Tag imf

اسلام آباد(ایمرا نیوز آن لائن ) روزگار کے معیاری مواقع اقتصادی شرح نمو کو ترقی کی شاہراہ پر گامزن کرنے کے لئے ضروری ہیں۔ عالمی بینک کی رپورٹ کے مطابق معیشت کی ترقی کے لئے زیادہ سے زیادہ روزگار کی فراہمی، معیاری روزگار کے مواقع، کم معیار کے روزگار کی بجائے بہتر روزگار کی دستیابی اور کم سے کم دورانیہ میں زیادہ سے زیادہ معیاری کام انتہائی ضروری ہیں۔معاشی تبدیلیوں اور مارکیٹ کی بدلتی ہوئی ضروریات کے پیش نظر لیبر مارکیٹ کا ڈ ھانچہ بھی تبدیل ہو تا ہے جو کم آمدنی، متوسط آمدن اور بہتر آمدن کے خدوخال وضع کرتا ہے۔

رپورٹ کے مطابق کسی بھی ملک کی بہتر اقتصادی کارکردگی سے رقزگار کے بہتر مواقع پیدا ہونا ضروری نہیں ہے اس لئے مجموعی قومی پیداوار (جی ڈی پی) کی بڑھوتری کے ساتھ ساتھ کارکنوں کی استعداد کار اور آمدنی میں اضافہ ہونا بھی ضروری ہے جو ان کو کام کے معیاری مواقع فراہم کرنے سے ہی ممکن ہو سکتا ہے۔کارکنوں کی استعداد کار کی بہتری سے روزگار کے معیار میں بھی بہتری ہوتی ہے۔ عالمی بینک نے کہاکہ جی ڈی پی کی شرح نمو لیبر مارکیٹ کی ترقی سے منسلک ہے۔ جب جی ڈی پی میں بہتری آتی ہے تو ہو سکتا ہے کہ روزگار کے نئے مواقع پیدا ہو ں لیکن یہ ضروری نہیں کہ کارکنوں کو معیاری روزگار بھی دستیاب ہو سکے۔

اس لئے پائیدار اقتصادی ترقی کے لئے ضروری ہے کہ روزگارکے معیاری مواقع اور کارکنوں کی استعداد کار سے زیادہ سے زیادہ استفادہ کو یقینی بنایا جائے۔ عالمی بینک نے کہا ہے کہ کسی بھی ملک میں پائیدار اقتصادی ترقی کے لئے روزگار کے بہتر اور معیاری مواقع پیدا کرنا ضروری ہیں تاکہ کارکنوں کی صلاحیت اور تجربہ سے حقیقی استفادہ کیا جا سکے۔

پالیسی سازی کی کوششیں مزید تیز کی جائیں، تیل درآمد کرنے والے متعدد ممالک کے لیے قرض کی بڑھتی ہوئی شرح بڑے پیمانے پر اقتصادی استحکام کیلئے چیلنج بن چکی ،ڈائریکٹر آئی ایم ایف محکمہ مشرق وسطیٰ اور وسط ایشیا
واشنگٹن(ایمرا نیوز آن لائن)انٹرنیشنل مانیٹری فنڈ (آئی ایم ایف) کے محکمہ مشرق وسطیٰ اور وسط ایشیا کے ڈائریکٹر جہاد آزور نے کہا ہے کہ پاکستانی معیشت مستقبل میں بڑے پیمانے پر سست روی کا شکار ہو گی اور یہ خطے کی مجموعی معاشی ترقی کی شرح پر بوجھ بن جائےگی۔مشرق وسطیٰ، شمالی افریقہ، افغانستان اور پاکستان(MENAP) کے معاشی منظر نامے کے حوالے سے گفتگو میں عالمی معاشی صورتحال اس بات کا تقاضا کرتی ہے کہ مذکورہ خطوں میں پالیسی سازی کی کوششیں مزید تیز تر کی جائیں۔اس خطے کے تیل کے درآمد کنندگان کے لیے شرح نمو 2018 میں 4.2 فیصد کے مقابلے میں کم ہو کر 3.6فیصد تک ہونے کا امکان ہے جس کی وجہ کمزور عالمی معاشی ماحول ہے۔جہاد آزور نے کہا کہ تیل درآمد کرنے والے متعدد ممالک کے لیے قرض کی بڑھتی ہوئی شرح بڑے پیمانے پر اقتصادی استحکام کیلئے چیلنج بن چکی ہے اور بھاری قرض کے سبب صحت، تعلیم، انفرا اسٹرکچر اور سماجی پروگراموں میں اہم سرمایہ کاری کے لیے مالیاتی خلا محدود ہو گیا ہے۔آئی ایم ایف نے کہا کہ بجٹ پر پڑنے والا یہ دباؤ اصلاحات کےساتھ ساتھ درمیانی شرح نمو میں تیزی سے اضافے کے متقاضی ہیں، مطلب ایسے اقدامات کیے جائیں جس سے کاروباری ماحول اور انتظامی امور کو بہتر بنایا جائے اور مزدوروں کے لیے مارکیٹ میں لچک اور مارکیٹ میں مسابقت کو مضبوط کیا جا سکے۔عالمی مالیاتی ادارے کے ڈائریکٹر نے مزید بتایا کہ سست ہوتی عالمی معاشی شرح نمو اور تجارت کےساتھ ساتھ عالمی سیاسی تناؤ اور دیگر بیرونی دھچکوں کے سبب اس خطے کو معاشی طور پر چیلنجز کا سامنا ہے، یہ صورتحال اس بات کا تقاضا کرتی ہے کہ فوری طور پر ایسی اصلاحات پر عملدرآمد کیا جائے جن سے اقتصادی لچک اور محفوظ مجموعی شرح نمو حاصل کی جا سکے۔اس حوالے سے ایک رپورٹ میں آئی ایم ایف نے بڑھتے ہوئے عالمی قرض پر تحفظات کا اظہار کیا اور کہا کہ عالمی قرض اب 164ٹریلین ڈالر تک پہنچ گیا ہے جو عالمی جی ڈی پی کا 225فیصد ہے اور خبردار کیا کہ دنیا بھر کے عوام اور نجی شعبے 2008 کے مالیاتی بحران کے مقابلے میں زیادہ قرض میں ڈوبے ہوئے ہوں گے جہاں اس وقت عالمی قرض اپنی بلند ترین شرح پر تھا جو مجموعی جی ڈی پی کا 213فیصد تھا۔جہاں عالمی قرضوں میں اضافے کی وجہ سے تیزی سے ترقی کرتی معییشتیں ہیں، وہیں گزشتہ دس سال میں چین جیسی تیزی سے ابھرتی ہوئی معاشی طاقتیں بھی اس اضافے کی ذمے دار ہیں جہاں 2007 سے اب تک صرف چین عالمی قرض میں کل 43فیصد اضافے کی وجہ بنا۔

لاہور(ایمرا نیوزآن لائن) بین الاقوامی مالیاتی فنڈ(آئی ایم ایف) کے پاکستان کے ساتھ معاملات طے پا گئے۔ذرائع کا کہنا ہے کہ آئی ایم ایف کا بیل آؤٹ پیکیج تین سال کے لیے ہو گا، آئی ایم ایف اورعالمی بینک کےاجلاسوں میں شرکت کے بعدپاکستانی وفد واپس پہنچ گیا ہے۔ذرائع کے مطابق آئی ایم ایف نے پاکستان کے مجوزہ اثاثہ جات ڈیکلیئریشن اسکیم سے اختلاف نہیں کیا، پاکستان نے مجوزہ اسکیم کا مسودہ آئی ایم ایف اور ایف اے ٹی ایف سے پہلےہی شیئر کرلیا تھا۔ذرائع نے بتایا ہے کہ آئی ایم ایف اور ایف اے ٹی ایف نے اس اسکیم پر کوئی اعتراض نہیں اٹھایا، قرض 6 ارب ڈالر ہو یا 9 ارب ڈالر اس بات کا فیصلہ آئی ایم ایف کے وفد کے دورۂ پاکستان کے موقع پر کیا جائے گا۔ذرائع نے بتایا کہ آئی ایم ایف وفد کے دورے کی تاریخ اگلے ایک دو روز میں طے ہو جائے گی، جبکہ آٗئی ایم ایف کے ساتھ بیل آؤٹ پیکیج پر دستخط اپریل میں ہی کر لیے جائیں گے۔ذرائع کا مزید کہنا ہے کہ اثاثہ جات ڈیکلیریشن اسکیم کو آئی ایم ایف کے دورے سے پہلے قانونی شکل دی جائے گی،اس اسکیم کی حتمی منظوری کل کابینہ سے لی جائے گی۔ذرائع کا یہ بھی کہنا ہے کہ کابینہ سے منظوری پر ایک 2 روز میں صدارتی آرڈیننس کے ذریعے نافذ کر دی جائے گی، آرڈیننس جاری ہوتے ہی اثاثہ جات ڈیکلیریشن اسکیم فوری طور پر نافذ ہوگی۔

اسلام آباد:(ایمرا نیوزآن لائن) چینی قرضوں سے حکومت کو مالی ضروریات پوری کرنے میں مدد ملی یہی ایک بنیادی وجہ ہے جس کے سبب آئی ایم ایف کے بیل آؤٹ پیکیج کی منظوری میں تاخیر ہورہی ہے۔آئی ایم ایف سے بیل آؤٹ پیکیج کے اجرا میں تاخیر کا سبب عالمی مالیاتی فنڈ کی شرائط ہیں جن میں چینی قرضوں کی تفصیلات سے آگہی، بجلی کے نرخ میں اضافہ،روپے کی قدر، قرضوں کی ایڈجسٹمنٹ اور ٹیکسز کانفاذ شامل ہے۔ حکومتی ذرائع کا کہناہے کہ میڈیا کی توجہ صرف قرضوں، روپے کی قدر اور بجلی کے نرخ پر ہے۔ آئی ایم ایف چین اور پاکستان کے درمیان مالی تعاون کی تفصیلات کے حصول سے دست بردار ہونے کو تیارنہیں۔ بیجنگ اور اسلام آباد کا دوطرفہ تعاون صرف سی پیک تک محدود نہیں ہے، پاکستان قومی اہمیت کے کئی منصوبے چین کے تعاون سے چلارہاہے جن میں انفرااسٹرکچر، جوہری توانائی، جے ایف17تھنڈرکی تیاری اور آبدوزوں کی خریداری شامل ہے۔واضح رہے کہ چین نے پاکستان کو بطوربیل آؤٹ 6.5ارب ڈالر کے تجارتی قرضے دیے ہیں اور اسٹیٹ بینک آف پاکستان میں 2ارب ڈالر جمع کرائے ہیں۔

حکومتی اقدام سے رشوت کی شرح میں اضافہ ہوگیا ، زیادہ بدعنوان ممالک نے کم ٹیکس جمع کیا ، لوگ اس سے بچنے کیلئے رشوت ادا کرتے ہیں ،کک بیکس کی ادائیگی کیلئے ٹیکس میں ڈیزائن کی گئی خامیاں شامل ہوتی ہیں ، رپورٹ
واشنگٹن(ایمرا نیوز آن لائن )آئی ایم ایف نے ایک حالیہ تحقیق میں کہا ہے کہ پاکستان میں کارکردگی کی بنیاد پر ٹیکس حکام کی تنخواہوں کی وجہ سے ٹیکس وصولی قابل ذکر حد تک بڑھی لیکن اس حکومتی اقدام سے رشوت کی شرح میں بھی اضافہ ہوگیا۔ آئی ایم ایف کی ‘حکومتوں میں بدعنوانی سے نمٹنے’ سے متعلق تحقیق میں 180 سے زائد ممالک کا جائزہ لیا گیا اور یہ بات سامنے آئی زیادہ بدعنوان ممالک نے کم ٹیکس جمع کیا کیونکہ لوگ اس سے بچنے کے لیے رشوت ادا کرتے ہیں، جس میں کک بیکس کی ادائیگی کے لیے ٹیکس میں ڈیزائن کی گئی خامیاں شامل ہوتی ہیں۔تحقیق میں یہ بات بھی سامنے آئی کہ جب ٹیکس دہندگان کو یہ لگتا ہے کہ اس کی حکومت بدعنوان ہے تو وہ ٹیکس کی ادائیگی سے بچنے کی زیادہ کوشش کرتا ہے۔آئی ایم ایف نے اپنی تحقیق میں پاکستان کی جانب سے کارکردگی کی بنیاد پر ٹیکس حکام کے لیے حالیہ مراعات کا جائزہ لیا جس میں پسندیدہ اور ناپسندیدہ نتائج دونوں شامل تھے۔تحقیق میں یہ پتہ چلا کہ ‘ پاکستان میں ٹیکس حکام کی کارکردگی کی بنیاد پر تنخواہوں نے (زیادہ سے زیادہ 50 فیصد) تک ٹیکس وصولی میں نمایاں اضافہ کیا جبکہ رشوت کی درخواستیں بھی 30 فیصد تک بڑھ گئیں’۔آئی ایم ایف کی جانب سے اس مسئلے سے نمٹنے کے لیے زائد اجرت کو نگرانی اور پابندیوں سے جوڑنے کی تجویز دی گئی۔
ساتھ ہی جارجیا میں اصلاحات کی مثال دیتے ہوئے بتایا کہ اس سے کرپشن میں نمایاں طور پر کمی اور ٹیکس ریونیو دوگنا سے زیادہ بڑھا جس سے 2003 سے 2008 کے درمیان جی ڈی پی کے 13 فیصد پوائنٹس میں اضافہ دیکھنے میں آیا۔1990 کی دہائی کے وسط سے کرپشن کے خلاف روندا کی اصلاحات سے ٹیکس آمدنی میں جی ڈی پی کے 6 فیصد پوائنٹس تک اضافہ ہوا۔کرپشن سے لڑنا اقوام متحدہ کے پائیدار ترقی کے مقاصد میں سے ایک ہے کیونکہ اس کا وسیع تصور ہے کہ بدعنوانی سے نمٹنا معاشی کارکردگی اور اقتصادی ترقی کے لیے اہم ہے۔آئی ایم ایف کی تحقیق بتاتی ہے کہ مجموعی طور پر کم کرپٹ حکومتیں ان ممالک کے مقابلے میں ٹیکس آمدنی میں جی ڈی پی کا 4 فیصد زیادہ جمع کرتی ہیں جو کرپشن کی بلند سطح کے ساتھ اسی سطح کی اقتصادی ترقی کی شرح پر ہوں۔ساتھ ہی اس بات کی نشاندہی کی گئی کہ کرپشن حکومتی ترجیحات کو بھی مسخ کردیتی ہے۔آئی ایم ایف کی جانب سے یہ بھی کہا گیا کہ کرپشن لوگوں کو ملک کی قدرتی وسائل سے بننے والی رقم کے مکمل فائدے سے مستفید ہونے سے بھی روکتی ہے کیونکہ تیل یا کان کنی کی تلاش سے بڑا منافع ہوتا ہے اور یہ کرپشن کے لیے ایک مضبوط رغبت پیدا کرتا ہے۔عالمی ادارے کی تحقیق یہ ظاہر کرتی ہے کہ وسائل سے مالا مال ممالک میں عموما کمزور ادارے اور زیادہ کرپشن ہوتی ہے۔

اسلام آباد / لاہور(ایمرا نیوز آن لائن) پاکستان کے دورے پر آئے ہوئے بین الاقوامی مالیاتی فنڈ(آئی ایم ایف) جائزہ مشن کے سربراہ انسٹرو رامیریز ریگو پاکستان کا دورہ مکمل کرکے واپس چلے گئے ہیں۔آئی ایم ایف وفد کے دورے کے دوران وزیر خزانہ اسد عمر سمیت دیگر حکام سے ہونیوالی ملاقاتوں میں آئی ایم ایف سے نئے پروگرام کیلیے جاری مذاکرات کے تناظر میں پاکستان میں آئی ہونیوالی حالیہ اقتصادی ڈویلپمنٹس پر تبادلہ خیال ہوا۔آئی ایم ایف نے دورہ مکمل ہونے کے بعد اعلامیہ جاری کردیا ہے جس میں کہا گیا ہے کہ آئی ایم ایف مشن چیف نے پاکستان میں قیام کے دوران اسلام آباد اور کراچی کے دورے کیے اور اہم حکام سے ملاقاتیں کیں۔

کراچی(ایمرا نیوز آن لائن)عالمی ریٹنگ ایجنسی فیچ نے کہاہے کہ عالمی مالیاتی فنڈ(آئی ایم ایف )اورپاکستان میں معاہدہ جلدمتوقع ہے اور اس مرتبہ پلان کا حجم گزشتہ پلان سے دگناہوگا، آئی ایم ایف پاکستان کو12ارب ڈالر دے گا۔عالمی ریٹنگ ایجنسی فیچ نے پاکستانی معیشت سے متعلق رپورٹ جاری کردی ۔جس میں کہا گیا ہے کہ آئی ایم ایف پاکستان کو12ارب ڈالر فراہم کرے گا، دونوں کے درمیان معاہدہ جلد طے پا جائیگا ،جس سے پاکستان میں معاشی استحکام آئے گا۔فیچ کی رپورٹ کے مطابق پلان کے تحت جامع معاشی اصلاحات متوقع ہیں۔ رواں مالی سال پاکستان کی معاشی شرح نمو 5اعشاریہ 4فیصد رہنے کا امکان ہے۔

لاہور، نارووال (ایمرا نیوزآن لائن) مسلم لیگ ن کے رہنمائوں نے وزیر اعظم عمران خان کی عالمی مالیاتی ادارے (آئی ایم ایف)کی منیجنگ ڈائریکٹرکرسٹین لوگارڈ سے ملاقات پر ردعمل ظاہر کرتے ہوئے کہا ہے کہ کوئی وزیر اعظم IMFسے نہیں ملتا، قوم مہنگائی کے ایک نئے طوفان کیلئے تیار رہے، درحقیقت حکومت آئی ایم ایف کی شرائط کا بوجھ عوام پر ڈالنے کا خفیہ وعدہ کر چکی ہے ، وزیر اعظم کی ملاقات صرف ڈرامہ ہے۔ موضع جسٹر میں صحافیوں سے سابق وفاقی وزیر داخلہ و مسلم لیگ ن کے سینئر رہنماء احسن اقبال نے کہا ہے کہ وزیر اعظم عالمی گداگر بن کر پوری دنیا سے بھیک مانگ رہے ہیں ۔انہوںنے کہا کہ گزشتہ 6ماہ میں معیشت کو زبوں حالی کی طرف دھکیلا گیا، وہ عمران خان جو کہتا تھا کہ خودکشی کر لوں گا مگر کسی سے پیسہ نہیں مانگوں گا ،کیا عمران خان اپنی وہ قسم بھول گئے ؟ سینئر رہنما مسلم لیگ ن خواجہ محمد آصف نے کہا ہے کہ عمران خان نے آئی ایم ایف کے پاس جانے پر خود کشی کرنے کا اعلان کیا تھالیکن پہلی دفعہ کوئی
وزیراعظم خود آئی ایم ایف سے بھیک مانگنے گیا، 6 ماہ میں یہ عوام کو کوئی سہولت فراہم نہیں کرسکے،6 ماہ کے دوران 1400 ارب کے نوٹ چھاپے گئے، حکمرانوں کی پالیسیوں کی وجہ سے خدشہ ہے کہ ہمارے دیرینہ دوست ممالک ناراض نہ ہوجائیں۔ ترجمان مسلم لیگ (ن) مریم اورنگزیب نے کہا ہے کہ حکومت آئی ایم ایف سے پیکج لینے سے پہلے ہی مہنگائی بم گراچکی ہے ، قوم حکومتی نااہلی کی وجہ سے مہنگائی کے ایک اورطوفان کا سامنا کرنے کی تیاری کرے۔انہوںنے کہا کہ جب حکومت پہلے ہی آئی ایم ایف کی شرائط پوری کرچکی ہے تو پھر آج ملاقات کا ڈرامہ کیوں کیا جارہا ہے۔ پہلی حکومت ہے جس نے چور دروازے سے آئی ایم ایف کی شرائط پر پیشگی عمل کیا، بقول وزیر خزانہ حکومت نے آئی ایم ایف جانے سے پہلے ہی شرائط مان لی ہیں۔مریم اورنگزیب نے کہاکہ حکومت آئی ایم ایف سے پیکج لینے سے پہلے ہی مہنگائی کا بم گراچکی ہے، روپے کی قدر میں 35 فیصد سے زائد کمی، بجلی، گیس کی قیمتوں میں ریکارڈ اضافہ کیا جاچکا ہے، آئی ایم ایف کے پیکج سے پہلے ہی حکومت ہر سبسڈی بشمول حج ختم کرچکی ہے، قوم کو مزید مہنگائی کی کون سی چکی میں پیسنے کی تیاری کی جارہی ہے۔ترجمان مسلم لیگ (ن)نے کہا کہ وزیراعظم کی آئی ایم ایف سے پاکستان میں ملاقات کیوں نہیں ہو سکتی، قوم کو بتایا جائے کہ اب کون سی مزید شرائط طے کی جارہی ہیں، پارلیمان اور قوم سے سچ کے وعدے کرنے والے تمام کام خفیہ کررہے ہیں، قوم حکومت کی نااہلی کی وجہ سے مہنگائی کے ایک اورطوفان کی تیاری کرے

لاہور(نیٹ نیوز/ایمرا نیوز) عالمی مالیاتی فنڈ (آئی ایم ایف) کا کہنا ہے کہ پاکستان نے معاشی ڈیٹا اکھٹا کرنے کے لیے آئی ایم ایف کے طریقہ کار کو اپنایا ہے، اس سے پاکستان میں معاشی ڈیٹا مزید شفاف ہوسکے گا۔آئی ایم ایف کا کہنا ہے کہ درست معاشی ڈیٹا سے پاکستان کو اقتصادی ترقی میں مدد ملے گی، یہ درست معاشی ڈیٹا لوگوں کو بہتر سہولتیں فراہم کر سکتا ہے۔عالمی مالیاتی فنڈ کا مزید کہنا ہے کہ آئی ایم ایف کے طریقہ کار کو اپنانا پاکستان کا اہم سنگ میل ہے، درست ڈیٹا سے پاکستان میں انسانی وسائل کی ترقی میں مدد ملے گی۔آئی ایم ایف کی جانب سے یہ بھی کہا گیا ہے کہ درست معاشی ڈیٹا سے اسٹیٹ بینک، وزارت خزانہ اور ادارہ شماریات کے درمیان رابطہ بہتر ہوگا۔

ممبئی(نیٹ نیوز/ایمرا نیوز) عالمی مالیاتی ادارے (IMF)نے گیتا گوپی ناتھ کو ادارے کی اگلی چیف اکانومسٹ مقرر کرنے کا اعلان کیا ہے۔ گیتا گوپی ناتھ 2018ء کے اختتام پر جب چیف اکانومسٹ کے طور پر اپنی نئی ذمہ داریاں سنبھالیں گی تو اس کے ساتھ ہی وہ آئی ایم ایف کے ریسرچ ڈپارٹمنٹ کی سربراہی کرنے والی اولین خاتون کا اعزاز بھی حاصل کرلیں گی۔ اس وقت گیتا گوپی ناتھ ہارورڈ بزنس اسکول میں انٹرنیشنل اسٹڈیز اینڈ اکنامکس کی پروفیسر کی ذمہ داریاں انجام دے رہی ہیں۔گیتا گوپی ناتھ کی ریسرچ میں میکرواکنامکس اور انٹرنیشنل فنانس بشمول شرحِ تبادلہ، تجارت، سرمایہ کا بہاؤ، پیداوار اور قرضہ جات شامل ہیں۔

کئی اہم پالیسی مسائل پر گیتا گوپی ناتھ، اپنے ادارے کے ساتھ اتفاق نہیں کرتیں، جیسے کرنسی کی لچکدار شرحِ تبادلہ کی پالیسی۔وہ سمجھتی ہیں کہ کسی بھی ملک کی کرنسی کی لچکدار شرحِ تبادلہ کے مقابلے میں یہ دیکھنا زیادہ اہمیت کا حامل ہے کہ ڈالر (امریکی) کے مقابلے میں اس کرنسی کی شرحِ تبادلہ کیا ہے۔2014ء میں ورلڈ اکنامک فورم کے لیے ایک تحریری مراسلے میں گیتا گوپی ناتھ نے آئی ایم ایف پر زور دیا تھا کہ وہ عالمی منڈیوں میں ہیجان کو ختم کرنے میں اپنا کردار ادا کرے۔ ’مداخلت ختم کرنےکیلئے بحران پھوٹ پڑنے کا انتظار کرنے کے بجائے آئی ایم ایف کو رہنمائی فراہم کرنی چاہیے کہ وہ عالمی مالیاتی منڈیوں میں ہیجان کو کس طرح ختم کرے گا‘۔ماہرین معاشیات کا ماننا ہے کہ گوپی ناتھ نے معاشیات کے جن مسائل پر ریسرچ کی ہےوہ روایتی سوچ کی نفی کرتی ہے اور اجتماعی سوچ کو مثبت انداز میں آگے بڑھاتی ہے۔ یہ دیکھنا ہوگا کہ ادارہ (آئی ایم ایف) مالیات، مارکیٹ کے تکنیکی اُتار چڑھاؤ اور حقیقی معیشت کے پھیلاؤ کے درمیان تعلق قائم کرنے، آنے والے معاشی اور مالیاتی رجحانات سے قبل از وقت خبردار کرنے کا نظام وضع کرنے، آئی ایم ایف پروگرامز کے تحت انفرادی ملکوں کی بیرونی اور مارکیٹ بحرانوں کے خلاف قوت مدافعت کو بہتر بنانے اور سرمایہ کے بہاؤ میں حد سے زیادہ اضافے یا انتہائی قلت کی صورت حال سے نمٹنے کے لیے پالیسی ترتیب دینے جیسے معاملات میں گوپی ناتھ کی رائے اور ریسرچ کو کس حد تک شامل کرتا ہے۔یہ سب اسی وقت ممکن ہوپائے گا، جب آئی ایم ایف میں بیٹھے اعلیٰ عہدیدار کھُلے ذہن، فکری پھرتی اور ایک عرصے سے قائم روایتی سوچ کا ازسرنو جائزہ لینے کے لیے تیار ہوں گے۔ایک ہونہار طالبہ یہ 1991ء کی بات ہے جب گیتا گوپی ناتھ یونیورسٹی آف دلی میں بی اے کی طالبہ تھیں اور بھارت کو مالیاتی اور کرنسی کے بحران کا سامنا تھا۔ یہی وہ وقت تھا، جب گیتا کی ملکی معاشی صورت حال میں دلچسپی بڑھنے لگی اور اس نے اکنامکس کے شعبے میں مزید تعلیم حاصل کرنے کا فیصلہ کیا۔ یہ فیصلہ گیتا گوپی ناتھ کے لیے اس وجہ سے بھی نسبتاً آسان تھا، کیونکہ انٹرنیشنل فنانس میں ان کی عمومی دلچسپی پہلے بھی موجود تھی۔اس کے بعد انھوں نے دلی اسکول آف اکنامکس کے ساتھ ساتھ یونیورسٹی آف واشنگٹن سے ایم اے کی ڈگریاں حاصل کیں، جس کے بعد انھوں نے پرنسٹن سے ڈاکٹریٹ کیا۔گیتا گوپی ناتھ کے انتخاب پر آئی ایم ایف کی منیجنگ ڈائریکٹر کرسٹینا لگارڈ کہتی ہیں، ’گیتا، بے داغ تعلیمی ساکھ،ثابت شدہ دانشورانہ و قائدانہ صلاحیتوں اور وسیع بین الاقوامی تجربہ کے ساتھ اس وقت دنیا میں موجود غیرمعمولی صلاحیتیں رکھنے والے ماہرِ معاشیات میں سے ایک ہیں۔ یہ ساری باتیں، انھیں تاریخ کے اس اہم موڑ پر ہمارے ریسرچ ڈپارٹمنٹ کی سربراہی کرنے کا اہل بناتی ہیں‘۔گیتا گوپی ناتھ کے بارے میں بروکنگز انسٹی ٹیوشن کے ایک اہلکار کہتے ہیں، ’گوپی ناتھ انتہائی باریک بینی سے کام کرتی ہیں، جس سے آئی ایم ایف کو اپنے رکن ملکوں خصوصاً ترقی پذیر ملکوں کو عالمگیریت کے پیچیدہ معاشی اور سماجی چیلنجزسے نمٹنے کیلئے رہنمائی فراہم کرنے میں مدد ملے گی‘۔ انھیں 2011ء میں ورلڈ اکنامک فورم نے ینگ گلوبل لیڈر بھی منتخب کیا تھا۔