Tag hollywood

بھارت(ایمرا نیوزآن لائن) کے دارالحکومت نئی دہلی میں کانگریس کی جانب سے نکالی گئی ریلی میں ایک سیاسی رہنما کی زبان ہی پھسل گئی اور انہوں نے فرط جذبات میں پریانکا گاندھی کو پریانکا چوپڑا بنا ڈالا۔

کانگریس پارٹی کے سابق ایم ایل اے سریندر کمار نے ریلی میں غلطی سے پریانکا چوپڑا کا نعرہ لگا دیا جو سوشل میڈیا پر خوب وائرل ہو گیا ہے۔ سریندر کمار نے ریلی میں کانگریس پارٹی کی لیڈر پریانکا گاندھی کے نعرے کے جگہ غلطی سے ’پریانکا چوپڑا زندہ باد‘ کا نعرہ لگایا تھا۔

سوشل میڈیا پر وائرل ہونے والی ویڈیو میں دیکھا جا سکتا ہے کہ کانگریس کے سابق ایم ایل اے سریندر کمار نے سب سے پہلے ’سونیا گاندھی زندہ باد‘ کا نعرہ لگایا، پھر انہوں نے ’کانگریس پارٹی زندہ باد‘ ’راہول گاندھی زندہ باد‘ اور آخر میں ’پریانکا چوپڑا زندہ باد‘ کا نعرہ لگایا۔

زبان پھسل جانے کے فوراً بعد ہی کانگریس رہنما نے معافی مانگتے ہوئے اپنی غلطی کو ٹھیک کیا اور ’پریانکا گاندھی زندہ باد‘ کا نعرہ لگایا۔ سوشل میڈیا پر صارفین نے اس ویڈیو کو خوب شیئر کیا اور چند ہی گھنٹوں میں اس وائرل ویڈیو پر دلچسپ تبصروں کا تانتا بندھ گیا۔ ٹوئٹر پر ایک صارف نے ویڈیو پر تبصرہ کرتے ہوئے خود بھی پریانکا چوپڑا زندہ باد کا نعرہ لگایا۔

(ایمرا نیوزآن لائن) گلوکارہ مومنہ مستحسن کے رومانوی پنجابی گانے ’باری‘ نے مداحوں کی توجہ سمیٹ لی۔

حال ہی میں گلوکارہ مومنہ مستحسن کا نیا پنجابی گانا ’باری‘ ریلیز ہوا جس میں انہوں نے گلوکار بلال سعید کے ساتھ اپنی سُریلی آواز کا جادو جگایا۔ اس گانے میں بلال سعید نے اپنی آواز کا جادو تو جگایا ہی لیکن اس کے ساتھ ساتھ انہوں نے اس کی شاعری، کمپوزیشن اور ہدایت کاری کے فرائض بھی خود ہی انجام دیے ہیں۔

’باری‘ میں دونوں گلوکاروں نے ساتھ پرفارمنس بھی دی ہے اور مداحوں نے دونوں کی جوڑی پر پسندیدگی کا اظہار کیا ہے۔ گلوکارہ نے رومانوی گانے کی وضاحت دیتے ہوئے کہا کہ ’باری‘ ایک پنجابی لفظ ہے جس کے معنی ’کھڑکی‘ کے ہیں۔

انہوں نے لکھا کہ یہ گانا بتاتا ہے کہ چاہے محبت آپ کی دسترس سے باہر ہی کیوں نہ ہو تب بھی دل مطمئن رہتا ہے لیکن کبھی کبھی، خاص طور پر جب ہم کم توقع کرتے ہیں تو ہمیں ایک ایسی محبت مل جاتی ہے جو سب بدل دیتی ہے، آپ بکھرنے کے بجائے اپنے آپ کو پیار میں سنوار لیتے ہیں۔

خیال رہے کہ مومنہ مستحسن کو کوک اسٹوڈیو میں راحت فتح علی خان کے ساتھ گائے ہوئے گانے ’آفرین آفرین‘ سے شہرت ملی تھی اور وہ بالی وڈ فلم ‘اِک ولن’ کا گانا ‘آواری’ بھی گاچکی ہیں۔ گلوکارہ پاکستان کے نامور گلوکاروں کے ساتھ اپنی آواز کا جادو جگانے کے ساتھ بھارتی گلوکار ارجن کننگو کے ساتھ بھی ’آیا نہ تو‘ گانے میں اپنی آواز کا جادو جگا چکی ہیں۔

(وقت نی2زآن لائن) مہوش حیات نے معروف فوٹو شیئرنگ ایپ انسٹاگرام پر ایک تصویر شیئر کی جس پر انہوں نے ایک دلچسپ کیپشن لکھا۔

اداکارہ نے لکھا کہ ’کسی کو بھی اس بات کی اجازت نہ دیں کہ وہ آپ کے ساتھ اُبلے ہوئے چاولوں کی طرح سلوک کرے‘ مہوش حیات نے اپنے کیپشن میں مزید لکھا کہ ’آپ بریانی ہیں بے بی گرل‘۔ اس کیپشن میں اداکارہ نے آخر میں ہیش ٹیگ کا استعمال کرتے ہوئے اپنے پہلے پیار کے بارے میں بتایا۔

اداکارہ نے ہیش ٹیگ میں لکھا کہ ‘بریانی ہمیشہ سے ہی میرا پہلا پیار ہے‘۔ مہوش حیات کا دلچسپ کیپشن پڑھنے کے بعد ان کے مداح بھی پیچھے نہ رہے اور ان کی تصویر اور کیپشن کی داد دینے لگے۔

اداکارہ مہوش حیات سوشل میڈیا پر بہت زیادہ متحرک رہتی ہیں اور صارفین کو اپنی تمام تر سرگرمیوں کے حوالے سے آگاہ رکھتی ہیں جب کہ اپنی سرگرمیوں کی وجہ سے اداکارہ کئی بار تنقید کا سامنا بھی کر چکی ہیں۔

(ایمرا نیوزآن لائن) پاکستانی ڈرامہ انڈسٹری کی معروف اداکارہ عائزہ خان نے اپنے گھر اور پیشہ وارانہ زندگی میں توازن رکھنے کی جدوجہد مداحوں سے شیئر کی۔

عائزہ خان نے اپنے انسٹاگرام اکاؤنٹ پر ایک طویل پوسٹ مداحوں سے شیئر کی۔ اداکارہ نے اس پوسٹ کے ذریعے تمام لوگوں کو اپنی روٹین اور گھر کو ایک ساتھ لے کر چلنے کی کوشش کے بارے میں بتایا۔

عائزہ خان 2019 میں متعدد ڈراموں میں نظر آئیں جس کی وجہ سے یہ سال ان کے لیے کافی مصروف رہا۔ عائزہ نے اپنی پوسٹ میں لکھا کہ ’اس سے پہلے کہ یہ سال ختم ہو، میں ان تمام لوگوں کی بے حد شکر گزار ہوں جنہوں نے مجھے اتنا پیار دیا اور میری حوصلہ افزائی کی۔

اداکارہ جو کہ دو بچوں کی والدہ بھی ہیں، انہوں نے مداحوں کو بتایا کہ صبح سویرے 7 بجے اٹھ کر بیٹی کا لنچ باکس تیار کرکے اسے اسکول چھوڑ کر آنے کے بعد دوسرے بیٹے کو تیار کر کے اپنی والدہ کے پاس چھوڑتی ہوں۔ عائزہ نے اپنی روٹین مداحوں سے شیئر کرتے ہوئے لکھا کہ کبھی کبھی تو میں اپنی والدہ سے کہتی ہوں کہ آپ میرے گھر آجائیں تاکہ میں اپنے کام پر جا سکوں۔

عائزہ خان نے طویل کیپشن میں بتایا کہ وہ کس طرح اپنی مشکل روٹین میں سے اپنے کام اور گھر کو ساتھ لے کر چلتی ہیں اور اس میں توازن قائم رکھتی ہیں۔ اداکارہ نے خود سے سوال کرتے ہوئے لکھا کہ یہ سب کرنا مشکل ہے؟ اور اس بات کے جواب میں عائزہ نے لکھا کہ کافی مرتبہ یہ میرے لیے مشکل ہوجاتا ہے لیکن جو محبت اور حوصلہ افزائی مجھے مداحوں سے ملتی ہے یہ مجھے سپر وومن (مضبوط عورت) بنا دیتی ہے۔

عائزہ نے اپنے کیپشن کے اختتام میں لکھا کہ میرے مداحوں کا پیار ہی مجھے کام کرنے کی ہمت دیتا ہے۔ واضح رہے کہ ڈرامہ انڈسٹری میں نام کمانے والی معروف اداکارہ عائزہ خان نے 2009 میں شوبز انڈسٹری میں قدم رکھا تھا۔ عائزہ خان نے پیارے افضل، دو قدم دور تھے، میری زندگی ہے تو اور دیگر ڈراموں میں اداکاری کے جوہر دکھائے ہیں۔ عائزہ نے 2014 میں پاکستانی شوبز اور فلم انڈسٹری کے معروف اداکار دانش تیمور کے ساتھ شادی کی۔

ماہرہ خان(میڈٰیا92نیوزآن لائن) نے آئی فون 11 پرو میکس کے ’سلوفی‘ فیچر سے بنائی گئی ایک مختصر ویڈیو اپنے انسٹاگرام اکاؤنٹ پر شیئر کی جو سوشل میڈیا پر وائرل ہوگئی۔

اداکارہ نے ویڈیو کے کیپشن میں لکھا’ امید ہے کہ میں اس میں بہتری لا سکوں گی لیکن ابھی کے لیے یہ میری پہلی کوشش ہے۔‘ ماہرہ کے مداحوں نے ان کی اس ویڈیو کو بے حد پسند کیا اور اس ویڈیو میں ان کی خوبصورتی کی تعریفیں بھی کیں۔ واضح رہے کہ معروف امریکی ٹیکنالوجی کمپنی آئی فون نے چند روز قبل نئے آئی فون 11، الیون پرو اور الیون پرو میکس پاکستان میں لانچ کیے تھے۔

آئی فون کی 11 کی نئی سیریز میں ایک نیا فیچر بھی شامل کیا گیا جس کا نام ’سلو فی‘ ہے جس کے ذریعے صارف سلو موشن سیلفی ریکارڈ کر سکتےہیں۔ یہ ’سلو فی‘ ایپل فون کے فرنٹ کیمرے سے ایک سیکنڈ میں 120 فریم پر ریکارڈ ہوتی ہے جو کہ سیلفی میں سلو موشن کا اثر دیتی ہے اور یہی وجہ ہے کہ اس فیچر کا نام سلوفی رکھا گیا ہے۔

لندن(ایمرا نیوز آن لائن)ادھیڑ عمری میں بھی کسی خوبرو لڑکی کی طرح پرفارمنس کرنے والی گلوکارہ، موسیقار، اداکارہ و لکھاری 50 سالہ جینیفر لوپیز نے پہلی مرتبہ انکشاف کیا ہے کہ انہیں بھی ’جنسی طور پر ہراساں‘ کیا گیا۔جینیفر لوپیز کی چند ہفتے قبل ریلیز ہونے والی بولڈ فلم ’ہسلرز‘ نے دھوم مچائی تھی اور یہ ریکارڈ کمائی کرنے میں بھی کامیاب ہوئی۔اسی فلم میں جینیفر لوپیز کے ایک سین کو رواں سال کا ’سب سے عریاں‘ سین بھی قرار دیا گیا تھا۔مذکورہ سین میں جینیفر لوپیز کو پول ڈانس کرتے ہوئے دکھایا گیا تھا۔اگرچہ جینیفر لوپیز نے اداکاری سے زیادہ گلوکاری میں اپنے جوہر دکھائے ہیں لیکن انہوں نے ہولی وڈ کو کامیاب فلمیں بھی دی ہیں اور انہیں انتہائی اچھی اور بولڈ اداکارہ مانا جاتا ہے۔

ان کے حوالے سے خیال کیا جاتا ہے کہ وہ ذہنی و جسمانی طور پر میچور ہونے کی وجہ سے ہر بولڈ کردار کو بھی احسن انداز میں نبھاتی ہیں۔جینیفر لوپیز کو جہاں فلموں میں بولڈ انداز میں دیکھا جاتا ہے، وہیں ان پر میوزیکل فیٹسیول کے دوران بھی بولڈ پرفارمنس کرنے کے الزامات لگائے جاتے ہیں۔تاہم اب تک انہوں نے ایسے کسی واقعے کا ذکر نہیں کیا تھا، جس میں انہیں ہراساں کیا گیا ہو لیکن اب پہلی مرتبہ انہوں نے خود کو جنسی طور پر ہراساں کیے جانے کا انکشاف کیا ہے۔جینیفر لوپیز نے شوبز میگزین ’ہولی وڈ رپورٹر‘ کے ایک سلسلے میں ساتھی اداکاراؤں اسکارلٹ جانسن، لپیتا نیانگو، لارا ڈیرن، رینی زلویگر اور آکوافینا کے ساتھ اپنے زندگی کے تجربات شیئر کرتے ہوئے ماضی کے ایک قصے کو بیان کیا۔

اسی سلسلے میں تمام اداکاراؤں نے اپنی زندگی کے تجربات شیئر کیے اور انہوں نے فلمی زندگی میں خود کو پیش آنے والی مشکلات کا بھی ذکر کیا۔اسی سلسلے میں بات کرتے ہوئے جینیفر لوپیز نے انکشاف کیا کہ انہیں بھی ایک کاسٹیوم ڈائریکٹر نے جنسی طور پر ہراساں کیا تھا۔اداکارہ نے کسی کا بھی نام لیے بغیر بتایا کہ ایک مرتبہ فلم کی شوٹنگ کے دوران سیٹ پر کاسٹیوم ڈائریکٹر نے کمرے میں ان سے نامناسب خواہش کا ذکر کیا۔ادھیڑ عمر اداکارہ کے مطابق کاسٹیوم ڈائریکٹر نے ان سے اپنے جسم پر موجود لباس اتارنے کی فرمائش کی اور کہا کہ وہ ان کی ’چھاتی‘ دیکھنا چاہتے ہیں۔جینیفر لوپیز کے مطابق کاسٹیوم ڈائریکٹر کی نامناسب خواہش پر وہ پریشان ہونے کے ساتھ ساتھ شرمندہ بھی ہوئیں اور انہوں نے ایسا کرنے سے منع کردیا۔

اداکارہ کا کہنا تھا کہ اس وقت کمرے میں ان کے ساتھ ان کا فلمی لباس تیار کرنے والی خاتون ڈیزائنر بھی موجود تھیں اور انہوں نے کاسٹیوم ڈائریکٹر کو ایسا کرنے سے صاف منع کردیا۔یہ بھی پڑھیں: جینیفر لوپیز ادھیڑ عمری میں جوان اور حسین کیسے؟جینیفر لوپیز نے بتایا کہ انہوں نے کاسٹیوم ڈائریکٹر کو کہا کہ وہ ان کی خواہش کی تکمیل نہیں کر سکتیں البتہ جب فلم کی شوٹنگ ہوگی تو وہ جو دیکھنا چاہتے ہیں انہیں نظر آجائے گا۔اداکارہ و گلوکارہ نے اعتراف کیا کہ اگرچہ انہیں کاسٹیوم ڈائریکٹر کے مطالبے پر تکلیف پہنچیں لیکن ان کے مطالبے پر انہیں حیرانی بھی ہوئی تھی، کیوں کہ وہ صرف ان کے ’بریسٹ‘ دیکھنا چاہتے تھے۔

حمزہ علی عباسی(ایمرا نیوزآن لائن) نے گزشتہ ماہ اپنے ٹوئٹر پیغام میں مداحوں کو اس حوالے سے اشارہ بھی دیا تھا۔

حمزہ علی عباسی نے اپنے پیغام میں کہا تھا کہ’ایک دہائی سے زائد کا سفر اب اپنے اختتام کو پہنچا، میں اس ماہ کے اختتام پر ایک ضروری اعلان بھی کروں گا، امید ہے کہ میری آواز بہت سے لوگوں تک پہنچے گی۔‘ حمزہ علی عباسی نے اپنی ویڈیو میں وضاحت کرتے ہوئے بتایا کہ میں نے یہ اعلان اکتوبر کے آخر میں کرنے کا وعدہ کیا تھا مگر کچھ مصروفیات کی بناء پر یہ اعلان کرنے میں تاخیر ہوگئی جس کے لیے میں معذرت خواہ ہوں۔

انہوں نے بتایا کہ یہ فیصلہ میری زندگی کا سب سے بڑا فیصلہ ہےجو کہ خدا کے بارے میں ہے۔ اداکار نے ویڈیو پیغام میں اس فیصلے کا پس منظر بتاتے ہوئے کہا کہ ’میں اپنی نو عمری میں ہی لادین (ملحد) ہوگیا تھا۔‘ حمزہ نے بتایا کہ لادین ہونے کے بعد میں نے تمام مذہب کو غیر جانبداری کے ساتھ دیکھا اور پرکھا تو مجھے اسلام ہی اصل مذہب لگا۔

ان کا کہنا تھا یہ حقیقت 10 سے 12سال کے طویل درد ناک سفر کے بعد میرے سامنے واضح ہوئی۔ حمزہ نے طویل ویڈیو پیغام میں بتایا کہ جب میں نے موت کی حقیقت کو سمجھا تو مجھے زندگی کی تمام چیزیں موت کی طرح ختم ہوتے ہوئے نظر آتی گئیں۔

انہوں نے کہا کہ میں اب اپنی ساری زندگی اللہ اور اس کے بتائے ہوئے اصولوں کے مطابق اور انسانیت کی خدمت میں گزاروں گا، اب میں ٹی وی اور سوشل میڈیا کا پلیٹ فارم خدا کا پیغام آگے بڑھانے کے لیے استعمال کروں گا۔ حمزہ نے کہا کہ مجھے اللہ نے جتنی شہرت اور عزت دی ہے اب میں اس کو صرف دین، اسلام اور اللہ کے بتائے ہوئے اصولوں کو لوگوں تک پہنچانے کے لیے استعمال کروں گا۔

انہوں نے اپنے آخری ڈرامہ سیریل ’الف‘ کی بات کرتے ہوئے بتایا کہ اس ڈرامے کو کرنے کا مقصد صرف یہی تھا کہ اس میں اللہ کا پیغام چھپا ہوا تھا ورنہ فلم ’دی مولا جٹ‘ ہی میرا آخری پروجیکٹ ہوتا۔ حمزہ نے ویڈیو میں پیغام میں کہا کہ میں ڈرامہ اور فلمیں بناؤں گا لیکن ایسی جن میں کسی قسم کا غیر اخلاقی اور بدکاری کا مواد شامل نہیں ہوگا، ڈرامہ اور فلم کے میڈیم کو ملک کی سلامتی اور مذہب کا پیغام دینے کے لیے استعمال کروں گا۔

ویڈیو کے آخر میں شوبز چھوڑنے والے اداکار حمزہ علی عباسی نے کہا کہ میں اب دین کا ادنیٰ طالب علم بن کر زندگی گزاروں گا۔ واضح رہے کہ اداکار حمزہ علی عباسی نے 2006میں شوبز انڈسٹری کی دنیا میں قدم رکھا تھا جس کے بعد انہوں نے ’پیارے افضل‘ اور ’من مائل‘ جیسے ڈرامہ سیریل سے شہرت حاصل کی۔

حمزہ علی عباسی نے فلم ’وار‘ ، ’میں ہوں شاہد آفریدی‘ ، اور ’جوانی پھر نہیں آنی‘ میں بھی بہترین اداکاری کی۔ حمزہ علی عباسی حال ہی میں جیو ٹی وی کے ڈرامہ سیریک ’الف‘ میں اہم کردار نبھاتے ہوئے بھی نظر آرہے ہیں۔ اداکار حمزہ علی عباسی نے رواں سال25 اگست کو نیمل خاور سے شادی کرلی تھی۔ حمزہ علی عباسی کی اہلیہ نیمل خاور نے بھی ڈرامہ سیریل انٰا کے بعد شوبز چھوڑنے کا اعلان کردیا تھا۔

لندن(ایمرا نیوز آن لائن)فلوریڈا کے ایک شخص نے ’پاپ میوزک کی شہزادی‘ میڈونا پر تاخیر سے کانسرٹ شروع کرنے پر مقدمہ درج کرادیا۔مدعی نے دعویٰ کیا ہے کہ گلوکارہ اپنے کانسرٹ رات 10:30 بجے کے بعد شروع کرتی ہیں اس لیے جو لوگ صبح سویرے کام پر جاتے ہیں یہ ان کے لیے یہ وقت بہت دیر سے ہے۔مدعی کا کہنا ہےکہ انہوں نے 17 دسمبر کو پاپ گلوکارہ کے فلمور میامی بیچ پر منعقدہ ‘Madame X Tour’ کانسرٹ کے شومیں جانے کے لیے تین ٹکٹ خریدے تھے، اس کانسرٹ کا آغاز 8:30 بجے ہونا تھا لیکن 61 سالہ پاپ گلوکارہ 2 گھنٹے تاخیر سے پہنچی۔

میامی ڈیڈ کاؤنٹی کی وفاقی عدالت میں دائر مقدمے کے مطابق نیٹ ہولینڈر نامی مدعی کو اگلے دن صبح کام پر جانا تھا جس کی وجہ سے وہ اس کانسرٹ میں شرکت نہیں کرسکتے تھے جو کہ رات ایک بجے ختم ہوتا۔ہولینڈر نے پاپ لیجنڈ پر یہ الزام بھی لگایا کہ وہ کانسرٹ کے شیڈول کے مطابق نہیں آتیں، گلوکارہ اس سے قبل بھی متعدد کانسرٹس میں وقت کی پابندی نہ کرتے ہوئے تاخیر سے کانسرٹ شروع کرتی آرہی ہیں۔

لاہور(ایمرا نیوز آن لائن)کرتار پور راہداری کے افتتاح کے موقع پر پاکستانی فلم و ڈرامہ انڈسٹری کی معروف شخصیات نے حکومت پاکستان کی جانب سے امن کے اس مثبت قدم کو خوب سراہا ہے حکومتِ پاکستان نے کرتار پور راہداری کا افتتاح کرکے دنیا میں امن، محبت اور رواداری کی ایک اعلیٰ مثال قائم کردی۔اس موقع پر پاکستانی شوبز انڈسٹری کی معروف شخصیات بھی حکومت کے اس اقدام کے حوالے سے اپنے جذبات کو ظاہر کرنے میں کسی سے پیچھے نہیں ہیں۔پاکستانی فلم و ڈرامہ انڈسٹری کی معروف شخصیات نے حکومت پاکستان کی جانب سے امن کے اس مثبت قدم کو خوب سراہا۔اس تاریخی موقع پر معروف اداکارہ ماہرہ خان، ارمینا خان، علی ظفر اور متعدد مشہور شخصیات نے اپنے جذبات کا اظہار کیا۔
ماہرہ خان
سپر اسٹار ماہرہ خان نے کرتار پور راہداری کے افتتاح کے موقع پر اپنے ٹوئٹر پیغام میں لکھا کہ ’مجھے پاکستان پر بہت فخر ہے، یہ قدم سب کے لیے محبت، امن اور رواداری کا پیغام ہے، یہ اقبال کا پاکستان ہے۔‘
ماورا حسین
اداکارہ ماورا حسین نے اپنے ٹوئٹر پیغام میں کہا کہ ’مجھے اپنے ملک اور وزیر اعظم پاکستان عمران خان پر ہمیشہ فخر ہے‘۔انہوں نے امید ظاہر کی کہ مستقبل میں امن و ترقی کی مزید راہداریاں کھلیں گی۔
مومنہ مستحسن
گلوکارہ مومنہ مستحسن نے کرتار پور راہداری کے افتتاح کے موقع پر وزیر اعظم عمران خان کا شکریہ ادا کرتے ہوئے کہا کہ ہمیں بحیثیت ایک قوم اپنے لیڈر پر فخر ہے۔انہوں نے کہا کہ ’جب ہم دیکھتے ہیں کہ ہمارا لیڈر خطے میں امن کی کرن ہے تو ہمیں ان پر فخر ہوتا ہے‘۔
ارمینہ خان
اداکارہ ارمینہ رانا خان نے کرتار پور راہداری کے افتتاح کے موقع پر اپنے جذبات کا اظہار کرتے ہوئے امن کے اس اقدام کو خوب سراہا۔ ارمینہ خان نے اپنی ٹوئٹ میں پاکستان کے کرتار پور راہداری کے افتتاح کے احسن قدم اور بھارت کی جانب سے بابری مسجد کے متعصبانہ فیصلے کا موازنہ بھی کیا۔
بلال اشرف
اداکار بلال اشرف نے اپنے ٹوئٹر پیغام میں سکھوں کو خوش آمدید کہتے ہوئے پاکستان زندہ باد کہا۔
احد رضا میر
معروف اداکار احد رضا میر نے پاکستان کی جانب سے امن اور بین المذاہب ہم آہنگی کے اس قدم کو تاریخی کہتے ہوئے وزیر اعظم پاکستان عمران خان کا شکریہ بھی ادا کیا۔
وزیر اعظم عمران خان نے کرتار پور راہداری کا افتتاح کیا
خیال رہے کہ وزیراعظم عمران خان نے گزشتہ برس 28 نومبر کو کرتارپور راہداری کا سنگ بنیاد رکھا تھا اور اس تقریب میں وزیراعظم کی دعوت پر کانگریس رہنما اور سابق بھارتی کرکٹر نوجوت سنگھ سدھو نے شرکت کی تھی جب کہ بھارتی حکومت کی طرف سے وزیر خوراک ہرسمرت کور اور وزیر تعمیرات ہردیپ سنگھ بھی شریک ہوئے تھے۔ وزیراعظم عمران خان نے کرتارپور راہداری کا افتتاح کردیا 11 ماہ میں راہداری کی تکمیل حکومتِ پاکستان نے 11 ماہ کی ریکارڈ مدت میں کرتارپور راہداری مکمل کی اورگوردوارہ دربار صاحب کودنیا کا سب سے بڑا گوردوارہ بنادیا۔گزشتہ روز 9 نومبر کو وزیراعظم عمران خان نے کرتارپور راہداری کا افتتاح کرکے تاریخ رقم کی۔سکھ یاتری اسے بابا گورونانک کے 550 ویں جنم دن پر حکومتِ پاکستان کی طرف سے تحفہ قرار دے رہے ہیں۔

اقوام متحدہ(ایمرا نیوزآن لائن) کے ادارہ برائے مہاجرین (یو این ایچ سی آر) نے اداکارہ ماہرہ خان کو پاکستان میں اپنا خیرسگالی سفیر مقرر کر دیا۔

یو این ایچ سی آر نے ٹوئٹر پر ماہرہ خان کی ایک ویڈیو شیئر کی جس میں وہ اقوام متحدہ کا ٹوپی پہنے مہاجر بچوں کے ساتھ وقت گزار رہی ہیں۔ مذکورہ ویڈیو کے ساتھ یو این ایچ سی آر نے ماہر خان کو خیرسگالی سفیر مقرر کرنے پر مسرت کا اظہار کیا۔

مذکورہ ویڈیو کو ماہرہ خان نے اپنے ٹوئٹر اکاؤنٹ پر شیئر کیا اور لکھا کہ ’مہاجرین کی خیرسگالی سفیر بننا میرے لیے ایک بڑے اعزاز کی بات ہے، مجھے اپنے ملک جس نے 40 برسوں سے مہاجرین کے لیے اپنی باہیں پھیلائی ہوئی ہیں، میں پید ہونے پر فخر ہے‘۔ اسلام آباد میں اقوام متحدہ کے ہائی کمیشن برائے مہاجرین کی جانب سے ملک کی خیر سگالی سفیر ماہرہ خان کے اعزاز میں تقریب کا انعقاد بھی کیا گیا۔

تقریب سے خطاب کرتے ہوئے ماہرہ خان نے کہا کہ “میں خوش قسمت ہوں کہ اس نیک مقصد کے لیے مجھے منتخب کیا گیا۔” انہوں نے کہا کہ میں اقوام متحدہ کے ادارہ برائے مہاجرین (یو این ایچ سی آر) کی شکر گزار ہوں کہ جنہوں نے مجھ پر اعتماد کیا، اللّہ نے مجھے اس مقصد کے لیے چنا جس پر میں پوری اترنے کی کوشش کروں گی۔

ماہرہ خان کا کہنا تھا کہ پاکستانی عوام نے افغان مہاجرین کو کھلے دل سے خوش آمدید کہا، یہی وجہ ہے کہ پاکستان 4 دہائیوں سے 40 لاکھ افغان مہاجرین کی مدد کر رہا ہے۔ انہوں نے مزید کہا کہ ماضی میں مہاجرین کے مسائل کو اتنی اہمیت نہیں دی گئی لیکن یہ بات بھی اہم ہے کہ مہاجرین کا مسئلہ کسی ایک ملک کا نہیں بلکہ پوری دنیا کا ہے۔

یاد رہے کہ گزشتہ برس ماہرہ خان نے پشاور میں یو این سی ایچ آر کے کیمپ کا دورہ کیا تھا جہاں تقریب سے خطاب کرتے ہوئے ان کا کہنا تھا کہ ہمیں بے گھر بچوں کے مستقبل کے لیے مل کر کام کرنا ہوگا کیوں کہ بچے مستقبل کے معمار ہیں۔