Tag iran

تہران(ایمرا نیوز آن لائن)ایران بھر میں قدس فورس کے کمانڈر جنرل قاسم سلیمانی کی امریکی حملے میں ہلاکت پر سوگ منایا جارہا ہے جب کہ ایران کے سپریم کمانڈر اور صدر کے بعد اب پاسداران انقلاب کے ترجمان نے امریکا کو بدلہ لینے کی دھمکی دی ہے۔غیر ملکی خبر رساں ادارے کے مطابق جنرل قاسم سلیمانی کی ہلاکت پر ہزاروں افراد دارالحکومت تہران کی سڑکوں پر نکل آئے اور امریکا کے خلاف سخت نعرے بازی کی۔

ایران کے سپریم لیڈر خامنہ ای نے امریکی حملے کو وحشیانہ جرم قرار دیتے ہوئے جنرل سلیمانی کے قتل کا بدلہ لینے کا اعلان کیا ہے۔جب کہ ایرانی صدر حسن روحانی نے بھی اپنے بیان میں کہاکہ جنرل سلیمانی کے قتل نے امریکا کے خلاف کھڑا ہونے کے عظیم ایرانی قوم کے پختہ عزم کو دگنا کردیا ہے۔

ایرانی صدر نے کہا کہ امریکا کے اس وحشیانہ جرم کا انتقام لیا جائے گا۔ایرانی پاسداران انقلاب کے ترجمان نے بھی اپنے بیان میں امریکا کو سخت وارننگ دیتے ہوئے کہا ہےکہ امریکی حملے کے بعد طاقت کے ایک نئے باب کا آغاز ہوگا۔ترجمان کا کہنا تھا کہ امریکا کی اس وقتی خوشی کو بہت جلد سوگ میں بدل دیں گے۔

خیال رہے کہ عراق کے دارالحکومت بغداد میں ہونے والے امریکی حملے میں ایران کی القدس فورس کےکمانڈر قاسم سلیمانی جاں بحق ہوگئے ہیں۔قاسم سلیمانی کی ہلاکت کے بعد ایرانی سپریم لیڈر آیت اللہ خامنہ ای نے بریگیڈیئر جنرل اسماعیل قاآنی کو قدس فورس کا کمانڈر مقرر کردیا ہے۔

خرطوم (ایمرا نیوز آن لائن) سوڈان میں فوجی طیارہ گرکر تباہ ہوگیا جس میں سوار 18 افراد ہلاک ہوگئے۔ عرب خبر رساں ادارے کے مطابق جنوبی سوڈان میں 18 مسافروں کو لے کر جانے والا فوجی ٹرانسپورٹ طیارہ ایلجینیا سے اڑا جو اپنی پرواز کے 5 منٹ بعد ہی زمین پر آگرا۔

فوجی ترجمان کے مطابق حادثے کے نتیجے میں جہاز میں عملے کے 7 ممبران سمیت تمام 18 افراد ہلاک ہوگئے جن میں 3 جج اور 8 دیگر شہری شامل تھے جب کہ مرنے والوں میں 4 بچے بھی ہیں۔

میڈیا رپورٹ کے مطابق اقوام متحدہ کی ایجنسی کا کہنا ہےکہ حادثے میں عالمی پروگرام برائے خوراک کے سوڈان کے ایک ملازم اپنی اہلیہ اور 4 بچوں سے سمیت ہلاک ہوگئے۔

حادثے کی تحقیقات شروع کردی گئی ہیں اور ابتدائی طور پر حادثے کی وجوہات معلوم نہیں ہوسکی ہیں۔

کراچی(ایمرا نیوز آن لائن) پاکستان کے کوہ پیما اسد علی میمن نے 150 فٹ لمبا قومی پرچم دنیا کی دوسری بلند ترین چوٹی پر لہرانے کا عزم ظاہر کر دیا۔پاکستان کے کوہ پیما اسد علی میمن کا کہنا ہے کہ ملک کا نام روشن کرنے کے لیے 150 فٹ لمبا قومی پرچم دنیا کی دوسری بلند ترین چوٹی پر لہراؤں گا، قومی پرچم کیساتھ کشمیر کا جھنڈا بھی جڑا ہوا ہے۔

ان کا کہنا تھا کہ ارجنٹینا کا بلند ترین مقام اکنگوا 24 ہزار فٹ اونچا ہے، اسدعلی واحد پاکستانی ہوں گے جو یہ بلند ترین چوٹی سر بھی کریں گے، اسدعلی ارجنٹائن میں لہرانے سے پہلے پرچم مزارقائد لیکر پہنچ گئے۔لاڑکانہ سے تعلق رکھنے والے نوجوان کوہ پیما اسد علی میمن کے مطابق 4 جنوری کو اپنی منزل کے جانب روانگی کیلئے پر عزم ہوں، چوٹی سر کرنے میں 21 دن لگیں گے جبکہ ہوائیں چلنے کی صورت میں درجہ حرارت منفی 40 تک ہوسکتا ہے۔

ان کا کہنا تھا کہ مہم میں 10 لاکھ روپے کے مساوی اخراجات میں سندھ حکومت نے3 لاکھ روپے کی اعانت کی ہے۔یاد رہے کہ اسد علی میمن نے 23 اگست 2019 کو روس کے جنوب میں جارجیا کی سرحد کے قریب ایشیا اور یورپ کو ملانے والے پہاڑی سلسلے میں برف سے ڈھکی یورپ کی سب سے اونچی 6 ہزار 642 میٹر بلند چوٹی ماونٹ البرس سر کر کے پاکستان کا جھنڈا لہرایا تھا۔

لندن(ایمرا نیوز آن لائن) مسلم لیگ (ن) کے صدر اور قومی اسمبلی میں اپوزیشن رہنما شہباز شریف کا لندن میں صحافیوں سے سامنا ہوا تو انہوں نےکسی سوال کا جواب نہیں دیا اور وہ صحافیوں کے ہر سوال پر خاموش رہے اور چپ چاپ گاڑی میں بیٹھ کر روانہ ہوگئے۔

ذرائع کے مطابق شہباز شریف نے نواز شریف سے لندن میں ملاقات کی جو تقریباً ایک گھنٹے تک جاری رہی۔ملاقات کے بعد جب شہباز شریف سے صحافیوں نے سوالات کیے تو انہوں نے جواب دینے سے گریز کیا۔

ایک صحافی نے سوال کیا کہ آرمی ایکٹ پر تنقید ہو رہی ہے جس پر انہون نے جواب میں کہا کہ آپ بھی تنقید کریں اور گاڑی میں بیٹھ کر چلے گئے۔

لاہور(ایمرا نیوز آن لائن)معروف شیف، میزبان اور ماہر امور خانہ داری زبیدہ طارق کو ہم سے بچھڑے 2 برس بیت گئے لیکن ان سے زندگی گزارنے کا طریقہ سیکھنے والے آج بھی انہیں یاد کرتے ہیں۔زبیدہ آپا کے نام سے مشہور زبیدہ طارق 4 اپریل 1945 کو حیدرآباد دکن میں پیدا ہوئیں تھیں اور 1947 میں تقسیم ہند کے بعد ان کا خاندان پاکستان منتقل ہوگیا تھا۔زبیدہ طارق کی شہرت کی ایک وجہ اُن کے وہ ٹوٹکے بھی تھے جو وہ اپنے ٹی وی پروگرامز کے دوران ناظرین کو بتایا کرتی تھیں۔زبیدہ طارق جس خاندان سے تعلق رکھتی تھیں اس کا حصہ پاکستان کی مایہ ناز مصنفہ فاطمہ ثریا بجیا، منفرد لہجے کی شاعرہ زہرہ نگاہ اور ہر خاص و عام میں مقبول قلم کار، شاعر، مزاح نگار، مصور اور اداکار انور مقصود بھی ہیں۔زبیدہ طارق 4 جنوری 2018 کو حرکتِ قلب بند ہو جانے کی وجہ سے دنیائے فانی سے کوچ کر گئی تھیں۔آج ہم آپ کو زبیدہ آپا کے بتائے ہوئے 5 بہترین ٹوٹکے بتائیں گے۔
چکنی جلد
چکنی جلد ایک ایسا مسئلہ ہے جو بہت سے لوگوں کو درپیش ہوتا ہے لیکن زبیدہ آپا نے اس مسئلے کا گھریلو اور آسان ٹوٹکا بتایا تھا۔’’2 چمچ انڈے کی سفیدی میں ایک سے 2 قطرے لیمو کا رس اور زیتون کا تیل ملا کر چہرے کو صاف کرنے کے بعد اس ماسک کو 5-7 منٹ تک لگائیں، اس ماسک کو آپ مہینے میں ایک بار استعمال کرسکتے ہیں‘‘۔
خشک پاؤں
خاص طور پر سردیوں میں پاؤں خشک ہونا ایک عام سی بات ہے لیکن ماہر امور خانہ داری زبیدہ آپا نے اس مسئلے کا حل کچھ یوں بتایا تھا۔’’ایک پین میں آدھا کپ سرسوں کا تیل اور آدھا چمچ مکھی کا موم گرم کریں جب یہ پگھل جائے تو اسے اچھی طرح ملا کر ایک برتن میں رکھ لیں، رات میں سونے سے قبل اپنے پاؤں کو دھونے کے بعد اس کریم کو لگا کر موزے پہن لیں‘‘۔
سونے کے زیورات کی حفاظت و صفائی
سونے کے زیورات اگر روزانہ استعمال کیے جائیں تو یہ پھیکے پڑ جاتے ہیں،گھر پر سونے کے زیورات صاف کرنے کے لیے زبیدہ آپا کا بتایا ہوا یہ ٹوٹکا آزمائیں۔’’ایک چمچ ہلدی اور ایک چمچ ڈٹرجنٹ کو ایک کپ پانی میں گھول لیں، اس مرکب میں زیورات کو 10-15 منٹ کے لیے بھگو دیں۔ اس کے بعد دانت صاف کرنے کے برش سے انہیں آہستہ سے رگڑیں اور پانی سے دھو لیں‘‘۔
باورچی خانے کے کیبنٹس میں کیڑے مکوڑے اگر آپ کے باورچی خانے کے کیبنٹس کے اندر کیڑے مکوڑے آجائیں تو زبیدہ آپا کے اس موثر ٹوٹکے کو آزمائیں۔ ’’نیم کے پتوں کو خشک کر کے باورچی خانے کے کیبنٹس اور ایسی جگہوں پر رکھ دیں جہاں کیڑے مکوڑے آتے ہیں اور ہر 15 دن بعد ان پتوں کو پھینک کر نئے پتے رکھ دیجیے‘‘۔
روکھے بال
روکھے بالوں سے تقریباً ہر کوئی پریشان ہوتا ہے لیکن زبیدہ آپا نے اس مسئلے کا حل بھی ہمیں بتایا تھا۔’’زبیدہ آپا کے مطابق ہفتے میں 2 مرتبہ بالوں میں تیل لگانا ضروری ہے جب کہ ایک انڈے میں ایک چمچ زیتون، ناریل یا سرسوں کے تیل کو شامل کرکے اس میں ایک سے 2 چمچ دہی ملا کر مرکب بنالیں۔ آدھے گھنٹے تک اسے لگا رہنے دیں اور پھر بال شیمپو سے دھو لیں، ایسا مہینے میں ایک بار ضرور کریں‘‘۔

امریکہ(ایمرا نیوز آن لائن)عراق میں ایرانی جنرل قاسم سلیمانی کے امریکی حملے میں قتل کے بعد خطے میں کشیدگی کی صورتحال ہے اور جنگ کے خدشات کے پیشر نظر عالمی منڈی میں تیل کی قیمتوں میں اضافہ دیکھا جا رہا ہے۔

گزشتہ روز ایرانی پاسدارانِ انقلاب کی القدس فورس کے سربراہ میجر جنرل قاسم سلیمانی عراق میں امریکی راکٹ حملے میں جاں بحق ہوئے جس کے بعد پیدا ہونے والی کشیدگی سے نہ صرف عالمی مارکیٹ میں تیل کی قیمتوں میں اضافہ ہوا بلکہ ایشیا میں اسٹاک مارکیٹ میں بھی ملا جلا رجحان دیکھا گیا۔

خبر رساں ادارے رائٹرز کے مطابق لندن میں خام تیل کی قیمت 2 اعشاریہ 14 ڈالرز اضافے کے بعد 68.39 ڈالرز فی بیرل ہوگئی ہے۔ نیویارک مرسنٹائیل ایکسچینج میں الیکٹرانک ٹریڈنگ میں بینچ مارک یو ایس کروڈ 1 اعشاریہ 87 ڈالر اضافے کے ساتھ 63.05 ڈالر فی بیرل ہوگیا جو کُل 12 سینٹس کمی کے ساتھ 61.18 ڈالر پر بند ہوا۔

دریں اثناء یو ایس ویسٹ ٹیکساس انٹرمیڈیٹ (ڈبیو ٹی آئی) میں خام تیل 1 اعشاریہ 68 ڈالر یا 2 اعشاریہ 8 فیصد اضافے کے ساتھ 62.86 ڈالر فی بیرل تک ہو گیا جو یکم مئی کے بعد سب سے زیادہ اضافہ ہے۔

ایران(ایمرا نیوز آن لائن)ایران کی القدس فورس کے سربراہ جنرل قاسم سلیمانی پر راکٹ حملے کے 24 گھنٹوں کے اندر امریکا نے عراق میں ایک اور فضائی کارروائی میں 6 افراد کو ہلاک کر دیا۔غیر ملکی خبر ایجنسی کے مطابق بغداد کے شمال میں کیے گئے حملے میں الحشدالشعبی کی دو گاڑیوں کو نشانہ بنایا گیا۔میڈیا رپورٹس کے مطابق حملے میں دونوں گاڑیاں مکمل طور پر تباہ ہو گئیں، حملے میں 6 افراد ہلاک اور 3 شدید زخمی بھی ہوئے۔عراقی حکام نے شبہ ظاہر کیا کہ حملے میں داعش کے خلاف سرگرم تنظیم الحشدا لشعبي کے کمانڈر کو نشانہ بنایا گیا۔

دوسری جانب الحشد الشعبی کے حکام نے حملے کی تصدیق کرتے ہوئے کہا کہ فضائی حملے میں تنظیم کے طبی عملےکو نشانہ بنایا گیا، پیرا ملٹری فورس کے کمانڈر کو نشانہ بنانے کی خبریں درست نہیں ہیں۔خیال رہے کہ گزشتہ روز بھی امریکا نے بغداد ائیرپورٹ پر راکٹ حملہ کر کے ایران کی القدس فورس کے جنرل قاسم سلیمانی کو ہلاک کر دیا تھا۔

ایران کے مذہبی پیشوا آیت اللہ خامنہ ای، صدر حسن روحانی اور وزیر خارجہ جواد ظریف نے امریکی حملے کئی شدید مذمت کرتے ہوئے اسے کھلی جارحیت قرار دیا تھا اور امریکا نے بدلہ لینے کا اعلان بھی کیا تھا۔

تہران(ایمرا نیوز آن لائن) ایرانی صدر حسن روحانی نے دعویٰ کیا ہے کہ ایران نے 53 ارب بیرل خام تیل کے ذخائر دریافت کیے ہیں۔عرب خبر رساں ادارے کے مطابق ایران کے صدر حسن روحانی نے سرکاری ٹی وی پر تیل کے ذخائر برآمد ہونے کا اعلان کرتے ہوئے کہا کہ تیل کے نئے ذخائر ملک کے 150 ارب بیرل ذخائر کو مزید وسعت دے سکتے ہیں۔ایرانی صدر نے بتایا کہ یہ آئل فیلڈ ملک کے جنوبی صوبے خزستان میں واقع ہے۔

اس موقع حسن روحانی نے امریکا کو للکارتے ہوئے کہا کہ میں وائٹ ہاؤس کو بتانا چاہتاہوں کہ ان دنوں میں جب امریکا نے ایرانی تیل کی فروخت پر پابندی عائد کی تو ہمارے ملک کے انجینئرز اور مزدور 53 ارب بیرل تیل کی تلاش کیلئے تیار تھے۔عرب میڈیا کا کہناہےکہ ایران خام تیل رکھنے والا اس وقت دنیا کا چوتھا اور قدرتی گیس رکھنے والا دوسرا بڑا ملک ہے جب کہ برآمد ہونے والی نئی آئل فیلڈ آہواز کی 65 ارب بیرل کی آئل فیلڈ کے بعد ایران کی دوسری بڑی آئل فیلڈ بن سکتی ہے۔

عرب میڈیا کے مطابق نئی آئل فیلڈ 2400 اسکوائر کلو میٹر ہے اور اس کی گہرائی 80 میٹر ہے۔عرب میڈیا کے مطابق ایران کے نئے تیل کے ذخائر کے اعلان پر عالمی ماہر کا کہنا ہےکہ ایران نے اپنے اعلان میں یہ نہیں بتایا کہ ان ذخائر سے تیل کی کتنی پیداوار کی جاسکتی ہے، یہ اعلان سیاسی سطح پر کیا گیا ہے اور اس حوالے سے ایران نے کوئی تکنیکی تفصیلات جاری نہیں کی ہیں۔

امریکہ(ایمرا نیوز آن لائن)امریکا نے پاکستان اور بھارت کے درمیان کرتارپور راہداری کا افتتاح خوش آئند قرار دیا ہے۔گزشتہ روز وزیراعظم عمران خان نے سکھوں کے مذہبی پیشوا بابا گرونانک کے 550 ویں جنم دن کے موقع پر کرتارپور راہداری کا افتتاح کیا جس میں بھارتی اہم شخصیات سمیت دنیا بھر سے آئے سکھ یاتریوں نے شرکت کی۔

وزیراعظم عمران خان نے کرتارپور راہداری کا افتتاح کردیا کرتارپور راہداری کا افتتاح کرنے پر وزیراعظم عمران خان کو دنیا بھر سے مبارک باد موصول ہونے کا سلسلہ جاری ہے اور ان کے اس عمل کو امریکا نے بھی خوب سراہا ہے۔

امریکی محکمہ خارجہ کی ترجمان مورگن اورٹاگس نے ٹوئٹر پر ویڈیو پیغام جاری کرتے ہوئے کہا کہ ’امریکی محکمہ خارجہ پاکستان اور بھارت کو کرتارپور راہداری کے افتتاح پر مبارک باد پیش کرتا ہے، یہ راہداری مذہبی آزادی کی جانب ایک قدم ہے‘۔

ترجمان امریکی محکمہ خارجہ نے نیک خواہشات کا اظہار کرتے ہوئے مزید کہا کہ ’یہ متاثر کن پروجیکٹ حساس بین الاقوامی سرحد کے اطراف تین ایکڑ رقبے پر پھیلے مضافاتی علاقے کو یکسر بدل دے گا۔علاوہ ازیں مورگن آرٹاگس نے پاکستان کو بابا گرونانک کے 550 ویں جنم دن کے موقع پر کرتارپور راہداری کا افتتاح کرنے پر خوب داد بھی دی۔

خیال رہے کہ حکومتِ پاکستان نے 11 ماہ کی ریکارڈ مدت میں کرتارپور راہداری مکمل کی اورگوردوارہ دربار صاحب کودنیا کا سب سے بڑا گوردوارہ بنادیا۔گزشتہ روز 9 نومبر کو وزیراعظم عمران خان نے کرتارپور راہداری کا افتتاح کرکے تاریخ رقم کی۔سکھ یاتری اسے بابا گورونانک کے 550 ویں جنم دن پر حکومتِ پاکستان کی طرف سے تحفہ قرار دے رہے ہیں۔

کربلا(ایمرا نیوز آن لائن) سیکیورٹی فورسز کی جانب سے احتجاجی مظاہرین پر فائرنگ کے نتیجے میں 14 افراد جاں بحق ہوگئے۔غیر ملکی خبر رساں ادارے رائٹرز کےمطابق عراق کے شہر کربلا میں رات گئے احتجاج کرنے والے مظاہرین پر فورسز نے براہِ راست فائرنگ کی جس کے نتیجے میں کم از کم 14 افراد جاں بحق اور 800 سے زائد زخمی ہوئے جب کہ جنوبی شہری نصیریا میں بھی احتجاج کے دوران زخمی ہونے والے تین مظاہرین دم توڑ گئے۔

عراقی وزیراعظم عادل عبدالمہدی اور ان کی اتحادی سیاسی جماعتوں پر مظاہرین کی جانب سے کرپشن کا الزام عائد کیا گیا جس کے باعث مظاہرین رواں ماہ کے آغاز سے ہی احتجاج کررہے ہیں جب کہ احتجاج کے دوران پیش آنے والے پرتشدد واقعات میں اب تک مرنے والوں کی کم از کم تعداد 250 ہوگئی ہے۔اس حوالے سے ایک حکومتی کمیٹی اکتوبر کے پہلے ہفتے میں ہونے والے احتجاج کی تحقیقات کررہی ہے جس دوران سیکیورٹی فورسز کی براہ راست فائرنگ سے 149 عام شہری جاں بحق ہوئے۔

اس حوالے سے رپورٹ میں بتایا گیا ہےکہ 70 فیصد سے زائد ہلاکتیں سر اور سینے میں گولیاں لگنے سے ہوئیں جس کا ذمہ دار سینئر کمانڈرز کو ٹھہرایا گیا۔رپورٹ میں عراقی وزیراعظم اور دیگر اعلیٰ حکام پر اس کا کوئی الزام عائد نہیں کیا گیا اور بتایا گیا ہےکہ ان کی طرف سے فائرنگ کے احکامات نہیں تھے۔میڈیا رپورٹس کے مطابق سیکیورٹی فورسز نے پیر کے روز ہونے والے احتجاج میں اسکول اور یونیورسٹی کے طلبہ پر آنسو گیس بھی فائر کیے جب کہ فوسز نے ضلع بغداد میں اسکول کے طلبہ پر لاٹھی چارج بھی کیا۔