Tag hollywood

ہالی ووڈ(ایمرا نیوزآن لائن) فلم ”بیڈ بوائز فار لائف“ کا نیا ٹیزر جاری کر دیا گیا ہے۔

فلم ”بیڈ بوائز فار لائف“ کا نیا ٹیزر جاری کر دیا گیا ہے جبکہ فلم کا نیا ٹریلر آج ریلیز کیا جائے گا۔ فلم کی کاسٹ میں ول اسمتھ، مرٹین لورنس، وانیسا ،الگزینڈر، چارلس ملٹن، نیکی جام اور دیگر شامل ہیں۔

فلم 17 جنوری 2020 کو نمائش کے لیے پیش کی جائے گی۔

لاہور (ایمرا نیوز آن لائن) پاکستانی فلم اور ڈرامہ انڈسٹری کی اداکارہ ماہرہ خان نے سوشل میڈیا پر اپنی قریبی دوست کے نام کہانی لکھتے ہوئے کچھ پرانی تصاویر بھی شیئر کیں۔ماہرہ خان نے انسٹاگرام اکاؤنٹ پر اپنی قریبی دوست کے ساتھ پرانی یادیں تازہ کرتے ہوئے چند تصاویر شیئر کرنے کے ساتھ ساتھ طویل کیپشن میں ایک کہانی بھی لکھی۔سپر اسٹار ماہرہ خان نے اپنی پوسٹ میں لکھا کہ ’میں آپ سب کو یہ کہانی بتانا چاہتی ہوں، ایک لڑکی کی کہانی جس سے میں کافی سالوں پہلے ملی تھی، یہ ایک ایسی لڑکی کی کہانی ہے جس کا دنیا میں سب سے بڑا دل ہے۔‘

اداکارہ نے اپنی پرانی اور سب سے قریبی دوست کی کہانی سناتے ہوئے بتایا کہ مجھے یاد ہے کہ میں ’نارو‘ سے کالج میں ملی تھی، یہ میرے ساتھ ہر اس وقت کھڑی تھی جب میرا ساتھ کسی نے نہیں دیا تھا، جب میں اسے اپنے تمام خوابوں کے بارے میں بتایا کرتی تھی تو یہ میری باتیں بہت ہی صبر کے ساتھ سنتی تھی۔ماہرہ خان نے اپنی دوست کے بارے میں مزید کہا کہ جب اس کے والد دنیا سے چلے گئے تھے تو یہ اپنی ماں کے سامنے کبھی نہیں روئی، یہ صرف میرے ساتھ کالج میں روتی تھی،

23 سال کی عمر سے اس نے اپنے والد کی چھوٹی سی کمپنی کو سنبھالا اور دن رات کام کرنے کے باوجود بھی یہ ہمیشہ میرے لیے حاضر ہوتی تھی۔ماہرہ نے اس کہانی میں اپنی دوست کی کامیابی کو سراہتے ہوئے کہا کہ جب آج میں نے اسے اسٹیج پر دیکھا، اس کے تمام خواب پورے ہو گئے، یہ پاکستان آٹو موٹو انڈسٹری کی واحد خاتون سی ای او ہے، اور یہ ہمیں بتاتی تھی کہ ’ایک دن ضرور مجھے اس طرح کانفرنس میں مدعو کیا جائے گا۔‘

اداکارہ ماہرہ خان نے اپنی قریبی دوست کی کامیابی کی وجہ محنت قرار دیتے ہوئے کہا کہ اچھی نیت اور محنت سے ہی کامیابی حاصل ہوتی ہے، مجھے یقین ہے کہ تمہاری اس کامیابی کا تعلق میری دعاؤں سے بھی ہے، میں تمہارے لیے بہت دعائیں کرتی ہوں، میری نارو میں تم سے بہت پیار کرتی ہوں اور مجھے تم پر فخر ہے۔

لاہور(ایمرا نیوز آن لائن)پاکستانی فلم اور ڈرامہ انڈسٹری کے اداکار شاز خان نے فلم ساز جامی کی فلم مور میں اداکاری دکھا کر شہرت حاصل کی تھی اور اب انہوں نے اپنی آنے والی فلم کے لیے خوب محنت کر کے اپنے آپ کو فائٹر میں تبدیل کر کے سب کو دنگ کر دیا ہے۔اداکار شاز خان اپنی آنے والی فلم ’دی مارشل آرٹسٹ‘ میں ایک ایم ایم اے فائٹر کا کردار نبھائیں گے جس کے لیے وہ کیلی فورنیا میں ٹریننگ حاصل کر رہے ہیں۔شاز خان نے اپنی چند تصاویر سوشل میڈیا ایپ انسٹاگرام پر شیئر کی ہیں جس میں انہوں نے اپنے کردار کی جھلک دکھائی، اور ان تصاویر میں وہ ایک فائٹر دکھائی دے رہے ہیں۔

اداکار اس فلم میں اپنے کردار کے لیے کیلی فورنیا میں معروف کوچ ایم ایم اے چیمپئن رافائل کورڈیرو کی سربراہی میں مارشل آرٹس کی ٹریننگ حاصل کر رہے ہیں۔’دی مارشل آرٹسٹ‘ فلم کا اسکرپٹ اداکار شاز خان نے خود ہی لکھا ہے اور اس فلم کی کہانی ایک مارشل آرٹسٹ پر مبنی ہے جو کہ کیلی فورنیا سے لڑتا ہے اور اچانک اسے پاکستان آنا پڑتا ہے۔اداکار نے فلم کے اسکرپٹ کے حوالے سے سوشل میڈیا پر ایک تصویر بھی شیئر کی تھی جس میں انہوں نے فلم کا اسکرپٹ مکمل ہونے کے بارے میں بتایا تھا۔شاز خان وقفے وقفے سے اس فلم کے حوالے سے اپنی ٹریننگ کی تصاویر سوشل میڈیا پر اپنے مداحوں کے ساتھ شئیر کر رہے ہیں مگر فلم کی مزید تفصیلات کے حوالے سے انہوں نے فی الحال کچھ نہیں بتایا۔

‘دی مارشل آرٹسٹ‘ فلم کی ریلیز کے حوالے سے بھی ابھی کوئی معلومات سامنے نہیں آ سکی ہیں۔واضح رہے کہ اداکار شاز خان پاکستانی فلم ’دوبارہ پھر سے‘ اور ’پرواز ہے جنون‘ جیسی فلموں میں اداکاری کر چکے ہیں، فلموں کے علاوہ شاز خان متعدد ٹی وی ڈراموں میں بھی کام کر چکے ہیں۔

(ایمرا نیوزآن لائن) بھوتوں اور چڑیلوں کے سالانہ تہوار ہیلووین کے لیے اداکار عثمان مختار انوکھا انداز اپناتے ہوئے ’جٹ اسپیرو‘ بن گئے اور اب آپ سوچ رہے ہوں گے کہ کیپٹن جیک اسپیرو کو تو دیکھا ہے یہ جٹ اسپیرو کیوں بنے ؟

فلم اور ڈراموں میں اداکاری کے جوہر دکھانے والے عثمان مختار نے انسٹاگرام پر ایک تصویر شیئر کی جس میں انہوں نے ہالی وڈ فکشن فلم ’پائیریٹ آف دی کیربین‘ کے مشہور کردار کیپٹن جیک اسپیرو کا روپ دھارا ہوا ہے۔

اداکار نے اس روپ کو دیسی بناتے ہوئے جیک اسپیرو کو ’جٹ اسپیرو‘ کہا اور پیغام دیا کہ ’کسی کی ماں بہن کو سڑکوں پر تنگ کرنے سے پہلے، اتنی سی، بس اتنی سی شرم کر لیا کرو‘۔

بعدازاں انہوں نے اپنے جٹ اسپیرو روپ کو ہیلووین سیزن کا روپ قرار دیا جس پر مداحوں نے ملے جلے ردعمل کا اظہار کیا۔ کچھ مداحوں نے اداکار کو کیپٹن جیک اسپیرو سے ہی تشبیہ دی جب کہ کچھ نے ناپسندیدگی کا اظہار کرتے ہوئے لکھا کہ یہ کیا کرلیا۔

رِڈز بیکر نامی مداح نے عثمان مختار کو ہیلووین کے روپ پر ’غریبوں کا پائیریٹ‘ قرار دیا جب کہ عریبہ مسکان نامی مداح نے انہیں جیک اسپیرو کا ’پاکستانی ورژن‘ کہہ ڈالا۔ فرحین نامی مداح نے اداکار کو تجویز پیش کی کہ آپ اچھے ہیں اس طرح کی حرکتیں نہ کریں۔

خیال رہے کہ ہیلووین کی مناسبت سے پاکستانی شوبز کے ستارے دلچسپ اور خوفناک حلیہ اپناتے ہوئے کافی انوکھے انداز میں نظر آتے ہیں اور وہ اپنے نت نئے انداز کے باعث مداحوں کی جانب سے تنقید کا شکار بھی بنتے ہیں۔

لاہور (ایمرا نیوز آن لائن) اداکار وگلوکار علی ظفر کی جانب سے میشا شفیع کے خلاف 100 کروڑ روپے کے ہتک عزت کے دعویٰ کی سماعت کے موقع پر گلوکارہ میشا شفیع کی والدہ صباحمید بیان قلمبند کرانے سیشن کورٹ پہنچ گئیں تاہم جج کے رخصت پر ہونے کی وجہ سے سماعت 29 اکتوبر تک ملتوی کردی گئی۔

بتایا گیا ہے کہ گلوکارہ کی والدہ صبا حمید اپنی بیٹی کے حق میں گواہی کیلئے سیشن کورٹ آئیں لیکن ایڈیشنل سیشن جج امجد علی شاہ کے رخصت پر ہونے کے باعث کوئی کارروائی نہ ہو سکی، عدالت نے گواہوں کو آئندہ سماعت پر دوبارہ پیش ہونے کا حکم دے دیا۔

(میڈیا 92 نیوزآن لا ئن ) نامور پاکستانی گلوکار استاد راحت فتح علی خان اور عاطف اسلم نے سعودی عرب میں ہونے والے ’ریاض سیزن‘ کا میلہ لوٹ لیا۔

عالمی شہرت یافتہ گلوکار راحت فتح علی خان اور عاطف اسلم نے سعودی عرب کے دارالحکومت ریاض میں رواں برس کے پہلے ہفتے سے شروع ہونے والے ثقافتی فیسٹول میں اپنی آواز کا جادو جگا کر لوگوں پر سحر طاری کردیا۔

راحت، عاطف اور شفقت کےکراچی میں ڈیرے: واضح رہے کہ اب تک ریاض سیزن میں پاکستانی و بھارتی فنکاروں سمیت مشرق وسطیٰ اور بعض مغربی فنکار بھی پرفارمنس کر چکے ہیں اور کئی معروف فنکار رواں برس 15 دسمبر تک اسی میلے میں پرفارم کریں گے۔

(میڈیا 92 نیوزآن لا ئن ) 90 کی دہائی میں ابرار الحق کے شہرہ آفاق گانے’بلو دے گھر‘ نے شہرت کی بلندیوں کو چھوا اور آج 24 برس بعد بھی یہ گانا اپنی مقبولیت برقرار رکھنے میں کامیاب ہوگیا۔

’بلو دے گھر‘ گیت 1995 میں پاکستانی پاپ اور بھنگڑا موسیقی کے معروف گلوکار ابرار الحق نے گایا تھا جسے خوب پزیرائی ملی تھی جس کا اب ریمیک کر کے کوک اسٹوڈیو سیزن 12 کی دوسری قسط میں پیش کیا گیا ہے۔ کوک اسٹوڈیو میں ’بلو‘ کے ریمیک نے جہاں 90 کی دہائی کے افراد کی 24 برس بعد یادیں تازہ کیں وہیں اس نے نئی نوجوان نسل کی دلچسپی بھی اپنی جانب مبذول کروالی ہے۔

اس گیت کا ریمیک پیش کرنے سے قبل ابرار الحق کا کہنا تھا کہ یہ گانا ان کے لیے ’گیم چینجر‘ تھا اور اب اس کو پیش کرنے کا انداز پرانا روایتی نہیں بلکہ پہلے سے مختلف ہے یعنی اسے آج کی ’بلو’ سمجھیں۔ ایسے میں کوک اسٹوڈیو سیزن 12 میں نئی بلو نے ٹکٹ بھی کٹادی اور لائن بھی بنا ڈالی۔ مداحوں کی جانب سے ’ ’بلو دے گھر‘ کو قابل ستائش ریمیک قرار دیا جارہا ہے جس پر دلچسپ تبصروں کا سلسہ جاری ہے۔ مجادلہ نامی صارف لکھتی ہیں کہ ’1995 سے 2019 وقت گزرگیا لیکن کل بھی بلو زندہ تھی آج بھی بلو زندہ ہے‘۔

واضح رہے کہ کوک اسٹوڈیو سیزن 12 کو معروف بینڈ وائٹل سائنز کے سابق رکن روحیل حیات پروڈیوس کررہے ہیں جو اس سے قبل کوک اسٹوڈیو کے ابتدائی 6 سیزن پروڈیوس کرچکے ہیں۔ کوک اسٹوڈیو سیزن 12 کا آغاز 11 اکتوبر سے کیا گیا ہے جس کی پہلی قسط میں اب تک حمد باری تعالی ’وہی خدا ہے‘، ’دم مستم‘، ’ماہی دیا جھونکا‘ اور ’رم پم‘ پیش کیا جاچکا ہے۔

( میڈیا 92 نیوز آن لا ئن) پاکستانی ڈرامہ انڈسٹری کے معروف اور باصلاحیت اداکار عمران اشرف نے حال ہی میں ڈرامہ سیریل ’رانجھا رانجھا کردی‘ میں ’بھولے‘ کا کردار نبھاتے ہوئے بہترین اداکاری کے جوہر دکھائے اور لوگوں کے دل جیت لیے۔

اداکار عمران اشرف نے اپنے مداحوں کو ایک خوشخبری سنائی ہے جس میں انہوں نے بتایا کہ وہ اب سلور اسکرین پر ڈیبیو کے لیے تیار ہیں اور امید ہے کہ وہ سلور اسکرین پر بھی اپنی بہترین اداکاری دکھا کر سب کی توجہ کا مرکز بنیں گے۔ عمران اشرف اپنی ڈیبیو فلم ’دم مستم‘ میں مرکزی کردار ادا کریں گے جو آئندہ سال ریلیز کی جائے گی۔

فلم’دم مستم‘ میں الف اللہ اور انسان ڈرامے کے باکمال اداکار عمران اشرف کے مدمقابل پاکستان ڈرامہ انڈسٹری کی اُبھرتی ہوئی اسٹار اَمر خان ہوں گی۔ عمران اشرف کی ڈیبیو فلم ’دم مستم‘ کی ہدایت کاری معروف فلم ’سپر اسٹار‘ کے ہدایت کار احتشام الدین کریں گے اور فلم کے پروڈیوسر عدنان صدیقی ہیں۔ ’دم مستم‘ ایک رومانوی کامیڈی فلم ہوگی جس کی کہانی اس فلم کی ہیروئن امر خان نے ہی لکھی ہے۔

امر خان کو پاکستانی ڈرامہ انڈسٹری میں قدم رکھے ابھی کچھ زیادہ وقت نہیں ہوا، اداکارہ حال ہی میں جیو ٹی وی پر نشر ہونے والے ڈرامہ سیریل ’دل گم شدہ‘ میں بھی اداکاری کرتی دکھائی دے رہی ہیں۔ عمران اشرف نے اپنی ڈیبیو فلم کی خبر مداحوں سے انسٹاگرام اکاؤنٹ پر شیئر کرتے ہوئے لکھا کہ’ شروع کرتے ہیں اللہ کے نام سے، میری پہلی فلم۔‘ ساتھ ہی انہوں نے فلم کی چند کاسٹ کا بھی ذکر کیا جس میں سہیل احمد، سلیم معراج، عدنان شاہ ٹیپو اور دیگر لوگ بھی شامل ہیں۔

عمران اشرف نے جیسے ہی انسٹاگرام پر اپنی سلور اسکرین پر انٹری کی خبر سنائی تو ان کے مداحوں نے ان کے لیے نیک خواہشات کا اظہار کیا اور ان کی فلم کی کامیابی کے لیے انہیں دعائیں بھی دیں۔ بھولا کے مداحوں کا ان کے لیے نیک خواہشات کا سلسلہ تا حال جاری ہے اور انہیں عمران اشرف کی فلم کا بے صبری سے انتظار ہے۔

لاہور(ایمرا نیوز آن لائن)اداکار حمزہ علی عباسی اپنی اہلیہ نیمل خاور کے ساتھ پیرس کے دورے پر ہیں جن کی تصاویر سوشل میڈیا پر وائرل ہیں۔حمزہ علی عباسی نے نیمل خاور سے رواں برس اگست میں شادی کی تھی جس کے بعد دونوں نے پاکستان کے خوبصورت مقامات کی سیر کی اور پھر اسپین چلے گئے۔حمزہ اور نیمل اب پیرس میں موجود ہیں جہاں ان کے سیر سپاٹے جاری ہیں۔نیمل خاور نے گزشتہ دنوں اسپین کے خوبصورت مناظر کی تصاویر انسٹاگرام پر شیئر کیں جسے مداحوں نے پسند کیا اور اب انہوں نے پیرس کے سیر سپاٹوں کی تصویریں بھی پوسٹ کی ہیں۔

نیمل خاور نے فرانس کے شہر پیرس کے تاریخی مقام ایفل ٹاور کے سامنے لی گئی ایک خوبصورت تصویر شیئر کی جس میں دیکھا جاسکتا ہے کہ نیمل ہاتھ میں تالا پکڑی ہوئی ہیں جس پر حمزہ اور ان کا نام لکھا ہوا جب کہ تالے پر دل بھی بنا ہوا ہے جو دونوں کی محبت کا اظہار کرتا ہے۔

اس کے علاوہ انہوں نے اپنی اور حمزہ کی دو تصویریں بھی شیئر کیں جس پر مداحوں نے دونوں کی جوڑی کو بہت پسند کیا۔خیال رہے کہ نیمل خاور نے شادی سے قبل فلم ’ورنہ‘ میں کام کیا تھا جس کے بعد انہوں نے ڈرامہ سیریل ’انا‘ میں اداکاری کے جوہر دکھائے لیکن شادی کے بعد انہوں نے شوبز انڈسٹری کو خیرباد کہہ دیا اور اب وہ اپنے مصوری کے شوق پر متوجہ ہیں۔دوسری جانب جیو ٹی وی پر حمزہ علی عباسی کا ڈرامہ سیریل ’الف‘ قسط وار جاری ہے جسے پرستاروں کی جانب سے خوب پذیرائی موصول ہورہی ہے۔

لاہور(ایمرا نیوز آن لائن)لالی وڈ اداکارہ ماہرہ خان اور فہد مصطفیٰ پہلی بار ایک ساتھ مرکزی کرداروں میں سلور اسکرین پر جلوہ گر ہوں گے۔دونوں اداکار نبیل قریشی کی ہدایتکاری میں بننے والی فلم ’قائد اعظم زندہ باد‘ میں ایک ساتھ نظر آئیں گے۔خیال رہے کہ ماہرہ خان اس سے قبل فلم ’ایکٹر ان لاء‘ میں کیمیو (خصوصی شرکت) کرچکی ہیں اور ان کی فہد مصطفیٰ کے ساتھ بطور مرکزی اداکار پہلی فلم ہے۔

فہد مصطفیٰ فلم ’قائداعظم زندہ باد‘ میں اداکاری کے جوہر دکھائیں گے فلم میں فہد مصطفیٰ کے کردار سے متعلق ہدایتکار نبیل قریشی اپنے انٹرویو میں پہلی ہی بتاچکے ہیں کہ وہ ایک پولیس افسر کے کردار میں نظر آئیں گے۔فلم کی کہانی ایکشن اور کامیڈی پر مبنی ہے جو معاشرے میں بدنام پولیس افسر کے گرد گھومتی ہے اور یہ فلم اگلے سال عیدالاضحیٰ پر ریلیز کی جائے گی۔

اداکارہ ماہرہ خان نے سماجی رابطوں کی ویب سائٹ پر فلم میں فہد مصطفیٰ کے ساتھ کام کرنے کی تصدیق کی ہے۔فلم کو انڈسٹری کی مشہور جوڑی نبیل قریشی اور فضا علی ہی پروڈیوس کرے گی اور یہ جوڑی پہلے ہی کئی سپر ہٹ فلمیں بناچکی ہے جس میں ’نامعلوم افراد‘، ’ایکٹر ان لاء‘، ’نامعلوم افراد 2‘ اور ’لوڈ ویڈنگ‘ شامل ہیں۔