیمبرج سے جاری کیا، اور اپنی آواز پہنچانے کے لئے جرمنی اور فرانس کا سفر کیا اور جرمنی کے ہٹلر سے انگریزوں کے خلاف مدد کا وعدہ لیا۔ اس کے علاوہ اسی سلسلہ میں امریکہ اور جاپان وغیرہ کے سفر بھی اختیار کئے۔
چودھری رحمت علی 23مارچ 1940 ءکو آل انڈیا مسلم لیگ کے چو نتیسویں سالانہ اجلاس میں شرکت کے لئے لاہور تشریف لانا چاہتے تھے لیکن چند روز قبل خاکساروں کی فائرنگ کی وجہ سے اس وقت کے وزیر اعلیٰ پنجاب سکندر حیات نے چودھری رحمت علی کے پنجاب میں داخلے پر پابندی عائد کر دی۔ بالاآخر 14 اگست 1947ءکو چوہدری رحمت علی کے تجویز کردہ نام کو تعبیر مل گئی، پاکستان معرض وجود میں آگیا، مگرآپ پاکستان کی جغرافیائی حیثیت سے مطمئن نہ تھے۔ اپریل 1948ءمیں آپ پاکستان تشریف لائے لیکن قائد اعظم کی وفات کے بعد مسلم لیگی قیادت کے روئیے سے مایوس ہوکر واپس انگلستان لوٹ گئے جہاں 29جنوری1951ءکو نمونیہ کے مرض میں مبتلا ہو گئے اور 3 فروری کے دن شدید بیماری کی حالت میں کیمبرج کے ایک ہسپتال میں غریب الوطنی، ناداری اور بیماری کے عالم میں وفات پائی۔
چودھری رحمت علی کا جسد خاکی انگلستان کے شہر کیمبرج کے قبرستان میں امانتًا دفن ہے۔ چوہدری رحمت علی عالم اسلام کی بڑی اہم شخصیت تھے ان کی لازوال خدمات ، محنت اور جدو جہد کی وجہ سے آج اسلامی جمہوریہ پاکستان کے کروڑوں مسلمان آزادی کا سانس لے رہے ہیں۔

اسلام آباد(وقت نیوز آن لائن)پاکستان اور آئی ایم ایف کے درمیان مذاکرات آج شروع ہوں گے۔آئی ایم ایف کا وفد گزشتہ روز پاکستان پہنچاتھا۔
میڈیارپورٹس کے مطابق 6 ارب ڈالر کی تیسری قسط کے حوالے سے مذاکرات کیلئے آئی ایم ایف کا وفد گزشتہ روزپاکستان پہنچ گیاتھا ،پاکستان اور آئی ایم ایف کے درمیان مذاکرات آج سے شروع ہوں گے۔ ذرائع کاکہنا ہے کہ آئی ایم ایف وفد مذاکرات میں پاکستانی معیشت کاسہ ماہی جائزے لے گا،آئی ایم ایف حکام مختلف وزارتوں اورمحکموں کی کارکردگی کاجائزہ لیں گے،آئی ایم ایف وفد توانائی اور ٹیکس اصلاحات کا جائزہ لے گا۔ ذرائع کامزید کہنا ہے کہ آئی ایم ایف وفد حکومتی معاشی ٹیم سے بھی ملاقاتیں کرے گا،واضح رہے کہ آئی ایم ایف قرض پروگرام کے تحت پاکستان کو ایک ارب44 کروڑ ڈالر مل چکے ہیں ۔