Tag imf

لاہور(ایمرا نیوزآن لائن) وزارت خزانہ کا کہنا ہے کہ آئی ایم ایف سے مذاکرات میں پیش رفت ہوئی ہے، مذاکرات آج اور کل بھی جاری رہیں گے۔آئی ایم ایف سے معاہدے کے بارے میں جو اطلاعات ملی ہیں ان کے مطابق معاہدے کے مطابق ملک میں نئے ٹیکسز لگیں گے، ڈالر پر حکومتی کنٹرول ہٹانے کی بھی تجویز ہے، جبکہ بجلی اور گیس کی قیمتوں میں بھی مزید اضافہ ہو گا۔آئی ایم ایف سے جلد تین سالہ قرض معاہدے کو حتمی شکل دیے جانے کا امکان ہے، پاکستان شرطیں مان گیا تو معاہدے کے تحت پاکستان کو 6 ارب 40 کروڑ ڈالر کا قرض ملنے کی توقع ہے۔قرض معاہدے کی شرائط کے مطابق بجٹ میں 700 ارب روپے کے نئے ٹیکس لگائے جائیں گے۔

توانائی سمیت متعدد شعبوں میں سبسڈی ختم کی جائے گی، شرح سود 12 فیصد تک لائی جائے گی، بجلی اور گیس کی قیمتیں سال میں 2 مرحلوں میں بڑھائی جائیں گی۔وزارت خزانہ کا کہنا ہے کہ آئی ایم ایف سے مذاکرات آج اور اتوار کو بھی جاری رہیں گے، ذرائع کے مطابق وزیراعظم نے آئی ایم ایف، وزارت خزانہ اسٹاف لیول معاہدے کا مسودہ مسترد کر دیا۔ذرائع کے مطابق وزیراعظم افراط زر کے معاملے پر آئی ایم ایف کی شرائط میں نرمی چاہتے ہیں۔

ذرائع کا کہنا ہے کہ وزیراعظم نے ٹیکس وصولی ہدف کم کرنے کے لیے آئی ایم ایف کو راضی کرنے کی ہدایت کی ہے اور کہا ہے کہ ٹیکس استثنیٰ سے متعلق بھی آئی ایم ایف سے مزید رعایت لی جائے۔وزیراعلیٰ پنجاب کے ترجمان شہباز گل کہتے ہیں کہ نون لیگ اور پیپلزپارٹی نے پاکستان کو قرضوں کی دلدل میں دھکیلا، دونوں جماعتوں کی حکومتوں میں 50 ارب ڈالرتک قرضہ لیاگیا۔انہوں نے مزید کہا کہ آئی ایم ایف سے معاہدہ گزشتہ حکومتوں کے کرتوتوں کی وجہ سے کرنا پڑ رہا ہے، وزیر اعظم عمران خان کی قیادت میں پاکستان جلد قرضوں سے جان چھڑا کر ترقی کی راہ پر گامزن ہو گا۔

اسلام آباد: (ایمرا نیوزآن لائن) پاکستان آئی ایم ایف کے درمیان قرضے پروگرام کا مسودہ آخری مراحل میں داخل ہو گیا۔ ذرائع کا کہنا ہے یکم جولائی سے بجلی مرحلہ وار مہنگی جبکہ 700 ارب روپے کے ٹیکس لگیں گے۔ذرائع کے مطابق آئی ایم ایف سے قرض کے حوالے سے مسودہ آخری مرحلہ میں داخل ہو گیا ہے، پاکستان آئی ایم ایف سے 7 سے 8 ارب ڈالر سے زائد قرض حاصل کرے گا۔ 3 سالہ پروگرام پر معاہدہ آج طے پا جائے گا جس کے تحت یکم جولائی سے بجلی مہنگی ہوگی، بجلی کی قیمتوں میں اضافہ 2 مراحل میں ہوگا۔

یکم جولائی سے 700 ارب سے زائد کے ٹیکس لگیں گے۔ گیس کی قیمتیں دوسرے مر حلے میں بڑھائی جائیں گی۔ذرائع کے مطابق ترقیاتی بجٹ گزشتہ سال کی سطح پر منجمد کیا جائے گا، خسارے میں چلنے والے اداروں کی نجکاری کی جائے گی، ایکسچینج ریٹ طے کرنے میں اسٹیٹ بینک خود مختار ہوگا، بجٹ خسارہ کم کر کے 3 سال میں 6.8 فیصد سے 4 فی صد تک لایا جائے گا، مالی نظم و ضبط پر عمل اور غیر ترقیاتی اخراجات محدود رکھے جائیں گے۔

اسلام آباد:(ایمرا نیوزآن لائن) وزارت خزانہ نے کہا ہے کہ پاکستان پر واجب الادا قرضوں کا حجم اگلے 7 برسوں میں 31 ارب ڈالر ہوجائے گا۔وزارت خزانہ کے لگائے گئے تخمینے میں آئی ایم ایف سے ملنے والا متوقع قرض شامل نہیں ہے۔ یہ تخمینہ ایکسٹرنل پبلک ڈیٹ کی بنیادوں پر لگایا گیا ہے جو فروری 2019 کے اختتام پر 74 ارب ڈالر تھا جب کہ عالمی مالیاتی فنڈ سے ماضی میں لیے گئے قرضے بھی ان ری پیمنٹس کا حصہ نہیں ہیں۔

وزارت خزانہ کے ڈائریکٹر جنرل ڈیٹ آفس عبدالرحمان وڑائچ نے قومی اسمبلی کی قائمہ کمیٹی برائے خزانہ کو بریفنگ دیتے ہوئے بتایا کہ مستقبل میں مجموعی پبلک ڈیٹ جی ڈی پی کے اعتبار سے مزید بڑھ جائے گا۔عبدالرحمان وڑائچ نے بتایا کہ مارچ 2019 کے اختتام پر پاکستان کا پبلک ڈیٹ28.6 ٹریلین روپے تھا جو جی ڈی پی کے 74.5 فیصد کے مساوی ہے۔ انھوں نے امید ظاہر کی کہ اگلے 5 سال میں یہ تناسب میکرواکنامک صورتحال کے بعد 65 فیصد کی سطح پر آجائے گا۔

اسلام آباد: (ایمرا نیوزآن لائن) اثاثے ظاہر کرنے کی سکیم لانے میں حائل بڑی رکاوٹ دور ہوگئی، پاکستان نے ایمنسٹی سکیم پر آئی ایم ایف مشن کو راضی کرلیا۔ذرائع کے مطابق اثاثے ظاہر کرنے کی سکیم اسی ماہ متعارف کرائے جانے کا امکان ہے، اثاثے ظاہر کرنے کی سکیم سے ٹیکس آمدن میں اضافہ ہوسکتا ہے، حکومت کا موقف ہے کہ سکیم سے 170 ارب روپے کا ٹیکس مل سکتا ہے۔

وزارت خزانہ ذرائع کے مطابق سکیم سے 2500 ارب روپے کے اثاثے قانونی بن سکتے ہیں، اثاثے ظاہر کرنے کی سکیم آسان اور سہل ہوگی، اثاثے ظاہر کرنے کی سکیم آئی ایم ایف پروگرام سے پہلےجاری ہوگی، آئی ایم ایف سے قرض پروگرام لینے کے بعد سکیم کا اجرا نہیں ہوسکتا۔

اسلام آباد(ایمرا نیوزآن لائن) بین الاقوامی مالیاتی فنڈ(آئی ایم ایف) کے وفد نے اسلام آباد میں پلاننگ کمیشن کے حکام سے ملاقات کی ہے۔اعلامیے کے مطابق آئی ایم ایف کے وفد کو ترقیاتی بجٹ اور ترقیاتی منصوبوں پر بھی بریفنگ دی گئی۔اعلامیے ممیں مزید کہا گیا ہے کہ آئی ایم ایف کے وفد کو معاشی شرح نموکی حکمت عملی سے آگاہ کیا گیا اور سی پیک منصوبوں پر مکمل بریفنگ دی گئی۔اعلامیے میں کہا گیا ہے کہ مذاکرات میں معاشی ترقی کی رفتاربڑھانے کے لیےحکمت عملی پر غور کیا گیا۔آئی ایم ایف مشن چیف نے وفاقی سیکریٹری منصوبہ بندی ظفر حسن سے بھی ملاقات کی جس کے دوران پی ایس ڈی پی، سی پیک سمیت میکرو اکنامک منصوبوں پر تبادلہ خیال کیا گیا۔اعلامیے میں بتایا گیا ہے کہ آئی ایم ایف کے ساتھ گروتھ اہداف پر بھی بات چیت ہوئی ہے۔

اسلام آباد:(ایمرا نیوزآن لائن) عالمی مالیاتی فنڈ(آئی ایم ایف) نے گذشتہ 5 سال کے دوران پاکستان کی ٹیکس ٹو جی ڈی پی کی شرح میں اضافے کے رجحان پر اطمینان کا اظہار کرتے ہوئے اس رجحان کو برقرار رکھنے اور ٹیکس آمدنی جی ڈی پی کے 13.2 فیصد تک بڑھانے کا مطالبہ کیا ہے تاہم حکومت پاکستان نے12.7 فیصد تک بڑھانے کی یقین دہانی کرائی ہے۔

ذرائع کے مطابق پاکستان نے10سال کی ٹیکس ٹو جی ڈی پی کی شرح کی تفصیلات آئی ایم ایف کو پیش کردی ہیں۔ جس میں یہ بات سامنے آئی ہے کہ گذشتہ 5 سال کے دوران ٹیکس ٹو جی ڈی پی کی شرح 8.7 سے بڑھ کر 11.2 فیصد ہوگئی ہے۔دستاویز کے مطابق پاکستان نے آئی ایم ایف کو بلاواسطہ ٹیکسوں اور بالواسطہ ٹیکسوں کی الگ الگ تفصیلات فراہم کی ہیں۔ مالی سال 2015-16 میں پاکستان کی ٹیکس ٹو جی ڈی پی کی شرح بڑھ کر10.7 فیصد ہوگئی جس میں جی ڈی پی کے لحاظ سے ڈائریکٹ ٹیکسوں کی شرح بڑھ کر4.2 فیصد ہوگئی جبکہ جی ڈی پی کے لحاظ سے ان ڈائریکٹ ٹیکسوں کی شرح بڑھ کر6.5 فیصد ہوگئی اور ان میں سے کسٹمز ڈیوٹی کی جی ڈی پی کے لحاظ سے شرح بڑھ کر1.4 فیصد، جی ڈی پی کے لحاظ سے سیلز ٹیکس کی شرح بڑھ کر4.5 فیصد ہوگئی۔

جی ڈی پی کے لحاظ سے فیڈرل ایکسائز ڈیوٹی کی شرح بڑھ کر0.6 فیصد رہی اور مالی سال 2016-17 میں پاکستان کی ٹیکس ٹو جی ڈی پی کی شرح ایک بار پھر کم ہو کر 10.5 فیصد ہوگئی جس میں جی ڈی پی کے لحاظ سے ڈائیریکٹ ٹیکسوں کی شرح4.2 فیصد ہی برقرار رہی جبکہ جی ڈی پی کے لحاظ سے ان ڈائریکٹ ٹیکسوں کی شرح کم ہو کر6.3 فیصد ہوگئی اور ان میں سے کسٹمز ڈیوٹی کی جی ڈی پی کے لحاظ سے شرح پھر سے کم ہو کر1.1 فیصد ہوگئی، جی ڈی پی کے لحاظ سے سیلز ٹیکس کی شرح کم ہوکر 4.2 فیصد ہوگئی۔

اسلام آباد(ایمرا نیوزآن لائن) مشیر خزانہ عبدالحفیظ شیخ نے کہا ہے کہ آئی ایم ایف کے ساتھ ابتدائی مذاکرات کیے گئے ہیں، پُرامید ہیں کہ یہ مذاکرات کامیاب ہوں گے۔بین الاقوامی مالیاتی فنڈ (آئی ایم ایف ) سے آج کے مذاکرات کے دور کے بعد عبدالحفیظ شیخ میڈیا سے گفتگو کر رہے تھے۔انہوں نے بتایا کہ مذاکرات میں آئی ایم ایف کو اقتصادی اصلاحات کے ایجنڈے سے آگاہ کیا ہے، پاکستان اور آئی ایم ایف کے مذاکرات آئندہ مزید چند روز جاری رہیں گے۔انہوں نے یہ بھی کہا کہ پُرامید ہیں کہ آئی ایم ایف کے ساتھ مذاکرات کامیاب ہوں گے۔

اسلام آباد:(ایمرا نیوزآن لائن) نئے بیل آؤٹ پیکیج کے لیے پاکستان اور آئی ایم ایف حکام کے درمیان دوسرے روز ہونے والے تکنیکی سطح کے مذاکرات میں آئی ایم ایف کی جانب سے ایف بی آر کی کارکردگی اور ایف بی آر کے 3سو ارب روپے سے زائد کے ریونیو شارٹ فال پر تحفظات کا اظہار کیا۔پاکستان نے مذاکرات میں آئی ایم ایف کو 6سو ارب روپے سے زائد کے نئے ٹیکسز لگانے، بجلی اور گیس کے نرخ بڑھانے سمیت دیگر اہم یقین دہانیاں کرائی گئیں ،مذاکرات 10مئی تک جاری رہیں گے جبکہ آج صبح وزارت خزانہ میں آئی ایم ایف کے ٹیکنیکل سطح کے مذاکرات کا اہم دور ہوگا اور آج کے مذاکرات میں ایف بی آر،وزارت خزانہ،وزارت تجارت،ایس ای سی پی،اسٹیٹ بینک سمیت دیگر تمام متعلقہ وزارتوں کے حکام شریک ہونگے۔

وزارت خزانہ ذرائع کے مطابق پاکستان اور آئی ایم ایف کے درمیان جاری تکنیکی سطح کے مذاکرات میں آئی ایم ایف کو پاور سیکٹر، سوشل سیفٹی نیٹ، سرکلر ڈیٹ کمی، بجلی اور گیس کے نرخ بڑھانے کی حکمت عملی پر بریفنگ دی گئی جس کے تحت جون تک بجلی کی قیمتوں میں مرحلہ وار ا ضافہ کا ا مکان ہے۔وفد نے ایف بی آر ہیڈ کوارٹر کا بھی دورہ کیا ،ایف بی آر کی کارکردگی کے بارے میں بریفنگ دی گئی تاہم آئی ایم ایف نے ایف بی آرکی کارکردگی اور رواں مالی سال کے پہلے نو ماہ کے دوران 335 ارب روپے کے لگ بھگ ریونیو شارٹ فال پر تحفظات کا اظہار کیا ۔ مذاکرات میں پاکستان نے 6سو ارب روپے کے نئے ٹیکسز لگانے کی یقین دہانی کرادی ۔
نئے بجٹ میں ایف بی آر کا ہدف 4500 ارب روپے سے زائد مقرر کیا جائے، رواں سال ایف بی آر 4100 ارب روپے کا ٹیکس اکٹھا کرے گاکہ آئی ایم ایف جائزہ مشن کے ساتھ آئندہ مالی سال 2019-20 کے وفاقی بجٹ کیلیے تیار کردہ تجاویز اور بجٹ اسٹریٹجی پیپر اور مڈ ٹرم اکنامک فریم ورک بارے بھی تفصیلی تبادلہ خیال ہوا ہے۔

اسلام آباد:(ایمرا نیوزآن لائن) آئی ایم ایف نے کہا ہے کہ پاکستان پر 2سال میں 27 ارب ڈالر کا بیرونی قرض واجب الادا ہوجائے گا جب کہ قرض کا یہ حجم پاکستان کے مجموعی بیرونی قرضوں کا 27 فیصد ہے۔حکومت اور کچھ نجی سیکٹر کے ماہرین کے جائزوں کے مطابق جاری کھاتوں کے خسارے کو پورا کرنے کے لیے درکار رقم کو شامل کرنے کے بعد پاکستان کو اقتصادی بحران سے بچنے کے لیے اگلے دو برسوں میں 46 سے 50 ارب ڈالر کی ضرورت ہوگی۔ 27 ارب ڈالر کے بیرونی قرضوں کا ذکر پیر کو جاری کردہ آئی ایم ایف کی نئی ریجنل آؤٹ لُک رپورٹ اپ ڈیٹ میں کیا گیا ہے۔
رپورٹ کے مطابق پاکستان واحد علاقائی ملک ہے جسے سب سے زیادہ غیرملکی قرضہ ادا کرنا ہے۔ آئی ایم ایف کی رپورٹ کے مطابق رواں برس جون تک قرض کا تناسب جی ڈی پی کے 77 فیصد تک رہنے کی توقع ہے۔ سابقہ دور حکومت کے اختتام پر یہ تناسب 72.5 فیصد تھا۔ آئی ایم ایف کی جانب سے یہ رپورٹ اسی دن جاری کی گئی ہے جس روز پاکستان کے ساتھ ممکنہ بیل آؤٹ پیکیج پر مذاکرات شروع ہوئے ہیں۔

قبل ازیں گذشتہ برس نومبر میں بہت اہم معاملات پر اختلافات کے باعث مذاکرات ناکام ہوگئے تھے۔ تاہم اس بار حکام کو توقع ہے کہ اختلافات دور کرلیے جائیں گے اور 6.5 ارب ڈالر قرض کے معاہدے پر دستخط ہوجائیں گے۔پاکستان کو یہ قرض 3 سال میں ادا کرنا ہوگا۔ بیجنگ میں جمعے کو بیلٹ اینڈ روڈ فورم کی سائیڈلائن پر وزیراعظم پاکستان کی ملاقات آئی ایم ایف کی ایم ڈی کرسٹائن لوگارڈ سے ہوئی تھی۔ایوان وزیراعظم سے جاری کردہ بیان کے مطابق دونوں رہنماؤں نے فنڈ پروگرام کی اہمیت اور معاہدے کی جانب پیش قدمی پر اتفاق کیا تھا۔ پاکستان اورآئی ایم ایف کے درمیان تکنیکی سطح کے مذاکرات شروع ہوگئے ہیں، پیرکو ہونے والے مذاکرات کے پہلے روزپاکستان نے آئی ایم ایف کو 600 ارب روپے سے زائدکے نئے ٹیکسزلگانے پرآمادگی ظاہرکردی۔پاکستان نے ٹیکس اصلاحات، توانائی کے شعبہ میں تجاویز تیارکرلی ہیں جبکہ آئی ایم ایف سے 3 سالہ پروگرام کے تحت ساڑھے 6 ارب ڈالرکے لگ بھگ قرضے کا معاہدہ 10مئی کوطے پانے کا امکان ہے، مذاکرات میں آئی ایم ایف جائزہ مشن کی سربراہی ارنستو ریگوکرہے ہیں جبکہ پاکستانی ٹیم کی قیادت سیکریٹری خزانہ نے کی، وفد نے پہلے روز وزارت خزانہ ، ایف بی آر اور وزارت توانائی کے حکام سے مذاکرات کیے۔پاکستان نے 600ارب روپے کے نئے ٹیکسز لگانے کی یقین دہانی کرادی، آئی ایم ایف کو یقین دہانی کرائی گئی ہے کہ نئے بجٹ میں ایف بی آرکا ہدف 4500 ارب روپے سے زائد مقررکیا جائے گا، رواں سال ایف بی آر 4100 ارب روپے کا ٹیکس اکٹھا کرے گا، مذاکرات میںچیئرمین ایف بی آر اور ٹیکس حکام نے ٹیکس اصلاحات پر بھی آئی ایم ایف کو بریفنگ دی اورٹیکس کی چھوٹ محدود کرنے پر بھی تبادلہ خیال ہوا۔

آئی ایم ایف جائزہ مشن کے ساتھ مذاکرات میں رواں مالی سال کے پہلے 9 ماہ کے اقتصادی اعدادوشمار پر مشتمل مرتب کردہ ڈیٹا شیئرکیاگیا ہے، ذرائع کا کہنا ہے کہ آئی ایم ایف جائزہ مشن کے ساتھ آئندہ مالی سال 2019-20 کے وفاقی بجٹ کے لیے تیارکردہ تجاویز اور بجٹ اسٹریٹجی پیپراورمڈٹرم اکنامک فریم ورک بارے بھی تفصیلی تبادلہ ہوا ہے اور بجٹ اسٹریٹجی پیپر کے مجوزہ اہداف کو حتمی شکل دینے پرتبادلہ خیال ہواہے۔ذرائع کا کہنا ہے کہ آئی ایم ایے کے ساتھ مالیاتی خسارہ اور ادئیگیوں کے توازن سمیت دیگر اہداف پر بھی بات چیت ہورہی ہے او مالیاتی خسارہ رواں مالی سال کے آخر تک 7 فیصدکے لگ بھگ جبکہ پروگرام کے تحت اس میں بتدریج کمی لائی جائیگی اور 5.6 فیصد تک اگلے سال لایا جائے گا۔آئی ایم ایف پاکستان کی ٹیکس آمدنی جی ڈی پی کے 13.2 فیصد تک بڑھانے کا مطالبہ کررہا ہے لیکن حکومت پاکستان نے 12.7 فیصد تک بڑھانے کی یقین دہانی کرائی ہے، ذرائع کاکہنا ہے کہ آئی ایم ایف سے ہونے والے مذاکرات میں ریونیو فریم ورک کے بارے میں بھی تفصیلی تبادلہ خیال ہوا ہے۔ذرائع کا کہنا ہے کہ مذاکرات میں چین سے لیے جانے والے قرضوں کے بارے میں آگاہی سے متعلق آئی ایم ایف کو آگاہی دینے میں بھی پیشرفت ہوئی ہے، قرضوں کی تفصیلات پاکستان کے مجموعی قرضوں میں ظاہرہے، وہی آئی ایم ایف کو دی جائے گی۔آئی ایم ایف کو بتایا گیا ہے کہ پاکستان آمدن بڑھانے کی کوشش کر رہا ہے، تجارتی خسارے میں کمی ہو رہی ہے جبکہ درآمدات کو روکا جا رہا ہے، امید ہے رواں سال جاری کھاتوں کا خسارہ کم ہوگا، پاکستان نے ٹیکس اصلاحات، توانائی کے شعبہ میں تجاویزتیارکرلی ہیں۔

اسلام آباد:(ایمرا نیوزآن لائن) پاکستان اور آئی ایم ایف کے درمیان مذاکرات کا شیڈول طے پاگیا جس کے تحت پیر سے باضابطہ مذاکرات شروع ہوں گے۔بین الاقوامی مالیاتی فنڈ کا جائزہ مشن ڈائریکٹرارنسٹو رمیریزریگو کی سربراہی میں 29 اپریل کو پاکستان پہنچے گا اور 7 مئی تک پاکستان میں قیام کرے گا اس دوران آئی ایم ایف جائزہ مشن مختلف اداروں کا دورہ بھی کرے گا، نئے پروگرام کیلئے 29 اپریل سے باضابطہ مذاکرات شروع ہوں گے۔

ذرائع کے مطابق وزارت خزانہ نے تمام متعلقہ وزارتوں اور اداروں کو مراسلہ جاری کردیا اور آئی ایم ایف سے مذاکرات کیلئے ایف بی آر سمیت متعلقہ وزارتوں سے ڈیٹا مانگ لیا اور جائزہ مشن کے ساتھ مذاکرات کے لیے 9 ماہ کے اقتصادی اعداد وشمار پر مشتمل ڈیٹا مرتب کرنے کی ہدایات بھی کردی ہے، وزارت خزانہ کی ہدایت پر ایف بی آر کے تمام متعلقہ ونگز نے ڈیٹا مرتب کرنا شروع کردیا ہے۔

ذرائع کا کہنا ہے کہ آئی ایم ایف پاکستان کی ٹیکس آمدنی جی ڈی پی کے 13.2 فیصد تک بڑھانے کا مطالبہ کررہا ہے، حکومت پاکستان نے 12.7 فیصد تک بڑھانے کی یقین دہانی کرائی ہے، آئی ایم ایف سے ہونے والے مذاکرات میں ریونیو فریم ورک پر بھی تفصیلی تبادلہ خیال ہوگا، ریونیو فریم ورک میں بجٹ میں 729 ارب روپے کے نئے ٹیکس لگانے کی تجاویز زیرغور ہیں۔ذرائع کے مطابق آئی ایم ایف جائزہ مشن کے ساتھ وفاقی بجٹ کیلئے تجاویز اور بجٹ اسٹریٹجی پیپر پرتبادلہ خیال ہوگا، آئندہ بجٹ میں جی ڈی پی کے 1.4 فیصد کے برابر ٹیکس عائد کئے جانے کا امکان ہے، بجٹ میں برآمدی و مینوفیکچرنگ شعبہ کے لیے ٹیکس میں ریلیف بھی دیا جائے گا اور بجٹ میں 634 ارب روپے ان لینڈ ریونیواور 95 ارب روپے کسٹمز ڈیوٹی کی مد میں جب کہ انکم ٹیکس کی مد میں 334ارب روپے، سیلز ٹیکس کی مد میں 150 ارب اور فیڈرل ایکسائز ڈیوٹی کی مد میں 150 ارب روپے کے نئے ٹیکس لگانے کی تجاویز ہیں۔
ذرائع کا کہنا ہے کہ جائزہ مشن کو بجلی کے نرخ میں اضافہ، روپے کی قدر،موبائل فون کارڈ پر ٹیکس کی بحالی سے اضافی ریونیو، ایمنسٹی اسکیم اور قرضوں کی ایڈجسٹمنٹ سے متعلق شرائط پر پیشرفت سے آگاہ کیا جائے گا تاہم چین سے لئے جانیوالے قرضوں کے بارے آئی ایم ایف کو آگاہ کرنا سب سے بڑا چیلنج ہوگا۔